Coss Ear2
lakbima.lk
COSS Ear 1

තවත් ප්‍රධාන පෙළේ රාජ්‍යයක නායකයෙකුට දූෂණ චෝදනා හේතුවෙන් ධුරයෙන් ඉවත්ව යාමට සිදුවිය. ඒ 2009 සිට දකුණු අප්‍රිකාවේ ජනාධිපතිවරයා ලෙස කටයුතු කළ ජේකබ් සූමාටය.  මේ වනවිට දූෂිත රාජ්‍ය නායකයන්ට එරෙහිව ලෝකයේ බොහෝ කලාපවල විශාල ජන රැල්ලක් පැතිරෙමින් ඇති අතර සූමා අලුතෙන්ම ඊට හසු වූ නායකයා වේ. සූමාගෙන් පසු දැන් දකුණු අප්‍රිකාවට නව ජනාධිපතිවරයෙකු පත්ව සිටියි. ඒ,  පසුගිය කාලයේ උප ජනාධිපති ලෙස කටයුතු කරමින් සිටි සිරිල් රමෆෝසායි. එරට පාර්ලිමේන්තුව විසින් ඔහු ජනාධිපති ලෙස පත් කරගන්නා ලද අතර පසුගිය 15 වෙනි දින රමෆෝසා  එම ධුරයෙහි දිවුරුම් දුන්නේය. ඔහුට එරෙහිව කිසිවෙකු තරගයට ඉදිරිපත් වූයේ නැත.
දකුණු අප්‍රිකාවෙහි වර්ණභේදවාදී පාලනයට එරෙහිව ගෙන ගිය සටනේ කැපී පෙනෙන චරිතයක් වූ සිරිල් රමෆෝසා සැලකෙන්නේ නෙල්සන් මැන්ඩෙලාගෙන් පසු එරට ජනාධිපති ලෙස පත්වීමට සිටි කෙනෙකුද වශයෙනි. තමාගෙන් පසු රමෆෝසා එම ධුරයට පත් වනු දැකීමට මැන්ඩෙලා කැමැත්තෙන් සිටි බවට කතාවක් තිබේ. නමුත් ඔවුන්ගේ පක්ෂය වූ අප්‍රිකානු ජාතික කොංග්‍රසය තුළ ඒ වනවිට පැවති බල අරගල තුළ ඔහු වෙනුවට එවර ජනාධිපති ධුරයට පත් වූයේ තාබෝ ම්බෙකිය. පසුව මඳ කලකට දේශපාලනයෙන් ඈත්ව සිටි රමෆෝසා ව්‍යාපාරික ක්‍ෂේත්‍රයට ඇතුළු විය. එහි විශාල සාර්ථකත්වයක් අත් කරගනිමින් අද වනවිට බිලියනපතියෙකු බවට පත් වීමට ඔහු සමත්ව සිටියි. උසස් නායකත්ව ලක්ෂණ පළ කරන්නෙකු ලෙසද, දක්ෂ මැදිහත්කරුවෙකු ලෙසද රමෆෝසා විශාල ප්‍රසිද්ධියක් උසුලයි. මෙයට වසර කීපයකට පෙර 2014 දී ඔහු  සංහිඳියා කටයුතු සඳහා මැදිහත් වීමට ලංකාවේද  සංචාරය කළේය. ‍පොලිස් නිලධාරියෙකුගේ පුතෙකු වූ ඔහු පසුව වෘත්තීය සමිති නායකයෙකු ලෙසද කැපී පෙනුණු අතර දකුණු අප්‍රිකාවේ ජනාධිපති ධුරය තෙක් ඔහු පැමිණි ගමන නාටකීය සිදුවීම්වලින් බහුල වූවකි. 
මේ අතර 2009 සිට වසර 
9ක් දකුණු අප්‍රිකාවේ ජනාධිපති ධුරය දැරූ ජේකබ් සූමාට මෙවැනි ඉරණමක් අත්වීමට බලපෑ පසුබිම ගැනද අවධානය යොමු කළ යුතු වෙයි. පසුගිය කාලය තුළ ඔහුට එරෙහිව විශාල වශයෙන් වංචා දූෂණ චෝදනා එල්ල වූ අතර මෙම චෝදනාවලට පසුබිම් වූ ප්‍රධාන කාරණයක් වූයේ ඔහු සහ ගුප්තා පවුල යනුවෙන් හැඳින්වුණු ව්‍යාපාරික පවුලක් අතර පැවති සම්බන්ධයයි. මෙම සම්බන්ධය නිසා සූමාට සහ ඔහුගේ පවු‍ලේ අයට විවිධ වාසි අත් වූ බවටද, ඒ හරහා රජයේ කටයුතුවලට ඇඟිලි ගැසීමට ගුප්තා පවුලට හැකි වූ බවටද චෝදනා නැගිණි. සිය ව්‍යාපාරික අරමුණුවලට සරිලන ආකාරයෙන් රජයේ ප්‍රතිපත්ති සකස් කර ගැනීමට පවා ඔවුන්ට හැකියාව ලැබුණු බව සඳහන් වන අතර කැබිනට් ඇමැතිවරුන් පත් කිරීම වැනි කටයුතුවලදීද ඔවුන්ට විශාල බලපෑමක් කළ හැකි වූ බවට චෝදනා එල්ල විය. මෙම තත්ත්වය සැලකුණේ ගුප්තා පවුල විසින් රජය ග්‍රහණයට ගනු ලැබිමක් ලෙසිනි. ජේකබ් සූමා ඉල්ලා අස්වීමට පැය කිහිපයකට පෙර ‍පොලීසිය ගුප්තා පවු‍ලේ සුවිසල් නිවස පරීක්ෂාවට ලක් කළ අතර කිහිප දෙනෙකු අත්අඩංගුවට ගැනීමටද පියවර ගත්තේය.
