Coss Ear2
lakbima.lk
COSS Ear 1

අද (මැයි 9)  පැවැත්වෙන මැ‍ලේසියානු මහ මැතිවරණය විශාල ජාත්‍යන්තර අවධානයක් දිනාගන්නට සමත්ව තිබේ. එයට ප්‍රධානම හේතුවක් වී තිබෙන්නේ වසර 15 කට පෙර අගමැති ධුරයෙන් සමුගත්, නූතන මැ‍ලේසියාවේ පියා ලෙස සැලකෙන මහතීර් මොහොමඩ් වයස අවුරුදු 92 දී නැවත වරක් මැතිවරණයට ඉදිරිපත් වීමයි. 
ඔහු මේ ආකාරයෙන් දේශපාලන ‍පොර පිටියට අවතීර්ණ වන්නේ 2003 වසරේ අගමැති ධුරයෙන් සමුගැනීමෙන් අනතුරුව ය.  1981 සිට 2003 දක්වා වසර 22 ක කාලයක් ඔහු මැ‍ලේසියාවේ අගමැති ධුරය දැරුවේය. මෙවර ඔහු මැතිවරණයට ඉදිරිපත් වන්නේ එම වසර 22 තුළම තමා නායකත්වය දැරූ පක්ෂයට, එනම් එක්සත් මැ‍ලේවරුන්ගේ ජාතික සංවිධානය (United Malays' National Organization)  ට විරුද්ධව වීම තවත් අපූරු විශේෂත්වයකි. 
මහතීර් 2016 වසරේ එම පක්ෂයෙන් ඉවත් වීමට එක් ප්‍රධාන හේතුවක් ලෙස සඳහන් වන්නේ ඒ වනවිට පක්ෂ නායකයා මෙන්ම අගමැතිවරයා ද ලෙස කටයුතු කරමින් සිටි නජීබ් රසාක් ට එරෙහිව බරපතළ දූෂණ චෝදනා එල්ල වීමයි. එහි ඇති අනෙක් සරදම වන්නේ නජීබ් රසාක් යනු කලකට පෙර මහතීර් විසින්ම රෙකමදාරු කරන ලද චරිතයක් වීමය. මැ‍ලේසියානු රජයට අයත් ආයෝජන සමාගමකින් ඇමෙරිකානු ඩොලර් මිලියන 700 කට ආසන්න මුදලක් නජීබ්ගේ පෞද්ගලික ගිණුම්වලට යොමු කර ඇති බවට වන චෝදනාව අගමැතිවරයා මුහුණ දී සිටින ප්‍රධාන අභියෝගයකි. මෙම චෝදනා නිසා වරක් ඔහුට අගමැති ධුරයෙන් ඉල්ලා අස්වන ලෙසටද බලපෑම් එල්ල විය. මේ වනවිට මේ සම්බන්ධයෙන් ජාත්‍යන්තර පරීක්ෂණයක් ද ක්‍රියාත්මක වෙමින් තිබේ.
මහතීර් දැන් නායකත්වය දරන්නේ 2016 වසරේම ඔහු විසින් පිහිටුවා ගන්නා ලද  මැ‍ලේසියානු එක්සත් ස්වදේශීය පක්ෂයේ යි. එම පක්ෂය ද ඇතුළත් වන සන්ධානයක් මෙවර මැතිවරණයේදී වත්මන් අගමැති නජීබ් රසාක්ගේ සන්ධානයට එරෙහිව තරග කරයි.
මහතීර් මොහොමඩ් මැ‍ලේසියාවේ කැපී පෙනෙන නායකයෙකු ලෙස කීර්තියක් අත් කරගත්තේ එරට වඩාත් දියුණු, ධනවත්, නවීන රාජ්‍යයක් බවට පත්වූයේ ඔහුගේ කාලයේ වූ බැවිනි. එක දිගට පස් වතාවක් මැතිවරණවලින් ජය ගනිමින් ඔහු මැ‍ලේසියාව තුළ විශාල බලයක් තහවුරු කරගත්තේය. කෙසේ නමුත් එම කාලය තුළ එරට මානව හිමිකම්, ප්‍රජාතන්ත්‍රවාදී අයිතීන්  ආදිය සම්බන්ධයෙන් මර්දනකාරී වාතාවරණයක් ඇති වූ බවද ප්‍රසිද්ධ කාරණයකි. විශේෂයෙන් ඔහුගේ දේශපාලන ප්‍රතිවාදීන් මර්දනය කිරීම සඳහා මහතීර් නිර්දයව කටයුතු කළ බවට චෝදනා එල්ල වෙයි.
