lakbima.lk

දරුවන් අතුරුදන්වීම ලෝකය පුරා දිනපතා සිදුවන්නකි. මේ ඇතැම් දරුවන් අතරමන්ව සිටියදී හෝ කිසිවෙකු විසින් පැහැරගෙන සිටියදී හමුවන අතර මිය ගොස් සිටියදී හමුවන දරුවන් මෙන්ම කිසිදිනක හමුනොවන දරුවන්ද වෙයි. ඇමෙරිකාවේ පමණක් හැම තත්පර හතළිහකට වරක් දරුවෙකු අතුරුදන් වන බව වාර්තා වන අතර වසරකට ලොව පුරා නැතිවන දරුවන් ගණන මිලියන අටක් බව කියැවෙයි.වාර්ෂිකව ඉන් ලක්ෂ අටක් හෝ වැඩි ගණනක් වාර්තා වන්නේ ඇමෙරිකාවෙනි.

අතීතයේදී දරුවෙකු අතුරුදන්වීමක් ‍පොලිස් ‍පොතේ සටහන් කිරීමට පැය විසි හතරක් බලා සිටිය යුතු නමුත් නව නීතිවලට අනුව හැකි ඉක්මනින් එය සටහන් කරවාගත හැකිවෙයි. මෙම දරුවන් අතුරුදන්වීම් සම්බන්ධ වාර්තාවලට අනුව තමන් නාඳුනන පුද්ගලයන් විසින් දරුවන් පැහැරගැනීම දුලබ වන අතර බොහෝ විට මෙය සිදුවන්නේ දරුවාව දන්නා හඳුනන හෝ ඥාති වන අයෙකු විසිනි.

මෙසේ පැහැරගන්නා ඇතැම් දරුවන් ක්‍රමයෙන් තමාව පැහැරගත් තැනැත්තා හෝ තැනැත්තියට සමීපව පිටස්තර ලෝකය හෝ ‍පොලීසියට විරෝධය දක්වන අවස්ථාද වෙ යි. මානසික තත්ත්වයක් නිසා ඇතිවන මෙය හැඳින්වෙන්නේ හෙල්සින්කි සින්ඩ්‍රම් නමිනි.


මේ අතර මෙසේ අතුරුදන් වන දරුවන් සෙවීමට ප්‍රංශය අලුත් ක්‍රමයක් සොයාගෙන තිබේ. සියයට සියයක්ම සාර්ථක බව හඳුනාගෙන ඇති මෙම ක්‍රමයට අනුව දරුවෙකු පැහැරගත් මුල් අවස්ථාවේම ‍පොලීසියට මෙන්ම මාධ්‍ය, මහා මාර්ගවල සේවයට සිටින්නන් හා ‍පොදු ප්‍රවාහන සේවා යන අංශවලට එකම මොහොතේ ඒ බව දැනගන්නට ලැබේ. දැනට කලකට පෙර ඇරඹුණු මෙම ක්‍රියාවලිය මේ වනවිට සියයට සියයක්ම සාර්ථක වන අතර ඒ බව පසුගියදා අතුරුදන්වූ වයස අවුරුදු හතරක පිරිමි දරුවෙකු සොයාගැනීම සමග වඩාත් පැහැදිලි විය.


ඇ‍ලේට් එන්ලෙව්මන්ට් නමින් හැඳින්වෙන මෙම ක්‍රමයට සමාන ක්‍රමයක්  ඇමෙරිකාව සහ කැනඩාව එක්ව ක්‍රියාත්මක කළ අතර නැතිවුණු දරුවෙකු ගැන හැකි ඉක්මනින් ජනතාව දැනුවත් කිරීම අරමුණ වූ ඇ‍ලේට් එන්ලෙව්මන්ට් බිහිවුණේ ඒ ආභාෂයෙනි. ඇම්බර් එලර්ට් ලෙස මෙය වෙනත් රටවලදී හැඳින්වෙයි. ස්කයිරොක් ගුවන් විදුලි සේවයේ නිර්මාතෘ පියර් බෙලන්ගර් මෙහිද නිර්මාතෘවරයාය.

දෙවසරක් පුරා කළ අත්හදා බැලීම්වලින් පසු මෙම ක්‍රමය ප්‍රංශයට හඳුන්වාදෙනු ලැබිණි. දරුවෙකු අතුරුදන්වූ බවත්, ඔහුගේ හෝ ඇයගේ ජීවිතය අනතුරේ බවටත් වැඩිහිටියන් විසින් ‍පොලීසියට පැමිණිලි කළ විගස ඒ හරහා අධිකරණ අමාත්‍යාංශයට යැවෙන පණිවුඩය මෙසේ සියලු අංශවලට වහා බෙදාහරිනු ලබයි.


