Coss Ear2
lakbima.lk
COSS Ear 1


දරුවන් සිව්දෙනාත්, බිරිඳත් සසුන්ගත කර තමන්ද පැවිදිව ගිහිකල තමන් සතුව තිබූ ස්ථිර නිවස හා ගොඩ ඉඩම විකුණා එම මුදලින් තම දෑතින්ම විහාරස්ථානයක් ඉදිකරන බුද්ධ පුත්‍රයෙක් පිළිබඳව ‍පොළොන්නරුව වැලිකන්ද ප්‍රදේශයෙන් අපට අසන්නට ලැබිණි.
ඒ වැලිකන්ද මහවැව ශ්‍රී ශාන්ති නිකේතාරාමයේ වැඩවාසය කරන වලපනේ අභයරතන හිමියන්ය.
විහාරස්ථානයේ බෝධි ප්‍රාකාරය මෙන්ම විහාරස්ථානයට පිවිසුම් පඩිපෙළ ඇතුළු අනවශ්‍ය කොටස් ඉදිකිරීමට තම දෑතින්ම බදාම සිමෙන්ති මිශ්‍ර කිරීම නිසා අභයරතන හිමියන්ගේ දෑතේ ඇඟිලිද තුවාල වී ඇති අයුරු අපට දක්නට ලැබිණි.
වලපනේ නිල් දණ්ඩාහින්න ගම්මානයේ පදිංචිව සිටි ඩබ්ලිව්.ජී. අබේසේකර සහ ජී.ඩබ්ලිව්. සිරියාවතී යන පින්බර යුවළට දාව උපන් දරුවන් සිව්දෙනාගෙන් තිදෙනකු 2004 වසරේදී පළමුව සසුන් කෙතට ඇතුළත් වූහ.
ඒ අලව්ව වැදිකන්ද ආරණ්‍ය සේනාසනයේ වැඩ විසූ උස්සාපිටියේ පඤ්ඤාරංසි නායක හිමියන්ගේ උපදේශකත්වයෙනි.
වලපනේ ධම්මවංශ, වලපනේ අරියවිමල, වලපනේ පඤ්ඤාධීර නමින් ඔවුන් සසුන්ගත වී ඇති අතර මේ වනවිට එම සාමනේරවරුන් වයස අවුරුදු 24, 21 සහ 18 වියෙහි පසුවෙති.
අනතුරුව 2005 වසරේදී මහරගම පඤ්ඤාතිලක මහ පිරිවෙනේ අනුනායක විමලබුද්ධි නාහිමියන් අතින් වලපනේ අභයරතන, වලපනේ ධම්මච්ෙතනා සහ වලපනේ සුබෝධි යනුවෙන් පියාත් මවත් බාල පුතුත් සසුන් කෙතට ඇතුළත් වූහ.
වලපනේ අභයරතන හිමියන්ගේ වයස අවුරුදු 49කි. වලපනේ ධම්මච්ෙතනා මෙහෙනින් වහන්සේගේ වයස අවුරුදු 44ක් වන අතර උන්වහන්සේ මේ වනවිට කුරුවිට වාළුකාරාම ආරණ්‍ය සේනාසනයේ භාවනායෝගීව වැඩ වාසය කරති. 14 වියෙහි පසුවන වලපනේ සුබෝධි හිමියන් මහවැව ශ්‍රී ශාන්ති නිකේතනාරාමයේ වැඩ වාසය කරති.
මහත්තයෝ මගේ මුළු පවුලම පැවිදි වුණා. බුදු දහම පවත්වාගෙන යෑම ඉතා වැදගත්. මම ගිහි කල හම්බ කරපු සියලු දේවල් සාසනයට පූජා කළා. මගේ ස්ථිර නිවසත් ගොඩ ඉඩමත් විකුණලා ඒ මුදල්වලින් මේ පන්ස‍ලේ අඩුපාඩු හදනවා. දැන් අවුරුදු 03ක් ඉඳලා මේ පන්ස‍ලේ මම වැඩ වාසය කරනවා. සිමෙන්ති බදාම අනලා මගේ අතත් තුවාල වුණා. මට මේසන්, වඩු වැඩ, හොඳට පුළුවන්. මේ පළාතේ දායකයින්ටත් තියෙන ආර්ථික ගැටලු නිසා මම හිතුවා මම ගිහි කා‍ලේ හම්බ කරපුවා සාසනයට පූජා කරන්න. ඒ නිසා මම දායකයින්ට කරදර නොකර බදාම සිමෙන්ති අනලා බෝධි ප්‍රාකාරයයි. පන්ස‍ලේ අඩුපාඩු ටික මමම හදනවා. බුද්ධ ශාසනය වෙනුවෙන් මම කරන්න හැකි උපරිම සේවය කරනවා. දැන් අරියවිමල හාමුදුරුවෝ රජරට විශ්වවිද්‍යාලයේ අධ්‍යාපනය ලබනවා. පඤ්ඤාධීර හාමුදුරුවෝත් විශ්වවිද්‍යාලයට තේරිලා ඉන්නවා. මම විහාරස්ථාන පහක හයක වැඩ වාසය කළා. සිංහරාජයේ වසර 04ක් වනවාසීවත් හිටියා. දැන් ඉතින් මේ දුෂ්කර පන්සල දියුණු කරගෙන වැඩ ඉන්නවා. මේ පළාතේ සමහර පන්සල්වල භික්ෂූන් වහන්සේලාට කිසි පහසුකමක් නැහැ. රජයේ අවධානය යොමු වුණොත් ලොකු පිනක්. වලපනේ අභයරතන හිමියන් එලෙස පැවැසූහ.

නිමල් ජයරත්න - මනම්පිටිය

ඔහු මෑතක දී ජනප්‍රියත්වයට පත් තරුණ ගායකයෙකි. සංගීත සන්දර්ශනාදියේද ඔහුට සැලකිය යුතු තැනක් හිමිව තිබේ. එනිසා ඔහු පසුගිය කාලයේ නවීන මෝටර් රථයක්ද මිලදීගෙන ඇත.

තවමත් අවිවාහකයෙකු වුව ඔහු තරුණියක් සමඟ නිළ නොලත් ලෙසින්  පවුල්කෑ බවට ක්‍ෂේත්‍රයේ තොරතුරු පැතිර ගොස් තිබේ. මේ අතර ඔහු කොළඹට ආසන්න ප්‍රදේශයක තම සමීපතම මිතුරෙකුගේ නිවසට නිතර යාම් ඊම් සිදු කරයි. ඒ එම පවුල තමන් හා අතිශය හිතවත් බැවිනි.

