lakbima.lk

නාරි දේහ ලාලිත්‍යයේ අනන්‍යතා ලකුණ එදා අපේ පුරාණ කවීන් උපමා කළේ රණහංස යුවළකටය. ඒ සුන්දර ශරීරාංගය වන පියයුරු මව්කිරෙන් දරුවන් ‍පෝෂණය කරමින් මිනිස් සංහතියේ පැවැත්ම තහවුරු කිරීමට, සොඳුරු හැඩයක්  ඇති සිරුරකින් යුතුව දිවිගෙවීමට කාන්තාවන්ට ලබාදෙන ආශිර්වාදය අතිමහත්ය. නමුත් දැන් දැන් කාන්තාවන් සහ පියයුරු අතර තිබෙන මේ සුන්දර සබඳතාවය ගැන අසන්නට ලැබෙන තොරතුරු නම් අසුන්දර කතාන්දරයක් බවට පත්වෙමින් තිබේ. මුළු ලෝකයටම ප්‍රබල, සෞඛ්‍ය ගැටලුවක් බවට පත්ව තිබෙන පියයුරු පිළිකාව ගැන කතා කරන්නට සෑම වසරකම ඔක්තෝබර් මාසයම වෙන්කොට තිබෙන්නේ එනිසාමය.
පිළිකාව යන නම ඇසූ සැනින් කෙනෙකුගේ සිහියට එන අනෙක් වචනය මරණයයි. නමුත් මෙය මිථ්‍යාවකි. පිළිකා අතරින් 1/3ක් යහපත් හුරුපුරුදු වලින් වළක්වා ගත හැකිය. (උදා : - මත්පැන්, දුම්පානය, බුලත් සැපීම, ශරීරයේ බර පාලනය කරගෙන ක්‍රියාශීලී දිවි පෙවතකට හුරුවීම ආදියෙන්) තවත් 1/3ක් ඉක්මනින් හඳුනාගැනීම තුළින් නිසි ප්‍රතිකාර පද්ධතියකින් නිට්ටාවට සනීප කරගත හැකිය. පිළිකා නිසා ගැටලු මතුවන්නේත් කලින් හඳුනාගත නොහැකි වන්නේත් ඉතිරි 1/3 පමණය.
පියයුරු පිළිකාව අයත් වන්නේ මේ දෙවන වර්ගය වන කලින් හඳුනා ගැනීමෙන් නිට්ටාවට සුවකර ගත හැකි පිළිකා වර්ගයටය. කළ යුතු එකම දෙය නම් නිතරම ඔබේ පියයුරු ගැන සැලකිලිමත්ව පරීක්ෂාවෙන් කල්ගත කිරීමය. අවම තරමින් මාසයකට වරක්වත් ඇඟිලි තුඩුවලින් පියයුරු අතගා පරීක්ෂා කර බලන්න. පියයුරේ හැඩයේ වෙනසක් ගැටිත්තක්, පෙනුමේ වෙනසක් ඇතුළට ගිලා යාමක් පියයුරක දිගටම පවතින වේදනාවක් හෝ අපහසුතාවයක්. ගෙඩියක්, තනපුඩුවේ වෙනසක්, සමේ ඝනවීමක් හෝ ඕනෑම වෙනසක් ඇත්නම් හෙට නොව අදම ක්‍රියාත්මක වන්න. ඔබ පළාතේ “සුවනාරි” සායනයකින් “සුවදිවි” සායනයකින් හෝ ඕනෑම සායනික පුහුණුව ලත් වෛද්‍යවරයෙකු, හෙදියක පවුල් සෞඛ්‍ය සේවිකාවක ලවා පරීක්ෂා කරවා ගන්න. ඕනෑම රජයේ රෝහලකට ගොස් පරීක්ෂා කරවා ගත හැකිය. එසේම කොළඹ ජාතික රෝහ‍ලේ සෑම බ්‍රහස්පතින්දාවකම උදේ වරුවේ පැවැත්වෙන සුවනාරී සායනයට පැමිණ ඔබගේ අවශ්‍යතාවය පවසා පරීක්ෂාවන්ට ලක්විය හැක. එසේම නාරාහේන්පිට පිහිටා තිබෙන පිළිකා කලින් හඳුනාගැනීමේ මධ්‍යස්ථානයෙන්ද සායනික පරීක්ෂාවන් නොමි‍ලේ කරගත හැකිය. ඔබගේ පියයුරු ගැන මේ තරම් සැලකිලිමත් විය යුත්තේ ඇයිදැයි මේ තොරතුරු කියවීමෙන් වැටහී යනු ඇත.
“කාන්තාවන් අතර ව්‍යාප්ත වන පිළිකා අතුරින් ඉහළින්ම තිබෙන්නේ පියයුරු පිළිකාවන්ය. ලංකාවේ වසරකට අලුත් පියයුරු පිළිකා රෝගීන් 3000ක් පමණ හමුවෙයි. අපේ රටේ කාන්තාවන් 38 දෙනෙකුගෙන් එක් අයෙකුට පියයුරු පිළිකා වැලඳීමේ අවදානමක් ඇති බව සෞඛ්‍ය අංශ පවසයි. දවසකට අලුත් පියයුරු පිළිකා රෝගීන් 6-7ක් පමණ හමුවීම තුළම ඔබේ ජීවිතයට තිබෙන අවදානම හඳුනා ගන්න. මෙය ඉතා ඉක්මනින් පැතිරී ජීවිතයට අවදානමක් විය හැකි තත්ත්වයක් බැවින් වෙනසක් දුටු වහාම ඉක්මනින්ම වෛද්‍ය උපදෙස් කරා යොමු වන්න. ඔබේ ජීවිතය ඔබේ පවු‍ලේ අනාගතය, ප්‍රාර්ථනා බලා‍පොරොත්තු පියයුරු පිළිකාවකට විනාශ කරන්නට ඉඩ දීම මොන තරම් ඛිෙදවාචකයක්ද?
“අනේ අපිට ඕවා හැදෙන්නෙ නැහැ”
“ඕවා හැදෙන්න තරම් අපි පව් කරල නැහැ”
“අ‍පො කාටවත් ඔය වගේ ලෙඩ නම් හැදෙන්නෙ නැහැ”

