lakbima.lk

ලෝචනා ඉමාෂි පසුගිය කාලයේ රට අතහැරලා යන්නම ගිහින් කියලයි පසුගිය කාලයේ බොහෝ මාධ්‍ය වාර්තා කර තිබුණේ. නමුත් රට හැරලා ගියා කියන ලෝචනා පසුගිය දවසක පාමංකඩ ප‍්‍රදේශයේ සැලෝන් එකකදී අපට අහම්බෙන් වගේ මුණ ගැහුණා.

ආයෙමත් එන්නේ නැහැ කියලා නෙදර්ලන්තයට ගිය ලෝචනා හොරෙන්ම ආපහු ලංකාවට ඇවිත් නේද?

හුඟක් මාධ්‍ය මම ආයෙමත් ලංකාවට එන්නේ නැහැ කියලා පළ කරලා තිබුණා. එ් වගේ දෙයක් මගේ කටින් කියවෙන්නත් ඇති. හැබැයි මට නෙදර්ලන්තයට ගිහින් වැඩි කාලයක් ඉන්න බැරි වුණා. නිතරම මගේ හිත තිබුණේ ලංකාවට දුවගෙන එන්න. අන්තිමේදී එන්නේ නැහැයි කියපු මම මාස හතරකින් පහකින් ආපහු ආවා.

ඔබේ සැමියා ලසන්ත ඉන්නේ නෙදර්ලන්තයේ. ඉතින් ලෝචනා මේ තරම් හදිසියෙන් ලංකාවට දුවගෙන එන්නේ ඇයි?

ලසන්ත එහේ ඉන්නේ එයාගේ රැුකියාව නිසා. ඇත්තටම එ් රට ගොඩක් හොඳයි. මොනම දේකවත් අඩුවක් දැනෙන්නේ නැහැ. ඒත් එහේ ඉන්න කොට තමන්ගේ රට කියන හැඟීම නම් දැනෙන්නේ නැහැ. කලාවෙන් ඈත්වෙලා, නෑදෑයන්ගෙන් ඈත්වෙලා එහෙදී අපි ඉන්නේ තනිවෙලා. ඒ රටේ ලංකාවේ අයත් ගොඩක් අඩුයි. ඒකයි මම නිතරම ලංකාවට එන්නේ.

කොහොමත් ඉස්සරහට බබාගේ අධ්‍යාපන කටයුතුත් එක්ක නම් ලෝචනාට නෙදර්ලන්තයේ නවතින්නම වේවි නේද?

ලසන්තයි මායි මේ වෙද්දී තීරණය කරලා තියෙන්නේ බබාගේ අධ්‍යාපන කටයුතු නෙදර්ලන්ඞ්වල කරන්න. එ් නිසා මම ඉදිරියේදී කලාවෙන් ඈත්වෙලා දරුවා වෙනුවෙන් ඒ කැප කිරීම කරන්නත් ඉඩ තියෙනවා.ඉස්සරහට බලමු මොකද වෙන්නේ කියලා.

ඉතින් මේ දවස්වල ලෝචනා මොකද කරන්නේ ?

මේ දවස්වල මම දිගටම මගේ සැලෝන් එකේ වැඩවලයි යෙදිලා ඉන්නේ. මොකද මට සැලෝන් එක පටන් ගත්ත ගමන් හදිසියේ රට යන්න වුණා. ඉතින් ආපහු ආව ගමන් ඒ වැඩත් එක්ක මම දැන් ටිකක් කාර්යබහුලයි.

සැලෝන් එක ගැන විස්තර ටිකක් කියන්නකෝ. ?

