lakbima.lk



ක්‍රයිස්චර්ච් ඛිෙදවාචකය පිළිබඳව ලෝක මාධ්‍ය මේ වනවිටත් බොහෝ දේ කතා කර තිබේ. බොහෝ මාධ්‍ය එය සංයමයකින් හා පාලනයකින් යුතුව වාර්තා කරන්නට කටයුතු කිරීම ප්‍රශංසා කටයුතුය. ක්‍රයිස්චර්ච්හි ලින්වුඩ් මුස්ලිම් පල්ලිය හා අල් නූර් මුස්ලිම් පල්ලිය ඉලක්ක කරගනිමින් සිදු කළ මේ වෙඩි තැබිම ලොව සාමකාමීම රටවල් අතර ඉදිරියෙන්ම සිටින නවසීලන්තය බලවත් කම්පනයකට පත් කරන්නට සමත්ව තිබුණි.


අල් නූර් මුස්ලිම්  පල්ලියේදී 41 දෙනකුත්, ලින්වුඩ් පල්ලිය අසලදී තවත් හත් දෙනකුත් ඝාතකයා අතින් මරුමුවට පත්විය. තවත් එක් අයකු රෝහලට ඇතුළත් කිරීමෙන් පසු මියගිය බව ආරංචි විය. මේ අමානුෂික වෙඩි තැබිම සැලකෙන්නේ නූතන නවසීලන්ත ඉතිහාසය තුළ සිදු වූ කුරිරුතම සමූහ ඝාතනය ලෙසය. මේ මහා අපරාධය සිදු කළ ඝාතකයා පිළිබඳ සිදුවීම සිදු වූ මොහොතේ පටන් ලෝකයේ අවධානය යොමු විය. සැබැවින්ම ඔහුට අවධානය දිනා ගන්නට අවැසි විය. මේ අපරාධය සිදු කරන්නට පෙරාතුවම සජීවී වීඩියෝ පටයකින් ලෝකය හා සම්බන්ධ වන්නට කටයුතු කිරීම තුළින් එය පැහැදිලි වෙයි.

අනෙක් අතට නවසීලන්තය සාමකාමී රාජ්‍යයක් වශයෙන් මේ ව්‍යසනය විඳ දරා ගත් අන්දම හා ඊට ප්‍රතිචාර දැක්වූ ආකාරය ප්‍රශංසනීයය. නවසීලන්ත අගමැතිනිය ජසින්ඩා ආර්ඩ්න්ගේ පරිණත නායකත්වය වෙත ලෝකයේම විමසුම් ඇස යොමුවී තිබුණි.

එහෙත් මේ සියලු සිදුවීම්, සියලු චරිත අභිභවා තවත් එක්තරා චරිතයක් මේ අභාග්‍ය සම්පන්න සිදුවීමට පසුබිම්ව ලෝකයේ අවධානයට පාත්‍ර විය. ඒ වූ කලී හතළිස් අට (48) හැවිරිදි මුසල්මානුවෙකි. සරණාගතයකු ලෙස ඇෆ්ගනිස්ථානය හැර දමා පළමුව ඕස්ට්‍රේලියාවේ වසර ගණනාවක් ජීවත්ව මෑතකදී නවසීලන්තයේ පදිංචියට ගිය ඔහු අබ්දුල් අසීස්ය. හිටි අඩියේ වීරයකු ලෙස ලොවෙන් සැලකුම් ලබන්නට තරම් ඔහු වාසනාවන්ත විය.

එහෙත් එය හුදෙක් වාසනාවක් නොව මේ අභාග්‍ය සම්පන්න මොහොතට ඔහු මුහුණ දුන් නිර්භීත ආකාරය හේතුවෙන් ඔහු ලද ඇගයුමය. එහෙත් තමා කළ කාරිය ගැන ඔහු ඒ හැටි ආඩම්බර වන්නට මැලි වූයේ පෞද්ගලිකව තමාගේ ආදරණීයයන්ද මේ ව්‍යසනයට මුහුණ දුන් බැවිනි.

ඒක මම ‍නෙවෙයි, වෙන ඕනෑම කෙනෙක් හිටියත් කරන දෙයක් අසීස් පවසන්නේ නිහතමානීවය. තමා අබිමුව හමුවන සැමකෙකුටම ගිනි බිඳිමින් ආ ප්‍රහාරකයා වෙතින් පළා යන්නට අබ්දුල් අසීස් කල්පනා නොකළේය. ඒ වෙනුවට අතට හසුවූ යමක් ගෙන ඝාතකයා වෙත කඩා පනින්නට ඔහු උත්සාහ කළේය. ඔහුගේ අත හසුවන මායිමක තිබුණේ කේ‍රඩිට් කාර්ඩ් යන්ත්‍රයකි. එයද සුරතින් අමෝරාගෙන ඔහු ඝාතකයා වෙත දිව ගියේ ඔහුගේ රුදුරු අවධානය වෙනතක යොමු කරන අරමුණෙනි.

