lakbima.lk

පැරණි මස්කෙළිය නගරය යළි මතුවේ

මධ්‍යම කඳුකරයට මාස හතරකට ආසන්න කාලයක් තිස්සේ පවතින වියළි කාළගුණයත් සමග මාවුස්සාකැලේ හා කාසල්රී යන ජලාශවල ජල මට්ටම  ඉතා සීඝ්‍රයෙන් පහත බැස ඇත්තේ ජාතික වශයෙන් විදුලි අර්බූදයක් ඇති කරමිනි.

ජාතික ජල විදුලි බල පද්ධතියට අයත් මාවුස්සාකැලේ ජලාශය ඉදිකර ඇත්තේ 1961 වසරේදීය. ජල ධාරිතාව අක්කර අඩි 95400 ක වපසරියකින් යුත් මෙම ජලාශය ඉදිකිරීමෙන් අනතුරුව ජලය සම්පූර්ණයෙන් පුරවා ඇත්තේ, 1969 වසරේ ජූනි මාසයේදීය.මුලින්ම මෙම ජලාශය ඉදිකර ඇත්තේ ජලය ගබඩා කර ගැනීමේ අරමුණිනි.

එම කාලයේදී පැවති අධික වර්ෂාවත් සමග මාවුස්සාකැලේ ජලාශය දින 03 ක පමණ කාලයක් ඇතුළත සම්පූර්ණයෙන් පිරී ගිය බව මස්කෙළිය ප්‍රදේශයේදැනටත් ජීවතුන් අතර සිටින පැරැණ්නෝ  පවසති. දින තුනක් තිස්සේ පැවති ධාරා නිපාත වර්ෂාවත් සමග පැරණි මස්කෙළිය නගරය සම්පූර්ණයෙන්ම ජලයෙන් යට වන අවස්ථාවේ ඇතුම් වෙළඳසල් හිමියන්ට හා නිවාස හිමියන්ට තම ගෘහ භාණ්ඩ රැසක් ඉවත් කර ගැනීමට නොහැකි වී ඇත්තේ, මස්කෙළිය පොලීසිය හා  විදුලි බල මණ්ඩලය මගින් දින කීපයකට පෙර වහාම නිවාස, වෙළඳසල් හා ව්‍යාපාරික ස්ථාන වලින්  ඉවත්වන ලෙස කර තිබූ දැණුම්දීම් අනුව පැරණි මස්කෙළිය නගරයෙන්  ඔවුන් ඉවත් නොවූ නිසාය.

දින 03 ක් වැනි කෙටි කාලයකදී ජලාශය පිරී යනු ඇතැයි ඔවුන් කිසිසේත් විශ්වාස නොකළ නිසාත්, වසර ගණනක් තිස්සේ තමන් ඉපදුන, හැදුන වැඩුන ස්ථාන හැර දමා ඉවත්ව යාමට හිත් ඉඩ නොදුන් නිසාත් ඔවුහූ අවසන් මොහොත දක්වා එම ස්ථාන වල රැඳී සිටි නිසා වටිණා ගෘහ භාණ්ඩ ඇතුලු චංචල දේපළ රැසක් ජලාශයට පුද කරන්නට සිදු වූ බව පැරැණ්නෝ පවසති.

ඇතැම් අය තම නිවාස හා වෙළඳසල් ඇතුලු දේපළ ජලයෙන් ක්‍රමක් ක්‍රමයෙන් යට වෙද්දී හඬා වැළපුණ බව පැරණ්නෝ පවසන්නේ දැඩි හැඟීම් බරවය. පැරණි මස්කෙළිය නගරයේ ජලාශයට යටව තිබූ ආගමික සිද්ධස්ථාන අතර ශ්‍රී සුමනාරාම විහාරස්ථානය, ශ්‍රී ෂණ්මුගනාදන් හින්දු දේවස්ථානය, ඝණ දෙවි කෝවිල, සිවන් කෝවිල, ඉස්ලාම් පල්ලිය හා  සාන්ත ජෝෂප් කතෝලික පල්ලිය ප්‍රධාන වශයෙන් සඳහන් වේ. ඊට අමතරව පැරණි මස්කෙළිය නගරය අවට තිබූ තේ වතු 13 ක පිහිටුවා තිබූ හින්දු කෝවිල් 15 කට ආසන්න ප්‍රමාණයක්  මෙම ජලාශයට යටව ඇත.

එම තේ වතු වන්නේ, මහ මස්කෙළිය, මෝකා, දෝතැල්ල, බනියන්, වක්කා, ලක්ෂපාන, ගඟේවත්ත, බ්‍රවුන්ලෝ, පුංචි ගඟේ වත්ත, රක්කාඩු, නූගේ වත්ත, පොඩියෙන් තෝට්ටම් හා මරේ වත්තය. එම තේ වතු වල පිහිටි වතු අධිකාරිවරුන්ගේ නිල නිවාස 13 ක් හා තේ කර්මාන්ත ශාලා 08 ක්ද ජලයට යට වී ඇත. පොලිසිය හා  රජයේ රෝහල සමග සිනමා ශාලා 02 ක් ද මෙහිදී ජලයට යටවී තිබේ.  පැරණි මස්කෙළියෙ හා ගඟේවත්ත  යන නගර 02 ක් සම්පූර්ණයෙන් මාවුස්සාකැලේ   ජලාශයට යටවූ බව ජනතාව පවසති.

