Coss Ear2
lakbima.lk
COSS Ear 1

දිවංගත ජනාධිපති රණසිංහ‍ ප්‍රේමදාස මහතා දේවත්වයක් ලබා ඇති බව තහවුරු වී ඇතැයි පේරාදෙණිය විශ්ව විද්‍යාලයේ සමාජවිද්‍යා මහාචාර්ය දයා අමරසේකර මහතා 'ලක්බිම ඔන්ලයින්' වෙත කළ ප්‍රකාශයක් පසුගිය දින කිහිපය තුළ  වෙබ් අඩවි සහ සමාජ ජාල ‍ඔස්සේ ව්‍යාප්තවන ලදුව  ලක්‍ෂ ගණනකගේ අවධානයට යොමු විය. බැලූ බැල්මටම එය අසාමාන්‍ය ප්‍රකාශයක් වූ බැවින් එම ප්‍රකාශය මත පදනම්ව මහාචාර්යවරයාගේ මානසික සෞඛ්‍යය අභියෝගයට ලක්කෙරුණු අවස්ථාවන්ද සමාජ ජාල වෙබ් අඩවි තුළින් මම දුටුවෙමි.

සම්මතයෙන් සහ පොදු ජන විඥානයෙන් බැහැර වූ කිනම් හෝ අදහසක් පළ  කරන ඕනෑම කෙනෙකු ‍ගේ මානසික සෞඛ්‍යය පිළිබඳ ප්‍රශ්න කිරීමක් හෝ එය අභියෝගයට ලක් කිරීමක්  සෑම සමාජයකම දක්නට ලැබේ. කාටත් වැටහෙන ලෙසින් කිවහොත් එය එම තැනැත්තාට 'පිස්සු' ලේබලය ඇලවීමකි. එහෙත් එවන් ප්‍රකාශ බොහොමයක් විචාරශීලී නොවන බව සියල්ලටම කලින් කිව යුතුය.

මානව ඉතිහාසයේ ඒ තාක් ඉස්මතු නොවූ විවිධ ක්‍ෂේත්‍රයන් සම්බන්ධයෙන් නව ඉසව් මංපෙත් සොයා ගත් බොහෝ විද්වතුන්ද එම සමාජයන්හි 'පිස්සු' ලේබලයෙන් ගැරහුම් ලැබූ බව නොරහසකි. ඒ සඳහා නිදසුන් දහස් ගණනක් ඇති අතර මෑත ඉතිහාසයෙන් ගත හැකි හොඳම නිදසුන වනුයේ නූතන මනෝ විද්‍යාවේ පියා ලෙස සමාජයෙන් පිදුම් ලබන සිග්මන්ඩ් ‍ෆ්රොයිඩ් ය. නූතන මනෝ විද්‍යාවේ පියා ලෙස හැඳින්වෙන ඔහුද ජීවත් වූ සමාජය තුළ පිස්සෙකු ලෙස හැඳින්වුණි නම් සෙස්සන් ගැන කවර කතාද?

දැන් අපි මහාචාර්ය දයා අමරසේකරයන්ගේ ප්‍රශ්නය වෙත යොමු වෙමු.

