lakbima.lk

ශ්‍රී ලංකාව සහ එංගලන්තය අතර දෙවැනි ටෙස්ට් ක්‍රිකට් තරගය අද (14දා) පල්ලෙකැ‍ලේ ජාත්‍යන්තර ක්‍රිකට් ක්‍රීඩාංගණයේදී ආරම්භ වෙයි.  ගාල්ලේ පැවැති පළමු තරගයෙන් ලකුණු 211 ක විශිෂ්ට ජයක් ලැබූ එංගලන්තය තරගාවලිය 1-0 ක් ලෙස පෙරමුණ ගෙන සිටියි.

ශ්‍රී ලංකාව සහ එංගලන්තය අතර පල්ලෙකැ‍ලේ පවත්වන පළමු ටෙස්ට් ක්‍රිකට් තරගය ලෙස මෙම තරගය වාර්තා ‍පොතට එක්වෙයි.  දඟ පන්දු යවන්නන්ට වාසිදායක ගාල්ල තණතීරුවේදී ශ්‍රී ලංකාවට තියුණු තර්ජනයක් එල්ල කිරීමට එංගලන්ත දඟ පන්දු යවන්නන් සමත්වූ නමුත් පල්ලෙකැ‍ලේ තණතීරුවද මෙම තරගයේදී දඟ පන්දු යවන්නන්ට වාසිදායක ලෙස සකසන බව ශ්‍රී ලංකා නායක සුරංග ලක්මාල් පවසයි.

අද තරගය ජයගෙන තරගාවලිය ජය ගැනීමේ අරමුණින් එංගලන්තය තරග බිමට පිවිසී සිටින අතර යළි තරගාවලියට අවතීර්ණවීමේ අරමුණින් ශ්‍රී ලංකාව සටනට පිවිසී සිටියි. දිනේෂ් චන්දිමාල් ආබාධයකට ගොදුරුවී සිටින බැවින් ශ්‍රී ලංකා පිල මෙහෙයවීම සුරංග ලක්මාල්ට පවරා තිබේ. මීට පෙර ලක්මාල් නායකත්වය දැරූ ටෙස්ට් තරග තුනම ජය ගැනීමට ශ්‍රී ලංකාව සමත්වී තිබේ.

පළමු තරගයෙන් පරාජය වුවද තම පිල මානසිකව ඇදවැටී නොමැති බවත් ඉතිරි තරග දෙක ජයගෙන තරගාවලිය ජය ගැනීම කණ්ඩායමේ අරමුණ බවත් සුරංග ලක්මාල් ඊයේ පැවැති මාධ්‍ය හමුවේදී පැවැසීය.  පසුගිය තරගයේදී පිතිකරුවන් දුර්වල වුවද මෙම තරගයේදී ඔවුන් යළිත් නැගී සිටිනු ඇතැයි ලක්මාල් විශ්වාසය පළ කළේය.  චන්දිමාල්ගෙන් හිස්වන පිතිකරු ස්ථානයට රොෂේන් සිල්වා හෝ චරිත් අසලංක ක්‍රීඩා කරන බවත් රංගනගේ ස්ථානයට මලින්ද පුෂ්පකුමාර හෝ ලක්ෂාන් සඳකැන් ක්‍රීඩා කරනු ඇති බවත් පැවැසූ ලක්මාල් අද පෙරවරුවේ අවසන් තීරණය ගන්නා බව පවසයි.

මෙම තරගයට වේගපන්දු යවන්නන් දෙදෙනකු ක්‍රීඩා කරනවාදැයි විමසූ විට ලක්මාල් පැවසුවේ දඟ පන්දු යවන්නන්ට වාසිදායක තණතීරුවක වේග පන්දු යවන්නන් දෙදෙනෙකු ක්‍රීඩා කිරීමේ අවශ්‍යතාවය පැන නොනගින බවයි.  තමා නායකයකු ලෙස සිටියද නොසිටියද සිය උපරිමය කණ්ඩායමට ලබා දෙන බව පැවැසූ ලක්මාල් සියලුම ක්‍රීඩකයන්ට මෙම තරගයේදී සිය උපරිමය ලබා දෙන මෙන් ඉල්ලා සිටින බවද පැවැසීය.

පළමු ටෙස්ට් තරගයේදී දැක්වූ දස්කම් ඉදිරියට ගෙන යමින් තරගාවලිය ජය ගැනීම තම අරමුණ බව එංගලන්ත නායක ජෝ රූට් ඊයේ පැවැති මාධ්‍ය හමුවේදී පැවැසීය.  කණ්ඩායමේ වෙනස්කම් සිදුවීම හෝ නොවීම පිළිබඳව අද පෙරවරුවේ තීරණය කරන බව පවසන රූට් අංක 3 පිතිකරු ස්ථානය පිළිබඳව තවමත් අවසන් තීරණයක් ගෙන නොමැති බව පවසයි.

