lakbima.lk

පාර්ලිමේන්තුව නියෝජනය කළ මන්ත්‍රී හාමුදුරුවන් අතරින් අවසානයේ මැතිසබයේ ඉතිරි වූයේ අතුරලියේ රතන හාමුදුරුවන් පමණි. දෙදහස් පහළොවේ මහා මැතිවරණයේදී උන්වහන්සේ පාර්ලිමේන්තුවට පත් වූයේ එජාප ජාතික ලැයිස්තුවෙනි.

එහෙත් ටික දොහක් යන විට උන්වහන්සේ ස්වාධීන වූහ. මෛත්‍රීපාල සිරිසේන ජනපතිවරයාගේ උපදේශකවරයකු ලෙසද කටයුතු කළ උන්වහන්සේ ආණ්ඩුවට එරෙහිව ආන්දෝලනාත්මක ප්‍රකාශ නිකුත් කළේ වරක් දෙවරක් නොවේ. එම ප්‍රකාශවලින් පිළිබිඹු වූයේ උන්වහන්සේ අලුත් ගමනක් යන්නට සැරසෙන බවය.

ඒ කතාබහ අතරේ ගලගොඩඅත්තේ ඥානසාර හාමුදුරුවෝ තෙසතියකට ඉහතදී ජනපති සමාව ලබා හිරෙන් නිදහස් වූහ. උන්වහන්සේ හිරෙන් නිදහස් වු කතාවල උණුහුම වැඩිකලක් තිබුණේ නැත. ඥානසාර හාමුදුරුවන් යටට ගොස් රතන හාමුදුරුවෝ උඩට ආහ.

ඊට හේතු වූයේ රතන හාමුදුරුවන් කී කතාවකි. උන්වහන්සේ ඉකුත් විසිනව වැනිදා ප්‍රවෘත්ති සාකච්ඡාවක් පවත්වමින් අනතුරු හැඟවීමක් කළහ. ඒ රිෂාද් බදියුදීන් ඇමැතිවරයා හා ආණ්ඩුකාරවරුන් වන එම්.එල්.ඒ.එම්. හිස්බුල්ලා හා අසාද් සාලි තනතුරුවලින් ඉවත් නොකළහොත් තමා මුළු රටම බලා සිටින තීන්දුවක් ගන්නා බවය. ඊට උන්වහන්සේ කල් දුන්නේ පැය විසිහතරකි.

එම තීන්දුව ගන්නා බව කීවේ තිස්වැනිදාය. නමුත් එදින කිසිවක් වූයේ නැත. ඒ ගැන උන්වහන්සේ ප්‍රකාශ කළේ තමන්ගේ තීන්දුව හෙට (31) දිනයේ ගන්නා බවය. ඒ නිසාම රටම බලා සිටියේ රතන හාමුදුරුවන් ගන්නා තීරණය ගැනය. තත්ත්වය එසේ තිබියදී රතන හාමුදුරුවන් ඇතුළු භික්ෂුන් වහන්සේ පිරිසක් ඉකුත් සිකුරාදා (31) දළදා වහන්සේ වැඳපුදා ගැනීමට මහනුවරට වැඩම කළහ.

ඉක්බිතිව උන්වහන්සේ  දළදා මාලිගාව ඉදිරිපිට මහ මළුවේ බෞද්ධ ධජය ඔසවන ස්ථානය අසල වාඩි වී ප්‍රකාශ කළේ තම ඉල්ලීම ඉටුකරන තුරු මාරාන්තික උපවාසයක් අරඹන බවය. උපවාසය ආරම්භ කිරීමට උන්වහන්සේ මහ මළුවේ වාඩි වූ පසු පැමිණ සිටි භික්ෂුන් වහන්සේ ඇතුළු පිරිස උන්වහන්සේට වැඳ නමස්කාර කළහ. ඇතැම් ගිහි පැවිදි අය හඬා වැටුණහ.


උපවාසය ආරම්භ කිරීමෙන් පසු උන්වහන්සේ වෙනුවෙන් මහ මළුවේ විශේෂ ආවරණයක්ද ඉදිකර තිබිණි. ආරක්ෂක හේතුන් මත මහ මළුව රාත්‍රී අටට වසන මුත් රතන හාමුදුරුවන් ඇතුළු භික්ෂුහු එදින රාත්‍රියේ මහ මළුවෙන් ඉවත් වූයේ නැත. කිසිවකු ඉවත්වන්නට කීවේද නැත. ඒ අතරේ මධ්‍යම පළාත් ප්‍රධාන හින්දු පූජක නිල්ලඹ හරිදෙව් එස්. ප්‍රභා කුරුක්කල්තුමාද උන්වහන්සේට සහය පළකරමින් උපවාසයට එක් වූහ.