ඇමෙරිකානු ඩොලර් බිලියන ගණනක අවි ගනුදෙනුවක් සම්බන්ධයෙන්ද, කළු සල්ලි සුදු කිරීම හෙවත් මුදල් විශුද්ධිකරණය සම්බන්ධයෙන්ද  සූමාට එරෙහිව චෝදනා එල්ල වී තිබේ. තමාට අයත් නිවසක් වැඩිදියුණු කිරීම සඳහා රජයේ මුදල් යොදාගැනීම සම්බන්ධයෙන්ද වරක් ඔහුට එරෙහිව නඩු පැවරිණි. අනතුරුව ඔහු එම මුදල් නැවත ගෙවීමට එකඟ වූ අතර ස්ත්‍රී දූෂණයක් සම්බන්ධයෙන් එල්ල වූ චෝදනාවකින් නිදහස් වීමට ඔහුට හැකි විය.
කෙසේ හෝ වේවා සූමාට එරෙහිව දිගින් දිගටම එල්ල වූ මෙම චෝදනා හේතුවෙන් ඔහු පිළිබඳ පැවැති ප්‍රසාදය වේගයෙන් පහත වැටෙන්නට විය. මේ තත්ත්වය තුළ ඔහු අයත් අප්‍රිකානු ජාතික කොංග්‍රසයද මුහුණ දුන්නේ බැරෑරුම් අභියෝගයකටයි. ලබන වසරේ එරට මහා මැතිවරණය පැවැත්වීමට නියමිතව ඇති අතර පක්ෂය ජනප්‍රියත්වයෙන් පිරිහීම බරපතළ ගැටලුවක් බවට පත් විය. මේ අතර දකුණු අප්‍රිකාවෙහි විරුද්ධ පක්ෂද වේගයෙන් සිය පදනම් ශක්තිමත් කරගනිමින් සිටින බව පෙනිණි. මේ නිසා ඉක්මනින් පියවරක් ගැනීමේ අවශ්‍යතාව අප්‍රිකානු ජාතික කොංග්‍රසයේ නායකයන් හමුවෙහි මතු විය. සූමා ජනාධිපති ධුරයෙන් ඉවත් විය යුතුය යන තෙරපුම ඉහළ යන්නට පටන් ගත්තේ මෙම පසුබිම තුළයි.  එරට ආර්ථිකය  තිබෙන්නේ එතරම් යහපත් තත්ත්වයක නොවීම ද තීරණාත්මක සාධකයක් විය. ලෝක බැංකුවේ පුරෝකථනයන්ට අනුව 2018 වසරේ එරට ආර්ථික වර්ධන අනුපාතය සියයට 1ක් පමණ වනු ඇත. මෙය අප්‍රිකානු කලාපය සම්බන්ධයෙන් පළ වූ අඩුම මට්ටමේ අනුපාතයකි. සාමාන්‍යයෙන් දකුණු අප්‍රිකාව වැනි රටක් සියයට 5ක තරම්වත් වර්ධන වේගයක් පවත්වා ගත යුතුය යන්න ආර්ථික විශේෂඥයන්ගේ විශ්වාසයයි. විරැකියාව තවත් ලොකු ගැටලුවක් බවට පත්ව තිබේ. සෑම සිව් දෙනෙකුගෙන්ම එක් අයෙකු විරැකියාවෙන් පෙළෙන බව අනාවරණය වෙයි. මෙය ඉතා බරපතළ තත්ත්වයක් බව අමුතුවෙන් කිව යුතු නොවේ.
රමෆෝසා නව ජනාධිපතිවරයා ලෙස දිවුරුම් දුන් අතර ලබන වසරේ පැවැත්වෙන මැතිවරණයෙන් පසුද ඔහුම එම ධුරය සඳහා පත්වනු ඇතැයි විශ්වාස කෙරේ. මෙම තත්ත්වය තුළ දැන් කාගෙත් අවධානය යොමුව ඇත්තේ දකුණු අප්‍රිකාව නිවැරදි මාවතට ගෙන ඒමට ඔහු සමත් වනු ඇත්ද යන්න පිළිබඳවය. එමෙන්ම දූෂණ චෝදනා ලැබූ සූමා ඇතුළු ඔහුගේ සහචරයන් සම්බන්ධයෙන් නව ජනාධිපතිවරයා කවර  පියවරක් ගනු ඇත්ද යන්නද කවුරුත් කුතුහලයෙන් යුතුව බලා සිටින කාරණයක් බවට පත්ව ඇත.
 
