lakbima.lk

යුක්රේනයේ ජනාධිපතිකමට විහිළුකාරයෙක්

විදේශ විත්ති විචාරකයා විස්සෝපයෙන් සිටිනු දුටු ඔහුගේ බිරිඳ දුකට හේතුව කුමක්දැයි විමසුවාය.

විහිළුකාරයෙක් යුක්රේනේ ජනාධිපති වුණානේ. ඔහු සිය බිරිඳට කියා සිටියේය. මං නම් හිතුවේ මේ ප්‍රවෘත්තිය හොඳට නැගල යයි කියලා.

විදේශ විත්ති විචාරකයාගේ බිරිඳටද එය අලුත් ආරංචියක් වූ බව ඇගේ මුහුණෙන්ම පෙනී ගියේය.

විදේශ විචාරකයා කනගාටුවෙන් කතා කළේය.

මෙච්චර අපූරු වැඩක් වෙලත් ලෝකේ කොහේවත් මිනිස්සුන්ට මේක ගානක් නැතිවීමනේ වැඩේ.

විචාරකයාගේ බිරිඳ මොහොතක් කල්පනා කළාය.

ලෝකයා කැමැති නැතුව ඇති විහිළුකාරයෙක් දේශපාලනඥයෙක් වුණාට ඕ කියා සිටියාය. විහිළුකාරයෝ මිනිස්සුන්ව හිනස්සනවනේ, දේශපාලනඥයෝ කරන්නේ මිනිස්සුන්ව කේන්ති ගැස්සිල්ලනේ.

ඒ වුණාට මේ කාලෙ මිනිස්සුන්ට විහිළු සපයන්නේ දේශපාලනඥයොනේ විදේශ විචාරකයා කියා සිටියේය. ඒකයි මං හිතුවෙ විහිළුකාරයෙක් ජනාධිපති වුණාම ඒක අල්ලල යයි කියල විචාරකයාගේ බිරිඳ වෙනත් අදහසක් පළ කළාය.

ඒත් රටක ජනාධිපති වෙනව කියන්නේ විහිළුවක් ‍නෙවෙයිනෙ ඈ කියා සිටියාය. විහිළුකාරයෙක් ජනාධිපති වුණාට ජනාධිපතිකමත් විහිළුවක් වෙයි කියල මිනිස්සු හිතනව ඇති

ඇගේ සැමියා ඊට විරුද්ධ විය.

මේ ජනාධිපතිම ඉස්සෙල්ල විහිළුවක් වුණා ‍නෙවෙයිනෙ ඔහු කියා සිටියේය. ලෝකෙ තව ජනාධිපතිවරු නැද්ද විහිළුවලට වැඩිය දෙයක් රටට දෙන්න බැරි?

විචාරකයාගේ බිරිඳ ඒ කතාවෙන් පුදුමයට පත් වූවාය.

ලෝකෙ එහෙම අයත් ඉන්නවද? ඕ අහිංසක ලෙස ඇසුවාය. මං ඉතින් ඔයා වගේ රට රටවල් ගැන දන්නෙ නෑනෙ

විදේශ විචාරකයා නොපහන් බැල්මක් සිය බිරිඳට හෙලුවේය.

බිරිඳට ඒ බැල්ම තේරුණේ නැත.

විහිළු වැඩසටහන් බලල පුරුදු මිනිස්සු හිතනව ඇති ජනාධිපතිකම කියන්නෙත් විහිළු වැඩසටහනක් කියල ඈ සිය සැමියාට කියා සිටියාය. ඒ වුණාට ජනාධිපතිධුර කාලය ඒ වගේ ඕන වෙලාවට ඕෆ් කරන්න බැරි බව දැනගත්තම තමයි සොරි වෙන්නෙ.

සැමියා අමාරුවෙන් හිනා වී බිරිඳගේ කතා අසා සිටියේය.

