lakbima.lk

කලින් කල තම ජිවිතයට එබිකම් කළ පිළිකාවට මෙවර පරාජය වූ ‍පෝල් ඇලන් පසුගියදා ජීවිත ගමන නිම කළේය. තම පාසල් මිතුරා වූ බිල් ගේට්ස් සමග එක්ව සුප්‍රකට මයික්‍රොසොෆ්ට් සමාගම බිහිකළ ඔහු ලොවින් සමුගන්නා විට ප්‍රකෝටිපති ව්‍යාපාරිකයකු මෙන්ම ලොව ධනවතුන් අතර හතළිස්හයවැනි තැනට පත්ව සිටියේය. මිය යනවිට ඔහුගේ වයස අවුරුදු හැටපහක් වූ අතර ගේට්ස් ඔහුට වඩා වසර දෙකකින් බාලය. ඇලන්ගේ මරණය සම්බන්ධයෙන් දැඩි ලෙස කම්පාවට පත් බිල් ගේට්ස් කියා තිබුණේ තම දිගුකාලීන හා සමීපතම මිතුරා නොවන්නට මයික්‍රොසොෆ්ට් සමාගමක් ලොවට බිහිනොවනු ඇති බවය. උසස් අධ්‍යාපනය වෙත යොමු නොවී තම මිතුරා වන බිල් මයික්‍රොසොෆ්ට් සමාගම ආරම්භ කිරීම සඳහා ‍පොලඹවන ලද්දේ ‍පෝල් වීම ඊට හේතුවයි. ඒ වනවිට ‍පෝල් පාසල් අධ්‍යාපනය නිමකොට වොෂින්ටන් ස්ටේට් විශ්වවිද්‍යාලයේ උසස් අධ්‍යාපනය ආරම්භ කොට සිටියදී එය අතරමග නවතා දමා සිටියේය. 1975 වසරේදී ඔවුහු මයික්‍රොසොෆ්ට් සමාගම ආරම්භ කළෝය. කිසිදිනක විවාහනොවූ හා දරුවන් නොමැති ‍පෝල් ඇලන් තම ජීවිතයම කැප කළේ ව්‍යාපාරික කටයුතු සඳහාය.

‍පෝල් තම සොයුරිය ජෝඩි සමග එකතුව චිත්‍රපට හා ටෙලි නාට්‍ය නිෂ්පාදන ආයතනයක්ද පවත්වාගෙන ගියේය. තම මියගිය සොයුරාට උපහාර දක්වමින් ජෝඩ් කියා සිටියේ ඔහු සෑම අතින්ම විශිෂ්ටයෙකු වූ බවය. 1982 වසරේදී ඇලන්ට මුල්වරට ලිම්ෆෝමා පිළිකාවක් වැලඳුණද වහා ප්‍රතිකාර ලැබූ ඔහු ඉදිරි වසර විසිහයක් නිරෝගීව ගතකළේය. නැවත වසර නවයකට පෙර ඔහුට නොන් හොක්ඵකින් ලිම්ෆෝමා පිළිකා තත්ත්වය ඇතිවුණ අතර එවරද ඇලන් ප්‍රතිකාර ලබා සුවවුවේය. නමුත් මීට සති කිහිපයකට පෙර නැවත එම තත්ත්වයම ඇතිවූ විට මරණයෙන් ගැලවීමට ඔහු සමත් නොවුවේය. ප්‍රකෝටිපතියෙකුව සිටියදී පරිගණක ක්ෂෙත්‍රයේ ඉහළින්ම නම කියැවුණු ඔහුගේ මරණය සිහිපත් කරන්නේ ස්ටීව් ජොබ්ස්ගේ ජීවිතය හා මරණ යයි.

මියයන අවස්ථාව වනවිට ‍පෝල් ඇලන්ගේ වත්කම ඇමෙරිකානු ඩොලර් බිලියන 20.3කි. මයික්‍රොසොෆ්ට් කොටස් මිලියන සියයක අයිතිය ඔහු සතුවිය. 1953 ජනවාරි විසිඑක්වැනිදා ‍පෝල් ගාඩ්නර් ඇලන් උපත ලැබුවේ සියැටල් නගරයේ වන අතර මියයන විටද එහි පදිංචිව සිටියේය. බිල් සමග ඔහු ඉගෙනුම ලැබුවේ ‍ලේක්සයිඩ් නම් පෞද්ගලික විදුහ‍ලේය.තම සියලු ව්‍යාපාරික කටයුතු පවත්වාගෙන යාමට වල්කන් නමින් ආයතනයක් පිහිටුවාගත් ඔහු එහි සභාපතිවරයා ලෙස මියයන තුරුම කටයුතු කළේය. තාක්ෂණික ආයතන, මාධ්‍ය ආයතන, විද්‍යාත්මක පර්යේෂණ ආයතන, දේපළ විකිණීම් ආයතන, අභ්‍යවකාශ ගමන් ආයතන ඇතුළු ඇමෙරිකානු ඩොලර් බිලියන ගණනක් වටිනා ව්‍යාපාර එහි විය. පාපන්දු හා වෙනත් ක්‍රීඩා සමාජ කිහිපයක්ද ඔහු සතු විය. විවිධ පර්යේෂණ කටයුතු සඳහා ආයතන කිහිපයක නිර්මාතෘ වූ ඔහු සමාජ සේවා කටයුතු සඳහා ඇමෙරිකානු ඩොලර් බිලියන දෙකක් පරිත්‍යාග කොට තිබුණි. සම්මාන රැසකින් පිදුම් ලැබූ ‍පෝල් ඇලන් 2007 හා 2008 වසරවලදී ටයිම් සඟරාව මගින් ලොවට වැඩිම බලපෑමක් කළ හැකි පුද්ගලයන් සියදෙනා අතරට එක්කොට තිබිණි.