මීට මද කලකට පෙර ඔහු එම නිවසට යන අතරේ මඟ අද්දර පිහිටි රූපලාවන්‍යාගාරයක රූපලාවන්‍ය ශිල්පිනියක් ඔහු ගේ මෝටර් රථය නතරකොට ඔහු හා කතා බස් කළාය. එහිදී ඇය කියා සිටියේ තමන් එම ගායකයාගේ මුල් පෙලේ රසිකාවියක බවය. තම රූපලාවන්‍යාගාරයේ ඔහුගේ ගීත නිතරම සීඩී මඟින් වාදනය කරන බවත් ඇය කියා සිටියාය. ඉන්පසුව ඇගේ පෙරැත්ත මත ඔහු ද එම රූපලාවන්‍යාගාරයට ගොඩවැදුණු අතර ඔහුගේ රූපලාවන්‍ය කටයුතුද ස්වෙච්ඡාවෙන්ම කරදිය හැකි යැයි එම රූපලාවන්‍යවේදිනිය කියා සිටියාය.

කෙසේ හෝ පසුගිය සිංහල අලුත් අවුරුද්ද ළංවත්ම එම රූපලාවන්‍ය වේදිනියගෙන් ඔහුට විශේෂ ඇරයුමක් ලැබුණි. ඒ සිංහල අලුත් අවුරුද්දෙන් පසු අසවල් දිනයේ තම රූපලාවන්‍යාගාරය හාපුරා කියා විවෘත කරන බැවින් තම පළමු සේවාලාභියා ලෙස එහි පැමිණ සේවය ලබා ගන්නා ලෙසය. කෙසේ හෝ ඇගේ ඇරයුම සතුටින් පිළිගත් එම ගායකයා ඇය කී දින කී වෙලාවටම එහි ගියේ ඇය විස්මයට පත්කරවන අන්දමේ තුටු පඬුරක්ද ලියුම් කවරයක බහාගෙනය. එහි දී ඇයට එම තුටු පඬුර ප්‍රදානය කළ ගායකයා ඇගෙන්  උණුසුම් හාදුවක්ද ලබා තම මිතුරාගේ නිවස වෙත යත්ම මිතුරා වෙනුවට ඉදිරියට පැමිණියේ ඔහුගේ මවය.

"පුතා දැන් අර සැලුන් එකේ හිටියද?"

මිතුරාගේ මව ඇසුවේ තරමක නොසතුටකිනි.

"ඔව් ඇන්ටි ඇයි?"

ඔහු අසා සිටියේ විස්මයෙන් යුතුවය.

"ඉතින් පුතේ ඒක පුතා වගේ කෙනෙකුට යන්න හොඳ තැනක් නෙවෙයිනේ? බලන්නකො දැන් පුතා එතනට යනව එනවා කියලා මට කීප දෙනෙක්ම කිව්වා. මේ දැනුත් පුතා එතනට ගියා කියලා මට එක්කෙනෙක් ෆෝන් කරලා කිව්වා."

මිතුරාගේ මව එසේ කියත්ම ගායකයාට කිසිවක් අදහා ගත නොහැකි විය.

"ඉතිං ඇන්ටි ඒ මගේ රසිකාවියක්නේ;  මම එතනට ගියාම ඇති වරද මොකක්ද?"

ගායකයා අසා සිටියේය. ‍

"පුතා හිතන්නේ ඒ පුතාගේ රසිකාවියක් කියලද? ඒත් දැන ගන්න ඒ හැමෝගෙම රසිකාවියක්; ඔය අවුරුදු දවස් වලත් ඔය ගෑනි ඕක වහන්නේ නැතිව එක එක මිනිස්සු ඇතුලට ගෙන්න ගත්තා. ඒක ඒ පැත්තෙ හැමෝම දන්නවා."

මිතුරාගේ මව එසේ කියත්ම ගායකයාට තරු පෙණුනි.

රූපලාවන්‍යවේදිනියක ලෙසින් එසේ පෙනී සිට ඇත්තේ නොයෙකුත් දුරාචාරයන්ට සම්බන්ධ කාන්තාවක බවත් ඇය විවිධ පුද්ගලයන්ගෙන් මෙලෙස උපායශීලි ලෙස මුදල් කඩා වඩා ගන්නා බවත් ගායකයාට වැටහී ගියේ ඉන් පසුවය.

"අවුරුද්දට නාන්න නැකතක් තියෙනවා නෙ මචං; මට දුක උඹ නැකතට කලින්ම නාගත්ත එක ගැන."

සිය මව නොමනාපයෙන් ඉවත්ව ගිය පසු මිතුරා ඔහුගේ කනට කර කෙදිරීය.

 