නිහාල් පීරිස්

සමහර කාලවලට පොළොවේ තැනින් තැන කුහුඹුවන් එක් රැස් වෙලා රවුමක් හැදිලා වටේ යනවා ඔබ දැකලා ඇති. ඇත්තටම කුහුඹුවන් මේ විදියට වටේ යන්නේ ඇයි? කුහුඹුවා කියලා කියන්නේ ඇස් පෙනෙන්නෙ නැති සතෙක් කියලා තමයි සත්ව විසඥයන් කියන්නේ. කුහුඹුවා පාර හොයා ගන්නේ ගන්ධයෙන්. ඔවුන් පෝලිමට ඉදිරියට යන්නෙත් ඉස්සරහින් යන කෙනාගේ ගන්ධය අනුව ඉව පාර සොයාගෙන මිස ඇස් දෙකෙන් දැකලා නෙවෙයි.
මේ විදියට එකා පසුපස එකා විදියට ඉදිරියට යන සමහර කූඹි රංචු නොදැනීම රවුමක ගමන් කරන්න පටන් ගන්නවා. ඔවුන් දන්නේ නැහැ ඔවුන් මේ ගමන් කරන්නේ රවුමක කියලා. මොකද ඔවුන්ට පෙනෙන්නේ නැති නිසා. මේ විදියට රවුමට ඉදිරියට ගිහින් ගිහින් අන්තිමේදි ඔවුන් අධික වෙහෙසට පත් වෙලාම මිය යනවා. ඒ නිසා මේ වගේ කූඹි රවුම්වලට කියන්නේ Death circles කියලා.
 
 

ජැෆා කේක් කියලා කියන්නේ බිස්කට් එකක් තරම් පුංචි කේක්වලට. ජැෆා කියන නම අපිට ඒ තරම් හුරු නැති වුණත් බිස්කට් සයිස් කේක් නම් අපිට නුහුරු නැහැ. කොහොම වුණත් ලෝකයේ මේ තාක් කාලයකට හදපු ලොකුම ජැෆා කේක් එක ගැනයි මේ කියන්න යන්නේ. මේ ජැෆා කේක් එක හදලා තියෙන්නේ බි‍්‍රතාන්‍යයේ ෆ‍්‍රාන්සස් කුයින් සහ හැම්බ්ලටන් කියන දෙදෙනා විසින්.
මේ කේක් එකේ විශ්කම්භය හරියටම කියනවා නම් අඩි හතරයි අ`ගල් අටක් වෙනවා. එහි වටේ දිග, ඒ කියන්නේ පරිධිය අඩි 13 යි අ`ගල් 2ක්. මේ කේක් එක හදන්න බිත්තර කිලෝ 5.6 කුත්, බටර් කිලෝ 6.1 කුත් සීනි කිලෝ 6.1 කුත්, පිටි කිලෝ 6.1 කුත් වැනිලා ග‍්‍රෑම් 200කුත් අවශ්‍ය වෙලා තියනවා. කේක් එක හැදුවට පස්සේ ඒකෙ මතුපිට නිර්මාණය කරන්න ජෙලි කිලෝ 12කුත්, චොක්ලට් කිලේ 15කුත් යොදාගෙන තියනවා.

