lakbima.lk

 

ආදරවන්තයන්ගේ දිනයදා එනම් පෙබරවාරි 14 වැනිදා ජනප්‍රිය නිළි ධනංජි තාරුකා සිය ආදරය මල්ඵල ගන්වමින් යුගදිවියට පිවිසුණා. ධනංජිගේ අතගත්තේ සුදම් දෙව්ණක වීරනායකයි. පසුගියදා නිමාවට පත්වූ “අවසන් ඉනිම” ටෙලි නාට්‍යය තමයි මේ දෙන්නා මුලින්ම මුණගස්වලා තියෙන්නේ. ධනංජි තමන්ගේ ආදර කතාව ගැන අපට කිව්වේ මේ විදිහටයි.

“අවසන් ඉනිම” ටෙලි නාට්‍යය රූගත කළේ සුදම්ලාගේ ගෙදරට ඉස්සරහ ගෙදර, එතනදී තමයි අපි මුල්වරට මුණගැහුණේ. අපි දැන හඳුනාගෙන අවුරුදු තුනක් විතර කතාබහ කරමින් එකිනෙකා තේරුම් ගත්තා. අපි ආදරවන්තයන් වෙලා අවුරුදු එකහමාරක් විතර වෙනවා. අපි යාළුවෝ විදිහට ඇසුරු කරන කා‍ලේ අපි දෙන්නාගේ පවුල්වල අය අතරේත් හිතවත්කමක් ගොඩනැගුණා. ඒ වෙද්දී අපි දෙන්නාගේ ආදරේ අපේ හිත්වලට සීමාවෙලයි තිබුණේ. ඔය අතරේ තමයි අපේ වැඩිහිටියෝ විවාහ යෝජනාවක් අරගෙන ආවේ. ඒ වෙද්දීත් අපි දෙන්නට දෙන්නා අතරේ කැමැත්තක් තිබුණ හින්දා ඒ විවාහය ස්ථීර වුණා. පෙම්වතුන්ගේ දිනය දා අපි විවාහ වුණා.

ඔබේ ආදරවන්තයත් නළුවෙක්. එහෙම නේද?

එයා “අවසන් ඉනිම” නාට්‍යයේ සුළු චරිතයක් රඟපෑවා. දැන් නම් එයාට රඟපාන්න දිගටම ආරාධනා ලැබෙනවා. ඒත් එයා කැමැති නැහැ රඟපාන්න. මොකද වෘත්තියෙන් ව්‍යාපාරිකයෙක් හින්දා එයා හුඟක් කාර්යබහුලයි. හැබැයි සුදම් නිරූපණයට නම් ආසයි. සමහර විට එයා ඉදිරියේදී නිරූපණ ශිල්පියෙක් විදිහට ඉදිරියට යාවි.

ධනංජි 14 වැනිදා බැඳලා 16 වැනිදා ෂූටිං ගියා කියන්නේ ඇත්තද?

ඔව්. මම ඒ වෙද්දී ප්‍රසන්න ප්‍රිදර්ශනගේ “රකුන්ගිර” ටෙලි නාට්‍යය භාරගෙනයි තිබුණේ. 16 ෂූටිං පටන්ගන්න නියමිත බව 14 වෙද්දීත් අපි දෙන්නා දැනගෙන හිටියා. විවාහ වුණු ගමන් රඟපාන්න යන්න වුණු එක ගැන සතුටකුත් තියෙනවා. මොකද බැඳපු අලුත දුරස්වෙලා හිටියම ආදරේ වටිනවානේ. හැබැයි මේ ටෙලි නාට්‍යයේ ෂූටිං ඉවරවෙලා නම් මම පුංචි විවේකයක් ගන්නවා.

ඉදිරියේදී ධනංජිගේ රංගන කටයුතු සීමාකරන්න කියලා සැමියාගෙන් තහංචි එල්ල වේවිද?

එයාගෙන් එහෙම කිසිම තහංචියක් මට නැහැ.

