lakbima.lk

 

කලා ලෝකයේ facebook හින්දා ප්‍රශ්නවලට මුහුණ දෙන්න සිදුවෙලා තියෙන්නේ මට විතරක් නමෛයි. අපේ සහෝදර නළු නිළියන්ටත් ඒ විදියේ නොයෙකුත් ප්‍රශ්නවලට මුහුණදෙන්න සිදුවෙලා තියෙනවා. මට හිතෙන විදියට facebook හින්දා මට වැඩියෙන්ම ප්‍රශ්නවලට මුහුණදෙන්න සිදුවුණේ 2018 දී. කොටින්ම කියනවා නම් ඒ ප්‍රශ්න නිසා 2018 වසරේ මාස කීපයක්ම මම facebook වලින්  ඈත්වෙලත් හිටියා.

facebook හරහා හමුවන විවිධාකාර රසික රසිකාවියන්ගේ විවිධ ප්‍රතිචාරවලට මම මුහුණ දීලා තියෙනවා. රසික පිරිස වගේම කාලෙකට ඉස්සර  ළඟින් හිටි යාළුවෝ FB තුළින්  “Hi” කියලා පණිවුඩ එව්වාම අපි ඒවාට උත්තර දෙන්න යොමු නොවුණොත් බණිනවා. “හිතාගෙන ඉන්නේ ලොකු නළුවෝ කියලා... දැන් ලොකු සීන්...” කියලා දෝෂාරෝපණ එල්ල කරනවා. අපේ  කාර්ය බහුලකමත් එක්ක නිතර FB  යන්න ලැබෙන්නේ නැහැ. ඒ නිසයි ඒ අයගේ ප්‍රතිචාරවලට  සැණින් උත්තර දෙන්න බැරි වෙන්නේ. ඒත් ඔවුන් ඒක තේරුම් ගන්නේ නෑ. ඒ වගේ දේවල් හින්දා සිත් රිදීම් ඇතිවෙන අවස්ථා නම් අනන්තයි, අප්‍රමාණයයි. ඒත් FB  හින්දා මට ඔයිට වඩා බරපතළ සිදුවීම්වලට මුහුණ දෙන්න සිදුවෙලා තියෙනවා.

 

“පැහැසරා” ටෙලි නාට්‍යයේ මගේ පෙම්වතිය විදියට රඟපෑවේ තරිනදි ප්‍රනාන්දුයි. එක අවස්ථාවක මගේ නමින් හදපු ව්‍යාජ ගිණුමකින් දිගට හරහට මමයි තරිනදියි දෙන්නා ටෙලි නාට්‍යයේ රඟපාන ජවනිකා ඇතුළත් Photos දාන්න පටන් ගත්තා. ඒ හැම Photos එකක්ම දාන්නේ “මේ මගේ පණ... සුදු මම ඔයාට ආදරෙයි” වගේ පෙම් වදන් වලින්. ඒවා දකින අය හිතන්නේ  මේ ඇත්තටම මම දාන ඒවා කියලා. මෙහෙම කාලයක් ගතවෙද්දී තරිනදියි  මමයි අතරේ ඇත්තටම ප්‍රේම සම්බන්ධයක් තියෙනවද කියලා හැමෝම අහන්න පටන් ගත්තා. ඒ සිදුවීමෙන් මම වගේම තරිනදිත් විශාල අපහසුතාවකට පත්වුණා. කරන්නම දෙයක් නැති නිසා ෆේස්බුක් හරහාම අදාළ නීතිමය පියවර අරගෙන මම ඒ ගිණුම අවලංගු කළා.

ඒ ගිණුම අවලංගු කරලා සතියක්වත් යන්න කලින් ආයෙම මගේ නමින් ව්‍යාජ ගිණුමක් විවෘතවෙලා තිබුණා. ඒ අවස්ථාව කලින්  අවස්ථාවටත් වඩා දරුණු වුණා. මගේ facebook ගිණුමේ සියලුම දත්ත ඒ ව්‍යාජ ගිණුමට ඇතුළත් කරගෙනයි තිබුණේ. ඊට පස්සේ මගේ සැබෑ ගිණුම අවලංගු වෙන තැනට වැඩකටයුතු කරලා. මොකද දවසක් මම මගේ facebook එකට යන්න හදද්දී මගේ ගිණුමට යන්න බැහැ.

ඔය අතරේ අර ව්‍යාජ ගිණුම හරහා කවුරුහරි මගේ Friendlist එකේ ඉන්න ගෑනු ළමයින්ට නොයෙක් විදියේ Masage  යවලා. මගේ යාළුවන් එක්කත් Chat කරලා. ඒ කතාබහ ගැනත් මට ආරංචි වුණා.

මේ කාලයේ මම ජනප්‍රිය නළුවන්ගේ ලැයිස්තුවට නිර්දේශ වෙලා හිටියා. මම මතුවන්න ඕනකමට ඒ ලැයිස්තුවේ ඉන්න අපේ නළුවන්ට මා විසින් මඩ ගහන බව අඟවන Post අර ගිණුම පුරා පළ කරලා තිබුණා. ඒත් මම මගේ සහෝදර නළුවන් ඒ ගැන දැනුවත් කළා. ඉසුරු ලොකුහෙට්ටිආරච්චි විදියට මුහුණ‍පොතේ සැරිසරන්නේ, මම ‍නෙවෙයි කියන එක ඇඟවන්න මාස කීපයක් facebook එකෙන් ඈත්වෙලා ඉඳලා අලුතින්ම ගිණුමක් හදාගෙන ඊට පසුව මම අර ව්‍යාජ ගිණුමත් block කළා.

 

“ඉසුරු ලොකුහෙට්ටිආරච්චි” නමින් ව්‍යාජ ගිණුම් ඇතිකරන අවස්ථාවල ඊට එරෙහිව කටයුතු කරන්න පුළුවන් වුණත් එක් එක් නම් වලින් ගිණුම් හදාගෙන මට මඩ ගහද්දී අපි අසරණ වෙනවා. මේ දවස්වලත් එම කරදරයම සිදුවෙනවා. මගේ ඡායාරූපයක් පළවුණත් ඊට යටින් කැත විදියේ Comment එකක් වැටෙනවා. මේ විදියේ ප්‍රතිචාර එක් එක් ගිණුම්වලින් ආවට මේ හැමදේම කරන්නේ එක්කෙනෙක්ද කියලා මට සැකයි. අර මුලින් කියපු මගේ නමින් ඇරඹු ව්‍යාජ ගිණුම් පිටුපස සිටින්නේත් ඒ කෙනාම විය යුතුයි. මම ඒ විදියට සැක කරන්නේ ඒ හැම මඩ ප්‍රහාරයන් අතරම යම් සමානකමක් ඇති හින්දා.

ප්‍රේමයයි - වෛරයයි අතර තියෙන්නේ  කෙස් ගසක වෙනසක්.  කෙනෙකුට ආදරය කරලා එයා ලබාගන්න බැරි වුණාම එයාට වෛර කරන අය වගේම ඔහුව නැතිම කරලා දානවා කියන අධිෂ්ඨානයෙන් කටයුතු කරන අයත් ඉන්නවානේ. එහෙම අයට අනුකම්පා කරනවා ඇරෙන්න මම වෙන මොනවා කරන්නද?

- ආරියවංශ කුලතිලක

ඡායාරූප - මංජුල පෙරේරා

 

Page 1 of 7

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.