කෙසේ වුවද දඟ පන්දු යවන්නන්ට සකසා ඇති තණතීරුවේ පළමු ටෙස්ට් තරගයට ක්‍රීඩා කළ කණ්ඩායමම ක්‍රීඩා කිරීමේ වැඩි ඉඩකඩක් බවතින බව වාර්තාවේ.  ශ්‍රී ලංකාව පල්ලෙකැ‍ලේදී ටෙස්ට් තරග 6 කට මුහුණදී ඇති අතර ඉන් එක් තරගයක් ජයගෙන තරග 2 ක් පරාජයවී තරග 3 ක් ජය පරාජයෙන් තොරව අවසන් කරගෙන තිබේ.

ශ්‍රී ලංකා සංචිතය :-

සුරංග ලක්මාල් (නායක), දිමුත් කරුණාරත්න, කෞෂාල් සිල්වා, කුසල් මෙන්ඩිස්, ඇන්ජලෝ මැතිව්ස්. ධනංජය ද සිල්වා, රොෂේන් සිල්වා, නිරෝෂන් දික්වැල්ල, දිල්රුවන් පෙරේරා, චරිත් අසලංක, මලින්ද පුෂ්පකුමාර, අකිල ධනංජය, ලක්ෂාන් සඳකැන්,  කසුන් රාජිත, දුෂ්මන්ත චමීර

එංගලන්ත සංචිතය :- 

ජෝ රූට් (නායක), රෝරි බර්න්ස්, කේට්න් ජෙනින්ග්ස්, මොයින් අලී, ජෝ ඩෙන්ලි, ඔලී ‍පෝප්, බෙන් ෆෝක්ස්, බෙන් ස්ටෝක්ස්, ජොස් බට්ලර්, අදිල් රෂීඩ්, ජැක් ලීච්, ජේම්ස් ඇන්ඩර්සන්, ස්ටුවර්ට් බ්‍රෝඩ්, ඔලී ස්ටෝන්, සෑම් කරන්, ක්‍රිස් වෝක්ස්

මංගල ධර්මප්‍රේම පල්ලෙකැ‍ලේ සිට

ශ්‍රී ලංකා කණ්ඩායමේ හිටපු තුන් ඉරියව් ක්‍රීඩකයකු වන දිල්හාර ලොකුහෙට්ටිගේට ජාත්‍යන්තර ක්‍රිකට් කවුන්සිලයේ ක්‍රිකට් දූෂණ සම්බන්ධයෙන් චෝදනා එල්ල කර තිබේ.

එමීර් රාජ්‍යයේ පැවැති 10-10 ක්‍රිකට් තරගාවලියේදී ඇතිවූ සිදුවීම් සම්බන්ධයෙන් මෙම චෝදනා එල්ල වී ඇති අතර, එමීර් රාජ්‍ය ක්‍රිකට් දූෂණ මර්දන නීති මාලාවේ වගන්ති 3ක් කඩකර ඇති බවට දන්වා තිබේ. වහාම ක්‍රියාත්මක වන පරිදි ඔහුට තාවකාලික ක්‍රිකට් තහනමක් පනවා ඇති අතර, සිදුවීමට ප්‍රතිචාර දැක්වීම සඳහා දින 14ක කාලයක් ලබා දී තිබේ.

ශ්‍රී ලංකා පිල පලමු ටෙස්ට් තරගයෙන් අන්ත පරාජයකට පත්වීමේ මූලික හේතුව ශ්‍රී ලංකා පිතිකරුවන්ගේ පාසල් මට්ටමේ පිතිහරඹය බව ශ්‍රී ලංකා පුහුණුකරු චන්දික හතුරුසිංහ පරාජයෙන් පසු පැවැති මාධ්‍ය හමුවේදී පැවැසීය.  ගාල්ලේ පැවැති පළමු ටෙස්ට් තරගය දිනයක් ඉතිරිව තිබියදී ලකුණු 211 කින් පරාජය වීමට ශ්‍රී ලංකාවට සිදුවූ අතර ලකුණු 462 ක ඉලක්කයක් හඹාගිය ශ්‍රී ලංකාවට සියල්ල දැවී ලබාගත හැකිවූයේ ලකුණු 250 ක් පමණි.