ප්‍රංශය පුරා ඇති ගුවන් විදුලි හා රූපවාහිනි සේවා සිය ගණනක් මෙම ක්‍රමය සමග අත්වැල් බැඳගෙන ඇති අතර එම පණිවුඩය ලැබුණු තැන සිට පැය තුනක කාලයක් තුළ තම සේවාවන් හා තම වබේ අඩවි ඔස්සේ අතුරුදන් දරුවා හෝ දරුවන් ගැන ප්‍රචාරය කිරීමට ඔවුන් ගිවිසුමක් මගින් එකඟවී තිබේ. මෙම නිවේදනය එරට ජාතික පුවත් සේවය වන ඒ.එෆ්.පී. මගින්ද සිදු කරනු ලබයි. මෙම ක්‍රමයට අනුව වහා ජංගම දුරකථන කෙටි පණිවුඩ යැවෙන අතර මහාමාර්ග පාලකයන් මාර්ග අයිනේ ඇති දැන්වීම් පුවරුවල මේ බව නිවේදනය කරයි.

ඒ සමගම ‍පොදු ප්‍රවාහන සේවාවලද මේ බව දක්වනු ලබයි. මේ වනවිට මෙම ක්‍රමය අවස්ථා දහසයකදි උපයෝගි කරගෙන ඇති අතර පළමුවැන්න වූයේ කුඩා දැරියක් පැහැර ගෙන යනු ලැබූ අවස්ථාවකි. පැය තිහක් ඇතුළත ඇය සොයාගැනීමට මෙම ක්‍රමයේ උපකාරය ඇතිව ‍පොලීසිය සමත්විය. දහසය වැනි වතාව වූයේ තම මවගේ භාර කාරත්වයෙන් පැහැරගෙන යනු ලැබු රිෆ්කි නම් සිව්හැවිරිදි පිරිමි දරුවා සොයා ගැනීමයි.පැහැරගත් තැන සිට කිලෝමීටර් හාරසිය පනහක දුරින් සිටියදී ඔහු සොයා ගනු ලැබිණි.

ප්‍රංශයේ ගේ‍රනොබල් හි සිටි මෙම දරුවා පැහැරගෙන තිබුණේ ඔහුගේ පියා විසිනි. මේ වනවිට ප්‍රංශයේ මෙම සියයට සියයක් සාර්ථක ක්‍රමය වෙනත් රටවලද භාවිත කරන අතර චෙක් ජනරජයේ නිවස අසල ක්‍රීඩාංගණයක සෙල්ලම් කරමින් සිටියදී අතුරුදන් වූ වයස අවුරුදු හයක් හා නවයක් වූ සොයුරියන් දෙදෙනෙක් කෙටිකාලයක් තුළ නිරුපද්‍රිතව සොයාගන්නා ලද්දේද මෙම ක්‍රමයට අනුවය. එලෙසම අතුරුදන් වූ වයස අවුරුදු දෙකක දැරියක සොයාගෙන තිබිණි.වයස අවුරුදු හතරක් හා දහයක් වන සොයුරන් දෙදෙනෙක්ද එලෙසම අතුරුදන්ව සිටියදී සොයාගන්නා ලදී.

දෙමවුපියන් නිසි රැකවරණය නොසපයන නිසා අධිකරණය මගින් නිවාසයකට යොමුකරන ලද මෙම දරුවන් දෙදෙනා බලන්නට ආ අවස්ථාවක දෙමව්පියන් විසින්ම ඔවුන් පැහැරගෙන ගිය බව සොයාගෙන තිබිණි. මෙසේ නැති වූ දරුවන් හමු වූ අවස්ථාවකදී ඇම්බර් එලර්ට් ක්‍රමය අදාළ රටවල එය ක්‍රියාත්මක මූලස්ථානයේ සිට නතර කරනු ලබන්නේ ඒ බව ඊට සම්බන්ධ සියලු අංශවලට දන්වමිනි.


