lakbima.lk

හදිසි අනතුරකින් මරණයට පත්වූ, සිය ආර්ථිකය ශක්තිමක් කර ගැනීම සඳහා කැපවූ මී එළදෙන නැවතත් මතු කිසිදු භවයක තිරිසන් ආත්මයක නොඉපදේවා, අකල් මරණයකට පත් නොවේවා යන ප‍්‍රාර්ථනයෙන් මහා සංඝරත්නය වෙත දානය පූජා කරමින් මිනිසකු සිදුකළ උතුම් පිංකමක් පිළිබඳව එප්පාවල එළිය දිවුල්වැවෙන් වාර්තා වෙයි.

එප්පාවල පොලිස් වසමේ එළියදිවුල්වැව, අක්කරවත්ත පදිංචි එම්. මහින්ද දිසානායක මහතා මෙම පුණ්‍යකර්මය සිදුකළ අතර කිරිගවයන් ඇති කරමින් ඒ මහතා ගොවිපොළක් පවත්වාගෙන යයි. මහින්ද දිසානායක මහතා තම ගොවිපොළේ ගවයන්ට දරුවන්ට මෙන්ම ආදරය කරමින් රැකබලා ගන්නා ගොවි මහතකු බව ඔහු සිදුකළ පුණ්‍යකර්මයෙන් මනාව පැහැදිලි විය.

තම පවුලට ආදායම් ලබා දෙන ගවයන් වෙනුවෙන් දවසේ වැඩි කාලයක් කැපකරන මහින්ද මහතාගේ ගැබ්බර මී දෙනක පසුගිය ජූලි මස 14 වැනි දින එප්පාවල එළියදිවුල්වැව ප‍්‍රදේශයේදී ලොරි රථයක ගැටී එම ස්ථානයේම මරණයට පත්වී තිබුණි.

මියගියේ තිරිසන් සතකු වූවත් මිනිසකු මළ පසුව අවසන් ගෞරව දක්වන ආකාරයෙන්ම සංඝයා වහන්සේලා වඩම්මවා පාංශු කූලය ලබාදී මියගිය මී ගවදෙනගේ අවසන් කටයුතු බෞද්ධ ආගමානූකූලව සිදුකර දින තුන හා සතිය (හත්දවස) දානය ලබා දෙමින් පසුගිය 14 දා හදිසි අනතුරෙන් මියගිය මී ගවදෙන වෙනුවෙන් පුණ්‍යානුමෝදනා සිදුකිරීමට මහින්ද මහතා කටයුතු කළේය.

පසුගිය 13 දා මහින්ද මහතාගේ නිවසේ ධර්ම දේශනයක් පවත්වා 14 දා එප්පාවල ගල්කන්ද පුරාණ රාජමහා විහාරස්ථානයෙන් ස්වාමීන් වහන්සේලා නිවසට වැඩමකරවා හීල් දානය හා පිරිකර පිළිගැන්වීම සිදුකෙරිණි. එහිදී අනුශාසනාවක් සිදු කරමින් ගල්කන්ද පුරාණ රාජමහා විහාරාධිපති රාජකීය පණ්ඩිත උපරතන හිමියන් කියා සිටියේ තිරිසන් සතකුට තිරිසනකු සේ සලකන්නේ නැතිව තම පවුලේ සාමාජිකයකු සේ සලකමින් මහින්ද මහතා සිදුකරන පිංකම් සමාජයට, රටට ආදර්ශයක් බවයි.

තම ජීවිතය වෙනුවෙන් කැප වූ මහලූ මව-පියාට බත් කටක් නොකවන දරුවන් සිටින සමාජයක තම දිවිසරි කර ගැනීමට පිහිටක් වූ ගවයකු වෙනුවෙන් දානයක් දීම තුළින් උතුම් මනුස්සකමක් පෙන්නුම් කර ඇති බව උන්වහන්සේ අනුශාසනාවේදී වැඩිදුරටත් පැවැසූහ.

බුද්ධික මහේෂ් විජේසූරිය - අනුරාධපුර

Page 1 of 55

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.