Coss Ear2
lakbima.lk
COSS Ear 1

දෙවෙනි එලිසබෙත් රැජින කොච්චර වාසනාවන්තද කියනවා නම් ඇයට පුළුවන් වෙලා තියෙනවා මුනුපුරන්ගේ දරුවන් පවා ඉස්කෝ‍ලේ යන හැටි දකින්න. එහෙම කියන්නේ ගිය සතියේ විලියම් සහ කේට්ගේ පුංචි දියණිය චාලට් කුමරිය එලිසබෙත් ආච්චි අම්මටයි පිලිප් සීයාටයි බායි කියලා පළවෙනි වතාවට නර්සරි යන්න පිටත් වුණු නිසා. ඇය ගියේ විල්කොක්ස් නර්සරි පාසලට. මේ විදියට නර්සරි ගිය චාලට් පළවෙනි දවසෙම යාළුවෝ හත් අට දෙනෙක්ම ඇති කරගෙන. ඇය හරි හරියට යාළුවෝ එක්ක කතා කරමින් විහිළු තහළු කරමින් හිටියලු. චාලට්ගේ පන්ති භාර ගුරුතුමිය නම් කියන්නේ ඇය බොහොම කටකාර හැඩකාර පුංචි කෙල්ලෙක් කියලයි.