ඔබ මැදි වයස් පසුකරමින් සිටින කෙනෙකු නම් ගුවන්විදුලිය ඔස්සේ කුඩා කල ඔබේ සිඟිති දෙසවන් පිනවූ “තැපැල් පියුං මාමේ මට ලියුම් ගොඩාක් ඕනේ” “හොර පූසියි බටු මීයයි“ “අතුරු මිතුරු වන වටකුරු” “බෙලෙක්ක ටින් බෙර” වැනි සුන්දර මාතෘකා වටා ගෙතුණ සුමිහිරි ළමා ගී වල මිහිරියාව අදටත් ඔබේ සිත් කොනක ලැගුම්ගෙන ඇතිවාට සැක නැත. 1968 දී පමණ ළමා පිටියේ ගායිකාවක ලෙස ගීත ගායනයට අවතීර්ණ වූ ඇය අද හැටවිය සපිරි මිත්තණියකි. එතැන් පටන් දශක පහක් තිස්සේ ඒ ශ්‍රේණියේ සරල ගී ගායිකාවක අති දක්ෂ චිත්‍රපට පසුබිම් ගායිකාවක සේම සිත් පහන් කරන බුදුගුණ, ගී, කවි, ගායනා රැසකටද හිමිකාරිය වූ ඒ සොඳුරු ගැහැනිය දමයන්ති ජයසූරියයි. තවමත් බිඳකුඳු වෙනස් නොවූ ඒ කටහඬේ මිහිර එලෙසමය. මේ දිනවල ඇය සූදානම් වන්නේ ඇයගේ “සිත නිවන ගී” සංගීීත සූයාමය සමග සංගත තැටිය එළිදැක්වීමටය. එසේම මේ ඇයගේ නිර්මාණ දිවියේ අවසන් වැඩසටහන බවද ඇය කියන්නීය. ඒ පණිවුඩය ඇගේ රසික රසිකාවියන්ට දුකක් විය හැකි නමුදු ඒ ගැන ඇය දරනා හේතු කාරණා මොන තරම් නම් උත්තරීතරදැයි ඒ අය තේරුම් ගනු ඇත. වසර 50ක් තිස්සේ සුවහසක් රසික සිත්සතන් පිනවමින් ගී ගැයූ ඇය ඒ මිහිරි හඬට සමුදී ජීවිතයේ ඉසිඹුලන්නට අත්හැරීමෙන් ලැබිය හැකි “සමහන් සුවය” වින්දනය කිරීමට පෙරුම් පුරන්නීය. ඒ තොරතුරු සොයා ගිය අප හා පිළිසඳරට මුල පිරුවේ අතිශය ලෙන්ගතුවය. 
“ළමා පිටියේ සින්දු කියන්න පටන් ගන්නකොට මට වයස අවුරුදු 11-12ක් විතර ඇති. ඒ කා‍ලේ බොහොම ජනප්‍රිය වුනු ළමා ගීත 25-30ක් විතර මම ගායනා කරල තියෙනවා. බොහොම සතුටින් ගෙවුණු ළමා කාලයක් මට තිබුණෙ. ඉන් පස්සෙ තමයි සරල ගී ගායිකාවක් විදියට ක්ෂේත්‍රයට එකතු වුණේ. සාමාන්‍යයෙන් ඒ කාලෙ කෙනෙකුට සරල ගී වැඩසටහන් ලැබෙන්නේ ඉතාම සීමිතවයි. ඒ වගේම ඒ වැඩසටහනකදී අපි මව්ගුණ බුදුගුණ වගේම දේශාභිමානී මාතෘකා යටතේ තමයි ගීත තෝරාගත යුතු වුණේ් ඉතින් මම ඊට වෙනස් මාතෘකාවකින් මුල්ම ගීතය ගායනා කළේ රෝහන සිරිවර්ධන එක්ක. “හමුවේවා අපි මතු අත් භවයක මිනිස් හඬින් තොර පාළු දූපතේ” ඒක බොහොම ජනප්‍රිය වුණු එකක්. ඉතින් ඔහොම කාලය ගෙවිලා ගියා”
තරුණ දමයන්තිය විවාහ වූයේ ප්‍රවීණ මාධ්‍යවේදියෙකු ඒ.ඩී. රංජිත් කුමාර මහතා සමගය. නුවන් නයනජිත් කුමාර ඔවුන්ගේ එකම ආදරණීය පුතණුුවන්ය. අතිවිශිෂ්ට සිනමා තොරතුරු ගවේෂකයෙකු සිනමා විචාරකයෙකු වන ඔහු අද සරසවිය පුවත්පතේ නියෝජ්‍ය කර්තෘ ලෙස සේවය කරයි. එසේම නුවන් කැලණිය විශ්වවිද්‍යාලයේ බාහිර කථිකාචාර්යවරයෙකු ලෙසද කටයුතු කරයි. 
“ඉතින් විවාහ වුනාට පස්සෙ මම ස්වාමියාගෙයි දරුවගෙයි වැඩකටයුතුවලට යොමුවුණා. සම්පූර්ණයෙන්ම ගීත ගායනයෙන් ඈත් වුණා. ඔහොම ඉන්න අතරෙ දවසක් අපේ පුංචි පුතාව බලන්න හේමසිරි සෙල්ලප්පෙරුමයි. චන්ද්‍රා මුතුතන්ත්‍රියි ආවා. ඉතින් ආගිය තොරතුරු කතා කරමින් ඉන්න අතරේ ඇයි මේ විදියට ගීත නොකියා ඉන්නෙ අපේ චිත්‍රපටයකට ගීත කියන්න කියල ආරාධනා කලා. ඒ මගේ ගීත කලාවේ දෙවැනි ආගමනයයි. සත්වෙනි දවස චිත්‍රපටයේ මාලිනී ෆොන්සේකාගේ චරිතයට “කුමාරයෙක් ආවා” කියන පසුබිම් ගීතයෙන්. ඒක මගේ දිවියේ කඩඉමක්. කුලරත්න ආරියවංශ ලියපු ඒ ගීයට සංගීත අධ්‍යක්ෂණය කළේ ප්‍රේමසිරි කේමදාස සූරීන්. ඉන් පස්සෙ මම දිගටම වගේ චිත්‍රපට පසුබිම් ගී ගායනයේ යෙදුණා. බිනරි සහ සුදු බණ්ඩා චිත්‍රපටයේ ශ්‍රියානි අමරසේනගේ චරිතයට ගැයූ “හිරු දෙවියෝ වඩිනා සේ මා” ඒ ගීතයත් කේමදාස මාස්ටර්ගේ සංගීතයට අජන්තා රණසිංහ අකුරු ඇමුණු එකක්. මේ වගේ “අසිපත මමයි“ දිනුම “සප්ත කන්‍යා” වගේ චිත්‍රපට විශාල ප්‍රමාණයකට මම පසුබිම් ගායනා කළා”