ආරියවංශ කුලතිලක

 



පුංචි තිරය, රිදී තිරය පමණක් නොව වේදිකාවටද සිය ප්‍රතිභාපූර්ණ රංගන  දායකත්වය ලබාදුන් දක්ෂ රංගන ශිල්පියෙක් හැටියට පාලිත සිල්වා හැඳින්විය හැකියි. තමන් රංගන දායකත්වය ලබා දෙන සෑම නිර්මාණයකටම උපරිම සාධාරණය ඉටු කරනා ඔහු අද වන විට කලානිර්මාණ 300කට අධික සංඛ්‍යාවකට දායකත්වය ලබාදෙමින් කාගේත් ගෞරවයටද ලක් වී සිටිනවා. නමුත් ඔහුගේ එම සාර්ථකත්වයේ ගමනට ශක්තියක් වූ සෙවණැල්ල පිළිබඳව ඔබ මෙතුවක් කල් දැන නොසිටින්නට ඇති. ඇය ඔහුගේ ආදරණීය බිරිඳ නාමලී සිල්වායි.
අපි අද කියන්නේ පාලිත පිළිබඳ ඇගේ කතාවයි.

• මම
මම ශ්‍රී ලංකා ඉන්ෂුවරන්ස් ආයතනයේ අලෙවි අංශයේ නියෝජ්‍ය ප්‍රධාන අධිකාරීවරිය  වශයෙන් කටයුතු කරනවා. මම පාසල් ගියේ බම්බලපිටිය ශුද්ධ වූ කන්‍යාරමයට හා කොළඹ දේවිබාලිකා විද්‍යාලයටයි. ඊට පස්සේ ලන්ඩන් වරලත් අලෙවිකරණ ආයතනයෙන් අලෙවිකරණ උපාධිය ලබා ගත්තා. මේ වන විට මමත් පාලිතත් තරුණ දරුවන් දෙදෙනෙකුගේ වගකීම් සහිත දෙමව්පියන් විදියට කටයුතු කරනවා.

•හමුවීම
ඇත්තටම මම පාලිතව අඳුනන්නේ අවුරුදු දහයේ ඉඳලයි. අපි දෙන්නා එකම ගමේ (ගල්කිස්සේ) තමයි ජීවත් වුණේ. අපි දෙන්නම එකම දහම් පාස‍ලේ (ගල්කිස්ස ධම්මෝදය දහම් පාසල) එකම පන්තියේ ඉගෙන ගත්තේ. අපි ටියුෂන් පන්ති ගියෙත් එකට. එහෙම බැලුවම  අපි දෙන්නගේ හමුවීම පුංචි කාලය දක්වාම දිව යනවා. ඒ බැඳීම ඒතරම් දිග ඉතිහාසයකට හිමිකම් කියනවා. විශේෂයෙන් කියලා හමුවුණ දිනයක් නැතත් පුංචි කා‍ලේ ඇති වුණ ඒ බැඳීම අදටත් අපි දෙන්නගේ හිත්වල බොහොම සුරක්ෂිතව තැන්පත් වෙලා තියෙනවා.



• යුග දිවිය
ඇත්තටම පාලිතගෙයි මගෙයි යුග දිවිය පිළිබඳව මම අද ආපහු හැරිලා බලද්දී ගොඩක් තෘප්තිමත් වෙන්න පුළුවන්. අපේ දෙමව්පිය පාර්ශ්ව වලිනුත් නෑදෑයන්ගෙනුත්, හිතමිත්‍රාදීන්ගෙනුත් විශාල සහයෝගයක් අපේ විවාහයට ලැබුණා. ඇත්තටම මමයි පාලිතයි දෙන්නම බොහෝ කාර්ය බහුල දෙපළක්. ඒත් අපේ පවුල් දෙකම හරිම එකමුතුයි. ඒ නිසා ඔවුන්ගෙන් හොඳ සහයෝගයක් අපේ යුග ජීවිතයට අදටත් ලැබෙනවා. ඒ වගේම මමත් පාලිතත් අපේ දරුවනුත් පවුලක් විදිහට ගොඩක් ශක්තිමත්. ඒ හේතු සාධකත් සමග ඉතාම සාර්ථක යුග දිවියක් අපි ගතකරමින් සිටිනවා.