විහිළුකාරයෙක් ඡන්දෙ ඉල්ලනකොට මුලදී මිනිස්සු හිතන්න ඇත්තේ මිනිහ ඡන්දෙ ඉල්ලන්නෙත් විහිළුවට වගේ කියලනේ ඈ කියා සිටියාය. මිනිහෙක්ව ජනාධිපති කරාට පස්සෙනෙ තේරෙන්නේ ජනාධිපතිකමත් එක්ක විහිළු නෑ කියල

ඇමෙරිකාවෙ ජනාධිපති ඡන්දෙ ඉල්ලන කා‍ලේ ඉඳන්ම හැසිරුණේ විහිළුකාරයෙක් වගේනෙ විදේශ විචාරකයා මෙහිදී බිරිඳට කියා දුන්නේය.  ඡන්ද ඉල්ලන කා‍ලේ සීරියස් වගේ ඉඳල දිනුවට පස්සෙ විහිළුකාරයෙක් වෙනවට වැඩියෙ නම් හොඳයිනෙ ඒක

අපි ඔක්කොම කුඩ්ඩෝ

රාත්‍රී ටෙලිවිෂන් ප්‍රවෘත්ති අවසන් විය. අපේ අසල්වැසියා තාප්පය අයිනේ සිට මගේ නම කියා කෑ ගසනු මට ඇසුණේය.

“මචං, දැන් මාසෙකින් විතර ආණ්ඩුව කුඩ අල්ලපු ප්‍රවෘත්තියක් ගියේ නෑනේ.”  ඔහු මා දුටු විගස  කියා සිටියේය. “මේ බෝම්බ කේස් නිසා කුඩු ඇල්ලිල්ල නවත්තලද දන්නෑ නේද?”

“දැන් රටේ අල්ලන්න කුඩු ඉතුරුවෙලා නැතුව ඇති මගේ හිතේ” මම කියා සිටියෙමි. “පහුගිය කාලෙ දිනපතා ටොන් ගණන් කුඩු අල්ලපු හැටියට ලංකාවෙ විතරක් ‍නෙවෙයි දැන් ඉන්දියාවෙත් කුඩු ඉවර ඇතිනෙ.”

“ඒක වෙන්න බෑ” අසල්වැසියා මගේ කීම තරයේ ප්‍රතික්ෂේප කළේය. “එහෙම නම් ආණ්ඩුව ඒකෙ ගෞරවය බාර නොගෙන ඉඳියිද?

ඒ කතාවට මට හිනා ගියේය.

“මේගොල්ලො කිසි දෙයක ගෞරවය බාර ගන්න නැති නිහතමානි කට්ටියක්නේ” මම අසල්වැසියාට මතක් කර දුනිමි. “කොටින්ම රට මේ තියෙන තත්ත්වෙට අරගෙන ගිය ගෞරවේවත් බාර ගන්නේ නෑනෙ.”

මගේ පිටුපසින් තාප්පය අයිනට පැමිණි බිරිඳ මෙහිදී අපේ කතාවට කට දැම්මාය.

“රන්ජන් රාමනායක මුලින්ම ඕක කිව්වම කවුරුවත් ගණන් ගත්තෙ නෑ” බිරිඳ කියා සිටියාය. “දැන් තේරෙනව නේද මෑන් කියපු කතාව ඇත්ත කියල.”

“රන්ජා මොකක්ද කිව්වෙ?”

“ඇයි දෙයියනේ පාර්ලිමේන්තුවෙ ඉන්න කට්ටිය කුඩු ගහනව කියල මනුස්සය කිව්ව මතක නැද්ද?” බිරිඳ අපට සිහිපත් කළාය. “හැම දේම ඒ ගොල්ලොම බෙදා ගන්න පුරුද්දට දැන් අල්ලන අල්ලන කුඩු ඔක්කොම තමන්ගෙම පරිභෝජනයට ගන්නව ඇති.”

අපේ අසල්වැසියා ඊට විරුද්ධයි “දේශපාලනඥයො හැත්ත බුරුත්තම මටත් පෙන්නන්න බෑ තමයි.” ඔහු කියා සිටියේය. “ඒ වුණාට ඔය සැට්ටෙක කුඩු ගහනව කියන කතාව නම් මං කියන්නෙ අතේ රෝලක්.”

බිරිඳ ඒ කතාවෙන් කේන්ති ගත්තාය.

“ඕගොල්ලො දිනපතා ටෙලිවිෂන් ප්‍රවෘත්ති බලන කට්ටිය නේද?” ඕ නොඉවසිල්ලෙන් ඇසුවාය. “ඔය නායකයො කියන කට්ටිය කියන දේවල් අහගෙන ඉන්නකොට මට නම් තේරිලා තිබුණෙ මුන් ඉස්මුරුත්තාවට කුඩු ගහල තමයි දොඩවන්නේ කියල.”

මම බිරිඳට කරුණු කාරණා පහදන්නට වූයෙමි.

