lakbima.lk

කුඩා දරුවන්ට බලපාන ප්‍රධාන සෞඛ්‍ය ගැටලු අතර ආහාර නිසා හටගන්නා විවිධ රෝගී තත්ත්වයන්ගේ සංඛ්‍යාත්මක වැඩිවීමක් දැන් දැන් ඉතා පැහැදිලිව දැකගන්නට පිළිවන. ආහාර විෂවීම්, අසාත්මිකතා, අජීර්ණ තත්ත්වයන්, අපත්‍යවීම් වැනි ගැටලු මේ තරම් සුලභවීමට ප්‍රබල ලෙස බලපා තිබෙන්නේ අපට ආවේණික වූ ආහාර රටාවෙන් ඈත්වීමය. මීට කලකට පෙර මේ ආකාරයේ ගැටලු අපට බලනොපෑවේ දේශීය ආහාර වර්ග පරිභෝජනයට හුරුව තිබූ නිසාවෙනි. දැන් සමාජය තුළ ඇතිව තිබෙන කෘත්‍රිම රස කාරක අඩංගු ක්ෂණික ආහාර වර්ග කලින් සකස් කරන ලද විදේශවලින් ආනයනය කරන ආහාර වර්ග, එළවළු, පලතුරු වර්ග මත යැපීමට හුරුවීම මේ ගැටලුවලට මුල්ව තිබේ.

කිසියම් මනුෂ්‍ය කොට්ඨාසයකට ගැළපෙන ගුණාංග අඩංගු ආහාර වර්ග ස්වභාව ධර්මයෙන්ම ඒ අය ජීවත්වන ප්‍රදේශ අවටම නිර්මාණය කොට තිබේ. ලෝකයේ ශීතල දේශගුණයක් සහිත කලාපවල වැවෙන එළවළු පලතුරු වර්ග ගැළපෙන්නේ ඒ ප්‍රදේශවල ජීවත්වන අයට මිස, වෙනත් අයට නොවේ. මේ තත්ත්වය හරිහැටි අවබෝධ කර නොගත් වැඩිහිටියන් දරුවන්ට නොගැළපෙන ආහාර වර්ග ලබාදීම සේම, අපේ ආහාර වර්ග පිළියෙළ කිරීම්වලදී අනවශ්‍ය ලෙස කෘත්‍රිම රසකාරක වර්ග එකතු කිරීම්ද මේ තත්ත්වයට හේතු වී තිබේ.
දරුවකුට කිසියම් ලෙසකින් මෙවැනි තත්ත්වයක් මතුවුවහොත් එය නිවැරදිව තේරුම්ගෙන කටයුතු කිරීමට මෙම තොරතුරු ඔබට උපකාරී වේවි. සාමාන්‍යයෙන් දරුවකුට කිසියම් ආහාරයක් අසාත්මිකවීමක් ඕනෑම අවස්ථාවකදී මතුවිය හැකිය. එසේම ඕනෑම ආහාර වර්ගයක් ඕනෑම වේලාවක අසාත්මික විය හැකිය. සමහර විට මුලදී අසාත්මික නොවූ ආහාර පසුකාලීනව අසාත්මික වීමට හැකියාවක් තිබේ. ආහාර අසාත්මිකවීමක් යනු ඉතාම බැරෑරුම් තත්ත්වයක් බව සිහි තබා ගත යුතුමය. එහි උච්ච තත්ත්වයට පත්වුවහොත් ඒදචනඩචතචයඪඵ ඵඩධජඬ ජීවිතය මරණයෙන් කෙළවර වීමට පවා පිළිවන. ඒ නිසා ආහාර අසාත්මිකතා සුළුවෙන් තැකිය හැකි තත්ත්වයක් නොවේ. විශේෂයෙන් කුඩා දරුවන්ගේ ආහාර අසාත්මිකතා ගැන වැඩි අවධානයකින් කටයුතු කළ යුත්තේ ඔවුන්ට එය නිවැරදිව සන්නිවේදනය කළ නොහැකි නිසාය. ආහාර අසාත්මිකවීමක් ශරීරයේ අංශ ගණනාවකට බලපෑම් ඇතිකරයි. සම මත පලු මතුවීම්, හුස්ම ගැනීමේ අපහසුතා, බඩ රිදුම, බඩඑළිය යාම වැනි ආහාර ජීර්ණ පද්ධතියේ ගැටලු, හෘදය වස්තුවට බලපෑම වැනි විසල් පරාසයක විහිදී යන ක්‍රියාවලියකි. මේ ලක්ෂණ කිසියම් ආහාරයක් ගත් විගසම හටගත හැකිවා සේම ආහාරය ලබාගෙන පැය කීපයකට පසු මෙන්ම සති කීපයකට පසුව වුවද හටගත හැකිය. දරුවාට අසාත්මික ලක්ෂණ ගෙනෙන ආහාර වර්ගය හඳුනාගෙන එය දරුවාට කිසිසේත්ම ලබා නොදීම වැඩිහිටියන්ගේ වගකීමකි. එසේම එවැනි දැඩි අසාත්මිකතා වලට එක් වරක් ගොදුරු වූ දරුවකු අවම තරමින් රෝහලට රැගෙන යනතුරු ජීවිතය රැක ගැනීමට ගත යුතු ඖෂධ වර්ග ගැන දැනුවත්ව ප්‍රතිකාර ලබා ගන්නා වෛද්‍යවරයා හා සමග සාකච්ඡා කොට හදිසි අවස්ථාවකදී ගත යුතු ඖෂධ වර්ග නිතරම දරුවා සිටින තැනක තබා ගැනීමට සැලකිලිමත්වීමද අතිශයින් වැදගත්වෙයි. කිසියම් ආහාරයක් ගත් විටෙක දරුවාගේ සමේ පලු මතුවේ නම් කවදාවත් නැති ආකාරයේ කැස්සක්, තොලක ඉදිමීමක්, නාසයෙන් දියර වැනි සොටු ගැලීමක්, අසාත්මිකතාවයක ලක්ෂණ වීමට බොහෝ ඉඩ තිබේ. සමහර තදබල අසාත්මිකතා ඇතිවිට එම ආහාර වර්ගය ස්පර්ශ වීමක්, ඒවායේ සුවඳ ආඝ්‍රාණය වීමකින් පවා අසාත්මික ලක්ෂණ මතුවීමට ඉඩකඩ තිබේ. මෙවැනි අසාත්මිකතා මතුවූ විටෙක හැකි ඉක්මනින් පහසුකම් ඇති රෝහලක් වෙත රැගෙන යාම අතිශයින් වැදගත්ය.
එසේම කිසියම් දරුවකු යම් ආහාර වර්ගයකට අසාත්මික නම් ඒ බව දරුවාගේ පාසල් ගුරුතුමියට, පවු‍ලේ වැඩිහිටියන්ට සේම දරුවා යනෙන ආහාර ගන්නා තැනක සිටින සෑම කෙනෙකුම වාගේ දැනුවත් කර තිබිය යුතුමය. එසේම දරුවා අසාත්මිකතා දක්වන ආහාර වර්ග වල නම් සේම ඉක්මනින් ලබාදිය හැකි ඖෂධ ගැනද, කිසියම් සටහනක් දමා හදිස්සි අවස්ථාවක භාවිත කළ ආකාරයට තැබිමද අත්‍යාවශ්‍යය.