1999 වසරේ දී, ඔහුගේ උප අගමැතිවරයා ලෙස හුන් අන්වර් ඉබ්‍රහිම් සිරගත කිරීමට කටයුතු කළ බවට එල්ල වන චෝදනාව ඒ අතරින් කැපී පෙනෙන්නකි. අන්වර්ට එරෙහිව එල්ල කළ චෝදනා අතර ප්‍රධාන තැනක් ගත්තේ සමලිංගික සබඳතාවක් පිළිබඳ එකකි. නමුත් ඔහු මේ ආකාරයෙන්  සිරගත කිරීම බටහිර රටවල් ඇතුළු විවිධ පාර්ශ්ව විසින් හඳුන්වන ලද්දේ දේශපාලන පලිගැනීමක් වශයෙනි. ඒ වනවිට අන්වර් සහ මහතීර් අතර යම්  යම් ගැටුම් ඇතිවෙමින් තිබූ බව දක්නට ලැබිණි. මහතීර් බටහිර රටවල් සමග එතරම් ඇඟෑළුම්කමක් නොදැක් වූ කෙනෙකු වූ අතර අන්වර් එයට වෙනස් ආකල්පයකින් කටයුතු කළ කෙනෙකු විය. 
මේ නිසා මොවුන් දෙදෙනා අතර   ප්‍රතිපත්තිමය වශයෙන් බොහෝ වෙනස්කම්  පැවති බව පෙනිණි. කෙසේ හෝ වේවා තමාගෙන් පසු අන්වර් බලයට පැමිණියහොත් මැ‍ලේසියාව බටහිර ගැති රාජ්‍යයක් බවට පත් වනු ඇතැයි යන බිය මෙන්ම තමාගේ හිතවත් ව්‍යාපාරිකයින්ට යම් යම් ගැටලු ඇති වනු ඇතැයි යන සැකසංකා ද මහතීර් තුළ තිබුණු බව පෙනිණි. කෙසේ හෝ වේවා, මෙවර මහතීර් මැතිවරණයට ඉදිරිපත් වන්නේ ඔහු අතින්ම අසාධාරණයන්ට ලක් වූ බව පැවසෙන අන්වර් ඉබ්‍රහිම් ද නියෝජනය කරන විපක්ෂ සන්ධානය යටතේම වීම තවත් අපූරු කාරණයකි.  දේශපාලනය තුළ සදාකාලික සතුරන් මිතුරන් නැති බව ඉතා අපූරුවට පෙන්වන අවස්ථාවකි. 
2004 වසරේ අන්වර් සිරෙන් නිදහස් කරනු ලැබූවත් 2015 දී නැවතත් සිරගත කරනු ලැබිණි. ඒ වනවිට ඔහු සිටියේ විපක්ෂයේ යි. ඔහු තවමත් සිටින්නේ බන්ධනාගාරගතව වන අතර මේ නිසා පසුගිය කාලය තුළ පැවතියේ මැ‍ලේසියානු විපක්ෂයට ප්‍රබල නායකයෙකු නොමැති තත්ත්වයකි. මහතීර් ඒ සඳහා ඉදිරිපත්ව තිබෙන්නේ මෙම තත්ත්වය යටතේය. මහතීර්  පවසන්නේ දූෂණ වංචාවලින් ගහණ නජීබ් රසාක් පාලනයෙන් මැ‍ලේසියාව ගලවා ගත යුතු බවයි. ඒ නිසා තමාට මෙම අවස්ථාවෙහි අන්වර් සමග එක්වීම ගැටලුවක් නොවන බවයි. 
තමා බලයට පත් වුවහොත් අන්වර් ඉක්මනින් නිදහස් කිරීමට පියවර ගෙන ඔහුට අගමැති ධුරය පවරා ඉවත් වන බව ද මහතීර් ප්‍රකාශ කර තිබේ.  මේ අතර අන්වර්ගේ පාර්ශ්වයෙන්ද ප්‍රකාශ වී ඇත්තේ මහතීර් ඔහුට එරෙහිව බොහෝ විරුද්ධකම් කළ කෙනෙකු වුවද මේ මොහොතේ මැ‍ලේසියාවේ අනාගතය වෙනුවෙන් ඔහු සමග එක්ව සටන් කිරීමට තීරණය කළ බවයි. කෙසේ නමුත් මහතීර් පවසා ඇති ආකාරයට ඔහු බලයට පැමිණියහොත් අන්වර්ට ඉඩ දී ඉවත් වනු ඇත්ද යන්න පිළිබඳව සැක පළ කරන උදවිය ද නැතුවා නොවේ.
