Coss Ear2
lakbima.lk
COSS Ear 1

බංග්ලාදේශ තුන්කොන් ක්‍රිකට් තරගාවලිය යටතේ ඊයේ (23දා) ධකාහි පැවැති බංග්ලාදේශය සහ සිම්බාබ්වේ අතර තරගයෙන් ලකුණු 91ක ජයක් වාර්තා කිරීමට බංග්ලාදේශය සමත් විය.
මුලින්ම පන්දුවට පහර දුන් බංග්ලාදේශය පන්දුවාර 50දී කඩුලු 9ට ලකුණු 216ක් රැස් කළ අතර, පිළිතුරු ඉනිම ක්‍රීඩා කළ සිම්බාබ්වේට පන්දුවාර 36.3කදී සියලු දෙනා දැවී රැස්කරගත හැකිවූයේ ලකුණු 125ක් පමණි.

මේ අනුව බංග්ලාදේශය තරගාවලියේ එකම අපරාජිත කණ්ඩායම බවට පත්වී සිටින අතර, අවසන් මහා තරගයට සුදුසුකම් ලබන අනෙක් කණ්ඩායම හෙට (25දා) පැවැත්වෙන බංග්ලාදේශය සහ ශ්‍රී ලංකාව අතර තරගයෙන් තීරණය වෙයි.
මුලින්ම පන්දුවට පහරදුන් බංග්ලාදේශය වෙනුවෙන් තමීම් ඉක්බාල් පන්දු 105කදී හතරේ පහර 6ක් සහිතව ලකුණු 76ක් ලබාගත් අතර, ෂකිබ් අල් හසන් පන්දු 80කදී හතරේ පහර 6ක් සහිතව ලකුණු 51ක් වාර්තා කළේය.

තමීම් ඉක්බාල් සහ ෂකිබ් අල් හසන් අතර දෙවැනි කඩුල්ල වෙනුවෙන් ලකුණු 106ක සම්බන්ධතාවක් පැවැති අතර,
ෂකිබ් දැවී යාමත් සමග ඉනිම බිඳ වැටුණි.
සිම්බාබ්වේ වෙනුවෙන් පන්දුවෙන් දස්කම් දැක්වූ ක්‍රීමර් කඩුලු 4ක්ද, ජාවිස් කඩුලු 3ක්ද බිඳ දැමීමට සමත් විය.
ලකුණු හඹා යාමේදී සිම්බාබ්වේ පිතිකරුවන්ට කිසිදු අවස්ථාවක් ලබා නොදුන් බංග්ලාදේශ පන්දු යවන්නෝ ඉනිම ලකුණු 125කට සීමා කළහ.
සිකන්දර් රාසා ලකුණු 39ක්ද, ග්‍රැහැම් ක්‍රීමර් ලකුණු 23ක්ද ලබාගත් අතර, බංග්ලාදේශය වෙනුවෙන් පන්දුවෙන් දස්කම් දැක්වූ ෂකිබ් අල් හසන් ලකුණු 34ට කඩුලු 3ක්ද, මොර්ටාසා, සුන්සාමුල් සහ මුස්ටාෆිසූර් කඩුලු 2 බැගින් බිඳ හෙලූහ.

අවුරුදු 19න් පහළ ලෝක කුසලාන ක්‍රිකට් තරගාවලියේ අර්ධ අවසන් පූර්ව වටයේදී එංගලන්තය ලකුණු 31කින් පරාජය කළ ඕස්ට්‍රේලියාව අවසන් පූර්ව වටයට සුදුසුකම් ලබා ගත්තේය. ඕස්ට්‍රේලියානු ජයග්‍රහණය වෙනුවෙන් විශිෂ්ට පන්දු යැවීමක නිරත වූ ලොයිඩ් ‍පෝප් ලකුණු 35ට කඩුලු 8ක් බිඳ හෙළමින් තරගයේ වීරයා විය.

ක්වීන්ස්ටවුන්හිදී පැවැති මෙම තරගයේ පළමුවෙන් පන්දුවට පහර දුන් ඕස්ට්‍රේලියාව 33.3කදී ලකුණු 127කට දැවී ගිය අතර, පිළිතුරු ඉනිම ක්‍රීඩා කළ එංගලන්තයට පන්දුවාර 23.4කදී සියලු දෙනා දැවී රැස්කරගත හැකිවූයේ ලකුණු 96ක් පමණි. මෙම තරගාවලියේ පාකිස්තානය සහ දකුණු අප්‍රිකාව අතර අර්ධ අවසන් පූර්ව තරගය අද (24දා) ක්‍රයිස්චර්ච්හිදී පැවැත්වේ.

