lakbima.lk

එදු ගෙවීම පොදු යහපතට බව අඟවන වත්මන් ආණ්ඩුව සෑම පුරවැසියෙකුම බලහත්කාරයෙන් සෘජු බදු ගෙවන තැනට තල්ලූ කරන්නට වෑයම් කරමින් සිටී. ශ‍්‍රී ලංකා මහ බැංකුවේ අධිපතිවරයාට අනුව දරිද්‍රතාව මනින ජාත්‍යන්තර මිණුම් දණ්ඩ වෙනස් වී තිබේ. එයට සාපේක්ෂව ශ‍්‍රී ලංකාවේ දුප්පත් ජන කොටස ඉහළ යන්නට ඉඩ ඇත. රට දුප්පත් තැනකය. එවැනි පසුබිමක තිබියදී රජයේ ආදායම් බදු දෙපාර්තමේන්තුව වාහනයක් පාවිච්චි කරන්නට පුළුවන්කම ඇති සහ විනෝදයට විදේශ සංචාරයෙහි යෙදෙන සෑම පුද්ගලයකුම නියත බදු ගෙවන්නන් බවට පත් කරන්නට සූදානම් වන බව දක්වයි. කැමැත්තෙන් බදු ලිපි ගොනුවක් ඇරඹීම සුදුසු බව සඳහන් කරන රජයේ ආදායම් බදු කොමසාරිස්වරයා එය ප‍්‍රමාද කළහොත් ධනය උපයා ගත් ආකාරය ප‍්‍රශ්න කරන්නට සිදුවිය හැකි  බවටද අනතුරු අඟවයි. එය පුරවැසියන්ට කරන තර්ජනයකි. ජනතාවගේ ගෙලට ආයුධයක් තබා බදු ගෙවන සේ බල කරන තරමට ආණ්ඩුව දුබල තැනකට පත්වීම කනගාටුදායකය. පසුගිය ආණ්ඩුවේ හදිසියේ ධනවත්ව, වත්කම් හෙළි නොකරන ලද මැති ඇමැතිවරු අධිකරණයෙන් නියම කළ රුපියල් දහසක දඩය ගෙවා පිටව යන අයුරු ඉකුත් දිනවල මාධ්‍ය වාර්තා කළේය. බලය හා ධනය ඇති පිරිස කොටු නොකරන බදු නිලධාරීන් සාමාන්‍ය ජනතාව පීඩනයට පත් කරන බව පෙනේ.

සම්මුති ආණ්ඩුව බලයට පත් වූයේ රැකී රක්ෂා දස ලක්ෂයක් යන සැලැස්ම සහිතවය. රට දියුණු කර ජනතා අපේක්ෂා සාක්ෂාත් කරන බව දේශපාලනඥයෝ පොරොන්දු දුන්හ. වාහනයක් මිල දී ගැනීමට හැකි පසුබිමක් ඇති කරන බව ඇඟවීය. දැන් අගමැතිවරයා නියෝජනය කරන පක්‍ෂය පසුගිය මැතිවරණ සමයේදී රූපවාහිනියෙන් හා පුවත්පත්වල පළ කළ දැන්වීමක් මෙහිදී සිහියට නැගෙයි. එ් යතුරුපැදියකින් යන තරුණ යුවළකි. අතරමගදී වැස්සට හසුවන ඔවුන්ගේ අපේක්‍ෂාව එළැඹෙන නව රජයක් යටතේ වාහනයක් ගැනීමයි. එසේම වත්මන් අගමැතිවරයා එදා කියා සිටියේ තම පාලනයක් යටතේ මෝටර් සයිකලයෙන් යන අයට පුංචි කාරයක් ගත හැකි ආර්ථිකයක් රටේ සකස් කරන බවයි. එ්ත් බලයට පත් දේශපාලනඥයෝ වේදිකාවේ දී කියා සිටි දේ ඉක්මනින් අමතක කළෝය. වාහන බදු වැඩි කර සාමාන්‍ය මිනිහෙකුට වාහනයක් අයිතිකර ගැනීම දුෂ්කර තැනකට පත් කරන ලද වත්මන් ආණ්ඩුව ඉතා මහන්සියෙන් වාහනයක් මිල දී ගත් මැදි ආදායම් මට්ටමේ ජන කොටස අසරණ කරන්නට තැත් කරන බවකි දැන් පෙනෙන්නේ. සෑම පුරවැසියෙකුටම බදු අංකයක් නිකුත් කරන බව පසුගිය වසරේ දී අනාවරණය විය. එයට බලවත් විරෝධයක් මතු  විය. එළවළුවක්, පොල් ගෙඩියක් මිල දී ගැනීමත් ප‍්‍රශ්නයක් වී ඇති ජන කොටසකට කැමැත්තෙන් පැමිණ බදු ලිපිගොනු අරඹන්නැයි යෝජනා කිරීම අපූරු විහිළුවකි. බහුතර ජනතාවකට බදු ගෙවන්නට හැකියාවක් නැත. රජයේ සේවය කරන පිරිස දිනපතා කරන විරෝධතා ඔවුන්ට ජීවත් වීමට ඇති අපහසුව පෙන්වයි. පෞද්ගලික අංශයේ සේවකයන්ට වැඩ වර්ජන නැත. විරෝධය පළ  කළහොත් රැුකියාව අහිමි වෙයි. නිහ`ඩව සියලූ අතවර විඳීන පෞද්ගලික අංශයේ සේවකයන් වැඩිම ආදායම් උපයන පිරිසක් යැයි තක්සේරු කළ යුතු නැත. රජයේ සේවකයන් බදුවලින් නිදහස් කරන ආණ්ඩුව පෞද්ගලික අංශය හා ව්‍යවසායකයන් වටා බදු දැල එළන්නේ පසුබිම තේරුම් ගැනීමෙන් තොරවය.

