lakbima.lk

“උඹලාගේ ආයුධ, උඹලාට ම පහර දීමට යොදා ගැනීම අපේ සිංහලකමට නිගාවක්....” ඒ මීට සියවස් දෙකකට පමණ ඉහත දී ඇසුණු, මොණරවිල කැප්පෙටි‍පොළ මහ දිසාවේගේ අභීත හඬයි. ඉංග්‍රීසි අධිරාජ්‍යවාදයෙන් රට බේරා ගනු වස් දියත් කළ ඌව වෙල්ලස්ස සටනේ නායකත්වය භාරගත් මොහොතේ, කැප්පෙටි‍පොළ මහ දිසාවේ තමන් සමග ආ ඉංග්‍රීසින්ගේ හමුදාවත්, ඔවුන්ගේ ආයුධත්, ආපසු හරවා යැව්වේ එසේ පවසමිනි.

එක්දහස් අටසිය දහඅටේ ජාතික විමුක්ති අරගලයේ වීර සෙන්පතියා වූයේ, මොණරවිල කැප්පෙටි‍පොළ මහ දිසාවේ ය. ජාතියේ අභිමානය වෙනුවෙන් ඔහු සිය ජීවිතය පිදූයේ හරියට ම මීට සියවස් දෙකකට ඉහතදී ය. ඔහු දැයෙන් සමුගෙන ලබන නොවැම්බර් විසිඅට වනදාට හරියටම වසර දෙසීයකි. කැප්පෙටි‍පොළ මහ දිසාව ගැන මතකය යළි අලුත් වූයේ, ඔහු ඉංග්‍රීසින්ගේ අත්අඩංගුවට පත්වෙන්නේ ද, හරියට ම මීට වසර දෙසීයකට ඉහත අද වැනි දිනයක (28දා) වන බැවිනි. මේ ඔහුගේ  කතාව ය.

දහඅට වැනි සියවසේ මුල් භාගයේදී, මාත‍ලේ, තමන්කඩුව සහ සත් කෝරළේ දිසාවේ පදවි දැරූ රාජපක්ෂ වික්‍රමසේකර මුදියන්සේ රාළහාමි තම නිජභූමිය වූ සතර කෝරළයේ සිට පැමිණ, උතුරු මාත‍ලේ, උඩුගොඩ උඩසිය පත්තුවේ මොණරවිල තම වාසභූමිය කර ගත්තේ ය. මේ පරපුරට අයත් කැප්පෙටි‍පොළ හෙවත් ගොලහැල, රාජාධිරාජසිංහ සමයේදී දියවඩන නිලමේ පදවිය දැරී ය. ඔහු සරණපාවා ගත්තේ, මොණරවිල  කුමාරිහාමි ය. කැප්පෙටි‍පොළ  මහ දිසාවේ ඔවුන්ගේ වැඩිමහල් පුත්‍රයා ය.

මව්පිය දෙපළගේ පරපුර වෙනුවෙන් ඔහු මොණරවිල කැප්පෙටි‍පොළ නමින් ප්‍රකට විය.

එක්දහස් අටසිය පහළොවේදී, කන්ද උඩරට අධිරාජ්‍යවාදීන්ට යටත් වූ උඩරට ගිවිසුමෙන් පසු, ඌව පළාත් දිසාවේ පදවියට පත්වෙන්නේ, කැප්පෙටි‍පොළ නිලමේ ය.

කැප්පෙටි‍පොළ මහ දිසාවේ උඩරට ගිවිසුමට සිංහලෙන් අත්සන් තැබූ නිලමේවරුන්ගෙන් ද එක් අයෙකි. බ්‍රිතාන්‍ය අණ පනත්වලිනුත්,  ඔවුන්ගේ  නොපනත්කම්වලිනුත්,  පීඩාවට පත්වූ සිංහලයා ඉංග්‍රීසින්ට එරෙහිව අවිඅමෝරා ගන්නට වැඩිකලක් ගත වූයේ නැත. ඌව වෙල්ලස්ස, වලපනේ, සබරගමුව, මාත‍ලේ, තුම්පනේ, හාරිස්පත්තුව සහ දුම්බර ඒ අතර වැඩි තැනක් ගත්තේ ය. මේ සටන් මර්දනය කරනු වස්, පෙරමුණට යැවීමට ඉංග්‍රීසින් තීරණය කරන්නේ, කැප්පෙටි‍පොළ දිසාවේ ය. එක්දහස් අටසිය දහහතේ නොවැම්බර් දහහත් වෙනිදා, ඉංග්‍රීසි සහ සිංහල හමුදාවක් රැගෙන ඔහු ඌව වෙල්ලස්සට යන්නේ ඒ අනුව ය.

