lakbima.lk



මන්නාරම තිරික්කල් සංගමය සංවිධානය කළ තිරික්කල් තරඟයක් මන්නාරම,නානට්ටන්,පරිකාරි කන්ඩල් තිරික්කල් තරඟ පිටියේදී ඊයේ(08) පැවැත්විණ.

යුද්ධයෙන් අනතුරුව මන්නාරම තිරික්කල් සංගමය තිරික්කල් තරඟයක් පැවැත්වීම සංවිධානය කොට තිබු අතර,තරඟකරුවන් 21 දෙනෙකු තරඟය වෙනුවෙන් එක්ව සිටියහ.

හින්දු ජනතාව පාරම්පරික තරඟයක් ලෙස තිරික්කල් තරඟ පවත්වන අතර,කණ්ඩායම් පහක් යටතේ තරඟ පැවැත්වීම සංවිධානය කොට තිබිණ.

සිය වගා කටයුතු අවසන් වීමෙන් අනතුරුව පවතින විවේකය හමුවේ තිරික්කල් පැවැත්වීම සාම්ප්‍රදායික ජනතාව සිදුකොට තිබිණ.

තරඟය නැරඹීම වෙනුවෙන් විශාල පිරිසක් එක්ව සිටියහ.

වවුනියාව - මාධව කුලසූරිය
 

ශ්‍රී ලංකා නාවික හමුදාවේ මෙහෙයුම් කටයුතු පුළුල් කිරීම වෙනුවෙන් ඇමෙරිකා එක්සත් ජනපදය වෙතින් ශ්‍රී ලංකා නාවික හමුදාව වෙත ලබා ගන්නා ලද පී626 නෞකාව ඊයේ (06) පස්වරුවේ කොළඹ වරාය පරිශ්‍රයේ දී සන්නද්ධ හමුදා සේනාධිනායක, ජනාධිපති මෛත්‍රිපාල සිරිසේන මහතාගේ සුරතින් ශ්‍රී ලංකා නාවික නෞකා, ගජබාහු, නමින් අධිකාරියට පත් කෙරිණි.

මෙම අවස්ථාවට ගරුතර මහා සංඝරත්නය ප්‍රමුඛ අන්‍යාගමික පුජකවරුන් ද, ආරක්ෂක රාජ්‍ය අමාත්‍ය රුවන් විජේවර්ධන, ආරක්ෂක ලේකම් ජෙනරාල් ශාන්ත කෝට්ටේගොඩ, ආරක්ෂක මාණ්ඩලික ප්‍රධානී අද්මිරාල් රවින්ද්‍ර විජේගුණරත්න, යුද හමුදාපති ලුතිනන් ජෙනරාල් මහේෂ් සේනානායක, නාවික හමුදාපති වයිස් අදිමිරාල් පියල් ද සිල්වා, ගුවන් හමුදාපති එයාර් මාර්ෂල් සුමංගල ඩයස් යන මහත්වරුන් ද, ශ්‍රී ලංකාවේ ඇමරිකා එක්සත් ජනපද තානාපති ඇලීනා ටෙප්ලිට්ස් මහත්මිය ඇතුළු සම්භාවනීය ආරාධිත පිරිසක් එක්ව සිටියහ. 

අභිනව නෞකාවේ අණදෙන නිලධාරි, කපිතාන් රෝහිත අබේසිංහ මහතා වෙත නෞකාව අධිකාරියට පත් කිරීමේ සන්නස් පත්‍රය ප්‍රදානය කිරීම ජනාධිපතිතුමා අතින් සිදු විය. 

අනතුරුව ශ්‍රී ලංකා නාවික නෞකා, ගජබාහු, නමින් අධිකාරියට පත් කරන ලද මෙම ගැඹුරු මුහුදු නිරික්ෂණ නෞකාවේ නාම පුවරුව සහ නිල ලාංඡනය නිරාවරණය කිරීම සර්ව ආගමික ආශිර්වාද මධ්‍යයේ ජනාධිපතිතුමා අතින් සිදු කෙරිණි.

ජනාධිපතිතුමා නෞකාවේ නිරික්ෂණ චාරිකාවක ද නිරත වූ අතර නාවික හමුදාපතිතුමා විසින් නෞකාවේ මෙහෙයුම් සූදානම සැකැස්ම සහ ක්‍රියාකාරිත්ව පිළිබඳව පිරිස දැනුවත් කරන ලදී. 

