lakbima.lk

තුමිඳු දොඩන්තැන්න කියන්නේ ශ‍්‍රී ලාංකේය රංගන අම්බරයට පායා ආ දිදුලන තරුවක් බව පසුගිය කාලයේ ඔහුගේ රංගන ප‍්‍රතිභාව දකිද්දී බොහෝ දෙනාට පැහැදිලි වූ කාරණයක්. වේදිකාව, ටෙලි නාට්‍ය පමණක් නොව සිනමාව තුළ ද ඔහුගේ රංග ප‍්‍රභාව පැතිර යන මොහොතක ඔහුගේ රංගනයෙන් ඔපවත් වුණු  නිදහසේ පියා ඞී. එස්. චිත‍්‍රපටයේ ප‍්‍රදර්ශන කටයුතුද මේ වනවිට ආරම්භ වෙලා.

නිදහසේ පියා ඞී.එස්. ප‍්‍රදර්ශනයට මුදා හැරලා. කොහොමද එ් වෙනුවෙන් ඔබට ලැබෙන ප‍්‍රතිචාර ?

චිත‍්‍රපටය මේ දිනවල ප‍්‍රදර්ශනය වීම ගැන සතුටුයි. ඉදිරියේදීත් මීට වඩා පේ‍්‍රක්ෂක ප‍්‍රතිචාර ලැබෙයි කියන විශ්වාසය මා තුළ තියෙනවා.

මේ චිත‍්‍රපටයේ ඔබේ රංගනය ගැන ඔබ සෑහීමකට පත්වෙනවාද?

මට රඟපාන්න ලැබුණේ ඞී.එස්. සේනානායක මහතාගේ තරුණ අවධිය. ඒ චරිතය හුඟක් විශේෂයි. මොකද අපි ඔහු ගැන ගොඩක් දන්නේ මැදිවියේ තොරතුරු. එ් නිසා තරුණ කාලයේදී එතුමා කොහොමද කියන එක වටහා ගන්න අමාරුයි. එක පැත්තකින් ඒ චරිතයට පණපොවන එක පහසුයි කියලා හිතෙනවා. තවත් පැත්තකින් අමාරුයි කියලත් හිතෙනවා. මොකද ඒ සෘජුවම ඔහුව අනුකරණය කරන්නට කලින් දන්නා ප‍්‍රතිරූපයක් නොමැති නිසා. කොහොම වුණත් ලැබුණු චරිතයට සාධාරණයක් කරන්න මම උපරිම මහන්සි ගත්තා. ඇත්තටම මෙවැනි ප‍්‍රකට දේශපාලන චරිතයක්, විශාල ප‍්‍රතිරූපයක් නැවත ප‍්‍රතිනිර්මාණය කිරීමට ලැබුණු එක ගැන මට හුඟක් සතුටුයි.

චිත‍්‍රපටය රූගත කරන මොහොතේ පටන් විවිධ හැලහැප්පීම්වලටත් මුහුණ දෙන්න සිදුවුණා. ඒ ගැන මොකද හිතෙන්නේ?

චිත‍්‍රපටය නිෂ්පාදනයේදී යම් යම් බාධක ඇතිවුණා. නමුත් ඒවා මම මගේ රංගනයට බාධාවක් කරගත්තේ නැහැ. මොකද මුල ඉඳලම චරිතය ගලාගෙන යන ආකාරය ගැන අදහසක් මට තිබුණා.

තුමිඳු කාලයක් තිස්සේ කලා ක්‍ෂේත‍්‍රයේ සිටින රංගන ශිල්පියෙක්. නමුත් අදටත් රටේ කතාබහට ලක්වෙන ‘කූඹියෝ’ ටෙලි නාට්‍යයේ ජෙහාන්ගේ චරිතයෙන් තමයි තුමිඳුගේ රංගන හැකියාව ගැන බොහෝ දෙනාගේ අවධානය යොමුවුණේ?

‘කුඹියෝ’ ටෙලි නාට්‍යය විකාශය වීමත් එක්ක බොහෝ අය මගේ රංගනය ආදරයෙන් වැළඳ ගත්තා. නමුත් කොහොමත් මම ටිකක් අඩුවෙන් රඟපාන කෙනෙක්. ‘කුඹියෝ’ වලින් පස්සේ ආරාධනා රැුසක් ලැබුණත් මම ‘සහෝදරයා’ ටෙලි නාට්‍ය පමණයි භාර ගත්තේ. මම නළුවෙක් වගේම වෘත්තියෙන් විශ්වවිද්‍යාල කථිකාචාර්යවරයෙක්. ඉතින් මගේ ඒ වැඩ කටයුතුත් එක්ක මගෙන් පවුලට ඉටුවිය යුතු යුතුකම් ඉටු කරන්නත් කාලය මම සොයාගන්න  ඕනේ.  ඒ නිසා රංගනය වෙනුවෙන්ම කාලය වැය නොකර හැකි සෑම මොහොතකම දරුවත් බිරිඳත් වෙනුවෙන් කාලයක් හොයන්නට මම උත්සාහ කරනවා.

එ් කියන්නේ පවුල් ජීවිතේදී හැමවිටම හොඳ සැමියෙක් සහ ආදරණීය පියෙක් වෙන්නද ඔබ උත්සාහ දරන්නේ?

මම හොඳ පියෙක්ද සැමියෙක්ද කියන එක දන්නේ මගේ බිරිඳ සහ දරුවා තමයි. මොකද මම අතිශය කාර්යබහුල චරිතයක්. කොහොම වුණත් මම මේ දවස්වල පියෙක් කියන ඒ සෙනෙහෙබර අත්දැකීම විඳිමින් ඉන්නවා. මේ ගමනේදී මගේ බිරිඳ කලණි මට ලබාදෙන සහයෝගය වචනයෙන් විස්තර කරන්න බැහැ.

කලණි කියන්නෙත් දක්‍ෂ රංගන ශිල්පිනියක් බව ඇය රඟපෑ ටෙලි නාට්‍යවලින් ඔප්පු වී තිබෙනවා’ මෙතෙක් කලක් කලණිගේ හැකියාව සඟවාගෙන හිටියේ ඇයි ?

කලණි හැකියාවන් සඟවාගෙන හිටියේ නැහැ. ඇය හැකියාවන් එක්ක වැඩ කරන්න පටන් ගත්තා. කොහොමත් කලණි කියන්නේ චිත‍්‍රකලා චිකිත්සිකාවක්. ඇයගේ වෘත්තිය රංගනය නෙවෙයි. නමුත් කලණි දැන් වසර හත අටක ඉඳලා වෙළෙඳ දැන්වීම් නිරූපිකාවක ලෙසත් කටයුතු කරනවා. ඉදිරියේ දීත් හොඳ නිර්මාණ ලැබුණොන් ඇයගේ හැකියාවන් දකින්නට ලැබේවි. කලණි රංගනයෙන් දායක වුණු ‘සිනෙමා’ චිත‍්‍රපටයේත්, කැමරා අධ්‍යක්ෂ පාලිත පෙරේරාගේ පළමු චිත‍්‍රපටයේත් වැඩ කටයුතු මේ වනවිට අවසන් වෙලයි තියෙන්නේ.

තමාරා කල්හාරි පතිරණ

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.