1995 වසරේ දී රටට මෙරට දළ දේශීය නිෂ්පාදිතයේ ප‍්‍රතිශතයක් වශයෙන් සියයට 20.4ක බදු ආදායමක් උපයා ගත හැකි වී ඇති බව මහ බැංකු වාර්තා පෙන්වයි. 2015 වන විට රජයේ බදු ආදායම දළ දේශීය නිෂ්පාදිතයේ ප‍්‍රතිශතයක් වශයෙන් සලකන විට සියයට 10.85 දක්වා පහතට වැටී තිබේ. එම බදු ප‍්‍රතිශතය සියයට 15-16 අතර ගණනක් දක්වා වැඩි කරගන්නා ලෙස රජයට උපදෙස් ලැබී ඇත. මෙම උපදෙස් දෙන ජාත්‍යන්තර මූල්‍ය අරමුදල ශ‍්‍රී ලංකාවේ වැසියන් ජීවත්වීමට කරන අරගලය ගැන කල්පනා කරන්නේ නැත. අධික ජීවන වියදමක හිරවී සිටින රටවැසියෝ කෙරෙහි  අවධානය යොමු නොකරන අතර ඉලක්කම්වලින් සංවර්ධනය මනින ආර්ථික විශේෂඥයෝ මෙරට ඉහළ යන රජයේ වියදම් ගැන සලකා තව තවත් බදු ලැබිය යුතු බව ඔප්පු කරමින් සිටිති.

රටේ ආදායම් බදු ලිපි ගොනු 694,000ක් පවත්වාගෙන යන බව නිල සංඛ්‍යා ලේඛනවල දැක්වෙයි. බදු ලිපි ගොනු ගණන ලක්ෂ දහ හතර දක්වා වැඩි කර ගැනීම ඉලක්කය බව අනාවරණය වෙයි. එවැනි ලිපිගොනු ප‍්‍රමාණයකින් විනා අපේක්ෂිත බදු ඉලක්ක සාර්ථක කරගත නොහැකිය. යමක් කමක් ඇති උත්සාහවන්ත සියලූ දෙනා කොටු කරගැනීම ආදායම් බදු දෙපාර්තමේන්තුවේ පරමාර්ථයයි. බදු ගෙවිය යුතු බව තීරණය කර පුදුම නිර්නායක දෙකක් දෙපාර්තමේන්තුව හෙළි කර ඇති අතර එය ආණ්ඩුවේ වගකිව යුතු අංශවල පුළුල් අවධානයට ලක් විය යුතුය.

