lakbima.lk

එළැඹෙන අලුත් අවුරුද්දේ වේදිකාවේ අලුත් වැඩක් කරන්න උමයංගනා මේ දිනවල නිදිමරාගෙන මහන්සි වෙනවා කියලා ආරංචියි ?

ඔව්, ඒ ආරංචිය ඇත්ත. චාමික හත්ලහවත්තගේ බෝම්බයක් ඉතුරුයි කියන අලුත්ම වේදිකා නාට්‍යය ලබන ජනවාරි 13 සහ 14 දිනවල රාත්‍රී 7.00ට ලයනල් වෙන්ඩ්ට් රඟහ‍ලේදී මුල්වරට වේදිකාගත වෙනවා. මටත් ඒ නාට්‍යයේ ප්‍රධාන චරිතයක් ලැබිලයි තියෙන්නේ. අපි මේ දවස්වල ඒ වෙනුවෙන් පාන්දර වෙනතුරුත් රිහසල් කරනවා.

කොහොමවුණත් මේ දවස්වල ඔබ ගැන ප්‍රේක්ෂකයන් වැඩිපුර කතාබහ කරන්නේ ඔබේ වේදිකා නාට්‍යය රංගනයට වඩා ටෙලි නාට්‍ය රංගනය ගැනයි කීවොත් හරි නේද?

ඒක එහෙම වෙලා තියෙන්නේ ෙතේ‍රලෝකා ටෙලි නාට්‍යය නිසා වෙන්න ඇති. ඔව්, ඒ ටෙලි නාට්‍යය තවමත් විකාශය වෙලා තියෙන්නේ කොටස් කිහිපයක් පමණක් වුණත්, ඉතාම හොඳ ප්‍රතිචාර ඊට ප්‍රේක්ෂකයන්ගෙන් දැනටමත් ලැබෙමින් පවතිනවා.

ඔබ ත්‍රෛලෝකාට දායක වෙන්න ලැබුණු ආරාධනාව භාරගත්තේ ඇයි කියන එක ගැනත් කියමු නේද?

ත්‍රෛලෝකා කියන්නේ චාමර රණසූරියගේ තිරපිටපතකට අනුව නිර්මාණය වෙන ටෙලි නාට්‍යයක්. ඔහු ඉතා දක්ෂ පිටපත් රචකයෙක්. ජාතීන් කිහිපයකට අයත් ජනතාව බොහොම සමගියෙන් ජීවත්වන ගමක් තමයි මෙහි කතාවට පසුබිම් වෙන්නේ. මම විශ්වාස කරන දෙයක් තමයි විවිධ ජාතීන් අනුව බෙදෙන්න කලින්, අපි හැමෝම අයත් වන්නේ මනුස්ස ජාතියටයි කියන කාරණය අපි වටහා ගත යුතු බව. ඉතින් ඒ ගැන කියැවෙන ලස්සන කතාවක් තමයි ත්‍රෛලෝකා ටෙලි නාට්‍යයෙන් දිගහැරෙන්නේ. ප්‍රදීප් ධර්මදාස කියන්නෙත් බොහොම දක්ෂ විදියට නළු නිළියන් හසුරුවමින් ටෙලි නිර්මාණ බිහිකරන අධ්‍යක්ෂවරයෙක්. ඉතින් ඔය කියන හේතු කාරණා එක්ක බලලා මේ ටෙලි නාට්‍යයේ දිල්රුක්ෂිකාගේ චරිතය රඟපාන්න ලැබුණු ආරාධනාව භාරගත් එක හොඳයි කියලා අද මට හිතෙනවා.

ඔබේ ගමන දිහා බලද්දී, දැන් ඔබ යන්නේ මෙගා ටෙලි නාට්‍ය ප්‍රතික්‍ෂේප කරමින් යන ගමනක් වගෙයි පේන්නේ?

දීර්ඝ ටෙලි නාට්‍ය ගැන කිසිම විරෝධයක් මට නැහැ. මමත් දීර්ඝ ටෙලි නාට්‍යයවල රඟපාලා තියෙනවා. අපේ ප්‍රේක්ෂකයන් දීර්ඝ ටෙලි නාට්‍යවලට දැන් ඇබ්බැහි වෙලයි ඉන්නේ කියලා මතයකුත් තියෙනවානේ. ඒ වුණාට කූඹියෝ වගේ ටෙලි නාට්‍යවල ජනප්‍රියත්වයත් එක්ක ඒ මතය බොරුවක් කියලා ඔප්පු වුණා. මට හිතෙන විදිහට ටෙලි නාට්‍යය දීර්ඝද නැද්ද කියන කාරණයට වඩා හොඳ තිරපිටපත් නැතිකමයි අද විශාලම ගැටලුව බවට පත්වෙලා තියෙන්නේ. මම වෘත්තීය රංගන ශිල්පිනියක්. ලැබෙන නිර්මාණය මොකක් වුණත්, නළු නිළියන් විදිහට අපි ඊට උපරිම සාධාරණය ඉටුකළ යුතුයි කියන ස්ථාවරයේ තමයි මම ඉන්නේ.

උමයංගනාට වේදිකාවේ සහ පුංචි තිරයේ රංගනයත් සමබර කරගෙන ඉදිරිගමන යන්න පුළුවන් වේවිද?

හුඟක් අය මාව මුලින්ම හඳුනාගත්තේ ටෙලි නාට්‍යවලින් වුණාට මම මේ ගමන ආරම්භ කළේ වේදිකාවෙන්. ඒ නෙයිනගේ සූදුව වේදිකා නාට්‍යයේ ගායක කණ්ඩායමේ සාමාජිකාවක් විදිහට. ඒ ඇරඹුම මම කවදාවත් අමතක කරන්නේ නැහැ. මේ දිනවලත් රජා මං වහලා, මාරක ළිඳේ සවාරියක් සහ 361 කියන වේදිකා නාට්‍යයත් එක්ක මම රටපුරා යනවා. මට රංගනය ගැඹුරින් අතපත ගාන්න ලැබුණේ වේදිකාව නිසයි. වේදිකාව නිසා මගේ පෞද්ගලික මතයනුත් ජනතාව ඉදිරිපිටට ගේන්න මට අවස්ථාව ලැබෙනවා. හැබැයි එහෙම ලැබෙනවා කියලා මම පුංචි තිරය අමතක කරලා නැහැ. එළැඹෙන අලුත් අවුරද්දේ විකාශය වීමට නියමිත ටෙලි නාට්‍ය කිහිපයකින්ම ප්‍රේක්ෂකයන්ට මාව දැකබලා ගන්න පුළුවන්.

- කිෂාන් කනංකෙ

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.