lakbima.lk

අවුරුදු නිවාඩුව ලැබෙන්නට ඇත්තේ තවත් දින කිහිපයක් පමණි. වෙනදා මේ කාලයට කොළඹ නගරයේ ෙදෙනික ක්‍රියාවලිය සිදුවන්නේ ඇවිස්සුණු කඩිගුලක් සේය. දෙසක ගම්බිම් බලා යන්නට දරු මල්ලන්ටද බඩුමුට්ටුද අතින් කටින් එල්ලා ගත් ජනතාවය. දෙසක ඇඳුම් පැලඳුම් බඩු භාණ්ඩ කෑගසමින් විකුණනා වෙළෙන්දන්ය.

එහෙත් අද කොළඹ මහමගට බට විට දැනෙන්නේ උහුලාගත නොහැකි ගත දවාලන රස්නයයි. වෙළෙඳසල්වලද ලොකු වෙළෙඳාමක් සිදුනොවන සේය. මහමග අඩි දෙක තුනක් ඇවිද යන මගීන්ගේ මුහුණුවලින්ද දිස්වනුයේ දැඩි විඩාවකි. කොළඹ ගිනිගහන වීදි ඔස්සේ ඇවිද ගිය අපි පිටකොටුවේ සුප්‍රසිද්ධ නවගිරි හෝටලයට ගොඩවැදුණෙමු. හෝටලයේ අසුන්ගෙන සිටියේ කිහිපදෙනකු පමණි. අලුත් අවුරුද්ද අත ළඟ යැයි කියා කොළඹට එන යන මගීන් ප්‍රමාණය අඩුවී ඇති සෙයකි.

“මොන අවුරුදුද මහත්තයෝ. මෙදාපාර මිනිස්සුන්ටත් නෑ, අපිටත් නෑ. පේනවනේ කඩේ හැටි. සෙනඟ නෑ කොළඹ” නවගිරි හෝටලයේ කළමනාකරු වසීර් අහමඩ් අප හා කතාබහ ඇරඹුවේම විස්සෝපයෙනි.

“ගිය අවුරුදුවල සාමාන්‍ය දවස්වලටත් මීට වඩා සේල් තිබුණා. දවසේ වියදම් ටික ගෙව්වට පස්සේ  ලාච්චුවේ සතයක්වත් ඉතිරි වෙන්නේ නැති තැනට වැටිලා. රටම තියෙන්නේ අවුලක” ඔහු පවසන්නේ දේශපාලනමය අස්ථාවර භාවය හේතුවෙන් මෙවැනි තත්ත්වයක් උද්ගතව ඇති බවය. උත්සව සමය නිසා සේවකයන් අත්තිකාරම් හා පාරිතෝෂික මුදල්ද වැටුපට අමතරව බලා‍පොරොත්තු වන බවත් එසේ දීමේදී තත්ත්වය තවත් බරපතළ වන බවත් ඔහු වැඩිදුරටත් පෙන්වා දෙන්නේය.

“මේ වැඩ කරන අය බදුල්ල, මොනරාගල, බිබිල වගේ දුර ඈත පළාත්වල අය. ඒ අය අවුරුද්දට ගමට යන්න ආසාවෙන් ඉන්නේ. ඒ නිසා 12 වැනිදා රෑ ඉඳල හෝටලය වහනවා. ආයෙ අරින්න වෙන්නේ 21 විතර. ඒකත් හරිම අමාරු වැඩක්. මොකද අවුරුදු නිවාඩුවට ගිය සේවකයෝ ආපහු එන්න කැමැත්තක් නෑ. ගෙනියපු සල්ලි සේරම ඉවර කරලා ණයත් වෙලා. අපිට ඒවත් ගෙවලා තමයි ඔවුන් එක්ක එන්න වෙන්නේ. ගිය අවුරුද්දේ අයිතිකාර මුදලාලියි මායි වාහනයක් අරන් ගිහින් දවසක්ම  කරක් ගහලත් අල්ලගන්න පුළුවන් වුණේ දෙන්නයි. එයින් එක්කෙනෙකුත් බිබිලෙ ටවුමේ ඉඳලා බලෙන් වගේ එක්කන් ආවේ, අපිට හරියට ලිපිනයක් දෙන්නේ නෑ. ගියාම ෆෝන් ඔෆ් කරනවා. එයාලට සල්ලි නැති වුණාමයි රස්සාව මතක් වෙන්නේ. දැන් වැඩ කරන 18 දෙනා අවුරුද්දෙන් පස්සෙ ආපහු ගෙන්න ගන්න එකත් අභියෝගයක්” ඔහු පවසන්නේ සිනාමුසුවය.

