lakbima.lk

අපි මුඛයෙන් ආහාරයට ගන්නා දේවල් බඩ තුළට ගමන් ගන්නා තෙක් වූ ක්‍රියාවලිය ඉතා සංකීර්ණ වූවකි. යම් ආහාරයක් ගත් විගස බඩ පිරුණාසේ දැනුණද එම ආහාරය මුළු කුස පුරා එකම ආකාරයකට ගමන් කරන්නේ නැත. 
කුස තුළ විවිධ අවයව ගණනාවක් තිබේ. නමුත් ඒ සෑම අවයවයක් කරාම අප ගන්නා ආහාරය එකම ආකාරයෙන් විසිරී යන්නේ නැත. අප මුව තුළට ගත් ආහාර පිඩක් උගුරෙන් පහළට ගමන් කරන්නට රබර් වැනි වූ බටයක් තිබේ. එම බටය දිගේ ආහාර පිඩ උගුරෙන් පහළට ගමන් කරන ආකාරය අපට දැනෙන්නේ නැත. මුඛයේදී හොඳින් සපමින් ආහාර ගිලින වාරයක් පාසා එම ආහාර කොටස් තෙතමනයත් සමග එකට ගුළියක් වී පෙර කී බටය දිගේ පහළට ගමන් කිරීම සිදුවේ. 
කුස තුළට ගිය පසු මෙම බටය කුඩා කොට්ට උරයක ප්‍රමාණයට පළල්වේ. අප ගන්නා ආහාර පෙර කී බටය දිගේ පැමිණ කොට්ට උරයක ප්‍රමාණයේ පැසට වැටුණු පසුව පැය කිහිපයක්ම ඒ තුළ රැඳී පවතී. මෙම පැස හොඳින් පිරුණු විට “තවත් නම් කන්න බෑ බඩ පිරිලා” යයි පවසන අපි එය හිස් වූ විටදී ‘ඉවසන්න බෑ බඩගිනියි’ යැයි පවසමු. 
ආහාර බොහෝ වේලාවක් රඳවා තැබෙන මෙම අවයවය කොට්ට උරයක් වැනි වුවද උරයේ කවරය ආකාරයට සලකන එහි බිත්තිය කොට්ට උර කවරයට වඩා බොහෝ සතා කමෙන් වැඩිය. දික් අතට හරස් අතට මෙන්ම කවාකාරවත් එම බිත්තියේ පවතින මාංශපේෂීන් නිසා මෙම පැස තුළට පැමිණෙන ආහාර හොඳින් මිරිකී, කැලතී, මිශ්‍රවීම සිදුවේ. ඔබ දන්නා ආමාශය යනු එයයි. අප ගන්නා ආහාර දිරවීමට අවශ්‍ය කරන ඇසිඩ්වර්ග ආමාශ බිත්තියෙන් වෑහෙමින් ආමාශය තුළට පැමිණේ. ආහාර දිරවීමට අවශ්‍ය කරන තවත් නොයෙක් දේ යම් සෙවල වර්ගයක් සමග එකතු වෙමින් ආරම්භ වන ජීර්ණ ක්‍රියාවලිය එම ආහාර අංශුමාත්‍ර බවට පත් කරන්නට සමත්වේ. එලෙස ඉතා කුඩා අංශු බවට පත් වූ ආහාර කොටස් වල පවතින ලිස්සන සුළු ස්වභාවය නිසා ඒවා බටය දිගේ පහසුවෙන් පැමිණෙමින් ඉන් ඉදිරියේ පිහිටා ඇති කුඩා බඩවැල් දිගේද තවදුරටත් ජීර්ණය වෙමින් ගමන් කරයි. 
මේ ආකාරයට ආහාර ජීර්ණ ක්‍රියාවලියේදී විශාල වශයෙන් උනන ඇසිඩ්වර්ග හේතුවෙන් අපේ බඩට හානියක් නොවී පවතින්නේ කෙසේදැයි ඔබට ගැටලුවක් පැවතිය හැකිය. මිනිස් ශරීරය නිර්මාණය වී ඇති විශ්මයජනක ආකාරය අනුව ඊටද අපූරු උපක්‍රමයක් යොදවා තිබේ. ඒ අනුව ආමාශයේ ඇතුළත බිත්තිය පුරාවට අතුරා ඇති සෙවල වර්ගයක් හේතුවෙන් ඇසිඩ් වලින් ආමාශයට වන අහිතකර බලපෑමෙන් එය ආරක්ෂා කරනු ලබයි. 
එසේ වුවද කලාතුරකින් මෙම ඇසිඩ්වල බලපෑමෙන් බඩ තුළ තුවාල හට ගන්නා අවස්ථාද නැතිවා නොවේ. 
