lakbima.lk

ඉකුත් සතිය ශ්‍රී ලංකා දේශපාලන ඉතිහාසයට අලුත් පිටුවක් එකතු කර ඇත. දේශපාලන ඉතිහාසයේ එදා මෙදා තුර සිදු නොවූ බොහෝ දේ ඉකුත් සතිය පුරාවට සිදු වූ අතර තවමත් සිදු වෙමින් තිබේ. මේ සියල්‍ලේ කථානායකයා වන්නේ 2015 ජනවාරි 08 දා බලයට පත් මෙරට බිහි වූ දුර්වලම ජනාධිපතිවරයා යැයි බොහෝ අය හැඳින් වූ මෛත්‍රීපාල සිරිසේන ජනාධිපතිවරයාය. මෙම සිදුවීම් කිසිවක් අහඹු සිදු වීම් නොව රහසිගත දේශපාලන මෙහෙයුමක ප්‍රතිඵලයන්ය. මෙම රහසිගත මෙහෙයුමේ නායකයා හිටපු අමාත්‍ය බැසිල් රාජපක්ෂ මෙන්ම ආණ්ඩුවෙන් එළියට බැස ආණ්ඩුවට එරෙහිව විවෘතව සටන් කළ 15 කණ්ඩායමය.

ඒකාබද්ධ විපක්ෂය නියෝජනය කරන පක්ෂනායකයෝ ආණ්ඩුව වෙනස් කිරීමේ දැඩි අරගලයක නිරත වූහ. ඔවුන් සෘජුවම සඳහන් කළේ අගමැති රනිල් වික්‍රමසිංහ ධුරයෙන් පහ කොට මහින්ද රාජපක්ෂ මහතා අගමැති ලෙස පත් කර ගත යුතු බවය. මෙම මතයට ඒකාබද්ධ විපක්ෂයේ ශ්‍රීලනිප මන්ත්‍රීවරුන්ගේ දැඩි බාධා කකුලෙන් ඇදීම් සිදු වුවද ඔවුන්ද සටන අත් හැරියේම නැත. රංජිත් සොයිසා මන්ත්‍රීවරයා සඳහන් කළේ මෙවැනි ආණ්ඩුවක් පිහිට වුවහොත් නෙලුම් මාවතේ පක්ෂ කාර්යාල භූමියේ පිහිටි අඹ ගසේ එල්ලී මැරෙන බවය.

කෙසේ වුවද වාසුදේව නානායක්කාර, දිනේෂ් ගුණවර්ධන, උදය ගම්මන්පිල, විමල් වීරවංශ යන මන්ත්‍රීවරුන් ප්‍රසිද්ධියේම සඳහන් කළේ මහින්ද රාජපක්ෂ මහතා අගමැති ධුරයට පත් කර නව ආණ්ඩුවක් පිහිටුවීමට ජනපති මැදිහත් විය යුතු බවය. මේ පිළිබඳව සාකච්ඡා කිරීමට වාසුදේව නානායක්කාර මහතා ජනපති හමුවන බවද ඒකාබද්ධ විපක්ෂ කණ්ඩායම් රැස්වීමකදී සඳහන් කර තිබුණි. ඒ අනුව වාසුදේව නානායක්කාර, දිනේෂ් ගුණවර්ධන හා ජනාධිපති මෛත්‍රීපාල සිරිසේන අතර විටින් විට ඇති වූ දුරකථන සංවාදවලදී ආණ්ඩු පෙරළියක සුබ නිමිති පහළ වුවද ඒ කිසිවක් හෙළිදරව් නොකර ඉන්නට ඔවුහු වග බලා ගත්තෝය.