කොළඹ ජනාකීර්ණ ප්‍රදේශවල බහුතරයක් ආපනශාලාවල සේවය කරන්නේ බොහෝ දුරබැහැර ප්‍රදේශවලින් පැමිණි පුද්ගලයන්ය. එසේ හෙයින් අලුත් අවුරුද්දේ උණුසුම පහව ගොස් සෑහෙන දවසක් ගතවනතුරු ආපනශාලාවල ක්‍රියාකාරීත්වය යථා තත්ත්වයට පත්වන්නේ නැත. මේ හේතුවෙන් ලොකුම අභියෝගයට මුහුණදෙන්නේ කොළඹ මේ දිනවල ඉතිරි වන පිරිසය.

ආරක්ෂක සේවා, සුපිරි වෙළෙඳසල්, තරු හෝටල්, සමහර මූල්‍ය ආයතන මෙන්ම බහුතරයක් මාධ්‍ය ආයතනවලද සේවකයන්ට අලුත් අවුරුදු කියා ලොකු නිවාඩුවක් හිමිවන්නේ නැත. සේවා මුර ක්‍රමයට සේවයේ යෙදෙන මෙවැනි සේවකයෝ පාළුවට යන කොළඹ  අන්ත අසරණ වෙති. ආහාර ගැනීමට ආපනශාලාවක්, බෙහෙත් ගැනීමට වෛද්‍යවරයෙක්, අත්‍යවශ්‍ය යමක් මිලදී ගැනීමට  වෙළෙඳසලක් සොයා පාළු කොළඹ පීරීම කෙතරම් අසීරු අත්දැකීමක්ද දැයි දන්නේ ඒ දුක විඳි අයෙක්ම පමණි.

සිය දහස් පා යුග ගැටෙනා කොළඹ ගෙන්දගම් ‍පොළව පාළුවට යන මේ දින කිහිපයේ ඉඳහිට හෝ විවෘතව පවතින්නේ මුස්ලිම් හෝටලයක් පමණි. ඊට හේතු වන්නේ කොළඹ ජීවත් වන්නන්ගෙන් සියයට 75ක් පමණ වන තාවකාලික පදිංචිකරුවන් ගම්බිම් බලා ගියපසු මෙහි ඉතිරිවන බහුතරය මුස්ලිම් හා දමිළ පවුල් වීම නිසාය.

“අපේ හෝටලය 13-14 ඇරලා. දුර සේවකයන් යවනවා කලින්. මේ කිට්ටුව සිටින මුස්ලිම් සේවකයන් ඒ දවස්වලටත් වැඩට එනවා. ඒ නිසා අපිට ගැටලුවක් නැතිව කඩේ අරින්න පුළුවන්. ඒත් ඉතින් සෙනඟ අඩුයි. අපිට ගොඩක් පාඩුයි, ඒ කාලෙට හෝට‍ලේ අරින එක. බොහෝ මුස්ලිම් හෝටල් අවුරුද්දට කියලා වහන්නේ නෑ. අන්තිමට ඒ දවස්වලට කොළඹ අසරණ වෙන මිනිස්සුන්ට ඉතිරි වන්නේ ඒ කඩ ටික තමයි“

පිටකොටුවේ බෝගහ හන්දියේ සිසිල හෝටලයේ අයකැමි ෆවාස් පවසන්නේ එසේය. සිය සේවක මණ්ඩලය 10ක් පමණ වුවත් ඒ දින කිහිපය දුවන්නේ දෙතුන් දෙනෙකුගෙන් බව ඔහු පවසයි.

