lakbima.lk

සැප්තැම්බර් එකොළහ එනම් 9/11 ප්‍රහාරය ගැන නොදන්නා කිසිවෙකුත් හිඳින්නට නුපුළුවන. ජාත්‍යන්තර ත්‍රස්තවාදයේ උච්චතම අවස්ථාව සනිටුහන් කරමින් ඇමෙරිකා එක්සත් ජනපදය ඉලක්ක කරගනිමින් සිදුවූ මේ ප්‍රහාරය මුළු ලොවම භීතියට පත් කරන්නට සමත් විය. අල් කයිඩා ඉස්ලාමීය ත්‍රස්තවාදීන් විසින් 2001 සැප්තැම්බරයේ 11 වැනි අඟහරුවාදාවේ උදේ සිදු කළ මේ ප්‍රහාරයෙන්  මිනිසුන් 2996 ක් මියගොස් හයදහසකට අධික දෙනා තුවාල ලද්දෝය. දේපළ හානිය අවම වශයෙන් ඇමෙරිකානු ඩොලර් බිලියන දහයක් පමණවත් වී යැයි පැවැසිණ.

මේ අවාසනාවන්ත සිදුවීම් පදනම් කරගෙන ඉනික්බිති බොහෝ සංවාද මතවාද හා ක්‍රියාකාරකම්ද, ප්‍රතිප්‍රහාරද පසුකාලීනව ඇති විය. එයින් සමහර සිදුවීම් අද වන තෙක්ද සාමාන්‍ය ජනතාවට වසන්ව පවතින්නේය. පසුගිය වසරේ එළිදුටු  “12 Strong”  ඉංග්‍රීසි සිනමා සිත්තමද මේ 9/11 ප්‍රහාරය හා අදාළ සැඟවුණු කතාන්දරයකැයි බොහෝ දෙනාගේ ඉඟි හා අදහස් පළවූයේ මේ අතරවාරයේය. සැබැවින්ම එය එසේම විය.

වෝනර් බ්‍රදර්ස් චිත්‍රපට සමාගමේ චිත්‍රපටයක් ලෙස එළි දුටු “12 Strong” සිනමා සිත්තටමට මුල් වී තිබෙන්නේ ඩග් ස්ටැන්ටන්ගේ Horse Soldiers කෘතියයි. එහි අන්තර්ගත වන්නේ ඇමෙරිකා එක්සත් ජනපද විශේෂ
බළකා හමුදාව සැප්තැම්බර් 11 ප්‍රහාරය සිදුවූ වහාම පාහේ ඇෆ්ගනිස්ථානයට කඩා වැදුණු මෙහෙයුමයි. 12 දෙනෙකුගෙන් සමන්විත වූ මේ බළඇණිය සැලකෙන්නේ ඇෆ්ගනිස්ථානයට පා තැබූ මුල්ම ඇමෙරිකා එක්සත් ජනපද භට පිරිස ලෙසිනි.

සැප්තැම්බර් 11 ප්‍රහාරයෙන් පසුව ඇමෙරිකානු රජය තීරණය කළේ ඉතා ඉක්මනින් මේ තත්ත්වයට එරෙහිව කටයුතු කළයුතු බවය. ඊළඟ දවසේ ඇමෙරිකානු ජනාධිපති බුෂ් පැවැසුයේ මෙය හුදෙක් කඩාකප්පල්කාරී ත්‍රස්ත ප්‍රහාරයක් ලෙස පමණක් ලෙස නොව එය යුද ප්‍රහාරයක් ලෙස සලකා ඊට අවැසි ප්‍රතිප්‍රහාර අදාළ පාර්ශ්ව වෙත සිදු කළ යුතු බවය.

සැප්තැම්බර් දහ තුන්වනදා වනවිට මෙම ප්‍රහාරය සඳහා පිඹුරුපත් සැකසෙන්නට පටන් ගෙන තිබුණි. ඒ සඳහා තෝරාගෙන තිබුණේ පස්වැනි විශේෂ බළකා කණ්ඩායමකි. පස්වැනි විශේෂ බලකා කණ්ඩායම 5th SFG(AJ) වූ කලී ඇමෙරිකානු එක්සත් ජනපද හමුදාවන්හි වඩාත් සක්‍රීයතම අනුඛණ්ඩයක් ලෙස සැලකෙන්නකි. 1961 සැප්තැම්බරයේ 21 වැනිදා පිහිටුවන ලද මෙහි මුඛ්‍ය පරමාර්ථය  වූයේද විශේෂ ක්‍රියාන්විතයන් සඳහා දායකවීමයි. පළමුවැනි විශේෂ සේවා බළඇණිය යටතේ ක්‍රියාත්මක වූ මෙහි තේමා පාඨය වූයේ බලසම්පන්න බව හා ගෞරවයයි.

