lakbima.lk

කොළඹ පී. සරවණමුත්තු ක්‍රීඩාංගණයේදී පවත්වන ලද 42 වැනි වෙළෙඳ සේවා සත් සාමාජික හොකී තරගාවලියේ ‘ඒ’ කාණ්ඩයේ ශූරතාව දිනා ගැනීමට කොමර්ෂල් බැංකුව සමත් විය.  විනීතම කණ්ඩායමට හිමි සම්මානයද කොමර්ෂල් බැංකුව සතු වූ අතර, වෙළෙඳ සේවා හොකී ඉතිහාසයේ ප්‍රථම වරට ‘ඒ’ කාණ්ඩයෙන් තරග වැදුණු මාස් සමාගමට අනුශූරතාව හිමි විය.

මෙවර දක්ෂතම ක්‍රීඩකයා ලෙස ජනිත් විතාරණගේ (කොමර්ෂල්) සම්මාන දිනාගත් අතර, දක්ෂතම ගෝල් රකින්නා ලෙස ශිවන්ත රාජපක්ෂ (මාස්) සම්මාන ලැබිය.  කොමර්ෂල් බැංකුව සහ මාස් අතර පැවැති අවසන් මහ තරගයේදී ගෝල් 3-1ක ජයග්‍රහණයක් වාර්තා කරමින් අපරාජිතව ශූරතාව දිනා ගත්තේය.  ජයග්‍රාහී පිල වෙනුවෙන් අංජු හේවගේ (02) සහ මිලාන් ආරියවංශ ගෝල් රැස් කළ අතර, සයිඩ් කුතුබ්ඩීන් මාස් වෙනුවෙන් එකම ගෝලය රැස් කළේය.

වෙළෙඳ සේවා හොකී සංගමය සංවිධානය කරන ලද මෙම තරගාවලියේ කුසලාන සහ ත්‍යාග ප්‍රදානය මේජර් ජෙනරාල් ශවේන්ද්‍ර සිල්වා මහතාගේ ප්‍රධානත්වයෙන් සිදු කෙරුණි.

සපුමල් වීදියබණ්ඩාර

ශ්‍රී ලංකා පාසල් මලල ක්‍රීඩා සංගමය සිලෝන් බිස්කට්ස් සමාගමේ ‘රිට්ස්බරි’ අනුග්‍රාහකත්වය යටතේ අනුරාධපුර මහජන ක්‍රීඩාංගණයේදී පැවැති 49 වැනි ශ්‍රීමත් ජෝන් ටාබට් කුසලාන කනිෂ්ඨ මලල ක්‍රීඩා තරගාවලියේ බාලක සමස්ත ශූරතාව බම්බලපිටිය ශා. පීතර විදුහල (ලකුණු 84) දිනාගත් අතර, බාලිකා සමස්ත ශූරතාව දිනා ගැනීමට වත්තල ලයිසියම් ජාත්‍යන්තර පාසල (ලකුණු 45) සමත් විය.

මෙම තරගාවලි ඉතිහාසය තුළ ලයිසියම් ජාත්‍යන්තර පාසල බාලිකා ශූරතාව දිනාගත් පළමු අවස්ථාවලෙස මෙය සටහන් විය.  පසුගිය වසරේ ශූරයන් වූ කොළඹ ශා. ජෝසප් විදුහල මෙවර බාලක අනුශූරතාව (ලකුණු 79) දිනාගත් අතර, බාලිකා අනුශූරතාව ගේට්වේ ජාත්‍යන්තර පාසල (ලකුණු 40) සතුවිය.

මෙවර තරගාවලියේදී නව තරග වාර්තා 7ක් පිහිටුවීමට සහ එක් වාර්තාවක් සම කිරීමට ක්‍රීඩක ක්‍රීඩිකාවෝ සමත් වූහ.

මෙවර දක්ෂතම මලල ක්‍රීඩකයා ලෙස හලාවත අඹකඳවිල ශාන්ත රෝගුස් කනිඨ විදුහ‍ලේ ආර්.පී. නිපුන් රනිෂ්ක (අවු. 15න් පහළ දුර පැනීම - මී. 6.23) සම්මාන දිනාගත් අතර, රාජගිරිය ගේට්වේ ජාත්‍යන්තර පාස‍ලේ දිනාරා බණ්ඩාර දෑල (අවු. 15න් පහළ මීටර් 100 - තත්. 12.8) දක්ෂතම ක්‍රීඩිකාව ලෙස සම්මාන ලැබුවාය.