හතළිස් අට හැවිරිදි අසීස් වීරයකු වශයෙන් ලෝක අවධානයට පාත්‍ර වූයේ ඔහුගේ මැදිහත්වීම ඝාතකයාගේ ඝාතන ලැයිස්තුව එතෙකින් නතර කරන්නට සමත් වූ බැවිනි. මොනයම් ආකාරයකින් හෝ ඔහු මෙසේ ඝාතකයා පසුබස්වන්නට වෙහෙසෙද්දී ඔහුගේ පුතුන් සිව් දෙනා රැඳී සිටියේ පල්ලිය ඇතුළේය. වාර්තා වන අන්දමට ඔහු පළමුව කඩා වැදුණේ අල් නූර් මුස්ලිම් පල්ලියටය. එහිදී හතළිස් එක් දෙනකු මරා දැමූ ඔහුගේ ඊළඟ ඉලක්කය ඊට සැතපුම් තුනක් පමණ එපිටින් පිහිටි ලින්වුඩ් මුස්ලිම් පල්ලියයි.

ලින්වුඩ් මුස්ලිම් පල්ලියේ වැඩ බලන ඉමාම් ලෙස කටයුතු කරන ලතේෆ් අලාබි මේ සිදුවීම සිහි කරන්නේ මහත් තිගැස්මෙන් යුතුවය.

අසීස් නොහිටින්නට ඔහු (අපරාධකරු) අතින් මිය ගිය ගණන මීට වඩා බොහෝ වැඩි වන්නට ඉඩ තිබුණා. ඒ අතින් බැලුවහම මේ ව්‍යසනය මෙතැනින් හෝ නවතා ගන්නට ලැබුණේ අසීස්ගේ නිර්භීතකම හින්දයි.
ඉමාම්වරයා අසීස්ගේ ධෛර්ය සම්පන්න බව අගය කරයි.

අපට යම් සද්දයක් ඇහෙන්නට පටන් ගත්තා. එතකොට වෙලාව දෙකට කිට්ටුයි. යාතිකාව ටිකකට නතර කරලා ඒ ශබ්දය මොකක්දැයි බලන්න මම ජනේලයෙන් එබිකම් කළා. එතකොටයි මම දැක්කේ හමුදා ඇඳුමකට සමාන කළු ඇඳුමක් ඇඳගත්ත මිනිහෙකුව. ඔහු අතේ ගිනි අවියක්. හිස් වැසුමකින් සැරසිලයි හිටියේ ඔහු. මා හිතුවේ ‍පොලිස් නිලධාරියෙක් කියලයි. ඊට පස්සේ තමයි මට සියල්ල අවබෝධ වන්නට පටන් ගත්තේ. ඔහු අශ්ලීල විදිහට කෑ ගසමිනුයි ඉදිරියට ආවේ.

අපි අසූ දෙනෙක් විතර එතන හිටියා. ඔහු කෑ ගැහුවා අපට දිගාවෙයල්ලා කියලා. ඒත් කවුරුත් ඒක ගණන් ගත්තේ නැහැ. ඒ එක්කම වීදුරුව කුඩු පට්ටම් කරගෙන උණ්ඩයක් ආවා. අපෙන් කෙනෙක් ඇදගෙන වැටුණා. ඔන්න ඔය වෙලාවෙයි අසීස් අප හැමෝම වෙනුවෙන් ඉදිරියට පැන්නේ.

පල්ලියේ ඉමාම්වරයා පවසන අන්දමට ඝාතකයාගේ පැමිණීම අවහිර කරන ලද්දේ අසීස් විසිනි. ඔහු විශ්වාස කරන ආකාරයට ඝාතකයා පල්ලිය ඇතුළට ආවේ නම් මේ අසූ දෙනාම අවසන් ගමන් යන්නට ඉඩ තිබුණි.
අසීස් කෑ ගසාගෙන පල්ලියෙන් පිටතට පැන්නේ ඝාතකයාගේ අවධානය වෙනතකට යොමු කරන අරමුණෙනි. මෙවේ‍ලේ වාසනාවකට මෙන් ඝාතකයා ආපසු සිය මොටෝ රිය වෙත දිව යමින් සිටියේය.

ඒ තවත් තුවක්කුවක් අතට ගන්නටය. අසීස් වාසියක් ගන්නට කල්පනා කළේ අත තිබූ කේ‍රඩිට් කාඩ් යන්ත්‍රයෙන් දමා ගසමිනි. සිය තාත්තා වැටී සිටි අවදානම් තත්ත්වය දුටු අසීස්ගේ බාල පුතුන් දෙදෙනා මෙවිට පල්ලියේ දොරින් හිස දමා කෑගසමින් සිටි අතර අසීස් ඔවුනට යළි ඇතුළට යන ලෙස සන් කරමින් වාහන පෙළ අතරින් දුවන්නට පටන් ගත්තේය. ඒ ඝාතකයාට පැහැදිලි ඉලක්කයක් ගන්නට ඇති ඉඩකඩ අහුරමිනි.