ලකුණු තත්ත්වය :-
ඕස්ට්‍රේලියාව පන්දුවාර 33.3කදී සියලු දෙනා දැවී - 127යි
ජේසන් සංහා 58, ඒතන් බැම්බර් 31/3, ඩිලොන් පෙනින්ටන් 27/3, විල් ජේක්ස් 21/3
එංගලන්තය පන්දුවාර 23.4කදී සියලු දෙනා දැවී - 96යි
ටොම් බැන්ටන් 58, ලොයිඩ් ‍පෝප් 35/8

ඩයලොග් අන්තර් ක්‍රීඩා සමාජ ලීග් රග්බි තරගාවලිය යටතේ පැවැති මහනුවර සහ සී.එච්. අතර තරගයෙන් ලකුණු 34-23 ක ජයක් වාර්තා කිරීමට මහනුවර සමත් විය.
පළමු භාගය අවසන් වන විට මහනුවර ලකුණු 19-10 ක් ලෙස පෙරමුණ ගෙන සිටි අතර අවසන් මිනිත්තු 10 වන විට මහනුවර 29-23 ක් ලෙස පෙරමුණේ විය.
අවසන් මොහොතේ තියුණු සටනක් ඇතිවුවද ලවංග පෙරේරා අවසන් මිනිත්තුවේ උත්සාහක දිනුමක් වාර්තා කිරීමෙන් මහනුවරට ලකුණු 34-23 ක ජයක් හිමිවිය.
මහනුවර වෙනුවෙන් ශ්‍රීනාත් සූරියබණ්ඩාර, ෆාසිල් මරිජා, ගයාන් වීරරත්න, ලවංග පෙරේරා උත්සාහක දිනුම් වාර්තා කළ අතර නයිජල් රත්වත්ත උත්සාහක දිනුමක් ප්‍රවර්තන 3 ක් සහ දඬුවම් පහරක් මගින් ලකුණු ලබා ගත්තේය.
සී.එච්. වෙනුවෙන් හසන් මදුරංග උත්සාහක දිනුම් 2 ක්ද ලී කීගල් උත්සාහක දිනුමක්ද වාර්තා කළ අතර සැමුවෙල් මධුවන්ත ප්‍රවර්තනයක් සහ දඬුවම් පහර 2ක් මගින් ලකුණු ලබා ගත්තේය.
 
නාවික හමුදාව 27 සී.ආර්. 19
නාවික හමුදාව සහ සී.ආර්. අතර තරගයෙන් ලකුණු 27-19 ක ජයක් වාර්තා කිරීමට නාවික හමුදාව සමත් විය.
ගුවන් හමුදාව 33 යුද හමුදාව 10
ගුවන් හමුදාව සහ යුද හමුදාව අතර පැවැති තරගයෙන් ලකුණු 33-10 ක ජයක් වාර්තා කිරීමට ගුවන් හමුදාව සමත් විය.
 
