lakbima.lk

එල්ලේ සම්මේලනයේ සභාපති සම්මේලන ව්‍යවස්ථාවන්ට පයින් ගසා තමන්ගේ දේශපාලන අරමුණු සඳහා සම්මේලනය අවභාවිතා කරනවා. ක්‍රීඩාව එල්ලේ වුණත් සම්මේලන සභාපතිවරයාට එල්ලයක් නොමැති විම මත එල්ලේ ක්‍රීඩාව ලොකු අනතුරකට මුහුණපා තිබෙනවා.

මෙවර පැවැත්වෙන ජාතික එල්ලේ තරඟාවලියේ සිදුවන අකටයුතුකම් හෙලිකිරීමට සහ ජාතික එල්ලේ සම්මේලනයේ සභාපතිවරයාගේ පක්ෂග්‍රාහී ක්‍රියා කළාපයට විරෝධය පල කිරීම සඳහා පැවති මාධ්‍ය හමුවක දී එසේ ප්‍රකාශ කරන ලද්දේ සම්මේලන උපසභාපති ජූඩ් පෙරේරා මහතාය.

එහිදී වැඩි දුරටත් අදහස් දැක්වූ උපසභාපතිවරයා මෙසේ ද කීය.

 ‘‘ක්‍රීඩා ඇමති ෆයිසර් මුස්තාප මහතා අපිට කිව්වා තරගාවලිය පවත්වන්න සහයෝගය දෙන්නම් කියලා. අවසන් තරගය සුගතදාස ක්‍රීඩාංගණයේ දිවා රාත්‍රී තරගයක් ලෙස පවත්වන්නත් අවශ්‍ය පහසුකම් දෙන්නම් කියලා. තරගාවලිය සඳහා ඇස්තමෙන්තු කළ මුදල ලක්ෂ 84ක්. ඒකෙන් හතරෙන් තුනක්ම දෙන්න ෆයිසර් මුස්තාපා අමාත්‍යවරයා පොරොන්දු වුණා. ඒ වගේම කොළඹ එල්ලේ ක්‍රීඩාංගණ තුනක් හොඳින් එල්ලේ ක්‍රීඩා කරන්න පුලුවන් තත්ත්වයට නවීකරණය කරල දෙන්නම් කියලාත් ක්‍රීඩා අමාත්‍යවරයා අපට පොරොන්දුවණා. එහෙම අවස්ථාවක තමයි සභාපතිවරයා මාධ්‍යයට කියන්නේ ක්‍රීඩා ඇමතිවරයා එල්ලේ ක්‍රීඩාවට සහය දෙන්නේ නැහැ කියලා. ඒක සම්පූර්ණයෙන්ම වැරදි ප්‍රකාශයක්‘‘

එහිදී අදහස් දැක්වූ ජා-ඇල සික්ස්ටීන් බ්‍රදර්ස් ක්‍රීඩා සමාජයේ ලේකම් ධම්මික ප්‍රසන්න සිල්වා මහතා මෙසේ කීය.

 ‘‘අපි ශුරතාවලියේ දෙවැනි‍ වටයේ තරගයකින් ජයග්‍රහණය කරලා සිටින විට සභාපති තුමා කිව්වා නැවතත් දෙවැනි ඉනිමේ තරඟයක් ලෙස එම තරගයම පවත්වන්න කියල. අපි ඇහුවා ඇයි එහෙම කියන්නේ කියල. ජාතික එල්ලේ සම්මේලනයේ තීරණය තමයි අවසන් තීරණය. ඔවුන් අපිට ජයග්‍රහණය දීලයි තිබුණේ. එහෙම තියෙද්දි ඇයි මෙහෙම කියන්නේ කියල තේරුම් ගන්න බැහැ. ඒ තරඟය සම්මන්ධයෙන් ගැටළු තිබුණා නම් ඒක ඉදිරිපත් කරන්න ඕන එල්ලේ සංගමයට පැය භාගයක් ඇතුලත රුපියල් 1000ක ඇප මුදලක් සමග. එහෙම තමයි එල්ලේ සම්මේලනයේ විනය නීති මාලාව අනුව තියෙන්නේ. නමුත් එහෙම දෙයක් වුණේ නැහැ. දවස්දෙකකකට පස්සේ තමයි මේ ආකාරයට නැවත තරඟ කරන්න කියලා සභාපතිවරයා කියන්නේ. නමුත් තරඟ කමිටුව කියනව එහෙම නැවතතරගයක් පවත්වන්න චෝදනාවක් අපිට නැහැ කියලා.