• ගෙදර වැඩ
කාර්ය බහුල රංගන ශිල්පියෙක් වුණත් පාලිත ඉතාම හොඳ සහයෝගයක් නිවසේ වැඩ කටයුතු සඳහා ලබා දෙනවා. හැමදේම අහලා බලලා කරලා දෙනවා. මං ගැනත් අපේ දරුවන් ගැනත් අවදියෙන් ඉන්නා පියෙක්, සැමියෙක් ඔහු. පාලිත ගෙදර ඉන්න දවස් වලට එයාගේ අතින්ම ලොකු වැඩ කොටසක් මට කරලා දෙනවා. අපි දෙන්නම කාර්ය බහුල වුණ දවසට නම් දුරකථන හරහා තමයි ගෙදර හැම වැඩක්ම කළමනාකරණය කරගන්නේ.

• එයා ගැන මම විතරක් දන්නා රහස
මම හිතන්නේ ඔහු පිළිබඳ විස්තර බොහෝ දෙනෙක් දන්නවා. මම විතරක් දන්න රහසක් මෙතනදී මතක් කරනවා නම්  කියන්න තියෙන්නේ පාලිත බොහොම නිහඬව රංගන ක්ෂේත්‍රයට වැඩක් කරන ශිල්පියෙක් කියන එකයි. ඔහු කිසිම දවසක මුදල් තණ්හාවෙන් වැඩ නොකරන කලාකරුවෙක්. ඔහු දිවයිනේ පාසල් විශාල ප්‍රමාණයක දරුවන්ටත්, ගුරුවරුන්ටත් රංගන වැඩමුළු පවත්වනවා. බොහෝ අවස්ථාවන් වලදී ඔහු ඒ සේවාවන් ලබා දෙන්නේ මුදල් අය කිරීමකින් තොරවයි. ඔහු මේ දේවල් කවදාවත් මාධ්‍යයට කියන්න කැමති නෑ.

• හෙට දවස
දෙමව්පියන් වශයෙන් අපි නිරන්තරයෙන් හිතන්නේ අපේ දරුවන්ගේ ජීවිත සැපවත් කරන්නනේ. අපි දෙන්නගේ සිහිනයත් ඒකම තමයි. අද වෙද්දී අපේ දරුවන් දෙදෙනා විශ්වවිද්‍යාල අධ්‍යාපනය ලබලා නිවැරදි මාර්ගයට යොමු වෙලා ඉන්නවා. ඉතින් පාලිතත් මමත් දරුවන් දිහා බලලා බොහොම සැනසිල්‍ලේ වර්තමානයේ ජීවත් වෙනවා.

 

සංවාද සටහන - තිනෙති නානයක්කාර
 


ලොව වැඩිම පිරිසක් ගැයූ ගීතය


ගීතයක් කිව්වාට මේක ඇත්තටම ගීත කණ්ඩයක් කියලා කිව්වොත් නිවැරදියි. මේ ගීතය ඔබත් ඕනෑතරම් ගායනා කරලා ඇති. ඒ තමයි Happy Birthday to You ගීතය. 1893 අවුරුද්දේ නිර්මාණය වුණු මේ ගීතය ඇමෙරිකානු ජාතික සංගීතඥ සොයුරියන් දෙදෙනකු වුණු Patty  සහ Mildred J. Hill  විසින් නිර්මාණය කර ගායනා කරන ලද්දක්. ඒ වගේම මෙය භාෂා 18 කට පරිවර්තනය වෙලා තියෙනවා. මේ ගීත කණ්ඩය කොපමණ පිරිසක් ගායනා කරලා තියෙනවාද කියලා හරියටම ගණන් බලන්න බැහැ. මොකද ඔබ මෙය කියවන මොහොතේදීත් ලෝකයේ අතිවිශාල ජනකායක් එය ගායනා කරමින් සිටිනවා.


