lakbima.lk

ඇඳුම් ඇඳ සිටින විටත් විලිබිය දැනෙන යුවතියක්

ෂහ්; අද කෙල්ල ලස්සනට ඇඳලා තියෙන්නේ හරියට උඩරට මැණිකේ කෙනෙක් වගෙයිනේ දිනක් උදෑසන සුනීතා කාර්යාලයට පැමිණෙත්ම ඇගේ සමීපතම මිතුරියක එසේ සරදම් කළාය.

මම උඩරට කිව්වට මතුරට  නේ ඇගේ සරදම එවන් සැහැල්ලු පිළිතුරකින් පිළිගත් නමුදු ඒ සමගම සුනීතාගේ මුහුණ අඳුරින් බර විය.

ඇයි සුනීතා, ඔයාට මුකුත් ප්‍රශ්නයක්ද? මිතුරිය අසන ලද්දේ සුනීතාගේ සිත තුළින් නැගෙන වේදනාව දෙනෙතින් පිටාර ගලන අයුරු මනාව තේරුම් ගැනිමෙන් පසුවැය.

නෑ අනේ කොච්චර හොඳ ඇඳුමක් ඇන්දත් මට ඒකෙන් ඔයාලට වගේ සතුටු වෙන්න බැහැනේ මිතුරියගේ පැනයට පිළිතුරු දෙමින් සුනීතා කීවාය.

ඒ මොකද? මිතුරිය අසන ලද්දේ තරමක විස්මයකිනි.

මේක කාටවත්ම කියා ගන්න බැරි දෙයක් හාත්පස කිසිවකු සිටීදැයි විපරම් කළ සුනීතා කීවාය මම ඇඳුම් ඇඳලා ඉන්නකොට සමහර වෙලාවට මගේ ඇගේ ඇඳුම් මුකුත්ම නැහැ කියලා එක පාරටම හිතෙනවා. ඒක විදුලි සැරයක් වගේ වේගෙන් හිතට දැනෙන සිතුවිල්ලක්. එතකොට හිතට දැනෙන ලජ්ජාව කෙළවරක් නැහැ. ඒ වගේම ඇඳුමක් ඇඳගෙන ප්‍රසිද්ධ තැනකට යනකොට ඒ ඇඳුමේ පිටිපස්ස ඉරිලා වගේ හැඟීමක් එකපාරටම හිතට දැනිලා මාව ගැස්සෙනවා. ඒත් මං දන්නවා එහෙම ඉරෙන්න විදිහක් නෑ කියලත්. කොහොම වුණත් මේක මගේ හිතට හරිම වදයක්. මට හිතාගන්නවත් බැහැ මේකට මොකද කරන්නේ කියලා සුනීතා දුක්මුසු හඩින් කීවාය.

මම නම් ඔහොම දෙයක් ගැන ඇහුවමයි ඔය; ඒත් ඕක මොකක් හරි මානසික ප්‍රශ්නයක් වෙන්න බැරිද? නරකද? ගිහින් මනෝ වෛද්‍යවරයෙක් මුණගැහුණොත්? මිතුරිය රහසින් කීවාය.

එතකොට උඹ කියන්නේ මට පිස්සු කියලද? ඊට පිළිතුරු ලෙස සුනීතා දුක්මුසුව ඇසුවාය.

පිස්සු කතාවක් මෙතනට වැඩක් නැහැ සුනීතා; ඒත් උඹට මොකක් හරි මානසික ප්‍රශ්නයක් තියනවා නම් ඒක මනෝ වෛද්‍යවරයකුට නොකියා ‍පෝ්ස්ට් මාස්ටර් කෙනෙකුට කියලා හරියන්නේ නැහැනේ මිතුරිය සිනාසෙමින් කීවාය.

කෙසේ හෝ සුනීතා මනෝ වෛද්‍යවරයා හමුවට පැමිණිය් තම මිතුරියද සමගය. මෙහි දී සුනීතා මුහුණ දී ඇති අපහසුව පිළිබඳව දීර්ඝ වශයෙන් කරුණු විමසා සිටි තමන් හමුවේ හෙළි කළ කරුණුවලින් මතු දැක්වෙන කරුණු කෙරෙහි මනෝ වෛද්‍යවරයාගේ විශේෂ අවධානය යොමු විය.

එය කිනම් කාලයක සිට බලපාන මානසික තත්ත්වයක්දැයි සුනීතාට නිශ්චයක් නැත. ඇය පවසනුයේ එය තමන් වැඩිවිය පත්වූ පසුව මුහුණ දෙන තත්ත්වයක් බවය.