අලූත් බදු නිර්නායක අතරින් එකක් වාහනයක් නඩත්තු කරන පිරිස බව දැක්වෙයි. මෙරට පොදු ජනතාව වාහනයක් මිල දී ගන්නේ ආසාවකට නොවේ. රටේ පවතින පොදු ප‍්‍රවාහනය අතිශය දුර්වල නිසාය. අනෙක මෙරට සදාචාරාත්මක පරිහානියයි. ලෝක බැංකුව පසුගිය වසරේ අග අනාවරණය කරන ලද වාර්තාවකට අනුව පොදු ප‍්‍රවාහන සේවාවල ගමන් කරන කාන්තාවන් අතරින් සියයට අනූවක් ලිංගික හිංසනවලට ලක් වෙති. අතවර දරා ගත නොහැකි කාන්තාවෝ වැඩට පැමිණීම අත්හරින අතර එහි ප‍්‍රතිඵලයක් ලෙස 2010 -16 කාලය තුළ කාන්තා ශ‍්‍රම බලකාය සියයට පහකින් පහත වැටී තිබේ. සෑම ස්වාමි පුරුෂයෙකුම තම පවුලේ කාන්තා පාර්ශවයේ යහපත සලකා ක‍්‍රියා කරයි. ලීසිං සමාගම්වලට ණය ගෙවමින් වාහනයක් ගන්නේ ආඩම්බරයකින් නොවේ. ආණ්ඩුව පනවන අතිවිශාල බදු ප‍්‍රතිශත නිසා වාහන මිල දෙගුණ තෙගුණ වී තිබේ. බදු ගෙවා ගත් වාහනය නඩත්තුවට වාර්ෂික ආදායම් බලපත‍්‍ර, මාර්ග හා දුම් සහතික බදු ගෙවන අතරවාරයේ එම වාහනය නඩත්තුව වෙනුවෙන් ආදායම් බදු ගෙවීම යුක්ති සහගත නැත. බදු රහිත සුඛෝපභෝගී වාහන දෙක තුන පාවිච්චි කරන මැති ඇමැතිවරුන්ට හා රජයේ නිලධාරීන්ට මෙකී යථාර්ථය වැටහෙන්නේ නැත.

විදේශ සංචාර අනෙක් කාරණයයි. මැදි ආදායම් ජන කොටසට ශ‍්‍රී ලංකාවේ හෝටලයක දවසක් දෙකක් ගත කිරීම පහසු නැත. මෙරට තරු හෝටලයක විවේකය ගත කරන පවුල් සොයා බලා බදු අය කිරීමට හැකි නම් එය සාධාරණය. හේතුව මෙරට හෝටල් කාමරවල අධික මිල ගණන්ය. සංචාරක පාරාදිසයක් වන මාලදිවයිනේ හෝටල් ගාස්තු මෙරට සාපේක්ෂව අඩුය. විදේශ සංචාරවලට පිටත්ව යන මෙරට වැසියන්ගෙන් බහුතරයක් තායිලන්තය, මලයාසියාව හෝ පිලිපීනයට යන බව සමීක්ෂණයක් කළහොත් ඔප්පු වනු ඇත. අඩුම තරමින් ඉන්දියාවට වත් යන්නට අදහස් නොකරන මෙම පිරිස මුලින් සඳහන් කරන අඩු මිල වියදම් සංචාර තෝරා ගන්නේ මෙරට හෝටල්වලටත් වඩා අඩු මිලකින් දින කිහිපයක් ගත කළහැකි හෙයින් බව ආණ්ඩුවේ බලධාරීන් තේරුම් ගත යුතුය. සංචාරක හෝටල්වලට අධික බදු පනවා දේශීය සංචාරකයන්ට ඇතුළු විය නොහැකි තැනට පත් කර ඇති ආණ්ඩුව කෙසේ හෝ මුදලක් සොයාගෙන විදේශ සංචාරයකට අවස්ථාව පාදා ගන්නා ජන කොටස ද දුර්මුඛ කරන බව පෙනේ.