මෙම තරගයේදී බොහෝ ශ්‍රී ලංකා පිතිකරුවන් එංගලන්ත පි‍ලේ උගුල්වලට හසුවෙමින් දැවීගිය අතර ජාත්‍යන්තර පිටියේදී මෙලෙස ක්‍රීඩා කිරීම හාස්‍යජනක සිදුවීමක් විය.   නිරෝෂන් දික්වැල්ල, කුසල් මෙන්ඩිස්, ඇන්ජලෝ මැතිව්ස් මෙන්ම ධනංජය ද සිල්වාද මෙසේ උගුල්වලට හසුවන ආකාරය දැකගත හැකි විය.

සිව්වැනි දිනයේ දිවා ආහාරයට පෙර අතිරේක පන්දුවාරයක් යැවීම වැලැක්වීමට ධනංජය අ‍පොහොසත් වීමද විවේචනයට ලක්වී ඇති අතර එම අතිරේක පන්දුවාරයේදී රූට්ගේ උගුලට හසුවෙමින් ස්ටෝක්ස් හමුවේ ධනංජය දැවී ගියේය.  “මෙවන් සිදුවීම් පාසල්, අන්තර් ක්‍රීඩා සමාජ මට්ටමේ විය හැකියි. එයින් පාඩම් ඉගෙන ගෙන ජාත්‍යන්තර පිටියට එන්නේ. ජාත්‍යන්තර තරගවලදී පාසල් ක්‍රීඩකයන් ලෙස ක්‍රීඩා කිරීම කනගාටුවක්” යැයි හතුරුසිංහ පවසයි.

මේ අතර පාදයේ ඉහළ කොටසේ ආබාධයකට ලක්වී සිටින නායක දිනේෂ් චන්දිමාල්ට දෙවැනි ටෙස්ට් තරගය අහිමිවන ලකුණු පහලවී තිබේ. ඔහුට දින 14 ක් විවේක ගැනීමට වෛද්‍ය උපදෙස් ලැබි තිබේ. මේ අනුව සුරංග ලක්මාල් දෙවැනි ටෙස්්ට් තරගයේදී ශ්‍රී ලංකා පිල මෙහෙයවනු ඇතැයි වාර්තාවේ.

පූර්ණ සුවයක් නොමැතිව චන්දිමාල් ක්‍රීඩා කරවීමේ බලා‍පොරොත්තුවක් නොමැති බව හතුරුසිංහද තහවුරු  කළේය.  තරගයේ පළමු දිනයේ එංගලන්ත කඩුලු 5 ක් බිඳ වැටී තිබූ අවස්ථාවේ අකිල ධනංජයට කඩුලු ලබා ගැනීමට නොහැකි වීම තරගය වෙනස්කළ එක් අවස්ථාවක් බවත් ශ්‍රී ලංකාව පළමු ඉනිමේ ලකුණු 203 කට දැවී යාමෙන් පසුපසට ඇද වැටුණු බවත් හතුරුසිංහ පවසයි.

කොදෙව් සංචාරයේදීද පළමු තරගයෙන් පරාජය වී දෙවැනි තරගය ජයගෙන තරගාවලියට පැමිණි බව පවසන හතුරුසිංහ මෙම තරගාවලියේදීද දෙවැනි තරගයේදී දස්කම් දක්වා තරගාවලියට පැමිණීමේ හැකියාවක් ඇති බවද පවසයි.  මේ අතර ටෙස්ට් පිටියෙන් සමුගත් රංගන හේරත්ට ක්‍රිකට් ආයතනය සහ අනුග්‍රාහක ඩයලොග් ආසියාටා සමාගම සමරු තිළිණ පිළිගන්වනු ලැබිය.

ශ්‍රී ලංකා පි‍ලේ පිට දඟ පන්දු යවන්නා වන අකිල ධනන්ජයගේ පන්දු යැවීමේ ඉරියව්ව සැක සහිත බව ජාත්‍යන්තර ක්‍රිකට් කවුන්සිලය නිවේදනය කරයි.  එංගලන්තය සමග ගාල්ලේදී පැවැති පළමු ටෙස්ට් තරගයේදී අකිලගේ ඉරියව්ව සැක සහිත බවට විනිසුරුවන් පැමිණිළි කර තිබේ.

