lakbima.lk

බදාදා හැන්දෑවේ නවාතැනට යන විට හාත්පස පැවැතියේ දැඩි අඳුරකි. හැන්දෑ වීත් ගත දවාලන දාහයේ අඩුවක් නොමැති හෙයින් පඩිපෙළ නගින අතරම මම කමීසයේ බොත්තම් පැන්නුවෙමි. විවෘත ආලින්දයේ කෙළවරක ඉටිපන්දමක මන්දාලෝකය පෙනුණි.

“අදත් ලයිට් කැපුවා බං. ඇතුළෙ ඉන්න බෑ තැම්බෙනවා.”
නවාතැනේ සගයෙකුගේ කටහඬ ඇසුණි. ලයිට් කැපිල්ලට පින්සිදු වන්නට වෙනදා කාමරවලින් ‍ලේසියෙන් එළියට ගන්නට බැරි කොල්ලන් ආලින්දයේ පුටුවලටත් සඳලුතලයේ කෙටි බැම්ම මතටත් කැඳවමින් සතුටු සාමිචියේ නිරත වන්නට අවස්ථාව සැලසී තිබුණි.

ගමන්මල්ල අසුනක් මතට විසිකර කමීසය වැලට දැමූ මමද කතාබහට එක් වුණෙමි.
“උදේ ලක්මාලය කොණ්ඩේ කප කප ඉද්දී කරන්ට් ගිහින්. ඌ ඉතුරු බාගේ කපන්න ගියේ හවස. ලියපංකෝ පත්තරේට. අපිට කොහොම වුණත් මේ පාඩම් කරන උන්ට කොච්චර පාඩුවක්ද මේක” එකෙකු මගේ ඇඟට ගොඩවිය.

“චාර්ජ් කරන ලයිට් එකකුයි ෆෑන් එකකුයි ගත්තනම් ඉවරනේ” මම කීවෙමි.
“හහ්... මම පිටකොටුවට ගියා එයින් එකක් බලන්න. මීට මාසෙකට විතර කලින් බලද්දී රුපියල් 4500කට තිබුණු රීචාර්ජබල් ෆෑන් - ලයිට් එකක් හත්දාස් පන්සීයට වැඩිවෙලා. එයිනුත් එකයි දෙකයි තියෙන්නේ. ‍පොඩි ටෝච් එකේ ඉඳන් ගණන් වැඩි කරලා.”

වතුර බේසමක් ගත් එකෙකු ආලින්දය පුරා ආශීර්වාද පැන් ඉසින්නාක් මෙන් වතුර ඉසිමින් ගියේ දාහය දරාගනු බැරි තැනය. මා වෙතද වතුර පහරක් වැදුණු මුත් මම මුවින් නොබැණ සිටියේ වෙලාවේ හැටියට ඒ ද සනීපයක් ලෙස ගතට දැනෙන නිසාය.


අල්ලපු වත්තේ නවාතැනේ සඳලුතලයද දාහයත් අඳුරත් හේතුවෙන් කාමරවලින් එළියට ගෙන්වූ යුවතියන්ගෙන් පිරී ඇති බව අඳුර අතරින් පෙනුණි. මේ දිනවල මුළු රටේම තත්ත්වය මෙයින් වෙනස් වන්නේ නැත. ලයිට් කැපිල්ලට පින්සිදු වන්නට කළ දුටු කල වළ ඉහගන්නා සේ පිටකොටුවේ ජයටම කෙරෙන “රීචාර්ජබල්” බඩු වෙළෙඳාම ගැන පහුවදාම සොයා යන්නට ඉටාගනිමින් මම නාන කාමරයට වැදුණෙමි.

* * *
“මේ දවස්වල පිටකොටුවේ වැඩියෙන්ම විකිණෙන්නේ ෆෑන්.”
කාලාන්තරයක් තිස්සේ පිටකොටුවේ පළමුවැනි හරස් වීදියේ  පදික වේදිකාවේ වෙළෙඳාමේ යෙදෙන දේවා අප හා කතාබහට එක්වූයේ එසේය.