සපුමල් වීදිය බණ්ඩාර

අර්ජන්ටිනාවේ බුවනෝර්ස් අයර්ස්හිදී පැවැති තෙවැනි යොවුන් ඔලිම්පික් ක්‍රීඩා  උළෙ‍ලේදී මීටර් 2000 බාධක මතින් දිවීමේ ඉසව්වේදී ඉතිහාසයේ පළමු වරට යොවුන් ඔලම්පික් පදක්කමක් (ලෝකඩ) දිනාගත් කුලියාපිටිය මධ්‍ය මහා විදුහ‍ලේ පාරමී වසන්ති මාරිස්ටෙලා පසුගියදා කටුනායක ජාත්‍යන්තර ගුවන් තොටුපළින් ලක්බිමට පැමිණියාය.

මෙහිදී ක්‍රීඩා අමාත්‍යාංශයේ උපදේශිකාවක් වන ඔලිම්පික් පදක්කම්ලාභිනී සුසන්තිකා ජයසිංහ මහත්මිය, ක්‍රීඩා අමාත්‍යාංශයේ නිලධාරීන් සහ මලල ක්‍රීඩා සම්මේලනයේ නිලධාරීන් විසින් පාරමී ඇතුළු ක්‍රීඩක ක්‍රීඩිකා කණ්ඩායම පිළිගනු ලැබූහ.  එහිදී පාරමී වසන්ති මාරිස්ටෙලා පවසා සිටියේ තමන්ට උපතින්ම උරුම වූ මුහුදු වෙරළේ දුවමින් සිටින අවස්ථාවල ඔලිම්පික් පදක්කම් සිහිනය තම සිත තුළ හොල්මන් කළ බවයි.

අඹකඳවල විදුහලෙන් අස්වී කුලියාපිටිය මහ විද්‍යාලයට ඇතුළත් වීම තුළ තම ඔලිම්පික් සිහිනය සැබෑකර ගැනීමට අවකාශ ලැබුණු බව පැවැසූ පාරමී එම විද්‍යාලයේදී ජනිත් ජයසිංහ සර්ව මුණ ගැසුණේ නැතිනම් කවදාවත් තමන්ට මෙම ඔලිම්පික් පදක්කම දිනා ගැනීමට බැරි බව සඳහන් කළාය.  

“ක්‍රීඩිකාවක් ලෙස අපට මෙවැනි ක්‍රීඩා තරගවලට පුහුණුව ලැබිමේදී ‍පෝෂ්‍යදායක ආහාර අවශ්‍ය වෙනවා. පුහුණුවීම් සඳහා කොළඹට එන විට ප්‍රවාහන ගාස්තු විදිහට විශාල මුදලක් වැය වෙනවා. ජනිත් සර්රුත් මගේ පුහුණුවීම් සඳහා මුදල් ණයට ලබාගෙන තියනවා” යැයි පාරමී කටුනායක ගුවන් තොටුපළේදී පැවැසුවාය.

“මට ක්‍රීඩා අමාත්‍යාංශයෙන් රු. 75,000ක මාසික දීමනාවක් දුන්නා. එය ලැබුනේ එක මාසයයි. දිගටම එය ලැබුණා නම් මට විශාල සහනයක් වීමට තිබුණා. කුමන හෝ හේතුවකින් ඒක මාසයකින් නතර කළා. ජනාධිපතිතුමා මට ස්ථාවර තැන්පතුවකට රුපියල් ලක්ෂ 15ක් දාලා තියෙනවා. මට එයින් මාසිකව රු. 12,000ක ‍පොලී මුදලක් ලැබෙනවා. මගේ වියදම් සඳහා අම්මා අපේ ඉඩම උකස් තියලා කියලා දැනගත්තේ මේ ළඟදී. ඉතා දුෂ්කර කටුක ජීවිතයක් තුළින් තමා මම මේ පදක්කම දිනා ගැනීමට ආවේ.”

“ඔලිම්පික් පදක්කමක් ලංකාවට දිනා ගැනීමේ වෑයම තමයි මට දැන් තිබෙන්නේ. ජනිත් සර්ටයි මටයි විදේශීය රටකට වසරක හෝ වසර දෙකක පුහුණුවක් ලබා දෙනවානම් ගොඩක් වටිනවා” යැයි පාරමී වැඩිදුරටත් සඳහන් කළාය.