ඇමෙරිකාවේ ධවල මන්දිරය මේ දිනවල උණුසුම් වී ඇත්තේය. ධවල මන්දිර මාධ්‍ය ‍ලේකම්වරිය වන සාරා හතබි කියන හැටියට ජනාධිපති ඩොනල්ඩ් ට්‍රම්ප් සිටින්නේ කෝපයෙන් දැවෙමිනි. අපේ භාෂාවෙන් කීවොත් ඌරු ජුවල් පිටය.
ට්‍රම්ප්ගේ මෙම කෝපයට හේතුව අයි.එස්.අයි.එස් ගරිල්ලන්ගේ ක්‍රියාකාරකම් හෝ උතුරු කොරියාවේ තර්ජන නොවේ. බටහිර ලෝකයෙන් හෝ රට ඇතු‍ලේම ඩිමොක්‍රටිස් ප්‍රතිවාදීන්ගේ විවේචනද නොවේ. මයිකල් වුල්ෆ් නම් මාධ්‍යවේදියෙකු විසින් ලියන ලද Tire and Tury - Inside the Trump white house  (ධවල මන්දිරයේ ට්‍රම්ප් වියරුව) නැමැති ‍පොත නිසාය.
මයිකල් වුල්ෆ් සම්මානනීය තීරු ලිපි රචකයෙකි. රූපවාහිනී නිවේදකයෙකි. මාධ්‍යවේදියෙකි. ඔහු විසින් ඉහත කෘතිය රචනා කර ඇත්තේ පුද්ගලයෝ දෙසිය දෙනෙකු සමග ට්‍රම්ප් කළ සාකච්ඡාවලින් සොයාගත් තොරතුරුවලින් සහ ට්‍රම්ප් ජනාධිපති ධුරයට පත්වූ පසු අවුරුද්දකට ආසන්න කාලයක් ඔහුගේ උපාය මාර්ගික ප්‍රධානියා (Former Chief Strategist) වශයෙන් ධවල මන්දිරයේ ට්‍රම්ප් සමගම එකට සිටි ස්ටීව් බැනන් විසින් හෙළි කළ තොරතුරු මත බවද කියැවේ.
‍පොත නිල වශයෙන් නිකුත් වීමට තිබුණේ පසුගිය 09 වැනිදාය. ඒත් හදිසියේම එම තීරණය වෙනස් කළ ප්‍රකාශකයෝ පසුගිය 03 වැනිදා එනම් සැලසුම්කර තිබූ දිනට වඩා සතියකට කලින් ‍පොත වෙළෙඳ ‍පොළට නිකුත් කළෝය. ‍පොත නිකුත් කළ වහාම උණු කැවුම් මෙන් ‍පොත විකිනෙන්නට විය. එහි අලෙවි වාර්තා කොයිතරම් දැයි කිවහොත් අන්තර්ජාලය හරහා ‍පොත් මිලදී ගත හැකි 'ඇමර්සන්' වබේ අඩවිය කියන්නේ මෑත ඉතිහාසයේදී එක දිනක් තුළ වැඩියෙන්ම අලෙවි වූ ‍පොත. මෙකී Tire and Tury කෘතිය බවයි.
Tire and Tury  කෘතිය රචනා කිරීම සඳහා මාධ්‍යවේදී මයිකල් වුල්ෆ්ට වැඩි වශයෙන්ම තොරතුරු සම්පාදනය කරමින් උදව් උපකාර කර ඇති ස්ටීව් බැනන් ජනාධිපති ඩොනල්ඩ් ට්‍රම්ප්ගේ සමීපතමයකුව සිටි බව කියැවේ. ට්‍රම්ප් ජනපතිවරණය ජයගත් සැනින් බැනන්ව ධවල මන්දිර උපාය මාර්ගික ප්‍රධානියා හැටියට පත් කරගත්තේද මෙකී සමීපකම නිසාම බවද කියැවේ.
මේ හිතමිත්‍රකම සමීපකම කොතෙක්ද යත් මීට මාස පහ හයකට ප්‍රථම ජනාධිපති ඩොනල්ඩ් ට්‍රම්ප් ස්ටීව් බැනන් ගැන කතා කළේ හිලරි ක්ලින්ටන් නමැති කපටි ගැහැනිය සමග මම කළ ජනාධිපතිවරණ සටනේදී මා වෙනුවෙන් කළ කැපකිරීම් සහ උපකාරවලට මම ඔබට අතිශයින් ස්තුතිවන්ත වෙමි. වැනි වර්ණනාත්මක වදනිනි. ඒත් මයිකල් වුල්ෆ්ගේ Tire and Tury ත නිකුත්වීමෙන් සහ එය කියැවීමෙන් පසුව ට්‍රම්ප් කතා කරන්නේ ධවල මන්දිර රැකියාවෙන් දොට්ට දැමූ පසු සිහිය විකල් වූ පල් මෝඩයෙකු වැනි අපහාසාත්මක මුඛයෙනි. 
ස්ටීව් බැනන් සමග මගේ කිසිදු පුද්ගලික සම්බන්ධයක් නැත. රිපබ්ලිකන් අපේක්ෂකයන් දාහත් දෙනෙකු අභිභවා ජනාධිපතිවරණ අපේක්ෂකයා හැටියට නාම යෝජනා දිනා ගැනීමට හැකි වීමෙන් පසුව ධවල මන්දිරයේ සේවයට ආ මේ ගුණමකු මිනිසා අසත්‍යය වපුරමින් සිටී යැයි ට්‍රම්ප් මාධ්‍ය හමුවේ කියා තිබුණි. ඒත් ඩොනල්ඩ් ට්‍රම්ප්ගේ ජනාධිපතිවරණ සටනේ අවසන් කාලයේ ඔහුගේ ප්‍රචාරක ව්‍යාපාරයේ ප්‍රධානියා හැටියට කටයුතු කළේ දැන් ට්‍රම්ප් 'සිහිය විකල් වූ පල් මෝඩයෙකු' යැයි කියන මේ ස්ටීව් බැනන්ම බව ඇමෙරිකානුවන් මතු නොව ට්‍රම්ප්ගේ ජනාධිපති සටන ගැන අවදියෙන් සිටී. ලොව ඕනෑම කෙනෙක් දන්නා ප්‍රකට කාරණාවකි. 
ජනාධිපතිවරණ මෙහෙයුම පැවති කාලයේ සහ ඉන් පසුව ධවල මන්දිරයේ ගෙවුන කාලය පිළිබඳව ලියැවී ඇති Tire and Tury  පොත කියැවීමත් සමගම ට්‍රම්ප්ගේ හිස මුදුනට යක්ෂයා ආරූඪ වීමට තරම් වූ ආන්දෝලනාත්මක කරුණු ගණනාවක්ම ‍පොතේ අන්තර්ගතව ඇත්තේය.
ජනාධිපති ඩොනල්ඩ් ට්‍රම්ප් ධවල මන්දිරයේ වාසය ප්‍රිය නොකරන අතර ජනාධිපතිවරයා සහ ආර්යාව වන මෙලනියා එකම කාමරයක නිදාගන්නේ ද නැත. ඒ අනුව කෙනඩි, ජැකොලයින් දෙදෙනාගෙන් පසුව ධවල මන්දිරයේ වෙන වෙනම කාමර දෙකක නිදාගත් එකම ජනාධිපති යුවළ ට්‍රම්ප් යුවළයි යනුවෙන්ද මෙම ‍පොතේ සඳහන්ව තිබේ. එසේම ඩොනල්ඩ් ට්‍රම්ප් නිතර කේන්තියෙන් පසුවන කේන්ති ගියවිට ධවල මන්දිරයේ බඩුමුට්ටු ‍පොළොවේ ගසන ඒ මේ අත විසි කරන අයෙකු බවද එසේම ට්‍රම්ප් විසි කළ බඩුමුට්ටු නැවත තිබූ තැන්වලින් තබන සේවකයන්ට ට්‍රම්ප් බැනවදින බවද තව තැනක සඳහන් බවද කියැවේ. 
මීට අමතරව ට්‍රම්ප් නිතරම සැකයෙන් ජීවත්වන අයෙකු බවත් කවුරුන් හෝ කොයි මෙහොතේ හෝ තමන්ට වස දෙනු ඇතැයි බියෙන් පසුවන ඔහු මැක්ඩොනල්ඩ්ස් ආහාරවලට පමණක්ම ඇබ්බැහි වී තිබේ. එසේම ට්‍රම්ප් ධවල මන්දිර සේවකයන්ට මතෛක් කිසිදු ජනාධිපතිවරයකු පනවා නොතිබුණු අලුත් නීති රීති මාලාවක් පනවා තිබේ. ඒ සිය පෞද්ගලික බඩු භාණ්ඩ සම්බන්ධයෙනි. මේ නීතියට අනුව කිසිවෙකුටත් ඔහුගේ පෞද්ගලික භාණ්ඩවලට අත තැබිම සපුරා තහනම්ය. මේ අතරින්ද දත් බුරුසුව සම්බන්ධ තහනම ඉතා දැඩිය.
තම නිදන කාමරයට කිසිවෙකු හෝ පිවිසීම ට්‍රම්ප් නොරුස්නා දෙයකි. ඒ ඔහු නිරුවතින් ඇදේ වැතිර සිටීමට ඇති කැමැත්තට බාධා වනු ඇතැයි බියෙනි. එසේම පෞද්ගලික ජීවිතයේදී ඉතාමත් දරුණු ලෙස තනිවූ මිනිසෙකු සිය විවාහ තුනෙන්ම ලද දරුවන්ගෙන් දැන් යම් තරමකට හෝ ඔහු සමීපයේ සිටින්නේ ඉවන්කා පමණි. ඇයද ඔහු සමග වැඩිපුර කතා බහ කරන්නේ ව්‍යාපාර කටයුතු පිළිබඳව වන අතර ඉවන්කාද ඇමරිකාවේ පළමු ජනාධිපතිවරිය වීමට සිහින දකිමින් සිටින්නීය.
මෙකී නිදන කාමර කතාවලට අමතරව ආන්දෝලනාත්මක දේශපාලන කාරණා ගණනාවක්ද ‍පොතට ඇතුලත් බව කියැවේ. ඒ අතරින් ප්‍රමුඛ වන්නේ ජනාධිපතිවරණ සමයේදී ට්‍රම්ප් හා රුසියාව අතර වූ සම්බන්ධතාවයි. මෙහිදී ට්‍රම්ප් පුත්‍රයා වන බැරන්ට් ට්‍රම්ප් 2016 වසරේ ඇමෙරිකානු මැතිවරණ පැවති සමයේදී රුසියානු නියෝජිතයන් කණ්ඩායමක් සමග පැවැත්වූ සාකච්ඡා සම්බන්ධයෙන්ද සඳහන් වේ.
මීට අමතරව ජනාධිපතිවරණයේදී තමා ජයග්‍රහණය කරනු ඇතැයි ට්‍රම්ප් පවා බලා‍පොරොත්තු නොවූ අතර ජනාධිපතිවරණ දින රාත්‍රියේදී ට්‍රම්ප්ගේ බිරිඳ මෙලනියා හඬමින් කඳුළු සලමින් සිටි බවද ඒවා සතුටු කඳුළු නොවන බවද මෙම ‍පොතේ සඳහන්ව තිබේ. තමා පරාජය වනු ඇතැයි සිතූ ට්‍රම්ප් ජනාධිපති තරගයෙන් පරාජය වූ පසුව නැවත සිය ව්‍යාපාර කටයුතු කරගෙන යන ආකාරය ගැන මැතිවරණ සමයේ අවසන් කාලයේදී කල්පනා කළ බවද මෙහි කියැවේ. 
ට්‍රම්ප් ඇමෙරිකානු ජනාධිපති පුටුවට කොයි තරම් නුසුදුස්සෙකුද යන්න පෙන්වා දෙන්නට බැනන් මෙම ‍පොතට තවත් අපූරු කරුණක් කියා තිබේ. ට්‍රම්ප්ගේ මැතිවරණ ප්‍රචාරණ ව්‍යාපාරයේ කළමනාකරු වූ සෑම් නැන්බර්ග් ට්‍රම්ප්ට ඇමෙරිකානු ආණ්ඩුක්‍රම ව්‍යවස්ථාව කියවා පැහැදිලි කර දීමට උත්සාහ කළත් ට්‍රම්ප්ට එය ගෝචර වී නැත්තේය. හතර වැනි සංශෝධනය කියවා දෙන විටම ඔහු නැගිට ගියා යැයි බැනන් කියයි.
කෙසේ වෙතත් මෙම ‍පොත පාඨකයන් හමුවට ඒමට ප්‍රථම එය වළක්වා ගැනීමට ට්‍රම්ප් උත්සාහ කළත් එයද සාර්ථක නොවූයේය. ට්‍රම්ප් දැන් කියන්නේ ‍පොතේ ඇති සියලුම දේ අමුම අමු බොරු බැවින් ඉදිරියේදී ඊට විරුද්ධව නීතිමය ක්‍රියාමාර්ග ගන්නා බවයි. ඒත් ‍පොතේ කර්තෘ මයිකල් වුල්ෆ් කියන්නේ ‍පොතේ අන්තර්ගත කරුණු සියල්ල සත්‍ය බැවින් තමා කිසි දෙයකට බිය නැති බවය. එසේම ‍පොත එළියට ආ සැනින් ට්‍රම්ප් ඇතුළු හිතමිතුරු පාර්ශ්වයේ ප්‍රතිචාර හේතුවෙන් ‍පොතට ඇත්තේ අධික ඉල්ලුමකි. මේ ඉල්ලුම නිසාම ‍පොතේ ප්‍රකාශකයින් වන හෙන්රි හෝල්ට් ඇන්ඩ් කම්පැණි ආයතනය පළමු මුද්‍රණයෙන් දින කීපයකට ඇවෑමෙන් දෙවැනි මුද්‍රණයටද සැරසෙමින් සිටින්නේය.
 