“මෙදා පාර මිනිසුන්ට ඇඳුම් කැඩුම් ගන්නවටත් වඩා මේ ගිනි රස්නෙන් මිදෙන්න ක්‍රමයක් හොයන එක ලොකුවෙලා” ඔහු පැවැසුවේ උදේ ලෑල්ලට දැමූ සරම් ගොඩෙන් අඩු වී ඇත්තේ එක දෙකක් පමණක් බව පෙන්වමිනි.
“විකිණෙන්නේ නැතුව අයින් කරලා දාපු චාර්ජ් කරන ටෝර්ච් තොග පිටින් පේමන්ට් එකේ තියෙනවා. ටික වේලාවක් චාර්ජ් කරලා නිසා දාලා පෙන්නද්දී ඒක වැඩ. ගිහින් බැලුවාම චාර්ජ් එක හිටින්නේ නැහැ. ඒවා විකුණන්නෙත් රුපියල් 250ට වැඩියෙන්”.

පළමු වැනි හරස් වීදියෙන් විදුලි උපකරණවල අමතර කොටස් මිලට ගන්නට නිතර එන යන පළපුරුදු විදුලි කාර්මිකයකු අප හා පැවැසීය.

“ඕවා සමහරු හදන්න කියලා අපි ළඟට ගේනවා. බැටරිය කල් ඉකුත් වෙලා. ජීව කාලය ඉවර වෙලා. අලුතින් ඒ වගේ බැටරියත් ගන්නත් තව රුපියල් දෙතුන් සියයක් විතර යනවා. ඉතින් අන්තිමට ඒක කුණු කුඩෙට තමයි”
ඔහු පෙන්වා දෙන්නේය.

පළමු වැනි හරස් වීදිය දිගේ ඇවිද යන අපිට වැඩිපුරම පෙනුණේ වෙළෙඳසල් ඉදිරිපිට ගොඩගසා ඇති විවිධ මාදිලිවල විදුලිපංකා පෙට්ටි ය.

“රීචාර්ජබල් ෆෑන් තියෙනවද?”
කෙයිසර් වීදියට හැරෙන ස්ථානයේ ඇති විදුලි උපකරණ අලෙවිසලට ගොඩවැදුණු අපි විමසුවෙමු.
“අද මුළු කොළඹම ඇවිද්දත් චාර්ජ් කරන ෆෑන් එකක් හොයාගන්න බෑ. අපි ගාව තියෙන්නේ තව තුනයි. තුන්දහස් පන්සීයයට දුන්නේ. තුන්දාහක් දෙන්නකෝ. මේකේ ලයිට් එකකුත් තියෙනවා. පැය තුන හතරක් බැටරිය ෂුවර්.” අලෙවි සහයකයා කියාගෙන ගියේය.

“මේකම ඔන්ලයින්, ස්ටෝර්ස්වල මීට ගොඩක් අඩුවට තියෙනවනේ. වැඩියෙන් විකිණෙන නිසා මිනිස්සුන්ට ලොකු ගාණක් කියන එක අසාධාරණයි.” මම ඔහුට පෙන්වා දුනිමි.

“ඔන්ලයින් කීවට ඕවාට ගැරන්ටි දෙන්නෙත් නෑ. විකුණලා ටික කලකින් වබේ සයිට් එක හොයාගන්නවත් නෑ. අපි මාස හයක ගැරන්ටියකුත් දෙනවා මහත්තයා. ඇත්තම කියනවා නම් රුපියල් හාරපන්සීයකින් ගණන් වැඩිකළා තමයි. ඔහොම ඉල්ලුමක් ආවොත් මිසක් මේ දවස්වල අපේ බඩු විකිණෙන්නේ නෑ මහත්තයෝ. ඉලෙක්ට්‍රික් බඩු ගන්න තියා මිනිස්සුන්ට කන්න බොන්නවත් සල්ලි නෑ.”

නැවත ආරෝපණය කළ හැකි විදුලි පන්දම්වලද විදුලි ලාම්පුවලද මිල, ඉල්ලුම වැඩිවීම හේතුවෙන් සැලකිය යුතු ගණනකින් ඉහළ ගොස් තිබේ. කලින් රු. 3600ට අලෙවි කළ බහුකාර්ය විදුලි පහනක් රු.4200 දක්වා මිල ඉහළ දැමීමට කටයුතු කළ බව වෙළෙඳසල් සේවකයෝ පැවැසූහ.