ඇයගේ පසුබිම් ගායනා ෙශෙලියේ විශේෂත්වය වන්නේ මාලනී ෆොන්සේකාගේ චරිතයකට පසුබිම් ගැයුමෙන් ආරම්භ කළ ඒ හඬ වසන්ති චතුරානි, ශ්‍රියානි අමරසේන, ගීතා කුමාරසිංහ, සබිතා පෙරේරා, ඩිලානි අබේවර්ධන, දිල්හානි අශෝකමාලා වැනි නිළියන් රැසකටම ගලපා ගනිමින් ගායනයේ යෙදීමය. මෑතකදී තිරගත වූ පත්තිනි චිත්‍රපටයේ සමන් ලෙනින් සමග ගැයූ “සරස්වතී ගීතය” ද ඇගේ ගායනයේ සුවිශේෂී වූවකි. 
ඇය හඬ මුසු කළේ චිත්‍රපට වලට පමණක් නොවේ. “හිරුට මුවාවෙන්” ටෙලි නාට්‍යයේ “ඔබට හොරා” තේමා ගීතයෙන් ඇරඹි ගමනද, මෑතක විකාශය වූ “හඳපානාගල” ටෙලි නාට්‍ය තෙක්ම දිව ගියේය. “හිරුට මුවාවෙන්” නමින්ම ඇගේ මුල්ම කැසට් පටය බිහිවූයේ අසූ ගණන්වලය. “අවාරේ පිපී” සේම “ලා සඳ පායා” “සඳහම් චාරිකා” වැනි සංයුක්ත තැටිවලද ඇගේ නිර්මාණ ඇතුළත්විය. කලකට පසු ඇය නැවත “සිත නිවන ගී” නම් සංගීත තැටියක් එළිදැක්වීමට සැරසෙන්නේ ඒ ඇයගේ ගී ගැයුමට ආයුබෝවන් කීමටය. 
“දැන් මගේ වයස අවුරුදු 62ක්. මම අවුරුදු 50ක්ම ගීත ගායනා කළා. ඒ වගේම මගේ සැමියට, පුතාට මගේ යුතුකම් උපරිමයෙන්ම ඉෂ්ට කළා. දැන් මගේ පුතාට පුංචි පුතාලා දෙන්නෙක් ඉන්නවා. මගෙ ‍ලේලිත් බොහොම කරුණාවන්ත දරුවෙක්. ඉතින් මම හිතුවා දැන් මගේ ඊළඟ ආත්ම භවය වෙනුවෙන් යමක් එක්රැස් කරගන්න ඕනේ කියල. දැන් ඉදිරියට එන අලුත් පරපුරට මේවා භාරදීලා අපි නිදහස් වෙන්න ඕනේ. නිදහසේ පින් දහම් කරගෙන සතුටින් අනාගතයට මූණ දෙන්නයි දැන් මට අවශ්‍ය කරන්නේ”
“මම දැන් කාලෙක ඉඳලා බියගම සියඹලාපේ, “සිතුම් පියස” ධර්මායතනයේ පූජ්‍ය හන්තානේ ධම්ම ගවේෂී ස්වාමින් වහන්සේ හා සමග ධර්ම කටයුතුවලට සම්බන්ධ වෙලා කටයුතු කරනවා. උන්වහන්සේ තරුණ දරුවන්ගේ අනාගත සුබසිද්ධියට මානසික සෞඛ්‍යය ප්‍රවර්ධනයට විශේෂ වැඩසටහන් දියත් කරන කෙනෙක්. මගේ මේ “සිත නිවන ගී” සංගීත වැඩසටහනටත් “සිතුම් පියසේ දායක දායිකාවන් තමයි අනුග්‍රහය දක්වන්නේ. මේ සංගීත තැටියේ ගීත රචනා කොට තිබෙන්නේ මහාචාර්ය සුනිල් ආරියරත්න, පූජ්‍ය රඹුක්කන සිද්ධාර්ථ හිමි, පූජ්‍ය තිරිකුණාම‍ලේ ආනන්ද මහ නාහිමි, කුලරත්න ආරියවංශ, ආචාර්ය ප්‍රනීත් අබේසුන්දර, ජයම්පති අල්ගම, පූජ්‍ය මඩපාත ධම්මසාර  හිමි, පූජ්‍ය වෙන්නප්පුවේ චන්ද්‍රානන්ද හිමි වගේ අයයි. මට ගායනයෙන් සහය වෙන්නේ එඩ්වඩ් ජයකොඩි සහෝදර කලා ශිල්පියායි. 
ආචාර්ය රෝහණ වීරසිංහ, ආචාර්ය ලයනල් අල්ගම, ආචාර්ය නන්දා මාලනී, එච්.එම්. ජයවර්ධන, එම්.ආර්. චූලසිංහ, අජිත් දර්ශන ජයවීර, දර්ශන වික්‍රමතුංග, ඉන්ද්‍රජිත් මිරිහාන සංගීත නිර්මාණයෙන් දායක වෙලා තියෙනවා. “සිත නිවන ගී” ජනගත කිරීමේ සංගීත සූසාමය අප්‍රේල් මාසෙ 23 වැනි සඳුදා ප.ව. 5.00ට හැව්ලොක් පාරේ සම්බුද්ධත්ව මාවතේ බෞද්ධ සංස්කෘතික මධ්‍යස්ථානයේදී පැවැත්වෙනවා. එහි විශේෂ දේශන මහාචාර්ය පාතේගම ඥාණිස්සර හිමි සහ කථිකාචාරිනී නාවලපිටියේ අනුරාධා සුධම්මිකා මෙහෙණින් වහන්සේ විසින් පවත්වනු ලබනවා. සංස්කෘතික කටයුතු දෙපාර්තමේන්තුවේ රාජ්‍ය සංගීත කණ්ඩායම සංගීතය මෙහෙයවීමේ කටයුතුවල යෙදෙනවා ඇයගේ සංගීත වැඩසටහනේ තොරතුරු අප හා කීවේ එලෙසය. ගී ලොවට ආයුබෝවන් කීමට ඇය තෝරාගත් ආකාරය නම් සුවිශේෂීය. 
 