ලොව දිගින් වැඩිම ගීතය

සාමාන්‍යයෙන් සින්දුවක් අහන්න ගතවෙන්නේ විනාඩි 3 ක, 4 ක විතර කාලයක්නේ. නමුත් ක්‍රිස් බට්ලර් විසින් 1996 අවුරුද්දේ ලියලා සංගීතය යොදපු ඊඩඥ ච්ඥමඪත ට්තඪබජඩ  කියන සින්දුව නම් විනාඩි 3, 4 කින් අහලා ඉවර කරන්න බැහැ. ඒකට හේතුව තමයි මේ සින්දුව විනාඩි 69 ක් දිගයි. ඒ කියන්නේ පැයකුත් විනාඩි 9 ක් පුරා වාදනය වෙනවා. ඒ නිසා මේ සින්දුව ගොඩක්ම ප්‍රසිද්ධ වුණේ දිගින් වැඩිම සින්දුව විදියට මිසක් සම්පූර්ණයෙන්ම අහලා ඉවර කරපු සින්දුව විදියට නම් ‍නෙවෙයි.

වැඩිම පිරිසක් නැරඹූ චිත්‍රපටය

 


මීට අවුරුදු 22 කට කලින් නිර්මාණය වුණු ටයිටැනික් චිත්‍රපටය නරඹපු නැති කෙනෙක්ව සොයා ගන්න එක එච්චර ‍ලේසි වෙන එකක් නැහැ. මොකද කියනවා නම් ලෝක ජනගහනයෙන් සියයට 92 ක් මෙය නරඹා තියෙනවා කියලා සමීක්ෂණයකින් ඔප්පු වෙලා තියෙනවා. ඒ වගේම වයස අනුව බැලුවොත් අවුරුදු 14 ත් 34 ත් අතර පිරිසෙන් සියයට 96 කුත්, 54 ට වැඩි පිරිසෙන් සියයට 93 කුත් මෙය නරඹා තියෙනවා. ඒ වගේම ටයිටැනික් වැඩිපුරම බලලා තියෙන්නේ පිරිමි අය ‍නෙවෙයි කාන්තාවන්. කොහොම වුණත් ඇමෙරිකානු ඩොලර් මිලියන 200 ක් වියදම් කරලා හදපු ටයිටැනික් චිත්‍රපටය ලබා ඇති ආදායම ඇමෙරිකානු ඩොලර් මිලියන 2200 ක් විතර වෙනවා.

වැඩිම කාලයක් තිරගත වූ චිත්‍රපටය



මේ වාර්තාව නම් අයිති වෙන්නේ අපේ අසල්වැසි ඉන්දියාවටයි. 1995 අවුරුද්දේ නිර්මාණය කරපු Dilwale Dulhania Le Jayenge කියන බොලිවුඩ් චිත්‍රපටය 1995 අවුරුද්දේ ඉඳලා සති 1200 ක්, ඒ කියන්නේ අවුරුදු 23 ක් එක දිගට ප්‍රදර්ශනය වුණා. 2018 අවුරුද්දෙන් පස්සේ එය ප්‍රදර්ශනය කිරීම නිල වශයෙන් නතර කළත් ඉන්දියාවේ සමහර චිත්‍රපට ශාලාවල එය දිනකට එක් ප්‍රදර්ශන වාරය බැගින් ධාවනය වෙනවා කියලා වාර්තා වෙනවා. ෂාරුක් ඛාන් සහ කාජල් ප්‍රධාන චරිත රඟන මේ චිත්‍රපටය ඉන්දියානු රුපියල් මිලියන 40 ක් වැය කරලා ඉන්දියානු රුපියල් මිලියන 1220 ක් හම්බ කරපු චිත්‍රපටයක්.