අපේ ආහාර රටාවේ වැරදි හේතුවෙන් මෙම ඇසිඩ් ආහාරයට පෙරාතුව ඉනීමත්, මත්ද්‍රව්‍ය දුම්පානය වැනි වැරදි පුරුදු හේතුවෙන් මෙන්ම තෙල් මිරිස් වැඩි වැඩියෙන් ආහාරයට එකතු කර ගැනීමත්, මානසික ආතතියෙන් පෙළීමත් මේ ආකාරයට ආමාශ බිත්තියේ ඇතුළු පැත්තේ තුවාල හට ගැනීමට බලපාන හේතු අතරවේ. මෙම තුවාල ප්‍රමාණයෙන් විශාල තුවාලයක් ලෙස හෝ කුඩා තුවාල ගණනාවක් ආකාරයට පැවතිය හැකිය. 
මෙලෙස හටගන්නා සමහර තුවාල රෝගීන්ට දැනෙන්නේවත් නැති අතර කාලයක් පවතින තවත් සමහර තුවාල පසුකාලීනව පිළිකාමය තත්ත්වයක් බවට පත්වන්නට වුවද හැකියාව තිබේ.  මෙම තුවාලවලින් රුධිර වහනයක් පවතින විටදී එම ‍ලේ ආහාර සමග මිශ්‍ර වී ජීර්ණය වීම හේතුවෙන් අවසානයේ කළු පැහැති තාර ආකාරයේ අසූචි පහවීම සිදුවේ. 
ආමාශ බිත්තියේ හටගන්නා එවන් තුවාල සමහර විට බිත්තිය ඇතුළටම කිඳා බැසීම නිසා ආමාශ බිත්තිය පසාරු වන්නටද හැකියාව තිබේ. එවිට ආහාර මාර්ගය ඇතුළත ඇති විවිධ වූ විෂබිජ බඩවැල් තුළින් පිටතට පැමිණීම, එසැනින් මාරාන්තික තත්ත්වයක් උදාකරවිය හැකි අවදානම් අවස්ථාවකි. 
මේ සියල්ල මිනිස් ශරීරයක් තුළ නිහඬව සිදුවෙද්දී වෛද්‍යවරයාට ඒ පිළිබඳ යම් ඉඟියක් සැපයෙන්නේ රෝගියාට දැනෙන දේට අනුව පවසන ලක්ෂණ පදනම් කරගෙනය. එහෙත් අද වන විට ශරීර අභ්‍යන්තරයේ සිදුවන සියලු දේ පිටතින් ඇති රූපවාහිනී තිරයක් මත ප්‍රදර්ශනය කරවිය හැකි තරමට දියුණු තාක්ෂණික වෛද්‍ය පරීක්ෂණ තිබේ. එන්ඩොස්කොපි (Endoscopy) නමින් හැඳින්වෙන මෙම පරීක්ෂණයේදී පෑනක් පමණ ගණකමින් යුත් ඉතා නම්‍යශීලී, බටයක් වැනි වූ කුඩා උපකරණයක් මුඛය තුළින් ආහාර මාර්ගය තුළට ඇතුළු කිරීම සිදුකරයි. 
මෙම උපකරණයේ ඉදිරිපසින් කුඩා කැමරාවක් සහ බල්බයක්ද ඇති අතර තවත් කුඩා අඬු කිහිපයක්ද පිහිටා තිබේ. එම අඬු අවශ්‍ය විටදී පමණක් පිටතට ගත හැකි ආකාරයට රැඳි පවතින්නකි. බටයේ අග කෙළවර ක්‍රියාත්මක කරමින් ඉදිරිපසින් ඇති මෙම අඬු එහා මෙහා කරමින් හසුරුවන්නටත් ආහාර මාර්ගයේ අවශ්‍ය තැනකින් යම් සියුම් කොටසක් ගැනීමටත්  හැකියාව තිබේ. කැමරාවත් සමග ඇති බල්බයේ එළියෙන් කැමරාවට ඉදිරිපසින් ඇති දේ සහ එහිදී සිදුවන සියල්ල බටයේ අග කෙළවරින් දැක බලාගන්නටද හැකියාව තිබේ. 
මෙය කල්තියා විශේෂයෙන් සූදානම් විය යුතු වෛද්‍ය පරීක්ෂණයකි. ආහාර මාර්ගයේ බිත්තිය ආහාරවලින් ආවරණය වී පැවතීම වළක්වා ගන්නට රෝගියාට පැය කිහිපයක් නිරාහාරව සිටින්නට සිදුවේ. කෘත්‍රිම දත් පළඳා ඇත්නම් ඒවා ඉවත් කිරීමටද අමතක නොකළ යුතුය. පරීක්ෂණය සඳහා ඇඳක හාන්සිවන රෝගියාට එන්නත් කරන ඖෂධයක් නිසා රෝගියා අඩ නින්දකට අවතීර්ණ වේ. මුව තුළ හිරිවැටෙන ආකාරයට යම් ඖෂධයක් ස්ප්‍රේ කිරීම සිදු කරන අතර එතැන් සිට උගුරට කිසිවක් නොදැනෙන්නට පටන් ගනී. වෛද්‍යවරයා විසින් මෙම උපකරණයේ බටයක් වැනි වූ කොටස උගුරෙන් පහළට සීරුවෙන් ඇතුළු කරන්නේ ඉන් පසුවය. 