ස්පාඤ්ඤය දෙකඩ වේවිද? එහි එක් ''ප්‍රාන්තයක්'' වන කැටලෝනියාව ස්පාඤ්ඤයෙන් වෙන් වී වෙනම රාජ්‍යයක් බවට පත් වේවිද? මේ දැන් මාස කිහිපයක සිටම ලෝක දේශපාලන කරළියේ විශාල අවධානයක් දිනාගෙන ඇති කාරණාවකි. යුරෝපයේ ප්‍රධාන රටක් වන ස්පාඤ්ඤය යම් හෙයකින් ඒ ආකාරයෙන් දෙකඩ වුවහොත් එය එරටට පමණක් නොව මුළු යුරෝපයටම  විශාල බලපෑමක් කරන සිදුවීමක් වනු ඇති බව අමුතුවෙන් කිව යුතු නොවේ. මේ නිසා ස්පාඤ්ඤයේ දිග හැරෙමින් ඇති තත්ත්වය ගැන මේ සියලු රාජ්‍යයන් සිටින්නේ මහත් අවධානයෙන් සහ කුතුහලයෙනි.

කැටලෝනියාවට නිදහස දිනා ගැනීමට සටන් කරමින් සිටින එහි බෙදුම්වාදී කණ්ඩායම් සහ ස්පාඤ්ඤයේ මධ්‍යම රජය අතර මෙම කාරණය සම්බන්ධයෙන් පසුගිය කාලය පුරාම ද්වන්ද සටනක් පවතී. මේ වනවිට එය කිසියම් උච්ඡාවස්ථාවක් කරා එළැඹෙමින් ඇති ආකාරය දැකිය හැකි වෙයි. මේ පිළිබඳව පවතින අලුත්ම තත්ත්වය ගැන සඳහන් කිරීමට පෙර කැටලෝනියා අරගලයේ මෑත ඉතිහාසය පිළිබඳ කෙටියෙන් සඳහන් කිරීම වැදගත්වේ.

කැටලෝනියාව ස්පාඤ්ඤයෙන් වෙන්ව නිදහස් රාජ්‍යයක් බවට පත් වීම සඳහා දැන් කාලයක සිටම කරමින් සිටින අරගලයේ වැදගත් අවස්ථාවක් වූයේ පසුගිය  ඔක්තෝබර් 1 වෙනි දින කැටලෝනියාව තුළ පැවති ජනමත විචාරණයයි. 'කැටලෝනියාව වෙනම රාජ්‍යයක් බවට පත් විය යුතුද' යන්න පිළිබඳව මෙහිදී  ඡන්දදායකයින්ගෙන්  විමසන ලදී. ඡන්දය දුන් සියයට 43 ක පිරිසෙන් සියයට 92ක්ම පැවැසුවේ 'ඔව්' යනුවෙනි. නමුත් කැටලෝනියාව ස්පාඤ්ඤයෙන් වෙන්වෙනවාට දැඩි විරුද්ධත්වයක් දක්වන එරට අගමැති මරියානෝ රයෝයි ඇතුළු මධ්‍යම රජය මෙම ජනමත විචාරණය ව්‍යවස්ථානුකූල ජනමත විචාරණයක් ලෙස පිළිිගත්තේ නැත. ඔවුන් මුල සිටම උත්සාහ කළේ එය කඩාකප්පල් කර දැමීමටයි. ජනමත විචාරණය පැවැති දින ආරක්ෂ අංශ යොදවා විශාල මර්දනයක්ද දියත් කෙරිණි.