අයි.සී.සී. නීතියට අනුව දින 14ක් ඇතුළත ඉරියව්ව පරීක්ෂාවක් සිදුකළ යුතු අතර, එතෙක් තරග කිරීමේ හැකියාව ක්‍රීඩකයාට හිමිවෙයි.  මේ අනුව පල්ලෙකැ‍ලේ පැවැත්වීමට නියමිත දෙවැනි ටෙස්ට් ක්‍රිකට් තරගයට නම් කළහොත් ක්‍රීඩා කිරීමේ හැකියාව අකිල සතුව පවතියි.  අකිල ධනන්ජය ශ්‍රී ලංකාව වෙනුවෙන් ටෙස්ට් තරග 4ක්, එක්දින තරග 30ක් සහ 20-20 තරග 16ක් ක්‍රීඩා කර තිබේ.

ලකුණු 462 ක ඉලක්කය අසීරු වුවද පිතිකරුවන්ට එය හඹා යා හැකි බව ශ්‍රී ලංකා දඟ පන්දු පුහුණුකරු පියල් විජේතුංග ඊයේ පැවැති මාධ්‍ය හමුවේදී පැවැසීය.
ගාල්ල තණතීරුව වෙනදා මෙන් පන්දු යවන්නන්ට යෝග්‍ය ලෙස නොපෙනෙන බවත් එම නිසා පිතිකරුවන් සාර්ථක වුවහොත් ඉලක්කය හඹායා හැකි බව පියල් විජේතුංග පවසයි.
එංගලන්තය වෙනුවෙන් ශතකයක් රැස්කළ ජෙනින්ග්ස්ගේ ඉනිම ආදර්ශයට ගත යුතු බවත් කඩුල්‍ලේ රැඳී සිටීමෙන් ලකුණු ලබාගත හැකිබව ඔහු ඔප්පු කළ බවත් පියල් පවසයි.
මෙම තරගයේදී සමුගන්නා රංගන හේරත් විශිෂ්ට පන්දු යවන්නෙකු බවත් ඔහුගේ අඩුව පිරවීම අසීරු වුවද මලින්ද පුෂ්පකුමාර ඉදිරි තරගවලදී ලැබුණු අවස්ථාවෙන් උපරිම ප්‍රයෝජනය ගනු ඇතැයි පියල් විශ්වාසය පළ කළේය.

ලකුණු පුවරුව

එංගලන්තය මුල් ඉනිම - 342යි
කේට්න් ජෙනින්ග්ස් 46, ජෝ රූට් 35, ජොස් බට්ලර් 38, බෙන් ෆෝක්ස් 107, සෑම් කරන් 48, අදිල් රෂීඩ් 35,
සුරංග ලක්මාල් 73/3, දිල්රුවන් පෙරේරා 75/5

ශ්‍රී ලංකාව මුල් ඉනිම - 203යි
ඇන්ජලෝ මැතිව්ස් 52, දිනේෂ් චන්දිමාල් 33, නිරෝෂන් දික්වැල්ල 28, මොයින් අලී 66/4

එංගලන්තය දෙවැනි ඉනිම
රෝරි බර්න්ස් දු.දැ.ගි. (කරුණාරත්න)23
කේට්න් ජෙනින්ග්ස් (නොදැවී)146
මොයින් අලී ඇ. හේරත් ප. පෙරේරා3
ජෝ රූට් ඇ. දික්වැල්ල ප. හේරත් 3
බෙන් ස්ටෝක්ස් ප. පෙරේරා 62
ජොස් බට්ලර් ඇ. සිල්වා ප. හේරත් 35
බෙන් ෆෝක්ස් ඇ. මෙන්ඩිස් ප. අකිල 37
සෑම් කරන් (නොදැවී)0
අතිරේක 13

මුළු ලකුණු (පන්දුවාර 93කදී කඩුලු 6ක් දැවී)322
කඩුලු බිඳ වැටීම :- 1-60, 2-67, 3-74, 4-181, 5-258, 6-319
පන්දු යැවීම :- දිල්රුවන් පෙරේරා 30-3-94-2, සුරංග ලක්මාල් 9-2-30-0, රංගන හේරත් 23-1-59-2, අකිල ධනන්ජය 18.5-2-87-1, ධනන්ජය ද සිල්වා 12.1-2-41-0

ශ්‍රී ලංකාව දෙවැනි ඉනිම
දිමුත් කරුණාරත්න (නොදැවී)7
කෞෂාල් සිල්වා (නොදැවී)8
අතිරේක 0
මුළු ලකුණු (පන්දුවාර 7කදී කිසිවකු නොදැවී)15
පන්දු යැවීම :- සෑම් කරන් 1-1-0-0, ජේම්ස් ඇන්ඩර්සන් 1-0-4-0, මොයින් අලී 2-0-7-0, අදිල් රෂීඩ් 2-0-2-0, ජැක් ලීච් 1-0-2-0