සාකච්ඡා කළා - නිර්මලා කුමාරි සේනාරත්න

ලොව මේ වනවිට ජීවත්ව සිටින වයස්ගතම පිරිමි පුද්ගලයා වෙත ගිනස් සහතිකය පිරිනැමීම පසුගිය දා සිදු විය. ජපානයේ හොකයිඩෝ දූපතේ පිහිටි අශොරෝ නැමැති ගම්මානයේ වෙසෙන මේ අපූරු මිනිසාගේ නම මසාසෝ නොනාකා (Masazo Nonaka) ය. 1905 ජුලි 25 වෙනි දින උපන් නොනාකාගේ වයස අද වනවිට අවුරුදු 112ක් සහ දවස් 265කට ආසන්නය. 
නොනාකා මේ වනවිට සිටින වයස්ගතම පිරිමියා ලෙස ලෝක වාර්තා ‍පොතට එක් වූයේ මතෛක් එම වාර්තාවට හිමිකම් කියමින් සිටි ස්පාඤ්ඤ ජාතික ෆ්‍රැන්සිස්කෝ ඔලිවේරා පසුගිය දා ජීවිතයෙන් සමුගැනීමත් සමගය. මිය යන විට ඔලිවේරා ගේ වයස අවුරුදු 113 ක් විය. මේ අනුව නොනකාට හිමි ගිනස් සහතිකය එම ආයතනයේ ජපාන නියෝජිතවරිය වන එරිකා ඔගාවා පසුගිය සතියේ නොනකාගේ නිවසේ දී ඔහුට පිරිනැමීමට පියවර ගත්තාය.
නොනකා උපත ලබන විට රයිට් සහෝදරයින් පළමු ගුවන් යානය අත්හදා බලා ගතව තිබුණේ වසර දෙකක කාලයකි. ඔහු ඉතිහාසයේ මොන තරම් සිදුවීම් අත්දුටු පුද්ගලයෙකුද යන්න සිතා ගැනීම අපහසු නොවේ. ඔහුට සහෝදරයෝ සය දෙනෙක් ද, එක් සහෝදරියක් ද සිටිති. ඔවුන් ද බොහෝ දෙනෙකු වාසය කරන්නේ අශොරෝ ගම්මානයේමය. 1931 දී නොනකා විවාහ දිවියට ඇතුළත් වූ අතර ඔහුගේ බිරිඳ බවට පත් වූයේ හත්සුනෝය. ඔවුන් දෙදෙනාට දරුවන් පස් දෙනෙකු සිටින බවද වාර්තා වෙයි.
මේ වනවිට නොනකා ගේ ප්‍රියතම විනෝදාංශ බවට පත්ව ඇත්තේ රූපවාහිනිය නැරඹීම, පුවත්පත් කියවීම සහ කේක් වැනි පැණි රස ආහාර ගැනීම බව සඳහන් වෙයි. ඔහු නැරඹීමට වඩාත්ම කැමති රූපවාහිනී වැඩසටහන් ලෙස සඳහන් වන්නේ සුමෝ සටන් පෙන්වන වැඩසටහන්ය. එමෙන්ම තම පවු‍ලේ අය සමග කාලය ගත කිරීමට ද, සුරතල් බළලුන් දෙදෙනා වන  කුරෝ සහ හරූ සුරතල් කරමින් කල් ගෙවීමට ද  නොනකා විශේෂ ඇල්මක් දක්වයි. තවත් අපූරු කාරණයක් නම් මෙතරම් දීර්ඝ කාලයක් ජීවත් වීමේ රහස ලෙස නොනකා දක්වන හේතුවයි. ඔහු කියන්නේ තමාට දීර්ඝායුෂ හිමි වූයේ පැණි රස කෑම නිසා බවයි. එමෙන්ම උණු දිය උල්පත්වලින් ස්නානය කිරීමේ පුරුද්ද ද එයට එක් හේතුවක් යයි නොනකා පවසයි. ඔහු ජීවත් වන අශොරෝ ප්‍රදේශය උණු දිය උල්පත් බහුල ප්‍රදේශයක් ලෙස ප්‍රසිද්ධියක් උසුලයි. මේවා එම ප්‍රදේශයට සංචාරකයන් ආකර්ෂණය කරන ප්‍රධාන අංගයක් ලෙසද සැලකෙයි. 
කෙසේ වෙතත්,  නොනකා ගේ දියණිය මේ හේතු එතරම් පිළිගන්නේ නැත. ඇය කියන්නේ සිය පියාගේ ජීවන ෙශෙලිය මානසික ආතතීන්ගෙන් තොර එකක් වීම ඔහු දීර්ඝායුෂ ලැබිමට ප්‍රධාන හේතුවක් බවයි.  තමා අකමැති කිසි දෙයක් ආයාසයෙන් කිරීමට ඔහු කිසි විටෙක උත්සාහ නොගන්නා බවද සඳහන් වෙයි. කෙසේ වෙතත් ගිනස් සහතිකය සමග රසවත් කේක් ගෙඩියක් ද නොනකා වෙත පිරිනැමීමට ගිනස් නියෝජිතවරිය පියවර ගෙන තිබූ අතර නොනකා එයින් මහත් සතුටට පත්වූ බව ද පැවැසේ.
මේ වනවිට ජීවතුන් අතර සිටින වයස්ගතම පිරිමියා යන වාර්තාවට මේ ආකාරයෙන් මසාසෝ නොනකා හිමිකම් කීවත් ජීවතුන් අතර සිටින වයස්ගතම කාන්තාව යන වාර්තාවට මේ වනවිට කිසිවෙකු හිමිකම් කියන්නේ නැත. ගිනස් ආයතනය එම වාර්තාවට හිමිකම් කියන්නේ කව්දැයි සොයමින් සිටින බව සඳහන් වේ. පසුගිය කාලයේ මෙම වාර්තාවට හිමිකම් කීවේ ජැමෙයිකාවේ වයලට් බ්‍රවුන් නැමැති කාන්තාවයි. නමුත් 2017 වසරේ ඇය මිය ගියාය. එයින් පසුව මෙම වාර්තාවට හිමිකම් කීම සඳහා කිසිවෙකු ඉදිරිපත් නොවීම නිසා තවමත් එය පුරප්පාඩු වී පවතී.  වයලට් බ්‍රවුන් මිය යන විට ඇගේ වයස අවුරුදු 117ක් විය. මෙතරම් කාලයක් ජීවත් වීමේ රහස කුමක්දැයි වරක් මාධ්‍යවේදියෙකු ඇගෙන් විමසූ විට ඇය පවසා ඇත්තේ එහි කිසිදු රහසක් ගැන තමා නොදන්නා බවයි.
එතෙක් මතෛක් ලොව වාර්තා වී ඇති වයස්ගතම පිරිමියා ලෙස සැලකෙන්නේ ද ජපාන ජාතිකයෙකු වීම තවත් විශේෂත්වයකි. ඒ අවුරුදු 116කුත් දවස් 54ක් ජීවත්ව පසුගිය 2013 වසරේ මිය ගිය ජිරොමොන් කිමුරාය. ඔහුගේ උපන් දිනය ලෙස සඳහන් වන්නේ 1897 අප්‍රේල් 19යි. මේ අනුව  කිමුරාගේ ජීවිතය සියවස් තුනක් තුළ විහිදී තිබිමද විශේෂ කාරණයකි. වයස 65 ක් වනතුරු තැපැල් සේවකයෙකු ලෙස රැකියාව කළ ඔහු පසුව විශ්‍රාම ගෙන අවුරුදු අනූ ගණනක් වනතුරු ගොවිතැන්  කටයුතුවල නියැළී තිබේ. එමෙන්ම ඔහු වුවමනාවට වඩා ආහාර නොගන්නා, සැහැල්ලු ආහාරවලින් සෑහීමට පත්වන කෙනෙකු බව ද පැවැසේ. එය ඔහුට දීර්ඝායුෂ ලැබිමට එක හේතුවක් ලෙස කිමුරා විශ්වාස කළ බව පෙනේ. 
ගැහැනු පිරිමි දෙපාර්ශ්වයෙන්ම එතෙක් මතෛක් ලොව ජීවත් වූ වයස්ගතම පුද්ගලයා ලෙස වාර්තා ‍පොතට එක්ව සිටින්නේ  ප්‍රංශ ජාතික කාන්තාවකි. ඇගේ නම ලුයි කැල්මන්ට්ය.  1875 වසරේ උපන් ඇය වසර 122 කුත් දින 164ක් ජීවත්ව 1997 වසරේ මිය ගියාය. ඇය මේ ආකාරයෙන් දීර්ඝායුෂ භුක්ති විඳින්නට හේතුවක් ලෙස අපූරු කාරණාවක් සඳහන් වෙයි. එනම්, ලුයී කැල්මන්ට් ඉතා ධනවත් පුද්ගලයෙකු හා විවාහ වීම නිසා රැකියාවක් පවා නොකර ඉතා සුව පහසු ජීවිතයක් ගත කිරීමට අවස්ථාව ලැබිමත්, මෙම විවේක කාලය තුළ පිහිනීම, බයිසිකල් පැදීම, ටෙනිස් ක්‍රීඩා කිරීම වැනි ඉතා සෞඛ්‍ය සම්පන්න විනෝදාංශවල නියැළීමත් ය.  
ඇගේ ජීවිත කාලය තුළ ක්ලෙමන්ට්ගේ සැමියා, දරුවන් පමණක් නොව මුණුපුරන් පවා මිය යාම නිසා අවසන් කාලයේ ඇය ගත කර ඇත්තේ හුදෙකලා ජීවිතයක් බව පෙනේ. 
 