පසුදින දළදා මාලිගාව වැඳ පුදා ගැනීමට පැමිණි බොහෝ පිරිසක් රතන හාමුදුරුවන්ගේ උපවාසය නැරඹීමට පැමිණියහ. එසේ පැමිණෙන ඇතැම්හු උන්වහන්සේට මාරාන්තික උපවාසය කරන ස්ථානය ඉදිරිපිට වැඳ වැටී හඬා වැළපෙන්නට පටන් ගත්හ. මේ අතර පැමිණි පිරිස පාලනය කර ගැනීමට නොහැකි වීම හේතුවෙන් උපවාසය වටා ලණුවලින් සීමා ඇද ආරක්ෂාවද තර කෙරුණි.


මේ අතර මඩකලපුව දිස්ත්‍රික් දෙමළ සන්ධාන මන්ත්‍රී සතාසිවම් විය‍ලේන්ද්‍රන්ද රතන හාමුදුරුවන්ගේ උපවාසයට සහය දක්වමින් මඩකලපුවේ ගාන්ධි උද්‍යානය ඉදිරිපිට උපවාසයක් ඇරඹූහ. ඊට භික්ෂුන් වහන්සේගේද සහය ලැබිණි. ඔහු උපවාසය ඇරඹුවේ රතන හාමුදුරුවන් ඇරඹූ උපවාසයට පසුදිනය (01). මඩකලපුවේදී පමණක් නොව රතන හාමුදුරුවන්ගේ මාරාන්තික උපවාසයට සහය පළකරමින් රට පුරාම විරෝධතා උද්ඝෝෂණ උපවාස ඇරඹුණි.


මහනුවර ඇතුළු නගර ගණනාවක සාප්පු වසා දැමුණි. කළුකොඩි එසවිණි. ඇතැම් ප්‍රධාන මාර්ගවල බස් ගමනාගමනය නතර කෙරුණි. ඇතැම් බස් ගමනාගමනය නතර කර ඇත්තේ බලහත්කාරයෙන් බවට ‍පොලීසියට පැමිණිලි ඉදිරිපත් විය. එසේ බලහත්කාරයෙන් බස් නතර කළ පුද්ගලයන් දෙදෙනකු කළුතරදී ‍පොලිස් අත්අඩංගුවට පත්විය. දැන් ඔවුන් දෙන්නා සිටින්නේ රක්ෂිත බන්ධනාගාරයේය.

රතන හාමුදුරුවන්ගේ මාරාන්තික උපවාසයෙන් රටම ගිනි ගන්නා විට උන්වහන්සේගේ නිකාය වන අමරපුර සංඝ සභාව ජනපතිවරයා ඇතුළු ආණ්ඩුවෙන් ඉල්ලීමක් කළේ උන්වහන්සේගේ ඉල්ලීම ගැන නොපමාව කටයුතු කරන ලෙසය. සියම් මහ නිකායේ මල්වතු, අස්ගිරි උභය පාර්ශ්වවල මහානාහිමිවරුද ජනපති හා අගමැතිගෙන් ඉල්ලා සිටියේ රතන හාමුදුරුවන්ගේ ඉල්ලීම්වලට වහාම විසඳුම් දෙන ලෙසය.

සඳුදා වන විට උන්වහන්සේගේ මාරාන්තික උපවාසයට දිනතුනක් ගත වී තිබිණි. වරින් වර උන්වහන්සේගේ සෞඛ්‍ය තත්ත්වය පරීක්ෂා කළ වෛද්‍යවරුන්ගේ මතය වූයේ උන්වහන්සේ විජලනයට පත්වෙමින් තිබෙන බවය.


දිගටම එම තත්ත්වය පැවැතියෙන් විවිධ සංකූලතා ඇති වී සිරුරේ අභ්‍යන්තර ඉන්ද්‍රියන්ට හානි විය හැකි බව වෛද්‍යවරු අනතුරු හැඟවූහ. එනමුත් උන්වහන්සේ දියර ජාති පවා වැලඳීම ප්‍රතික්‍ෂේප කළහ.