මගේ සැලෝන් එක තියෙන්නේ පාමංකඩ. Sallon losh තමයි එ්කෙ නම. මනාලියන් හැඩගැන්වීමට අමතරව රූපලාවණ්‍ය සත්කාර කරනවා. එතැනදී රට රටවල තිබෙන විවිධ සත්කාරක ක‍්‍රම හඳුන්වාදෙන්න බලාපොරොත්තු වෙනවා. ළඟදී අපි ජපානයේ තිබෙන සත්කාරක ක‍්‍රම හඳුන්වා දෙන්නත් බලාපොරොත්තු වෙනවා. අද ගොඩක් අයට තියෙන සුදු වීමේ ආසාව ඉටුකර ගැනීමේදී සමට අහිතකර නොවන ආකාරයට ඒ සත්කාර කර ගැනීමේ අවස්ථාව මගේ සේවාදායකයන්ට ලබාදෙන්නත් බලාපොරොත්තු වෙනවා.

දැන් ලෝචනාට රංගනයට ඇරයුම් ලැබෙන්නේ නැහැ කියන කතාව ඇත්තද?

මට මුල ඉඳලම මෙගා ටෙලි නාට්‍යවලට ආරාධනා  ලැබුණා. ඒත් මම රටවල් දෙකක ඉඳගෙන ඒ ආරාධනා භාරගත්තා නම් මට ඒවා වෙනුවෙන් සාධාරණයක් ඉටු කරන්න බැරි වෙනවා. නමුත් දැන් නම් මම කාලයක් ලංකාවේ නවතින්නයි හිතාගෙන ඉන්නේ. ඒ නිසා දැන් මට නිර්මාණවලට එකතුවෙන්න හැකියාව තියෙනවා.

කලාව හා රැඳෙමින් ඔබ කරන ගනුදෙනුව ගැන සැමියා යහපත් ප‍්‍රතිචාරයක්ද දක්වන්නේ?  

එයාත් කලාවට සම්බන්ධ කෙනෙක්. බබා ලැබුණු දවසේ ඉඳලම එයා මට කලා කටයුතු කරගන්න අවශ්‍ය පසුබිම හදලා දුන්නා. කොහොමත් මම කලාවට සම්බන්ධ වීම ලසන්තට ප‍්‍රශ්නයක් නෙමෙයි. මට නිතරම නෙදර්ලන්ඞ් යන්න වෙන නිසා කලා කටයුතු වලින් ටිකක් දුරස්වෙන්න වුණත් එයා නිතරම කියන්නේ හොඳ නිර්මාණයක් ලැබුණොත් බාරගන්න කියලයි.

තමාරා කල්හාරි පතිරණ

ටෙලි නාට්‍ය නිළියක් නම් වෙන්නේ නැහැයි කියපු ටීනා රංගනයෙන් දායක වන “සකූගේ කතාව” ටෙලි සිත්තම පිළිබඳව මේ දවස්වල කාගේත් අවධානය යොමු වෙලා. ඔය අතර සකූගේ කතාවේ ටීනාගේ රංගනය ගැන විවේචනාත්මකව කතා කරන පිරිසකුත් ඉන්නවා. ඒ අයට ටීනා කිව්වේ මොනවාද කියලා දන්නවාද?

අපි ඉස්සෙල්ලාම මේ දවස්වල ටීනාගේ ජීවිතය ගවෛන හැටි කියමුකෝ?

මේ දවස්වල සකූගේ කතාව ටෙලි නාට්‍ය නිසා ටිකක් විතර කාර්ය බහුලයි. ප්‍රියන්ත කොළඹගේ අධ්‍යක්ෂණය කරන සකූගේ කතාව ගැන ගොඩාක් අය කතා වෙනවා.  ටෙලි නාට්‍ය නොබලන අය පවා මේ කතාව බලන්නට පුරුදු වෙලා ඉන්නවා. අද වෙනකොට ටෙලි නාට්‍ය අතර මුල් තැනට සකූගේ කතාව ඇවිත් තියෙන එක ගැන නම් හරිම සතුටුයි. ඒ ප්‍රශංසාව හිමිවිය යුත්තේ නම් එහි අධ්‍යක්ෂ ප්‍රියන්ත කොළඹගේටයි.