මරදානේ බුහාරි හෝටලය දශක ගණනාවක් තිස්සේ සිය ජනප්‍රියත්වය සහ ආවේණික කෑම වට්ටෝරුව වෙනස් නොකර එක සේ ජනතාව අතර නම දිනාගත් ආයතනයකි. අවුරුද්දේ කාලවකවානු වෙනසක් නැතිව ඒ වෙත ඇදෙන අඛණ්ඩ පාරිභෝගික පිරිසක් වෙති. එහෙත් අලුත් අවුරුදු සමයේ බුහාරි හෝටලයේ කළමනාකාරීත්වයද මුහුණදී ඇත්තේ සේවක ගැටලුවටය. අපි එහි ගිය මොහොතේත් සේවකයන් ප්‍රමාණවත් නොවීම නිසා එහි ආපනශාලාව විවෘත කර තිබුණේ එක මහලක පමණි.

“අද බොහොම කාර්යබහුල දවසක්. ඒත් අපේ සේවකයන්ට අලුත් අවුරුද්දට නිවාඩු දෙන්න වෙලා තියෙනවා. සේවකයන් 100ක් විතර මෙහි සේවය කරනවා. ඒ අය ගාල්ල, මාතර, නුවර, කුරුණෑගල ආදී ඈත පළාත්වල අය. ඉතින් අපිට 12 දා අවන්හල වහලා ආයෙත් විවෘත කරන්න වෙන්නේ 17න් පස්සේ තමයි. හෝම් ඩිලිවරි සර්විස් එකත් නවත්වන්න වෙනවා. ඒ කාලෙටත් පාරිභෝගිකයන් හෝටලය අරීවි කියලා බලා‍පොරොත්තු වෙනවා. ඒත් සේවකයන් ගැන හිතලා වහන්න වෙනවා. කොහොම වුණත් නැවත සාමාන්‍ය තත්ත්වයට එද්දී 20-21 වත් වෙනවා”

බුහාරි හෝටලයේ කළමනාකරු කෝසල කුරුවිටගේ පෙන්වා දෙන්නේය.

ආමර්වීදියේ මීට මාස කිහිපයකට පෙර ආරම්භ කළ ආකර්ෂණීය ආපනශාලාවක් වන ඛිභපපර ධබ ජ්භඵඪධද ද පාරිභෝගිකයන් නිතර යන එන තැනකි. ඔවුන්ටද අලුත් අවුරුදු සමයේ ආපනශාලාව වසා දැමීමට සිදුව තිබේ.

“මේ ප්‍රදේශයේ බොහෝ දෙනා අතර අපේ ආපනශාලාව ඉක්මනින් ජනප්‍රිය වුණා. අපි වෙළෙඳසල ආරම්භ කරලා මාස තුනයි. ඒ කා‍ලේ ඇතුළත අපි එක්ක එකතු වුණු පිරිස අතරින් අලුත් අවුරුද්දට ගමේ නොයන කිහිප දෙනෙක්ම හිටියා. ඒ අයගේ ඉල්ලීම වුණේ අවුරුද්ද දවස්වලටත් කඩේ අරින්න කියලා. ඒත් අපිට අත්‍යවශ්‍ය නඩත්තු කටයුතු ටිකක් කරගන්නත් වෙලා තියෙන්නෙ මේ කාලෙදි. අපේ සේවකයන් වැඩි දුරක අය නමෛයි. ඒත් එයාලටත් අවුරුදු දවස් දෙකේ පවුලෙ අය එක්ක ඉන්න ඉඩදෙන්න ඕනනේ. අපේ සූපවේදියාත් ළඟපාත කෙනෙක් නිසා අපි නඩත්තු කටයුතු අවසන් කරලා අනිවාර්යෙන්ම 16 දා අවන්හල විවෘත කරනවා. ජනතාව පත්වන අපහසුතාව ගැන කනගාටුයි තමයි“ ආමර් වීදියේ ඛිභපපර නධබ ජ්භඵඪධද හි කළමනාකරු මලීෂ පෙන්වා දෙයි.