බ්‍රිතාන්‍යයේ මෙලෙස අතුරුදන්වූ 14 හැවිරිදි දැරියක සොයාගන්නා ලද අතර බ්‍රිතාන්‍යයේම ගෝල්ඩ්ආමින් ප්‍රදේශයේ අතුරුදන්වූ තුන් හැවිරිදි දැරියක්ද කෙටි කාලයක් තුළ නිරුපද්‍රිතව සොයාගෙන තිබිණි. අයර්ලන්තයේ ඩබ්ලින්හි තම මව සමග සිටියදී අතුරුදන්වූ තුන් හැවිරිදි දැරියක් සොයාගන්නා ලද අතර නෙදර්ලන්තයේ මෙසේ ඇම්බර්එලට් ක්‍රමයට සොයාගන්නා ලද්දේ තම නිවසේ සිටියදී අවසන් වරට දකින ලදුව අතුරුදන්වූ පහළොස් හැවිරිදි පිරිමි ළමයෙකි.

මොහු බිහිරි මෙන්ම ඕටිසම් රෝගයෙන්ද පෙළෙන දරුවෙකුවූ අතර හිරිහැරයක් වන්නට පෙර මොහු සොයාගැනීමට හැකිව ඇත්තේ ඇම්බර්එලට් ක්‍රමයට මෙම දරුවා ගැන දැනගත් අයෙකු විසින් ‍පොලීසියට කළ දැනුම්දීමක් හේතුවෙනි. ග්‍රීසියේද මෙසේ මෙම ක්‍රමයට සොයාගෙන තිබුණේ පහළොස් හැවිරිදි දැරියකි.

මේ සියලු සොයාගැනීම් අනුව පැහැදිලිවන්නේ ඇම්බර්එලට් ක්‍රමයට දැනුවත්කොට තිබූ රටවල හෝ ප්‍රදේශවල අතුරුදන්වු දරු, දැරියන් ඉතා ඉක්මනින් මෙන්ම නිරුපද්‍රිතව හමුවන බවය. මෙහිදී ඇම්බර්එලර්ට් ක්‍රමයට තමාගේ විද්‍යුත් තැපෑලට අතුරුදන් වූ දරුවන් ගැන තොරතුරු ගෙන්වාගෙන ඒවා බෙදාගැනීමට කැමැත්ත විමසා එවන ක්‍රමයක්ද වෙයි. මෙහිදී අදාල විද්‍යුත් තැපෑල හිමියා ඊට කැමැත්ත පළකළොත් එතැන් සිට ඔහුගේ හෝ ඇයගේ විද්‍යුත් තැපෑලට අතුරුදන් වූ දරුවන් ගැන තොරතුරු ලැබේ.


සාමාන්‍යයෙන් දරුවකු අතුරුදන් වූ විට මුල් පැය කිහිපය තුළ ඔහු හෝ ඇය සොයාගැනීමට හැකිවීම වැදගත්ය. ඇමෙරිකාවේ අතුරුදන් වී පසුව මළ සිරුරු හමු වූ දරුවන් හයසිය විසිඑකක් සම්බන්ධයෙන් සිදුකරන ලද සමීක්ෂණය කට අනුව ඉන් සියයට හතළිස් හතරක් පළමු පැයේදීද, සියයට හැත්තෑහතරක්
පළමු පැය තුනේදීද, සියයට අනූඑකක් පළමු පැය විසිහතර තුළදීද මරා දමා තිබෙන බව හෙළිවිය.

ලොව දරුවන් අතුරුදන්වීමේ සිදුවීම් අතරින් සුප්‍රකට සිදුවිම් රැසක් ඇති අතර එහි වඩාත් කැපී පෙනෙන්නේ මෑත ඉතිහාසයේ වැඩිම මාධ්‍ය ප්‍රචාරයක් ලැබූ දරුවකු අතුරුදන් වූ සිදුවීම ලෙස හැඳින්වුණු මැඩෙලීන් මැකෑන් නැමැති තුන් හැවිරිදි දැරියගේ අතුරුදන්වීමය.

එංගලන්තයේ උපත ලැබූ ඇය අතුරුදන් වූයේ තම දෙමව්පියන් සමග පෘතුගාලයේ නිවාඩුවක් ගතකරමින් සිටියදීය.නැවතී සිටි තට්ටු නිවාසයෙන් අතුරුදන්වූ මැඩෙලීන් ගැන අදටද තොරතුරක් නැත. ඇමෙරිකාවේ ජාතික අතුරුදන් වූ දරුවන්ගේ දිනය ලෙස මැයි විසිපස්වැනිදා නම් කරන ලද්දේ එවැනි දිනක අතුරුදන් වූ හය හැවිරිදි පිරිමි දරුවෙකු වූ ඊතන් පැට්ස් සිහිකරමිනි.