උපාලි තිලකරත්න

මීට සති කීපයකට පෙර බි‍්‍රතාන්‍ය කිරුළට හිමිකම් කියන එක් පුද්ගලයෙකු වූ හැරී කුමරු සිය විවාහ ගිවිස ගැනීමට සූදානම් බව නිල වශයෙන් ප‍්‍රකාශයට පත් කළ බව මේ වනවිට රහසක් නොවේ. මෙම විවාහ ගිවිස ගැනීම නිල වශයෙන් ප‍්‍රකාශ කිරීමත් සමග ඔහුගේ පෙම්වතිය වූ මේගන් මාකල් යනු කවුද යන්න පිළිබඳව සෙවීම සඳහා ගූගල් සෙවුම් යන්ත‍්‍රය භාවිත කළ පිරිස සීග‍්‍ර වශයෙන් ඉහළ ගොස් තිබූ බව ද වාර්තා වී තිබිණි. කෙසේ වුවද මේගන් මාකල් පිළිබඳව රජ පවුලට ළැදි බි‍්‍රතාන්‍ය වැසියන් තුළ තිබෙන්නේ පහන් හැගීමක් නොවන බව කිව යුතුය. 
ඔවුන් මේගන් මාකල් නම් වූ චරිතයට අපහාස කරන්නට පවා පටන් ගෙන ඇති බවක් දක්නට තිබේ. එපමණක් ද නොව මාකල් පවුලේ සමහර පුද්ගලයන් පවා මේගන් කෙරෙහි අප‍්‍රසාදය පළ කර ඇති බව විවිධ වෙබ් අඩෙවි ඔස්සේ වාර්තා වී තිබිණි.
මේගන් මාකල් යනු 36 හැවිරිදි ඇමෙරිකානු ජාතික කාන්තාවකි. ඇය හැරීට වඩා අවුරුදු තුනකින් වැඩිමහළු වන අතර විලියම් සහ කේට් දෙදෙනාට වඩා ද අවුරුද්දකින් වැඩිමහළු ය. ඇය සිය වෘත්තිය ලෙස තෝරාගෙන තිබුණේ රංගනයයි. මේගන් හොලිවුඩයේ තරුණ නිළියන් අතර නැගී එන නිළියක ලෙස හැඳින්විය හැකිය. 2011 වසරේ දී ඇමෙරිකානු ජාතික චිත‍්‍රපට නිෂ්පාදකයෙකු වන ටෙ‍්‍රවෝ එංගල්සන් සමග විවාහ වූ ඇය 2013 වසරේ දී ඔහුගෙන් දික්කසාද වී තිබේ. මේ වනවිට ඇය ජීවත් වන්නේ සමාජ සේවිකාවක සහ යෝග උපදේශකවරියක වන අප‍්‍රිකානු ඇමෙරිකානු සම්භවයක් සහිත ඇගේ මව ඩෝරියා ලොයිස් සහ චිත‍්‍රපට ආලෝකකරණ ශිල්පියෙකු වන කොකේසියානු ජාතික ඇගේ පියා තෝමස් මාකල් සමග ය. ඇයට සිය පියාගේ පෙර විවාහයෙන් තෝමස් මාකල් ජූනියර් නමින් සහෝදරයෙකු සහ සමන්තා ග‍්‍රාන්ට් නමින් සහෝදරියක ද සිටී. පියාගේ උදව් ඇතිව චිත‍්‍රපට ක්ෂේත‍්‍රයට පිවිසෙන විට මේගන්ගේ වයස අවුරුදු 11 කි. ඒ වෙළඳ දැන්වීමකට පෙනී සිටිමිනි. පසු කාලයේ ඇය හොලිවුඞ් සිනමාවට පිවිස ඇති අතර ඒ වනවිට ඇගේ වයස අවුරුදු 20 ඉක්මවා තිබිණි. ඒ දක්වා ඇය කටයුතු කර තිබුණේ නිරූපිකාවක ලෙස ය.
මේගන් මාකල් පිළිබඳව බි‍්‍රතාන්‍ය වැසියන් මෙතරම් අප‍්‍රසාදයක් පළ කරන්නට හේතු වී තිබෙන්නේ ද ඉහත කී සමහර කාරණාය. එනම් ඇය විදේශිකයෙකු වීමත් හොලිවුඞ් නිළියක වීමත් දික්කසාද වූ කාන්තාවක වීමත් ප‍්‍රධාන කරුණු ලෙස දක්වා තිබේ. ඇය වැන්නියක සම්බන්ධ කර ගැනීමෙන් බි‍්‍රතාන්‍ය රජ පවුලේ ගෞරවය තව දුරටත් නොනැසී පවත්වා ගත නොහැකි බව ඔවුන්ගේ අදහස වී ඇත. කෙසේ වුව ද පසුගිය කාලයේ රජ පවුලේ කිට්ටු ඥාතීන් ඇය කෙරෙහි විවිධ ක‍්‍රම මගින් අප‍්‍රසාදය පළ කළ අවස්ථා ද වාර්තා වී තිබිණි. ඉන් පළමුවැන්න වාර්තා වන්නේ හැරී සහ මේගන්ගේ විවාහ ගිවිස ගැනීම සිදු කරන බව නිල වශයෙන් ප‍්‍රකාශයට පත් කළ අවස්ථාවේ දී ය. රජ පවුලට ළගම නෑකම් කියනු ලැබූ පුද්ගලයෙකු මාධ්‍යයට පවසා තිබුණේ ‘වියපත් බව නිසාම මේ වනවිට එලිසබෙත් රැජිනගේ සිහි කල්පනාව මඳ වෙමින් පවතින’ බවකි. නොඑසේ නම් ඇය මෙවැනි විවාහයකට කිසිසේත්ම එකග නොවන බව එම පුද්ගලයා තරයේ ම ප‍්‍රකාශ කර තිබිණි.
මේගන් මාකල් කෙරෙහි රජ පවුලේ ඥාතීන් අතරින් නැගුණු දෙවැනි ප‍්‍රසිද්ධ අප‍්‍රසාදය වාර්තා වන්නේ බකිංහැම් මාලිගයේ පැවති නත්තල් දිවා භෝජන සංග‍්‍රහයේ දී ය. මෙම භෝජන සංග‍්‍රහයට මේගන් මාකල්ට ද රැජින විසින් ආරාධනා කර තිබූ අතර ඇයට සිය අප‍්‍රසාදය පළ කර තිබුණේ මයිකල් කුමරුගේ බිරිඳ විසිනි. ඒ ඇය සිය කෝට් ඇඳුමේ පැළඳ සිටි සාරි කටුවක් මගිනි. ඇය පැළඳ සිටි සාරි කටුවෙන් නිරුපණය වී තිබුණේ රත‍්‍රන් පැළඳි අප‍්‍රිකානු තරුණියකගේ උඩුකය දැක්වෙන්නකි. රජ පවුලට සම්බන්ධ වීමෙන් රත‍්‍රන් පැළඳ ගත්තාක් වැනි හැගීමක් ඇති කරවන, මව් පාර්ශ්වයෙන් අප‍්‍රිකානු සම්භවයක් සහිත මේගන් මාකල්ට එය අපහාසයක් බව මාධ්‍ය පවා වාර්තා කර තිබිණි.
රජ පවුලට හිතැතියන් පමණක් නොව මාකල් පවුලේ සමීපතමයන් පවා මේගන් බි‍්‍රතාන්‍ය රජ පවුලට සම්බන්ධ වීම පිළිබඳව දක්වන්නේ එවැනි අදහසකි. එනම් ‘කටුස්සාගේ කරේ රත්තරන් බැන්දා’ වැනි හැගීමක් මේ වනවිට මේගන්ට ඇති වී තිබෙන බවකි. එසේ පවසා තිබුණේ මේගන්ගේ පියාගේ පළමු විවාහයේ දියණිය වූ සමන්තා ග‍්‍රාන්ට් විසිනි. ‘ඉස්සර මේගන් මට නිතරම කෝල් කරනවා. හැරී එක්ක සම්බන්ධ වුණාට පස්සෙ එයා හිතාගෙන ඉන්නෙ එයා බි‍්‍රතාන්‍යයේ රැජින වුණා කියලා වෙන්නැති. දැන් එයා අපේ පවුලේ කා එක්කවත් කතාවක් හෝ ආශ‍්‍රයක් නැහැ. අඩුම තරමෙ උපන්දින සුභ පැතුම්, නත්තල් සුභ පැතුම් පවා නැහැ. මේවා රජ පවුලේ අය දැන ගන්න  ඕනෙ’ යනුවෙනි. 
කෙසේ වුව ද මෙවැනි කතා නිසා මේගන් මාකල් පිළිබඳ හැරී කුමරුට ඇති ඇල්ම නිමක් නොවන බව කිව යුතුව ඇත්තේ මේ වනවිට තරුණියන් දස දෙනෙකුට වඩා ඇසුරු කර ඇති ඔහු විවාහය සඳහා දික්කසාද ඇමෙරිකානු නිළියකම තෝරා ගෙන ඇති බැවිනි.
 