කවර විද්‍යාවක හෝ ශාස්ත්‍රයක ප්‍රාමාණික විද්වතෙකු තුළ වුවද ඒ තැනැත්තාට ආවේනික පෞද්ගලික සිතුම් පැතුම්, ආකල්ප විකල්ප  සමුදායක් පැවතිය හැක. හුදෙක් ඒවා ඔහු ප්‍රගුණ කළ විද්‍යාව හා ශාස්ත්‍රය සමඟ බද්ධ නොවේ. එසේ බද්ධ වන්නේ නම් මෘත ශරීර කපා කොටා ව්‍යච්ඡේදනය කරන කාය ව්‍යච්ඡේද විද්‍යාව පිළිබඳ උ‍ගතෙකු තුළ ලිංගිකත්වයක් පැවතීමට අවකාශයක් නැතැයි යමෙකුට තර්ක කළ හැක. සෙසු විෂයන් සම්බන්ධයෙන් කීමට ඇත්තේ ද එපමණකි. ලෝකයේ නවීන විද්‍යා තාක්ෂණ ආදී ක්‍ෂේත්‍රයන් පිළිබඳ නොබෙල් ත්‍යාග දිනා ගත් ඇතැම් විද්වතුන් පවා සර්වබලධාරී දෙවියන් වහන්සේ විසින් තමනට ඒ සම්මානය හිමිකර දුන් බව පැවසූ අවස්ථා ඉතිහාසයෙහි ඇත. මිනිස් මනැසෙහි ස්වභාවය එයයි.

ආධ්‍යාත්මික විෂය පථය මිනිස් මොළය තුළ පමණක් ක්‍රියාත්මක වන්නකි.  අන් කිසිදු සත්ව මොළයක එය ක්‍රියාත්මක නොවේ. සදාචාරය, ශිෂ්ටාචාරය, සංස්කෘතිය ආදී විෂයන්ද ඒහා තදනුබද්ධව පවතී. මිනිසා තුළ පවත්නා මෙම තත්ත්වය මිනිස් පරිනාමයේ එක්තරා දියුණු අවස්ථාවක සිට ක්‍රියාවට නැංවෙන්නකි. අතීතයේ ජීවත් වූ මිනිසුන් ගස් ගල් ආදී ස්වාභාවික වස්තූන්ටද කිසියම් ප්‍රාණයක් ඇතැයි ද ඉන් ජීවත්වන්නවුන් කෙරෙහි බලපෑමක් සිදුවෙතැයි ද විශ්වාස කළහ. එය හැඳින්වෙනුයේ ප්‍රාණවාදය (Animism) යනුවෙනි. අතීත මානව සමාජයේ අධි භෞතික සංකල්ප මත හටගත් පුරාණෝක්ති මිනිස් මනැසට පහසුවෙන් අව‍ශෝෂණය විය. ලොව දේව සංකල්ප බිහිවීමේ සමාරම්භය එයයි.  ඉන්පසු ඒවා පදනම් කොට ලොව පුරා ආගම් ඇරඹීමේ මානව විද්‍යාත්මක සහ මනෝ විද්‍යාත්මක පදනම එය බව ලොව පුරා පිළිගැනෙන මතයකි. ඉන්පසුව මිනිසාගේ පරිනාමයත් සමඟ එම බහුදේවවාදී ආගම් ඒකදේවවාදී ආගම් බවට පත්වූ අතර අද වන විට දේවාවාදී නොවන බුදුදහම වැනි ඥාණවිමංසා වාදී ඉගැන්වීම්  (Epistemology) ද ඉහත සඳහන් ආගම් අතරටම පිවිසී ඇත.

මිනිසාගේ චින්තනය හුදෙක් විද්‍යාත්මක නැත. විද්‍යාත්මක චින්තනයට හුරුවූ මිනිසා තුළද දාර්ශනික, සංස්කෘතික, කලාත්මක, සෞන්දර්යාත්මක සහ භාවාත්මක සිතුවිලි හැඟීම් ක්‍රියාත්මක වීම ඉතා ස්වභාවික තත්ත්වයකි. මෙය මිනිසා තුළ පවත්නා විද්‍යාත්මක චින්තනයට පරිබාහිර වූ වෙනම ක්‍රියාවලියකි. කලාව, සංස්කෘතිය ආදී විද්‍යාත්මක නොවන ක්‍ෂේත්‍ර රාශියක් මෙම විෂය පථය තුළ ක්‍රියාත්මක වේ. එසේ නොවන්නට අඩුම තරමින් කවියක්වත් අපට අසාගන්නට හෝ කියවා ගන්නට ඉඩක් නොලැබෙනු නියතය.

