lakbima.lk

නවසීලන්තයේ ප්‍රධාන සංඝනායක, ඕක්ලන්ඩ් නුවර ශ්‍රී ලංකාරාමාධිපති,  මහා විහාර වංශික ශ්‍යාමෝපාලී මහා නිකායේ අස්ගිරි පාර්ශවයේ සතර කෝරළ මහ දිසාවේ ප්‍රධාන අධිකරණ සංඝනායක, ශාස්ත්‍රපති රාජකීය පණ්ඩිත අති පූජ්‍ය වල්ගම ශ්‍රී මුනින්දවංස නාහිමියන්ගේ උපසම්පදා දිවියට වසර පණහක් සපිරීම නිමිතිකොටගෙන සහ ලෝක තරුණ බෞද්ධ සංගමයේ ගරු ලේඛකාධිකාරී පූජ්‍ය මුගුණුවෙල අනුරුද්ධ ස්වාමින්වහන්සේගේ මූලිකත්වයෙන් ආරම්භ කෙරුණු නවසීලන්තයේ ඕක්ලන්ඩ් නුවර ශ්‍රී ලංකාරාම විහාරස්ථානයට වසර විස්සක් සපිරීම නිමිතිකොට ගෙන විශේෂ ආගමික වැඩසටහන් මාලාවක් පසුගිය ඔක්තෝබර් මස 22 වෙනි සඳුදා සිට 28 වෙනි ඉරිදා දක්වා නවසීලන්තයේදී පැවැත්විණි.

මෙහි සමාරම්භක උත්සවය “නාහිමි අභිවන්දනා” ලෙස නම් කර තිබු අතර එම උත්සවය නවසීලන්තයේ සියළුම විහාරස්ථාන වල වැඩවසන අතිපුජනිය ගරුතර මහා සංඝරත්නයේ සහ ශ්‍රී ලංකාවෙන් හා ඕස්ට්‍රේලියාවෙන් වැඩම කරනා ලද මහා සංඝරත්නයේ සහභාගිත්වයෙන් ඕක්ලන්ඩ් නුවර “ඊ.එෆ්.කේ.එස්” ශාලාවේ දී 22 වෙනිදා පැවැත්විණි.

නාහිමි අභිවන්දනා උත්සව සභාව වෙත අතිපූජ්‍ය වල්ගම ශ්‍රී මුනින්දවංස නාහිමි ප්‍රමුඛ ගරුතර සංඝරත්නය වැඩම කරනු ලැබූයේ, ශ්‍රී ලංකාරාම විහාරස්ථානය මගින් පවත්වාගෙන යනු ලබන ශ්‍රී මිහිඳු දහම් පාසැලේ ශිෂ්‍ය ශිෂ්‍යාවන්ගේ නැටුම් ගැයුම් සහ බෙරවාදනද පෙරටු කරගත් දර්ශණිය රථ පෙරහරකනි.

අනතුරුව පිරිස පංචශීලයේ පිහිටුවීම ඕස්ට්‍රේලියාවේ, මෙල්බර්න් නුවර ධම්ම්දිප භාවනා මධ්‍යස්ථානාධිපති සියම් නිකායේ අස්ගිරි පාර්ශවයේ ඕස්ට්‍රේලියාවේ ප්‍රධාන සංඝනායක පූජ්‍ය අකරවිට සංඝානන්ද නාහිමි විසින් සිදු කල අතර ඉන්පසු පළමු අනුශාසනාව නවසීලන්තයේ වෙලිංටන් නුවර ධම්මගවේෂි භාවනා මධ්‍යස්ථානාධිපති වැලිමඩ ජිනාලංකාර ස්වාමින්වහන්සේ විසින් පවත්වන ලදී.  

එහිදී සභාව ඇමතූ උන්වහන්සේ “වසර විස්සක් පුරා බුද්ධපුත්‍රයන් වහන්සේ නමක් විසින් තමන්කෙරේ අනුකම්පාවෙන් කරණ ලද සේවාවට කල ගුණ දන්නා පිරිසක් විසින් සංවිධානය කරණ ලද උත්සවයක් මේක. කළගුණ සැළකීම අපේ සමාජයෙන් ඈත් වෙමින් පවතින කාලයක විදේශයකදී හෝ මෙවන් අවස්ථාවක් දකින්නට ලැබීම ඉතාමත් සතුටට කාරණයක්.

