lakbima.lk



කළුතර බ්ලූස්ටාර් ක්‍රීඩා සමාජය හා කොළඹ ක්‍රීඩා සමාජය  අතර පැවැති පාපන්දු තරඟය අතරතුර විනිසුරු මොහොමඩ් අශාඩ් හට ප්‍රේක්ෂකයින් විසින් පහර දීමත් සමඟ  තරගය අතහැර දැමීමට සිදු විය. ඒ වන විට ගෝල 1-1 ලෙස කණ්ඩායම් දෙකම සම ලකුණු ලබා තිබුණි. තරගය කළුතර වර්නන් ප්‍රනාන්දු ක්‍රීඩාංගණයේ දී පැවැත්විණි.

ආර්ජන්ටිනාවේ බුව‍නෝර්ස් අයර්ස්හි සුප්‍රකට පාපන්දු තරඟාවලියක් වූ කොපා ලිබටේඩර්ස් තරඟාවලියේ පූර්ව තරඟය අවසන් වූයේ ප්‍රධාන කණ්ඩායම් ද්විත්වයක් වූ ‘බොකා ජූනියර්ස්’ හා ‘රිවර් ප්ලේට්’ කණ්ඩායම්හි රසිකයන් විසින් ඇති කළ  අමානුෂික ප්‍රහාරයකිනි. 

ඒ අනුව ‘දකුණු ඇමරිකානු පාපන්දු සංඟමය’ මඟින් දෙපාර්ශවයේ අවසන් තරඟය ආර්ජන්ටිනාවෙන් පිටත පවත්වන බවට ප්‍රකාශ කර ඇත.

ඒ අනුව දෙපාර්ශවය අතර අවසන් තරඟය ස්පාඤ්ඤ‍යේ මැඩ්‍රිඩ් නුවර දෙසැම්බර්  9 වැනිදා පැවැත්වීමට සියලුම කටයුතු සම්පාදනය කරමින් පවතියි. පාපන්දු සංඟමය මෙම තීරණය ගෙන ඇත්තේ රසිකයින්ගේත් ක්‍රීඩකයින්ගේත් දෙපාර්ශවයේම ආරක්ෂාව තර කිරීම සඳහා බැව් වැඩිදුරටත් ප්‍රකාශ කර ඇත.

ඒ 'රිවර් ප්ලේට් රසිකයන්' විසින් 'බොකා ජූනියර්ස් පා පන්දු කණ්ඩායම' ගමන් ගත් බස් රථයකට ‍දැඩි හානි පමුණුවා එහි සිටි ක්‍රීඩකයින්  කිහිපදනෙකුට ප්‍රහාර එල්ල කිරීමත් සමඟ ජගත්  පා පන්දු ලොව අවධානය ආර්ජන්ටිනාවට යොමු විය. මෙලෙස තුවාල වූ ක්‍රීඩකයින් අතර බොකා ජූනියර්ස් හි කණ්ඩායම් නායකයා ද මැදි පන්දු රකින්නා ද සිටියි.

එමෙන් ම මෙම පාපන්දු කණ්ඩායම් අතර වසර 60 කට පසු අවසන් තරඟයක් පැවතෙන ප්‍රථම අවස්ථාව ද මෙයයි. මේ වන විට රිවර් ප්ලේට් කණ්ඩායම වෙත ඇමරිකන් ඩොලර් 400 000ක දඩයක් පණවා ඇත. .

උත්පලා ප්‍රබුද්ධිකා

 

ඩයලොග් අන්තර් ක්‍රීඩා සමාජ ලීග් රග්බි තරගාවලියේ තෙවැනි සති අන්තය වන විට අපරාජිතව ලකුණු සටහනේ පෙරමුණ ගැනීමට මහනුවර ක්‍රීඩා සමාජය සමත් වී සිටියි.  මහනුවර, සී.ආර්. සහ හැව්ලොක්ස් තරග 3 බැගින් ජයගෙන අපරාජිතව සිටින නමුත් ප්‍රසාද ලකුණු අනුව මහනුවර පෙරමුණට පැමිණ තිබේ.