මෙහිදී අදහස් දැක්වූ ක්‍රීඩා උපදේශිකා සුසන්තිකා ජයසිංහ, 

“මෙම ක්‍රීඩිකාවට අද ලැබි තිබෙන පහසුකම් ඉතා හොඳයි එදා මට සහ මගේ සමකාලීන ක්‍රීඩිකාවන්ට ලැබුන දුෂ්කරතා දෙස බලන විට. ජනාධිපතිතුමත් රුපියල් ලක්ෂ 15ක් ස්ථාවර ගිණුමක තැන්පත් කරලා තියෙනවා. අමාත්‍යාංශ මට්ටමෙන් ඇතැම් විට අඩුපාඩු සිදුවීමට පුළුවන්. නමුත් ඒ ගැන මීට වඩා වගකීමෙන් කතා කළ යුතු වෙනවා. අත්දැකීම් අඩු ක්‍රීඩිකාවක් ලෙස මම ඇයට දෙන උපදේශය නම් කාගේත් උදව් ඇතිව හොඳ හිත දිනාගෙන නිහතමානීව ඉදිරි කටයුතුවලට මුහුණ දිය යුතු බවයි” යැයි සුසන්තිකා ජයසිංහ මහත්මිය සඳහන් කළාය.

“ඉක්මන් වෙලා යමක් ප්‍රකාශ කරන්න එපා. ඉවසීම තියාගන්න. මම අමාත්‍යාංශයේ උපදේශිකාවක් ලෙස සිටිනවා. මට පවතින අඩුපාඩු කියන්න. මම ඔයාලාගේ දුක්ගන්නාරාළ ලෙස සිටිනවා. අමාත්‍යතුමාට හෝ අදාළ නිලධාරීන්ට යොමුකර කඩිනම් විසඳුම් ලබා දෙන්නම්” යැයි ජයසිංහ මහත්මිය මෙහිදී වැඩිදුරටත් පැවැසුවාය.

ඡායාරූප : රේමන් අ‍පෝන්සු - මීගමුව

ශ්‍රී ලංකා පාසල් මලල ක්‍රීඩා සංගමය සිලෝන් බිස්කට්ස් සමාගමේ ‘රිට්ස්බරි’ අනුග්‍රාහකත්වය යටතේ සංවිධානය කරන 49 වැනි ශ්‍රීමත් ජෝන් ටාබට් කුසලාන කනිෂ්ඨ මලල ක්‍රීඩා තරගාවලියේ ආරම්භක දිනය වූ ඊයේ (17දා) නව තරග වාර්තාවක් පිහිටුවීමට කොළඹ ශා. ජෝසප් විදුහ‍ලේ නවීන් මාරසිංහ සමත් විය.  අවුරුදු 15න් පහළ බාලක යගුලිය දැමීම (කිලෝ ග්‍රෑම් 4ක් බරැති) ඉසව්වේදී නවීන් මාරසිංහ මීටර් 15.71ක දක්ෂතාවක් දක්වමින් මෙවර ක්‍රීඩා උළෙ‍ලේ පළමු නව තරග වාර්තාව පිහිටුවීය.

මේ අනුව 2007 වසරේදී රෝයල් ඉන්ස්ටිටියුට්හි සංජුල සුමණවීර (මී. 14.87) තබා තිබූ වාර්තාව බිඳ වැටුණි.  ඊයේ මෙම ඉසව්වේ දෙවැනි ස්ථානය ආනමඩුව මැදි විදුහ‍ලේ යසිරු ලක්ෂාන් (මී. 12.23) දිනාගත් අතර, තෙවැනි ස්ථානය බෙලිඅත්ත රුහුණු විජයබා විදුහ‍ලේ දහන් නෙත්සර (මී. 11.86) දිනා ගත්තේය.

අවු. 14න් පහළ බාලක කවපෙත්ත විසිකිරීම ඉසව්වේදී ප්‍රවිශ්ක පූර්ණ (බණ්ඩාරගම වෑවිට මෛත්‍රී මහ විදුහල - මී. 32.98) ප්‍රථම ස්ථානය දිනාගත් අතර, දෙවැනි ස්ථානය ආර්. ප්‍රවීන් (කොකුවිල් හින්දු විදුහල - මී. 3.59) ද, තෙවැනි ස්ථානය ශෂාන් ඉඳුවර (බලංගොඩ කල්තොට රෝහණ විදුහල - මී. 29.70) දිනා ගත්හ.

අවු. 12න් පහළ බාලිකා උස පැනීම ඉසව්වේ ප්‍රථම ස්ථානය නදිත්‍යා රෝමිණී ගීකියනගේ (පන්නිපිටිය ධර්මපාල - මී. 1.30) දිනාගත් අතර, දෙවැනි ස්ථානය අංජලිකා තමෙල් (වෙන්නප්පුව ශුද්ධ වූ පවු‍ලේ බාලිකා විදුහල - මී. 1.26) ද, තෙවැනි ස්ථානය අක්ශානා බාලචන්ද්‍රන් (වත්තල ලයිසියම් - මී. 1.22) දිනා ගත්හ.