කුඩා දරුවන් නිවසින් පිටත තැනකට ගිය විටෙක එම ආහාර ලබාගැනීමට වැඩි හැකියාවක් ඇති බැවින් වඩාත් කල්පනාකාරී විය යුතුමය. දියුණු රටවලදී නම් මෙවැනි දරුවන් අසාත්මිකතා දක්වන ආහාර ගැන, අතේ පලඳින පටියක සටහන් කර ඇත. දරුවකුට කිසියම් ආහාරයක් ලබාදීමට පෙර අදාළ අත්පටිය පරීක්ෂා කිරීමට ඒ අය හුරුවී සිටිති. නමුත් අප තවම එවැනි පුරුදුවලට අවතීර්ණ වී නොමැති බැවින් අදාළ අය ඒ හා සම්බන්ධයෙන් දැනුවත්කිරීම් කර තිබිම අත්‍යාවශ්‍ය වූවකි.
එසේම සමහර දරුවෝ ආහාර අපත්‍යවීම් වලටද ගොදුරුවෙති. එම තත්ත්වය ආහාර අසාත්මිකවීම් තරම් බරපතළ නොවේ. එය බලපාන්නේ දරුවාගේ ආහාර ජීර්ණ පද්ධතියට පමණයි. සමහරවිට, බඩ රිදීමක්, ආහාරය ලබා ගන්නා විට කටේ පිළිස්සීමක් වැනි දෙයක්, බඩ කොරවීමක් සිදු විය හැක. බොහෝ දරුවන්ට එළකිරි, බිත්තර, තිරිඟු වලින් සෑදූ ආහාර, මාළු වර්ග මේ ආකාරයට අපත්‍ය වන අවස්ථා බහුලය. දරුවාට අහිතකර ලෙස බලපෑම් ඇතිකරන එවැනි ආහාර වර්ග වලින් දරුවා ඈත්ව තැබිමද විශේෂයෙන්ම වැඩිහිටියන්ගේ යුතුකමකි.

සාකච්ඡා කළා
නිර්මලා කුමාරි සේනාරත්න

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.