සිංහලයේ නාමයෙන්, සිංහල සටනේ නායකත්වය භාරගන්නා ලෙස, සිංහල සටන්කාමීහු කැප්පෙටි‍පොළ දිසාවට ආරාධනා කරන්නේ මෙහිදී ය.

සිංහල සටනට පණ පෙවූ කැප්පෙටි‍පොළ මහ දිසාවේ පමණක් නොව, පිළිමතලාවේ දිසාවේත්, මඩුගල්‍ලේ දිසාවේත්, නිසා ඉංග්‍රීසින්ට හැදුණේ  සුළුපටු හිසරදයක් නොවේ ය. විමුක්ති සටනට පණ‍පොවමින් සුද්දන්  අන්දමන්ද  කළ මොවුන් තිදෙනා පිළිබඳව නිශ්චිත හෝඩුවාවක් දැනගන්නට නොමැතිකමින් ඉංග්‍රීසි හමුදාව දැඩි අසහනයට පත්ව සිටියේ, යළි කොයි මොහොතක කොතැනින් සටන් වදිනු ඇතැයි කුහුලෙන් හා බියකිනි. ඒ නිසා ම දිවා රෑ වෙහෙසෙමින්  ඔවුන්  මාන  බැලූයේ, මේ නායකයන් ගැන යම්තම් හෝ හෝඩුවාවක් දැනගැන්මට ය.

මේ කාලයේදී ඔවුන් තිදෙනා ම නැවතී සිටියේ, නුවර කලාවියේ කාහල්ල ගමේ වලව් ගොඩනැගිල්ලක ය. එය පිහිටියේ සිංහල භටයන් තුන්සියයකගේ පමණ මුරකාවල් මැදිනි. මේ වන විට ඉංග්‍රීසින්ගේ දැඩි මර්දනකාරී පිළිවෙත් නිසා ම සිංහ‍ලේ සටන් නායකයෝ විවිධ ප්‍රදේශවල බොහෝ දුරට තනි වූහ.  ඒත්  එක්කම  සිංහ‍ලේට  ද්‍රෝහිකම්  කරන්නවුන්ට ඉංග්‍රීසින් තාන්නමාන්න දුන් හෙයින් බොහෝ දෙනා ඊට ලොල් වූහ. ඒ නිසා ම පාවාදීමේ ද්‍රෝහීන් ගණන ද වැඩි විය. එහෙත් මොණරවිල කැප්පෙටි‍පොළ මහදිසාවේ ඉන්නා තැනක හෝඩුවාවක් සොයා ගැන්ම ඉංග්‍රීසින් සිතූ තරම් පහසු කාර්යයක් වූයේ නැත.

එක්දහස් අටසිය දහඅටේ අගභාගය වෙද්දී මේ තත්ත්වය තවදුරටත් දරුණු විය. ඉංග්‍රීසි හමුදාවේ පරවහගම සේනාංකය භාරව සිටි කපිතාන් ෆේ‍රසර් නුවර කලාවියේ මානාවැව අසල වාඩිලාගෙන වටපිටාවේ වන හැම කැලෑවක් ම පීරා බලමින් සිංහල නායකයන් සෙවීමෙහි යෙදුණේ ය. මේ අතරේ අනුරාධපුරයට ගිනිකොණ දෙසින් පුලියන්කුලමේ කඳවුරු බැඳ සිටියේ ලෙෆ්ටිනන්ට් විලියම් ඔනීල් නැමැත්තා ය. සිංහ‍ලේ නායකයන්ගේ හැසිරීම්, ගමන් බිමන්, ස්ථාන මාරු කිරීම් ආදී රහස් රැසක් ඔවුනට ඔත්තු වශයෙන් ලැබිණි. ඇතැම් ඒවා සත්‍යයෙන් තොර වුව ද ඒ හැම තොරතුරක් ඔස්සේ ම සේනාංක මෙහෙයවන්නට ඉංග්‍රීසිහු වගබලා ගත් හ. දිනය ඔක්තෝබර් විසි අට දා ය.