“රටේ නායකයො කතා කරන කොට, හිනාවෙන කොට නම් හිතෙනව තමයි මුන් හොඳ සිහියෙන්ද ඉන්නෙ කියල” මම කීවෙමි. “ඒ වුණාට උන් කුඩු ගහල මේව කියනව, කරනව කියල ඔප්පු කරන්න නම් ඔයිට වැඩියෙ හොඳ සාක්ෂි ඕන.”

බිරිඳ මොහොතක් කල්පනා කළාය.

“අප්‍රේල් 21 වැනිදා මරාගෙන මැරෙන ප්‍රහාරයක් එල්ල වෙනව කියල දැන දැනම මුකුත් නොකර බලාගෙන හිටියෙ මුන් කුඩුගහල ගල්වෙලා හිටපු නිසා වෙන්න ඕන නේද?” බිරිඳ අපට පෙන්වා දුන්නාය.” ඊට පස්සෙත් ඒ ගැන හැඟීමක්, දැනීමක් නැතුව ඉන්න සැට්ටෙකම කුඩු ගහල ඉන්න නිසා කියල  හිතා ගන්න එච්චර මොළයක් ඕනද?”

අසල්වැසියා බිරිඳගේ කතාව අසා සිනාසුණේය.

“කුඩු ගහන්නට ඕන නෑනෙ හලෝ, තකතීරු වැඩ කරන්න” අසල්වැසියා කියා සිටියේය. “දැන් හැමදාම පහෙන් පහට කැහි ගෑනි දීල හොටු ගෑනි ගන්නෙයි, හොටු ගෑනි දීල කැහි ගෑනි ගන්නෙයි මොකෝ අපිත් කුඩු ගහලද, නෑනෙ.”

මානිගේ පුතාගෙන් ජාත්‍යන්තර ත්‍රස්තවාදෙට විසඳුම

කිසි කරදරයක් නැතුව ආව ගියා ගමනක් ගොස් පැමිණි බිරිඳ සිනාකටින් කීවාය. ඉස්කෝල පටන් ගත්තට පාරෙ ළමයිවත්, ස්කූල් වෑන්වත් නෑ.

කොටි ගහපු කා‍ලේ තිබිච්ච විස්වාසෙවත් නෑනෙ ආරක්ෂාව ගැන දැන් මම ඇයට කීවෙමි. එහෙම තියෙද්දී දෙමව්පියො දරුවො එවයිද?

අපේ කතාව අසා සිටි පුතා සිනාසුනේය.

දේශීය විසඳුම් දීලා මේ ප්‍රශ්න ඉවරයක් කරන්න බෑ. පුතා බැරෑරුම් ලෙස කියා සිටියේය. මේක ජාත්‍යන්තර ත්‍රස්තවාදෙ නිසා ජාත්‍යන්තරේ සහයෝගයෙනුයි විසඳුමක් හොයන්න ඕන.

ඒ කොහොමද ඒ?

මේ හාදයෝ එක දවසයිනෙ බෝම්බ පිපිරෙව්වේ පුතා අවධාරණය කළේය. ඒ වුණාට කොටි අවුරුදු තිහක් තිස්සේ දිනපතා බෝම්ප පිපිරෙව්වනෙ ඉතින්?

එහෙව් කොටි එක්කත් අපි සාම සාකච්ඡා කරානේ. සාම ගිවිසුම් අස්සන් කරානේ. චන්ද්‍රිකා අවුරුදු 10කට උතුරු නැගෙනහිර ප්‍රභාකරන්ට දෙන්නම් කියලත් කිව්වනේ. පුතා මතක් කර දුන්නේය.

ඒත් අපි අයිඑස්සෙකට එහෙම කිසිම චාන්ස්සෙකක් දෙන්නෙ නැතිවීම වැරදියිනෙ ඒ කතාව අසා බිරිඳ උදහස් වූවාය.

දැන් ඔයා කියන්නෙ මොකක් කරන්න කියලද?

ඉස්සෙල්ලම මේ වැඩේ විසඳන්න නියම සුදුස්සට ඒක බාරදෙන්න ඕන

බිරිඳගේ මුහුණේ සිනාමලක් පිපුණි.

ඒක හරි පුතා ඕ කියා සිටියාය.
සරත් ෆොන්සේකාව වහාම සීන්නෙකට ගේන්න ඕන තමයි.