මීගමුව පාරත් නුවර පාරත් අවිස්සාවේල්ල පාරත් සම්බන්ධ වන කේන්ද්‍රස්ථානයක පිහිටි ග්‍රෑන්ඩ්පාස් කොස්ගස් හන්දියද අවුරුද්දට පාළුවට යන තවත් ජනාකීර්ණ මංසන්ධියකි. කොස්ගස් හන්දියේ සුප්‍රකට සියාරා බේක් හවුස්හි හිමිකාරිනි චමිලා එදිරිසිංහද අලුත් අවුරුද්ද හේතුවෙන් තමන්ට මුහුණදීමට වන ගැටලු අප හා පැවැසුවාය.

“අපේ බේකරියෙත් ආපනශාලාවෙත් සේවකයන් 15 බැගින් 30 දෙනකු වැඩ කරනවා. මේ අය ඔක්කොම අවුරුද්දට නිවාඩු ගන්නවා. ඒ අයට තුන් මාසයක වැටුප්, අවුරුදු බෝනස් මුදලකුත් දිය යුතුයි. එවිට එක් අයෙක් විශාල මුදලක් අරගෙනයි ගමට යන්නේ. අපිට එකවර අපේ ගිණුම්වල මුදල් හිස් කිරීමට සිදුවෙනවා. ලොකු මුදලක් අරන් යන නිසා ඒ අය ආපසු ගෙන්න ගන්න එකත් ටිකක් අමාරුයි. ජංගම ගිණුම්වල මුදල් නැතිවීම නිසා අවුරුද්ද ඉවර වෙද්දීම බැංකුවලින් අපට කතා කරනවා. ඒත් සේවකයෝ එන්නේ ප්‍රමාදවෙලා නිසා අපේ ව්‍යාපාරය ස්ථාවර කරගන්න ටික කාලයක් යනවා. ඒ කාලය තුළ ආදායම් අඩුවීමෙන් අපි විශාල අපහසුතාවකට පත්වෙනවා. ඒ වගේම අපෙන් දිනපතා කෑම ගත් බොහෝ පිරිසක් අවුරුදු දිනවලත් කොළඹ රැඳෙනවා. ඒ අය පත්වන අපහසුතාව ගැනත් කනගාටුයි. කොහොම වුණත් අපිට යළිත් හේටලය අරින්න පුළුවන් වෙන්නෙ සතියක් හමාරක් ගතවුණාට පස්සෙයි“

එසේ වුවත් කොස්ගස් හන්දිය අවටද මුස්ලිම් ජනතාව විශාල වශයෙන් වාසය කරන නිසා මුස්ලිම් ආපනශාලා කිහිපයක් ඒ දිනවලද විවෘතව පවතී.

ආමර් වීදියේ සුප්‍රකට ඉන්දියානු අවන්හල,

ශ්‍රී වානි විලාස්ද සිංහල, දෙමළ, මුස්ලිම් බහුතර ජනතාව අතර ආකර්ෂණීයත්වයට පත් ස්ථානයකි. අවුරුදු, ‍පෝය, නත්තල ආදී අවස්ථාවල සෙසු අවන්හල් වසා දැමුවද “වානි විලාස්” විවෘත වන බව බොහෝ දෙනා දනිති. එහි සිය ගණනක් වූ කාර්ය මණ්ඩලය ඒ අවට පදිංචිකරුවන් බහුතරයකගෙන් සැදුම්ලත් වීම ඊට එක් හේතුවකි.