එමෙන්ම තමන් කුඩා කල සිට හැදී වැඩුණු පරිසරය තුළ වූ විශ්වාස සහ ඇදහිලි විද්‍යා අධ්‍යාපනයත් සමඟ මිනිස් මනැසින් සේදී නොයනුයේ එම විශ්වාස මොළයේ ව්‍යුහයේ වෙනත් තැනක තැන්පත් වී ක්‍රියාත්මක වන බැවිනි. ඒ ඔස්සේ සමාජ විද්‍යාඥයෙකු වේවා, ජීව විද්‍යාඥයෙකු වේවා, තාරකා විද්‍යාඥයෙකු වේවා ළමා වියේදී තම ජීවිතය තුළට අධිභෞතික විශ්වාස, ඇදහිලි යන හර පද්ධතීන් පිවිසුවාගෙන ඒවා දිගින් දිගටම මනැස තුළ රඳවාගෙන තිබිය හැක. ඒවායින් තමනට හෝ සෙසු සමාජයට හානියක් නොවන්නේ නම් එය මානසික රෝග තත්ත්වයක් ලෙස අපට පිළිගත නොහැක.

මෙහිදී තම මෑණියන් සහ ජනපති ප්‍රේමදාස දේවත්වයට පත්ව ඇති බව පවසන මහාචාර්යවරයා ඉතා පැහැදිළි ලෙසම පවසන්නේ මෙය තමන් උගත් විෂය ක්‍ෂේත්‍රයට අනුව විස්තර කළ නොහැකි බවය. ඒ අනුව ඒ ඔහුගේ පෞද්ගලික මතයක් බව පැහැදිළිවම පෙනෙයි. එවැනි පෞද්ගලික මතයක් දැරීමට සහ එය ප්‍රකාශ කිරීමට ඕනෑම කෙනෙකුට අයිතියක් නිදහසක් තිබිය යුතුය යන්න මගේ  විශ්වාසයයි.  

විවිධ කරුණු සම්බන්ධ අස්වාභාවික ප්‍රකාශ කරන්නවුන් අතර මානසික රෝගීන් ද සිටිය හැකි බව පැහැදිලි සත්‍යයකි. එහෙත් ඒ සම්බන්ධයෙන් කීමට ඇත්තේ 'හැම රජෙකුම මිනිසෙකු වුවද සෑම මිනිසෙකුම රජෙකු ලෙස සැලකීම බරපතල වරදක්' බවය. එහෙත් මේ පිළිබඳව නොදත් හා තැකීමක් නොකරන වත්මන් සමාජය සමාජ ජාල වෙබ් අඩවි මඟින් ඉතා පහසුවෙන් කළ හැකි දෙයක් වන ඕනෑම කෙනෙකු හට ලේබල් ඇලවීමට දක්වන උන්නදුව සහ  ඉක්මන් භාවය පිළිබඳවද මා තුළ පුදුමයක් හෝ නොමනාපයක් නැත. ඒ  එය අප ජීවත්වන සමාජ‍යේ සාමාන්‍ය ස්වභාවයක් බැවිනි.

කොළඹ විශ්ව විද්‍යාලීය වෛද්‍ය පීඨයේ මනෝ වෛද්‍ය විද්‍යාව පිළිබඳ ජ්‍යෙෂ්ඨ කථිකාචාර්ය සහ ශ්‍රී ලංකා ජාතික රෝහලේ විශේෂඥ මනෝ වෛද්‍ය මහේෂ් රාජසූරිය

සටහන - දමයන්ති ගමගේ

පෙර ලිපි -

දෙවිවරුන් හා කතා කළ හැකි යැයි පවසන්නේ මානසික රෝගීන්ද?

 

Lakbima Online

Download Lakbima Mobile App

 
 

 

Get In Touch With Us

E-Papers

Please publish modules in offcanvas position.