දුලංජලී මුතුවාඩිගේ

මියන්මාරයේ නායිකාව ලෙස පිළිගැනෙන අවුන් සාන් සුකීට ඉදිරියේදී ජන සංහාර (genocide) චෝදනාවලට මුහුණ දීමට සිදුවනු ඇත්ද යන්න මේ වනවිට ජාත්‍යන්තර වශයෙන් කතාබහට ලක්වන කාරණාවක් බවට පත්ව තිබේ.  ඇයට එරෙහිව මෙවැනි තත්ත්වයක් මතුව තිබෙන්නේ මේ වනවිට මහත් ආන්දෝලනයක් ඇති කර තිබෙන එරට රොහිංග්යා ජනතාව පිළිබඳ ගැටලුව පසුබිම් කරගෙනය. රොහිංග්යාවරුන් එරටින් තුරන් කර දැමීම සඳහා කෲර ජන සංහාරයක් සිදුවෙමින් ඇති බවට මේ වනවිට විවිධ පාර්ශ්ව වෙතින් චෝදනා එල්ල වෙමින් ඇති අතර එහි  සිදුවෙමින් ඇතැයි පැවැසෙන අමානුෂික සිදුවීම් සම්බන්ධයෙන්ද, ඊට වගකිව යුත්තන් සම්බන්ධයෙන්ද ජාත්‍යන්තර පරීක්ෂණයක් පැවැත්විය යුතු බව එක්සත් ජාතීන්ගේ මානව හිමිකම් පිළිබඳ මහ කොමසාරිස් සෙයිඩ් රාද් අල් හුසේන් පවසා ඇති බවද පසුගියදා වාර්තා විය. කලකට ඉහත ප්‍රජාතන්ත්‍රවාදය සහ මානව හිමිකම් පිළිබඳ මහත් පරමාදර්ශයක් ලෙස බටහිර බලවේග විසින්ම හඳුන්වනු ලැබූ සුකී සම්බන්ධයෙන් දැන් මෙවැනි තත්ත්වයක් මතුව තිබිම විශේෂත්වයකි.

මියන්මාරයේ රැකයින් නම් ප්‍රාන්තයේ වෙසෙන සුළුතර ජන පිරිසක් වන රොහිංග්යාවරුන් දැන් කලෙක සිටම දැඩි අසාධාරණයන්ට මුහුණ දෙමින් සිටින ජනතාවක් ලෙස සැලකේ. එයට ප්‍රධාන හේතුවක් වන්නේ ඔවුන් මියන්මාරයට අයත් ජන පිරිසක් ලෙස නොසැලකීමයි. මියන්මාරයේ බහුතරය සලකන්නේ රොහිංග්යාවරුන් යනු යාබද බංග්ලාදේශයේ සිට පැමිණ රැකයින් ප්‍රාන්තයේ පදිංචි වූ ''අනවසර පදිංචිකරුවන්'' පිරිසක් ලෙසිනි. ඔවුහු මුස්ලිම් ජාතිකයෝ වෙති. කලෙක සිටම ඔවුන්ට එරෙහිව එල්ල වන විවිධ පීඩාවන් නිසා මෙම රොහිංග්යාවරුන් අතරින්ද සටන්කාමී සංවිධාන බිහි වී ඇති අතර ඔවුන් සහ මියන්මාර ආරක්ෂක අංශ අතර වරින් වර ගැටුම් ඇති වෙමින් තිබිණි. මෙවර ඇති වී තිබෙන උණුසුම්, අර්බුදකාරී තත්ත්වය ආරම්භ වූයේ පසුගිය අගෝස්තු මාසයේ එරට ආරක්ෂක  මුර‍පොළ කිහිපයක් වෙත මෙම සටන්කාමීන් ප්‍රහාර එල්ල කිරීමත් සමගය. නමුත් මෙහිදී ආරක්ෂක අංශවල ඉලක්ක බවට පත්වූයේ ඉහත කී සටන්කාමීන් පමණක් නොව, අහිංසක සිවිල් වැසියන්ද මහා පරිමාණයෙන් බිහිසුණු ප්‍රහාරයන්ට ලක් වූ බවට තොරතුරු පළවෙන්නට විය. ගම් දනව් පිටින් ගිනිබත් කර, දහස් ගණන් වැසියන් ඝාතනයට ලක් කෙරුණු බවට චෝදනා නැගෙන්නට පටන් ගත් අතර කුඩා දරුවන්ට සහ කාන්තාවන්ට එරෙහිවද දරුණු අපරාධ සිදු වූ බැව් පැවැසිණි. කාන්තාවන් සමූහ දූෂණයන්ට ලක් වූ බවට නිතර චෝදනා එල්ල විය. මෙම තත්ත්වය තුළ මේ වනවිට ලක්ෂ හතකට ආසන්න රොහිංග්යාවරුන් සංඛ්‍යාවක් සිය ගම්බිම් හැරදා බංග්ලාදේශය වෙත සංක්‍රමණය වී ඇති බවටද සංඛ්‍යා‍ලේඛන පළ වී තිබේ. අද රොහිංග්යාවරුන් සැලකෙන්නේ රටක් නැති ජන පිරිසක් වශයෙනි.