පුතා අවඥාවෙන් සිනාසුණේය.
මං කිව්වේ ජාත්‍යන්තර ප්‍රශ්නයක් විසඳන්න සුදුස්සව ගේන්න ඕන කියල ඔහු කියා සිටියේය. එරික් සොල්හයිම්ව
බිරිඳටත් මටත් දෙදෙනාටම කේන්ති ගියේ එකවරටය.

ඒ හාදයව ගාවගන්නේ මොකටද?

ඇයි මෑන්ගෙ රාජ්‍යතාන්ත්‍රික ඥාණයෙන් හරියටම නි‍ලේ අල්ලයිනෙ පුතා කීවේය. ප්‍රභාකරන්ව කැ‍ලේ ගල්ගුහාවට ගිහින් අල්ලගත්ත වගේ සොල්හයිම් කාන්තාරෙ කූඩාරමටම ගිහිල්ල අල් බග්ඩාඩිවත් අල්ලගනියි
ඊට පස්සේ බෝම්බ බය නැතිවෙනවද? බිරිඳ ඇසුවාය.

ඔව්. ඒත් ඒකට කලින් සාම ගිවිසුමක් අස්සන් කරන්න ඕන රනිලුයි, අල්බග්ඩාඩයි පුතා කියා සිටියේය. රනිල් අරලියගහ මන්දිරේ ඉඳන්, අල්බග්ඩාඩි කාන්තාරෙ කූඩාරමේ ඉඳන්.

ඇයි රනිල්? ජනාධිපතිගේ ආරක්ෂක ඇමැති මම ඇසුවෙමි.

අගමැති, ජනාධිපතිට හොරෙන් අස්සන් කරනෙක තමයි සම්ප්‍රදාය පුතා කීවේය. 2002දීත් ප්‍රභා එක්ක සාම ගිවිසුම අස්සන් කරෙත් රනිල්නේ, චන්ද්‍රිකාට හොරෙන්.

අයිඑස්සෙකත් එක්ක සාම ගිවිසුමක් අස්සන් කරාම අපේ මුණුබුරාවත් බය නැතුව ඉස්කෝලෙ යවන්න පුළුවන්ද? බිරිඳ ඇසුවාය.

නැතුව නැතුව පුතා කියා සිටියේය. ඒ අය විතරක් නමෛයි අපිට කොටි යුද්දෙදි මිස්වෙච්ච නොබෙල් තෑග්ගත් මේ වෙලාවේ ගන්න පුළුවන්.

බිරිඳත් මමත් කතාව නවතා එතැනින් පිටවීමු.

ඒත් බලන්නකෝ ලෝකේ තියෙන අසාධාරණේ පුතා දුකින් කියනු ඇසුණේය. කොටි එක්ක සාකච්ඡා කරන්න කියලා බලකරපු කිසිම රටක් අපිට අයිඑස්සෙකත් එක්ක සාකච්ඡා කරන්න කියන්නෑනේ.
 

ආණ්ඩුව වගකීම බාරගනී

පුවත්පත් කර්තෘ සිය ආරක්ෂක වාර්තාකරු සමග රටේ තත්ත්වය පිළිබඳ කතාබහක යෙදී සිටියේය.

මේ ආණ්ඩුව අවුරුදු හතරක් තිස්සේ කරපු මඟුලක් නෑ කියපු එවුන්ගේ නම් කටවල් වැහෙන්නට උත්තර ලැබුණා. කර්තෘ වාර්තාකරුට කියා සිටියේය. නිදහස ලැබුණට පස්සේ පත්වෙච්ච කිසිම ආණ්ඩුවකට පුළුවන් වුණාද මේ විදියට රට අරාජික කරන්න.

ආණ්ඩු හිතවාදියෙකු වූ ආරක්ෂක වාර්තාකරු සිය ප්‍රධානියා දෙස දුක්මුසු බැල්මක් හෙලුවේය.

රාජපක්ෂලගේ වැරදිවලට පින්සිද්ධ වෙන්න ඔතනට තල්ලු වුණාට ආණ්ඩුවෙත් ඉන්නේ පෘථග්ජනයොනෙ චීෆ් වාර්තාකරු කියා සිටියේය. ඒ මිනිස්සු කියලා වෙන මොනවා කරන්නද?

කර්තෘ සිය වාර්තාකරු දෙස රවා බැලුවේය.