අවුරුදු 15න් පහළ බාලිකා කවපෙත්ත විසිකිරීම ඉසව්වේද ඉංගිරිය ගාමිණී විදුහ‍ලේ ජේ. යෙලනි පබසරා (මී. 26.3) ප්‍රථම ස්ථානය දිනාගත් අතර, ගිරිඋල්ල වික්‍රමශීලා විදුහ‍ලේ සී.ඒ.එන්.එන්. සන්දීපනී (මී. 23.79) දෙවැනි ස්ථානයද, කොළඹ දේවි බාලිකා විදුහ‍ලේ එම්.එම්.එස්. දිසානායක (මී. 23.07) තෙවැනි ස්ථානයද දිනා ගත්හ.

ආර්ජන්ටිනාවේ බුවනෝර්ස් අයර්ස්හිදී පැවැත්වෙන තෙවැනි යොවුන් ඔලිම්පික් ක්‍රීඩා උළෙ‍ලේදී මීටර් 2000 බාධක මතින් දිවීමේ ඉසව්වේදී ලෝකඩ පදක්කම දිනා ගැනීමට පාරමී වසන්ති මාරිස්ටෙලා සමත්වූවාය.  මෙය ශ්‍රී ලංකා ක්‍රීඩා ඉතිහාසයේ යොවුන් ඔලිම්පික් උළෙලකදී ශ්‍රී ලංකාව පදක්කමක් දිනාගත් පළමු අවස්ථාව ලෙස වාර්තා ‍පොතට එක්වෙයි.

පාරමී දුව මෙවර පදක්කමක් දිනා ගන්නා බව තමන් දැඩි විශ්වාසයකින් පසු වූ බව යොවුන් ඔලිම්පික් ක්‍රීඩා ඉතිහාසයේ ශ්‍රී ලංකාවට පළමු පදක්කම දිනාදුන් පාරමී වසන්ති මාරිස්ටෙලාගේ මව පවසා සිටියි.

“මගේ සතුට වචනවලින් කියා ගන්න බෑ. මම දැනගෙන හිටියා එයා පදක්කමක් දිනයි කියලා. දුව ගොඩක් මහන්සි වුණා පුහුණුවීම්වලට. අම්මා  තාත්තා විදිහට අපි දෙන්නා ගොඩක් සතුටු වෙනවා කිසිම කෙනෙකුගේ සහයක් නැතුව මේ තත්ත්වයට ආපු එක ගැන. අපි මේ ලෝකෙට දරුවෝ බිහි කරලා දෙමව්පියන් විදිහට යමක් කළා කියලා ගොඩක් සතුටු වෙනවා”  යැයි රීටා මහත්මිය පවසයි.

“පාරමීගේ පියා මුහුදු රස්සාව කරන්නේ. අපි පුළුවන් උපරිමයෙන් දුවට උදව් කරනවා. අපි ඉන්න ගේත් බැංකුවට උකස් කරලා ගොඩාක් ණය වෙලයි දුවට  උදව් කරන්නේ. පාරමීගේ අක්කා ඉගෙන ගන්න කා‍ලේ ඉඳන්ම අපි ගොඩාක් ණය වෙලා ඉන්නේ. කිරිපිටි ගන්නේ, කොළඹ යන්නෙ එන්නේ ණයට සල්ලි හොයාගෙන” යැයි රීටා මහත්මිය සතුටු කඳුළු අතරින් පාරමී මේ තතත්වයට ගෙන ඒමට දැරූ වෑයම ගැන එසේ සඳහන් කළාය.

“අපි ඉන්නේ මුහුද අයිනේ ගේක. වැස්සට ගෙයි වහලයෙන් තැනින් තැන වතුර වැටෙනවා. වහ‍ලේ පරාල දිරලා තියෙන්නේ. ගේ වටේට වතුර පිරිලා යට වෙනවා. දුවට ගෙදර ඉන්න සුදුසු පරිසරයක් හදලා දීලා ඇගේ ඉදිරි ක්‍රීඩා දිවිය සාර්ථක කර ගන්න අවශ්‍ය පහසුකම් සලසා දෙන්න යැයි බලධාරීන්ගෙන් ඉල්ලා සිටිනවා” යැයි මාග්‍රට් මහත්මිය අවසන් වශයෙන් පැවැසුවාය.

