lakbima.lk

වරක් බි‍්‍රතාන්‍ය ගුවන් විදුලි සේවාව හෙවත් බී බී සී නාලිකාව සජීවී වැඩසටහනකට සහභාගී වන්නැයි ශ‍්‍රීමත් නිකොලස් වින්ටන්ට ආරාධනා කළා. ආරාධනය ලැබුණා හැරුණුවිට එහිදී සිදුවන්නේ කුමක්ද කියා ඔහු දැන සිටියේ නැහැ.  නිකොලස්ව සාදරයෙන් පිළිගත් බී බී සී නියෝජිතයන් ඔහුව විශාල ශාලාවකට කැඳවාගෙන ගියා. එහි විශාල පිරිසක් අසුන් ගෙන සිටියා. ශ‍්‍රීමත් නිකොලස් එයට පිවිසෙනවාත් සමගම ඔවුන් සියලූ දෙනාම නැඟී සිටිමින් ඔහුට ආචාර කළා. ඒත් මෙතැන සිදුවෙන දෙය නම් ඔහුට තවමත් මහා ප‍්‍රශ්නයක්.

අනතුරුව බී බී සී නිවේදිකාවක් මෙසේ කියන්නට පටන් ගත්තා. එ්, විශාල පොතක පිටු පෙරළමින්.

”මා අතේ තිබෙන මේ පොතේ තිබෙනවා දරුවන් බොහෝ දෙනෙකුගේ නම් ගම් ඇතුඵ බොහෝ විස්තර. මේ පොතේ අයිතිකරු තමයි අද අපේ ආරාධිත අමුත්තා. මේ පොතේ නම තියෙන මෙතන ඉන්න එක දැරියකගේ නම වේරා ඩියමන්ඞ්. දැන් ඇයගේ නම වේරා හිගින්ස්`. වේරා, ඔබ වාඩිවී සිටින්නේ ඔබේ ජීවිතය මරණයෙන් බේරාගත් ශ‍්‍රීමත් නිකොලස් වින්ටන් සමගයි.”

එසේ කියනවාත් සමගම ඇය ශ‍්‍රීමත් නිකොලස්ව වැලඳගත්තේ තමාගේ ජීවිතය බේරා දුන් එ් උත්තමයාට කරන ගෞරවයක් හැටියටයි. ඔහුගේ දෑස් සතුටු කඳුළින් තෙමී ගියා.

”වින්ටන් මහතා නිසා තමන්ගේ ජීවිත බේරුණු අය තව මෙතන ඉන්නවා නම් නැඟිටින්න.” නිවේදිකාව නැවතත් කියා සිටියා. ශාලාවේ සිටි සියලූ දෙනාම අසුන්වලින් නැඟී සිටියේ එක වරමයි. ශ‍්‍රීමත් වින්ටන්ට සතුටත් දුකත් එක වර දැනුණු මොහොතක් වූවා එය. එදා සුරතල් දරුවන් ලෙසින් දුටු ඔවුන් අද වැඩිහිටියන්.

ශ‍්‍රීමත් වින්ටන් මේ අන්දමට බේරාගත් ළමයින්ගේ ගණන 669 ක්. මේ බේරා ගැනීම ඔබට ප‍්‍රහේළිකාවක් වෙනවාට කිසිම සැකයක් නැහැ.

මේ සිදුවීම වුණේ 1938 තරම් ඈත කාලයකදීයි. එ් වෙද්දී 2 වැනි මහා ලෝක යුද්ධය ඇරඹීමේ පෙර ලකුණු පෙනෙමින් තිබුණා. මේ යුද්ධයට වගකිව යුතු ප‍්‍රධාන පුද්ගලයෙක් තමයි ජර්මන් නායක ඇඩොල්ෆ් හිට්ලර්.

ඔහු යුදෙව් ජාතිකයන් සමග මහා වෛරයකින් සිටි කෙනෙක්. ඔහුට  ඕනෑ වුණේ යුදෙව්වන් මුළු ලෝකයෙන්ම නැති කර දමන්නටයි. ඔහු ජර්මනියේ සිටි යුදෙව්වන් දහස් ගණනක් ඉතාමත් අමානුෂික විදිහට මරා දැමුවා.