දිගින් වැඩිම චිත්‍රපටය

2012 අවුරුද්දේ ස්වීඩනයේ නිර්මාණය වුණු  Logistics චිත්‍රපටය තමයි මෙතෙක් නිර්මාණය වුණු චිත්‍රපට අතරින් දිගින් වැඩිම චිත්‍රපටය විදියට වාර්තා වෙන්නේ. මෙහි ධාවන කාලය විනාඩි 51420 ක්. පැයවලින් කියනවා නම් පැය 857ක්. නොකා නොබි නිදා ගන්නේ නැතිව එක දිගට මේ චිත්‍රපටය බලනවා නම් ඔබට දවස් 35 කුත් පැය 17 ක් ඒ වෙනුවෙන් වැය කරන්න සිද්ධ වෙනවා. Logistics චිත්‍රපටයෙන් කියවෙන්නේ අනාගතයේ බිහිවෙන්න නියමිත අති නවීන තාක්ෂණික මෙවලම් කීපයක් ගැනයි. එරිකා මැග්නුසන් සහ ඩැනියෙල් ඇන්ඩර්සන්ගේ නිෂ්පාදනයෙන් සහ අධ්‍යක්ෂණයෙන් තමයි එය නිර්මාණය වුණේ. දිගින් වැඩි බව නිසාම මේ චිත්‍රපටය චිත්‍රපට ශාලාවල ප්‍රදර්ශනය කළේ නැහැ. ඩීවීඩී තැටිගත කරලා අලෙවි කරනු ලැබුවා.


වසරක් තුළ ලොව වැඩිම මුදලක් ඉපැයූ රංගන ශිල්පියා

ලෝක ප්‍රකට ෆෝබ්ස් සඟරාව මගින් සිදු කළ  සමීක්ෂණයකින් පස්සේ වසරක් තුළ ලොව වැඩිම ආදායමක් ඉපැයූ රංගන ශිල්පියා විදියට ඇමෙරිකානු ජාතික 57 හැවිරිදි ජෝජ් ක්ලුනි නම් කර තිබෙනවා. 2017 වසරේ ජූනි මස පළමු වැනිදා සිට 2018 වසරේ ජූනි මස පළමුවෙනිදා අතර කාලය තුළ රංගනය වෙනුවෙන් ඔහු උපයා ඇති මුළු මුදල ඇමෙරිකානු ඩොලර්  මිලියන 239 ක්. ඒ කියන්නේ රුපියල් මිලියන 45171 ක විතර මුදලක්. මෙම වාර්තාගත ඉපැයීමත් එක්ක ලොව වැඩිම ආදායම් ලබන ජනප්‍රිය පුද්ගල ලැයිස්තුවේ දවෛනි ස්ථානයට පත් වන්නටත් ඔහුට අවස්ථාව ලැබි තිබෙනවා. 2013 වසරේ බොක්ස් ඔෆීස් වාර්තා තබමින් ප්‍රදර්ශනය වූ සහ 2014 ඇකඩමි සහ ගෝල්ඩන් ග්ලෝබ් සම්මාන උළෙලවල සම්මාන 34 ක් දිනා ගැනීමට සමත් වූ ග්‍රැවිටි චිත්‍රපටයේ ප්‍රධාන චරිතය රඟපෑවෙද ජෝජ් ක්ලූනි විසිනුයි.

ජීවිත කාලය තුළදී රඟපෑමෙන් වැඩිම මුදලක් ඉපැයූ රංගන ශිල්පියා

 

මේ වෙද්දී 70 හැවිරිදි වියේ ඉන්න ඇමෙරිකානු ජාතික සැමුවෙන් ජැක්සන් රංගනයට පිවිසුණේ 1972 අවුරුද්දේ. ඒ වෙද්දී ඔහු වයස අවුරුදු 24 ක කඩවසම් තරුණයෙක්. ක්ෂේත්‍රයට පිවිසිලා අවුරුදු 46 ක් තුළ ඔහු රංගනය වෙනුවෙන් විතරක් ඇමෙරිකානු ඩොලර් මිලියන 5733 ක මුදලක් උපයාගෙන තිබෙනවා. ඔහු රංගනයෙන් දායක වී ඇති චිත්‍රපට ගණන 150 ඉක්මවනවා. රංගනයට අමතරව ඔහු හඬ නළුවකු විදියටත් චිත්‍රපට නිෂ්පාදකවරයකු සහ අධ්‍යක්ෂවරයකු විදියටත් කටයුතු කරනවා. නිෂ්පාදන සහ අධ්‍යක්ෂණ කටයුතු වෙනුවෙන්  ඔහු ලැබූ ආදායම ඉහත සඳහන් කළ මුදලට එකතු කර නොතිබිමත් තවත් විශේෂත්වයක්.


දුලංජලී මුතුවාඩිගේ
 

Page 2 of 6

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.