කෙසේ හෝ වේවා ජනමත විචාරණයේදී ඡන්දය දුන් බහුතරයේ  තීන්දුවට ගරු කරමින් කැටලෝනියාවේ කලාපීය ආණ්ඩුව ඉන් අනතුරුව  කළේ කැටලෝනියාව නිදහස් රාජ්‍යයක් ලෙස ඒක පාර්ශ්විකව ප්‍රකාශයට පත් කිරීමයි. කැටලෝනියා රජයේ ප්‍රධානියා, (එනම් කැටලෝනියා ජනාධිපතිවරයා) වූ කාලෝස් පුයිජ්ඩෙමොන්ට් මෙම නිදහස් අරගලයට නායකත්වය දුන් ප්‍රධානම චරිතය විය. ඉහත සිදුවීමත් සමගම ස්පාඤ්ඤ මධ්‍යම රජය  වහා එයට ප්‍රතිචාර දැක් වූයේ කැටලෝනියාවේ පාර්ලිමේන්තුව විසුරුවා හරිමින් එම ප්‍රාන්තයේ පාලනය මධ්‍යම රජය යටතට පවරා ගනිමිනි.  එහි නිදහස් සටනට නායකත්වය දුන් බොහෝ දෙනෙකු ස්පාඤ්ඤ රජයට එරෙහිව කැරළි ගැසීම සහ රාජද්‍රෝහී බව යන චෝදනා මත අත්අඩංගුවට ගන්නා ලදී. මෙම සටනේ ප්‍රධානියා වූ  පුයිජ්ඩෙමොන්ට් ද අත්අඩංගුවට ගැනීමේ සූදානමක් ගැන තොරතුරු පළ වූ අතර ඒ සමගම ඔහු තවත් කිහිප දෙනෙකු සමග රටින් පළා ගියේය. ඔහු මේ වනවිට සිටින්නේ බෙල්ජියමේ බව විශ්වාස කෙරේ. පුයිජ්ඩෙමොන්ට් නැවත ස්පාඤ්ඤයට පැමිණියහොත් වහා අත්අඩංගුවට ගනු ඇතැයි අපේක්ෂා කළ හැකි වෙයි.

කෙසේ හෝ වේවා කැටලෝනියාවේ පාර්ලිමේන්තුව විසුරුවා හැරි ස්පාඤ්ඤ අගමැති රයෝයි අලුත් පාර්ලිමේන්තුවක් පත් කර ගැනීම සඳහා නැවත කැටලෝනියාව තුළ මැතිවරණයක් කැඳවූයේය. එම මැතිවරණය පසුගිය දෙසැම්බර් 21 වෙනි දින පැවති අතර එයින් ද ජය ලැබුවේ කැටලෝනියාවේ නිදහස වෙනුවෙන් සටන් කරන පක්ෂමය. මේ නිසා කැටලෝනියාව වෙන් වීමට එරෙහිව දැඩි සටනක් කරමින් සිටින අගමැති රයෝයි නැවත වරක් පත් වූයේ ගැටලුකාරී තත්ත්වයකටය. දැන් ඔහු  සටන් කරමින් සිටින්නේ අලුතෙන් බලයට පත් වූ පක්ෂය නැවත වරක් කැටලෝනියාව නිදහස් කර ගැනීම සඳහා උත්සාහ ගැනීම කෙසේ හෝ වැළැක්වීම සඳහාය. මෙහිදී ඔහු කිසියම් දුරකට නීතියේ පිහිට පතමින් කටයුතු කරන ආකාරය දැකිය හැකි වේ. මේ වනවිට ඔහුගේ ප්‍රධානම තුරුම්පුව බවට පත්ව තිබෙන්නේ කැටලෝනියා සටනේ නායක පුයිජ්ඩෙමොන්ට් නැවතත් එම කලාපීය ආණ්ඩුවේ ප්‍රධානියා බවට පත් වීම වැළැක්වීමයි.