මහනුවර ප්‍රසාද ලකුණු 3ක්ද සහිතව ලකුණු 18ක් ලබා සිටින අතර, සී.ආර්. සහ හැව්ලොක්ස් එක් ප්‍රසාද ලකුණ බැගින් ලබා ලකුණු 16ක් ලබා සිටියි.  පසුගිය සති අන්තයේ පැවැති මහනුවර සහ යුද හමුදාව අතර තරගයෙන් ලකුණු 38-10ක පහසු ජයක් වාර්තා කිරීමට මහනුවර සමත් විය.

නාවික හමුදාවට එරෙහිව තියුණු සටනකින් පසු අවසන් මොහොතේ ලකුණු 22-18ක ජයක් වාර්තා කිරීමට හැව්ලොක්ස් සමත් විය.  සී.ආර්. සහ ‍පොලීසිය අතර තරගයෙන් ලකුණු 38-17ක පහසු ජයක් වාර්තා කිරීමට සී.ආර්. ට හැකිවිය.  මේ අතර මෙම තරගාවලියේ පළමු ජයග්‍රහණය වාර්තා කරමින් ගුවන් හමුදාවට එරෙහිව ලකුණු 26-18ක ජයක් ලැබිමට සී.එච්. සමත් විය.

මේ අතර මෙම සති අන්තයේදී අපරාජිත මහනුවර සහ සී.ආර්. අතර තරගය නිත්තවෙලදී පැවැත්වේ.  ‍පොලීසිය සහ හැව්ලොක්ස් අතර තරගය සිකුරාදා පැවැත්වෙන අතර, නාවික සහ ගුවන් හමුදා තරගය රත්මලානේදීද, යුද හමුදාව සහ සී.එච්. අතර තරගය සී.එච්. පිටියේදීද පැවැත්වේ.

මංගල ධර්මප්‍රේම

ඩයලොග් ආසිආටා සමාගමේ අනුග්‍රාහකත්වය යටතේ ශ්‍රී ලංකා දැල්පන්දු සම්මේලනය සංවිධානය කරන ඩයලොග් ජාතික ශූරතා දැල්පන්දු තරගාවලියේ දෙවැනි වටයේ තරග දෙසැම්බර් 4දා සිට 6දා දක්වා බණ්ඩාරගම ක්‍රීඩා අමාත්‍යාංශ ගෘහස්ථ ක්‍රීඩාංගණයේදී පැවැත්වේ.  මෙම තරගාවලියේ පළමු වටයේ තරග මේ වන විට (28දා සිට 30 දා දක්වා) ගම්පහ රත්නාවලී බාලිකා විද්‍යාලයීය ගෘහස්ථ ක්‍රීඩාගාරයේදී පැවැත්වේ.

ඩයලොග් දැල්පන්දු ශූරතාව සඳහා ලංකාවේ විවිධ ප්‍රදේශයන් නියෝජනය කරමින් කණ්ඩායම් 24ක් ඉදිරිපත්ව සිටින අතර, එම කණ්ඩායම් කාණ්ඩ 4ක් යටතේ තරග වැද එහි ශූරයන් අතර ලීග් ක්‍රමයට තරග පැවැත්වේ.  මීට පෙර ජාතික මට්ටමේ තරගාවලින්හිදී තරග මිනිත්තු 20ක කාලයකට සීමා වුවද, මෙවර තරග පැයක කාලයක් පැවැත්වීමට ශ්‍රී ලංකා දැල්පන්දු සම්මේලනය තීරණය කර තිබේ.

ජාත්‍යන්තර දැල්පන්දු තරග පැය කාලයක් පැවැත්වෙන බැවින් ක්‍රීඩිකාවන් ජාතික සංචිතයට ඇතුළත් කර ගැනීමේ අරමුණින් දැල්පන්දු සම්මේලනය මෙම තීරණය ගෙන තිබේ.  ඩයලොග් ජාතික ශූරතා දැල්පන්දු තරගාවලියේ අවසන් මහා තරගය දෙසැම්බර් 8දා වෙන්නප්පුව ශ්‍රීමත් ඇල්බට් එෆ්. පීරිස් ගෘහස්ථ ක්‍රීඩාංගණයේදී පැවැත්වේ.

