lakbima.lk



මුහුණුපොත හරහා තරුණ තරුණියන් එකමුතු කරගෙන පවත්වන සාද ගැන දැන් නිතර අසන්නට ඇති අතර පසුගිය වසර කීපය තිස්සේම නීති විරෝධී දේ කෙරුණු එවැනි සාද ගැන අසන්නට, දකින්නට ලැබුණු අවස්ථාවන්ද බොහෝය. පසුගිය සතියේදී තවත් එවැනිම සාදයක් ගැන අසන්නට ලැබුණේ තංගල්ල මැඩිල්ල ප‍්‍රදේශයෙනි.
මෙහිදී විශේෂත්වය වූයේ නීති විරෝධී මත්පැන්, මත්ද්‍රව්‍ය හා තවත් නීතියට පටහැනි දේවල් සිදුවූ මෙම සාදයේදී අත්අඩංගුවට ගැනුණ තරුණ තරුණියන්ගේ වැඩි පිරිස මේ රටේ හද්දා පිටිසර දුෂ්කර ගම්මානවල තරුණ තරුණියන් වීමයි.
ඉකුත් 07 වැනි දින තංගල්ල මැඩිල්ලේ සංචාරක හෝටලයක් තුළ පැවැති මෙම සාදය පිළිබඳව මුලින්ම තොරතුරු ලැබී තිබුණේ තංගල්ල මූලස්ථාන පොලීසියේ බුද්ධි අංශ නිලධාරීන්ටය. පසුව එම තොරතුරු තංගල්ල කොට්ඨාසයේ  පොලිස් අධිකාරී ලක්සිරි ගීතාල් අතට පත්විය. පොලිස් අධිකාරී වරයාගේ උපදෙස් මත ඉතා රහසිගත මෙහෙයුමක් සිදු කිරීමට තංගල්ල පොලීසියේ ප‍්‍රධාන පොලිස් පරීක්ෂක ලාල් චන්ද්‍රසිරි පියවර ගත් අතර ඒ සඳහා වීරකැටිය පොලීසියේ හා බෙලිඅත්ත පොලීසියේද නිලධාරීන් කණ්ඩායමක් කැඳවීමට පොලිස් අධිකාරිවරයා පියවර ගෙන තිබුණි.
පොලිස් ස්ථාන තුනෙන් පොලිස් නිලධාරීන් 50 දෙනකු පමණ සහභාගි වී සිටි අතර වැටලීම පිළිබඳව පොලිස් නිලධාරීන්ටවත් තොරතුරු ලබා නොදෙන්නට ඉහළ පොලිස් නිලධාරීන් පියවර ගෙන තිබුණි. රාත‍්‍රී අටට පමණ මැඩිල්ල ප‍්‍රදේශයට ගිය පොලිස් නිලධාරීන් මුහුණුපොතේ සාදය පැවැති සංචාරක හෝටලය වට කළෝය. අධික ශබ්ද භාවිත කරමින් විවිධ වූ මත්ද්‍රව්‍ය භාවිත කරමින් හෝටලය තුළ අනඟ රැුඟුමන්වල යෙදුණු ළාබාල තරුණියන් කීපදෙනකු හා කාන්තාවන් කිහිප දෙනකුද පොලිස් අත්අඩංගුවට පත්විය. තරුණයන් සය දෙනකුද පොලිස් අත්අඩංගුවට පත්වූ අතර ඔවුන්ද වයස අවුරුද 20 ත්, 25 ත් අතර පසු වෙන්නන්ය.
අත්අඩංගුවට පත් තරුණ තරුණියන් අතර රටේ දුෂ්කර ප‍්‍රදේශවලින් පැමිණි කිහිප දෙනෙකුම වූහ. ඔවුන් සියලූ දෙනාම තංගල්ල මූලස්ථාන පොලීසියට රැුගෙන ආහ. රාත‍්‍රී 10 ට පමණ අත්අඩංගුවට පත් මෙම තරුණ තරුණියන්ගෙන් මධ්‍යම රාති‍්‍රය වනතෙක්ම ප‍්‍රශ්න කළ පොලීසිය ඔවුන්ගේ ප‍්‍රකාශ සටහන් කරගත්තේය.
පොලිස් අත්අඩංගුවට පත් 17 වැනි වියේ පසුවූ එක් තරුණියක් නිකවැරටිය ප‍්‍රදේශයේ පදිංචිකාරියක් වූ අතර ඇයගේ මව පවුල් ජීවිතයට සමුදී ඇඹිලිපිටිය ප‍්‍රදේශයට පැමිණ තිබිණි. පාසල් අවධියත් සමගම තමන් මත් කුඩුවලට ඇබ්බැහි වී සිටින බවත් ඉන් මිදීමට තමන්ට මගක් නොමැතිව තමන් දුක් විඳින බවත් ඇය කඳුළු සලමින් පොලීසියට කීවාය. හිරිමල් සමයේදීම ජීවිතය වරද්දාගෙන සිටි ඇය ඉන් මිදීමට මගක් සොයමින් එහිම ගැලෙමින් සිටින්නියක් වූවාය.
‘‘බලන්න ඔයාගෙ වයස අවුරුදු 1‍7 යි. ඔයාගෙ ඇඟපත තිබුණට ඔයා තවම පුංචි ළමයෙක්. බලන්න ඔයා ඇඳගෙන ඉන්න ඒව. අපි රෙදි අඳින්නේ විළිවහ ගන්න නේ. ඔයා ඇඳගෙන ඉන්න ඔය කලිසම් කොටෙන් විළි වැහෙනවද? සත්තු හා මිනිසුන් අතර වෙනසක් තියෙනවා නේද? මේ සමාජයට ඔයාගෙ ඔය ඇඳුම ගැළපෙනවද? අම්ම, තාත්ත වෙන් වෙච්ච පවුල්වල තවත් දරුවො මේ සමාජෙ ඉන්නව. ඒ අතරින් කී දෙනෙක් නම් හොඳට ඉගෙන ගන්නවද, හොඳට ජීවත් වෙනවද? ඔයා  මට දරුවෙක් වගේ. මටත් ඔය වයසෙ ළමයි ඉන්නවා’’.
ඉහළ පොලිස් නිලධාරියාගේ ප‍්‍රකාශයත් සමග අත්අඩංගුවට පත් තරුණිය හඬන්නට වූවාය.
‘‘සර්... මම කුඩුවලට ඇබ්බැහි වෙච්ච කෙනෙක්.’’
ඇය නැවතත් හඬන්නට වූවාය.
‘‘මට ඒකෙන් අයින් වෙන්න  ඕන. මාව බේරගන්න කවුරුවත් නෑ’’ යි කියමින් හඬන්නට වූවාය.