බිම වැටී තිබූ තවත් ගිනි අවියක් අසීස්ගේ නෙත ගැටුණේ මෙවේ‍ලේදීය. එය අසුලාගෙන ඝාතකයා වෙත මෑනූ නමුත් එය හිස් ගිනි අවියක් විය. මේ අතරේ ඝාතකයා යළිත් වරක් හැරුණේ සිය මොටෝරිය වෙත යන්නටය. ඔහු එහි රිංගූ ඇසිල්‍ලේ අසීස් කළේ අත තිබූ හිස් ගිනි අවියෙන් මොටෝ රියේ ඉදිරිපස වීදුරුව කුඩු පට්ටම්ව යන ලෙස පහරක් එල්ල කිරීමය. එයින් තැති ගත් බවක් පෙන්වූ ඝාතකයා නොසරුප් වදන් වැලක් පවසමින් පලා ගියේ යළි ඔවුන් සියලු දෙනා මරා දමන බවට ශපථ කරමිනි.

අසීස්ගේ උපන් බිම වූයේ ඇෆ්ගනිස්ථානයේ කාබුල් නුවරයි. කොළු ගැටයකුව සිටියදීම ඇෆ්ගනිස්ථානය අතහැර ඕස්ට්‍රේලියාවට පලා ආ හේ එහි විසිපස් වසරක් ගත කළේය. ඔහු නවසීලන්තයේ පදිංචියට පැමිණ තිබුණේ මීට වසරකට, දෙකකට පමණ පෙරය.

මා බොහෝ රටවල සංචාරය කර තිබෙනවා. ඒ අතරින් මා දුටු ලස්සනම හා සාමකාමීම රටවල්වලින් එකක් නවසීලන්තය. ඉතින් එහෙම රටකදී මේ වාගේ දෙයක් සිදුවීම ගැන දැනෙන්නේ වචනයෙන් කියන්නට බැරි තරම් කනගාටුවක්.
අබ්දූල් අසීස් පවසන්නේ හැඟුම්බරවය.

පාලිත ජයකොඩි

  1. ඇල්ජීරියාවේ ජනපතිවරයාට විරුද්ධව වාර්තාගත උද්ඝෝෂණ තවදුරටත්
  2. කාර්යාල සේවකයන්ට දුරකථන සහනයක්
  3. බෝයිං 737ට චීන අහස තහනම්
  4. පාප් වහන්සේ රහස් හෙළිකරයි
  5. ඉන්දු- පාකිස්තාන යුද්ධයක් නතර කළ ගුවන් නියමුවා
  6. නොබෙල් ත්‍යාගයට ට්‍රම්ප්ගේ නම අබේගෙන්
  7. දෙවන ලෝක යුද්ධයේ අසිරිමත් ඡායාරූපය
  8. නාපාමි දැරියට ඉහළම සම්මානයක්
  9. රජිව් ගාන්ධිගේ දියණිය දේශපාලනයට
  10. නයගරාව ගල්ගැහෙයි
  11. සමාජ ජාලා හරහා හැමෝම ඉල්ලන Like
  12. මළවුන්ගේ නගරයේ විස්මිත තතු
  13. දිනෙන් දින වර්ධනය වන අපූරු දුපත
  14. නෙදර්ලන්තයේ අපූරු සුරංඟනා ගම්මානය
  15. ලෝකයේ අවසානයට හමු වූ මැමත් පැටියා
  16. සේවකයන් පහළොස් දෙනෙක් තවමත් මීටර් 112ක් යට
  17. බැරලයකින් අත්ලන්තික් සයුර තරණයට ගිය මිනිසා
  18. මැදපෙරදිග ඉදි වූ විශාලතම දෙව් මැඳුර
  19. ගඟක් උඩින් ඇලක් !
  20. කොටස් අහිමි පිළිම නෙළන අපූරු මිනිසා
  21. පැසිෆික් සයුර තරණය කළ පළමු මිනිසා
  22. අහසින් වැටුණු අමුතු වැසි
  23. දවසට පැය 2ක් පමණක් යා හැකි එකම පාර
  24. ඇමරිකානු ඔක්තෝබරය වර්ණ ගන්වන අපූරු බැලුම්
  25. මුට්ට කරගැහුවත් ලෝකයක් දිනන්නට පුළුවන් බව ඔප්පු කළ එම්මානුවෙල් ඩැපිඩ‍්‍රන් පැකියෝ

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.