මේ අතර ආණ්ඩුවෙන් ඉවත්ව ඒකාබද්ධ විපක්ෂයට එක් වූ මන්ත්‍රීවරු 16 දෙනාගෙන් එක් අයෙකු සතියක් ගත වන්නටත් කලින්  නැවත ස්වාධීන විය. ඉතිරි 15 දෙනාගෙන්ද හතර දෙනෙකු හැර අනෙක් අය මෛත්‍රී - මහින්ද එකතු කිරීමේ මෙහෙයුමෙන් හති වැටී සිටියහ. එහෙත් එස්. බි. දිසානායක, ඩිලාන් පෙරේරා, තිලංග සුමතිපාල හා ලක්ෂ්මන් වසන්ත යන මන්ත්‍රීවරු මහින්ද - මෛත්‍රී එකතුව කෙසේ හෝ සිදුවිය යුතු බවට අධිෂ්ඨානයෙන් මෙහෙයුම දියත් කළහ. “ඔයාලා අපි දෙන්නා එකතු කරලා නව ආණ්ඩුවක් හදන්න උත්සහ කරන එක හොඳයි. නමුත් ‍පොදුජන පෙරමුණේ නිර්මාතෘ බැසිල් රාජපක්ෂ මේ වැඩේට කැමති කරවා ගන්නෙ නැතුව ඕක හරි යන්නෙ නෑ.” මෛත්‍රීපාල සිරිසේන ජනපති වරක් එස්.බි., ඩිලාන් හා තිලංග හමු වූ අවස්ථාවක සඳහන් කර තිබුණි. ඒ අනුව බැසිල් රාජපක්ෂ මහතා මෙම වැඩ පිළිවෙළට එකඟ කරවා ගැනීම මහින්ද රාජපක්ෂ හිටපු ජනපතිට පැවැරිණ. ඒ වන විට විදෙස්ගතව සිටි බැසිල් රාජපක්ෂ වහා කැඳවා ගත් මහින්ද රාජපක්ෂ ඔහුට අලුත් දේශපාලන ප්‍රවණතාව  ගැන දැන්වීය.” මට නම් මෛත්‍රීපාල ජනපති විශ්වාස කරන්න බෑ. මතෛක් ඔහු කටයුතු කර තිබෙන්නෙ අපි ප්‍රතික්ෂේප කරලා. අනෙක ශ්‍රී ලංකා ‍පොදු ජන පෙරමුණ  වටා රටේම ජනතාව ඒක රාශී වෙද්දී අපි මොකටද මේ ටික කාලයට හවුල් ආණ්ඩු හදන්නේ?” බැසිල් රාජපක්ෂ හවුල් ආණ්ඩුව ගැන තම නොසතුට පළ කළේ එසේය. “යූඑන්පී එක රටම විනාශ කරනවා. සිරිසේන ජනපතිගේ අතපය බැඳලා රනිල් වික්‍රමසිංහ ඔහු ගේ කණ්ඩායම සමග රටට කරන විනාශය නවත්වන්න අපි මොනවා හරි කරන්න ඕනේ. ඔයා “එස්.බි.ට කතා කරලා වැඩ පිළිවෙළක් හදන්න.” මහින්ද රාජපක්ෂ බැසිල්ට කීවේය.

මේ අනුව බැසිල්, එස්.බි., ඩිලාන්, තිලංග අතර සාකච්ඡාවක් පැවැති අතර එහිදී තීරණය වුණේ මෛත්‍රීපාල ජනපති හා මහින්ද රාජපක්ෂ, බැසිල් රාජපක්ෂ හමු වීමටය. මෙම හමුවීම සඳහා එස්.බි. ගේ නිවසේ  ඉහළ මහලය සූදානම් කෙරුණේ ඒ අනුවය. මෙම සාකච්ඡාවට මෙම පිරිස සහභාගි වූයේද කිසිවකුටත් හඳුනාගත නොහැකි උපක්‍රම පාවිච්චි කරමිනි. මෙම හමුව ඒකාබද්ධ විපක්ෂයේ හෝ ආණ්ඩුව නියෝජනය කළ එජනිස මන්ත්‍රීවරුන්ද  දැන සිටියේ නැත. මෙම තීරණාත්මක සාකච්ඡාව අනුව ඊළඟ කටයුතු සංවිධානය විය. ඉකුත් සිකුරාදා පෙරවරුවේ සිරිසේන ජනපති මහින්ද අමරවීර කැඳවා සඳහන් කළේ එජනිසය ආණ්ඩුවෙන් ඉවත් වීමට අදාළ ලිපිය සකස් කර කථානායකට යවන ලෙසය. “අපි තව දුරටත් ආණ්ඩුවේ ඉන්න ඕනේ නෑ. මේ විදියට ආණ්ඩුවක් කරලා රටත් ජනතාවත් අමාරුවේ දාන්න බෑ. මම අපේම ආණ්ඩුවක් හදන්න කටයුතු සූදානම් කරලා තියෙනවා. ඔයා අපේ කණ්ඩායමට අද හවස මාව හමු වෙන්න කියන්න.” ජනාධිපති එජනිස සභාපති ලෙස එහි ‍ලේකම් මහින්ද අමරවීරට එලෙස උපදෙස් දුන්නේය. මේ අතර ජනාධිපතිවරයා මහින්ද රාජපක්ෂ මහතාට දුරකථනයෙන් කතා කර එදිනම සවස අගමැති ධුරය බාර ගැනීමට පැමිණෙන ලෙස දැන්වීය. ජනපති කාර්යාලයේ අයෙකු ඒකාබද්ධ විපක්ෂයේ මන්ත්‍රීවරුන්ට දුරකථන ඇමතුමක් මගින්  දැනුම් දුන්නේය සර් අපි කතා කරන්නෙ ජනාධිපති කාර්යාලයෙන් අද සවස විශේෂ රැස්වීමකට ඔබ තුමාට එන්න කියල ජනාධිපතිතුමා දන්වන්න කියල කිව්වා යනුවෙනි.