කිත්සිරි මල්වත්ත

පුංචි තිරයේ බිහිවූ නවක නිළි පරපුර අතර කැපී පෙනෙන නිළියක ලෙස ඇය හැඳින්විය හැක. මේ දිනවල විකාශය වන ටෙලි නාට්‍ය තුනක එකිනෙකට වෙනස් චරිත තුනකින් අප හමුවට එන මේ රංගන ශිල්පිනිය මෙවර ඔබ වෙත කැඳවාගෙන එන්නට අප සිතුවේ ඇය බොහෝ අයගේ අවධානයට ලක්ව ඇති නිසාමය. ඇය තරින්දි ප්‍රනාන්දුය. තරින්දි පාඨක හිතවතුන් වෙනුවෙන් අප සමග කතාබහට එක්වූයේ මේ ආකාරයටය . 
 
මුලින්ම අපි තරින්දිගේ කලා දිවියේ තොරතුරු ටිකක් කතා කරමු 
 
මේ දවස්වල විකාශය වන “පැහැසරා” ටෙලි නාට්‍යයේ “ උපමාලි” , “ දංකුඩ බංඩා” ටෙලි නාට්‍යයේ “කලනි” සහ “නේත්‍රා” ටෙලි නාට්‍යයේ “සුභද්‍රා” කියන චරිත තුනට දායක වෙලා ඉන්නවා. ඒ චරිත තුනම එකිනෙකට වෙනස් චරිත තුනක්. උපමාලි කියන්නේ හරිම අහිංසක ගෑනු ළමයෙක්. 
කලනි කියන්නේ ගොඩක් දඟකාර ගුරුවරියක්. සුභද්‍රා වලව්වක මාන්නයෙන් පිරිච්ච් ගෑනු ළමයෙක්. 
 
වෙනත් නිර්මාණ සඳහා ආරාධනා ලැබෙන්නෙ නැද්ද .... ?
 
මගේ පළමු ටෙලි නාට්‍යය තමයි පැහැසරා. ඒ ටෙලි නාට්‍ය සමග ආරාධනා කීපයක්ම ලැබුණා. ඒත් විවිධ හේතු මත ඒවා ගිලිහිලා ගියා. දැනට රඟපාන්නේ මේ ටෙලි නාට්‍ය තුනේ විතරයි.
 
රංගනයට පිවිසෙන බොහෝ නළු නිළියෝ පුංචි සන්දියේ පටන්ම ඒ වෙනුවෙන් හීන මවපු අය.. ඔබත් කාලයක් පුරා නිළියක් වන්නට හීන මැවූ කෙනෙක්ද.... ? 
 
ඇත්තටම මමත් පුංචි කා‍ලේ ඉඳන් කලාවට ගොඩක් ලැදි කෙනෙක්.. නිළියක් වන්නට පුංචි ආශාවක් හිතේ තිබුණත් ගෙදරින් ඊට අනුබලයක් ලැබුණෙ නෑ.. ඒ හින්දම උසස් පෙළට වාණිජ විෂය ධාරාව තෝරාගත්තා.. ඉන් පසු පෞද්ගලික බැංකුවක රැකියාවකට ගියා.. වසර හතරක් පෞද්ගලික බැංකු දෙකක සේවය කරලා ඉන් ඉවත්වෙලා තමයි රඟපාන්න ආවේ ..
 
එතකොට නිළියක් වීම අහම්බෙන් සිදුවූ දෙයක්ද ?
 
එහෙම කිව්වත් වැරදි නෑ.. ඒක ටිකක් දිග කතාවක් 
 
කැමතිද ඒ කතාව ඔබේ රසික පිරිසට කියන්න .. ?
 
2016 අප්‍රේල් 29 වැනිදා මගේ අම්මා හදිසියේ මියගියා. අම්මා පිළිකාවකට බඳුන්වෙලා හිටියත් එය සුව වුණා.. ඒත් නොසිතූ විදියට හදිසි හෘදයාබාධයකින් අම්මා ජීවිතයෙන් සමුගත්තා.. අම්මාගේ අභාවය මට ලොකු කම්පනයක් ඇති කළ හින්දා මම මාස හයකට බැංකු සේවයෙන් ඉවත් වුණේ හිත හදාගන්න. පාසල් අවධියේ පටන් මම නර්තනයට දක්ෂයි. 
මානසික තත්ත්වය හැදෙන්නත් එක්ක මම ඔය කාලය තුළ ගයාන් ශ්‍රීමාල්ගේ නර්තන පන්තියට ගියා. එහිදී මට අහම්බෙන් චරිත් අබේසිංහ හමුවුණා. ඒ වෙද්දි ඒ අය “බරතලී කියලා චිත්‍රපටයකට සූදානම් වනවා. ඒකේ නැටුම් ගුරුවරියකගේ චරිතයකට නිළියක් සොයමින් ඉඳලා තියෙන්නේ. නර්තන පන්තියේදී මම නටන දිහා බලාගෙන ඉඳලා චරිත් මගෙන් ඇහුවා. රඟපාන්න කැමතිද කියලා.. මට කොහොමත් නිළියක  වීමේ ආශාව තිබුණා. ගෙදරිනුත් ඒ වෙද්දි විරෝධතාවයක් එල්ල වුණෙ නැහැ. “බරතලී” චිත්‍රපටය තුළින් තමයි රඟපෑමට එකතු වුණේ. ඉන්පසු දිගටම රඟපෑමට ආරාධනා එද්දි බැංකු රැකියාවෙන් සමුගත්තා..  
 
ඒත් රටම ඔබව හඳුනාගත්තේ “පැහැසරා” ටෙලි නාට්‍යයේ “උපමාලි” විදියට....
 
තවම “බරතලී” චිත්‍රපටය තිරගත වුණේ නෑ.. “පැහැසරා” තමයි මුලින්ම විකාශය වුණේ ..
 
තරින්දි දැන් පුංචි තිරයටම කොටුවෙලා නේද ....?
 
“කරපිංචා ඕනද..” වේදිකා නාට්‍යයටත් සම්බන්ධ වුණා.. එය තවම රට වටා වේදිකාගත වනවා.. ලොකුම ආශාව සිනමාව.. ඉදිරියටත් හොඳ සිනමා නිර්මාණයකට සම්බන්ධ වෙන්න ආශාවෙන් ඉන්නවා.. 
 
තරින්දිගේ  පුද්ගලික තොරතුරු ටිකක් දැනගන්නත් රසික පිරිස කැමති වේවි ..
 
මම ඉපදුනේ හැදුනේ වැඩුනේ මීගමුව කොච්චිකඩේ.. ඉගෙන ගත්තේ දංකොටුව බාලිකා මහ විදුහලෙන්..  අපේ පවු‍ලේ  අම්මයි තාත්තයි අක්කයි මමයි. අම්මා දැන් නැහැ.. අක්කා විවාහ වෙලා ඉන්නේ.
 
