Coss Ear2
lakbima.lk
COSS Ear 1

දිවංගත රණසිංහ ප්‍රේමදාස ජනාධිපතිතුමා ප්‍රබල දේවාත්මයකට පත්ව ඇති බව   මනාව තහවුරු කරගැනීමට තමන්ට අවකාශ ලැබී ඇති බවට පේරාදෙණිය විශ්ව විද්‍යාලයේ සමාජවිද්‍යා අධ්‍යයන අංශයේ මහාචාර්ය දයා අමරසේකර මහතා  විසින් කරන ලද ප්‍රකාශයක් ලක්බිම අන්තර්ජාල සංස්කරණයේ පළවී තිබුණා. එහිදී ඔහු ප්‍රකාශ කර තිබුණේ තම මියගිය මවගේ දෙව්ලොව ආත්මය සමඟ තමන් විශේෂිත ක්‍රමයකට සංනිවේදනය කරන බවත් ඒ තුළින් මෙම කරුණ  මනාව තහවුරු කරගත් බවත්ය. භාවනා කිරීම මගින් සහ ආගමික වතාවත් නොකඩවා කිරීම තුළින් තමන්ට එම සංනිවේදන හැකියාව ලැබුණු බවත් ඔහු කියනවා.

මෙහිදී මෙම ප්‍රකාශය සමාජය තුළ යම් බලපෑමක් කළ හැකි වන්නේ මෙම ප්‍රකාශය කරන පුද්ගලයා සාමාන්‍ය පුද්ගලයෙක් නොව පේරාදෙණිය විශ්ව විද්‍යාලයේ මහාචාර්ය වරයෙකු වන නිසාවෙන්.

ලිපිය සම්පූර්ණයෙන් කියවීමේදී පෙනීයන්නේ ඔහු ආගමට තදින් ඇලුනු , දිගු කලක පටන් නිරතුරුව භාවනා කරන අයෙක් බවයි. මෙහිදී ඔහු සිය මව කළ කුසල කර්ම මත අනිවාර්යයෙන්ම  ඇය දෙව්ලොව උපදින බවට තදින්ම විශ්වාස කරගෙන සිටි බව පෙනීයනවා.ඒ අනුව ඔහුගේ ආගමික විශ්වාසය මත ,සිය මව සමග සංනිවේදනය කිරීම භාවනාව මගින් සිත දියුණු කිරීම ඔස්සේ සිදුකළ හැකිබවට තදින් විශ්වාස කොට ඒ අනුව වසර ගණනාවක් පුරා භාවනා කොට ඇති බවත් පෙනීයනවා. මෙලෙස යමක් දැඩිසේ විශ්වාසකර මනැස ඒ වෙත තදින්,කාලාන්තරයක් යොමුකිරීම මගින් යටි සිත ඒ අනුව ක්‍රියාකිරීමට පටන්ගන්නවා. මෙය ස්වයං මෝහනය වීමක් ලෙස හඳුන්වාදෙන්න පුලුවන්. මෙහිදී තමන් කාලයක් පුරා තදින් බලාපොරොත්තු වූ තත්වය තමන්ට ලැබී ඇති බව දැනෙනවා. එවිට තම යටිහිතේ තැන්පත්ව ඇති අදහස්ම දිව්‍යලෝකයේ සිටින තම මව විසින් ප්‍රකාශකරන ලෙසයි දැනෙන්නේ. තම යටිහිතේ තැන්පත්ව ඇති දේවල් උඩු සිත නොදන්නා නිසා ඔහුට සිතෙන්නේ ඒ අලුත්ම අදහසක් ලෙසයි.