ජනාධිපති  බුෂ් විසින් ඇෆ්ගනිස්ථානු මෙහෙයුම සඳහා කැඳවන ලද්දේ මේ පස්වැනි විශේෂ බළකායයි. ජනාධිපති බුෂ් තරයේ විශ්වාස කළේ තම දේශයට මෙබඳු විපතක් කළ සතුරාගේ ඊළඟ පිම්ම ගැන අධ්‍යයනය කරනු වෙනුවට වහාම ඔවුන්ගේ බළකොටුවටම පහර දී ඔවුන් අඩපණ කළ යුතු බවකි. ඒ අනුව ලහි ලහියේ මේ ඇෆ්ගන් මෙහෙයුමට කටයුතු සූදානම් වූයේය.


මූලික සාකච්ඡාවකින් පසුව මේ මෙහෙයුමට අවැසි උපදෙස් හා නියෝග ලබාදෙනු ලැබුයේ ඔක්තෝබරයේ මැද වෙද්දීය. එය ඉතා පුළුල් මෙහෙයුමක් වූයේය. එය ඇතැමෙකු කල්පනා කළේ හිතන්නටවත් අපහසු අරමුණක් ලෙසය. ඇමෙරිකා එක්සත් ජනපදය අපේක්ෂා කළේ මේ මෙහෙයුම තුළින් ඇෆ්ගනිස්ථානු බිම තුළ සිදුවන සියලු ත්‍රස්වාදී කටයුතු මෙන්ම ත‍ලේබාන් ක්‍රියාකාරකම් සියල්ල අවසන් කළ යුතු බවයි. ඒ සඳහා ඔවුනට අදාළ මූලික සහය ලබා දෙන්නට ඇෆ්ගන් හමුදාවේ ජෙනරාල්වරයකු මෙන්ම දේශපාලනඥයකුද වූ අබ්දුල් රෂීඩ් දොස්තෝම් එකඟ වී තිබුණි.


මේ මෙහෙයුම සඳහා සූදානම් වූ කණ්ඩායම සමන්විත වුයේ දොළොස්  දෙනෙකුගෙනි. කර්නල් ජෝන් මුලෝලන්ඩ්  (දැන් විශ්‍රාමික ලුතිනන් ජෙනරාල්) ගේ නායකත්වය මේ කණ්ඩායමට හිමි වී තිබිණි. මේ දොළොස්  දෙනා සමන්විතව තිබුණේ  අපූරු සංයුතියකිනි. අණදෙන නිලධාරියකු, වොරන්ට් නිලධාරියකු, අධිකාරී බල නොලත් මෙහෙයුම් නිලධාරියකු, අවි පිළිබඳ නිලධාරියකු, ඉංජිනේරුවන් දෙදෙනෙකු හා සන්නිවේදන කටයුතු පිළිබඳ සාර්ජන්ට්වරුන් දෙදෙනකු මේ පිරිසට අයත් විය. ඒ හැරුණුකොට වෛද්‍යවරයකුගේ, තාක්ෂණික කටයුතු පිළිබඳ දැනුමැත්තෙකුගේ සහය අණදෙන්නෙකුගේ යනාදී වශයෙන් විවිධ වූ රාජකාරි පැවරී තිබුණේද ඔවුනොවුන් අතරමය.


ඔවුන්ට මේ මෙහෙයුම හා අදාළ විධිවිධාන ලැබි තිබුණේ ඔක්තෝබරය මැදදීය. ඔවුනට පළමුව ඉටු කරන්නට තිබුණේ ඒ හැටි අසීරු යැයි සිතිය නොහැකි වූ පියවරකි. ඒ ඇෆ්ගනිස්ථානයේ ජෙනරාල් අබ්දුල් රෂිඩ් දොස්තෝම් හා සම්බන්ධ වීමයි. එහෙත් එතැනින් පසු මේ කාරිය කිසි ලෙසකින් හෝ පහසු එකක් නොවන බව ඔවුන් දැන සිටියේ ඇෆ්ගන් ජෙනරාල් දොස්තෝම් මේ වන විට පැටලී සිටියේ සම්මතයට පටහැනි යුද්ධයක බැවිනි.

පිළිගත්  නීති රීති හා සම්ප්‍රදායන් තුට්ටුවකට ගණන් නොගත් තුච්ඡ, අශීලාචාර එමෙන්ම අමානුෂික ඉස්ලාම් ත්‍රස්තවාදයක් සමග හටන් කරන්නට ඔවුනට සිදුවිය. කර්නල් මුලෝලන්ඩ් ඇතුළු පිරිසට නියමව තිබුණේ මෙකීදුෂ්ට බලවේගය ඇෆ්ගන් බිමෙන් අතුගා දමන්නටය. අනෙක් අතට කොතැනින් පටන් ගෙන කොතැනින් අවසාන කරන්නට දැයි ඔවුහු දැන නොසිටියේය. මන්ද යත් ඒ තරමටම ඇෆ්ගන් බිම පුරා මේ බිහිසුණූ ත්‍රස්තවාදය පැතිරී ගොස් තිබුණු බැවිනි.