උන්වහන්සේ මාරාන්තික උපවාසය අතරතුරේ වූ විශේෂම සිද්ධිය වන්නේ කොළඹ අගරදගුරු මැල්කම් රංජිත් කාදිනල්තුමා මහමළුවට පැමිණ උන්වහන්සේගේ සුවදුක් විමසීය.  එහිදී කාදිනල්තුමා ප්‍රකාශ කළේ උන්වහන්සේ උපවාස කරන්නේ පාස්කු ඉරිදා ප්‍රහාරයෙන් විපතට පත්වූ අපට සාධාරණය ඉටු කිරීමට බැවින් තමන් මේ අවස්ථාවට පැමිණි බවය.

කාදිනල්තුමාගේ පැමීණීම මුදල් ඇමැති මංගල සමරවීරගේ දැඩි දෝෂදර්ශනයට ලක්විය. කාදිනල්තුමා උපවාස බිමට පැමිණීම ජාතිවාදීන්ට උඩගෙඩි දීමක් බව ඇමැතිවරයාගේ කතාවට රට පුරා භික්ෂුන් වහන්සේගෙන් දැඩි විරෝධ පළවිය. ඇතැමුන් ඇමැතිවරයා එන උත්සව වර්ජනය කරන බව කීහ. ඊට පිළිතුරු දුන් ඇමැතිවරයා කීවේ බුදුන් වහන්සේ දෙව්දත් තෙරුන්ටත් තම විහාරස්ථානය තහනම් නොකළ බවය.


මේ අතර අමරපුර ධර්මරක්ෂිත නිකායේ මහ නායක තිරිකුණාමලයේ ආනන්ද මහනාහිමියෝද බම්බලපිටිය වජිරාරාමයේ සිට නුවරට වැඩම කර උන්වහන්සේගේ සුවදුක් විමසා බැලූහ. නායක හිමිවරු මෙන්ම දේශපාලකයන් රැසක් රතන හාමුදුරුවන් උපවාස කළ මහමළුවට පැමිණියහ. ඒ අතර ආණ්ඩුවේ මෙන්ම විපක්ෂයේ මන්ත්‍රීහුද සිටියහ. ඇතැම් මන්ත්‍රීන්ට විරෝධය දක්වමින් දේශපාලන පක්ෂ නියෝජනය කළ පිරිස් හූ තැබූහ. ඔවුන් මෙසේ හූ තබන්නේ දළදා වහන්සේ වැඩසිටින බිමේ බැවින් ඊට විවේචනද එල්ල විය.


මේ අතර ඉකුත් අඟහරුවාදා වන විට උන්වහන්සේගේ මාරාන්තික උපවාසයට සිව්දිනක් පිරී තිබිණි. භික්ෂුන් වහන්සේ ඇතුළු බෞද්ධ සංවිධානවලින් දිගින් දිගටම ආණ්ඩුවට එරෙහිව පීඩනය වැඩිවෙමින් තිබිණි. ආණ්ඩුකාරවරු දෙන්නා හා බදුයුදීන් ඇමැතිවරයා සිය ධුරවලින් ඉල්ලා අස් නොවුණහොත් රටපුරා දරුණු තත්ත්වයක් උද්ගත වන බවට පෙර නිමිති පහළ වෙමින් තිබිණි.

මේ හේතුවෙන් බස්නාහිර ආණ්ඩුකාර අසාද් සාලි හා නැගෙනහිර ආණ්ඩුකාර එම්.එල්.ඒ.එම්. හිස්බුල්ලා ජනපති ‍ලේකම් කාර්යාලයට කැඳවුණි. එහිදී සාකච්ඡාවලින් පසු තනතුරුවලින් ඉල්ලා අස්වීමට ඔවුහු කැමැති වූහ. එම ඉල්ලා අස්වීමෙන් අල්ලපු අත්තත් පයගහපු අත්තත් නැති වූයේ හිස්බුල්ලාටය. ඔහු ජනපතිවරයාගේ ආරාධනාවෙන් ආණ්ඩුකාර ධුරය ගන්නේ එතෙක් දැරූ පාර්ලිමේන්තු මන්ත්‍රී ධුරයෙන් ඉල්ලා අස්වීය. දැන් ඔහුට මන්ත්‍රී ධුරය නැත. ආණ්ඩුකාර ධුරයත් නැත.