අපිට පේන්නේ සභාපතිතුමාගේ උවමනාව මත තමයි මෙහෙම යෝජනාවක් එන්නේ. අපි ක්‍රීඩාං අමාත්‍යාංශයේ ලේකම්තුමාගෙන් මේ සම්බන්ධව නිසි පියවර ගන්නයි කියල ඉල්ලා සිටිනවා. එල්ලේ සංගමයට සම්බන්ධ ක්‍රීඩා සමාජ 178ක් ඉන්නවා. දිගින් දිගටම මේ ආකාරයට සිදුවුනොත් ඒ සියලුම කණ්ඩායම් එකතු කරලා අපි මාධ්‍ය හමුවක් කැඳවලා සභාපතිවරයාගේ මේ අත්තනෝමතික ක්‍රියාවන්ට ප්‍රසිද්ධියේ විරුද්ධව කටයුතු කරන්න බලාපොරොත්තු වෙනවා‘‘

එල්ලේ සම්මේලනයේ ජාතික සංවිධායක චාමර සේරසිංහ මහතා මෙහිදී අදහස් දක්වමින් මෙසේ කීය.

‘‘එල්ලේ ක්‍රීඩාවෙන් සමුගන්න තරමටම මම කලකිරිල ඉන්නේ සභාපතිවරයාගේ ක්‍රියාකලාපය නිසා. පසුගිය කාලයේදී ඇතැම් ක්‍රීඩා සමාජවලට වාසිදායක වෙන ආකාරයට එතුමා කටයුතු කරන්න කියලා මට කිව්වා. විශේෂයෙන්ම තොටළඟ අරුණ සහ වැලිවේරිය කාන්ති කණ්ඩායම් අතර තරඟය කාන්ති කණ්ඩායමට වාසිදායක ක්‍රීඩාංගණයක පවත්වන්න කියලා සභාපතිවරයා මට කිව්වා. මම ඊට එකඟ වුණේ නැහැ. ඒ අවස්ථාවේදී කිව්වා සභාපති ලෙස එතුමා කියන දේට මම එකඟ වෙන්න ඕන කියල. මම කිව්වා හරි දෙයකට නම් මම එකඟ වෙන්නම් කියලා. ඊට පස්සේ සභාපතිතුමා කිව්වා එයාගේ තීන්දුවලට එකඟවෙන්න බැරිනම් සම්මේලනයෙන් ඉවත්වෙන්න කියලා. මීට කලින් සම්මේලනයේ හිටපු ලේකම් වරයාටත් එහෙම පරුෂ වචනයෙන් බැනලා එලෙව්වා. දැන් එල්ලේ සංගමය ලේකම් වරයෙක් නැතුවයි කටයුතු කරන්නේ. දැනට මේ විධියට නිලධාරීන් 13 දෙනෙක් ඉවත් වෙලා තියෙනවා.

ඒ වගේම ජාතික එල්ලේ ශූරතාවලිය දැන් පවත්වන්නේ නැතුව එතුමාගේ මැතිවරණ ප්‍රචාරක කාලයේදී පවත්වමු කියල යෝජනා කළා මම ඒකට එකඟ වුණේ නැහැ. මම කිව්වා දැන් කණ්ඩායම් ඔක්කොම තරගාවලියට සූදානම් වෙලා බලාගෙන ඉන්නේ, ඒ නිසා තරගාවලිය ආරම්භ කරලා අපි අවසාන කණ්ඩායම් 4 දක්වා තරගාවලිය ඉදිරියට ගෙන එමු කියලා. ඒකටත් එතුමා මට දෝෂාරෝපනය කළා. දැන් මටත් ඉහළින් තරග කමිටුව තියාගෙන මට දන්වන්නෙවත් නැතුව කමිටු රැස්වීම් පවත්වනවා.