ජාත්‍යන්තර ක්‍රිකට් සම්මේලනය සංවිධානය කරන 20-20 ලෝක කුසලාන කාන්තා ක්‍රිකට් තරගාවලිය අද (9දා) බටහිර ඉන්දීය කොදෙව්  දූපත්හිදී ආරම්භවේ.
රටවල් 10කගේ සහභාගිත්වයෙන් පැවැත්වෙන තරගාවලියේදී වත්මන් ලෝක ශූරියන් වන බටහිර ඉන්දීය කොදෙව්, ශ්‍රී ලංකාව, එංගලන්තය, දකුණු අප්‍රිකාව සහ බංග්ලාදේශය මෙවර ‘ඒ’ කාණ්ඩය යටතේ තරග වදින අතර, ඕස්ට්‍රේලියාව, ඉන්දියාව, අයර්ලන්තය, පාකිස්තානය සහ නවසීලන්තය ‘බි’ කාණ්ඩය යටතේ තරග වදියි.
ලීග් ක්‍රමයට පැවැත්වෙන පළමු වටයේ තරග ගයනාහි ජාතික ක්‍රිකට් ක්‍රීඩාංගණයේදී සහ ශා. ලුසියාහි ඩැරන් සමී ජාත්‍යන්තර ක්‍රිකට් පිටියේදී පැවැත්වේ.
තරගාවලියේ ආරම්භක දිනය වන අද ඉන්දියාව සහ නවසීලන්තය අතරද, ඕස්ට්‍රේලියාව සහ පාකිස්තානය අතරද, බටහිර ඉන්දීය කොදෙව් සහ බංග්ලාදේශය අතරද තරග පැවැත්වේ.
ශ්‍රී ලංකාව ලබන 10දා එංගලන්තය සමගින්
පළමු තරගයට සහභාගි වන අතර, 12දා දකුණු අප්‍රිකා සමගින්ද, 14දා බංග්ලාදේශය සමගින්ද, 16දා බටහිර ඉන්දීය කොදෙව් සමගින්ද තරග වදියි.
ශ්‍රී ලංකාව සහභාගි වන මූලික වටයේ තරග හතරම ශාන්ත ලුසියාහි ඩැරන් සමී ජාත්‍යන්තර ක්‍රිකට් පිටියේදී පැවැත්වේ.
චමරි අතපත්තුගේ නායකත්වයෙන් යුත් ශ්‍රී ලංකාව සහභාගි වූ පුහුණු තරග දෙකේදී නවසීලන්තය සහ අයර්ලන්තය හමුවේ පරාජයට පත්විය.
පළමු වටයේ තරග අද (9දා) සිට ලබන 19දා  දක්වා පැවැත්වෙන අතර, කාණ්ඩ දෙකෙහි ශූරයන් සහ අනුශූරයන් අවසන් පූර්ව වටයට සුදුසුකම් ලබයි.
අවසන් පූර්ව තරග ලබන 22දා ඇන්ටිගුවා දූපත්හි ශ්‍රීමත් විවියන් රිචර්ඩ්ස් ක්‍රීඩාංගණයේදී පැවැත්වෙන අතර, අවසන් තරගය ලබන 24දා එම ක්‍රීඩාංගණයේදීම පැවැත්වේ.

ශ්‍රී ලංකා කාන්තා ක්‍රිකට් සංචිතය:
චමරි අතපත්තු (නායිකාව), ශෂිකලා සිරිවර්ධන, යශෝධා මෙන්ඩිස්, හෂිනි පෙරේරා, රෙබෙකා වැන්ඩොට්, ඩිලානි මනෝදරා, ඕෂධී රණසිංහ, අමා කාංචනා, එෂානි ලොකුසූරිය, නිලක්ෂි ද සිල්වා, කවීෂා දිල්හාරි, සුගන්ධිකා කුමාරි, උදේෂිකා ප්‍රබෝධනී, ඉනෝෂි ප්‍රියදර්ශනී, ශ්‍රීපාලි වීරක්කොඩි

ශ්‍රී ලංකාවේ තරග සටහන
නොවැ. 10දා - එංගලන්තය සමග ශා. ලුසියාහිදී
නොවැ. 12දා - දකුණු අප්‍රිකාව සමග ශා. ලුසියාහිදී
නොවැ. 14දා - බංග්ලාදේශය  සමග ශා. ලුසියාහිදී
නොවැ. 16දා - කොදෙව් සමග ශා. ලුසියාහිදී

(පමෝද්)

Page 1 of 8

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.