කරන්න ඕන දේ කාඩිනල්තුමා සුද්ද සිංහලෙන් කියනවා අහගෙන හිටියේ නැද්ද? ඔහු කේන්තියෙන් කඩා පැන්නේය. මේකට වගකියන්න ඕන හැමකෙනාම ඉල්ලා අස්වෙන්න ඕන කියලා කිව්වේ

ආරක්ෂක වාර්තාකරු මෙහිදී වටපිට බලා කිසිවකු නැති බව සැකහැර දැනගෙන කර්තෘට රහසින් කොඳුරන්නට වූයේය.

එහෙම නම් මං චීෆ්ට ටොප් සීක්‍රට්ටෙකක් කියන්නම් ඔහු පහත් හඩින් කීවේය. කවුරුත් නොදන්නවට මුලදීම මේකේ වගකීම අරගෙන ජනාධිපති ඉල්ලා අස්වෙන්න හැදුවා

කර්තෘගේ කට හොඳටම ඇරුණේය. ඔහු කතා කරගත නොහී බලා සිටියේය.

ඒ කතාව අහලා අගමැතිට හොඳටම කේන්ති ගිහින් කියලා තියෙනව ඔයාට විතරක් ‍නෙවෙයි මටත් මේකේ වගකීමක් තියෙනවා. මාත් ඉල්ලා අස්වෙනවා කියලා

මෙහිදී උගුරකට වේළුණු කර්තෘවරයා මොහොතකින් වතුරු වීදුරුවක්ම හිස් කළේය.

එතකොට ඇමැති මණ්ඩලය කම්පාවෙලා කියලා තියෙනවා අපිටත් පුළුවන්ද ලැජ්ජාවක් නැතුව තවදුරටත් මේ තනතුරුවල ඉන්න කියලා.

කර්තෘවරයාට තවමත් කතා කිරීමට වචන ගළපාගත හැකි වූයේ නැත.

ඒ අවස්ථාවේ ආණ්ඩුවේ සෙසු මන්ත්‍රීවරු කියලා තියෙනවා තමුන්නාන්සේලා ඔය තරම් වරප්‍රසාදයි, ඔච්චර බලයකුයි අතහැරලා අයින්වෙනවා නම් අපි ආණ්ඩුවක් හැටියට ඉල්ලා අස්වෙමු කියලා.

අන්තිමේදී කර්තෘ දිග හුස්මක් ගෙන ප්‍රශ්නයක් ඇසුවේය.

ඇයි ඕයි මේ මිනිස්සු ඔච්චර පරිත්‍යාගයක් කරන්න සූදානම් වෙලත් ඒක රටට දැනගන්න ඇරියේ නැත්තේ?

ආරක්ෂක වාර්තාකරු මෙහිදී කඳුළක් පිසදැමුවේය.

මේගොල්ලො එහෙම කටමැත දොඩවන කට්ටිය ‍නෙවෙයිනේ චීෆ් ඔහු පෙන්වා දුන්නේය. පාස්කු ඉරිදා ත්‍රස්තවාදීන් ගහනවා කියලා දැනගෙනත් ඒ ගැන කටක් හොල්ලපු නැති කට්ටියනේ.''

කර්තෘ මෙහිදී තවත් ප්‍රශ්නයක් ඇසුවේය.

එතකොට ඒ ගොල්ලෝ තාමත් ඉල්ලා අස්වුණේ නැත්තේ මොකද?

වැඩේට ලෑස්ති වෙනකොට එතන හිටපු මාධ්‍ය අධ්‍යක්ෂවරයෙක් පෙන්නලා දීලා තියෙනවා ඔය වැඩෙන් පාස්කු ඉරිදා වුණාට වැඩි විපතක් වෙන්න  පුළුවන් කියල

ඒ මොකද ඒ?

පාස්කු දා මැරුණේ 250යිනේ. වාර්තාකරු කීවේය. ආණ්ඩුව ඉල්ලා අස්වුණොත් ඒ සන්තෝසෙට ඒ වගේ දෙතුන්ගුණක්වත් හාට් ඇටෑක් හැදිලා මැරෙයි'' කියලා අර මාධ්‍ය අධ්‍යක්ෂ පෙන්නලා දුන්නලු. ඒ ජීවිත හත්අටසීය ගැන හිතල තමයි ආණ්ඩුව ඉල්ලා අස්වෙලා නැත්තේ

අයිඑස් පැරැද්දීමටත් කොටි පැරැද්දූ වීරයා

“යූඑන්පිය ජනාධිපතිගෙන් ඉල්ලල තියෙනවා සරත් ෆොන්සේකාව නීතිය හා සාමය ඇමති කරන්න කියල” මම බිරිඳට කියා සිටියෙමි.