මනැස යනු කිසිවෙකුට මේ යැයි පෙන්වාදිය හැකි දෙයක් නොවන බව අපි සැමදෙනා දන්නා කරුණක්. නමුත් මිනිසාගේ සිරුරේ මනා ක්‍රියාකාරිත්වයට  මනැසේ යථා පැවැත්ම අත්‍යවශ්‍ය වනවා. මනැස හෙවත් සිත පිළිබඳව අපට මනෝවෛද්‍ය විද්‍යාවෙන් මෙන්ම මනෝ විද්‍යාව මගින්ද විවිධ සංකල්පයන් ඔස්සේ අධ්‍යනය කළ හැකියි. නමුත් එය බොහෝවිට අන්ධයන් අලියාගේ හැඩය කීවා හා සමාන වන්නේ ඒ කිසිවකින් නිවැරදිව මනසේ ක්‍රියාකාරිත්වය පැහැදිලි නොවන නිසයි. මනෝ වෛද්‍ය විද්‍යවේ දී සිදුකරන්නේ පැහැදිලිව හඳුනාගත්,සාමාන්‍ය මානසික ක්‍රියාකාරිත්වයෙන් අපගමනය වූ මානසික තත්වයන් හඳුනාගෙන ඒ සඳහා ප්‍රතිකාර ලබාදීමයි. මෙහිදී විවිධ චර්යාත්මක ප්‍රතිකාර මෙන්ම ඖෂධීය ප්‍රතිකාර ලබාදීමත් සිදුකරනු ලබන්නේ අදාල රෝග තත්වයන් හඳුනාගෙනයි. මෙහිදී ඖෂධ ලබාදෙන්නේ මොළය ආශ්‍රිත රසායනද්‍රව්‍යයන් යාමනය කිරීම සඳහායි. එනම් සායනික මනෝවෛද්‍ය විද්‍යාවේදී මනැස යනු මොළය ආශ්‍රිත රසායන ක්‍රියාවලියක් ලෙස සළකනු ලබනවා.

මනෝවිද්‍යාවේදී කරනු ලබන්නේ මනැසේ ක්‍රියාකාරිත්වය සිරුර මත ඇතිකරන බලපෑම අධ්‍යයනය කිරීමයි. එනම් මනැසේ ක්‍රියාකාරිත්වය හේතුවෙන් ඇතිවෙන මිනිසාගේ හැසිරීම,සිතුවිලි සහ හැඟීම් පිළිබදව විද්‍යාත්මක අධ්‍යයනයක් කිරීමයි. මෙහිදී උඩු සිත(conscious mind) ගැන මෙන්ම යටි සිත(sub conscious mind) ගැනත් අධ්‍යයනය කරනු ලබනවා. ඒ අනුව මනැසේ ඇතිවන යම් යම් අපගමනයන්ට උපදේශනය සහ චර්යාත්මක ක්‍රම මගින් පිළියම් ලබාදීමටත් හැකියාව තියෙනවා.

සාමාන්‍යයෙන් මනෝවෛද්‍ය විද්‍යාවේදී මෙලෙස දෙවියන්, භූතයන්,මියගිය ආත්මයන් සමඟ සංනිවේදනය කිරීම මානසික රෝග වන බින්නෝන්මාදය(schizophrenia) ,විඝටනය(Dissociative disorder) වැනි රෝගයක ලක්ෂණයක් ලෙස සැලකෙනවා. නමුත් එහිදී සිදුවන්නේ චර්යාත්මක වෙනසක්. තමන්ට ඇතිවන ව්‍යාජ සිතිවිල්ල සත්‍යයක් ලෙස,ඊට පටහැනි කවර සාක්ෂි තිබුණත් එය නොතකා ඒ පුද්ගලයා විශ්වාස කරනවා. ඒ අනුව ඔවුන් ක්‍රියාකිරීමට යෑමේදී බරපතල ගැටලු ඇතිවන බැවින් දීර්ඝ කාලීනව ඖෂධ ප්‍රතිකාර ලබාදිය යුතු වනවා.

නමුත් ස්වයංමෝහනයේදී එසේ වන්නේ නැහැ. ඔහු නිරතුරුව නොව ඔහුට අවශ්‍ය මොහොතකදී පමණක්  එම තත්වයට මනැස හිතාමතාම පත්කර ගනිමින් තමන් තමන්ගේම යටිසිත සමඟින් සන්නිවේදනය කරගන්නේ ,තමන් විශ්වාස කරන පරිදි වෙනත් ලොවක ඇති ආත්මයක් සමඟ කතාබහ කරනවා යැයි විශ්වාසය අනුවයි. එමගින් ඔහුට මානසික වින්දනයක් ලැබෙනු ඇත.