පසුගිය සම්මේලනය එකතුකරල තිබුණ රැපියල් ලක්ෂ පහක මුදල තමයි දැන් වියදම් කරන්නේ. එල්ලේ විනිසුරුවරුන්ට තරගයක් සඳහා ගෙවන්න ඕන මුදලවත් හරියට ගෙවන්නේ නැහැ. එල්ලෙ ක්‍රීඩකයන් සඳහා සකස්කරන්න ඕන හැඳුනුම්පත සකස් කරන්නත් නියමිත ටෙන්ඩර් පටිපාටියට නෙමෙයි ඔහු කටයුතු කෙරුවේ. ඒක තමන්ගේ මිතුරෙකුට දුන්නා. සභාපතිවරයාගේ යාළු මිත්‍රකමට ඒ යාළුවා පවත්වාගෙන යන කණ්ඩායමට උදව් කරන්න ඕන නිසා. ඔවුන් කලින් තරගය පරාජය වෙලා තරගාවලියෙන් ඉවත්වෙලා තිබියදීත් නැවත ඔවුන්ට දළුපොත සමනල කණ්ඩායම සමග තරගයක් දීල තියෙනවා. ඒක සමනල කණ්ඩායමට කරන විශාල අසාධාරණයක්‘‘

මෙම මාධ්‍ය හමුව අවසානයේදී ඔවුන් ප්‍රකාශකර සිටියේ තම දේශපාලන අරමුණු පසෙකලා එල්ලේ සම්මේලනයේ කටයුතු නැවතත් නිසියාකාරව සහ විධිමත්ව කිරීමට සභාපතිවරයා සූදානම් වන්නේ නම් පමණක් තමන් සියලු දෙනාම ඔහුට සහය දැක්වීමට සූදානම් බවයි. එසේ නොකළ හොත් යුක්තිය සහ සාධාරනත්වය වෙනුවෙන් තම සටන ඉදිරියට ගෙන යන බවද මෙම මාධ්‍ය හමුවේදී අවධාරණය කෙරිණ.

 

1956 වසරේ සිට ප්‍රංශ පාපන්දු සම්මේලනය මඟින් පිරිනැමෙන 'බ්ලොන් ඩි ඕර්' සම්මානය ලෝකයේ ඉහළතම හා පැරණිතම පා පන්දු සම්මානයකි.

මෙවර එම සම්මානය ක්‍රොඒෂියානු සුපිරි පා පන්දු ක්‍රීඩක ලුකා මොඩ්රික් දිනා ගැනීමට සමත් විය. ඔහු වත්මන් ක්‍රොඒෂියානු පා පන්දු කණ්ඩායම් නායකයා ය.  

මෙම ජයග්‍රහණයේ  විශේෂත්වය වන්නේ මෙම සම්මානය පිට පිට දිනා ගනු ලැබුවේ ක්‍රිස්ටියානෝ රොනාල්ඩෝ හා ලයනල් මෙසී විසින් වීමයි.  ඔවුන් දෙදෙනා මේ වන විට පස් වතාව බැගින් බ්ලොන් ඩී ඕර් සම්මානය දිනා ගෙන ඇත.

කෙසේවෙතත් වසර 10කට පසු වෙනත් රටකට මෙම සම්මානය ලැබුණේ ප්‍රථම වතාවට ය. එමෙන්ම ක්‍රොඒෂියාවට බ්තෑන්ඩි ඕර් සම්මානය ලැබී ඇත්තේ ද ප්‍රථම වතාවට වීම සුවිශේෂී ය.