මේ අන්දමින් පළමු හරස් වීදියේ විදුලි උපකරණ අලෙවිසල් කිහිපයකටම ගිය අපිට ලැබුණු ප්‍රතිචාර එක හා සමාන විය.

“අපි ළඟ රුපියල් 1200 ඉඳන් හොඳ රීචාර්ජබල් ලයිට් තියෙනවා. මේ ටෝර්ච් එක 600යි. අපි වගකීමකුත් දෙනවා. මේ වෙලාවේ ලංකාවට ගෙන්වපු බඩු ගොඩක් ඉවර වෙලා. ආයෙත් ඕඩර් කරලා ෂිප්මන්ට් එකක් එන්න සති තුනක්වත් යනවා. එතකොට මේ ප්‍රශ්නය විසඳලා ඉල්ලුම නැතිවෙලා තියේවි. ඒ නිසා කවුරුවත් මේ දවස්වල ඕඩර් දාන්න ඉක්මන් වෙන්නේ නෑ. ඒ හින්දා තියෙන ටිකේ මිල ගණන් ඉහළ යන්න පුළුවන්.”
එම්.ආර්. ට්‍රේඩින්හි හිමිකරු නසාර් පෙන්වා දෙන්නේය.

මේ දිනවල අනෙක් ජනප්‍රිය ඉල්ලුම හිමිව ඇත්තේ “ජෙනරේටර්” හෙවත් විදුලි උත්පාදක යන්ත්‍ර වෙතටය.
“අපි දුන්නේ 17,000ට ‍පොඩිම ජෙනරේටරය. විසිදාහට දුන්නත් ගන්න තරමට ඉල්ලුම තිබුණා. මේ වෙද්දී කොළඹ ජෙනරේටර් හිඟයකුත් ඇතිවෙලාය කියන්න පුළුවන්.”

එම්.ආර්. ට්‍රේඩින්හි අයකැමිවරයා පෙන්වා දෙන්නේය. එය සැබෑවක් බව පැහැදිලි වන්නේ මරදානේ ජෙනරල් ඉක්විප්මන්ට් ආයතනයේ සියලුම 3ම්එ/5ම්එ පමණ විශාල පරිමාණයේ ජෙනරේටර් යන්ත්‍රද අලෙවි වී අවසන් බවට අපි කළ විමසීමේදී එහි සේවකයකු පැවැසූ හෙයිනි. එසේම මරදානේ බොහෝ යන්තේ‍රා්පකරණ විකුණන ආයතනවල “ජෙනරේටර් තොග අවසන් වී ඇත.” යන දැන්වීම ප්‍රදර්ශනය කර තිබෙනු දැකගත හැකිවිය.

මේ අහු අස්සේ පිටකොටුවේ පදික වේදිකාවේ විකුණන එල්.ඊ.ඩී. බල්බවල මිල ආරම්භ වන්නේ රුපියල් සියයෙනි.
“මීට වඩා අඩුවට දෙන්න බෑ. මේවා ඔක්කොම කොලිටි බඩු. ගණන් වැඩි වුණේ ටැක්ස් නිසා” උමර් තම තට්ටුවේ ඇති බල්බ පිළිවෙළට සකසමින් පවසන්නේය.
“මාස ගාණක් ගියත් අපි මෙතනින් යන්නේ නෑ. බය නැතුව මෙතනටම ඇවිත් මාරු කරගන්න පුළුවන් ගැටලුවක් වුණොත්.”

ඔහු හා විදුලි උපකරණ වෙළෙඳාමේ යෙදෙන අශාර් පවසන්නේය.
එහෙත් පදික වේදිකාවෙන් මිලට ගත් බඩුවක දෝෂයක්් ඇති වූ කල එය මාරු කරගන්නට එන්නේ එහෙමත් කෙනෙකි. පැමිණියද එයට සාධාරණයක් ඉටුවීම සැක සහිතය. වෙළෙඳස‍ලේ රු. 600ට මිල නියම වූ කුඩා විදුලි පන්දමක් ඔවුන් පදික වේදිකාවේ අලෙවි කරන්නේද  එම මුදලටමය. ඔවුන් පෙන්වා දෙන්නේ මේ වෙලාවේ හැටියට ඊට වඩා නම් රුපියලක්වත් අඩුවෙන් දෙන්නට බැරි බවය. රීචාර්ජබල් බඩු හිඟය, ආහාර හිඟයක් තරමටම රටට බලපා ඇති බව එයින් පෙනේ.

