lakbima.lk

ජැමෙයිකානු ජාතික උසේන් බෝල්ට් ලෝක පූජිත වූයේ මලල ක්‍රීඩකයෙකු වශයෙනි. මීටර 100 සහ මීටර 200 යන තරග ඉසව්වල දී ලොවම මවිතයට පත් කළ ඔහු මේ වනවිට එම ඉසව්වල ලෝක වාර්තාවලට ද හිමිකම් කියයි. 2008, 2012 සහ 2016 යන වසර වල ඔලිම්පික් රන් පදක්කම් 8 ක් ද දිනාගනිමින් එම පදක්කම් වැඩිම සංඛ්‍යාවක් දිනාගත් මලල ක්‍රීඩකයන් අතරට ද ඔහු එක්ව සිටියි. බොහෝ දෙනා ඔහු සලකන්නේ මතෛක් පහළ වූ ශේ්‍රෂ්ඨම කෙටි දුර ධාවකයා වශයෙනි.

කෙසේ නමුත් බෝල්ට් මලල  ක්‍රීඩාවලට අමතරව වෙනත් ක්‍රීඩාවන් සඳහා ද ලොකු කැමැත්තක් දැක්වූවෙකු බව ද බොහෝ දෙනෙකුට රහසක් නොවේ. ඔහු පාසල් යන සමයේ මුලින්ම එක් වී ඇත්තේ ක්‍රිකට් ක්‍රීඩාවටයි. වේග පන්දු යවන්නෙකු වීම එකල ඔහුගේ සිහිනය වූ බව පැවැසේ. නමුත් ඔහු පිටිය තුළ එහා මෙහා දුවද්දී ඔහුගේ වේගය ගැන සැලකිලිමත් වූ ක්‍රිකට් පුහුණුකරු මලල ක්‍රීඩා සඳහා යොමුවන මෙන් ඔහුට දන්වා ඇත. බෝල්ට් මලල ක්‍රීඩා ක්‍ෂේත්‍රයට පා තබා ඇත්තේ මෙම උපදෙස අනුව බව සඳහන් වේ. ජැමෙයිකාව තුළ ක්‍රිකට් ක්‍රීඩාවෙන් ඉහළට යනවාට වඩා මලල ක්‍රීඩාවලින් ඉහළට යාම පහසු වූ නිසා බෝල්ට්ගේ පියා ද ඔහු මලල ක්‍රීඩා සඳහා යොමු වෙනවාට කැමැත්ත දක්වා ඇත. ඇතැමුන් පවසන්නේ බෝල්ට්  දිගටම ක්‍රිකට් ක්‍රීඩා කළා නම්  ඇතැම් විට මයිකල් හෝල්ඩින්, කර්ට්නි වෝල්ෂ් වැනි ජැමෙයිකානුවන් මෙන්ම බටහිර ඉන්දීය ක්‍රිකට් පිලට ක්‍රීඩා කිරීමට ඉඩ තිබූ බවයි.