මේ අනුව එජනිස මන්ත්‍රීවරුන් ජනාධිපති ‍ලේකම් කාර්යාලයට කැඳවා මේ රටේ 22 වන අගමැති ලෙස මහින්ද රාජපක්ෂ මහතා පත් කරන්නට සියලු කටයුතු සංවිධානය විය. එස්.බි., ඩිලාන්, තිලංග, ලක්ෂ්මන් වසන්ත ඇතුළු කීප දෙනෙක් එදින කලින්ම ගොස් ජනපති හමු වී එකී කටයුතු සංවිධානය කළහ. එදින වූ සිදුවීම ජනාධිපති මාධ්‍ය අංශය නව අගමැති දිවුරුම් දී විනාඩි 15ක් ඇතුළත මාධ්‍ය වෙත නිකුත් කළේය. විද්‍යුත් මාධ්‍ය ආයතනවල එම ප්‍රවෘත්තිය “බේ්‍රකින් නිව්ස්” ලෙස ප්‍රකාශයට පත් වීමත් සමග පෙර සූදානමක් නොතිබූ නමුත් රටපුරා ගම්දනව්වල රතිඤ්ඤා හඬ ගිඟුරුම් දුන්නේය.

මේ සිද්ධියෙන් වඩාත් කලබලයට පත් වූයේ එජාපයයි. ඔවුන්ට අනපේක්ෂිත ලෙස රනිල් වික්‍රමසිංහ අගමැති ධුරයෙන් පහ කිරීම ඉවසුම් නොදෙන්නක් විය. “එස්.බි.ලා ආණ්ඩුවෙන් එළියට යන විට මම හිතුවා මොකක් හරි ගුලියක් අඹරයි කියලා” මංගල සමරවීර තමා ළඟ සිටි අයට කීවේ අනුර බණ්ඩාරනායක පස්සට තල්ලු කර චන්ද්‍රිකා මහත්මිය ඉදිරියට ගෙනෙන මෙහෙයුම ගැන ඔහුට අත්දැකීම් තිබූ නිසාය.  සිද්ධිය සැල වූ වහාම මාධ්‍ය හමුවක් කැඳවූ එජාපය මෛත්‍රීපාල සිරිසේන ජනපතිගේ ක්‍රියාව ව්‍යවස්ථාවට හා නීතියට පටහැනි බව කීවේය. ඉකුත් සිකුරාදා සිට මේ දක්වා එජාපය පවත්වා ඇති මාධ්‍ය හමු සංඛ්‍යාව සියයකට ආසන්නය.  (29දා) පමණක් මාධ්‍ය හමු නවයක් පවත්වා ඇති බවද සඳහන්ය. සිද්ධිය සැලවීමත් සමග මලික් සමරවික්‍රම සිංගප්පූරුවට ගොස් ඇති අතර එජාප මන්ත්‍රීවරු කීප දෙනෙකු රනිල් වික්‍රමසිංහ එජාප නායකයා මග හැර විදේශ ගතව ඇති බවද දැන ගන්නට ඇත. සිදුවීමෙන් කම්පනයට පත්ව සිටින මංගල, හරීන්, රහුමාන් ඇතුළු මන්ත්‍රීවරු කීප දෙනෙකු ඉතාමත් පහත් අයුරින් රටේ නායකයාට පරිභව කරමින් ප්‍රසිද්ධ ප්‍රකාශ නිකුත් කරන ආකාරයක්ද දක්නට ලැබුණි. රනිල් වික්‍රමසිංහ සෑම විටම  විදේශ බලපෑම් අනුමත කරමින් ඒ ගැන විශ්වාසයෙන් යුතුව කටයුතු කිරීම වඩාත් තහවුරු කර ගැනීමටද මෙම සිද්ධිය හේතුවක්  වී ඇත. මහින්ද රාජපක්ෂ අගමැති ධුරයේ දිවුරුම් දීම ව්‍යවස්ථාවට පටහැනි බව ඔහු තෝරා ගත් බටහිර රටවල් නියෝජනය කරන තානාපතිවරුන් ගෙන්වා දැනුම් දුන්නේය. එමෙන්ම මෙම තත්ත්වය තුළ තම පාක්ෂිකයන් වේදනාවෙන් සිටින නිසා ඇති විය හැකි සාමය කඩකිරීම් වලක්වා ගැනීමට එක්සත් ජාතීන්ගේ සාම සාධක හමුදා ශ්‍රී ලංකාවට එවන ලෙසද රනිල්  වික්‍රමසිංහ අදාළ බලධාරීන්ගෙන් ඉල්ලා ඇත.