පැරණි මස්කෙළිය නගරය හරහා කොළඹ, හැටන්  සහ නල්ලතන්නිය ප්‍රධාන  මාර්ග පද්ධතිය පිහිටා තිබුණි. ශ්‍රී පාදස්ථානය බලා ගමන් කරන වන්දනාකරුවන්ද මෙම මාර්ගය හරහා ගමන් කළහ.එවක ශ්‍රීපාද වන්දනාකරුවන්පැරණි මස්කෙළිය නගරය හරහා ගමන් ගනිද්දී නගරයේ පිහිටි බෞද්ධ හා හින්දු ආගමික ස්ථාන වැඳ  පුදා ගැනීමට අමතක නොකළහ.

දැනට නව මස්කෙළිය නගරයට වඩා විශාල නගරයක් වු පැරණි මස්කෙළිය නගරයේ කාටුවා කඩේ අසල පිහිටි කාවඩි පාළම කුඩා නිසා එම ස්ථානයෙන් ධාවනය කිරීම අපහසු නිසා  ලොකු වාහන ගඟේ වත්ත නගරයේ නවතා එම ස්ථානයේ සිට කුඩා ලංගම බස් රථ වලින් නල්තන්නිය දක්වා වන්දනාකරුවන් ප්‍රවාහනය කිරීම සිදු කෙරිණි. නල්ලතන්නිය නගරයේ බස් හා වෑන් රථ ගාල් කිරීමට ස්ථාන නොවූ නිසා සියලු ශ්‍රීපාද වන්දනා බස් රථ ගාල් කර ඇත්තේ ගඟේවත්ත නගරයේය. එම නිසා ශ්‍රීපාද වන්දනා සමයේදී ගඟේවත්ත හා  පැරණි මස්කෙළිය නගරවල සියලු වෙළඳසල් හා ආපන ශාලා වලට ශ්‍රීපාද හොඳ වෙළඳාමක් තිබූ බව පැරණ්නෝ පවසති.

මාවුස්සාකැලේ ජලාශය ඉස්මත්තේ පිහිටි නව මස්කෙළිය නගරය 1969 වසරේදී පිහිටුවා ඇත. පැරණි මස්කෙළිය නගරයේ දේපළ හානි වූ ව්‍යාපාරික ප්‍රජාවට හා අනෙකුත් ජනතාවට නව මස්කෙළිය නගරයේ ඉඩම් ලබා දී ඇති අතර අහිමි වූ දේපළ වලට වන්දි මුදල්ද ලැබුණි. පැරණි මස්කෙළිය නගරයේ පදිංචිව සිටිමින් තම ව්‍යාපාරික ස්ථාන පවත්වාගෙන යනු ලැබූ සිංහල ව්‍යාපාරිකයින් අති බහුතරයක් දකුණු පළාතේ සිට වෙළඳාම් කටයුතු සඳහා උඩරට ප්‍රදේශයට පැමිණි අයයි. මේ වන විට එම ව්‍යාපාරිකයින්ගේ ඥාතීන් වැඩි පිරිසක් නව මස්කෙළිය නගරය හැර ගොස් ඇති අතර එයින් වැඩි පිරිසක් දකුණු පලාතෙත් වෙනත් ප්‍රදේශවලත් ස්ථීරව පදිංචිව සිටිති.

තමන් වසර ගණනක් තිස්සේ පදංචිව සිටි ස්ථාන පමණක් නොව තමන්ගේ සියලු දේපළ, රටට විදුලිය ලබා දෙන  ජාතික වැඩ පිළිවෙල වෙනුවෙන් ලබා දෙන්න හැකි වීමත් තමන් ලැබූ වාසනාවක් බව පැරණි මස්කෙළිය නගරයේ පදිංචිව සිටි තවමත් ජීවතුන් අතර සිටින මස්කෙළිය නගරයේ පදිංචි ඇතැම් වයෝවෘද්ධ පුද්ගලයන් කීප දෙනෙක් අප සමග පැවසූහ.

මාවුස්සාකැලේ  ජලාශයේ ජල මට්ටම පිටාර මට්ටමේ සිට මේ වන විට අඩි 69 දක්වා පහත බැස යාමත් සමග ජලයට යටවී තිබූ පැරණි මස්කෙළිය නගරයේ නටඹුන් සියල්ල දර්ශණීය අයුරින් දිස්වන්නට පටන්ගෙන ඇත. විදුලි අර්බූදය නිසා දැඩි අපහසුතාවට පත් වූවත් පැරණි මස්කෙළිය නගරයේ නටඹුන් වසර ගණනකට පසුව නැවතත් දර්ශණයවිම තුලින් ශ්‍රීපාද වන්දනාකරුවන් ඇතුලු මස්කෙළිය ප්‍රදේශයේ  ජනතාව මහත් වින්දනයක් ලබන අයුරු දැක ගත හැකිය.

මස්කෙළිය නගරයේ හා අවට උප නගරවල ජීවත්වන බෞද්ධ හා හින්දු ජනතාව මේ දිනවල ජලය සිඳී ගොඩ වී ඇති පැරණි මස්කෙළිය නගරයේ ශ්‍රී සුමනාරාම  විහාරස්ථානයේ සහ ශ්‍රී ෂන්මුගනාදන් හින්දු කෝවිල මෙන්ම පැරණි ඝණ දෙවි කෝවිලටද ගොස් ආගමික කටයුතු වල නිරතවන අයුරු දක්නට හැකිය. එය ජාතික සමගිය මෙන්ම ආගමික සහජීවනයේ අපූරු අවස්ථාවක් ලෙස සඳහන් කළ හැකිය.

ඡායාරූප හා සටහන - මස්කෙළිය ගාමිණී බණ්ඩාර ඉලංගන්තිලක

Lakbima Online

Download Lakbima Mobile App

 
 

 

Get In Touch With Us

Explore More

Please publish modules in offcanvas position.