මංගල ධර්මප්‍රේම

බංග්ලාදේශ තුන්කොන් ක්‍රිකට් තරගාවලිය යටතේ ඊයේ (21දා) පැවැති ශ්‍රී ලංකාව සහ සිම්බාබ්වේ අතර තරගයෙන් කඩුලු 5ක ජයක් වාර්තා කිරීමට ශ්‍රී ලංකාව සමත්විය.
මුලින්ම පන්දුවට පහරදුන් සිම්බාබ්වේ පන්දුවාර 44කදී ලකුණු 198කට දැවී ගිය අතර, ශ්‍රී ලංකාව පන්දුවාර 44.5කදී කඩුලු 5ට ලකුණු 202ක් ලබමින් ජය වාර්තා කළේය.
ශ්‍රී ලංකාව වෙනුවෙන් තුන් ඉරියව්වෙන්ම විශිෂ්ට දස්කම් දක්වමින් ලකුණු 33ට කඩුලු 4ක් සහ නොදැවී ලකුණු 39ක් ලැබූ තිසර පෙරේරා තරගයේ වීරයා සම්මානය දිනා ගත්තේය.
ලකුණු හඹා යාමේදී කුසල් ජනිත් ලකුණු 49ක් වාර්තා කළ අතර, කඩුලු බිඳ වැටීමෙන් පසු නායකත්වයේ ඉනිමක් ක්‍රීඩා කළ දිනේෂ් චන්දිමාල් නොදැවී ලකුණු 38ක් ලබා ගත්තේය. 
තරංග ලකුණු 17කට දැවී යාමෙන් පසු කුසල් ජනිත් සහ කුසල් මෙන්ඩිස් (ලකුණු 36) එක්ව දෙවැනි කඩුල්ල වෙනුවෙන් ලකුණු 70ක සම්බන්ධතාවයක් තැබිමෙන් පසු මුසරබානි ක්‍රියාත්මක වීමෙන් කඩුලු 3ක් බිඳ වැටුණි.
ජාවිස්ගේ පන්දුවක් හමුවේ අසේල ගුණරත්න ලකුණු 9කට දැවී යාමෙන් ලකුණු 145ක් තුළ කඩුලු 5ක් බිඳ වැටී අසීරු තත්ත්වයකට පත්වුවද චන්දිමාල් සහ තිසර එක්ව ලකුණු 57ක නොබිඳුණු සම්බන්ධතාවයක් තබමින් ශ්‍රී ලංකා ජය තහවුරු කළහ.
තිසර පන්දු 26කදී එක් හතරේ පහරක් සහ හයේ පහර 3ක් සහිතව නොදැවී ලකුණු 39ක්ද, චන්දිමාල් පන්දු 71කදී හතරේ පහර 2ක් සහිතව නොදැවී ලකුණු 38ක් ද ලබා ගත්තේය.
මුලින්ම පන්දුවට පහරදුන් සිම්බාබ්වේ ආරම්භක පිතිකරුවන් මුල් කඩුල්ල වෙනුවෙන් ලකුණු 44ක සම්බන්ධතාවයක් තැබුවද තිසර කඩුලු 4ක් දවා ගැනීමෙන් ඉනිම බිඳ වැටුණි. සඳකැන් මැද පෙළ කඩුලු 2ක් බිඳ හෙලූ අතර පසුපෙළ කඩුලු 3 බිඳ දැමීමට නුවන් ප්‍රදීප් සමත්විය.
සිම්බාබ්වේ වෙනුවෙන් පිත්තෙන් සාර්ථක වූ බ්‍රෙන්ඩන් ටේලර් පන්දු 80කදී හතරේ පහර 6ක් සහිතව ලකුණු 58ක් වාර්තා කළේය.
තිසර ලකුණු 33ට කඩුලු 4ක් ද, ප්‍රදීප් ලකුණු 28ට කඩුලු 3ක්ද, සඳකැන් ලකුණු 54ට කඩුලු 2ක් ද බිඳ හෙළීය.

දකුණු අප්‍රිකාව සහ ඉන්දියාව අතර තරග තුනකින් සමන්විත ටෙස්ට් ක්‍රිකට් තරගාවලියේ සෙන්චූරියන්හිදී පැවැති දෙවැනි තරගයෙන් ලකුණු 135ක ජයක් වාර්තා කළ දකුණු අප්‍රිකාව තරගාවලිය 2-0ක් ලෙස ජය ගැනීමට සමත් විය.
තරගයේ ජයග්‍රහණය සඳහා ලකුණු 287ක ඉලක්කයක් හඹා ගිය ඉන්දීය දෙවැනි ඉනිම ලකුණු 151කට සීමා කිරීමට ලුන්ගි නිගිඩි සහ කගිසෝ රබාඩා සමත් වූහ.

ලුන්ගි එන්ගිඩි ලකුණු 39කට කඩුලු 5ක් සහ රබාඩා ලකුණු 47කට කඩුලු 3ක් දවා ගනිමින් ඉන්දීය දෙවැනි ඉනිම බිඳ දැමූ අතර, මෝනි මෝකල් ඉන්දීය මුල් ඉනිමේ කඩුලු 4ක් ලකුණු 60ක් තුළ බිඳ දැමීය.
දකුණු අප්‍රිකාව මුල් ඉනිම වෙනුවෙන් ඒඩ්න් මාක්රම් (94), හෂීම් අම්ලා (82) සහ ඩුප්ලෙසිස් (63) අර්ධ ශතක වාර්තා කළ අතර, දෙවැනි ඉනිමේදී ඩීන් එල්ගා (61) සහ ඒ.බි. ඩිවිලියර්ස් (80) අර්ධ ශතක වාර්තා කළහ.
ඉන්දීය මුල් ඉනිමේදී සටන්කාමී පිතිහරඹයක නිරත වූ නායක විරාත් කෝලි ලකුණු 153ක් රැස් කළ අතර, දෙවැනි ඉනිමේදී සියලුම පිතිකරුවෝ අසාර්ථක වූහ.

