lakbima.lk

ලෝක දේශපාලන නායකයන් තරමටම පුවත් මවන පිරිසක් ලෙස ආගමික නායකයන්ද හඳුන්වන්නට පුළුවන. ඇතැම් විට ඔවුන් සම්ප්‍රදායට පයින් ගසමින් සිදු කරන ඇතැම් කටයුතු මිනිසුන්ගේ විවේචනයට ලක් වුවද ඉන් සමහරක් ජනතාවගේ හිත සුව පිණිස ගත් ක්‍රියා මාර්ග වශයෙන් පිළිගැනෙයි. වත්මනෙහි නව සිතිවිලි ඇතිව නව ලොව හා අත්වැල් බැඳගත් ආගමික නායකයන් අතර ෆ්‍රැන්සිස් පාප් වහන්සේත්, දලයි ලාමාත් හඳුන්වන්නට පිළිවන. ඔවුන්ගේ ඇතැම් ක්‍රියා කලාප මුළු ලෝකයම මොහොතකට කම්පනය කරවන්නට සමත්ය.
 
පසුගිය සතියේ අපට එබඳු පුවතක් අසන්නට ලැබිණ. ඒ ප්‍රැන්සිස් පාප් වහන්සේ වෙතිනි. ඒ උන්වහන්සේ දේශපාලන නායකයන් දෙදෙනෙකුගේ දෙපතුල ළඟ වැටී පාද සිප ගත් බවය. දේශපාලන නායකයන්ගේ දෙපතුල් අසල වැඳ වැටෙන ආගමික නායකයන් පිළිබඳව අප අසා නැතුවා නොවේ; ඒ යම් යම් වාසි හා වරප්‍රසාද වෙනුවෙනි. එසේ නම් ෆ්‍රැන්සිස් පාප් වහන්සේ මෙසේ නායකයන්ගේ පාද සිප ගත්තේ ඇයිදැයි ඔබ කල්පනා කරනු ඇති. යම් වරප්‍රසාදයක් බලා‍පොරොත්තුවෙන්ද?
 
නැත. ඔහු සුඩාන නායකයන්ගේ දෙපා සිප ගත්තේ සාමය වෙනුවෙනි. දුගී හා පීඩිත ජනතාව වෙනුවෙනි. යුද්ධය
පිළිකෙව් කරන්නට යැයි ඉල්ලමිනි. ෆ්‍රැන්සිස් පාප් වහන්සේ මේ බැගෑපත් ඉල්ලීම කළේ දිගින් දිගටම යුද්ධයක පැටලී සිටින දකුණු සුඩාන නායකයන් ගෙනි. 
 
කිසිවකුත් බලා‍පොරොත්තු නොවුණු ආකාරයට උන්වහන්සේ මෙසේ දෑත දෙදණ බිම ඇණ සාමය වෙනුවෙන් කටයුතු කරන්නට යැයි ඉල්ලා සිටියේ දකුණු සුඩාන ජනපති සල්වා කීර් ගෙන් හා හිටපු උප ජනපති රීක් මචාර්ගෙනි. උන්වහන්සේ මේ ඉල්ලීම සිදු කළේ දැනට එහි පැවැත්වෙන සිවිල් යුද තත්ත්වය කෙළවරක් දැකීමේ අරමුණින් පවත්වන ලද ආගමික වැඩසටහනක් අවසානයේදීය.
 
දකුණු සුඩාන සිවිල් යුද තත්ත්වය අදවන විට වසර පහකට වැඩි කාලයක් තිස්සේ ඇදෙමින් තිබෙන්නකි. යුද බිමේදී මෙන්ම එහි අතුරු ප්‍රතිඵල වශයෙන් ඉන් පිටතද මිය ගිය සුඩාන ජාතිකයන්ගේ ගණන 3,83,000කි. වාර්තාවන සංඛ්‍යා මෙසේ වන්නේ නමුදු සාමාන්‍ය පිළිගැනීම වන්නේ මේ වන විට ලක්ෂ හතරකට වැඩි මනත් පිරිසක් මේ සටන් නිසා මිය ගොස් ඇති බවය.
 
මීට අමතරව හතර මිලියනයක පමණ ප්‍රමාණයක් මේ සිවිල් යුද තත්ත්වය හේතුවෙන් අවතැන්ව සිටින බව කියවෙයි. මිලියන 1.8 ප්‍රමාණයක් රට තුළම අවතැන්ව සිටින අතර තවත් මිලියන 2.5ක ජනතාවක් කෙන්යාව, උගන්ඩාව හා සුඩානය ආදී අසල්වැසි රටවල්වලට පලා ගොස් තිබේ. සිරියාව හා ඇෆ්ගනිස්ථානයට පසු ලොව තුන්වැනි විශාලම අවතැන් ජනගහනයක් ඇති දේශය නිර්මාණය කරන්නට මේ සිවිල් යුද තත්ත්වය හේතු වී තිබේ. අවාසනාව නම් මේ අවතැන් පිරිස් වලින් 86 පමණම කාන්තාවන් හා දරුවන් වීමයි. 
 