ආණ්ඩුකාරවරුන්ගේ ඉල්ලා අස්වීමේ නිවේදනය රතන හාමුදුරුවන්ට දැනුම් දීමට ජනපතිවරයා පැවැරුවේ මධ්‍යම පළාතේ ජනපති නියෝජිතයා හෙවත් ආණ්ඩුකාරවරයා වූ මෛත්‍රී ගුණරත්නටය. ඔහු මහ මළුවට ගිය විට ඇතැම් දේශපාලන පක්ෂ නියෝජනය කළ ආධාරකරුවෝ ඔහුටද හූ තැබූහ.

එහෙත් භික්ෂුන් මැදිහත් වී එය වළක්වා ගත්හ. ඉන් පසුව ආණ්ඩුකාරවරයා, හිස්බුල්ලා හා අසාද් සාලි ඉවත් වූ බවට ජනපතිවරයාගේ අත්සනින් යුතු ලිපිය රතන හාමුදුරුවන්ට භාරදුන්නේය. ඒ සමග සිය උපවාසය නතර කළ රතන හාමුදුරුවෝ ඉතා හැඟුම්බරව පැවැසුවේ ආධ්‍යාත්මික ක්‍රියාමාර්ගයකින් තනි පුද්ගලයකුට වූවත් විශාල දෙයක් කළ හැකි බවය. තමා රටට ණය නැති බවත් රිෂාද් බදුයුදීන් ඇමැතිවරයා ගැන අගමැතිවරයා තීන්දුවක් ගත යුතු බවද උන්වහන්සේ කීහ.

උන්වහන්සේ මාරාන්තික උපවාසය නවතා ටික වේලාවකට පසු මහනුවර නගරයට මහ වැස්සක් ඇද හැළුණි. ඒ අතරේ ගිලන් රියකින් රතන හාමුදුරුවෝ මහනුවර රෝහලට ගෙනයනු ලැබිය. උන්වහන්සේ සමග උපවාසය කළ කුරුක්කල්තුමාද රෝහලට රැගෙන ආවේය. ඒ අවස්ථාව නැරඹීමට දහස් ගණන් පිරිසක් මහනුවර රෝහල වටා එක්රොක් වූහ. ඇතැම් වෛද්‍ය කාර්ය මණ්ඩල සිය කටයුතු පසෙකලා රතන හාමුදුරුවන් බැලීමට රෝහ‍ලේ කොරිඩෝවලට එක්වූහ.


මහනුවර රෝහ‍ලේ ශල්‍ය දැඩි සත්කාර ඒකකයට ඇතුළු කළ උන්වහන්සේගේ සෞඛ්‍ය තත්ත්වය පිළිබඳ රෝහල් අධ්‍යක්ෂවරයා පැවැසුවේ උන්වහන්සේ දැඩි විජලනයෙන් පසුවන බවය. ඒ සඳහා ප්‍රතිකාර ලද උන්වහන්සේගේ සෞඛ්‍ය තත්ත්වය ඉකුත් හතර වැනිදා වන විට යහපත් තත්ත්වයට හැරී තිබිණි. මේ නිසා ශල්‍ය දැඩි සත්කාර ඒකකයේ සිට උන්වහන්සේ භික්ෂු වාට්ටුවට මාරු කෙරුණි.

එහි විවේක සුවයෙන් පසු වූ රතන හාමුදුරුවන්ගේ ඉල්ලීම මත රෝහල් බලධාරීහු ඉකුත් හතරවැනිදා සවස උන්වහන්සේ නැවත වරක් වෛද්‍ය පරීක්ෂණයට යොමු කර රෝහලෙන් මුදා හැරියහ.

රතන හිමි කවුද?

රතන හාමුදුරුවන්ගේ ගම මාතර, අකුරැස්සේ අතුරලියය. උන්වහන්සේ උපත ලැබුවේ එක්දහස් නවසිය හැට දෙකේ ඔක්තෝබර් පස්වැනිදාය. පස් දෙනෙකුගෙන් සමන්විත පවුලක බාලයා ලෙස උපත ලැබූ උන්වහන්සේගේ ගිහිනම රංජිත්ය. මව ඩබ්ලිව්.ජී. සිසිලියානාය. පියා ගම්ආරච්චිගේ  පීරිස්ය.