මෑන්හැට්න් ප්‍රදේශයේදී තම පාසල් බස් රථ නැවතුම වෙත ඇවිදයමින් සිටියදී අතුරුදන් වූ ඔහු පැහැරගෙන ගොස් මරාදමා ඇති බව හෙළිවන්නට වසර ගණනාවක් ගතවිය. 1985 වසරේදී ඇමෙරිකාවේ පෙන්සිල්වේනියාහිදී අතුරුදන්වූ අටහැවිරිදි චෙරී මහාන් නම් දැරිය එම වසරේදී අතුරුදන්වූ දරුවන් වෙනුවෙන්  විවර කළ ප්‍රකට ආයතනයකින් සොයාදෙන ලෙස ඉල්ලා පළමු ‍පෝස්ටරය නිකුත් කළ දරුවා හෝ දැරිය ලෙස ඉතිහාසගතවන අතර ඇය ගැනද අදටත් තොරතුරක් නැත.

අතුරුදන්වූ දරුවෙකු පිළිබඳ ඇමෙරිකාවේ ඔරිගන් ප්‍රාන්තයේ සිදුකළ විශාලතම මෙහෙයුම ලෙස සටහන් වන්නේ 2010 වසරේ අතුරුදන් වූ දස හැවිරිදි කයිරන් හෝමාන් නම් පිරිමි දරුවා සෙවීමට කළ මෙහෙයුමය. ඔහු ගැනද අදටත් තොරතුරක් නැත.

නිශානි දිසානායක

  1. සෙලෙන්ස්කි යුක්රේන ජනාධිපති තනතුරට
  2. ප්ලාස්ටික් බඳුනක ජීවත් වන නයිජීරියානු යුවතිය
  3. භූතානයේ දොස්තර අගමැති
  4. පෞද්ගලික ආරක්ෂිකාවගේ ආරක්ෂාව තායිලන්ත රජු යටතට
  5. ඇමෙරිකාවට ආදායම් බදු ගෙවන බ්‍රිතාන්‍යයේ අලුත් කුමාරයා
  6. වසර මිලියන පන්සීයක් පැරණි ග්‍රේට් කැනියන් නිම්නය
  7. බෘෘනායි රාජ්‍යයේ සමලිංගිකයන්ට අලුත් නීතියක්
  8. ලොව බරින් වැඩිම දැරිය ආලියා සලීම්
  9. සුඩානයේ යුද්ධය වෙනුවෙන් පාප්වහන්සේගේ වැඳ වැටීම
  10. අවුරුදු 65,000කට පසු මානව වර්ගයාට අලුත් නෑයෙක්
  11. ස්ලෝවැකියාවේ ජනාධිපති ධුරයට පළමු වරට කාන්තාවක්
  12. බ්‍රෙක්සිට් නිසා මේ තවත් අමාරුවේ
  13. රජ පවු‍ලේ අයෙක් පළමු වරට කියුබාවට
  14. කථානායකට රට භාරදී ජනපති ගෙදර යයි
  15. වියපත් පුද්ගලයන් ජපානයෙන් වැඩිපුර වාර්තාවන්නේ ඇයි?
  16. ඉන්දියාවේ ගැමි කතුනගේ දුක කියා ඔස්කාර් සම්මානය දිනාගත් චිත්‍රපටය
  17. රැකියා තුන්දහසක් අහිමි කරමින් ලොව ලොකුම ගුවන් යානය කඩාවැටෙයි
  18. ලෝකයේ දූෂිතම නගර 20න් 18ක්ම දකුණු ආසියාවේ
  19. අල්කයිඩාවේ මීළඟ නායකයා ඔසාමා බින් ලාඩ්න්ගේ පුත් හම්සාද?
  20. “අයිනු”වන්ට රජයේ පිළිගැනීම ලැබේ
  21. කාල් මාක්ස්ගේ සොහොන්කොතට සති දෙකක් තුළ ප්‍රහාර දෙකක්
  22. 2020 ඔලිම්පික් පදක්කම් කසළ ගොඩකින්
  23. රුසියාව අන්තර්ජාලය ක්‍රියා විරහිත කිරීමේ සූදානමක
  24. කියුරියොසිටි සිට අභ්‍යවකාශයේ කඳු තරණය කරයි
  25. වකුගඩුවක් දන් දී පුංචි සමනළියකගේ දිවි බේරාගත් ගුරුවරිය

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.