අනෙක් අතට මේ කැරැල්ලට සහභාගී වී සිටින රජයේ හමුදාවන් හා විරුද්ධ පාක්ෂිකයන්ගේ සටන් හමුවේ එහි රටවැසියන්ට විඳින්නට සිදුවී ඇත්තේ අන්ත දුක් කන්දරාවකටය. සාමාන්‍ය වැසියන් ඉලක්ක කරමින් ඔවුන් එල්ල කරන ප්‍රහාර අති අමානුෂිකය. බෝ නගරයෙහි රෝහලක් ඉලක්ක කර ගනිමින් ඔවුන් සිදු කළ ම්‍ලේච්ඡ ප්‍රහාරය එවන් තිරිසන් ප්‍රහාර අතුරින් එකක් පමණි. වරක් බෝ නගරයට කඩා වැදුණු කඩාකප්පල්කාරීන් එහි රෝහලකට පහර දුන්නේ එහි සිටි රෝගීන් 127 දෙනාගෙන් 126 දෙනෙකුම ඝාතනය කරමිනි. අනෙක් රෝගියාගේ පණ බේරුණේ ඔහු අන්ධයෙකු වූ බැවිනි. 
 
 ළමා සොල්දාදුවන් බඳවා ගැනීම පිළිබඳව මෙන්ම ලිංගික වද හිංසනය පිළිබඳවද දකුණු සුඩානයට ලෝකයේ අප්‍රසාදයේ හස්තය දිගු වෙයි. දහ හත් දහසකට වඩා වැඩි ළමා සොල්දාදවන් ප්‍රමාණයක් මේ සිවිල් අරගලයට සම්බන්ධ කරගෙන ඇතැයි ඔවුනට චෝදනා එල්ල වෙයි. එමෙන්ම එක්සත් ජාතීන්ගේ සමීක්ෂණයකදී හෙළිදරව් වූයේ අවතැන් කඳවුරුවල සිටින කාන්තාවන් හා ගැහැනු ළමුන්ගෙන් 70 පමණ දූෂණයට ලක්ව තිබෙන බවය. මෙහි ප්‍රධාන චෝදනාව එල්ල වන්නේ එරට ‍පොලීසියටත් හමුදාවටත්ය.
 
එමෙන්ම එරට මේ දුක්ඛිත තත්ත්වය සමහන් කරන්නට එහි පැමිණෙන රාජ්‍ය නොවන සංවිධාන හා උපකාරක  සේවකයන් පවා දැන් දැන් දකුණු සුඩාන දේශය අත්හැර දමා තිබෙන්නේ ඔවුනට එරෙහිවත් කැරලිකරුවන්ගේ මේ ප්‍රචණ්ඩත්වය අඩු නැතිවම හිස එසවූ බැවිනි.
 
ෆ්‍රැන්සිස් පාප් වහන්සේගේ ඇයදුම සිදුවන්නේ මෙකී දුර්භාග්‍ය සම්පන්න සමාජයේ ගැලවීම වෙනුවෙනි. අන්ත දුක්ඛිත තත්ත්වයට මුහුණ පා සිටින එරට වැසියන් වෙනුවෙනි.
 
“මම ඔබ සියලු දෙනාගෙන් මේ ඉල්ලීම කරන්නේ ඔබේ සහෝදරයකු විදිහටයි; මගේ මුළු හදින්ම මා ඉල්ලා සිටින්නේ මේ හටනට යළි නොපිවිසී  යහපත වෙත පා නගන්නටයි. ප්‍රශ්න ඇති වේවි. ඒත් ඒවාට ඔබ පරාජය විය යුතු නැහැ. ඔබ ඒවා විසඳගන්නට ධෛර්ය සම්බන්න විය යුතුයි” ෆ්‍රැන්සිස් පාප් වහන්සේ මෙහිදී දෙපාර්ශ්වයෙන්ම අයැද සිටි බව රොයිටර් පුවත් සේව පවසයි.
 