පුංචි තිරයේ ආදරවන්තිය සැබෑ ජීවිතයෙත් ආදරවන්තියක්ද.... ?
 
මම තවම පෙම්වතියක් ‍නෙවෙයි.. කවදාවත් ආදර සම්බන්ධයක් තිබිලත් නැහැ.. 
 
ආදර යෝජනා නම් එනව ඇති.
 
යෝජනා නම් එනවා.. ඒත් තවම සුදුසු කෙනෙක් තෝරාගත්තේ නැහැ..
 
මොන වගේ කෙනෙක්ද තෝරාගන්න හිතාගෙන ඉන්නේ  .. ?
 
එකම සුදුසුකම මාව තේරුම්ගත්තු කෙනෙක් වීම.. ගොඩක් අය නිළියන් ගැන වැරදි ප්‍රතිරූප මවාගෙන ඉන්නවා.. එහෙම කෙනෙක් නම් මට ගැළපෙන්නේ නෑ.. මම කලාවට ගොඩක් කැමති කෙනෙක් .. විවාහ වුණාට පස්සෙත් දිගටම කලාවේ රැඳෙන්න ඉඩ දෙන ඊට සහය දක්වන කෙනෙක් තමයි තෝරාගන්නේ.
 
ඡායාරූප මංජුල පෙරේරා
සටහන - ආරියවංශ කුලතිලක

'බුදු සසුනට පස්සා හරවන අලුත් අවුරුද්දේ හිස තෙල් ගෑම' යන මැයෙන් මාධ්‍යවේදී තිලක් සේනාසිංහ මහතා විසින් ලියා තිබූ ලිපිය මම මහත් උනන්දුවෙන් යුතුව කියවිමි. ඒ සඳහා යොදා තිබූ සිරස්තලයෙන්ම යමෙකුට හැඟීයා හැක්කේ එය අප රටේ ප්‍රමුඛතම සංස්කෘතික අංගයක් වන සිංහල අලුත් අවුරුද්දේ හිසතෙල් ගෑමේ චාරිත්‍රයත් බුදුදහමත් නිර්දය විවේචනයකට ලක්කොට ඇති බවය. එහෙත් එම ලිපියේ අඩංගු ප්‍රස්තුතය දෙස සමාජ විද්‍යාත්මකව බැලීමේ දී හැඟී යන්නේ තිලක් සේනාසිංහ වර්තමානයේ අප රටේ ප්‍රචලිත සිංහල බුද්ධාගම හෙවත් ජනප්‍රිය බුද්ධාගම කෙරෙහි  තැකීමකින් තොරව හෝ අනවබෝධයෙන් යුතුව එම කරුණු ගොනුකොට ඇති බවකි.

"ඔබේ ආගම කුමක්ද?" යනුවෙන් යමෙකු ඇසුවහොත් අප රටේ වැඩිම දෙනෙකු ඒ සඳහා දෙන පිළිතුර වනුයේ බුද්ධාගම යන්නය. එහෙත් බුද්ධාගම වේවා, වෙන කිනම් හෝ ආගමක් වේවා එය එම ශාස්තෘෘ දේශනාව සහ එම දේශනාවේ අඩංගු දාර්ශනික හරය සමඟ සෘජුව බද්ධවන්නේ නැත. එමෙන්ම ආගම යන්නට අතිශය පැහැදිළි නිවැරදි අර්ථකතනයක් දීමට ලොව මෙතෙක් කිසිවෙකුත් සමත්ව ද නැත. ඒ අනුව ආගමක් යන්න සරල ලෙස විස්තර කළ හැක්කේ කිසියම් ශාස්තෘෘ දේශනාවක් හෝ ආධ්‍යාත්මික සංකල්ප සමුදායක් එක්කොට එක් එක් ජනසමාජය විසින් තම තමන්ට රිසි ආකාරයට ගොඩනගා ගන්නා ලද සදාචාර, පූජා චාරිත්‍ර, ශාන්තිකර්ම ආදියෙන් සැකසුනු ඇදහිලි සම්ප්‍රදායක් බවය. එහිදී එම ඇදහිලි ඒ ඒ සමාජයන්හි ජන සංස්කෘතිය හා බද්ධවීමද වැලැක්විය නොහැක. එහෙත් එහිදී එම ජනසංස්කෘතියෙහි අඩංගු යම් යම්‍  අංග භාවිතයට ගැනීමේ දී ඒවාද එම ආගමික කොටස් වශයෙන් හැඳින්වීමද ඉතා සුලබ තත්ත්වයකි.

"එවර හිසතෙල් ගෑමේ රාජ්‍ය උත්සවය පවත්වන ලද්දේ ඓතිහාසික මාලිගාවිල බුද්ධ ප‍්‍රතිමාව අබියසදී ය. එය ඉදිරියේ එම චාරිත‍්‍රය ඉටු කෙරුණ ද හින්දු ජ්‍යොතිෂ නියමයට අනුව එවර හිසතෙල් ගෑම මෙවර මෙන් උතුර බලා සිදුකළ යුතුව තිබූ බැවින් ඊට සහභාගී වූ රාජ රාජ මහාමාත්‍යයන් බුද්ධ ප‍්‍රතිමාවට ‘පස්ස හරවා‘ එම හින්දු චාරිත‍්‍රය අනුගමනය කළහ. එම සිංහල අලූත් අවුරුදු මදයෙන් මත්වී සිටි අපගේ සිංහල බෞද්ධ ජනගහනයෙන් කිසිවකුත් සිංහල බෞද්ධයන් තම අලූත් අවුරුද්ද මුල්කොට සිය ශාස්තෲන් වහන්සේට කළ නිගරුව පිළිබඳව වදනක්වත් කතා නොකළහ."  යනුවෙන් තිලක් සේනාසිංහ විසින් සකස් කළ ලිපියෙහි ඇතුලත්ය.

මෙහිදී ඔහු ප්‍රකාශ කරනුයේ මීට කලකට පෙර මාලිගාවිල බුද්ධ ප්‍රතිමාව ඉදිරියේ පැවැති හිස තෙල් ගෑමේ රාජ්‍ය උත්සවයක දී එය බුද්ධ ප්‍රතිමාවට පිටුපා හෙවත් පස්ස හරවා සිදු කළ බවය. ඒ අනුව එය බෞද්ධ සංස්කෘතියට පිටුපෑමකැයි ඔහු කියයි. එහෙත් එහි ඇත්තම කතාව අනෙකකි. එවන් රාජ්‍ය උත්සවයක දී රාජ රාජ මහාමාත්‍යාදීන් එලෙස බුද්ධ ප්‍රතිමාවකට පස්ස හැරවීමෙන් සංස්කෘතික විපරීතයක් සිදුකරන ලද්දේ නම් එය මුල්කොට මහත් ජන කැලඹීමක් සිදුවිය යුතුය. එහෙත් ඒ සම්බන්ධයෙන් කිසිවෙකුත් කිසිදු හාවක්හූවක් නොමැතිව සිටියේ බුදුපිළිමයට වන්දනා කිරීම සේම හිසතෙල් ගෑම වැනි සුවිශේෂ අවස්ථාවක දී බුදුපිළිමයට 'පස්ස හැරවීමත්' අපගේ සංස්කෘතික උරුමයක් නිසා නොවේද?