අනෙක් අතට ඓතිහාසික සාධක සසඳා බලද්දී වුව මෙය ඒ සා පහසු කටයුත්තක් ලෙස සැලකිය නොහැකි විය. ඇෆ්ගනිස්ථානු බිම තුළ විදේශ යුද හමුදාවකට ජය ගැනීම ඉතා අතිශය අසීරු කටයුත්තක්ව තිබිණි. මහා ඇලෙක්සැන්ඩර් අධිරාජයා, මෙන්ම ගෙන්ගීස් ඛාන්ද එහි අසාර්ථක වූවෝය. අනෙක් අතට එක්දහස් අටසිය ගණන්වල බ්‍රිතාන්‍ය හමුදාද එක්දහස් නවසිය අසූ ගණන්වල සෝවියට් හමුදාද  ඇෆ්ගනිස්ථානු බිම තුළ  සැලකිය යුතු ජයක් ලබන්නට සමත් වුයේ නැත.

කර්නල් මුලෝලන්ඩ්ට මුහුණ දෙන්නට තිබුණේ එබඳු අසීරු අභියෝගයකටය.
පස්වැනි විශේෂ බළකායට අයත් මේ පිරිසට ගුවනින් සහය ලැබුණේ එක්සත් ජනපද යුද හමුදාවේ 160 වැනි විශේෂ මෙහෙයුම් ගුවන් රෙජිමේන්තුවෙනි. (160th SOAR)  (ඉතික්බිති එහි ළඟාවීමෙන් පසු දකුණු මිත්‍ර පාක්ෂික හමුදා  වල සහය ඔවුනට හිමිවන්නට නියමිත විය.

Task Force Dagger  ලෙසින් හඳුන්වන්නට යෙදුණු මේ මෙහෙයුම් මාලාවේ එක් ප්‍රධාන කොටසක් ලෙස සලකන්නට යෙදුණේ මේ දොළොස් දෙනාගේ කණ්ඩායමය. දැනට විශ්‍රාම සුවයෙන් පසුවන මුලෝලන්ඩ් පවසන්නේ  ඔවුනට මුහුණ දෙන්නට සිදුවූ මූලික ගැටලුව වූයේ මේ තත්ත්වයට මුහුණ දීම සඳහා ගැළපෙනම සෙබළ කණ්ඩායම තෝරා ගැනීම බවය. විශ්‍රාමලත් ප්‍රධාන වොරන්ට් නිලධාරී බොබ් පෙනිංග්ටන් පවසන්නේ මේ ලෝක වෙළෙඳ මධ්‍යස්ථාන ප්‍රහාරය සිදුවෙද්දීත් තම කණ්ඩායමේ සෙබළුන් ටෙනසි හි තාෂ්විල් ප්‍රදේශයක පුහුණු කටයුතුවල නිරත වෙමින් සිටි බවය.
Cumberland  නදියේ ඔවුන් මෙසේ පුහුණු වෙමින් සිට ඇත්තේ පුහුණු ඉලක්ක ආක්‍රමණයක යෙදෙමිනි. එය පැය කිහිපයක ක්‍රියාකාරකමක් වූ අතර ඉතා දැඩි මීදුමක් ප්‍රදේශය වසා පැතිර යාමත් සමගින් පුහුණුව අත්හැර දමන්නට මේ සෙබළ  පිරිසට සිදුවිය.


සැප්තැම්බර් ප්‍රහාරය සිදුවෙද්දී ඔවුන් ඒ ගැන හාංකවිසියක් දැන සිටියේ නැත. ඔවුන්ට එය අසන්නට ලැබුණේ ගුවන් විදුලියෙනි. ඒ පුවත කනවැටීමත් සමග ඔවුහු තුෂ්ණිම්භූත වූවෝය.

“අපට එකිනෙකාගේ මුහුණ දිහා බලාගන්නවා හැර වෙනත් දෙයක් තිබුණේ නැහැ කරන්නට. ඒක ඒ තරමටම විමතියට කාරණයක්. ගුවන්විදුලියෙන් නිවේදනය වුණේ ඒක ත්‍රස්ත ප්‍රහාරයක් කියලයි. ආයෙ දෙකක් තිබුණේ නෑ හිතන්න, ඒක ත්‍රස්ත ප්‍රහාරයක්ම තමයි. අපිට සැකයක් තිබුණේ නැහැ”

පුහුණුව වහා නතර කළ සෙබළ පිරිස සූදානම් වූයේ මූලික කඳවුර පිහිටි කෙන්ටකී වෙත ආපසු එන්නටයි. පෙනිංග්ටන් සහ සෙබළ පිරිස නගරයට එද්දී දුටුයේ විශ්වාස කරන්නටත් නොහැකි තරමේ කලබැගැහැනියකි. නගරයට ඇතුළුවී ගත නුහුණු මොටෝරිය ඇතුළු යාන වාහන මයිල සිය ගණනක් දිගට පෙළ ගැසී තිබෙණු ඔවුනට දකින්නට ලැබිණි.

