Coss Ear2
lakbima.lk
COSS Ear 1

‘බිම්බා දේවි හෙවත් යශෝධරා’ චිත්‍රපටයේ ප්‍රධාන භූමිකා වන සිදුහත් කුමරු සහ යශෝදරා දේවියගේ චරිත සඳහා නළු නිළි දෙපළක් තෝරා ගැනීමේදී එහි අධ්‍යක්ෂ සුනිල් ආරියරත්නයන් කරුණු කාරණා රැසක් ගැන සැලකිලිමත් වුණා. ඔහුට මේ අතරින් ප්‍රධාන නිළියගේ චරිතය සඳහා හැම අතින්ම ගැළපෙන නිළියක් සොයාගැනීම තමයි ඔහුට වඩාත්ම බැරෑරුම් කාර්යයක් වී තිබුණේ. අවසානයේ මේ සඳහා ගැළපෙන නළුවකු මෙන්ම නිළියකද ඔහුට හමුවුණේ ඉන්දියාවෙන්. එම නිළිය තමයි ‘පල්ලවි සුභාෂ්. පල්ලවි ඉන්දියාවේ නිර්මාණය වූ මරාති චිත්‍රපට සහ රූපවාහිනී මාලා නටක රැසක රඟපා තිබෙන නිළියක්. ඊ.ඒ.පී. මණ්ඩලය ප්‍රධාන, දිවයින පුරා පිහිටි සිනමාහල් රැසක මේ දිනවල සාර්ථක ලෙස තිරගත වන ‘බිම්බා දේවි හෙවත් යශෝධරා’ චිත්‍රපටයේදී තමන් ලැබූ අත්දැකීම් ගැන කියන්නට පල්ලවි මෙලෙසින් කතාබහට එක්කාසු වුණා. 
 
මේ චිත්‍රපටයට දායක වෙන්න කලින් යශෝධරාව ගැන ඔබට තිබුණේ මොන විදියේ අවබෝධයක්ද?
 
මම හින්දු ජාතිකයෙක්. නමුත්, මේ චිත්‍රපටයේ රඟපාන්න කලිනුත් යශෝධරාගේ චරිතය ගැන තරමක දැනුවත් බවක් මට තිබුණා. චිත්‍රපටයේ තිර පිටපත කියවලා යශෝදරා සහ මෙම කතා පුවත ගැන අවබෝධයක් ලබාගැනීමයි මම මුලින්ම කළේ. ඊට පස්සේ යශෝධරාවගේ චරිතය ගැන ලියැවුණු ‍පොතපත කියෙව්වා. හැබැයි මම ඒ ලබාගෙන තිබුණු දැනුම සම්පූර්ණ වුණේ දර්ශන තලයට ගියාට පසුවයි. චිත්‍රපටය රූගත කරද්දී යශෝධරාව ගැන දවසින් දවස අලුත් දේවල් ඉගෙන ගන්න මට අවස්ථාව ලැබුණා.
 
‘අධිරජ ධර්මාශෝක’ නමින් ශ්‍රී ලංකාවේද විකාශය වන කතා මාලාවේ අශෝක රජුගේ මව වන රාණි ධර්මාගේ චරිතයටද පණ‍පොවන්නේ ඔබයි. එවැනි ඓතිහාසික චරිත රඟපා ලැබූ පළපුරුද්දත් ඔබට මේ චරිතය රඟපෑමේදී බෙහෙවින් ඉවහල් වෙන්න ඇති. 
 
ඇත්තෙන්ම ඔව්. යශෝධරා දේවියගේ චරිතය සඳහා මාව තෝරාගන්න ධර්මා ඇතුළු මම මීට පෙර රඟපෑ එවැනි චරිතත් බොහෝ දුරට බලපාන්න ඇති. මොකද, තිර පරීක්ෂණයක්වත් නොතියා තමයි සුනිල් සර් මාව මේ චරිතය සඳහා තෝරා ගත්තේ. “චක්‍රවර්තීන් අශෝක සම්රාට්” කියන්නේ ඉන්දියාවේ හුඟක් ජනප්‍රිය වූ ටෙලි නාට්‍ය මාලාවක්. ධර්මා විදිහට මම රඟපාන භූමිකාවට අදටත් ඉතාම හොඳ ප්‍රතිචාර ලැබෙනවා. ඒත් ලංකාවට එනතුරුම මම දැනගෙන හිටියේ නැහැ ලංකාවේ මට මේ තරම් ප්‍රේක්ෂක පිරිසක් ඉන්නවා කියලා. 
 
මේ චිත්‍රපටයේදී ඔබ යශෝධරා දේවිය හිස මුඩු කර පැවිදි බිමට ඇතුළත් වීමෙන් අනතුරුව භික්ෂුණියක් ලෙස ජීවිතය ගෙන යන ආකාරයද නිරූපණය කිරීමට සිදුවෙනවා. කොහොමද ඔබට ඒ අත්දැකීම දැනුණේ ?
 
මීට කලින් මේ වගේ පූජනීය චරිතයක් රඟපාලා තිබුණේ නැති නිසා ඒක මට සුවිශේෂ අත්දැකීමක් වුණා. මම මුලින්ම විමසුවා යශෝධරා  පැවිදි වෙන දර්ශන සඳහා මට හිස මුඩු කරන්න වේවිද කියලා. නමුත් එවැනි අවශ්‍යතාවක් මතු වුණේ නැහැ. වේෂ නිරූපණ කටයුතුවලින් තමයි හිස මුඩුකළ බවක් පේන විදිහට මාව හැඩගැන්වූයේ. 
 
මීට පෙර වගේම යශෝධරාවගේ චරිතය රඟපෑ පසුවත් හොඳ මට්ටමේ චරිත පමණක් රඟපාන චරිතවත් නිළියක් තමයි මේ චිත්‍රපටය සඳහා මහාචාර්ය සුනිල් ආරියරත්නයන්ට අවශ්‍ය වුණේ. ඔහුගේ බලා‍පොරොත්තුව මින් ඉදිරියටත් ඉටු කිරීමට ඔබට හැකි වේවිද?
 
මම නිළියක් වුණේ අහම්බෙන්. මීට කලින් මගේ බලා‍පොරොත්තුව වෙලා තිබුණේ නීතිඥවරියක් වෙන්නයි. නිළියක් වුණාට පස්සේ ඉතා කල්පනාකාරීව බොහොම සැලකිල්ලෙන් තමයි මම චරිත තෝරා බේරා ගත්තේ. මම හිතන්නේ රංගන ජීවිතයේදී එවැනි පිළිවෙතක් අනුගමනය කිරීම නිසා තමයි යශෝධරා වගේ පූජනීය චරිතයකට පණ ‍පොවන්නත් මට අවස්ථාව ලැබුණේ. ඉතින්, රංගන ජීවිතයේ මෙතෙක් ආ මග මින් ඉදිරියටත් වෙනස් නොකර, මට ගැළපෙන හොඳ චරිතවලට පමණක් රංගනයෙන් දායක වීමට තමයි මම බලා‍පොරොත්තුවෙන් ඉන්නේ. 
 
කිෂාන් කනංකෙ 
ඡායාරූප - සංදේශ් බණ්ඩාර 

 

Lakbima Online

Download Lakbima Mobile App

 
 

 

Get In Touch With Us

E-Papers

Please publish modules in offcanvas position.