lakbima.lk

“කෝපි කඩේ” කුරුං ගුරුංව කවුද නොදන්නේ. ඔහු තමයි දශක ගණනක් තිස්සේ කලාවේ රැඳී සිටි කේ.ඒ. පියකරු. අද වන විට ඔහු ගිලන්ව ලෙඩ ඇඳේ සිටින බව රටම දන්නවා. කේ.ඒ. පියකරු රෝගී වූ අවස්ථාවේ ඒ ගැන විවිධාකාර වාර්තා පුවත්පත්වල පළවුණා. “රිද්ම” තුළිනුත් ඒ කනගාටුදායක පුවත අපි රටට හෙළි කළා. අද වන විට ඔහු ලෙඩ වෙලා වසරකට ආසන්නයි. මොළයේ රුධිර කැටියක් සිරවීම නිසා රෝගීව සිටින මේ කලාකරුවා සුව කරන්න අධික මුදලක් වැයවන බවයි ඔහුගේ පවු‍ලේ ඥාතීන් කියා සිටින්නේ. ඔය අතර පසුගියදා ඔහුගේ බිරිඳ ප්‍රේමා ද අල්විස් අනුරාධපුර හා මිහින්තලා පුද බිමේ ටිකට්පත් අලෙවියක නිරත වී සිටියේ ප්‍රතිකාර සඳහා අවශ්‍ය මුදල් සොයා ගැනීම පිණිසයි. මේ පිළිබඳ මාධ්‍ය ඔස්සේ වාර්තා පළවීමත් සමගම මේ අසරණ කලාකරුවාට පිහිට වන්නේ කෙසේද යන්න පිළිබඳව බොහෝ දෙනෙක් අපෙනුත් විමසීම් කරන්නට වුණා. මේ නිසා කේ.ඒ. පියකරුගේ ආදරණීය බිරිඳ “ප්‍රේමා” අපි මේ විදියට කතාබහකට එකතු කරගත්තා.

පසුගියදා ඔබ ඔබේ රෝගී සැමියා සමග මිහින්තලා පුදබිමේ හා අනුරාධපුර පුදබිමේ ටිකට්පත් අලෙවි කිරීමක නිරත වුණා නේද?

ඔව්, නිලන්ත වික්‍රමසිංහ කියලා මහත්තයෙක් තමයි ඒ කටයුත්තට අපිට උදව් කළේ. මේ වෙද්දී මගේ සැමියාගේ ඉදිරි ප්‍රතිකාර සඳහා විශාල මුදලක් අවශ්‍ය වී තිබෙනවා. ඒ හින්දා තමයි ඒ විදියේ දෙයක් කරලාවත් මුදල් ටිකක් හොයා ගන්න අපි කල්පනා කළේ.

ඔබේ සැමියා රෝගී වූ ආකාරය සහ මේ වන විට ඔහුගේ තත්ත්වය ගැන පාඨකයන් දැනුවත් කළොත්?

මීට වසරකට විතර කලින් තමයි එයා අසනීප වුණේ. ටෙලි නාට්‍යයක ෂූටිං යන අතරේ එක පාරටම කතාබහ කරන්න බැරිව ගිහින් තියෙනවා. ඒ වෙලාවේ ඒ ආසන්න රෝහලකට කට්ටිය සැමියාව අරගෙන ගිහින් තියෙනවා. ඊට පස්සේ තමයි කළුබෝවිල හොස්පිට්ල් එකට ගෙනාවේ. තවමත් ඉන්නේ අසනීප තත්ත්වයෙන් තමයි. මොළේ ‍ලේ කැටියක් හිරවෙලා කියලා තමයි වෛද්‍යවරු කියන්නේ.

සැත්කමක් මගින් එය ඉවත් කොට යථා තත්ත්වයට පත් කළ හැකිද?

දියකරලා අරින්න පුළුවන්ද කියලා තමයි තවමත් ප්‍රතිකාර කරමින් බලන්නේ.

 කේ.ඒ. පියකරු වසරකට පමණ පෙර අසනීප වූ මොහොතේ අපි ඒ ගැන “රිද්ම” තුළින් කතාබහ කළා. වෙනත් මාධ්‍යවලිනුත් ඒ ගැන කතා කළා. ඒත් පිහිටක් ලැබුණේ නැද්ද?

ගොඩක් උදව් උපකාර ලැබුණා. ඒත් හැමදාම ඔය විදියට උදව් උපකාර ඉල්ලන්න බැහැනේ. මහත්තයා රඟපානවට අමතරව රැකියාව විදියට කළේ මූර්ති නෙලීමයි. වේදිකා නාට්‍ය සෙට් ගහන එක වගේ දේවලුත් කළා. අසනීපයත් එක්ක ඒ හැමදේම නැවතුණාම මහත්තයගෙ බෙහෙත් ගන්න විතරක් ‍නෙවෙයි. අපි දෙන්නට ජීවත් වෙන එකත් ප්‍රශ්නයක් වුණා. වෛද්‍යවරු කියන්නේ මහත්තයා හදිසියේ වැටුණොත් එහෙම අංශභාගයට එන්න පුළුවන් කියලා. ඒ හින්දා එයාව ගෙදර දාලා මට රස්සාවකට යන්නත් බැහැ.

දූ දරුවෝ උපකාර කරන්නේ නැද්ද?

දුවට මාස දෙකක දරුවෙක් ඉන්නවා. එයාට  බෑනේ මෙහේ නැවතිලා එයාගේ තාත්තට උපස්ථාන කරන්න. පුතා හිටියේ බදුල්‍ලේ. එයා පෞද්ගලික ආයතනයක රැකියාවක් කළා. එක දිගට මෙහේ නැවතිලා තාත්තට ඇප උපස්ථාන කරලා එයාට රැකියාවත් නැතිවුණා. මේ දවස්වල මුත්‍රාශයේ ගල් ඇවිත් පුතාටත් ඔපරේෂන් එකක් කරලයි තියෙන්නේ. දැන් එයා ඉන්නේ බදුල්‍ලේ එයාගේ බිරිඳගේ ගෙදර. මම තමයි සැමියගේ හැම කටයුත්තක්ම කරන්නේ.

ටිකට් අලෙවියත් සමග රට වටා යන්න බලා‍පොරෝතු වෙනවද?

වාහනවලට ලොකු වියදමක් යනවනේ. ඒ හින්දා ඒක ටිකක් අමාරු වැඩක්.

කේ.ඒ. පියකරුට ප්‍රිය කරන රසික පිරිස් ඔහුට උදව් කරන්න ඉදිරිපත් වුණොත් ඒ සඳහා මාර්ගය මොකක්ද?

මහජන බැංකුවේ බත්තරමුල්ල ශාඛාවේ කේ.ඒ. පියකරු නමින් ගිණුමක් ආරම්භ කරලා තියෙනවා. ඒ ගිණුමේ අංකය 208200180005854 කැමති කෙනෙක් පුළුවන් විදියට ආධාර කරනවා නම් ලොකු උදව්වක්.

ආරියවංශ කුලතිලක

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.