 

උත්පලා ප්‍රබුද්ධිකා

ජාතික මල්ලවපොර සංගමය විසින් සංවිධානය කරනු ලැබූ ජාතික මල්ලවපොර තරඟාවලිය පසුගිය දෙසැම්බර් 01 වන දින සිට 04 වන දින දක්වා මීගමුව, කඩොල් කැලේ ජෙයරාජ් ප්‍රනාන්දුපුල්ලේ ගෘහස්ථ ක්‍රිඩාංගණයේදී පැවති අතර, එහිදී සුවිශේෂි දක්‍ෂතා දක්වමින් 2018 වර්ෂයේ ජාතික මල්ලවපොර ශූරතාවය දිනා ගැනීමට නාවික හමුදා කණ්ඩායම සමත් විය. ඒ අනුව අඛණ්ඩව 18 වන වරටත් එම ශූරතාවය දිනාගත් කණ්ඩායම ලෙස නාවික හමුදා මල්ලවපොර කණ්ඩායම ඉතිහාසයට එක්විය.

යුද හමුදා, ගුවන් හමුදා සහ පොලිස් ඇතුළුව දිවයිනේ ක්‍රීඩා සමාජ රැසක් නියෝජනය කරමින් මල්ලවපොර කණ්ඩායම් විශාල සංඛ්‍යාවක් මෙම තරඟාවලිය සඳහා සහභාගී වූ අතර, එම කණ්ඩායම් සියල්ල අභිබවමින් රන් පදක්කම් 4 ක්, රිදී පදක්කම් 3 ක් සහ ලෝකඩ පදක්කම් 5 ක් සමඟින් තරඟාවලියේ සමස්ථ ජයග්‍රහණය ලබා ගැනීමට ඔවුන්ට හැකියාව ලැබුණි.

ත්‍යාග ප්‍රධාන උත්සවයේ ප්‍රධාන ආරාධිත අමුත්තා වශයෙන් පාර්ලිමේන්තු මන්ත්‍රි නාමල් රාජපක්ෂ මැතිතුමන් සහභාගී විය. තවද, මෙම අවස්ථාව සඳහා නාවික හමුදා අධ්‍යක්‍ෂ ක්‍රීඩා, කොමදෝරු ජයන්ත ගමගේ මහතා, ජාතික මල්ලවපොර සංගමයේ සාමාජිකයින් ඇතුළු ක්‍රීඩක ක්‍රීඩිකාවන් රැසක් සහභාගීවි සිටියහ.



කළුතර බ්ලූස්ටාර් ක්‍රීඩා සමාජය හා කොළඹ ක්‍රීඩා සමාජය  අතර පැවැති පාපන්දු තරඟය අතරතුර විනිසුරු මොහොමඩ් අශාඩ් හට ප්‍රේක්ෂකයින් විසින් පහර දීමත් සමඟ  තරගය අතහැර දැමීමට සිදු විය. ඒ වන විට ගෝල 1-1 ලෙස කණ්ඩායම් දෙකම සම ලකුණු ලබා තිබුණි. තරගය කළුතර වර්නන් ප්‍රනාන්දු ක්‍රීඩාංගණයේ දී පැවැත්විණි.

ආර්ජන්ටිනාවේ බුව‍නෝර්ස් අයර්ස්හි සුප්‍රකට පාපන්දු තරඟාවලියක් වූ කොපා ලිබටේඩර්ස් තරඟාවලියේ පූර්ව තරඟය අවසන් වූයේ ප්‍රධාන කණ්ඩායම් ද්විත්වයක් වූ ‘බොකා ජූනියර්ස්’ හා ‘රිවර් ප්ලේට්’ කණ්ඩායම්හි රසිකයන් විසින් ඇති කළ  අමානුෂික ප්‍රහාරයකිනි. 

ඒ අනුව ‘දකුණු ඇමරිකානු පාපන්දු සංඟමය’ මඟින් දෙපාර්ශවයේ අවසන් තරඟය ආර්ජන්ටිනාවෙන් පිටත පවත්වන බවට ප්‍රකාශ කර ඇත.