ඔබත් මෙවැනි මිථ්‍යා මත දරන කෙනෙකු නම් ඉක්මනින්ම වෙනස්වන්න. මෙවැනි අදහස් දරන කාන්තාවන් ගැන ඔබ දන්නේ නම් ඒ අයවද එම තත්ත්වයෙන් මුදවා ගැනීමට උදව්වන්න. පිළිකා වැලඳෙන්නේ කරුමයක් නිසා නම් නොවේ. එය කරුමයක් වන්නේ සඟවාගෙන, ප්‍රතිකාර නොලබා සිටීමෙන් බව අමතක නොකළ යුතුය. ඔබ කාන්තාවක් වීමම පියයුරු පිළිකාවකට ගොදුරුවීමට තිබෙන අවදානමකි. එසේම පවු‍ලේ කෙනෙකුට පිළිකාව වැලඳී තිබෙන අය ජානමය හේතු නිසා වැඩි අවදානමක් දරයි. විවාහ නොවූ දරුවන් නොලැබූ දරුවන්ට නිසි කාලය තුළ මව්කිරි නොදුන්, වයස්ගත වූ අය වැනි අවදානම් සාධක බොහොමයකි. ඒ කෙසේ වෙතත් සෑම කාන්තාවක්ම තම පියයුරු ගැන අවධානයෙන් සිට වෙනසක් දුටු වහාම ප්‍රතිකාර සඳහා යොමුවීමට පිළිකාව නිසා ජීවිතය අනතුරකට ලක්වීම වැළැක්වීම සඳහා යහපත් පියවරකි.
මේ සඳහා ඇති එකම විසඳුම පිළිකාවක් තිබෙන බව කලින් හඳුනාගැනීමය. ස්වභාව ධර්මයා විසින් කාන්තාවන්ට එය හඳුනා ගැනීමට විශේෂ වරමක් ලබාදී තිබේ. පියයුරු ශරීරයෙන් පිටතට නෙරා පිහිටා තිබිමම එය හඳුනා ගැනීමට පහසු කරවන්නකි. හෙට නොව මේ දැන්ම ඔබේ පියයුරු අතගා බලන්න.
කිසියම් වෙනසක් තිබේ නම් ඉක්මනින්ම වෛද්‍ය උපදෙස් වෙත යොමු වන්න. ඉක්මනින්ම හඳුනාගත් තරමට ඔබට ඔබේ පියයුරු ආරක්ෂා කරගත හැකිය. අද පවතින අති නවීන ප්‍රතිකාර විධි හරහා පියයුරේ හැඩය, වෙනස් නොවන ආකාරයට එසේම ජීවිතයට හානියක් නොවන ලෙස අඩු මාත්‍රා වලින් යුතු ඖෂධ වලින් පිළිකාව නිට්ටාවටම සුවකර ගත හැකිය. නමුත් මේ සියලු වරප්‍රසාද ඔබට ලැබෙන්නේ ඔබ ඉක්මන් වන තරමට බවද සිහියේ තබා ගන්න.

ජාතික පිළිකා මර්දන වැඩසටහනේ
විශේෂඥ වෛද්‍ය
 නයනා ද අල්විස්,
විශේෂඥ වෛද්‍ය
සුරාජ් පෙරේරා
වෛද්‍ය
අසංග හේමරත්න
යන මහත්ම මහත්මීන්ට අපගේ ස්තූතිය.

සාකච්ඡා කළා
නිර්මලා
කුමාරි සේනාරත්න

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.