කෙසේ හෝ වේවා, ක්‍රිකට් ගැන මෙන්ම පාපන්දු ක්‍රීඩාව ගැන ද බෝල්ට් ගේ විශාල උනන්දුවක් තිබූ බව රහසක් නොවේ. 2016 වසරේ එක්තරා පුවත්පතක් සමග පැවැති සම්මුඛ සාකච්ඡාවක දී ඔහු පවසා තිබුණේ මලල ක්‍රීඩාවෙන් සමුගත් පසු තමා වෘත්තීය පාපන්දු ක්‍රීඩකයෙකු ලෙස කටයුතු කිරීමට අදහස් කරන බවයි. ඒ කී ආකාරයෙන්ම 2017 වසරේ මලල ක්‍රීඩාවෙන් සමුගත් පසු ඔහු පාපන්දු ක්‍රීඩාව ගැන වැඩි අවධානයක් දක්වන්නට පටන් ගත් බව පෙනිණි. බ්‍රිතාන්‍යයේ සුප්‍රකට පාපන්දු සමාජයක් වන 'මැන්චෙස්ටර් යුනයිටඩ්' ඔහුගේ ප්‍රියතම පාපන්දු සමාජය විය. කවදා හෝ දිනෙක මෙම සමාජය වෙනුවෙන් ක්‍රීඩා කිරීමට තමාට ලැබෙන්නේ නම් එය දිගු කාලීන සිහිනයක් ඉටු වීමක් වනු ඇති බව ද ඔහු තවත් අවස්ථාවක ප්‍රකාශ කර තිබිණි. මේ වසරේ මුල් භාගයේ බෝල්ට් නෙදර්ලන්ත පාපන්දු සමාජයක් වන 'ස්ටේ‍රාම්ස්ගොඩ්සෙට්' සමාජයට සම්බන්ධ වී පුහුණුවීම්වල නිරතව තිබිණි. අනතුරුව  එම කණ්ඩායම වෙනුවෙන්, නෝර්වේ හි කණ්ඩායමක් සමග සුහද පා පන්දු තරගයකට ද ඔහු සහභාගි වී තිබේ. එහිදී ඔහු හැඳ සිටි ජර්සියේ සටහන් වූ අංකය 9.58 ය. සාමාන්‍යයෙන් දශම ගණන් දැක්වෙන සංඛ්‍යා පාපන්දු ක්‍රීඩකයන් වෙනුවෙන් භාවිත වන්නේ නැත. නමුත් බෝල්ට් මෙම අංකය  යොදාගෙන ඇත්තේ ඔහු මීටර 100 ලෝක වාර්තාව පිහිටු වූ ධාවන කාලය සිහිගන්වනු සඳහා ය. නමුත් ඉහත කී කණ්ඩායම සමග ඔහු වැඩි කාලයක් රැඳී සිටියේ නැත. මේ වසරේ අගෝස්තු 31 වෙනිදා, එනම් ඔහුගේ 32 වෙනි උපන් දිනය දා ඔහු වෙනත් පා පන්දු සමාජයක් සමග කටයුතු කිරීමට පටන් ගත්තේ ය. ඒ ඕස්ට්‍රේලියාවේ ඒ-කාණ්ඩයේ කණ්ඩායමක් වන 'සෙන්ට්‍රල් කෝස්ට් මැරීනර්ස්'' නමැති කණ්ඩායම සමග යි.  එදින ඔහු ඉහත කී කණ්ඩායම සහ තවත් ආධුනික පා පන්දු කණ්ඩායමක් අතර පැවැති සුහද තරගයකට ද අතිරේක ක්‍රීඩකයෙකු ලෙස සහභාගි වී තිබේ.  බෝල්ට්ගේ අරමුණ වී ඇත්තේ මෙම කණ්ඩායමේ නිත්‍ය ක්‍රීඩකයෙකු බවට පත්වෙමින් වෘත්තීය පා පන්දු ක්‍රීඩකයෙකු ලෙස ඉදිරියට යාම ය.