රොහිංග්යා ජනතාවට එරෙහිව ක්‍රියාකාරකම් සිදුවන ආකාරයෙහි දක්නට ඇති පුළුල් සහ ක්‍රමානුකූල ස්වභාවය පිළිබඳ අවධානය යොමු කිරීමේදී කිසියම් සමූහ ජන සංහාරයක් සිදුවෙමින් තිබෙනවාද යන කාරණය බැහැර කළ නොහැකි ආකාරයක් පෙනී යන්නේ යැයි ද කොමසාරිස්වරයා වරක් සඳහන් කර තිබිණි. එමෙන්ම ඉහළ මට්ටමේ අයගේ තීරණවලින් තොරව මෙවැනි පුළුල් පරිමාණයේ හමුදා මෙහෙයුමක් දියත් කළ හැකිද යන්න සැක සහිත බවද ඔහු ප්‍රකාශ කර තිබේ. මේ වනවිට මියන්මාරයේ නායිකාව ලෙස පිළිගැනෙන අවුන් සාන් සුකී මෙන්ම එරට හමුදා ප්‍රධානියා වන ජනරාල් අවුන් මින් ‍ලේංග්ද ඉදිරියේදී ජන සංහාර චෝදනාවලට ලක්විය හැකි බවට ඔහු සැක පළ කරන්නේ මෙම පසුබිම තුළ බව පෙනී යයි. කාලයක් තිස්සේ හමුදා පාලනයක් යටතේ පැවැති මියන්මාරයේ තවමත් හමුදාවට විශාල බලයක් ඇති බව රහසක් නොවේ. සුකීට පවා හමුදාවට විශාල බලපෑමක් කිරීම අපහසු බවද පිළිගැනෙන කාරණයකි. නමුත් ඇයට රොහිංග්යාවරුන් වෙනුවෙන් මෙයට වඩා යමක් කිරීමට හැකියාව ඇති බව ජාත්‍යන්තරයේ  පිළිගැනීම වී ඇති ආකාරයක් දැකිය හැකි වෙයි.

පසුගිය 2015 පැවැති මියන්මාර මහා මැතිවරණයෙන් ජයගත්තේ සුකී නායකත්වය දරන ප්‍රජාතන්ත්‍රවාදය පිළිබඳ ජාතික ලීගයයි. එයින්  විශිෂ්ට ජයක් ලැබූ ඔවුන් ආණ්ඩුවක් පිහිටුවීමට සමත් වූ නමුත් සුකී ට ජනාධිපති පදවියට පත්වීමට හැකියාවක් නොලැබිණි. ඊට හේතු වූයේ එරට ව්‍යවස්ථාවේ ඇති එක් වගන්තියක් පිළිබඳ ප්‍රශ්නයකි. එම වගන්තියට අනුව යමෙකු හෝ ඔහුගේ/ඇයගේ පවු‍ලේ සමීපතම උදවිය හෝ විදේශ පුරවැසිභාවය හිමි අය නම් ඔවුන්ට මියන්මාරයේ ජනාධිපති ධුරය දැරීමට හැකියාවක් නැත. සුකීගේ (අභාවප්‍රාප්ත) සැමියා මෙන්ම දරුවන්ද බ්‍රිතාන්‍ය පුරවැසිභාවය දරන අය බැවින් ඇයටද මෙම වගන්තිය අනුව රටේ ජනාධිපති වීමට  අවස්ථාවක් නොලැබිණි. නමුත් රටේ නිල නොවන නායිකාව ලෙස ඇය පිළිගැනෙන අතර මියන්මාරයේ රාජ්‍ය උපදේශකවරිය  (State Counsellor of Myanmar) යන නව තනතුරක් ඇය වෙනුවෙන්ම නිර්මාණය කරනු ලැබිණි. කෙසේ වෙතත් එරට පාර්ලිමේන්තුව තුළ සැලකිය යුතු ආසන සංඛ්‍යාවක් හමුදාවෙන් පත් කෙරෙන නියෝජිතයන්ට හිමි වෙයි. එමෙන්ම ප්‍රධාන ඇමැති ධුර කිහිපයක්ම අනිවාර්යයෙන්ම හමුදා නියෝජිතයන්ට පිරි නැමේ. ආරක්ෂක, ස්වදේශ කටයුතු සහ දේශ සීමා කටයුතු වැනි වැදගත් ඇමැති ධුර හිමිවන්නේ හමුදා නියෝජිතයන් ටය. මෙම තත්ත්වය තුළ සුකී ට හමුදාව මත ඇති කළ හැකි බලපෑමට කිසියම් දුරකට සීමා පැනවෙයි. එමෙන්ම රොහිංග්යාවරුන් මුස්ලිම් සුළුතරයක් වන තත්ත්වය තුළ රටේ බහුතරයේ අදහස්වලට එරෙහිව යාමටද ඇය කිසියම් පැකිලීමක් දක්වනවා විය හැකිය. එය ඇගේ දේශපාලන අනාගතයට අහිතකර ලෙස බලපානු ඇතැයි සැලකිය හැකි බැවිනි. කෙසේ නමුත් ඇය දීර්ඝ කාලයක් තිස්සේ සටන් කළේත්, 2015 දී බලයට ආවේත් හමුදා පාලනයක් තුළ මර්දනය කර තිබූ ප්‍රජාතන්ත්‍රවාදී අයිතීන්, මානව හිමිකම් ආදිය නැවත තහවුරු කරන අපේක්ෂාවන් මත බවද අමතක කළ හැකි නොවේ. රොහිංග්යා ජනතාව මුහුණ දී සිටින ඛිෙදජනක මානුෂීය ගැටලුව  සම්බන්ධයෙන් මීට වඩා යමක් ඇය කළ යුතුව ඇතැයි අදහස් පළවන්නේ මෙම පසුබිම තුළය.