ඉතාම ලෙහෙසියන් අති විශාල මුදල් උපයාගන්නා අලූත් උපාය මාර්ග රට පුරා හැදී තිබේ. ඒවායේ ගනුදෙනු සිදුවන්නේ බැංකු පොත් හරහා නොවේ. වාහන මිල දී ගන්නේ නැත. විදේශ සංචාරවල යෙදෙන්නේ විනෝදයට නොවේ. වංචාවෙන්, ¥ෂණයෙන් අති විශාල ධනයක් උපයා ගත් ආණ්ඩුවල හිතෛශීහු ඒවා මෙරට තැන්පත් කරන්නේ නැත. ස්විස් ගිණුම්වල නම සඳහන්ව ඇති ලාංකිකයන් ගැන තොරතුරු අනාවරණය නොවීම එහි එක පැත්තකි. මෙරට දේශපාලන පක්ෂවලට මුදල් යොදවන කළු ආර්ථිකය එහි අනෙක් පැත්තයි. අද වන විට රට පුරා විශාල ආන්දෝලනයක් මතුවී ඇති මහා පරිමාණ වංචා පිළිබඳ සිද්ධි දෙස බලන විට දේශීය ආදායම් බදු දෙපාර්තමේන්තුව කොපමණ අසරණ ආයතනයක්ද යන්න මැනැවින් තහවුරු වෙයි. දුප්පත් ජනතාවගේ වාහන නඩත්තුව ගැන සොයා බලන්නට පෙර මෙරට ආර්ථිකයේ කළු හා සුදු බව ගැන නිශ්චිත ගණන් ගැනීමක් අවශ්‍ය බව මතක් කරන්නට අවශ්‍යය. ආර්ථිකයේ පවතින අතිශය අපවිත‍්‍ර පැතිවලට හේතු සොයා ඒවාට විසඳුම් දිය යුතුය. පෞද්ගලික බදු අය කරනු වෙනුවට රට තුළ කර්මාන්ත හෝ ව්‍යාපාර කරන්නට පහසුව ඇති කර එයින් ආදායම් නංවා ගැනීමට පියවර ගැනීම සුදුසුය.”

ජී.කේ.ජී. සරත්

  1. විජයකලාට දඬුවම් දීමට පෙර ඇහුම්කන් දෙමු
  2. අබි හබිබීගේ ලිපිය මහින්දට කළ හදිය
  3. කොන්ද පණ නැති ආණ්ඩුවේ වැනෙන ආර්ථික ප්‍රතිපත්ති
  4. ආර්ථික ඝාතකයන්ගේ නව බදු ගිනි ගෙඩිය
  5. රුපියල බාල්දුව නවතින හැඩක් නෑ
  6. ඉලක්කම්වලින් අඩු කරන ජීවන වියදම
  7. මෛත්‍රීයි-මහින්දයි එක් වෙන්න බැරි නෑ - හිටපු අමාත්‍ය චන්දිම වීරක්කොඩි
  8. යුද්ධයේදී වැරදි කළ අයෙක් වෙත්නම් දඬුවම් දීම රට පාවාදීමක් නොවේ
  9. ආර්ථික ඝාතකයන්ගේ තෙල් මිල ප්‍රතිපත්ති
  10. ස්වභාවික විපත් මැද හිරවෙන ණය උගුල
  11. ළදරු කිරි බෝතල් පවා තහනම් කළ යුතුයි
  12. රවිගේ ඇමැති සිහිනයට ජනපති හරස් වෙයි
  13. එජාප-ශ්‍රීලනිප අර්බුදයට විසඳුම මැතිවරණයක් පමණයි
  14. ආර්ථික අර්බුදය ඔඩු දුවන ලකුණු
  15. කෝටි 47 අල්ලසේ මෙතෙක් හෙළි නොවූ සුල මුල මෙන්න
  16. මේ කැබිනට් සංශෝධනයත් විද්‍යාත්මක නැහැ
  17. ආර්ථික වර්ධන වේගය අපේක්ෂා කළාට වඩා අඩුයි
  18. රාජාසන කතාවෙන් පසු මැයි 08 දා ආණ්ඩුව ඉවරද?
  19. වෙසක් ‍පෝයත් මැයි දිනයත් එකට දා ගත්තේ අපි නොවේ - පාර්ලිමේන්තු මන්ත්‍රී ගාමිණී ලොකුගේ
  20. මේ ආණ්ඩුවේ වැඩපිළිවෙළ එළ හරකයි මී හරකයි වගේ
  21. රුපියල බාල්දු වීමෙන් එකපිට එක ගැටලු
  22. අවුරුදු කිරිබතටත් ලූනු මිරිස් පිටරටින්
  23. ආණ්ඩුවේ අලුත් බද්දෙන් ජනතාව හාන්සියි
  24. කොළඹ කොටස් වෙළෙඳ‍පොළට මොකද වුණේ?
  25. විශ්වාසභංගය මොකක්ද?

Page 1 of 71

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.