ඒ වගේම මේ අපේ නායක හාමුදුරුවන් වහන්සේ හරියට ඔය උදවියගේ පන්සලේ දැල්වෙන දොළොස්මහේ පහන වගෙයි. මොකද ඔය දොළොස් මහේ පහන කාටවත් අයිති නැහැනෙ. ඔන්න අද කෙනෙක් ඇවිත් පහනට තෙල් ටිකක් දාලා ප්‍රාර්ථනාවක් කරලා යනවා. හෙට තව එක්කෙනෙක් එනවා, පහනට තිරයක් දානවා, ප්‍රර්ථනා කරනවා, යනවා. මේ විදියට මේ පහනට තෙල් ටිකක් දාලා, තිරයක් දාලා ප්‍රර්ථනා කරලා යන අය කොච්චරක් නම් ඉන්නවද? ඒ අයගේ ප්‍රර්ථනා ඉෂ්ට වෙනවා, ඒ අය යනවා, ආයෙමත් එන්නේ ඒ වගේම උවමනාවක් උනාම. අනේ ඒ උනාට මේ පහන මාස දොළහම කාටවත් දොසක් කියන්නේ නැතුව, ගතු කියන්නේ නැතුව දිගටම දැල්වෙනවා. මේ නායක හාමුදුරුවොත් ඒ වගෙයි. කාටවත් අයිති නැහැ, හැමදාම අනුන් වෙනුවෙන් සේවය කරනවා. සේවය අරගෙන දායකයෝ යනවා යන්න, උන්වහන්සේ දිගටම තමන්ගේ සේවය කරගෙන යනවා.

ඒ වගේම තමයි මේ නායක හාමුදුරුවන්ට ඔය ලොකු පොඩි කියලා කිසිම බේදයක් නැහැ, හැමෝම එකතු කරගෙන කිසි කලබලයක් නැතුව බොහොම හිමින් සීරුවේ ඉලක්කය කරා යන්න තරම් ඉතා සුවිශේෂ හැකියාවක් තියෙනවා.” යයි පැවසිය.

අනතුරුව අනුශාසනාවක් කරමින් සියම් නිකායේ මල්වතු පාර්ශවයේ ඔස්ටෙර්ලියාවේ ප්‍රධාන සංඝනායක සිඩ්නි නුවර ශ්‍රී ලංකාරාමාධිපති මීගහකුඹුරේ ධම්මගවෙසී නාහිමියන් “ශ්‍රී ලංකාරාමය ආරම්භ කරණ අවස්ථාවේ මටත් ඒ සඳහා සහභාගී වෙන්නට අනුරුද්ධ හිමියන් ආරාධනා කරා. එදා මේක පටන් ගත්තේ බොහොම පොඩි තැනක.  ඊට පස්සෙත් මම අවස්ථා කීපයකදීම මේ විහාරස්ථානයට ආවා ගියා. ඒ අවස්ථාවල මම දැකපු දෙයක් තමයි මේ නායක හාමුදුරුවෝ උන්වහන්සේගේ ශිෂ්‍යයොත් සම්බන්ධ කරගෙන දායකයොත් සම්බන්ධ කරගෙන මේ විහාරස්ථානය ටිකෙන් ටික දියුණු කරණ හැටි. දැන් අද වෙනකොට මේ විහාරස්ථානය අංග සම්පුර්ණ විහාරස්ථානයක්. ඉතින් ශ්‍රී ලංකාවෙන් පිට මේ වගේ රටකට ඇවිත් මේ තරම් ලොකු වැඩක් කරපු උන්වහන්සේ නම් සැබෑම දක්ෂයෙක්”