කැටලෝනියා ආණ්ඩුව ක්‍රියාත්මක වීමට නම් ඉක්මනින් එහි ප්‍රධානියා හෙවත් ජනාධිපතිවරයා පත් කර ගත යුතුව තිබේ. මේ වනවිට එහි පාර්ලිමේන්තුවේ බහුතර ආසන සංඛ්‍යාවක් දිනාගෙන සිටින බෙදුම්වාදී පක්ෂවලට අවශ්‍ය වන්නේ පුයිජ්ඩෙමොන්ට්ම නැවතත් එම පදවියට පත් කර ගැනීමටයි. නමුත් ගැටලුව වන්නේ ඔහු නැවත ස්පාඤ්ඤයට නොපැමිණ එම ධුරයේ කටයුතු කරන්නේ කෙසේද යන්නයි. පසුගිය සතියේ ස්පාඤ්ඤ අධිකරණයද මෙයට අදාළ තීන්දුවක් ලබා දෙමින් පවසා සිටියේ කාලෝස් පුයිජ්ඩෙමොන්ට්ට විදේශයක සිට කැටලෝනියා ජනාධිපති ධුරයේ දිවුරුම් දිය නොහැකි බවයි. නමුත් ඊළඟ ගැටලුව වන්නේ යම් හෙයකින් ඔහු නැවත ස්පාඤ්ඤයට පැමිණියහොත් නිසැකවම  අත්අඩංගුවට පත්වීමේ ඉඩක් පැවතීමයි. මෙම උණුසුම් තත්ත්වය තුළ දැන් පුයිජ්ඩෙමොන්ට් මෙන්ම ඔහුට සහය දෙන බෙදුම්වාදී පක්ෂ ද මුහුණ දී සිටින්නේ බරපතළ ප්‍රශ්නයකටය. මෙහිදී මෙම බෙදුම්වාදී පක්ෂවල නියෝජිතයින්ට ගත හැකි එකම පියවර ලෙස පෙනී යන්නේ පුයිජ්ඩෙමොන්ට් අමතක කර ඔවුන්ගේ වෙනත් නායකයෙකු ජනාධිපතිධුරය සඳහා පත් කරගැනීමයි. නිදහස් සටනට සහය දෙන එක් පක්ෂයක්ද පසුගිය දිනෙක මෙම යෝජනාව ඉදිරිපත් කර තිබූ අතර එය දැනගැනීමෙන් බෙල්ජියමේ සිටින පුයිජ්ඩෙමොන්ට් කිසියම් කලකිරීමකට පත් වූ බවක්ද දැනගන්නට තිබිණි. නමුත් මේ වනවිට කැටලෝනියා පාර්ලිමේන්තුවේ නව කථානායකවරයා ලෙස පත්ව සිටින රොජර් ටොරෙන්ට් මෙම යෝජනාවට කැමැත්ත දක්වා නැත.  ඔහු සිටින්නේ කෙසේ හෝ පුයිජ්ඩෙමොන්ට්ම මෙම ධුරයට පත් කරගත යුතුය යන ස්ථාවරයේය. කැටලෝනියාවේ ජනාධිපතිවරයා පත් කර ගැනීම අලුතෙන් පත් වූ පාර්ලිමේන්තුවට අයිති කටයුත්තක් බවත්, එයට බලපෑම් කිරීමට කිසිවෙකුට හැකියාවක් නොමැති බවත් ටොරෙන්ට් දැඩි ස්වරයෙන් පවසා ඇත්තේ මධ්‍යම රජයෙන් එල්ල වන බාධාවන්ට විරෝධය දක්වමිනි.

මේ අතර පසුගිය අඟහරුවාදා (30 දා) ජනාධිපතිවරයෙකු පත් කරගැනීම සඳහා කැටලෝනියා පාර්ලිමේන්තුවේ ඡන්ද විමසීමක් පැවැත්වීමට නියමිතව තිබූ නමුත් කථානායකවරයා එයද කල් දමා තිබේ. ඔහු පවසා ඇත්තේ බලපෑම්වලින් තොරව ජනාධිපතිවරයා පත් කර ගත හැකි වාතාවරණයක් ඇති වනතුරු නැවත එම ඡන්ද විමසීම නොපවත්වන බවයි. කැටලෝනියා ජනතාවගේ කැමැත්ත සහ ප්‍රජාතන්ත්‍රවාදය රැකගත හැක්කේ ඒ හරහා පමණක් බවද ඔහු මෙහිදී පවසා තිබේ. එදින පාර්ලිමේන්තුව රැස් වූ අවස්ථාවේ කැටලෝනියාවේ නිදහස අපේක්ෂා කරන සහ පුයිජ්ඩෙමොන්ට්ට සහය දක්වන විශාල ජනතාවක් පාර්ලිමේන්තු ගොඩනැගිල්ල අවට රැස්ව සිටි අන්දමද මාධ්‍ය වාර්තා කර තිබිණි. දැන් කවුරුත් කුතුහලයෙන් යුතුව බලා සිටින කාරණය වී ඇත්තේ ස්පාඤ්ඤ අගමැති රයෝයිඵගේ රජය සහ කැටලෝනියාවේ නිදහස වෙනුවෙන් අරගල කරන බෙදුම්වාදී පාර්ශ්ව අතර ද්වන්ද සටනේ මීළඟ වටය කවරාකාරයෙන් දිග හැරෙනු ඇත්ද යන්නය.