ඒ අනුව සිංහල බුද්ධාගම ගොඩනැගී ඇත්තේ හුදෙක් බුද්ධ දේශනාව පදනම් කරගත් පිරිසිදු බෞද්ධ දර්ශනය පදනම් කොට නොවන බවත් ඒ සඳහා හින්දු, ජෛන, මහායාන සහ බටහිර ආගමික දර්ශනයන්ද යම් යම් ප්‍රමාන වලින් සුසංයෝග වී ඇති අතර ඒ සඳහා ආදිතමයේ සිට අපට උරුම වූ 'ජනාගමික (Folk religion)' ලක්ෂණ සහ අධි විශ්වාස (Superstiction) ද කා වැදී ඇත.  අද වන විට ව්‍යවහාරයේ පැවැත්වෙන බෞද්ධ සංස්කෘතිය, සිංහල බුද්ධාගම නැතහොත් ජනප්‍රිය බුද්ධාගම තුළ ඇත්තේ පිරිසිදු බෞද්ධ දර්ශනයෙන් 'ඇබින්දක්' පමණක් බව සේනාසිංහ ඒකාන්ත වශයෙන්ම  පිළිගත යුතුය. 

කිසිදු ජාතියකට, ආගමකට සීමා වූ දහමක් බුදුරජාණන් වහන්සේ දෙසා නොමැති අතර සිංහල බුද්ධාගම යන්නද 'සබ්බේ සත්තා; සබ්බේ පානා; සබ්බේ භූතා; හිතානුකම්පාය. ‍සියළු සතුන්; සියළු ප්‍රානීන්;(ගස්වැල් ආදී ජීවීන් කොටස්) සියළු සංයුතීන්ගේ යහපත පිණිස කටයුතු කළ මැනව' යන මූලික බෞද්ධ දර්ශනයෙන් පරිබාහිරව පොහොරින් පෝෂණය වන වෘක්ෂයක් බව පෙනේ.  එමෙන්ම එසේ ගොඩනැගෙන සිංහල බුද්ධාගම මඟින් අන්කිසිදු ජාතියක්, ආගමක් හෝ ජනකොටසක් හෙලාදැකීම බුදුදහමට ඉඳුරාම වෙනස්ය. නමුත් නූතනයේ වෙසෙන බොහෝ තෙරවරුන් ඊට ඉඳුරාම වෙනත් බණක් දෙසීම අතිශයින් බරපතල තත්ත්වයකි.

යම් හෙයකින් බුදුරජාණන් වහන්සේ ජීවමානවම අප රටට වැඩම කළ හොත් 'ස්වාමීනි සිංහල බුද්ධාගම යනු කුමුක් දැයි' උන්වහන්සේ වෙතින් නැගෙන පැනයකට උන්වහන්සේ විසින් දෙනු ලබන නියත පිළිතුරක් තිබේ. එනම්  'එවැන්නක් පිළිබඳව මම නොදනිමි' යන්නය. ඒ අනුව සිංහල බෞද්ධ සංස්කෘතිය විසින් තම හිතුමනාපයට ඇතිකොට ගත් සිංහල අලුත් අවුරුද්ද නමැති කිරි එළදෙන අධිපරිභෝජනවාදී කෙවිටෙන් පහරකනු ලදුව අප ඇන මරාදැමීමට දරන ආයාසය ශීඝ්‍රයෙන් ඉහළ නැංවෙන අතර සිංහල බුද්ධාගම නමැති අප විසින් තනාගත් බෞද්ධ දර්ශනයෙන් බැහැර වූ අපේම ආගමකින්, සංස්කෘතියකින් එම ඛෙදවාචකයට කිසිදු විසදුමක් ලද නොහැකි බවද අවසන් වශයෙන් අධාරණය කරමි.

මහාචාර්ය දයා අමරසේකර,

සමාජවිද්‍යා අධ්‍යයනාංශය,

පේරාදෙණිය විශ්ව විද්‍යාලය  

Page 1 of 84

IMAGE

සියළු වත්කම් සසුනට පුදා මුළු පවුලම පැවිදි බිමට

IMAGE 2018 Apr 20 11:18
දරුවන් සිව්දෙනාත්, බිරිඳත් සසුන්ගත කර තමන්ද පැවිදිව ගිහිකල තමන් සතුව තිබූ ස්ථිර නිවස හා ගොඩ...
Views - 2216

අලුත් අවුරුද්දේ ගායකයෙකු 'නැහැවූ' රූපලාවන්‍යවේදිනිය

IMAGE 2018 Apr 19 15:05
ඔහු මෑතක දී ජනප්‍රියත්වයට පත් තරුණ ගායකයෙකි. සංගීත සන්දර්ශනාදියේද ඔහුට සැලකිය යුතු තැනක්...
Views - 3210

දමයන්ති ජයසූරිය සංගීත දිවියට සමුදී සිත නිවන මඟකට?

IMAGE 2018 Apr 19 10:26
ඔබ මැදි වයස් පසුකරමින් සිටින කෙනෙකු නම් ගුවන්විදුලිය ඔස්සේ කුඩා කල ඔබේ සිඟිති දෙසවන් පිනවූ...
Views - 3483

ලොව වයස්ගතම සියා ජපානයෙන්

IMAGE 2018 Apr 18 20:06
ලොව මේ වනවිට ජීවත්ව සිටින වයස්ගතම පිරිමි පුද්ගලයා වෙත ගිනස් සහතිකය පිරිනැමීම පසුගිය දා සිදු...
Views - 1412

පුංචි තිරයේ පෙම්වතියක් වුණත් මං කවදාවත් පෙම් කරලා නෑ

IMAGE 2018 Apr 18 13:24
පුංචි තිරයේ බිහිවූ නවක නිළි පරපුර අතර කැපී පෙනෙන නිළියක ලෙස ඇය හැඳින්විය හැක. මේ දිනවල විකාශය...
Views - 3361

සිංහල බුද්ධාගමක් ගැන බුදුන්වත් දන්නේ නැහැ

IMAGE 2018 Apr 18 09:27
'බුදු සසුනට පස්සා හරවන අලුත් අවුරුද්දේ හිස තෙල් ගෑම' යන මැයෙන් මාධ්‍යවේදී තිලක් සේනාසිංහ...
Views - 2470

Please publish modules in offcanvas position.