ඇමෙරිකානු වෙරළාරක්ෂක බළකායට අයත්ව පැවති, මෙම නෞකාව පසුගිය වසරේ අගෝස්තු 27 වන දින හවායි දූපතේ හොනොලුලුහි දී ශ්‍රී ලංකා නාවික හමුදාව වෙත නිල වශයෙන් භාර දෙන ලදී. මෙම නෞකාව දිගින් මීටර් 115 ක් වන අතර, පළලිල් මීටර් 13 කින් යුක්ත වේ. පැයට මුහුදු සැතපුම් 28 ක වේගයකින් යාත්‍රා කළ හැකි එය ටොන් 3302 ක ධාරිතාවයකින් යුක්ත වේ. මෙම නෞකාවේ නිලධාරීන් 22 දෙනකු ඇතුළු 111 දෙනකුගෙන් යුත් කාර්ය මණ්ඩලයක් රාජකාරියෙහි යෙදේ.

මෙම නෞකාව නවීනතම අවි ආයුධ, සන්නිවේදන උපකරණ සහ වෙනත් මෙහෙයුම් පද්ධතිවලින් සමන්විත නෞකාවක් වන අතර, එය ශ්‍රී ලංකා නාවික හමුදා කණ්ඩායමට එක් වූ පසු ශ්‍රී ලංකා නාවික හමුදාවේ භාවිත වන විශාලතම නෞකාව බවට පත් වේ. ශ්‍රී ලංකාවට අයත් ගැඹුරු මුහුදු කලාපය තුළ සෙවීමේ සහ මුදවා ගැනීම් මෙහෙයුම්, සාගර සම්පත් ආරක්‍ෂා කිරීම සහ නාවික කටයුතුවල නිරත වන නෞකා සහ යාත්‍රා වෙත සහන සැපයීම සඳහා මෙම නෞකාව යොදා ගැනීමට අපේක්‍ෂා කර ඇත.

( ඡායාරූප : නිශංක ද සිල්වා - ජනාධිපති මාධ්‍ය අංශය)

මහනුවර මහ නගර සභාවට අයත් දුණුමඩලාව රක්ෂිතයේ ඇති ෆයිනස් වගාව ඉවත් කර ඒ වෙනුවට එහි දේශීය වන වගා ආරම්භ කිරීමේ නියමු ව්‍යාපෘතියේ සමාරම්භක අවස්ථාව ජනාධිපති ගරු මෛත්‍රීපාල සිරිසේන මැතිතුමාගේ ප්‍රධානත්වයෙන් ඊයේ (06) පස්වරුවේ එම භූමියේ දී සිදු විය.

පිවිතුරු හරිත පුරවරයක් ගොඩනඟමින් ජෛව විවිධත්වය සුරකින, තුරු ප්‍රජාව, නමින් වැඩසටහන නම් කර තිබුණි. 

මෙම අවස්ථාව සංඛේතවත් කරමින් ජනාධිපතිතුමා විසින් දුණුමඩලාව රක්ෂිතයේ මී පැළයක් රෝපණය කරනු ලැබීය. 

මධ්‍යම පළාත් ආණ්ඩුකාර මෛත්‍රී ගුණරත්න, උතුරු මැද පළාත් ආණ්ඩුකාර සරත් ඒකනායක, මාතලේ නගරාධිපති ඩල්ජිත් අලුවිහාරේ, මහනුවර නියෝජ්‍ය පුරපති ඉලානි ආබ්දීන්, පේරාදෙණිය විශ්ව විද්‍යාලයේ උපකුලපති මහාචාර්ය උපුල් දිසානායක යන මහත්වරුන් ඇතු`ථ පිරිසක් මෙම අවස්ථාවට සහභාගී වූහ. 

( ඡායාරූප : නිශංක ද සිල්වා - ජනාධිපති මාධ්‍ය අංශය)


නුවරඑළිය දිස්ත්‍රික් ලේකම් එම්. බි. ආර්. පුෂ්පකුමාර මහතාගේ ප්‍රධානත්වයෙන් ජගත් පරිසර දිනයට සමගාමිව තලවාකැලේ ශා/කේලේයාර් දිය ඇල්ල ආශ්‍රිත පැල සිටුවීමක් සිදු කරන ලදි.