නිහාල් පීරිස්

ඇමෙරිකාව සහ උතුරු කොරියාව අතර යුද්ධයක් ඇති වෙයිද? මේ දැන් ටික කලෙක සිට ලෝක දේශපාලන ක්‍ෂේත්‍රයේ විශාල ආතතියක් ඇති කරමින් ඇති ප්‍රශ්නයකි. මෙම දෙරට අතර එවැනි ගැටුම්කාරී තත්ත්වයක් ඇති කිරීමට තුඩු දුන් ප්‍රධානම කාරණය වූයේ උතුරු කොරියාව න්‍යෂ්ටික අවි නිපදවීමේ වැඩපිළිවෙළක් ඉදිරියට ගෙන යමින් සිටීමයි. මෙම වැඩපිළිවෙළ තුළ ඔවුහු දැන් කාලයක සිටම න්‍යෂ්ටික සහ මිසයිල අත්හදාබැලීම් පෙළක් ක්‍රියාත්මක කරමින් සිටින අතර ඇමෙරිකාව මෙම වැඩපිළිවෙළ ගැන දැඩි විරෝධයක් දක්වයි. ඔවුන් පවසනුයේ උතුරු කොරියාවේ  න්‍යෂ්ටික අවි වැඩපිළිවෙළ ඇමෙරිකාවේ මෙන්ම ඔවුන්ගේ ආසියානු මිතුරන් වන දකුණු කොරියාව, ජපානය වැනි පාර්ශ්වවලද ආරක්ෂාවට තර්ජනයක්   බවයි. පසුගිය නොවැම්බර් මාසයේ අවසන් සතියේ උතුරු කොරියාව, මතෛක් ඔවුන් නිපද වූ ප්‍රබලම අන්තර් මහද්වීපික මිසයිලයද අත්හදා බැලූ අතර එයට ඇමෙරිකාවේ නිව්යෝර්ක්, වොෂින්ටන් වැනි මර්මස්ථාන ඇතුළු ඕනෑම ප්‍රදේශයක් ඉලක්ක කළ හැකි බව පැවැසිණි. මෙම පසුබිම තුළ ඇමෙරිකාව උත්සාහ ගනිමින් සිටින්නේ උතුරු කොරියාවේ මෙකී න්‍යෂ්ටික අවි වැඩසටහන කෙසේ හෝ නතර කරගැනීමටය. ඒ සඳහා ඔවුහු එක්සත් ජාතීන්ගේ ආරක්ෂක මණ්ඩලය හරහා උතුරු කොරියාවට එරෙහිව විවිධ සම්බාධක ආදියද ඉදිරියට ගෙන එමින් සිටිති.
නමුත් උතුරු කොරියාව තම න්‍යෂ්ටික අවි වැඩපිළිවෙළ නතර කිරීමට කිසිසේත් සූදානම් බවක් පෙනෙන්නට නැත. දකුණු කොරියාව සහ ජපානය සමග එක්ව ඇමෙරිකාව තම රටට එරෙහිව කුමන්ත්‍රණයක් දියත් කරමින් සිටින බවත්,  ඇමෙරිකන් විරෝධී කිම් ජොන්-උන් පාලනය පෙරළා දමා  ඇමෙරිකාවට හිතවත් පාලනයක් එහි ඇති කර ගැනීමට සැලසුම් කරමින් සිටින බවත් උතුරු කොරියාව පැත්තෙන් කියැවෙන කතාවයි. මෙම කුමන්ත්‍රණය ව්‍යර්ථ කිරීමට නම් තමුන් න්‍යෂ්ටික බලවතෙකු බවට පත්ව ශක්තිමත් තත්ත්වයකට පත්විය යුතු බව ඔවුන් ගෙනෙන තර්කය වී තිබේ. උතුරු කොරියානු පාලනය බිඳ වැටී ඉහත කී ආකාරයේ තත්ත්වයක් ඇති වුවහොත් එය මෙම කොරියානු කලාපය තුළ ඇමෙරිකාවේ බලය ශක්තිමත් කරන කාරණයක් වනු ඇත. එම නිසා කොරියානු අර්ධද්වීපය ආසන්නයේ සිටින චීනය වැනි පාර්ශ්වද මෙම ගැටුම පිළිබඳව දැඩි අවධානයෙන් සිටින බව රහසක් නොවේ.
කෙසේ හෝ වේවා, දැන් කලෙක සිටම කොරියානු කලාපය තුළ පවතින්නේ කොයි වේ‍ලේ යුද්ධයක් පැන නගිනු ඇත්දැයි කිව නොහැකි අවිනිශ්චිත තත්ත්වයකි. ඇමෙරිකාව මෙන්ම උතුරු කොරියාවද කිසිසේත් එකිනෙකාට දවෛනි වීමට කැමති බවක් නොපෙන්වූ අතර ඔවුනොවුනට එරෙහිව එල්ල කරගන්නා දරුණු වාග් ප්‍රහාර නිතර එහා මෙහා යන අන්දම මාධ්‍ය හරහා වාර්තා විය. යම් හෙයකින් ඔවුන් අතර යුදමය තත්ත්වයක් ඇති වුවහොත් එය ඇමෙරිකාව සහ උතුරු කොරියාව අතර ගැටුමක් පමණක් නොව චීනය, රුසියාව, දකුණු කොරියාව, ජපානය වැනි ප්‍රධාන පාර්ශ්ව ගණනාවක් පැටලවෙන ගැටුමක් බවට පත්වීමට අවැසි පසුබිම සකස් වෙමින් තිබූ අයුරුද පැහැදිලිව පෙනෙන්නට තිබිණි.
මෙම යුද උණුසුම අතරේ පසුගිය සතියේ දක්නට ලැබුණේ කිසියම් සුබදායක වෙනසක් පිළිබඳ පෙරනිමිති කිහිපයකි. මෙම දෙරට අතර යම් රාජ්‍ය තාන්ත්‍රික සාකච්ඡා මාර්ගයක් සඳහා ඉඩක් විවර වෙමින් තිබූ බවක් පෙනෙන්නට වූයේ බොහෝ දෙනෙකු තුළ යම් සංහිදියාවක් පිළිබඳ අපේක්ෂාවක්ද ඇති කරමිනි. වියනා නුවර පැවැති ජාත්‍යන්තර සමුළුවකට සහභාගි වෙමින් රුසියානු විදේශ ඇමැති සර්ගෙයි ලැව්රෝව් විසින් කරන ලද ප්‍රකාශයක් කාගේත් අවධානයට ලක් වූවක් විය. උතුරු කොරියාව ඇමෙරිකාව සමග සෘජු සාකච්ඡා සඳහා සූදානම් බවත්, ඇමෙරිකානු රාජ්‍ය ‍ලේකම් රෙක්ස් ටිලර්සන්ටද තමුන් මේ පිළිබඳව දැනුම් දුන් බවත් ඔහු පවසා සිටියේය. උතුරු කොරියාවට සිය රටේ ආරක්ෂාව සම්බන්ධයෙන් ඇමෙරිකාව සමග සෘජුව සාකච්ඡා කිරීමට අවශ්‍ය බව තමුන් දන්නා බව කී ලැව්රෝව් එවැනි ක්‍රියාදාමයකදී පහසුකම් සපයන්නෙකු ලෙස කටයුතු කිරීමට රුසියාව සූදානම් බව කියා සිටියේය. මේ අතර තවත් දුර්ලභ  ඝනයේ සිදුවීමක් එක්සත් ජාතීන්ගේ සංවිධානය හරහාද සිදු වෙමින් තිබිණි. එනම් එම සංවිධානයේ ඉහළම පෙළේ නිලධාරියෙකු වන ජෙෆ්රි ෆෙල්ට්මාන් උතුරු කොරියාවේ චාරිකා කරමින් එරට විදේශ අමාත්‍යවරයා වන රී යොංග්-හෝ මුණ ගැසී සාකච්ඡා කිරීමයි. එක්සත් ජාතීන්ගේ සංවිධානයේ මේ මට්ටමේ නිලධාරියෙකු උතුරු කොරියාව සමග මෙවැනි සාකච්ඡාවක නිරත වී ඇත්තේ වසර හයක කාලයකට පසුව වීමද විශේෂ කාරණයකි. ඒ අතර මෙයට සති කිහිපයකට පෙර චීනයේ නියෝජිතයෙකුද උතුරු කොරියාවට ගොස් එහි බලධාරීන් මුණ ගැසී සාකච්ඡා කර තිබූ බවට තොරතුරු වාර්තා විය. චීනය යනු, බොහෝ දුරට ලෝකයෙන් හුදෙකලා වී සිටින උතුරු කොරියාවට සිටින ලොකුම මිතුරා ලෙස සැලකිය හැකි පාර්ශ්වයකි. කෙසේ හෝ වේවා මේ සියල්ල තුළින් පෙනී ගියේ කිසියම් රාජ්‍ය තාන්ත්‍රික ක්‍රියාදාමයක් හරහා මෙම දෙරට අතර ගැටුම් නිරාකරණය කර ගැනීමේ දිශාවට යමක් සිදුවෙමින් ඇති බවයි. උතුරු කොරියාව කියන අන්දමට ඇමෙරිකාවට පවා පහර දිය හැකි න්‍යෂ්ටික මිසයිල දැන් ඔවුන් සතුව ඇත්නම් එවැනි ශක්තිමත් තත්ත්වයක් යටතේ සාකච්ඡා මාර්ගයට යොමුවීමට ඔවුන් අකමැති නොවනු ඇතැයිද සිතිය හැකිය.
ඉන්පසුව කවුරුත් කුතුහලයෙන් යුතුව බලා සිටියේ මේ සම්බන්ධයෙන් ඇමෙරිකාවේ ප්‍රතිචාරය කුමක් වනු ඇත්ද යන්න ගැනය. සාමයට ලැදි කා තුළත් බලා‍පොරොත්තු ඇති කරවන ආකාරයේ ප්‍රකාශයක් ඇමෙරිකානු රාජ්‍ය ‍ලේකම් ටිලර්සන්ගෙන් පළ වූයේ ඒ අතරය. කිසිදු කොන්දේසියකින් තොරව උතුරු කොරියාව සමග මූලික සාකච්ඡාවක් සඳහා ඇමෙරිකාව සූදානම් බව ඔහු පවසා සිටියේය. ''කොන්දේසි විරහිතව'' සාකච්ඡා සඳහා සූදානම් යැයි පැවැසීම  කාගේත් අවධානය දිනාගත්තේ එය ඇමෙරිකාව එතෙක් සිටි ස්ථාවරයෙන් සපුරා වෙනස් එකක් වීම නිසාය. ඇමෙරිකාව ඒ වනතුරු පවසා සිටියේ සාකච්ඡා සඳහා යොමු වීමට නම් උතුරු කොරියාව ඔවුන්ගේ න්‍යෂ්ටික අවි වැඩපිළිවෙළ නතර කිරීමට සූදානම් විය යුතු බවයි. ටිලර්සන්ගේ ඉහත ප්‍රකාශයත් සමග පෙනී ගියේ ඇමෙරිකාවේ එම දැඩි ස්ථාවරය වෙනස් වී ඇති ආකාරයකි. 
නමුත් ඒ සමගම ඇති වූයේ බොහෝ දෙනෙකු බලා‍පොරොත්තු නොවූ තත්ත්වයකි. ටිලර්සන්ගේ ප්‍රකාශයෙන් දිනක් ගතවීමටත් පෙර ධවල මන්දිරය මෙන්ම ඔහු යටතේම පවතින රාජ්‍ය දෙපාර්තමේන්තුවම පවා ඔහුගේ කතාව ප්‍රතික්‍ෂේප කරන ආකාරයක් පෙන්වමින් නැවතත් පැරණි ස්ථාවරයම ඉදිරිපත් කරන්නට විය. මේ නිසා මතු වූයේ ඉතා ව්‍යාකූල තත්ත්වයකි. ඇමෙරිකානු පාලනය තුළ පවතින අවුල් සහගත බව නැවත වතාවක් කරළියට ගෙන ආ සිද්ධියක් ලෙස දැන් මෙය විශාල අවධානයක් දිනාගනිමින් ඇති අයුරු දැකිය හැකි වෙයි. ටිලර්සන් උතුරු කොරියාව සම්බන්ධයෙන් එවැනි ස්ථාවරයක් ප්‍රකාශ කර ඇත්තේ ට්‍රම්ප්ගේ අනුමැතියකින් තොරව බව මේ තුළින් පෙනී යයි. ජනාධිපතිවරයා සහ රාජ්‍ය ‍ලේකම්වරයා අතර දැන් කලෙක සිටම මේ ආකාරයේ මත ගැටුම් සහ නොගැළපීම් පළවෙමින් ඇති අතර ටිලර්සන් ධුරයෙන් ඉවත් කරනු ඇති බවටද ඇතැම් අවස්ථාවල යම් යම් කතාබහ ඇති විය. දැන් කවුරුත් කුතුහලයෙන් යුතුව බලා සිටින කාරණය වී ඇත්තේ ටිලර්සන්ගේ මෙම අලුත්ම ප්‍රකාශය නිසා මෙවර ඔහු නියත වශයෙන්ම රාජ්‍ය ‍ලේකම් පදවියෙන් විසි වී යනු ඇත්ද කියාය. එමෙන්ම උතුරු කොරියාව සමග විවර වෙමින් ආ බවක් පෙනුණු සාකච්ඡා මාර්ගයට කුමක් වනු ඇත්ද යන්නද තවත් කුහුල දනවන කාරණයක් බවට පත්ව තිබේ.
 
