lakbima.lk

ජනාධිපති සම්මානය ජනාධිපතිටම

මා මිත්‍ර කාටූන් ශිල්පියෙකුගේ බිරිඳ පසුගියදා මට කතා කළාය.

අපේ මනුස්සය ජීවිතේ හොඳටම කලකිරිල ඈ හඬමින් පැවැසුවාය. මට බය කොයි වෙලාවක හරි දිවි නසා ගනියි වත්ද කියලයි.

මම සියලු වැඩ පසෙක දමා මිත්‍රයාගේ ගෙදර ගියෙමි.

ඔහු කිලිටි සරමක් හා කිලිටි මේස් බැනියමක් හැඳ නොකැපූ රැවුල් කොට පිරි කම්මුලකට අතක් තබාගෙන කල්පනා කරමින් සිටියේය.

විජය කුමාරයා ලංකාවට ආවට පස්සෙ කාටූන්කාරයින්ට මෙහෙම සශ්‍රීක කාලයක් කවදාවත් ආවෙ නෑනෙ මම ඔහුට කීවෙමි. ඒකට පාටියක් දානව මිසක් මොකද නිකම් විශ්වාසභංගයක් පැරදිලා වගේ ඉන්නෙ?

මිත්‍ර කාටූන් ශිල්පියා මා දෙස ඔරවා බැලුවේය.

අර ලිප පත්තු කරන තුරු හැලියෙ දිය කෙළපු කකුළුවා වගේ ඉන්නද උඹ මට කියන්නෙ? ඔහු කේන්තියෙන් පෙරලා කීවේය. දැන් මිනිස්සු කාටූන් බැලිල්ල අතෑරලා ඕයි, ඉතින් තව ටික දවසකින් කර්තෘල කියයි අපේ සේවය අනවශ්‍යයි කියල.

ඇයි ඒ?

වෙනදට මිනිස්සු පත්තර පිටු පෙරළල කාටූන් හොයාගෙන ගිහින්නෙ හාස්‍ය රසය විඳින්නෙ මිත්‍රයා කීවේය. දැන් පත්තර ලෑල්ල ගාවට ගිහින් පත්තරේක මුල පිටුවට එබුනම උන්ට සුමානයක් හිනාවෙන්න බඩු තියෙනවනෙ.

ඇත්ත නේන්නම් මමද පිළිගතිමි.

අපි අවුරුදු ගානක් ඉගෙන ගෙන තව කාලයක් අභ්‍යාස කරලනෙ උපහාසය මතු කරන්න අල්ල ගත්තෙ ඔහු මට කියා සිටියේය. ඒකට බලනවකො ජනාධිපතියි, ආණ්ඩුවයි කිසිම ආයාසයක් නැතුව හාස්‍යය මතු කරන ලස්සන.

හැබැයි විපක්ෂෙත් අත අරින්නෙ නෑ නේද? මම මිත්‍රයාට පෙන්වා දුනිමි. උන් ප්‍රජාතන්ත්‍රවාදය රැකගනිමු කිව්වහම ඇතිනෙ බඩ අල්ලගෙන හිනාවෙන්න.

මිත්‍රයාද ඊට එකඟ විය.

හැබැයි ජනාධිපතිට තමයි මචං ජනාධිපති සම්මානෙ හම්බු වෙන්නෙ කාටූන් මිත්‍රයා සිනහවකින් තොරව මට කීය.

මිනිහ මාසයක් තිස්සෙ කරන විහිළු දිහා බලාගෙන ඉඳල තමයි මට තේරුම් ගියේ කාටූන්කාරයො ඔක්කොටම රස්සාවල් නැතිවෙනව කියල.

මම මෙහිදී මගේ අදහස කීවෙමි.

මගේ නම් ප්‍රියතම කාටූන් කැරැක්ටරේ ජාතියේ පියාගෙ මී මුණුබුරා මම කියා සිටියෙමි. ඔහේ දන්නවද මිනිහ පහුගියදවසක ආණ්ඩුවෙන් විපක්ෂෙට යන අතරමගදි මිනිහටම හම්බුවුණා කියල මිනිහ විපක්ෂෙ ඉඳන් ආණ්ඩුවට එනවා.

කාටූන් මිත්‍රයා යළි බැරෑරුම් මුහුණක් හදා ගත්තේය.

මට බයයි මචං. කොයි වෙලාවක හරි රනිල් නැත්නම් මහින්ද මං මේක අත අරිනව කියයිද කියල ඔහු කීවේය. ඒක මතක් වෙනකොට මට රෑ නින්ද යන්නෙත් නෑ බං.

ඒ අසා මට හිනා ගියේය.

එහෙම ‍නෙවෙයි මට නම් හිතෙන්නෙ කොයි වෙලාවක හරි දෙන්නම එක සැරේ කියයිද කියල මං මේක අතාරිනව කියල මම කියා සිටියෙමි. ඊළඟට ජනාධිපති කිව්වොත් ඒව ඔට්ටු නෑ කියල.

මිත්‍රයා එකවරටම කෑ ගසාගෙන පුටුවෙන් නැගිට්ටේය.

මං කිව්වෙ නැද්ද උඹට මුලදිම, මේ තුන්දෙනා කරන්න, හදන්නෙ අපිව පාරට බස්සල, රට හිනැස්සිල්ල උන් බාරගන්න කියල.

Add comment

ප්‍රතිචාර දැක්වීමේ කොන්දේසි : -
ප්‍රතිචාර දැක්වීමේදී පරුෂ වචන අපහාස කිරීම් ලිපියට අදාල නොවන ප්‍රතිචාර පල කිරීමෙන් වලකින ලෙස කරුණාවෙන් දන්වා සිටිමු.


Security code
Refresh

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.