රාමඤ්ඤ නිකායේ ඕස්ට්‍රේලියාවේ ප්‍රධාන සංඝනායක නාඔටුන්නේ විජිත නාහිමියන් විසින් අනුශාසනාවක් කරමින් “මේ උත්සවේ වෙනුවෙන් සකස් කරලා තියෙන ප්‍රචාරක දැන්වීම් වල, සමරු පොත්වල, ඒ වගේම උත්සවේ කතා පවත්වන හැමෝම මේ විහාරස්ථානය ආරම්භ කරපු මුගුණුවෙල අනුරුද්ධ හාමුදුරුවෝ ගැනත් කියනවා. ඒකෙන් අපට පැහැදිලි වෙන්නේ මේ නායක හාමුදුරුවන්ගේ කෘතවේදී බව එහෙම නැත්නම් සත්පුරුෂභාවය. අනුරුද්ධ හාමුදුරුවෝ සැතපුම් දහස් ගණනක් ඈතක හිටියත් අපේ නායක හාමුදුරුවෝ උන්වහන්සේ කරපු සේවය අගය කරන්න අමතක කලේ නැහැ. ඒ වගේ ගුණවත් ස්වාමින්වහන්සේ නමකගේ ඇසුර ලබන්න ඔබ හැමෝම පින් කරලා තියෙනවා.” යයි පැවසිය.

මුනින්දවංස නාහිමියන් කතා කරමින්, “මේ විහාරස්ථානය ආරම්භයේදී මම ශ්‍රී ලංකාවේ පර්ෂද මුලස්ථාන පාසලක විදුහල්පති ලෙස කටයුතු කරමින් හිටියේ. ඒ අවස්ථාවේ මට කතා කරපු අනුරුද්ධ හාමුදුරුවෝ කිව්වා, මේ පන්සල ආරම්භ කරන්න නම් මගේ උදව් අනිවාර්යයෙන් අවශ්‍යයි කියලා. ඉතින් අප අතරේ පැවැත්වුන සාකච්ඡා කීපයකින් පස්සෙ මම එන්ඩ කැමති වුණා.

ඒ ආවට පස්සෙ අපට තේරුණා පන්සලට වැඩිය සෙනග එන්නෙ නැති වග, ඉතින් අපි දෙන්නා කතිකා කරගෙන ශ්‍රී ලාංකික නිවෙස් වලට ගිහින් පිරිත් කියන්ඩ බණ කියන්ඩ පටන් ගත්තා. එහෙම කරලා අපි දයකදායිකාවන් විශාල පිරිසක් හදා ගත්තා.  

ඔහොම ඉන්න අතරේ අනුරුද්ධ හාමුදුරුවන්ට ශ්‍රී ලංකාවට යන්න වුනා. ඒ ගමනින් පස්සෙ උන්වහන්සේට නැවත ආවේ නැහැ, මම පන්සලේ තනිවුනා. මේ කාලයේ මම නිරතුරුවම හිතුවේ මම ඉන්නේ බුදුහාමුදුරුවෝ ළඟ නිසා මට උන්වහන්සේගේ පිහිට ආරක්ෂාව ලැබෙයි කියලා. මම මුළු දවසම බොහොම කල්පනාවෙන්  තමයි පන්සලේ ඉන්නේ. නිදා ගන්න යන්නේ හොඳටම නිදිමත ආවහම. නිදාගත්තත් පාන්දරම කුරුල්ලන්ගේ නාදය ඇහෙනකොට මම නැගිටිනවා. දවසකට පැය කීපයක් විතරයි මම නිදාගත්තේ.  

ඔහොම ඉන්නකොට මම රජයෙන් අනුමත කරගෙන ආ නිවාඩු කාලයත් අවසන් වුණා. ඉතින් වගකිව යුතු රජයේ තනතුරක් දැරූ පුද්ගලයෙක් හැටියට මගේ යුතුකමක් තියෙනවනේ නැවත ලංකාවට ගිහින් ඒ රැකියාවෙන් නිත්‍යානුකුලව අස්වෙලා එන එක. ඒ වගේම මගේ ලංකාවේ කරගෙන ගිය ශාසනික කටයුතු තිබුනා, මම ලංකාවේ හිටපු පන්සල තිබුනා, මේවා පිළිවෙලක් ඇතුව කාටහරි භාර දෙන්ඩ තිබුනා.

ඉතින් මේ සියලු කාරනා සැලකිල්ලට අරන් මම ලංකාවට ගියා.