ඒ අනුව දෙපාර්ශවය අතර අවසන් තරඟය ස්පාඤ්ඤ‍යේ මැඩ්‍රිඩ් නුවර දෙසැම්බර්  9 වැනිදා පැවැත්වීමට සියලුම කටයුතු සම්පාදනය කරමින් පවතියි. පාපන්දු සංඟමය මෙම තීරණය ගෙන ඇත්තේ රසිකයින්ගේත් ක්‍රීඩකයින්ගේත් දෙපාර්ශවයේම ආරක්ෂාව තර කිරීම සඳහා බැව් වැඩිදුරටත් ප්‍රකාශ කර ඇත.

ඒ 'රිවර් ප්ලේට් රසිකයන්' විසින් 'බොකා ජූනියර්ස් පා පන්දු කණ්ඩායම' ගමන් ගත් බස් රථයකට ‍දැඩි හානි පමුණුවා එහි සිටි ක්‍රීඩකයින්  කිහිපදනෙකුට ප්‍රහාර එල්ල කිරීමත් සමඟ ජගත්  පා පන්දු ලොව අවධානය ආර්ජන්ටිනාවට යොමු විය. මෙලෙස තුවාල වූ ක්‍රීඩකයින් අතර බොකා ජූනියර්ස් හි කණ්ඩායම් නායකයා ද මැදි පන්දු රකින්නා ද සිටියි.

එමෙන් ම මෙම පාපන්දු කණ්ඩායම් අතර වසර 60 කට පසු අවසන් තරඟයක් පැවතෙන ප්‍රථම අවස්ථාව ද මෙයයි. මේ වන විට රිවර් ප්ලේට් කණ්ඩායම වෙත ඇමරිකන් ඩොලර් 400 000ක දඩයක් පණවා ඇත. .

උත්පලා ප්‍රබුද්ධිකා

 

ඩයලොග් අන්තර් ක්‍රීඩා සමාජ ලීග් රග්බි තරගාවලියේ තෙවැනි සති අන්තය වන විට අපරාජිතව ලකුණු සටහනේ පෙරමුණ ගැනීමට මහනුවර ක්‍රීඩා සමාජය සමත් වී සිටියි.  මහනුවර, සී.ආර්. සහ හැව්ලොක්ස් තරග 3 බැගින් ජයගෙන අපරාජිතව සිටින නමුත් ප්‍රසාද ලකුණු අනුව මහනුවර පෙරමුණට පැමිණ තිබේ.

මහනුවර ප්‍රසාද ලකුණු 3ක්ද සහිතව ලකුණු 18ක් ලබා සිටින අතර, සී.ආර්. සහ හැව්ලොක්ස් එක් ප්‍රසාද ලකුණ බැගින් ලබා ලකුණු 16ක් ලබා සිටියි.  පසුගිය සති අන්තයේ පැවැති මහනුවර සහ යුද හමුදාව අතර තරගයෙන් ලකුණු 38-10ක පහසු ජයක් වාර්තා කිරීමට මහනුවර සමත් විය.

නාවික හමුදාවට එරෙහිව තියුණු සටනකින් පසු අවසන් මොහොතේ ලකුණු 22-18ක ජයක් වාර්තා කිරීමට හැව්ලොක්ස් සමත් විය.  සී.ආර්. සහ ‍පොලීසිය අතර තරගයෙන් ලකුණු 38-17ක පහසු ජයක් වාර්තා කිරීමට සී.ආර්. ට හැකිවිය.  මේ අතර මෙම තරගාවලියේ පළමු ජයග්‍රහණය වාර්තා කරමින් ගුවන් හමුදාවට එරෙහිව ලකුණු 26-18ක ජයක් ලැබිමට සී.එච්. සමත් විය.

මේ අතර මෙම සති අන්තයේදී අපරාජිත මහනුවර සහ සී.ආර්. අතර තරගය නිත්තවෙලදී පැවැත්වේ.  ‍පොලීසිය සහ හැව්ලොක්ස් අතර තරගය සිකුරාදා පැවැත්වෙන අතර, නාවික සහ ගුවන් හමුදා තරගය රත්මලානේදීද, යුද හමුදාව සහ සී.එච්. අතර තරගය සී.එච්. පිටියේදීද පැවැත්වේ.

මංගල ධර්මප්‍රේම

Page 2 of 5

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.