රෝගියා දෑස් හැර අවධානයෙන් සිටියද බටය ඇතුළු කිරීමේදී වේදනාවක් වැනි කිසිවක් දැනෙන්නට හැකියාවක් නැත. උපකරණයේ කැමරාව සහිත ඉදිරි කොටස ආමාශය තුළට ඇතුළු වූ විට මුළු ආමාශ බිත්තියම දැකගන්නට හැකියාව ලැබේ. බිත්තියේ හටගෙන ඇති තුවාලයක්, ඉදිමීමක්, ගැටිත්තක්, පිළිකාවක්, රුධිර වහනයක් ආදී සියල්ල එවිට පෙනෙන්නට පටන් ගනී.
පිළිකාවක් යැයි සැක කරන යම් වර්ධනයක් වේ නම් ඉන් ෙසෙල කිහිපයක් ඉවතට ගන්නටද හැකියාව තිබේ. එලෙස ෙසෙල ඉවතට ගැනීමද රෝගියාට දැනෙන්නේ නැත. ඉන්පසු එම ෙසෙල වලට යම් ඩයි වර්ගයක් එකතු කර කුඩා දේ විශාල කර බලන අන්වීක්ෂයක් තුළින් බැලීමේදී ඒවා පිළිකා ෙසෙලදැයි නිසැකවම හඳුනා ගන්නටද හැකියාව තිබේ. 
ආමාශ බිත්තියේ ‍ලේ ගලන තුවාල වේ නම් ඖෂධයක් එන්නත් කිරීම මගින් රුධිර වහනය නතර කරන්නට හැකියාව ඇත. 
සමහර රෝගීන්ගේ ආමාශය ආරම්භ වන ස්ථානයේදීම හටගෙන ඇති නහර ගැටගැසීමක් පසුකාලීනව පුපුරා යෑමෙන් විශාල රුධිර වහනයක් සමග ‍ලේ වමනය හට ගන්නා අවස්ථා තිබේ. 
එහෙත් එලෙස නහර පුපුරා යාමත් රුධිරය බාල්දියක් දෙකක් වහනය වන තරමේ මාරන්තික තත්ත්වයක් වන නිසා මෙම තත්ත්වය කල්තියා හඳුනා ගෙන රබර් වළලු යොදා තද කිරීමෙන් නහර පිපිරීම වළක්වාගත හැකිය.  
විශේෂයෙන් කොන්ද කැක්කුම්, දණහිස් වේදනා ආදියට වේදනා නාශක හෝ වෙනත් ඖෂධ දිගුකාලීනව ගන්නා රෝගීන් බඩේ දැවිල්ලෙන් පෙළේනම් කල්තියා මෙම පරීක්ෂණය කර ගැනීමෙන් බරපතල තත්ත්වයක් මගහරවා ගත හැකිය. 
එන්ඩොස්කොපි පරීක්ෂණය අවසානයේදී විස්තර පත්‍රිකාවක් සමග ආමාශයේ ඡායාරූප ගණනාවක් රෝගියා අතට පත්වේ. ඉතාමත් අඩු අවදානමක් සහිත කිසිදු විකිරණයකට රෝගියා නිරාවරණය නොවන මෙම වෛද්‍ය පරීක්ෂණය විනාඩි පහළොවක පමණ කාලයක් තුළ සිදුකළ හැකිය. 
පරීක්ෂණය අවසන් වී තවත් පැයක් පමණ කාලයක් ඉක්ම යනතුරු උගුරේ හිරි වැටුණු ස්වභාවය පැවතිය හැකි අතර එම ස්වභාවය පහව ගිය වහාම රෝගියාට නැවත ආහාර ගැනීමට හැකියාව තිබේ. 
මෙම පරීක්ෂණයේදී යම් රෝගී තත්ත්වයක් හඳුනා ගන්නට හැකි වූයේ නම් ඒ සඳහා සිදුකරන ප්‍රතිකාර මගින් රෝගය කොතෙක් දුරට සුවවී ඇතිදැයි දැන ගැනීමට නැවත පරීක්ෂණයක් කිරීමට වෛද්‍යවරයා නිර්දේශ කරනු ඇත. මුලින් ගත් එන්ඩොස්කොපි පරීක්ෂණ වාර්තා සුරක්ෂිතව තබා ගත යුතු අතර ප්‍රතිකාරවලට පසුව දෙවනවර සිදුකරන පරීක්ෂණයේදී රෝගය කොතෙක් දුරට සුවවී ඇතිදැයි සංසන්දනාත්මකව බලන්නට එම පරීක්ෂණ වාර්තා මහෝපකාරී වේ. 
 
කරාපිටිය ශික්ෂණ රෝහ‍ලේ කායික රෝග විශේෂඥ වෛද්‍ය උපුල් ද සිල්වා අවධාරණය කරයි 
 
උත්පලා සුභාෂිනී ජයසේකර 

Page 1 of 4

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.