අත්අඩංගුවට පත්වූ තරුණියන් කිහිප දෙනෙකුගේ ජීවිත කතාව එක හා සමාන විය. කිහිප දෙනකුගේම අම්ම  තාත්තාගේ පවුල් ජීවිත දෙදරා තිබිණි. දරුවන් අසරණ වී තිබිණි. මාපියන්ගෙන් ඈත්වන ඔවුන් ළංවී තිබුණේ මත් කුඩුවලටය. මත්කුඩු වලට අවශ්‍ය  බරපැන සොයා ගන්නට ක‍්‍රමයක් නැති සමහර තරුණියන් ඇඟ විකුණමින් මුදල් උපයන අය බවට පත්ව සිටි අතර එය ව්‍යාපාරයක් කරගත් කාන්තාවක් බවට සිතිය හැකි තැනැත්තියක්ද අත්අඩංගුවට පත් වූ අය අතර විය. එ්ත් ඇය නම් පොලීසිය තුළ හැසිරුණේ කිසිවක් සිදු නොවූ ගානටය.
අත්අඩංගුවට පත් තරුණයන්ගේ තත්ත්වයද මීට වෙනස් නොවුණි. බොහෝ අය අධ්‍යාපනය අතරමග අතහැර තිබුණු අතර මත්ද්‍රව්‍යවලට ඇබ්බැහි වූවන් වූහ. මුහුණුපොතෙන් බොහෝ සමාජ වැඩදායී දේ සිදු කළ හැකිව තිබියදී එම තරුණයන් ගොනුවී ඇත්තේ ජීවිතයත් හා සමාජයත් විනාශ කර දැමිය හැකි ජීවන ගමනකටය.
පොලීසිය සිදු කළ වැටලීමෙන් අනතුරුව වියළි කංසා ග‍්‍රෑම් 10 ක්
සමග බලපත‍්‍ර ලබා නොගත් රජයේ අරක්කු බෝතල්ද, බියර් ටින් සියයකට ආසන්න සංඛ්‍යාවක් අත්අඩංගුවට ගෙන තිබිණි. එම අත්අඩංගුවට ගැනීම් සමග මෙම තරුණ තරුණියන් කෙතරම් දුරට මත්ද්‍රව්‍යවලට ඇබ්බැහි වී ඇද්දැයි පැහැදිලි වෙනු ඇත.
අත්අඩංගුවට පත්වූ තරුණ තරුණියන් ඉකුත් 08 දින තංගල්ල මහේස්ත‍්‍රාත්වරයා වෙත ඉදිරිපත් කළ අතර ඔවුන් දැඩි කොන්දේසි මත මුදා හරින්නට මහේස්ත‍්‍රාත්වරයා නියෝග කළේය.