පාසල් වියේදී බිල් ගේට්ස් සමග ඇලන්ගේ සමීප හිතවත්කම ඇතිවන්නට හේතුව වූයේ දෙදෙනාටම තිබූ පරිගණක පිස්සුවය. පාසල් වියේදී පාස‍ලේ වූ තාක්ෂණික සේවය උපයෝගී කොටගෙන ඔවුහු මෙම පරිගණක ක්‍රියාවලිය වැඩිදියුණු කිරීමට පටන්ගෙන තිබුණි. වොෂින්ටන් විශ්වවිද්‍යාලයේ සම්පත්ද තම පරිගණක පර්යේෂණ සඳහා උපයෝගී කරගත් ඔවුන්ට පසුව විශ්වවිද්‍යාල විද්‍යාගාරය තහනම් කරන ලද්දේ ලබාදුන් අවස්ථාවෙන් ප්‍රමාණයට වඩා ප්‍රයෝජන ගැනීමේ චෝදනාව මතය. වොෂින්ටන් ස්ටේට් විශ්වවිද්‍යාලයෙන් දෙවසරකට පසු මයික්‍රොසොෆ්ට් සමාගම ඇරඹීමට ඇලන් ඉවත්වෙද්දී හාවඩ් විශ්ව විද්‍යාලයේ එවකට හදාරමින් සිටි අධ්‍යාපනික කටයුතු අතරමග නවත්වා තමා සමග එක්වීමට ඔහු තම මිතුරා වන බිල් ගේට්ස් ‍පොලඹවා ගත්තේය. මයික්‍රොසොෆ්ට් යන නමද ‍පෝල් ඇලන්ගේ අදහසකි. 1982 දී සමාගම හැරයන්නට ඇලන් තීරණය කළේ පළමුවරට තමා පිළිකා තත්ත්වයකින් පෙළෙන බව දැනගත් අවස්ථාවේය. පසුකලක ගේට්ස්ට සියයට හැටක් හා ඇලන්ට සියයට හතළිහක් ලෙස සමාගම බෙදාගැනීමට ගේට්ස් ඇලන්ට යෝජනා කළ අතර ඇලන් සතු කොටස් කොටසකට ඩොලර් පහ බැගින් ගෙවා මිලයට ගැනීමේ අදහසක් ගේට්ස් විසින් ඉදිරිපත් කරන ලදී. එයට අකමැති වූ ඇලන් තමා සතු කොටස් රැගෙන සමාගමෙන් ඉවත් විය. ‍පෝල් ඇලන් ප්‍රකෝටිපතියෙකු වූයේ එලෙසිනි. 2000 වසරේදී මයික්‍රොසොෆ්ට් අධ්‍යක්ෂ මණ්ඩලයෙන් ඉවත් වූ ඇලන් මිය යනතුරුම සමාගමේ විධායක නිලධාරීන්ට ‍‍‍ජ්‍යෙෂ්ඨ උපදේශකවරයෙකු ලෙස කටයුතු කළේය.

විවිධ නිෂ්පාදන සඳහා පේටන්ට් බලපත්‍ර හතළිස් තුනක් ඇලන් සතුය. 2004 වසරේ වාණිජමය අරමුණෙන් අභ්‍යවකාශයට යානයක් යැවීමේදී එහි සම්පුර්ණ ආයෝජකයා වූයේ ඇලන්ය. 1998 වසරේදී ඵෙතිහාසික සියැටල් සිනෙරාමා සිනමා ශාලාව මිලයට ගත් ඔහු එය නවීන තාක්ෂණයෙන් යුතු සිනමා ශාලාවක් බවට පත්කළේ එය 2014 වසරේදී ලොව පළමු වාණිජමය ඩිජිටල් ‍ලේසර් ‍ප්‍රොජෙක්ටරයක් සතු සිනමා ශාලාව බවට පත්විය. 2014 වසරේදී ‍පෝල් ඇලන් මිලියන සියයක් බටහිර අප්‍රිකාවෙන් ඉබෝලා වසංගතය තුරන් කිරීම සඳහා ලබාදුන්නේ ඒ සඳහා තනි පුද්ගලයෙකු ලබාදුන් වැඩිම මුදල සනිටුහන් කරමිනි. සංගීතයට දැඩි ලෙස ඇලුම් කළ ඔහු සුපිරි ගායක ජිමි හෙන්ඩ්‍රිකස් ලෝලියෙකු වෙමින් තම පළමු විදුලි ගිටාරය සතු කරගත්තේ වයස අවුරුදු දහසයේදීය. ඔහු ගිටාර් වාදනයෙහි අති දක්ෂයෙකු විය.

 නිශානි දිසානායක

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.