නිහාල් පීරිස්

600

ඇමෙරිකානු ජනපති ඩොනල්ඩ් ට්‍රම්ප් ධවල මන්දිරයෙන් පිටතට පැමිණියේ එහි සිටි මාධ්‍යවේදීන්ට සුබ නත්තලක් පතමිනි. එය ධවල මන්දිරය අවට රෝස මල් සුවඳ හමන උණුසුම් දිනයක් වූ අතර කිසිසේත්ම නත්තල් ගතියක් තිබුණේද නැත. කෙසේවුවද නිවාඩු කාලය ධවල මන්දිරයට එළැඹී තිබුණේ ඔහුට පෙර සිටි ජනපතිවරුන් නත්තල් නිවාඩුව සමරනවාට වඩා සතියකට පෙර ට්‍රම්ප් නත්තල් කාලය සැමරීම අරඹා තිබුණු බැවිනි. කොහොමටත් ඩොනල්ඩ් ට්‍රම්ප් යනු සියල්ල අනෙක් අයට වඩා වෙනස් ලෙස කිරීමට කැමැති අයෙකු බව රහසක් නොවේ. ඒ අනුව මෙවර ධවල මන්දිරයේ නත්තල පෙර නත්තල් කාලයන්ට වඩා වෙනස්වන ආකාරය පහත දැක්වෙයි.
සාමාන්‍යයෙන් නත්තලට ධවල මන්දිරය සූදානම් වීම ස්තූතිය පළකිරීමේ දිනය හෙවත් තෑන්ක්ස් ගිවින්ග් ඩේ දිනයට පසු සිදුවුවද මෙවර එම දිනයට පෙර නත්තලට සුදානම්වීමට ධවල මන්දිරය වගබලාගෙන තිබුණි. පෙරදී ඇමෙරිකාවේ පළමු පවුල ධවල මන්දිරයේදී සමරන නත්තල් ගස අසුන් බැඳි කරත්තයක ගෙන එන්නේ ස්තූතිය පළකිරීමේ දිනය සැමරුවාට පසුවය.දශක ගණනාවක් තිස්සේ සාම් ප්‍රදායික ලෙස නත්තල් සමය වොෂින්ටනයේ ඇරඹෙන්නේ මෙම නත්තල් ගස ගෙනඒමේ සම්ප්‍රදායත් සමගය. මෙවර ජනපතිවරයාගේ සංචාරවලට බාධාවක් නොවන ලෙස ස්තූති කිරීමේ දිනයට දින තුනකට පෙර නත්තල් ගස ධවල මන්දිරයට ගෙන එන ලදි. පසුදින ඔහු ෆ්ලොරිඩාව බලා ගියේය.නියමිත කාලයට පෙර නත්තල් ගස ගෙනඒම හා ජනපතිවරයා සංචාරයක නිරතවීම මෙවර සිදු වූ විශේෂ සිදුවීම් ලෙස කැපී පෙනෙයි. මින් පෙනෙන්නේ පෙර ජනපතිවරුන් මෙන් ට්‍රම්ප් නත්තල සැමරීමේ ප්‍රධාන ස්ථානය ධවල මන්දිරයම වියයුතු ලෙස නොසිතන බවය.