චන්ද්‍රසේන ගමගේ

  1. මාලපල්ල මරා උපන් මාකුඹුරේ ඉස්ටේසම
  2. මේ කොළඹ නන්නත්තාර වන සතියයි
  3. ශිවශංකර් මෙනන් ගෝඨා හමුවෙන් රටට දෙන ඉඟිය
  4. එන්.ඩී.ටී. ගහලයෝ ශනිල්ක මරා ගනිති
  5. තරුණයකු අතුරුදන් කර වසර 11ක් නිදැල්ලේ සිටි ඒ.එස්.පී.
  6. බැඳුම්කර හොරකමේ තෝරු මෝරු හතරක් ඇල්ලූ මෙහෙයුම
  7. මේ රස්නය මරණයෙන්ද කෙළවර විය හැක
  8. තුසිතපුරයේ අපා දුක් විඳින, රජකමටත් සුදුසු මිනිස්සු
  9. ජ’පුර සරසවියෙන් ලෝකයට අලුත් වැඩක්
  10. ශ්‍රී ලංකා-ඉන්දියා බැතිමතුන් එකට වැඳ වැටෙන කච්චදූව
  11. සිරිසඟබෝ රජු හිස දන් දුන්නේ අත්තනගල්ලේ දී නොවේ
  12. නීතිඥ නාගානන්දට වුණා වගේ පෙරකදෝරු රස්සාව නැතිවෙන්නේ කොහොමද?
  13. දකුණේ නිදන් හාරද්දී උතුරේ හාරන්නේ රත්තරන්
  14. අවුරුදු විසිපහක්ම රෝදපුටුවේ ගිය හමුදාවේ ධෛර්යය
  15. දරුවන් රකින්නට නුවර කලාවියේ දෙන අපූරූ දානය
  16. ස්ථාන මාරුවකින් කෙළවර වූ ජී. ටී. බොස්ගේ වැදි නැටුම
  17. ඉන්දියාවේදී කොටු වූ බ්ලූමැන්ඩල් සංඛ
  18. කැඩුණු අමුණ බැඳගන්නට මුදල් නැතිව අකලට මහලු වෙන ගමක්
  19. ජංගම දුරකථනයෙන් කතා කර කර දුම්රිය මග දිගේ එලොව යන්නෝ
  20. ඩුබායි ගෙන ගිය බව කියූ කෝටි 700 දියමන්තිය පානදුරෙන් මතුවූ හැටි
  21. මත්පෙති සමග ටෙලි නිළියක් කොටු වූ පොල්හේනේ බිච් පාටිය
  22. කාන්තාවන්ට දුම්රිය මැදිරි වෙන් කිරීමෙන් අනික් මැදිරි වල තද බදයක්
  23. නැගෙනහිර වෙරළේ ඇස්කිමෝ ගෙවල්
  24. ඉතිහාසයේ විශාලම මූල්‍ය ආයෝජනය සමග “ළඟම පාසල - හොඳම පාසල“ වන අයුරු
  25. අල ගෝනියක සැඟව හොංකොං ආ සියවසක් පැරණි බෝම්බය

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.