මෙහිදී මා කළින් කියන ලද මානසික රෝගයන්හී දී මෙන්නොව තමන්ට ලැබෙන මානසික සංනිවේදනයන්, වෙනස් ලෙස ,ඔහුට විශ්වාස කළ හැකි අයුරකින් ඔහුගේ යටිසිත වෙත යොමුකළ හැකිනම් ඔහු ඔහුගේ මුල් ස්ථාවරය ඔහු විසින්ම වෙනස්කරනු ඇති. උදාහරණයක් ලෙස ශක්‍ර දෙවියන් සමඟ සන්නිවේදනය කරනවා යැයි කියන ප්‍රකට කපුවෙක් විසින්, ප්‍රේමදාස මහතාට තවම දේවත්වය ලබාදී නැති බවත්,එය සක් දෙවිදුන් විසින් තීරණය කර යථාකාලයේ ලබා දීමට කටයුතුකරන බව ශක්‍ර දේවේන්ද්‍රයා තමන්ට දැනුම් දුන් බව  මහාචාර්යතුමාගේ යට් සිතට ඇතුලුවන පරිදි ඔහු පියවි සිහියෙන් සිටින විට ප්‍රකාශ කළ හැකිනම් එවිට ඔහුද සිය මව විසින් තමාටද ඒ බව දැන්වූ බව පවසා සිය මුල් ස්ථාවරය වෙනස් කරනු ඇති. ඒ එසේ වනුයේ ඔහු මානසික රෝගයට ලක්වී නොමැති නම් පමණයි.

භාවනාව මගින් සිතුවිලි පාලනය කිරීම මෙන්ම තරහා යෑම,මානසික ආතතිය වැනි දේවල් පාලනය කරගත හැකි නමුත් පාලනයකින් තොරව ,නිසි මගපෙන්වීමක් නොමැතිව භාවනා කිරීම මගින් මානසික අවපීඩනය, සියදිවි නසාගැනීමේ සිතුවිලි, විඝටනය වැනි තත්වයන් ඇතිවිය හැකියි. යටිසිතේ තැන්පත්ව ඇති, උඩුසිතින් අමතක කර ඇති ජීවිතයේ මුහුණ දුන් අප්‍රසන්න,අමිහිරි අත්දැකීම් නැවත ආවර්ජනය වීමක් ද නොවිධිමත් භාවනාවේදී සිදුවන බව සොයාගෙන තියෙනවා. කෙසේ වෙතත් බුදුන් වහන්සේ පවා එක් එක් පුද්ගලයාට කමටහන් ලබාදි ඒ ඒ පුද්ගලයාට අනුව භාවනාව සකසා දෙනු ලබුවා. නිසි මගපෙන්වීමක් නොමැතිව භාවනා නොකරන ලෙසත් බුදුන් දේශනා කරනු ලැබුවේ මේ නිසයි.

සමහර අය තමන් සෝවාන් වී හෝ රහත්වී හෝ ඇති බවට ප්‍රකාශ කරන්නේත් මේ අයුරින් භාවනාව මගින් ස්වයංමෝහනයට පත්වීම නිසයි. මෙහිදී මොළයේ රසායනික වෙනසක් නොවන නිසා මොළයේ වෙනත් ක්‍රියාකාරිත්වයන්ට මෙමගින් බාධාවක් වෙන්නේ නැහැ. උදාහරණ ලෙස මෙවන් තත්වයකට පත්වූ වෛද්‍යවරයෙකුට මනාව ප්‍රතිකාර කිරීමටත්, ආචාර්ය වරයෙකුට මනාව විෂය කරුණු ඉගැන්වීමටත්,භික්ෂූන් වහන්සේ කෙනෙකුට ත්‍රිපිටකයේ ගැඹුරු දහම්  කරුණු සහිතව  මනාව දහම් දෙසීමටත් හැකියාව පවතිනවා. නමුත් ගැටළුව ඇත්තේ ඔවුන් ස්වයංමෝහනය මත සිදුකරනා ප්‍රකාශ කිසිදු විටෙක සත්‍ය නොවුණත්, බොහෝ දෙනා විසින්  ඒවා සත්‍ය ලෙස පිළිගැනීමයි. එම පුද්ගලයාගේ උගත්බව,රැකියාව,සමාජ පිළිගැනුම,මෙන්ම අනෙකුත් විෂයයන් සම්බන්ධව ඇති තාර්කික දැනුම හේතුවෙන් මෙවන් අය කියන ඕනෑම දෙයක් පිළිගැනීමට බොහෝ දෙනා පෙළඹෙන බව දක්නට ලැබෙනවා.