මැ‍ලේසියාව තුළ පවතින මෙම බල අරගල හා බැඳුණු ජාත්‍යන්තර සාධක සම්බන්ධයෙන්ද අමතක කළ හැකි නොවේ. මැ‍ලේසියාව අග්නිදිග ආසියාවේ ප්‍රබල රාජ්‍යයක් වන අතර චීනයට මෙන්ම ඇමෙරිකාව ඇතුළු බටහිර කඳවුරට ද වැදගත් පාර්ශ්වයකි. පසුගිය කාලය තුළ චීනය සහ මැ‍ලේසියාව අතර සබඳතා බෙහෙවින් වර්ධනය වූ බවක්ද පෙනී යයි. චීනයේ ආයෝජන විශාල වශයෙන් එරටට ලැබෙමින් ඇති බවද රහසක් නොවේ. මෙම තත්ත්වය යටතේ, කවදත් ඇමෙරිකාව ඇතුළු බටහිර කඳවුරේ හිතවතෙකු වූ අන්වර් ඉබ්‍රහිම් සමග කලින් බටහිර විරෝධියෙකු ලෙස සැලකුණු මහතීර් එක පිලකට ඒම සැලකිල්ලට ලක්විය යුත්තකි. 
මැ‍ලේසියාව වැනි රටවල් ආසන්නයේ පිහිටි දකුණු චීන මුහුදු කලාපය තුළ චීනයේ ආධිපත්‍යය ද බටහිර රටවලට කිසියම් හිසරදයක් වී ඇති කාරණයක් බව රහසක් නොවේ. මෙහිදී මෙම කලාපය තුළ  සිය බලය කළමනාකරණය කර ගැනීමේදී මැ‍ලේසියාව ඇතුළු එම කලාපයේ සෙසු රටවල සහය දිනාගැනීම චීනයට වැදගත් වන අතර  බටහිරට ද මෙම රටවල් වැදගත් වන්නේ ඉහත කී චීන ආධිපත්‍යය සමග ගනුදෙනු කිරීමේදී එය තීරණාත්මක වන බැවිනි. මැ‍ලේසියාවේ අභ්‍යන්තර බල අරගල තේරුම් ගැනීමේ දී මෙවැනි සාධක සම්බන්ධයෙන්ද අවධානය යොමු කිරීම වැදගත් වන බව අමුතුවෙන් කිව යුතු නොවේ. 
අද දින පැවැත්වෙන මැතිවරණයෙන් කව්රුන් ජයගනු ඇත්ද යන්න පිළිබඳව තවමත් නිශ්චිතව කිව හැකි නොවේ. ප්‍රධාන පාර්ශ්ව අතර තියුණු තරගයක් පවතින බව මේ වනවිට පැවසෙන තත්ත්වයයි. 2013 වසරේ පැවැති පසුගිය මැතිවරණයේදී  රට තුළ වැඩි ඡන්ද සංඛ්‍යාවක් දිනාගත්තේ අගමැතිවරයාගේ පක්ෂය ඇතුළත් සන්ධානය නොවේ. ඔවුන් ඡන්ද ලක්ෂ 52 ක් දිනාගනිද්දී විපක්ෂ සන්ධානයට ඡන්ද ලක්ෂ 56 ක් දිනා ගැනීමට හැකි විය. නමුත් කේවල ඡන්ද ක්‍රමයක් ක්‍රියාත්මක වන මැ‍ලේසියාව තුළ මැතිවරණ ක්‍රියාදාමයේ ඇති කර තිබූ තත්ත්වයන් නිසා ඡන්ද අඩුවෙන් දිනාගත්ත ද එරට පාර්ලිමේන්තුවේ වැඩි ආසන ගණනක් දිනා ගැනීමට අගමැතිවරයාගේ සන්ධානයට හැකියාව ලැබිණි. මෙවර ද ඔහුගේ සන්ධානය ගන්නා ඡන්ද සංඛ්‍යාවට වඩා විපක්ෂ සන්ධානය ඡන්ද ගනු ඇතැයි යන්න නිරීක්ෂකයින්ගේ විශ්වාසයයි. නමුත් විවිධ උප්පරවැට්ටි හරහා මෙවරද ආසන සංඛ්‍යාව වැඩි කර ගැනීමට නජීබ් රසාක්ගේ පාර්ශ්වය  දැනටමත් කටයුතු කර ඇති බවට තොරතුරු පළවේ.
 