එ් වෙද්දී චෙකොස්ලොවැකියාවේත් යුදෙව් පවුල් බොහොමයක් සිටියා. හිට්ලර්ගේ ඊළඟ ඉලක්කය වූයේ මොවුන් වනසා දැමීමයි. මේ අසරණ මිනිසුන් ගැන නිකොලස්ගේ හිතේ තිබුණේ විශාල දුකක්, ඔවුන් වෙනුවෙන් යමක් කළයුතුයි අදහස ඔහුගේ හිතේ තදින් කිඳාබැස තිබුණා.

නිකොලස් තමන්ගේ මිතුරන් කිහිප දෙනෙකු සම්බන්ධ කරගෙන චෙකොස්ලොවැකියාවේ සිටි යුදෙව් දරුවන් 669 ක් රහසින් රටින් පිටමං කළා. එ්, හිට්ලර්ගේ කෲර නාසි හමුදාවලට කොහෙත්ම නොදැනෙන විදිහටයි. ඔවුන් මේ දරුවන් තැන් තැන්වල නතර කරවූයේ දෙමාපිය රැකවරණයේද අඩුවක් ඔවුන්ට නොදැනෙන අන්දමටයි.

නිකොලස් මේ සෑම දරුවෙක් ගැනම තොරතුරු පොතක ලියා තැබුවා. ඔහු තමා කළ එ් මහා උතුම් කි‍්‍රයාව ගැන අඩුම තරමින් තමන්ගේ බිරිඳටවත් ඇඟවූයේ නැහැ. ඔහු එ් තරමට ඉතාමත් නිහතමානී මෙන්ම ප‍්‍රසිද්ධියට කොහෙත්ම අකැමැති කෙනෙක්.

දිනක් වින්ටන්ගේ බිරිඳ පොත් පත් ඇතුඵ පැරණි ලියකියවිලි කිහිපයක් උනන්දුවෙන් බලමින් සිටියා. එ්වා සියල්ලම වින්ටන්ගේ. ඒවා අතර තිබුණු එක් විශාල පොතක් ගැන ඇයගේ වැඩි අවධානයක් යොමුවුණා. එහි තිබුණේ යුද කාලයේදී තමන්ගේ සැමියා මැදිහත් වී ජීවිත බේරාගත් දරුවන් 669 ක් ගැන තොරතුරුයි. එවේලේ ඇයට තමන්ගේ සැමියා ගැන ඇතිවුණේ වචනවලින් කියාගන්න බැරි තරම් ගෞරවයක්. එ්ත් ඇය මේ පොත දුටු බවක් ඔහුට ඇඟවූයේ නැහැ.

ඇය මේ පොත රහසින්ම බී බී සී ආයතනයට භාරදුන්නා. එ් වෙද්දී වැඩිහිටියන් බවට පත්වී සිටි එදා වින්ටන් නිසා පණ බේරුණු බොහෝ දෙනෙක්ව බී බී සී ආයතනයට ගෙන්වා ගෙන සුහද හමුවක් සංවිධානය කළා. ශ‍්‍රීමත් නිකොලස්ට බී බී සී නාලිකාව ආරාධනා කළේ මේ හමුවට සහභාගී කරවාගෙන ඔහුට ගෞරව දක්වන්නටයි.

1909 මැයි 19 වැනිදා බි‍්‍රතාන්‍යයේදී උපන් නිකොලස් 2015 ජූලි 01 වැනිදා මියගියා. ඔහු බි‍්‍රතාන්‍ය රාජකීය ගුවන් හමුදාවේ පියාසර ලූතිනන්වරයෙක් හැටියටත් සේවය කර තිබෙනවා.

ජීවිත බේරාගනිමින් කළ උතුම් වූ මානව හිතවාදී මෙහෙවර ඉහළින්ම අගය කරමින් බි‍්‍රතාන්‍යයේ 2 වැනි එලිසබෙත් රැජින ඔහු වෙත නයිට් නාමයක් පවා ප‍්‍රදානය කළා.

නඳුන් අමන්ද මනමේන්ද්‍ර ආරච්චි

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.