එහෙන් මෙහෙන් රිංගා  ඉදිරියට පැමිණි ODA 595 කණ්ඩායම එහි ළඟා වෙද්දී ආරක්ෂක  සෙබළුන් විසින් ඔවුන් නවතන ලදී. එහෙත් මේ කවුරුන්දැයි හෙළිදරව් කරද්දී වහා ඉඩකඩ ලැබුණු අතර මහා හෙයියම් මාරුවකින් පසුව පෙනිංටන් නිවසට ළඟා වෙද්දී ඇගේ බිරිඳ මිෂෙල් දොරකඩට වී මග බලා සිටියාය.
“ඔයා ආපහු යුද්දෙකට යනවද?” ඕ ඇසුවාය.

“ඔව්, නැතුව කොහොමද?” ඔහු පිළිතුරු දුන්නේය.
“කවදද?”
“කියන්න දන්නේ නැහැ. කියන ඕනෑ වෙලාවක” ඔහුගේ පිළිතුර විය. ච්ඒ 595 සමග ඇෆ්ගනිස්ථානය බලා පිටත්ව යන්නට සූදානම් වන ලෙස ඔහුට නිශ්චිත වශයෙන්ම උපදෙස් ලැබුණේ ඊට සති කිහිපයකට පසුවය. ඒ වනාහි ඇමෙරිකානු සෙබළ පිරිසක් ඇෆ්ගන් බිමේ පය තබන මුල්ම වතාව යයිද ඔහුට අසන්නට ලැබුණි.

පාලිත ජයකොඩි

  1. එදා ගුරුවරුන්ටත් එපා වූ අද ඉන්දියාවම නටවන මහත ළමයා
  2. නොබෙල් ත්‍යාගය සඳහා යෝජනා වූ ලොව ළාබාලතම දැරිය
  3. ලොව කැලඹූ විකිලීක්ස් නිර්මාතෘ එංගලන්තයේදී අත්අඩංගුවට
  4. හිටපු ජනපති දිවි නසා ගත්තේ හමුදාවෙන් තෑගි ලැබුණු තුවක්කුවකින්
  5. බිලිඳුන් සමග පාර්ලිමේන්තු ගිය දේශපාලක මව්වරු
  6. දේශපාලන කුණාටුවකට මුල පිරූ මෝදි පිළිබඳ සිනමා පටය
  7. වයිකින් ස්කයි නැව බේරාගත් හෙලිකොප්ටර් මෙහෙයුම
  8. වැටුපෙන් සියයට 80ක් සිසු දරුවන්ට දෙන ලෝකයේ හොඳම අපූරු ගුරුවරයා
  9. නවසීලන්ත ත්‍රස්ත ප්‍රහාරයෙන් මතුවූ වීරයා ඇෆ්ගනිස්ථානයේ අසීස්
  10. ඇල්ජීරියාවේ ජනපතිවරයාට විරුද්ධව වාර්තාගත උද්ඝෝෂණ තවදුරටත්
  11. කාර්යාල සේවකයන්ට දුරකථන සහනයක්
  12. බෝයිං 737ට චීන අහස තහනම්
  13. පාප් වහන්සේ රහස් හෙළිකරයි
  14. ඉන්දු- පාකිස්තාන යුද්ධයක් නතර කළ ගුවන් නියමුවා
  15. නොබෙල් ත්‍යාගයට ට්‍රම්ප්ගේ නම අබේගෙන්
  16. දෙවන ලෝක යුද්ධයේ අසිරිමත් ඡායාරූපය
  17. නාපාමි දැරියට ඉහළම සම්මානයක්
  18. රජිව් ගාන්ධිගේ දියණිය දේශපාලනයට
  19. නයගරාව ගල්ගැහෙයි
  20. සමාජ ජාලා හරහා හැමෝම ඉල්ලන Like
  21. මළවුන්ගේ නගරයේ විස්මිත තතු
  22. දිනෙන් දින වර්ධනය වන අපූරු දුපත
  23. නෙදර්ලන්තයේ අපූරු සුරංඟනා ගම්මානය
  24. ලෝකයේ අවසානයට හමු වූ මැමත් පැටියා
  25. සේවකයන් පහළොස් දෙනෙක් තවමත් මීටර් 112ක් යට

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.