නිහාල් පීරිස්
  1. ජනපති පුටින් රුසියාවේ නිෂ්පාදිත රියකින් ක්‍රෙම්ලිනය වටා යයි
  2. ඉරාන න්‍යෂ්ටික ගිවිසුමෙන් ඉවත් නොවන ලෙස බ්‍රිතාන්‍ය විදේශ ‍ලේකම් ට්‍රම්ප්ගෙන් ඉල්ලයි
  3. ඉන්දියාව තුළ ලිංගික අපරාධ ඉහළ යන්නේ ඇයි?
  4. ඩොනල්ඩ් ට්‍රම්ප් - කිම් ජොං උන් හමුව ගැන ලොවම විමසිල්ලෙන්
  5. පිලිපීනය කුවේටයට ගෘහ සේවිකාවන් යැවීම තහනම් කරයි
  6. 65 වසරකට පසු උතුරු කොරියානු නායකයෙක් දකුණු කොරියාවට එයි
  7. ට්‍රම්ප් සහ ඉරානය අතර ‘න්‍යෂ්ටික ප්‍රශ්නය’
  8. දහයක් මරාදැමූ සැකකරුගෙන් ප්‍රශ්න කරයි
  9. බිරියගේ මරණයෙන් දිනකට පසු හිටපු ජනපතිවරයාත් රෝගාතුර වෙයි
  10. සංචාරකයින්ට මරු කැඳවූ බස් අනතුර ගැන උ.කොරියානු නායක සොව පළකරයි
  11. අතරමං වූ දැරියට තනි රැක්ක මහලු සුනඛයා
  12. කුඩා දරුවන්ද ඇතුළු 57 දෙනෙකුට මරු කැඳ වූ ඇෆ්ගන් බෝම්බය
  13. කියුබාවේ කස්ත්‍රෝලාගේ පාලනය අවසන් වෙයි
  14. ඇමෙරිකාවේ ගුවන්යානයක පිපිරීමකින් කාන්තාවක් මරුට
  15. මෝරුන්ගේ ප්‍රහාර නිසා ඔස්ට්‍රේලියාවේ තරගාවලියක් අවලංගු කරයි
  16. සී.අයි.ඒ. නායකයා හා උතුරු කොරියානු නායකයා අතර රහසිගත හමුවක්
  17. සිරියාවෙන් හමුදාව ඉවත්කර නොගැනීමට ඇමෙරිකානු ජනපති කැමැති කරවාගත් බව ප්‍රංශ ජනපති කියයි
  18. බටහිර බලවතුන් සිරියාවට එල්ල කළ මිසයිල ප්‍රහාරයෙන් පසු කුමක් සිදුවේවිද?
  19. ඇමෙරිකාව සහ රුසියාව අතර යුද ගැටුමක් ගැන බිය පළවෙයි
  20. තමිල්නාඩුවේ අයි.පී.එල් තරග එපා
  21. වසර 24 ක සිර දඬුවම් නියම වූ දකුණු කොරියාවේ හිටපු ජනාධිපතිනිය
  22. බ්‍රසීලයේ හිටපු ජනපති සිරදඬුවම ඇරඹිය යුතු බවට අධිකරණයෙන් නියෝගයක්
  23. වැඩ වර්ජන රැල්ලකින් ප්‍රංශය උණුසුම් වෙයි
  24. දකුණු කොරියානු ‍පොප් සංගීතඥයෝ උතුරු කොරියාවේ ප්‍රසංග පවත්වති
  25. චීනයෙන් ඇමෙරිකාවට ප්‍රතිචාර

 

Lakbima Online

Download Lakbima Mobile App

 
 

 

Get In Touch With Us

E-Papers

Please publish modules in offcanvas position.