එදා පාන්දර එදා මෙදා තුර ලැබුණ වටිනා ම රහස් ඔත්තුව ඔවුනට ලැබිණි. ඒ, කැප්පෙටි‍පොළ දිසාවේ සිටිනා ඉසව්වක් ගැන ය. ඔත්තුව ලැබුණේ, විලියම් ඔනීල්ට ය. තත්පරයක් හෝ පමා නොවූ ඕනීල් සන්නද්ධ භටයන් ද පිරිවරා  ගනිමින්,  පරවහගම  බලා පිටත් විය. පරවහගමට ළඟා වෙන්නට ඔහුට සැතපුම් දහසයක දුරක් ගෙවන්නට සිදු විය. මේ ගැන ඉවවැටුණු සිංහල භටයෝ ඔවුනට පහර දීමේ සූදානමක සිටියත්, ඉංග්‍රීසින්ගේ ගිනිඅවි බලයට මුහුණ දීගත නොහී ඔවුහු පලා ගියෝ ය. එහෙත් අවාසනාවකට එක් මුර භටයෙකු ඕනීල්ගේ අත්අඩංගුවට පත් වූ අතර, සිංහ‍ලේ නායකයන්ගේ නවාතැන ගැන තොරතුරු ලබා ගන්නට ඕනීල් සමත් වෙන්නේ ඒ අනුව ය. 

ඉතිහාසය සාක්ෂි  දරන්නේ, “මම තමයි කැප්පෙටි‍පොළ” යි දෙවරක් ම තමා හඳුන්වා දෙමින් ඉදිරියට ආ, කැප්පෙටි‍පොළ මහ දිසාවේ, සෙනෙවියාගේ අත අල්වා ගත් බවය. ඒ අසල ඔත්පලව කවිච්චියක වැතිර සිටි, මාත‍ලේ සිංහල පෙරමුණු නායක පිළිමතලාවේ දිසාවේ ද ඉංග්‍රීසින්ගේ අත්අඩංගුවට පත් වූ  නමුදු,  මේ කලබගෑනිය අස්සේ එතැනින් පලා යන්නට මඩුගල්‍ලේ දිසාවේ සමත් වීය.

සුද්දෝ මේ ජය සැලකූයේ තමන් එතෙක් ලැබූ විශිෂ්ටතම ජයක් ලෙසිනි. තමන් ලැබූ මේ අනපේක්ෂිත ජයග්‍රහණයෙන් ඔනීල් කෙතරම් අමන්දානන්දයට පත්වූයේද යත්, ඒ ගැන ඔහු වහාම පරවහගම සේනාංකය භාර කපිතාන් ෆේ‍රසර් වෙත වාර්තාවක් යවන්නට කටයුතු කළේ ය. එමගින් ඔහු හෙළි කරන ලද්දේ, කැප්පෙටි‍පොළතුමන් අල්වා ගන්නට තමන් කළ මෙහෙයුමේ තරම ය.

කැප්පෙටි‍පොළ මහ දිසාවේ තමන් භාරයට පත් වූ වග ඇසූ රොබට් බ්‍රවුන්රිග් ආණ්ඩුකාරවරයා එමගින් උද්දාමයට පත්වූයේ, මුළු ලංකාව ම අතට පත්වූ කලෙක මෙනි. මෙය

සියලු ම ඉංග්‍රීසින් විසින් උත්කර්ෂවත් ලෙස සැමරිය යුතු ජයග්‍රහණයක්  සේ සැලකූ බ්‍රවුන්රිග් ඒ වසරේ ඔක්තෝබර් තිස්එක් වන දා මුළු දිවයින පුරා සෑම කඳවුරක ම ජය සමරන ප්‍රීති උත්සව දිනයක් සේ සලකන්න යැයි විශේෂ නිවේදනයක් ද නිකුත් කළේ ය.