ඒ යනකොට ගුවන් යානයේදී මම කල්පනා කලේ දැන් ලංකාවේ වැඩ කටයුතු පිළිවෙලක් කරන්ඩ ගියාට, මේ නවසිලන්තේ පටන්ගත්ත පන්සලට මොකද කරන්නේ කියලා. ඒ අවස්ථාවේදී තමයි මට කාලයක් තිස්සේ මම දන්නා හඳුනන කොට්ටුකච්චියේ පඤ්ඤාසිරි හාමුදුරුවෝ මතක් වුනේ. ඉතින් මම ලංකාවට ගිය ගමන් උන්වහන්සේටත් කතා කරලා මගේ ලඟම මහණ වුන යසස්සී හාමුදුරුවන්ටත් කතා කරලා ඒ දෙන්නව මම එනකම් මේ පන්සල බලා ගන්න කියලා එව්වා.  

ඉතින් එදා ඒ ස්වාමින්වහන්සේලා දෙන්නාත් ඔබේ විහාරස්ථානය රැක ගන්න විශේෂ මෙහෙවරක් කරලා තියෙනවා. එදා ඒ වගේ අපි කටයුතු නොකළ නම් නම් අර දුෂ්ට බලවේග ජයග්‍රහණය කරලා මේ බෞද්ධ වැඩපිළිවෙල සම්පුර්ණයෙන් කඩාකප්පල් කරන්න තිබුනා.

ඒ වගේම අනුරුද්ධ හාමුදුරුවන් දැන් මෙහෙ නොසිටියත් උන් වහන්සේ අපට හැමදාම ආශීර්වාද කරනවා.” යනුවෙන් සඳහන් කරමින් උන්වහන්සේ මුහුණ දුන් අමිහිරි අතීතය මතක කර දුන්නා.

නවසීලන්ත ශ්‍රී ලංකා බෞද්ධ භාරකාරත්වයේ සභාපති දොන් හෙට්ටිආරච්චි මහතා සහ දයකදායිකාවන් වෙනුවෙන් ජයසිරි බස්නායක මහතාද උත්සව සභාව ඇමතිය.

මේ අවස්ථාවට රාමඤ්ඤ නිකායේ ඕස්ට්‍රේලියාවේ ප්‍රධාන සංඝනායක නාඔටුන්නේ විජිත නාහිමි, ශ්‍රී ලංකාවේ පානදුරේ ගඟුල පරමවිශුද්ධාරාම විහාරාධිකාරී සහ කොළඹ ගංගාරාම ඥානේස්වර පිරිවෙනේ හිටපු පරිවේනාධිපති තන්තිරිමුල්ලේ සරණ හිමි,  නව සීලන්තයේ ශ්‍රී ලංකාරාමවාසි උඩගලදෙණියේ යසස්සී හිමි, කොට්ටුකච්චියේ පඤ්ඤාසිරි හිමි සහ හැගව රාහුල හිමි ඇතුළු ගිහි පැවිදි විශාල පිරිසක් සහභාගී විය.

ප්‍රවීණ ගේයපද  රචක ප්‍රියානන්ද විජේසුන්දරයන් විසින් රචිත නාහිමි අභිවන්දනා ගීතය ශ්‍රී මිහිඳු දහම් පාසැලේ දරුදැරියන් විසින් ගයනා කල අතර උත්සව සභාවේ කටයුතු මෙහෙයවීම ශ්‍රී ලංකාරාමවාසී වල්ගම රේවත හිමියන් විසින් සිදු කෙරිනි.

මෙම උත්සවයෙන් අනතුරුව, ඔක්තෝබර් මස 23 වෙනිදායින් ආරම්භවී නොකඩවා දින හතරක් පුරා පැවැත්වුන පිරිත් දේශනාව සහ ඔක්තෝබර් 28 වෙනිදා පැවැත්වුන වාර්ෂික කඨින පින්කමින් පසු උත්සව මාලාව අවසන් විය.

මෙම උත්සව මාලාව සංවිධානය කිරීම ශ්‍රී ලංකාරාම දයකදයිකාවන් ගෙන් සහ බෞද්ධ භාරකාරත්වයෙන් සමන්විත විශේෂ කමිටුවක් විසින් කරන ලදී.

Page 4 of 9

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.