අනෙක් අතට දකුණු සුඩානයේ අසල්වැසි රාජ්‍යය වන සුඩානයේ ඇතිවී තිබෙන තත්ත්වයද මේ දෙපාර්ශ්වය සටන අත්හැර දමන්නට ‍පොළඹවනු ඇතැයි මත පළවෙයි. සුඩානයේ ආරක්ෂක අමාත්‍ය මෙන්ම හමුදාවේ  ජෙනරාල්වරයෙකුද වන අවාඩ් මොහොමඩ් අහ්මඩ් ඉවන් අවුෆ් යටතේ පෙළගැසුණු එරට හමුදාව තිස්වසරක් තිස්සේ ජනාධිපති ධුරය දරන ඔමාර් අල්-බෂිර්ට ධුරයෙන් ඉවත් වන ලෙස බලපෑම් කරමින් තිබෙන අතර ආරක්ෂක අමාත්‍යවරයා පවසන්නේ නුදුරේදීම අල් බෂීර් අත්අඩංගුවට ගන්නා බවයි.
 
දකුණු සුඩානය
 
දකුණු සුඩාන ස්වයංපාලක ප්‍රදේශය වශයෙන් 1972-83 අතර දක්වා කාලය තුළත් 2005-11 අතර දක්වා කාලය තුළත් හැඳුන්වුණු දකුණු සුඩානය සුඩානයෙන් නිදහස ලබන්නේ 2011 වසරේදීය. ජුබා අගනුවර කරගත් දකුණූ සුඩානය සතරවටින්ම ගොඩබිම් රාජ්‍යයන්ගෙන් වටවුණු ඉංග්‍රීසි බස නිල වශයෙන් පාවිච්චි කරන රාජ්‍යයකි. ඉතියෝපියාව, කෙන්යාව, උගන්ඩාව, කොංගෝ රාජ්‍ය හා මධ්‍යම අප්‍රිකානු ජනරජය එහි අසල්වැසි රාජ්‍යයන්ය.
2013 දෙසැම්බරයේදී PLA (Sudan People’s Liberation Army) විසින් සිදු කළා යැයි කියවෙන හමුදා කුමන්ත්‍රණයක් මේ මහා ගැටුමට මුලපිරු බව සඳහන් වෙයි.
 
 
පාලිත ජයකොඩි

 
  1. අවුරුදු 65,000කට පසු මානව වර්ගයාට අලුත් නෑයෙක්
  2. ස්ලෝවැකියාවේ ජනාධිපති ධුරයට පළමු වරට කාන්තාවක්
  3. බ්‍රෙක්සිට් නිසා මේ තවත් අමාරුවේ
  4. රජ පවු‍ලේ අයෙක් පළමු වරට කියුබාවට
  5. කථානායකට රට භාරදී ජනපති ගෙදර යයි
  6. වියපත් පුද්ගලයන් ජපානයෙන් වැඩිපුර වාර්තාවන්නේ ඇයි?
  7. ඉන්දියාවේ ගැමි කතුනගේ දුක කියා ඔස්කාර් සම්මානය දිනාගත් චිත්‍රපටය
  8. රැකියා තුන්දහසක් අහිමි කරමින් ලොව ලොකුම ගුවන් යානය කඩාවැටෙයි
  9. ලෝකයේ දූෂිතම නගර 20න් 18ක්ම දකුණු ආසියාවේ
  10. අල්කයිඩාවේ මීළඟ නායකයා ඔසාමා බින් ලාඩ්න්ගේ පුත් හම්සාද?
  11. “අයිනු”වන්ට රජයේ පිළිගැනීම ලැබේ
  12. කාල් මාක්ස්ගේ සොහොන්කොතට සති දෙකක් තුළ ප්‍රහාර දෙකක්
  13. 2020 ඔලිම්පික් පදක්කම් කසළ ගොඩකින්
  14. රුසියාව අන්තර්ජාලය ක්‍රියා විරහිත කිරීමේ සූදානමක
  15. කියුරියොසිටි සිට අභ්‍යවකාශයේ කඳු තරණය කරයි
  16. වකුගඩුවක් දන් දී පුංචි සමනළියකගේ දිවි බේරාගත් ගුරුවරිය
  17. චීනය තුළ ජපනුන් හැදු මරණයේ දොරටුව
  18. අයිස් ග්ලැසියරයෙන් මතු වූ ලේ ඇල්ල
  19. ඩිමෙන්ෂියා රෝගීන්ගේ විස්මිත අවන්හල
  20. අරුම පුදුම ගහගැනිලි උත්සවය
  21. කාර්ය මණ්ඩලයක් නැති පැය 24 පොත් සාප්පුව
  22. ලොවට උපන් එකම පුංචි යකඩ කෙල්ල
  23. එක් මිනිසෙක් ජීවත් වන හුදකලා නගරය
  24. ඩුබායි අඩ සඳ කුලූණේ විස්මිත තතු
  25. තිදෙනෙකුට පමණක් කතා කළ හැකි ලොව එකම භාෂාව

Page 1 of 38

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.