නමුත් ඔබ ක්ෂේත්‍රයට ආවේ නම් කවදාවත් ටෙලි නාට්‍යවලට සම්බන්ධ වෙන්නේ නැහැ කියලා නේද?

කොහොමත් මම කලා ලෝකය හඳුනාගත්තේ චිත්‍රපට රංගනයෙන්. ටෙලි නාට්‍යවලට සම්බන්ධ වෙන්න විශේෂ කැමැත්තක් මගේ තිබුණේ  නැහැ. ඒත් මගේ පළමු චිත්‍රපටයේ අධ්‍යක්ෂ ප්‍රියන්ත කොළඹගේ මහතා ඔහුගේ ටෙලි නාට්‍යයේ රංගනයට මට කළ ආරාධනාව ඉවත දමන්න  මට බැරි වුණා. අනෙක ඔහු වැනි කුසලතා පූර්ණ නිර්මාණකරුවෙකුගේ නිර්මාණයක් සාර්ථකත්වය කරා ළඟා වෙන බව මට දැනුණා. ඒ නිසයි. ටෙලි නාට්‍ය රංගනයට මම යොමු වුණේ. අද වෙනකොට ඊට හොඳ ප්‍රතිචාර ලැබෙමින් පවතිනවා. ඒත් මට ඊර්ෂ්‍යා කරන අයත් ඉන්නවා.

ඇයි ඔබට ඔවුන් ඊර්ෂ්‍යා කරන්නේ?

මට මේ ක්ෂේත්‍රයේ ඊර්ෂ්‍යා කරන අය ගොඩාක් ඉන්නවා. ඒ අය කවුද කියලා නම් වශයෙන් කියන්න මම කැමති නැහැ. නමුත් කවුරු හෝ කෙනෙක් මගේ වැරදි කිය කියා යනවා නම් ඒ ඊර්ෂ්‍යාව නිසානේ. කොහොමත් මොඩ්ලින් කරන ගොඩාක් අය ළඟ ඔය වගේ හැසිරීම්  තියෙනවා. හැබැයි ඒ හැමෝටම හොඳම උත්තරේ මම දීලා තියෙන්නේ.

ඒ කියන්නේ ටීනා අභියෝගය භාර අරගෙන?

ඔව්. මම කටින් උත්තර දෙන කෙනෙක් ‍නෙවෙයි. මම කරන කියන දේ එක්ක ඒ වගේ ඊර්ෂ්‍යා කරන අයට උත්තර ලැබෙනවා. මොකද මම කරන වැඩ කටයුතු එක්ක මාව අද වෙද්දී කතා බහට ලක් වෙන චරිතයක් වෙලා ඉවරයි. මේ හැමදේම මට ලැබුණේ ප්‍රියන්ත අයියා මාව ක්ෂේත්‍රයට ගෙනාව නිසා. එයාට ගොඩාක් ස්තූතියි.

කැපිලි කෙටිලි මැද දිවෙන ජීවිතේ ඔබට අභියෝගයක් ‍නෙවෙයිද?

එහෙන් මෙහෙන් කකුලෙන් ඇදිලි ගොසිප් මේ දේවල් තමා මගේ ශක්තිය. මොකද මනුස්සයෙක් ගැන කවුරුත් කතා බහට ලක්කරන්නේ නැත්නම් වැඩක් නැහැනේ. අද මාව මිනිස්සු මනින්නේ මියුසික් වීඩියෝ හරහා. එහෙමත් නැත්නම් මම අඳින පළදින විදියෙන්. ඒක මගේ පෞද්ගලික කැමැත්ත. මොඩල් කෙනෙක් විදියට මම කැමති දෙයක් අඳින්න නිදහස තියෙනවා. කොහොමත් අපි රසිකයන් ඉදිරියට එන්නේ චරිතයකින්. එතැනදී අපි නිරූපණය කරන්නේ චරිතයක්. එය අපේ සැබෑ චරිතය ‍නෙවෙයි. ඒ නිසා බොරු කට කතා වලට රැවටෙන්න එපා. කතාවක් හදන්න කලින් ඒ පුද්ගලයා කවුද කියලා අවබෝධ කර ගෙන ඉන්න. අපි දෙයක් කරන්නේ රසිකයන් පිනවන්නයි. ඒක වැරදි විදියට තේරුම් අරගෙන දකින දකින තැන ඒ පුද්ගලයව විවේචනය කරන එක නම්  මම අනුමත කරන්නේ නැහැ.