අතුරලිය මහා විදුහලෙන් මූලික අධ්‍යාපනය ලැබූ ඔහු එක්දහස් නවසිය හැත්තෑ හයේදී අතුරලියේ රතන යන නමින් පැවිදි බිමට පත්විය. එවිට උන්වහන්සේගේ වයස අවුරුදු දාහතරකි. දැන් පනස් හතකි. උන්වහන්සේ පෙරළිකාර චරිතයක් ලෙස ප්‍රකට වන්නේ එක්දහස් නවසිය අසූ හතේදී  පේරාදෙණිය සරසවියට ඇතුළු වීමත් සමගය.

අන්තර් විශ්වවිද්‍යාල භික්ෂු බල මණ්ඩලයේ ‍ලේකම්වරයා ලෙස කටයුතු කළ රතන හිමි ජනතා විමුක්ති පෙරමුණේ ශිෂ්‍ය ව්‍යාපාරයේ කැපී පෙණුනු චරිතයකි. එකල ශිෂ්‍ය සංගම් නායකයකු වූ පාඨලී චම්පික රණවක උන්වහන්සේට මුණ ගැහෙන්නේ විශ්වවිද්‍යාලවල ශිෂ්‍ය ව්‍යාපාරවලදීය. ඉන්දු - ලංකා ගිවිසුමට එරෙහිව මාදුළුවාවේ සෝභිත හිමි සමග විරෝධතා ව්‍යාපාරවලට එක් වූ උන්වහන්සේ එක්දහස් නවසිය අසූ අටේ ජූලියේදී ‍පොලිස් අත්අඩංගුවට පත්වූහ.

උන්වහන්සේ අත්අඩංගුවට ගැණුනේ රාජ්‍ය ආරක්ෂාව වෙනුවෙන් සැකකටයුතු පුද්ගලයන් අත්අඩංගුවට ගැනීම යටතේය. මාස පහක කාලයක් රතන හාමුදුරුවෝ රිමාන්ඩ් බන්ධනාගාරයේ සිටියහ. එකල පාඨලී චම්පික රණවකද සිරකර සිටියේ කොළඹ සරසවියේ වධකාගාරයේය.

හිරෙන් නිදහස ලැබූ ඔවුන් දෙන්නා ජනතා මිතුරෝ ව්‍යාපාරය ගොඩනැගීමට  වෙහෙස මහන්සි වූහ. රාජ්‍ය භීෂණයෙන් අතුරුදන් කළ තරුණයන්ගේ තොරතුරු සෙවූ ඔවුහු මිනීමැරුම් හා ඝාතන පිළිබඳ ආණ්ඩු විරෝධී ප්‍රදර්ශන සංවිධානය කළහ. ඒ පිළිබඳ උන්වහන්සේ ඇතුළු පිරිස ගනුදෙනු කළේ මංගල සමරවීර සමගය.

එම ප්‍රදර්ශන ගැන සාකච්ඡාවක් පවත්වමින් සිටියදී චම්පික රණවක උන්වහන්සේ ඇතුළු පිරිසත් යළිත් වරක් අත්අඩංගුවට පත් වන්නේ වාද්දුව ‍පොහොද්දරමුල්ල පන්සලකදීය. යළිත් වරක් හිරෙන් නිදහස ලැබූ උන්වහන්සේ ආණ්ඩුවට එරෙහිව විවිධ වැඩකටයුතුවලට නායකත්වය දුන්නේය. එකල ගාමිණී දිසානායක උන්වහන්සේ සමග ඉතා සමීපව කටයුතු කළේය.


ජාතික සංඝ සභාව, ත්‍රස්ත විරෝධී ජාතික ව්‍යාපාරය, සිහළ උරුමය, ජාතික හෙළ උරුමය වැනි ජාතික ව්‍යාපාර හා දේශපාලන ව්‍යාපාර ගොඩනැගීමේ ප්‍රධාන චරිතයක් වූහ.


ජාතික හෙළ උරුමය නියෝජනය කරමින් දෙදහස් හතරේදී කළුතර දිස්ත්‍රික්කයෙන් පාර්ලිමේන්තුවට පත් වූ උන්වහන්සේ, දෙදහස් දහයේදී යළිත් වරක් පාර්ලිමේන්තුවට පත්වූයේ ගම්පහ දිස්ත්‍රික්කයෙනි.