සාමාන්‍යයෙන් අතිරේක ක්‍රීඩකයන්ට පා පන්දු තරගයක ක්‍රීඩා කිරීමට අවස්ථාවක් ලැබේ ද යන්න අවිනිශ්චිත වුවත් බෝල්ට් ට තරගයේ අවසන් විනාඩි 20 ක් වැනි කාලයක් ක්‍රීඩා පිටියට පැමිණ ක්‍රීඩා කිරීමට අවස්ථාව උදා වී ඇත. මෙවැනි සුහද තරගයක් නැරඹීමට එන ප්‍රේක්ෂක පිරිසට වඩා විශාල පිරිසක් එදින මෙම තරගය නැරඹීම සඳහා පැමිණ ඇති බව ද මාධ්‍ය වාර්තා කර තිබිණි. ඒ බෝල්ට් ගේ පාපන්දු දස්කම් දැක ගැනීමේ බලා‍පොරොත්තුවෙනි. කෙසේ වෙතත්, ඔහුට මෙම තරගයේ දී එතරම් දස්කම් දැක්වීමට හැකියාවක් ලැබි නැති බව ද සඳහන් වේ. මලල ක්‍රීඩාවේදී කප් ගැසූ වීරයෙකු වුව ද පාපන්දු ක්‍රීඩාවේ දී අත්දැකීම් අඩුකම පැහැදිලිව දක්නට ලැබුණු බව  ක්‍රීඩා විචාරකයන් සඳහන් කර තිබිණි. මේ නිසා ප්‍රේක්ෂකයන්ගේ බලා‍පොරොත්තු තරමක් දුරට බිඳී ගිය බැව්ද සඳහන් විය. සමහර මාධ්‍යකරුවන් පවසා තිබුණේ ඔහු උසේන් බෝල්ට් නොවී වෙනත් කෙනෙකු වී නම් මෙම පළමු තරගයෙන් ම  පැත්තකට විසි වෙන්නට ඉඩ තිබුණු බවයි. ගෝලයක් රැස් කිරීමට තිබූ අවස්ථාවක් පවා ඔහුගෙන් ගිලිහී ගොස් තිබූ අතර තරගයට කලින් තමා තරමක් නොසන්සුන් මනසින් සිටි බව ද බෝල්ට් පිළිගෙන තිබිණි. තමා අතින් සිදු වූ වැරදි සම්බන්ධයෙන් ඔහු පසුව සිනාමුසු මුහුණින් ප්‍රතිචාර දක්වා ඇති බව ද සඳහන් විය.

ප්‍රේක්ෂකයන් තමාට විශාල ශක්තියක් ලබා දුන් බව ද,  පා පන්දු කණ්ඩායමේ සෙසු පළපුරුදු සාමාජිකයන්ගෙන් තමාට විශාල උදව්වක් ලැබුණු බව ද, ඔවුන් මහත් මිත්‍රශීලී ආකාරයෙන් තමාට සලකන බව ද බෝල්ට් තවදුරටත් පවසා තිබිණි.

තත්පර කිහිපයක් තුළ මීටර 100 ක් 200 ක් දිවීමේ දී අවශ්‍ය වනවාට වඩා විශාල ශාරීරික යෝග්‍යතාවක් පා පන්දු ක්‍රීඩාවේ දී අවශ්‍ය වීම ද බෝල්ට් ට බලපාන කාරණයක් බව ඇතැම් විචාරකයන්ගේ අදහසයි. ඒ නිසා ඔහු ඒ අතින්  තවත් ශක්තිමත් විය යුතුව ඇති බව  පෙන්වා දෙනු ලැබේ. එමෙන්ම ඔහු දැන් වයස අතින් ද තිස් ගණන්වල පසුවීම මෙහි දී බලපෑ හැකි තව සාධකයකි. තවමත් බෝල්ට් මෙම ඕස්ට්‍රේලියානු කණ්ඩායමේ නිල ක්‍රීඩකයෙකු ලෙස පිළිගෙන නැත. එය තීරණය වනු ඇත්තේ මෙවැනි තරගවල දී ඔහු විසින් දක්වනු ලබන දස්කම් මත ය. කෙසේ හෝ වේවා, මෙම සුපිරි මලල ක්‍රීඩකයා ඔහුගේ පා පන්දු සිහිනය ද සාක්ෂාත් කර ගන්නවා නම් එය ඔහුට ආදරය කරන සුවහසක් ක්‍රීඩා ලෝලීන්ගේ නොමඳ සතුටට හේතුවනු ඇති බව අමුතුවෙන් කිව යුතු නොවේ.

 කිත්සිරි මල්වත්ත

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.