Coss Ear2
lakbima.lk
COSS Ear 1

බ්‍රිතාන්‍ය රජ පවු‍ලේ තොරතුරු ගැන උනන්දුව දක්වන බොහෝ දෙනෙකුට සතුට දනවන පුවතක් පසුගිය 23 වෙනි දින දැනගන්නට ලැබිණි. එනම් කිරුළ හිමි විලියම් කුමරුගේ බිරිඳ වන කේට් මිඩ්ල්ටන් කුමරිය සිය තෙවැනි දරුවා බිහි කිරීම පිළිිබඳ ප්‍රවෘත්තියයි. 23 වෙනි සඳු දින බ්‍රිතාන්‍යයේ වේලාවෙන් පෙරවරු 11.00 ට පමණ කේට් කුමරිය පුතෙකු බිහි කළ අතර දරු උපත සිදු වූයේ ලන්ඩනයේ පිහිටි ශාන්ත මරියා රෝහ‍ලේදී ය. විලියම්-කේට් දෙපළගේ පළමු දරු දෙදෙනා වන ජෝර්ජ් සහ චාලට් දෙදෙනා උපත ලැබුවේද මෙම රෝහ‍ලේදීමය. දරු උපත සඳහා වෛද්‍යවරුන් කලින් නියම කර තිබූ දිනයේම එය සිදුවීමද තවත් විශේෂත්වයක් විය.
බිළඳාගේ උපත් බර රාත්තල් 8 කුත්, අවුන්ස 7 ක් බව සඳහන් වූ අතර පසුගිය වසර 100 ක කාලය ඇතුළත වැඩිම උපත් බරක් සටහන් කළ රාජකීයයා ලෙස ඔහු මේ වනවිටත් වාර්තාවක් පිහිටුවා ඇතැයි පැවැසේ. ඔහුගේ වැඩිමල් සොහොයුරු ජෝර්ජ්ගේ උපත් බර වූයේ රාත්තල් 8 කුත් අවුන්ස 6 කි. චාලට්ගේ උපත් බර රාත්තල් 8 කුත් අවුන්ස 3 ක් පමණි. මෙම සටහන ලියන අවස්ථාව වනවිට බිළිඳාට නමක් යොදා තිබුණේ නැත. දරුවාත්, මවත් හොඳ සුවයෙන් පසුවන බව රෝහල් ආරංචි මාර්ග සඳහන් කර තිබූ අතර දරු උපතෙන් පසු සඳුදා සවසම කේට් කුමරිය දරුවාද සමග නැවත ඔවුන්ගේ නිවහන වන කෙන්සින්ටන් මාළිගය වෙත පැමිණ ඇති බවද සඳහන් විය.
අලුත් රාජකීය සාමාජිකයා බ්‍රිතාන්‍ය රජ පවු‍ලේ කිරුළ හිමි අයගේ ලැයිස්තුවේ පස්වැන්නා බවට පත් වෙයි. චාල්ස් කුමරු, විලියම් කුමරු, ඔහුගේ පුත් ජෝර්ජ් කුමරු සහ දියණිය චාලට් කුමරිය එම ලැයිස්තුවේ ඔහුට ඉහළින් සිටිති. 2013 වසරට කලින් පැවැති සම්ප්‍රදාය අනුව නම් දියණියකට පසුව නැවත පුතෙකු බිහි වුවහොත් ඔහු දියණියට කලින් කිරුළ දැරීමට සුදුසුකම් ලබයි. එම සම්ප්‍රදාය පැවැතියේ නම්  අලුත් බිලිඳාගේ උපත නිසා චාලට් කුමරිය එක් ස්ථානයකින් ඉහත ලැයිස්තුවේ පහළට වැටෙන්නට නියමිතව තිබිණි. නමුත් 2013 වසරේ කරන ලද සංශෝධනයක් මගින් මෙම සම්ප්‍රදාය වෙනස් කරන ලද අතර ඒ නිසා චාලට් කුමරිය තවදුරටත් මෙම ලැයිස්තුවේ සිව්වෙනි ස්ථානයේම පසුවනු ඇත. විලියම් කුමරුගේ සොහොයුරු හැරී කුමරු දැන් සිටින්නේ මෙම ලැයිස්තුවේ සයවෙනි ස්ථානයේයි. 
රාජකීය බිළිඳා ගේ උපත සිදු වූ ලන්ඩනයේ ශාන්ත මරියා රෝහල දැන් ටික කලක සිටම පැවැතියේ දැඩි ආරක්ෂක රැකවල් මධ්‍යයේය. එය දිනපතා පිරිසිදු කර, නඩත්තු කිරීම සඳහා විශේෂ ආරක්ෂක කණ්ඩායමක් පත් කර තිබිණි. ඔවුහු දිනපතා කාමරය පිරිසිදු කර අවසානයේ එය මුද්‍රා තබති. නැවත මුද්‍රා ඉවත් කරන්නේ පසුදින පිරිසිදු කිරීමේ කටයුතු සඳහාය. කේට් කුමරිය වෙනුවෙන් ඉතා සුඛෝපභෝගී කාමරයක් වෙන් කර තිබූ අතර එහි ගාස්තුව දිනකට අවම වශයෙන් ඇමෙරිකානු ඩොලර් 10,000කට ආසන්න බව පැවසිණි. එය ලංකාවේ මුදලින් රුපියල් ලක්ෂ 15ක් පමණ වේ.