ලකුණු තත්ත්වය :-
ද. අප්‍රිකාව මුල් ඉනිම - 335යි
ඒඩ්න් මාක්රම් 94, හෂීම් අම්ලා 82, ෆැෆ් ඩුප්ලෙසිස් 63,
රවිචන්ද්‍රන් ඇෂ්වින් 113/4, ඉෂන්ට් ෂර්මා 46/3

ඉන්දියාව මුල් ඉනිම - 307යි
මුරලි විජේ 46, විරාත් කෝලි 153, මෝනි මෝකල් 60/4

ද. අප්‍රිකාව දෙවැනි ඉනිම - 258යි
ඩීන් එල්ගා 61, ඒ.බි. ඩිවිලියර්ස් 80, ෆැෆ් ඩුප්ලෙසිස් 48, මොහොමඩ් ෂමී 49/4, ජස්ප්‍රිට් බුම්රා 70/3, ඉෂන්ට්
ෂර්මා 40/2

ඉන්දියාව දෙවැනි ඉනිම - 151යි
රෝහිත් ෂර්මා 47, මොහොමඩ් ෂමී 28, ලුන්ගි එන්ගිඩි 39/6, කගිසෝ රබාඩා 47/3

බංග්ලාදේශයේ පැවැත්වෙන තුන්කොන් ක්‍රිකට් තරගාවලිය යටතේ ඊයේ (17දා) පැවැති ශ්‍රී ලංකාව සහ සිම්බාබ්වේ අතර තරගයෙන් තියුණු සටනකින් පසු ලකුණු 12ක ජයක් වාර්තා කිරීමට සිම්බාබ්වේ සමත් විය.
මුලින්ම පන්දුවට පහර දුන් සිම්බාබ්වේ පන්දුවාර 50දී කඩුලු 6ට ලකුණු 290ක් ලබාගත් අතර, ශ්‍රී ලංකාවට පන්දුවාර 48.1කදී සියල්ල දැවී ලබාගත හැකිවූයේ ලකුණු 278ක් පමණි.

සිම්බාබ්වේ වෙනුවෙන් හැමිල්ටන් මසකඩ්සා සහ සිකන්දර් රාසා අර්ධ ශතක වාර්තා කළ අතර, පන්දුවෙන් දස්කම් දැක්වූ චටාරා කඩුලු 4ක් බිඳ හෙළීය.
ලකුණු හඹා යාමේදී ශ්‍රී ලංකාවට සාර්ථක ආරම්භයක් ලබා දුන් කුසල් ජනිත් පෙරේරා පන්දු 83කදී හතරේ පහර 8ක් සහ හයේ පහර 2ක් සහිතව ලකුණු 80ක් ලබාගත් අතර, අවසන් මොහොත දක්වා සටනක් දුන් තිසර පෙරේරා පන්දු 37කදී හතරේ පහර 5ක් සහ හයේ පහර 3ක් සහිතව ලකුණු 64ක් ලබා ගත්තේය.

තරගයේ 47 වැනි පන්දු වාරයේදී තිසර දැවී යාමත් සමගම ශ්‍රී ලංකාවේ බලා‍පොරොත්තු සුන් වූ අතර නායක මැතිව්ස් ලකුණු 42ක්ද, දිනේෂ් චන්දිමාල් ලකුණු 34ක්ද ලබා ශ්‍රී ලංකාව වෙනුවෙන් සාර්ථක පිතිහරඹයක නිරත වූහ.
මුලින්ම පන්දුවට පහර දුන් සිම්බාබ්වේ වෙනුවෙන් මසකඩ්සා සහ මීරේ මුල් කඩුල්ල වෙනුවෙන් ලකුණු 75ක සම්බන්ධතාවක් තැබූ අතර, මසකඩ්සා පන්දු 83කදී හතරේ පහර 10ක් සහිතව ලකුණු 73ක් ලබා ගත්තේය.
කඩුලු 4ක් බිඳ වැටීමෙන් පසු පිටියට පිවිසි සිකන්දර් රාසා පන්දු 67කදී හතරේ පහර 8ක් සහ එක් හයේ පහරක් සහිතව නොදැවී ලකුණු 81ක් ලබා ගනිමින් තරගයේ වීරයා සම්මානය දිනාගත්තේය.
ශ්‍රී ලංකාව වෙනුවෙන් පන්දුවෙන් දස්කම් දැක්වූ අසේල ගුණරත්න කඩුලු 3ක්ද, තිසර පෙරේරා කඩුලු 2ක්ද බිඳ හෙළීය.

 

Lakbima Online

Download Lakbima Mobile App

 
 

 

Get In Touch With Us

E-Papers

Please publish modules in offcanvas position.