විදුලි උපකරණ  මිලට ගැනීමට එන ජනතාව අතර නම් ඒවායේ මිල ගණන් පිළිබඳව ඇත්තේ හොඳ චිත්‍රයක් නොවේ. “මුන් හූරගෙන කනවා වෙලාවෙ හැටියට” රීචාර්ජබල් පංකාවක් මිලට ගත් මහත්මයෙක් තරහින් කියා නොනැවතී ඉදිරියට ගියේය.

පළමු වැනි හරස් වීදියේ ඇවිද යන අපිට හුරුබුහුටි දැරියක අලුතින් මිලට ගත් විදුලි පංකාවක් බරට බරේ ඔසවාගෙන යනු දකින්නට ලැබුණි. අපි ඇය වෙත ළං වුණෙමු. ඇය වෙනුවට අපේ ප්‍රශ්නවලට පිළිතුරු දුන්නේ ඇගේ මව පානදුර, හිරණ පදිංචි ඉසංකා ප්‍රනාන්දුය.

“ෆෑන් එකක් ගත්තට වැඩක් නෑ ඉතින්. කරන්ට් එක කැපුවම වැඩ කරන්නෙ නෑනේ. ඒත් දුවට වගේම අපිටත් රෑට ඉන්න හරිම අමාරුයි. නින්ද යන්නෙම නැති තරම්. දුව උදේ වෙද්දී දාඩියෙන් නෑවිලා. මේ වෙලාවේ සල්ලි නැතත් ෆෑන් එක හැමෝටම අත්‍යවශ්‍ය දෙයක් වෙලා” ඇය පවසන්නීය.

පාරිභෝගික කටයුතු අධිකාරියේ ප්‍රාදේශීය කටයුතු පිළිබඳ නියෝජ්‍ය අධ්‍යක්ෂ අසේල බණ්ඩාර පෙන්වා දෙන්නේ ජනතාවට අත්‍යවශ්‍ය භාණ්ඩ හැර අන් භාණ්ඩවල මිල ගණන් සඳහා පාලන මිලක් නියම කිරීමට විවෘත ආර්ථිකය යටතේ හැකියාවක් නැති බවය. එහෙත් ඉල්ලුම වැඩිවීම නිසා මිල ගණන් වැඩිකරමින් ජනතාව නොමග යැවීම සිදුවන අවස්ථාවල ඊට එරෙහිව පාරිභෝගික කටයුතු අධිකාරියට පැමිණිලි කිරීමට අවස්ථාව තිබේ. එසේම භාණ්ඩයේ මිල සඳහන් කර තිබිමද අනිවාර්ය කරුණකි. එවිට අඩුම මිල පවතින තැනින් භාණ්ඩය මිලට ගැනීමට පාරිභෝගිකයාට අවස්ථාවක් පවතින බව හෙතෙම පෙන්වා දෙයි.

සුප්‍රකට විදුලි උපකරණ සන්නාමයකට අයත් අන්තර්ජාල ප්‍රචාරක වබේ අඩවියක රුපියල් දසදහසකට ආසන්න මිලකට වූ විදුලි පංකාව පැය 6ක කාලයක් විදුලිය නොමැතිව ආරෝපිත බලයෙන් ක්‍රියාකරන බව සඳහන් වූ අතර එල්.ඊ.ඩී. බල්බ 40කින් යුතු අලෝක පැනලයකින් එය සමන්විත විය. බිත්තියේ සවිකළ හැකි, එල්.ඊ.ඩී. පහනකින්ද යුතු විදුලි පංකාවක මිල වූයේ රුපියල් 6500කටය. ඒ පහසුකම් ඇති මේස පංකාවක් රු. 8500කි.

ඒ අතින් බලන විට නිවසට ගෙනවිත් දීමත් වසරක වගකීමක් හිමිවීමත් නිසා පිටකොටුවේ ගිනි රස්නයේ දැවෙමින් හොර බඩු මිලට ගන්නවාට වඩා අන්තර්ජාලයෙන් විදුලි උපකරණ මිලට ගැනීම පහසු හා සාධාරණ නොවේදැයි අපට සිතුණි.