“ඒත් අපි 14 දා උදේ වරුවේ සිංහල දෙමළ අලුත් අවුරුද්ද නිමිති කරගෙන හෝට‍ලේ වහනවා. මේ ‍පොඩි වෙලාවට එළියට යන සේවක පිරිස අවුරුදු සමරලා එහෙම ඉවර කරන් ආපහු එකතු කරගන්න එක ටිකක් අමාරු කාරියක්. ඒත් අපි එදා රෑත් සුපුරුදු විදියට පාරිභෝගිකයන් වෙනුවෙන් අවන්හල විවෘත කරනවා” වානි විලාස්හි අයකැමි පන්නීර් සෙල්වම් අප හා පවසන්නේ මඳහසකිනි.

“මේක ඉතින් කාගෙත් සතුටු දවසනේ. මිනිස්සු බඩගින්නෙ තියල අපි තනියම අවුරුදු සමරන එක හරි නෑ” ඔහු පවසන්නේ අලුත් අවුරුද්දට කොළඹ දුක්විඳින කිහිප දෙනා කෙරෙහි උපන් සැබෑ ළෙන්ගතුකමකිනැයි සමුගන්නා අපට සිතුණි.

ඡායාරූප : මලිත් ගමගේ

මිහිරාන් කරුණාරත්න

  1. ශිවශංකර් මෙනන් ගෝඨා හමුවෙන් රටට දෙන ඉඟිය
  2. එන්.ඩී.ටී. ගහලයෝ ශනිල්ක මරා ගනිති
  3. තරුණයකු අතුරුදන් කර වසර 11ක් නිදැල්ලේ සිටි ඒ.එස්.පී.
  4. බැඳුම්කර හොරකමේ තෝරු මෝරු හතරක් ඇල්ලූ මෙහෙයුම
  5. මේ රස්නය මරණයෙන්ද කෙළවර විය හැක
  6. තුසිතපුරයේ අපා දුක් විඳින, රජකමටත් සුදුසු මිනිස්සු
  7. ජ’පුර සරසවියෙන් ලෝකයට අලුත් වැඩක්
  8. ශ්‍රී ලංකා-ඉන්දියා බැතිමතුන් එකට වැඳ වැටෙන කච්චදූව
  9. සිරිසඟබෝ රජු හිස දන් දුන්නේ අත්තනගල්ලේ දී නොවේ
  10. නීතිඥ නාගානන්දට වුණා වගේ පෙරකදෝරු රස්සාව නැතිවෙන්නේ කොහොමද?
  11. දකුණේ නිදන් හාරද්දී උතුරේ හාරන්නේ රත්තරන්
  12. අවුරුදු විසිපහක්ම රෝදපුටුවේ ගිය හමුදාවේ ධෛර්යය
  13. දරුවන් රකින්නට නුවර කලාවියේ දෙන අපූරූ දානය
  14. ස්ථාන මාරුවකින් කෙළවර වූ ජී. ටී. බොස්ගේ වැදි නැටුම
  15. ඉන්දියාවේදී කොටු වූ බ්ලූමැන්ඩල් සංඛ
  16. කැඩුණු අමුණ බැඳගන්නට මුදල් නැතිව අකලට මහලු වෙන ගමක්
  17. ජංගම දුරකථනයෙන් කතා කර කර දුම්රිය මග දිගේ එලොව යන්නෝ
  18. ඩුබායි ගෙන ගිය බව කියූ කෝටි 700 දියමන්තිය පානදුරෙන් මතුවූ හැටි
  19. මත්පෙති සමග ටෙලි නිළියක් කොටු වූ පොල්හේනේ බිච් පාටිය
  20. කාන්තාවන්ට දුම්රිය මැදිරි වෙන් කිරීමෙන් අනික් මැදිරි වල තද බදයක්
  21. නැගෙනහිර වෙරළේ ඇස්කිමෝ ගෙවල්
  22. ඉතිහාසයේ විශාලම මූල්‍ය ආයෝජනය සමග “ළඟම පාසල - හොඳම පාසල“ වන අයුරු
  23. අල ගෝනියක සැඟව හොංකොං ආ සියවසක් පැරණි බෝම්බය
  24. පාතාලයන්ට නම් තබන්නේ මෙහෙමයි
  25. ලංකාව කිට්ටුවත් මළ මුහුදක්

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.