තලවාකැලේ වැවිලි සමාගම මගින් මෙම වැඩ සටහන ආරම්භ කර තිබු අතර මෙහිදි අදහස් දැක්වු නුවරඑළිය දිස්ත්‍රික් ලේකම් එම්. බි. ආර් පුෂ්පකුමාර මහතා පවසන ලද්දේ  ජනාධිපති මෛත්‍රිපාල සිරිසේන මහතා ගෙන යන මෙරට වන වැස්ම වැඩි කිරිමේ වැඩ සටහන ශක්තිමත් කිරිම සදහා නුවරඑළිය දිස්ත්‍රික්කයේ ශා/ ක්ලේයාර් දිය ඇල්ල ආශ්‍රිතව ස්වාභාවික පරිසර පද්ධතියක් ඇති කිරිමට තලවාකැලේ වැවිලි සමාගම මෙම වැඩ පිළිවෙල ආරම්භ කිරිම පැසසිය යුතු බවත්ය.

වතු සමාගම් මගින් ආර්ථිකමය වටිනාකමක් ඇති පැල සිටුවිමට වැඩි කැමැත්තක් දක්වන බවත් එම ගස් විශාලවු විට නැවත කැපිම සිදු කිරිම මගින් සිදුවන හානිය අවම කරමින් පරිසරය නිසියාකාරව ආරක්ෂා කිරිමට සැම වතු සමාගමක්ම ආර්ථික වන වගාවන් සිදු කිරිමේදි මුලු ප්‍රමාණයෙන් සියයට විස්සක්වත් දේශිය පැල සිටුවා නොකැපෙන වනාන්තර ඇති කිරිමට පියවර ගත යුතු බවද ඔහු පවසන ලදි.

මෙම අවස්ථාවට ප්‍රදේශයේ සර්ව ආගමික නායකයන් තලවාකැලේ වැවිලි සමාගමේ කළමනාකාර අධ්‍යක්ෂ අචාර්ය රොෂාන් රාජදොරේ මහතා ඇතුළු පාසල් සිසුන් හා තවත් පිරිසක්ද එක් විය.

සුදත් සෙල්ලහේවා - හැටන් 

හැටන් ජුම්මා පල්ලියේ රාමසාන් උත්සවය අද (05) පෙරවරුවේ එම පල්ලියේ මව්ලවි අජුමල් මහතාගේ ප්‍රධානත්වයෙන් පැවැත්විණි.

රාමසාන් උත්සවය සඳහා  හැටන් ප්‍රදේශයේ ඉස්ලාම් බැතිමතුන් විශාල පිරිසක් එක්ව සිටියහ.

ඡායාරූප හා සටහන-මස්කෙළිය ගාමිණී බණ්ඩාර ඉලංගන්තිලක

පවතින නියඟය හේතුවෙන් ආහාර සොයා වවුනියාව මඩුකන්ද ප්‍රදේශයට පැමිණි හැළ කිඹුලෙකු ඊයේ (04) අල්ලාගත් බව වවුනියාව වනජිවි කාර්යාල නිළධාරීන් පවසයි.

වවුනියාව වනජිවි කාර්යාල නිළධාරීන් පැවසූවේ ආහාර සොයාගෙන පැමිණි කිඹුලා දැක අනතුරුව ප්‍රදේශවාසීන් වනජිවි නිළධාරීන් දැනුවත් කළ බවයි.

අඩි අටක් පමණ දිගින් යුතු හැළ කිඹුලෙකු එලෙස අල්ලාගත් බව වනජිවි නිළධාරීන් සදහන් කළේය.

වනජිවි නිළධාරීන් පැවසූවේ අල්ලාගත් කිඹුලා වවුනියාව ජලපෝෂක ප්‍රදේශයක් වෙත මුදා හැරීමට කටයුතු කළ බවයි.

වවුනියාව ඇතුළු ප්‍රදේශ වෙත මේ වනවිට නියඟය ආරම්භ වි ඇති බැවින් වැවිවල ජල මට්ටම ශිඝ්‍රයෙන් පහත බැස පවති.

මාධව කුලසූරිය - වවුනියාව 

Lakbima Online

Download Lakbima Mobile App

 
 

 

Get In Touch With Us

Explore More

Please publish modules in offcanvas position.