ඉංග්‍රීසි ආණ්ඩුවට එරෙහිව කැරලි ගැසූවයි, චෝදනා ලැබූ කැප්පෙටි‍පොළ මහ දිසාව, එක්දහස් අටසිය දහඅටේ නොවැම්බර් විසිහය වෙනිදා, බෝගම්බර පිටියේදී එල්ලා මරන්නට නියම විය. සිංහලයේ අභිමානය වෙනුවෙන් ඔහු එදා දැයෙන් සමුගත්තේ සිංහලයන් ලෙස හෙට දිනයට ද අපට ආඩම්බරයෙන් සිහිපත් කළ හැකි මතකයක් ද ඉතිරි කරමිනි.

ගයාත්‍රි ගීගනආරච්චි

  1. දේශීය කිරි කර්මාන්තයේ විනාශය අත ළඟයි
  2. 1818 කළ විනාශයට ඌව පළාත් සභාව සුද්දගෙන් වන්දි ඉල්ලයි
  3. ලංකාවේ එකම සුනඛ සොහොන් පිටිය
  4. කටුපොල් මාරයාගේ දිග පළල කරළියට
  5. උඩවලව ජාතික වනෝද්‍යානයට බලංගොඩින් නව පිවිසුමක්
  6. ලක්බිම හෙළිදරව්වෙන් පසු ගාමිණී දිසානායක පදනමෙන් සියවස් පිරි බාලම්මාට උපහාර
  7. යළි සුනාමියක් ආවොත් ලංකාවට මොකක් වෙයිද?
  8. ජංගම ග්‍රහලෝකාගාරයක් තනිවම හැදූ බදුරලියේ තරංග මුළු රටටම එකයි
  9. සංඥා බස අප බසටත් අප බස සංඥා බසටත් පෙරළන අලුත්ම මෘදුකාංගය
  10. හඬක් නැතිව පුපුරණ උතුරේ බිම්බෝම්බ
  11. දරුවන් යකඩ කඩෙන් බේරාගන්න සටන් කරන ටොයෝටා තාත්තලා
  12. බුදුන්ගේ පාද ස්පර්ෂය ලද පින්බිම දීඝවාපිය
  13. සංඝරත්නයේ චීවරය දේශපාලනඥයන්ගේ වළං අල්ලන දැලිකඩක් කරන්න දෙන්න එපා
  14. කාවන්තිස්ස රජුගේ අත්සන සහිත සෙල්ලිපියක් ඇති තරුලෙන්ගල
  15. ආදම්ගේ පාලම ජාතික උද්‍යානයට වින කටිනා ඌරුම‍ලේ හෝටල්
  16. නියගයෙන් බැට කන කාන්තාවෝ කල්පිටියේ වගා බිම්වල රැකියාවන් සොයා යති
  17. හදවත විවෘත නොකර කළ ලංකාවේ පළමු හදවත් කපාට සැත්කම
  18. "සොබා දහමේ යොවුන් ඇස' චිත්‍ර හා ඡායාරූප ප්‍රදර්ශනය 21 සිට
  19. කොළඹ කනත්තේ හුදකලා වූ ධර්මපාලතුමාගේ භෂ්මාවශේෂ තැන්පත් වෙහෙර ගෙය
  20. රටටම සර්වඥ ධාතු බෙදාදුන් නීලගිරි සෑය
  21. බෙරපදයක හඬට පත්තු වෙන සබරගමු මහ සමන් දේවාලයේ කාලතුවක්කුව
  22. එකම දවසේ එකම කුස ඉපදී එකම දවසේ හමුදාවට බැඳී එකම දවසේ මේජර් ජෙනරාල්වරුන් වූ සොහොයුරන් දෙදෙනා
  23. පරිගණක ක්‍රීඩා කරන්න දෙන්න එපා: දරුවන්ගේ ඇස් දුර්වල වෙනවා
  24. හොඳ පුරවැසියෙක් සමාජයට දායාද කරන තැන දහම් පාසලයි
  25. හදවත විවෘත නොකර කපාට බද්ධ සැත්කම් තුනක් මෙරට දී පළමු වරට

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.