ප්‍රවීණ ක්‍රීඩා මාධ්‍යවේදී සුනිල් අභයවර්ධනයන්ගේ වර්ෂ පූර්ණ ගුණ සමරු උත්සවය වෙනුවෙන් පවත්වනු ලබන ‘සුනිල් අභයවර්ධන අනුස්මරණ කුසලාන’ මැරතන් තරගය දෙසැම්බර් 2දා පෙ.ව. 9.00ට කෙරවලපිටිය මාටාගොඩ මංසන්ධියෙන් ආරම්භ කෙරේ.  වත්තල ආසනයට පමණක් විවෘත තරගයක් ලෙස පැවැත්වෙන මෙම මැරතන් තරගයේ ප්‍රථම ස්ථානයට ‘සුනිල් අභයවර්ධන අනුස්මරණ කුසලාන’ සමගින් මුදලින් රු. 7,500ක්ද, දෙවන ස්ථානයට මුදලින් රු. 5,000ක්ද, තෙවැනි ස්ථානයට රු. 2,500ක්ද සමගින් කුසලාන පිරිනැමේ.

මීට අමතරව සිව්වැනි ස්ථානයේ සිට 10 වැනි ස්ථානය දක්වා මුදල් සහ සහතිකපත් පිරිනැමීමට සංවිධායකයන් කටයුතු යොදා තිබේ.  තරගාවලිය පිළිබඳ වැඩි තොරතුරු ප්‍රධාන සංවිධායක සරත් ක්‍රිශාන් (0718116727) මහතා හෝ උප සභාපති සිසිර (0776335874) මහත්වරුන් ඇමැතීමෙන් ලබාගත හැකියි.

සුනිල් අභයවර්ධන මහතා ‘ලක්බිම’ පුවත්පතේද ක්‍රීඩා මාධ්‍යවේදියකු ලෙස සේවය කළ අතර, ‍ලේක්හවුස් ආයතනය මගින් මුද්‍රිත ‘ක්‍රීඩා’ සඟරාවේ කර්තෘවරයකු ලෙසද සේවය කර තිබ්. මීට අමතරව ජාතික පුවත්පත් ගණනාවක සහ එෆ්.එම්. නාලිකා රැසක සේවය කර ඇති අභයවර්ධන මහතා විවිධ උත්සව සහ සංගීත සංදර්ශනයන්හි නිවේදකයකු ලෙසද, පාපැදි සහ එල්‍ලේ තරග විස්තර විචාරකයකු ලෙසද සිය දක්ෂතාවයන් ප්‍රදර්ශනය කර තිබේ.

කෙරවලපිටිය මුදිත ක්‍රීඩා සුබසාධක හා මරණාධාර සංගමයේ ආරම්භක සාමාජිකයකු වන අභයවර්ධන මහතා වෙනුවෙන් එදින තවත් විශේෂ වැඩසටහන් රැසක් සංවිධානය කර ඇත.  පළාත් සභා මන්ත්‍රී ඩෝල්ටන් ජානක සූරියබණ්ඩාර, වත්තල ප්‍රාදේශීය සභාවේ සභාපති ත්‍යාගරත්න අල්විස්, ලංකා ස්‍පෝර්ට්ස් රයිසන් අධිපති තිලක් වීරසිංහ, පැරඩයිස් ටෝයිස් ආයතනය, වත්තල ෆ්ලයින්ග් වීල් පාපැදි සංගමය, ප්‍රජා ‍පොලිස් කමිටුව, ප්‍රජා ‍පොලීසිය වත්තල, මුදිත ක්‍රීඩා සමාජය සහ සුනිල් අභයවර්ධන මිතුරු කැල මෙම උත්සවය සඳහා අනුග්‍රාහකත්වය දක්වයි.