පසුකලක මහින්ද රාජපක්ෂ ජනපතිවරයාගේ ආණ්ඩුවේ ක්‍රියාකලාපයට විරෝධය දැක්වූ උන්වහන්සේ ඊළඟ ජනපතිවරණයේදී ඔහුට එරෙහිව ‍පොදු අපේක්ෂකයකු ඉදිරිපත් කරන බව රැලියක් පවත්වමින් මුල් වරට කීවේය. ඉක්බිතිව මෛත්‍රීපාල සිරිසේනගේ ඡන්ද ව්‍යාපාරයේ උන්වහන්සේ කැපී පෙණුනු චරිතයක් විය.

දෙදහස් පහළොවේ මහ මැතිවරණයේදී ජාතික හෙළ උරුමයට එක්සත් ජාතික පක්ෂයෙන් හිමි වූ ජාතික ලැයිස්තු මන්ත්‍රී ධුරයට පත් කෙරුණේ උන්වහන්සේය. පසුව උන්වහන්සේ හෙළ උරුමයෙන්ද වෙන් වී එජාප ආණ්ඩුවෙන්ද ඉවත් වී ස්වාධීන මන්ත්‍රීවරයකු ලෙස කටයුතු කළහ.

උන්වහන්සේගේ අනවරත දේශපාලන ගමනේ අලුත්ම සිද්ධිය වන්නේ මාරාන්තික උපවාසයයි.

මිහිරි ෆොන්සේකා

  1. අවි අතට ගෙන අවියෙන්ම මහ පාරේ මිය ගිය කළු අජිත්
  2. නුඹලාගේ අත්වලත් ‍ලේ ද?
  3. වකුගඩු රෝගය රටටම බෙදන්නේ වතුර නෙමෙයි සහල්
  4. පාස්කු බෝම්බ සමග පිපිරී ගිය ගල් කොරිවල ජීවිත
  5. නම ඇහුවත් බය හිතෙන දොස්තර ෂාෆි කවුද?
  6. ජනපති අගමැති ගැටුමේදී පාපන්දුවක් වූ බුද්ධි අංශ
  7. වඳ කළාදැයි දැන ගන්න ක්‍රමය මොකක්ද?
  8. පාස්කු ප්‍රහාරයෙන් පසු පිපුරුණු වඳ බෝම්බය
  9. සම සමාජයට හැර අන් හැමටම අමතක වූ මැයි 22
  10. ත‍්‍රස්ත ප‍්‍රහාර අවසානයේ එන ඩෙංගු ප‍්‍රහාරයට සූදානම්ද?
  11. මම කියපු දේ අද ඇත්ත වෙලා
  12. වැලට අහුවෙන සහරාන්ගේ ගෝලයෝ
  13. ‍පොළොන්නරුවේ ඇඟලුම් සේවිකාව පුලුස්සා මරා දැමූ “ප්‍රේමය”
  14. කාදිනල්තුමා නිවූ ජාතිවාදී ගින්න යළි ඇවිළුණු හැටි
  15. ෆේස්බුක් බ්ලොක් කළාම ඔක්කොම හරිද?
  16. මුස්ලිම් නෙවේ කියල අපිව පාකිස්තානයෙන් එළෙව්වා මුස්ලිම් කියල ලංකාවෙන් එළවන්න හදනවා
  17. බෝම්බයෙන් නතර කෙරුණ රෝද තුනේ චාරිකාව
  18. වෙසක් ඇත තොරණ නැත
  19. පාස්කු ප්‍රහාරයෙන් පසු රට ඇවිළුවාද ඇවිළුනාද
  20. සහරාන්ගේ පුහුණු කඳවුරුවල රහසිගත සැලසුම
  21. මඩකලපුව ෂරියා සරසවියේ අලගිය මුලගිය තැන් සොයා ගියෙමු
  22. පාස්කු බෝම්බයේ කෑලි ජන ජීවිත තුවාල කළ හැටි
  23. පාස්කු බෝම්බයෙන් යටගිය මධුෂ් කටුනායකින් මතුවෙයි
  24. රහස් බුද්ධි වාර්තා රට කළඹවමින් එළියට යන්නේ කොහොමද?
  25. බුර්කාව ලංකාවේ මුස්ලිම් කතුන්ගේ ඇඳුමක් නොවේ - මුස්ලිම් විද්වත්හු අදහස් දක්වති

Page 2 of 119

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.