නැවත අප මහාචාර්ය දයා අමරසේකරගේ ප්‍රකාශයන් වෙත අවධානය යොමුකළවිට පෙනීයන්නේ ඔහු  ප්‍රබල ප්‍රේමදාස පාක්ෂිකයෙක් බවයි. එතුමා කළ සේවාවන් මෙන්ම පුවත් පත්වලට කළ ප්‍රකාශ පවා දින වකවානු ඇතිව කීමට ඔහු සමත් වන්නේ එම නිසයි. එබැවින් ඔහු (ඔහුගේ යටිසිත) විශ්වාස කරන්නේ සිය මව මෙන්ම සමාජයට විශාල සේවයක් කිරීම හේතුවෙන් ප්‍රේමදාස මහතා දෙවිකෙනෙක් වී ඇති බවයි. සමාජ විද්‍යාව පිළිබදව මහාචාර්ය වරයෙකු නිසා එවන් පුද්ගලයන්ට දේවත්වය සමාජය මගින් ආරෝපනය කරන බවද හොඳින් දන්නා සහ එය යටිසිතේ තැන්පත්ව ඇති බැවින් ස්වයංමෝහනයට පත්ව ඒය යථාර්ථයක් බවට විශ්වාස කිරීම හේතුවෙන් මෙම තත්වය ඇතිවී ඇති බවයි මට පෙනීයන්නේ.

පසුගිය කාලය තුළ අපගේ විශ්ව විද්‍යාලවල ආචාර්ය, මහාචාර්යවරුන්ට මෙන්ම වෛද්‍ය ක්‍ෂේත්‍රයේ  ප්‍රමුඛතමයන්ට භාවනා කිරීම මගින් දෙවියන් සමඟ කතාකිරීමට හැකිවූ බව ජන මාධ්‍ය‍යන් මගින් ප්‍රකාශ වුණා.

ලෝකයේ තාක්ෂණයෙන් ඉහළම සිටිනා අමෙරිකාවේ නාසා ආයතනයටත් තවම සොයාගත නොහැකි වූ වෙනත් ලෝකවල ආත්මයන් හා කතාකිරීමට පවා හැකි මහාචාර්යවරු ඕනෑ තරම් අපේ රටේ සිටීම මහත් කීර්තියක්. නාථ ආදී දෙවිවරුන්ගේ පිහිටෙන් රසායනික වි‍ශ්ලේෂණ පවා සිදු කළ හැකි යැයි පවසන මහාචාර්වරුන්ගේ සහයෝගය රැගෙන අපේ රටේ සංවර්ධනයට විදෙස් ආධාර වෙනුවට 'දිව්‍යලෝකාධාර' ලබාගැනීම සඳහා දිව්‍යලෝක සම්බන්ධීකරණ අමාත්‍යාංශයක් ඇතිකර,දිව්‍යලෝක කටයුතු ප්‍රවර්ධනය කිරීමට රජයේ අවධානය යොමුවීම  කාලෝචිත බවත් කිව යුතුයි.

 

නීතිවේදී,වෛද්‍ය පාලිත බණ්ඩාර සුබසිංහ MBBS (Peradeniya) / LL.B (ousl)

 

පෙර ලිපි

මහාචාර්ය දයා අමරසේකරට 'කසයෙන්' තලමුද?


ජනපති ප්‍රේමදාස ප්‍රබල දේවත්වයකට පත්ව ඇති බව තහවුරුයි

 

 

Lakbima Online

Download Lakbima Mobile App

 
 

 

Get In Touch With Us

E-Papers

Please publish modules in offcanvas position.