ඩයලොග් සමාගමේ අනුග්‍රාහකත්වයෙන් ශ්‍රී ලංකා වොලිබෝල් සම්මේලනය සංවිධානය කරන ඩයලොග් ජනාධිපති රන් කුසලාන වොලිබෝල් තරගාවලියේ අවසන් මහා තරග දෙසැම්බර් 15දා ජාතික තරුණ සේවා සභා ගෘහස්ථ ක්‍රීඩාංගණයේදී පැවැත්වේ.  මේ අනුව විවෘත පිරිමි අංශයේ අවසන් මහ සටනට කොළඹ බලරැස් ක්‍රීඩා සමාජය සහ ගම්පහ සියනෑතරු ක්‍රීඩා සමාජය සුදුසුකම් ලබාගත් අතර, කුරුණෑගල කැෂුවල් ක්‍රීඩා සමාජය සහ කොස්වාඩිය විජය ක්‍රීඩා සමාජය විවෘත කාන්තා අවසන් සටනට සුදුසුකම් ලබා ගත්තේය.

අවුරුදු 22න් පහළ පිරිමි අවසන් මහ තරගයට රුවන්වැල්ල රාජසිංහ ක්‍රීඩා සමාජය සහ නාත්තන්ඩිය ධම්මිස්සර ක්‍රීඩා සමාජය සුදුසුකම් ලබාගත් අතර, මහඋස්වැව රතනපාල ක්‍රීඩා සමාජය සහ කෑගල්ල ඇලමෝනියා ක්‍රීඩා සමාජය 22න් පහළ කාන්තා අවසන් සටනට සුදුසුකම් ලබා ගත්තේය.

පසුගියදා හික්කඩුව මහජන ක්‍රීඩාංගණයේදී නිමාවට පත්වූ ජාතික තරග සඳහා දිවයිනේ දිස්ත්‍රික්ක 25ම නියෝජනය කරමින් කණ්ඩායම් 100ක් සහභාගි විය.  එහිදී පැවැති විවෘත පිරිමි අවසන් පූර්ව තරගවලදී බලරැස් තරග වට 3-1කින් දෙබෑගම රන්තරු පරාජය කරමින්ද, සියනෑතරු තරග වට 3-0කින් ආනමඩුව රමීස් ට්‍රැවල්ස් ක්‍රීඩා සමාජය පරාජය කරමින්ද අවසන් සටනට පිවිසුණි.

විවෘත කාන්තා අවසන් පූර්ව තරගවලදී කැෂුවල් ක්‍රීඩා සමාජය තරග වට 3-0කින් රදාවාන ගෝල්ඩන් බර්ඩ්ස් පරාජය කරමින්ද, කොස්වාඩිය විජය තරග වට 3-0කින් සියඹලාගොඩ කපිල ක්‍රීඩා සමාජය පරාජය කරමින්ද අවසන් සටනට සුදුසුකම් ලබා ගත්තේය.  මෙහිදී පිරිමි තෙවැනි ස්ථානය ආනමඩුව රමීස් ට්‍රැවල්ස් ක්‍රීඩා සමාජය දිනාගත් අතර, කාන්තා තෙවැනි ස්ථානය රදාවාන ගෝල්ඩන් බර්ඩ්ස් සතුවිය.

අවුරුදු 22න් පහළ පිරිමි අවසන් පූර්ව තරගවලදී රුවන්වැල්ල රාජසිංහ තරග වට 3-0කින් සීදූව දවිසමර පරාජය කරමින්ද, නාත්තන්ඩිය ධම්මිස්සර තරග වට 3-0කින් හුංගම විජයබා පරාජය කරමින්ද අවසන් සටනට සුදුසුකම් ලබා ගත්තේය.  අවු. 22න් පහළ කාන්තා අවසන් පූර්ව තරගවලදී මහඋස්වැව රතනපාල ක්‍රීඩා සමාජය තරග වට 3-0කින් පරාජය කරමින්ද, ඇලමෝනා ක්‍රීඩා සමාජය තරග වට 3-0කින් හුංගම  විජයබා පරාජය කරමින්ද අවසන් සටනට පිවිසුණි.

සීදූව දවිසමර සහ හුංගම විජයබා 22න් පහළ තෙවැනි ස්ථාන දිනා ගත්තේය.

ප්‍රභාත් විදානපතිරණ

Lakbima Online

Download Lakbima Mobile App

 
 

 

Get In Touch With Us

Explore More

Please publish modules in offcanvas position.