ඒ අතර මේ දාහ සමය හේතුවෙන් විවිධ අන්තර්ජාල වබේ අඩවිවල කෙළි බඩු හා සමාන විදුලි පංකා, විදුලි ෆෑන්, කුඩා කූලර්, කුඩා ශීතකරණ, බල සංචිත උපාංග, සූර්යබල උපකරණ ආදී විවිධ නිෂ්පාදන විවිධ මිල ගණන් යටතේ අලෙවි වෙයි. මේවායේ ඡායාරූපවල ඇති සුන්දරත්වය මිලට ගත් පසු නැති බවට සාක්ෂි බොහෝය.

එවැනි වංචා කිරීම්වලට හසු නොවීමද මේ අවස්ථාවේ පාරිභෝගිකයන් තේරුම්ගත යුතු තත්ත්වයකි. ඒ මන්ද යත් කළ දුටු කල වළ ඉහ ගන්නා ව්‍යාපාරික මාෆියාවෙන් කොයි කලත් පීඩාවට පත්වනුයේ අසරණ මහජනතාව වන බැවිනි.

මිහිරාන් කරුණාරත්න
ඡායාරූප - මලිත් ගමගේ

  1. හද්දා පිටිසර තරුණ තරුණියන් මත්ද්‍රව්‍ය සමග විනෝද වූ ෆේස්බුක් සාදය
  2. මාලපල්ල මරා උපන් මාකුඹුරේ ඉස්ටේසම
  3. මේ කොළඹ නන්නත්තාර වන සතියයි
  4. ශිවශංකර් මෙනන් ගෝඨා හමුවෙන් රටට දෙන ඉඟිය
  5. එන්.ඩී.ටී. ගහලයෝ ශනිල්ක මරා ගනිති
  6. තරුණයකු අතුරුදන් කර වසර 11ක් නිදැල්ලේ සිටි ඒ.එස්.පී.
  7. බැඳුම්කර හොරකමේ තෝරු මෝරු හතරක් ඇල්ලූ මෙහෙයුම
  8. මේ රස්නය මරණයෙන්ද කෙළවර විය හැක
  9. තුසිතපුරයේ අපා දුක් විඳින, රජකමටත් සුදුසු මිනිස්සු
  10. ජ’පුර සරසවියෙන් ලෝකයට අලුත් වැඩක්
  11. ශ්‍රී ලංකා-ඉන්දියා බැතිමතුන් එකට වැඳ වැටෙන කච්චදූව
  12. සිරිසඟබෝ රජු හිස දන් දුන්නේ අත්තනගල්ලේ දී නොවේ
  13. නීතිඥ නාගානන්දට වුණා වගේ පෙරකදෝරු රස්සාව නැතිවෙන්නේ කොහොමද?
  14. දකුණේ නිදන් හාරද්දී උතුරේ හාරන්නේ රත්තරන්
  15. අවුරුදු විසිපහක්ම රෝදපුටුවේ ගිය හමුදාවේ ධෛර්යය
  16. දරුවන් රකින්නට නුවර කලාවියේ දෙන අපූරූ දානය
  17. ස්ථාන මාරුවකින් කෙළවර වූ ජී. ටී. බොස්ගේ වැදි නැටුම
  18. ඉන්දියාවේදී කොටු වූ බ්ලූමැන්ඩල් සංඛ
  19. කැඩුණු අමුණ බැඳගන්නට මුදල් නැතිව අකලට මහලු වෙන ගමක්
  20. ජංගම දුරකථනයෙන් කතා කර කර දුම්රිය මග දිගේ එලොව යන්නෝ
  21. ඩුබායි ගෙන ගිය බව කියූ කෝටි 700 දියමන්තිය පානදුරෙන් මතුවූ හැටි
  22. මත්පෙති සමග ටෙලි නිළියක් කොටු වූ පොල්හේනේ බිච් පාටිය
  23. කාන්තාවන්ට දුම්රිය මැදිරි වෙන් කිරීමෙන් අනික් මැදිරි වල තද බදයක්
  24. නැගෙනහිර වෙරළේ ඇස්කිමෝ ගෙවල්
  25. ඉතිහාසයේ විශාලම මූල්‍ය ආයෝජනය සමග “ළඟම පාසල - හොඳම පාසල“ වන අයුරු

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.