“යූඑන්පියට ජයවේවා ” බිරිඳ හඬ නැගුවාය. “ඇමෙරිකාවෙන්, රුසියාවෙන්වත් පාඩමක් ඉගෙන නොගත්ත අයිඑස් කාරයො මේ පාර අම්බලන්ගොඩින් තමයි පාඩමක් ඉගෙන ගන්නේ.”

එහෙත් මගේ හිතේ කුකුසක් තිබුණේය.

“ෆොන්සේකා ත්‍රස්තවාදෙ ඉවර කරයි කියල ෂුවර් නම් පාස්කු බෝම්බ පුපුරල දවස් දෙකක් යනතුරු රනිල් මිනිහට කතා කරලවත් නැත්තෙ මොකද?”

“අමතක වෙන්න ඇති අනේ” බිරිඳ මට කියා සිටියාය. “අගමැතිකම් කරාට  හැත්තෑවක් කියන්නේ දේවල් අමතක වෙන වයසනෙ.”

මමද එය පිළිගතිමි.

“ඒක තමයි වෙන්න ඇත්තෙ. නැත්නම් මුලින්ම ඇමති කෙනෙක් කරන වෙලාවෙ මිනිහට නීතිය හා සාමය දෙන්න ඕන කියලත් මතක් වෙන්න එපැයි.”

ඔවුන් නොදැන කළ වැරදිවලට යූඑන්පීයට  සමාව දෙන්නැයි බිරිඳ මගෙන් ඉල්ලා සිටියාය.

“අන්තිමට හරි ඒ ගොල්ලො හරි තීරණේ ගත්තනෙ” ඕ කියා සිටියාය. “කොටි ත්‍රස්තවාදය නැති කරපු වීරයටමනෙ පුළුවන් අයිඑස් ත්‍රස්තවාදයත් නැති කරන්නත් කියල.”

මෙහිදී මෙම පරණ කතාවගයක් සිහියට නැගුණේය.

“දැන් කොයි වෙලාවක හරි ලක්ෂ්මන් කිරිඇල්ල ෆොන්සේකාගෙන් සමාව ඉල්ලයි නේද?” මම බිරිඳගෙන් ඇසුවෙමි. “ඕනම ගොනෙකුට යුද්ද කරන්න පුළුවන් කිව්වට.”

බිරිඳගේ මුහුණ රතු විය. මම තවත් කාරණයක් ඇගෙන් ඇසුවෙමි.

“දැන් මංගල සමරවීර මොනව කියයිද දන්නෑ නේද?” මම විමසීමි. “ඒ කාලෙ නම් එයා කිව්වෙ ෆොන්සේකා හොඳ ගැලවීමේ හමුදාව මෙහෙයවන්න කියලනෙ.”

බිරිඳ බිම බලා ගත්තාය. මට තවත් දෙයක් මතක් විය.

“ජෝසප් මයිකල් පෙරේරා නම් විරුද්ධ වෙයි ෆොන්සේකාට ‍පොලිස් බලතලත් දෙනවට” මම කීවෙමි. “ඒ කාලෙ මිනිහ කිව්වනෙ ෆොන්සේකා හමුදාව යොදවල පත්තරකාරයො දඩයම් කරනව කියල.”

බිරිඳ මගේ කතාවලින් කේන්ති ගත්තාය.

“මේ වෙලාවෙ කවුරු හරි ලවා යූඑන්පීය ගොඩගන්නනෙ ඒ මිනිස්සු බලන්නෙ” කීවාය. “ඔයා කෙළින්ම කියන්න කොටි ත්‍රස්තවාදය ඉවර කරපු හමුදාපති සුදුසුද නැද්ද කියල අයිඑස් ත්‍රස්තවාදයත් ඉවර කරන්න.”

“සුදුසුයි සුදුසුයි” මම එක හෙළා

පිළිගත්තෙමි. “මට බය ඒක ‍නෙවෙයි, දැන් ඊළඟට යූඑන්පීය කියයිද දන්නෑනෙ අයිඑස් ත්‍රස්තවාදය ඉවර කරන්න නම් කොටි ත්‍රස්තවාදය ඉවර කරපු ගෝඨාවයි, මහින්දවයිත් ගේන්න ඕන කියල.”

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.