කෙසේ වුවද නව ආණ්ඩුව හා එහි ඇති ව්‍යවස්ථානුකූල තත්ත්වය පිළිබඳ විදෙස් වල සිටින ශ්‍රී ලංකා තානාපතිවරුන් මගින් එරට රාජ්‍ය නායකයන් දැනුවත් කිරීමටද සිරිසේන ජනපති පියවර ගෙන ඇත. එනිසා රනිල් වික්‍රමසිංහ මහතා අපේක්ෂා කළ විදෙස් බලපෑම්ද එතරම්ම බලවත් ලෙස ඉදිරිපත් වී නැත.

කෙසේ වුවද මෙම සිදුවීමත් සමග ජනාධිපතිවරයා සිය බලය පාවිච්චි කරමින් පාර්ලිමේන්තුවේ වාරය අවසන් කර නොවැම්බර් 16 දින දක්වා පාර්ලිමේන්තුව කල් තැබිම ගැන විවේචනයක් එල්ල වෙමින් පවතී. කථානායක කරු ජයසූරිය මෙම තත්ත්වය ගැන මහනායක හිමිවරුන් දැනුවත් කිරීමටද පියවර ගෙන තිබුණි. එජාප නායක රනිල් වික්‍රමසිංහ පාර්ලිමේන්තු බහුතරය ඔහුට තිබෙන බවට සඳහන් කරන නමුත් ඔහුට සහය දීමට එකඟ වී සිටි විජයදාස රාජපක්ෂ, ඩග්ලස් දේවානන්ද, ආනන්ද අලුත්ගමගේ, අරුමුගන් තොණ්ඩමන්, වසන්ත සේනානායක, වඩිවේල් සුරේෂ් සහ දුනේෂ් ගන්කන්ද යන මන්ත්‍රීවරුන් හත් දෙනා අලුත් ආණ්ඩුවේ ඇමැතිධුරද බාර ගෙන ඇත. මේ අනුව ලබන සතියේ  පාර්ලිමේන්තුව කැඳවුවද මහින්ද රාජපක්ෂ මහතාට නව රජය පිහිටුවීමට බහුතරය ඇති බව වාසුදේව නානායක්කාර මහතා සඳහන් කළේය. “අපි තීරණයක් අරගෙන තියෙන්නෙ. ඒකාබද්ධ විපක්ෂයේ අපි ඇමතිධුර බාර ගන්නේ ඉඩ කඩ තිබුණොත් පමණයි. නව ආණ්ඩුවට එකතු වන එජාපයේ අයට අමාත්‍යධුර දෙන්න තමයි අපේ එකඟතාවය. අපි මේ රට වෙනුවෙන් ඒ කැපවීම කරනවා. අපි තව දුරටත් මන්ත්‍රීවරුන් විදියට මේ රටේ අර්බුද ජය ගන්න කටයුතු කරනවා යැයිද නානායක්කාර මන්ත්‍රීවරයා සඳහන් කළේය.

ජයසූරිය උඩුකුඹුර

Page 4 of 9

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.