සකූගේ කතාවෙන් පස්සේ අලුත් ටෙලි නාට්‍යවලට ආරාධනා ලැබුණේ නැද්ද?

ප්‍රියන්ත අයියගේ නිර්මාණයක් නිසා සම්බන්ධ වුණත් මම අදටත් ටෙලි නාට්‍ය ක්ෂේත්‍රයට කැමැති නැහැ. ඒ නිසා හැම ටෙලි නිර්මාණයක්ම භාරගන්නේ නැහැ. මාව ඉස්මතු වෙන, හොඳ පිටපතක් ලැබුණොත් ඉදිරියේදී සම්බන්ධ වෙනවා. එහෙම නැතිව කතා කරපු පමණින් මම නිර්මාණ භාර ගන්නේ නෑ.

ඉදිරියේ එන්න තිබෙන චිත්‍රපට මොනවාද?

මගේ ප්‍රථම චිත්‍රපටය වාණිජ චිත්‍රපටයක්. දෙවන චිත්‍රපටය සමීර වක්වැල්ලගේ හෝර්න්. මේක හොරර් ෆිල්ම් එකක්. මේ චිත්‍රපට දෙකම ඉදිරියේදී එන්න තියෙනවා.

තමාරා පතිරණ

වොල්ගා කල්පනී කියන්නේ කාලයක පටන් රසික ආදරය දිනා ගත් රංගන ශිල්පිනියක්. ඇය විවාහ ගිවිසගෙන සිටින්නේ තවත් ජනප්‍රිය නළුවකු වන හර්ෂණ බෙත්මගේ සමගයි. මේ දෙදෙනා ගැනත් එක් එක් විදියේ කට කතා මේ දවස්වල පැතිර යනවා.

කොහොමද වොල්ගා ජීවිතේ?

ජීවිතේ සුන්දරයි. මේ දවස්වල හරිම ලස්සන වැඩක් කරගෙන යනවා. ඒ රොෂාන් කුරුප්පු මහත්මයා අධ්‍යක්ෂණය කරන 'නිරාවරණ' කියන ටෙලි නාට්‍යයේ. ඊට අමතරව ජනක චමින්ද කියන මහත්මයාගේ 'අපේ ආදරේ' ටෙලි නාට්‍යයෙත් මම වැඩ කරනවා. ඔය අතර  රවීන්ද්‍ර විජේරත්න මහත්මයාගේ සූරියවංශ ටෙලි නාට්‍යයෙත් මම රඟපානවා. සුදත් දේවප්‍රිය මහත්මයාගේ ටෙලි නාට්‍යයක රූපගත කිරීම් දෙසැම්බරයේ ආරම්භ වීමට නියමිතයි.

නිරාවරණ ලස්සන වැඩක් කිව්වේ මොකක්ද එහි තිබෙන විශේෂත්වය?

එහි වැඩ කරන නිර්මාණකරුවන් වගේම රොෂාන් කුරුප්පු මහත්මයා කියන්නේ බොහොම සුන්දර නිහතමානී අයෙක්. මගේ වාසනාවකට තමයි ඔහුගේ නිර්මාණයකට දායක වෙන්න ලැබුණේ. ඒ වගේම ඒ කතාව බොහොම වෙනස්. මම ඒ ගැන කියනවට වඩා ඉදිරියේදී විකාශනය වීමට නියමිත ඒ නාට්‍යය නරඹලම ඒ අත්දැකීම විඳ ගන්නවා නම් බොහොම හොඳයි. මට දැනෙන විදියට කාලයකට පස්සේ ආපු බොහොම අපූරු නිර්මාණයක්.