රෝහල පිහිටා ඇත්තේ විලියම්-කේට් දෙදෙනාගේ නිවස වන කෙන්සින්ටන්  මැදුරේ සිට සැතපුම් එකහමාරක් පමණ දුරිනි. කේට් දරු ප්‍රසූතිය සඳහා රෝහලට පැමිණෙනු පිණිස මෙම මැදුරෙන් පිටත් වන බව රෝහලට දැනුම් දුන්නේ එයට විනාඩි පහක් පමණ ඉතා කෙටි කාලයකට කලිනි. අවසන් මොහොත වනතුරුම මෙය රහසක් ලෙස තබා ගැනුණේ ද ආරක්ෂක හේතූන් නිසා බව සැලකිය හැකිය. කේට් කුමරිය රෝහලට ඇතුළත් කර පැය පහක් තරම් කාලයක් තුළ දරු ප්‍රසූතිය සිදුව ඇති බව සඳහන් වන අතර එය සැත්කමකින් තොරව ස්වභාවික ආකාරයෙන් සිදු වූ දරු උපතක් බවද වාර්තා වෙයි. මේ අතර මැයි 19 වෙනි දින පැවැත්වීමට නියමිත හැරී කුමරුගේ සහ මේගන් මාර්කල් ගේ විවාහ උත්සවයටද කේට් සහභාගි වනු ඇතැයි පැවැසේ. කුඩා ජෝර්ජ් කුමරු සහ චාලට් කුමරිය මෙම විවාහ උත්සවයේ මල් කුමර කුමරියන් ලෙස පෙනී සිටීමටද නියමිතය.
මේ වනවිට පස්වෙනි වියේ පසුවන ජෝර්ජ් ලන්ඩනයේ පිහිටි තෝමස'ස් ස්කූල් නැමැති පෞද්ගලික පාසලක අධ්‍යාපනය ලබයි. 2013 ජුලි 22 වෙනිදා ඔහුද උපන්නේ ශාන්ත මරියා රෝහ‍ලේදීම ය.  ජෝර්ජ් සිය පාසල් ගමන පටන් ගත්තේ 2017 සැප්තැම්බර් 7 වෙනිදා ය. විලියම්-කේට් දෙදෙනාගේ දියණිය වන චාලට්ට තවම වයස අවුරුදු 3කි. ඇය උපන්නේ 2015 මැයි 2 වෙනිදා ය. චාලට් මේ වසරේ මුල සිට ළදරු පාසල් යාමට පටන් ගත් අතර ඇය යන පාසල හැඳින්වෙන්නේ විල්කොක්ස් ළදරු පාසල යනුවෙනි. 
විලියම්-කේට් දෙපළ තම පවුලට එක් වූ අලුත් සාමාජිකයා පිළිගනිමින් සිටියදී තව සති කිහිපයකින් රජ පවු‍ලේ තවත් විශේෂ අවස්ථාවක් එළඹීමට නියමිතව තිබේ. එනම් හැරී කුමරු සහ ඔහුගේ පෙම්වතිය වන මේගන් මාකල් අතර විවාහයයි. මැයි 19 වෙනි දින මෙම උත්සවය පැවැත්වීමට නියමිතව ඇත්තේ සුප්‍රකට වින්ඩ්සර් මාලිගා පරිශ්‍රයේ පිහිටි ශාන්ත ජොර්ජ් දේවස්ථානයේදී ය. මේ වනවිට විවාහ උත්සවයේ කටයුතු ලහිලහියේ සූදානම් කෙරෙමින් පවතින අතර පසුගිය දිනවල ආරාධනා පත්‍ර ආදියද බෙදා හැර අවසන් කළ බව සඳහන් විය. මේ අතර මේගන් මාර්කල්ගේ පියා වන තෝමස් මාර්කල්ට විවාහ උත්සවය සඳහා ඇරයුම් කර නැති බවට ආන්දෝලනාත්මක කතාවක්ද පසුගිය දිනවල මාධ්‍ය ඔස්සේ පැතිර යමින් තිබිණි. තෝමස් මාර්කල් මේගන්ගේ පියා වුවද ඇයට වයස අවුරුදු 6 යේදී ඔහු සිය බිරිඳ (මේගන්ගේ මව) වූ ඩෝරියා රැඩ්ලාන්ගෙන් දික්කසාද වී තිබේ. කෙසේ හෝ වේවා, මෙම තත්ත්වය තුළ මේගන්ගේ විවාහය සඳහා සහභාගී වන්නේ ඇයගේ මව වන ඩෝරියා පමණක් විය හැකි බවටද ආරංචි පැතිරෙමින් තිබේ. තෝමස් මාර්කල් ඩෝරියා සමග විවාහ වීමට පෙර රොස්ලින් නමැති තවත් කාන්තාවක සමග විවාහ වී සිටි අතර එම විවාහයෙන් ඔහුට තවත් දරුවෝ දෙදෙනෙක් සිටිති.  මේ අයටද මේගන්ගේ විවාහය සඳහා ඇරයුම් කර නොමැති බව පැවැසේ.
 
කිත්සිරි මල්වත්ත

 

Lakbima Online

Download Lakbima Mobile App

 
 

 

Get In Touch With Us

E-Papers

Please publish modules in offcanvas position.