පාරමී වසන්ති මාරිස්ටෙලා මීටර් 2000 බාධක මතින් දිවීම ඉසව්වේ පළමු අදියරේදී ඇගේ හොඳම පෞද්ගලික කාලය වාර්තා කරමින් (මිනිත්තු 6.33.06) තෙවැන්නා ලෙස තරගය අවසන් කිරීමට සමත් වුවාය.  මෙම ඉසව්වේ දෙවැනි අදියර ලෙස ක්‍රියාත්මක වූ කිලෝ මීටර් 4ක දුරකින් සමන්විත  රට හරහා දිවීමේ ඉසව්වේදී මිනිත්තු 13.47ක කාලයකින් 17 වැන්නා ලෙස තරගය නිමා කළාය.

සමස්ත තරගයේ කාල ගණනය කිරීම් අනුව පාරමීට ලෝකඩ පදක්කම හිමි වූ අතර, කෙන්යාවේ ෆැන්සි චිරෝනෝ (6.26.08/12.51) රන් පදක්කමද, ඉතියෝපියාවේ මෙකිසිස් අබිබි (6.27.93/13.21) රිදී පදක්කම ද දිනා ගත්හ.  මෙම ක්‍රීඩා උළෙ‍ලේදී අවසන් තරග ඉසව් නොපැවැත්වෙන අතර, අදියර දෙකක් යටතේ ඉසව් පවත්වා එහි හොඳම කාල ගණනයන්ට අනුව පදක්කම් පිරිනැමේ.

හලාවත ධීවර පවුලක උපත ලබා අඹකඳවිල ශාන්ත රෝගුස් කනිටු විදුහලෙන් මූලික අධ්‍යාපනය ලබා ක්‍රීඩා ශිෂ්‍යත්වයක් ලබමින් කුලියාපිටිය මධ්‍ය මහා විදුහලෙන් සිය හැකියාවන් වැඩි දියුණුකරගත් 17 හැවිරිදි පාරමීගේ පුහුණුකරු ලෙස ජනිත් ජයසිංහ මහතා කටයුතු කරයි.

ශ්‍රී ලංකා පාසල් මලල ක්‍රීඩා සංගමය සංවිධානය කරන 49 වැනි ශ්‍රීමත් ජෝන් ටාබට් අභියෝග කුසලාන කනිෂ්ඨ ශූරතා මලල ක්‍රීඩා තරගාවලිය අද (17දා) අනුරාධපුර මහජන ක්‍රීඩාංගණයේදී ආරම්භ කෙරේ.  අද පෙ.ව. 8.30ට ඇරඹෙන මෙම තරගාවලිය 19දා දක්වා පැවැත්වේ.

මෙම තරගාවලිය අවුරදු 15න් පහළ, 14න් පහළ 13න් පහළ සහ 12න් පහළ (බාලක/බාලිකා) යන වයස් සීමා 4ක් යටතේ තරග පැවැත්වේ.

රන් පදක්කම් 98ක් සඳහා ක්‍රියාත්මක කෙරෙන මෙවර තරගාවලිය සඳහා සෑම දිස්ත්‍රික්කයක්ම නියෝජනය වන පරිදි ක්‍රීඩක ක්‍රීඩිකාවන් 3500ක් පමණ සහභාගි වීමට සුදුසුකම් ලබා සිටියි.  මෙම තරගාවලියට පෙර කලාප 3කදී පවත්වන ලද මූලික වටයේ තරගවලදී හොඳම කාලය හෝ උපරිම දක්ෂතාව ප්‍රදර්ශනය කරන ක්‍රීඩක ක්‍රීඩිකාවන් මෙම අවසන් තරග සඳහා සහභාගි වෙති.

මහනුවර (මධ්‍යම, ඌව, සබරගමුව), හංවැල්ල (බස්නාහිර, දකුණ), ‍පොළොන්නරුව (උතුර, උතුරු මැද, නැගෙනහිර, වයඹ) යන කලාපයන් යටතේ මෙම මූලික වටයේ තරග පැවැත්වුණි. ඉකුත් වසරේ පැවැති තරගාවලියේ බාලක ශූරතාව කොළඹ ශා. ජෝසප් විදුහල දිනාගත් අතර, බාලිකා ශූරතාව නාවල ජනාධිපති බාලිකා විදුහල දිනා ගත්තේය.

මෙවර තරගාවලිය සිලෝන් බිස්කට් සමාගමේ ‘රිට්ස්බරි’ අනුග්‍රහයෙන් පැවැත්වේ.

සපුමල් වීදියබණ්ඩාර

Page 3 of 6

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.