Trump Card
තම ජනපතිවරණ ප්‍රචාරක කටයුතුවලදී ඩොනල්ඩ් ට්‍රම්ප් පවසා සිටියේ ජනතාව මින්පසු ප්‍රීතිමත් නිවාඩු කාලයක් ලෙස සුබ පතාගන්නා හැපි හොලිඩේස් යනුවෙන් නොකියා ප්‍රීතිමත් නත්තලක් එනම් මෙරි ක්‍රිස්මස් ලෙස සුබපතාගන්නා කාල යක් තම පාලනය යටතේ එන බවය.පසුගිය ඔක්තෝබර් මාසයේදී මේ ගැන සඳහන් කරමින් තමා ‍පොරොන්දුව ඉටුකරන බව කියූ ජනපතිවරයා මෙවර නත්තලට මෙරි ක්‍රිස්මස් කියා සුබපතාගත හැකි බව දන්වා සිටියේය. ආදායම් බදු අඩුකොට මධ්‍යම පාන්තික ජනතාවට සෙතක් සැලසීම ගැන ඔහුගේ පාක්ෂිකයින් ජනපතිවරයා වෙත තම සතුට පළකරන අතර ඔවුන් කියන්නේද මෙවර මෙරි ක්‍රිස්මස් කිව හැකි බවය. ට්‍රම්ප් විවේචනය කරන්නන් කියන්නේ මේ කතාවේ තේරුමක් නැති බව හා හිටපු ජනපති ඔබාමාද මෙම කතාවම කියා සිටි බවත්ය. ඔබාමා පමණක් නොව හිටපු වෙනත් ජනපතිවරුද මෙවැනි කතා කියා තිබුණත් ඒවා ඔවුන් ප්‍රායෝගිකව ඉටුනොකළ බව ඊට පිළිතුරුදෙන ට්‍රම්ප් පාක්ෂිකයින්ගේ අදහසයි. වත්මන් ජනපතිවරයාට අවශ්‍යව ඇත්තේ නත්තල නියමාකාරයෙන් සැමරූ එකම ඇමෙරිකානු ජනපතිවරයා තමාම යන්න විශ්වාස කිරීම බව එවිට ට්‍රම්ප් විවේචනය කරන්නන් පවසති.
මෙවර නත්තලට ජනපතිවරයා ඇමෙරිකානු ජනතාව වෙත ලබාදී ඇත්තේ නත්තල් ගස යට තබන ආකාරයේ සාම්ප්‍රදායික තෑග්ගක් නොවේ. බදු අඩුකිරීම් එසේ පාර්සලයක ඔතා තැබිය නොහැකිවුවද ජනපතිවරයා කියන්නේ තම බදු අඩුකිරීම් ජනතාවට දැවැන්ත හා අලංකාර නත්තල් තෑග්ගක් වනු ඇති බවය. පසුගිය කාලයේ ඇදෙමින් තිබූ ජනපතිවරයාගේ බදු අඩුකිරීමේ යෝජනාවට නත්තල කිට්ටුවන අතරේ සෙනෙට් අනුමැතිය ලැබිම හේතුවෙන් එය යෝධ පිම්මක් ඉදිරියට පැන්නේය. මෙවර ට්‍රම්ප් නත්තලෙහි තවත් විශේෂත්වයක් වනු ඇත්තේ ධවල මන්දිර සුරතල් සතුන් නොමැතිවීමය. වසර සියයක කාලයක් තුළ ධවල මන්දිර සුරතලෙක් නොමැති පළමු ජනපතිවරයා ට්‍රම්ප් වන අතර එබැවින් මෙවර ධවල මන්දිර නත්තල් සුබ පැතුම් ඡායාරූපවලින් සුනඛ හෝ බළල් සුරතල් දැකිය නොහැකි වනු ඇත. පෘතුගාල ජල සුනඛයින් වර්ගයට අයත් බෝ සහ සනී ඔබාමා යුගයේ නත්තල් සුබ පැතුම් පත් සැරසු අතර ජෝර්ජ් බුෂ් ජනපති පදවිය දරන කාලයේ සුබපැතුම්පතක් සැරසුනේ ස්කොටිෂ් ටෙරියර් වර්ගයට අයත් බානි නම් සුනඛ සුරතලා නත්තල් ගස යට තබා ඇති තෑගි ඉවකර බලන ඡායාරූපයකිනි. බිල් ක්ලින්ටන්ගේ කාලයේ නත්තල් තොප්පියක් පැලඳගෙන සිටියේ සොක්ස් නම් වූ ඔවුන්ගේ සුරතල් බළලාය.
දෙසැම්බර් මුලදී මාධ්‍ය හමුවක් පැවැත්වීම පෙර ජනපතිවරුන්ගේ සාම්ප්‍රදා යක් වුවද ට්‍රම්ප් එසේ කරන බවක් පෙනෙන්නට නැත. සාම්ප්‍රදායිකව මාධ්‍ය හමුවක් පවත්වනු වෙනුවට තම එයාර්ෆෝස් වන් ගුවන්යානය තුළ හෝ ධවල මන්දිරයේ ඕවල් රූම් නම් කාමරය තුළ මාධ්‍යවේදීන් හමුවීම වැනි තමාට පහසු කටයුත්තක ඔහු යෙදෙනු ඇතැයි විශ්වාස කෙරේ. එමෙන්ම මාධ්‍යවේදීන් කිහිපදෙනකුට පමණක් ධවල මන්දිරයට පැමිණ නත්තල් නිවාඩුව සැමරීමේ උත්සවයට එක්වන ලෙස ජනපතිවරයා ආරාධනා කොට තිබුණි. කෙසේවුවද ආරාධනා ලැබුණද තම ආයතනයට දිගින් දිගටම ජනපතිවරයා එල්ල කරන ප්‍රහාරයන් හේතුවෙන් තමා මෙයට සහභාගිනොවන බව සී.එන්.එන්.සේවයේ ප්‍රකාශකයෙක් පවසා තිබේ. මෙයට පිළිතුරක් දෙමින් ධවල මන්දිරයේ ට්‍රම්ප්ට බෙහෙවින් හිතවත් මාධ්‍ය ‍ලේකම් සේරා හකබි සෑන්ඩර්ස් පවසා තිබුණේ “නත්තල වෙනදාට කලින් ඇවිත් සී.එන්.එන්. ආයතනයෙන් හොඳ ආරංචියක්,”යනුවෙනි.

Chrismas1

Chrismas2

නිශානි දිසානායක

Page 2 of 7

 

IMAGE

නෙලා සමග ඔබ හමුවට එන බෙනට්ගේ පුතා

IMAGE 2018 Feb 25 14:21
අද වෙද්දී උදාර රත්නායක කියන්නේ නළුවෙක්ද? එහෙමත් නැතිනම් දේශපාලනඥයෙක්ද? නළුකම මගේ වෘත්තිය...
Views - 636

මගෙන් නම් සල්ලි ඉල්ලුවේ නෑ ඒත් මේ වගේ කතාවක් නම් කිව්වා

IMAGE 2018 Feb 25 14:08
මේ වෙද්දී ඉන්දිකාගේ කලා දිවිය දශක දෙකකටත් එහා ගිය එකක් නේද? ඔව්. මම මුලින්ම ක්‍ෂේත්‍රයට එකතු...
Views - 1160

රනිල් සල් සපු නා හැර ගියේ ඇයි?

IMAGE 2018 Feb 25 13:52
“සල් සපු නා” ටෙලි නාට්‍යයේ දැන් රනිල්ව දකින්නට ලැබෙන්නේ නැහැ. ඇයි ඒ ? මම තාවකාලිකව ‘සල්...
Views - 1015

තාත්තගේ අකමැත්තෙන් රඟපාන්න ආපු උපාසක අම්මා

IMAGE 2018 Feb 25 12:18
කොහොමද ඔබට අංජනා එහෙමත් නැත්නම් උපාසක අක්කා වෙන්න අවස්ථාව ලැබුණේ? මාව උපාසක අම්මා කළේ...
Views - 786

බසයේදී දුන් බොරු විවාහ පොරොන්දුවෙන් පවුල්ජීවිතේ 'හබක්'

IMAGE 2018 Feb 23 12:25
ඔහු අගනුවර ප්‍රසිද්ධ සමාගමක විධායක නිලධාරියෙකි. වයස අවුරුදු 40 ඉක්මවූ ඔහුට රූමත් බිරිඳක් සහ...
Views - 5444

අහිමි පෙම ඉල්ලා පෙම්වතියට ප්‍රසිද්ධියේ ගුටි ඇනලා

IMAGE 2018 Feb 23 10:42
පැරණි පෙම්වතියගෙන් අහිමි වූ ආදරය නැවත ඉල්ලා එය නොලැබුණු විට නාරාහේන්පිට ප්‍රදේශයේදී ඇයට...
Views - 3598

Please publish modules in offcanvas position.