එමෙන්ම එය තනිව සිටින විට ඇතිවන තත්ත්වයක්ද පවු‍ලේ සාමාජිකයන් අතර සිටින විට ඇතිවන තත්ත්වයක්ද නැතහොත් මිතුරු මිතුරියන් අතරේ සිටින විට ඇතිවන තත්ත්වයක්ද එසේත් නැතිනම් ප්‍රසිද්ධ ස්ථානවලදී පමණක් මුහුණ දෙන තත්ත්වයක් ද යන්න සම්බන්ධයෙන් පැහැදිලි පිළිතුරක් දීමට ද සුනීතාට නොහැකි විය. ඇය කියා සිටියේ ඒ සම්බන්ධයෙන් නිශ්චිත දහසක් පළ කළ නොහැකි මුත් ප්‍රසිද්ධ ස්ථානවලදී තමන් එම අපහසුතාවට මුහුණ දීමේ වැඩි නැඹුරුවක් පවතින බවය.

එමෙන්ම මෙය ඇඳුම් ඇඳ සිටින සෑම අවස්ථාවක ඇතිවන තත්ත්වයක් නොවන බව කී සුනීතා කීයේ එම හැඟීම ඉතා අනපේක්ෂිත ලෙස 'විදුලියක් කොටන්නාක් මෙන්' ක්ෂණිකව සිත තුළම පිවිසෙන අතර ඉන් තමන්  මහත් ලජ්ජාවකට අසීරුතාවකට පත්වන බවකි.

ඕනෑම දෙයක් මුල්කොට තම මනාපයට පටහැනි සිතුවිලි සිත තුළට පිවිසීමේ  තත්ත්වයක් පිළිබඳව  මනෝ වෛද්‍ය විද්‍යාවේ සඳහන්ය. ප්‍රඥාවට සහ තර්කයට ගෙනු කර ගත නොහැකි එම සිතුවිලි මගින් හටගන්නා මානසික පීඩාව මුල්කොට එම තැනැත්තා තුළ කාංසාත්මක (anziety) සහ විශාද (depression) ලක්ෂණ පහළ විය හැක. මෙම තත්ත්වය මනෝ වෛද්‍ය විද්‍යාවේ හැඳින්වනුයේ ග්‍රස්ති නියුරෝසියාව (obsessional neurosis) යනුවෙනි.

එමෙන්ම යම් සිදුවීමක් මුල්කොටගත් ප්‍රබල මානසික කම්පනයක් නිසාද යම් මානසික කැළඹීමක් ඇතිවිය හැකි අතර පසුව එය මුල්කොට කාන්සාව ඇදී චිත්තාවේග සිත තුළට පිවිසීම පශ්චාත් ක්ෂණික ආතති ආබාධයේ (Post traumatic stress disorder) ලක්ෂණයක් ලෙස සැලකේ. එහෙත් ඒ රෝගය සම්බන්ධ සෙසු රෝග ලක්ෂණ ද සුනීතා වෙතින් පළවන බවක් පෙනෙන්නට නැත. එමෙන්ම තමන්ගේ විළිබිය සම්බන්ධයෙන් කුඩා කාලයේ මනැස තුළ යටපත් වූ යම් ප්‍රබල අත්දැකීමක් වරින්වර සිත තුළින් පැන නැඟීම ආදී තත්ත්වයන් මුල් කොටගෙනද මෙවැනි පුහු ලජ්ජාවක් හිටිහැටියේ සිත තුළට පිවිසීමට පුලුවන. 

ඒ කෙසේ හෝ ඉහත සඳහන් සිතුවිලි හුදෙක් ප්‍රඥාවට සහ තර්කයට ගොනු කර ගත නොහැකි හෝ මානසික ආතතියක් සමග ඉස්මතු වන පීඩාකාරී හැඟුම් ආවේග බව මනාව වටහා ගැනීමෙන් මෙම තත්ත්වය මූලිකව සමනය කර ගත හැකි බව කී වෛද්‍යවරයා ඒ වන විට සුනීතා තුළ තිබූ සුළු විශාල තත්ත්වයට ඖෂධීය ප්‍රතිකාර නියම කළේය. ඒ සමගම මනෝ වෛද්‍යවරයා දුන් මානසික අභ්‍යාස කිහිපයද මනාව ප්‍රගුණ කළ සුනීතාගේ සිත තුළින් එම මානසික පීඩාව පහව යන ලද්දේ ඇගේ සිතට අමුතුම සහනයක් උදාකරමිනි.

ගාල්ල, කරාපිටිය ශික්ෂණ රෝහ‍ලේ විශේෂඥ මනෝ වෛද්‍ය රූමි රූබන් අනාවරනය කරයි

සටහන දමයන්ති ගමගේ

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.