lakbima.lk

ඉමේෂාන් නෙල්ලිගහවත්ත රටේම කතාබහට ලක්වුණේ 'සිඳු' ටෙලි නාට්‍යයේ හේෂාන් විදියටයි. හේෂාන් සහ තෙරුණි (මනීෂා චංචලා) ඒ දවස්වල බොහෝ අයගේ කතාබහට ලක්වූ චරිත දෙකක්. ඒත් පස්සේ හැලෙන හේෂාන්ගේ චරිතය පේන්නෙම නැතුව ගියා. එම චරිතය තුළින් ඒ දවස්වල බොහෝ අයගේ කතාබහට ලක්වූ ඉමේෂාන් තුළත් පසුගිය කාලයේ දකින්න ලැබුණේ ලොකු නිහැඩියාවක්. ඊට හේතුව කුමක්ද? අපි ඉමේෂාන්ගෙන්ම ඒ ගැන විමසා සිටියා.

සිඳු ටෙලි නාට්‍යයේ කාලයක් කතාබහට ලක්වූ ඉමේෂාන් නිහඬ වෙලාද?

නිහඬ නැහැ. සිඳු ටෙලි නාට්‍යයෙන් පසු ටෙලි නාට්‍ය හතරකට සම්බන්ධ වුණා. පීකේ, කාසි, පූරි කියන ටෙලි නාට්‍යය ඒ අතර වෙනවා. මේ දවස්වල ශ්‍රී සිද්ධාර්ථ ගෞතම චිත්‍රපටයේ  චන්න ඇමැතිගේ තරුණ කාලය සඳහා රංගනයෙන් දායකවීමට සූදානමින් සිටිනවා. ඒ නිසා ජිම් එකට ගිහින් ඇඟ හදාගන්න තමයි මේ දවස්වල වැඩි කාලයක් ගත කරන්නේ.

ඉමේෂාන්ට වැඩි ප්‍රේක්ෂක ආකර්ෂණයක් හිමිවුණේ සිඳු ටෙලි නාට්‍යයෙන් කිව්වත් ඔබ එය පිළිගන්නවාද?

අනිවාර්යයෙන්ම පිළිගන්නවා. සිඳු විකාශය වන දවස්වල තමයි හැමෝම මා ගැන කතා කරන්න පටන් ගත්තේ. ඒකට හේතු කීපයක් තියෙනවා.  සිඳු එක රැයින් අතිශය ජනප්‍රියත්වයට පත්වූ නාට්‍යයක්. ඒ දවස්වල ලංකාවේ ඉහළම ජනප්‍රියත්වය ලැබූ නාට්‍යය වුණේත් සිඳු.... ඒත් එක්ක හේෂාන්-තෙරුණි චරිත දෙක ගැනත් හැමෝම කතා කළා.

නමුත් හේෂාන් දැන් සිඳු නාට්‍යයේ නැහැ?

මම නාට්‍යයට සම්බන්ධ වුණේ කොටස් විසි ගණන්වලදී. කොටස් 115ක් විතර මම හිටියා. ඉන් පසුව තමයි මගේ චරිතය ඉවත් වුණේ.

ඇයි එහෙම වුණේ?

හේෂාන්, තෙරුණිගේ තාත්තා, සංකේත් වික්‍රමගේ, හේෂාන්ගේ තාත්තා. යන චරිත තාවකාලිකව ඉවත් කරලා නාට්‍යය ගමට අරගෙන යන බව තමයි මට දැන්වුයේ.

ඒ කියන්නේ ඔබගේ චරිතය ඉවත් වුණේ තාවකාලිකව?

මුලදී මමත් හිතුවේ එහෙමයි. හේෂාන්, තෙරුණි සහ දිළුම් (යාෂ් මිහිරාන්) චරිත අතර තුන්කොන් ප්‍රේම කතාවක් ඉදිරියේ ඇතිවෙනවා කියලා තමයි මුලදී මටත් දැනුම් දීලා තිබුණේ. ඒ දවස්වල මමත් බලාගෙන හිටියා. ආයෙත් හේෂාන් සිඳු කතාවට එන්නේ කවද්ද කියලා. ඒත් දැන්නම් මට හිතෙන්නේ හේෂාන් ආයෙමත් සිඳු නාට්‍යයට එකතුවන්නේ නැහැ කියලයි.

ඔබ එහෙම හිතන්නේ ඇයි?

යම් යම් හේතු මත මට එහෙම හිතෙනවා.

යම් යම් දේ කිව්වේ?

විශ්වාස කටයුතු ආරංචි මාර්ගවලින් ආරංචි වූ යම් යම් දේ. ඒත් අපි ඔය ගැන ඔයට වඩා කතා කිරීම අවශ්‍ය නැහැ කියලයි මට හිතෙන්නේ.

ඉෂාන් කතා කරන්නේ කලකිරීමෙන්ද?

මට ලොකු ජනප්‍රියත්වයක් ලැබුණේ සිඳු නාට්‍යයේ හේෂාන්ගේ චරිත තුළින්. ඒ හින්දා මුලදී පුංචි දුකක් තිබුණා. ඒත් දැන් මට එක දිගට ටෙලි නාට්‍ය කීපයක්ම ලැබිලා තියෙනවා. ඒ හින්දා දැන්නම් දුකක්, කලකිරීමක් නැහැ.

මෙගා ටෙලි නාට්‍යවල හිටි හැටියේ නොසිතූ වෙනස්කම් වෙනවා. සිඳු නාට්‍යයට ඉදිරියේදී ආයෙම හේෂාන්ග් චරිතය එකතු වන බව ඔබට දැනුම් දුන්නොත්?

ටිකක් හිතලා බලලා තමයි තීරණයක් ගන්න වෙන්නේ.

ආරියවංශ කුලතිලක

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.