මේ දවස්වල නිර්මාණත් එක්ක කාර්ය බහුලයි වගේ. ජීවිතය මොන වගේද දැනෙන්නේ?

කොහොමත් මම ක්ෂේත්‍රයට ආව දවසේ ඉඳලා කාර්ය බහුල නිළියක් ‍නෙවෙයි. මොකද මම මගේ නිදහසට කැමතියි.

ඒ කියන්නේ කොපමණ වැඩ තිබුණත් ඔබ ජීවිතේ නිදහසේ විඳිනවා?

ජීවිතේ කියන්නේ හරිම සුන්දර දෙයක්. ඒ දිහා අපි බොහොම සුන්දර විදියට බලන්න ඕනේ. ඕනවට වඩා අහස් මාලිිගා හදන්නවත්, අනවශ්‍ය දේවල් ‍පොදි බැඳගෙන ජීවත් වෙන්නවත් නැතිව සාමාන්‍ය විදියට ජීවත් වෙලා අපට ලැබෙන දේවල් දිහා සුන්දරව බැලුවොත් අපට  ජීවත්වෙන්න පුළුවන්.

නමුත් නිදහසේ ගලා යන ජීවිතයට යම් යම් බාධක හැල හැප්පීම් ආවොත් ඒ වෙලාවට මොකද කරන්නේ?

කේට් කුමරියටත් එයාගේ ජීවිතයට බාධක එනවා ඇති. බාධක කියන දේ ජීවිතවලට එන්නම ඕනේ, නැත්නම් ජීවිතේ රහක් නෑනේ. රහ වෙන්න නම් බාධකත් එන්න ඕනේ.

ඔබ සතුටින් ඉන්නා මොහොතක බාහිර සමාජය  ඔබගෙ ජීවිතයට යම් බලපෑමක් එල්ල කරන්නේ නැද්ද?

මම ‍පොඩි කාලයේ ඉඳලම ජීවත් වෙන විදියක් තියෙනවා. මම දන්නවා නම් මං ගැන, මගේ අම්මා තාත්තා දන්නවා නම් මගේ සහෝදරයා දන්නවා නම්, මගේ මහත්මයා දන්නවා නම් මට ඕනේ එච්චරයි. සමාජයට ඕනේ විදියට අපට ජීවත් වෙන්නත් බැහැ. බාහිර සමාජය කියන දේවල් ඔළුවට දාගෙන අපට ජීවත් වෙන්නත් බැහැ.

සුන්දරව ගලාගෙන ආව නදියක් වගේ ඔබගෙත් හර්ෂණගෙත් ජීවිතේ ගලාගෙන ගියා. එය එදා වගේමද අදත්?

එදා වගේම ජීවිතේ සුන්දරව ගලාගෙන යනවා. ප්‍රශ්නයක් නැහැ. නමුත් පෞද්ගලික ජීවිතේ ගැන අනවශ්‍ය ලෙස කතා කරන්න මම කැමති නැහැ. කොටින්ම කට කතා වලට උත්තර දෙන්නත් මම කැමති නැහැ.

අනාගතය ගැන වොල්ගාගේ හිතේ මොන වගේ හීනයක්ද තියෙන්නේ?

මට තේරෙන දවසේ ඉඳලා ක්ෂේත්‍රය පැත්තෙන් හොඳ වැඩවල යෙදිලා වොල්ගා කල්පනී කියන නම හොඳ තැනක තියාගන්න ඕනේ කියන හැඟීම මට තිබුණා. මගේ අම්මා තාත්තා බලාගෙන මගේ පවු‍ලේ අයත් එක්ක සතුටින් අනෙක් අයට කරදරයක් නොවී ජීවත් වෙන එක තමයි මගේ ජීවිතයේ එකම බලා‍පොරොත්තුව.

තමාරා කල්හාරී පතිරණ

Page 2 of 3

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.