නිහාල් පීරිස්

වායු දූෂණය නොඑසේ නම් ශ්වසනය උදෙසා යෝග්‍ය වූ වාතය නොමැති වීමෙන් වසරකට ලොව පුරා මියයන ප්‍රමාණය මිලියන 7ක් පමණ බව කියැවේ. ලොව දියුණුම රටවලින් එකක් වන ඇමෙරිකාවේ කැලිෆෝනියා ප්‍රාන්තයේ වායු දූෂණය හේතුවෙන් වසරකට මියයන ප්‍රමාණය 53,000ක් පමණ වේ. 
එවන් පසුබිමක වායු දූෂණයට සෙවූ විසඳුමක් පිළිබඳ අපට වාර්තා වන්නේ නෙදර්ලන්තයේ ඩෙල්ෆ්ට් තාක්ෂණික විශ්වවිද්‍යාලයෙනි. 
එහි විද්‍යාඥයන් නිර්මාණය කළ මේ නව උපකරණය නවීන තාක්ෂණය භාවිත කරමින් වායුගෝලයේ පවතින අතිශය සිහින් දූවිලි අංශු පවා ඉවත් කරන්නට සමත් කුලුනකි. අඩි 23ක් පමණ උසැති මෙම කුලුන එළිමහනක ස්ථාපිත කිරීමෙන් පසු එමගින් පැයට වර්ග කිලෝමීටර 30,000ක පමණ වපරිසයක පවතින වායුව පවිත්‍ර කෙරේ. 
එහිදී සිදුවන්නේ වායු සමීකරණයක්දී මෙන් අවට සියලු වායූන් කුලුන වෙත ඇදගෙන පිරිසිදු කර යළි පිට කිරීමයි. බැක්ටීරියා, දූවිලි අංශු වැනි දෑ එහිදී ඇති විද්‍යුත් ආරෝපක මත රඳවා ගෙන පිරිසිදු වායුව පරිසරයට මුදා හරියි. එහි සිදුවන ක්‍රියාවලිය සරලව පැහැදිලිව කළ හැක්කේ මෙසේය. සුමට මතුපිටත් ඇති ස්ථානයක් තදින් අතුල්ලා ඊට ඔබේ සම ළං කර බලන්න. ඔබේ රෝම කූප සුමට මතුපිටෙහි ඇලෙන්නාක් මෙන් මෙම කුලුනේ ඇති විද්‍යුත් ආරෝපකවල දූවිලි අංශු හා බැක්ටීරියා ආදිය ඇලෙයි. මෙම නව නිපැයුම වෙනුවෙන් ජර්මනියේ ආර්ථික විද්‍යා හා තාක්ෂණ අමාත්‍යාංශය විසින් විශිෂ්ට නිෂ්පාදන නිර්මාණය සඳහා ලබා දෙන සම්මානයද හිමි වී තිබේ. 
වායු දූෂණය මනිනුයේ වායු ඒකකයක අඩංගු අංශුමය ද්‍රව්‍ය ප්‍රමාණය අනුවය. මෙම අංශුමය ද්‍රව්‍ය (Particulate Matter) අගය 2.5ට වඩා අඩු වූ විට එම අංශු මිනිස් ශ්වසන පද්ධතියෙන් පෙරීමට ලක් නොවී සෘජුවම පෙණහලු කරා ගොස් තැන්පත් වේ. මෙම නව නිර්මාණය මගින්  ආකර්ෂණය කරනු ලබන්නේ PM 2.5 අගයට අඩු සියුම් දූවිලි හා කාබන් වැනි අංශුමය ද්‍රව්‍ය වේ. මානව වර්ගයාගේ පැවැත්ම උදෙසා කරනු ලැබූ මාහැඟි සොයා ගැනීමක් ලෙස මෙම නව නිර්මාණය හඳුනා ගැනීම වඩාත් සාධාරණය.
 
තනුජා නානායක්කාර

මාපිය දෙදෙනෙක් තමන්ගේ දරුවන් 13 දෙනා වහල්කමේ යෙදවූ කතාවක් ගැන කැලිෆෝනියාවෙන් වාර්තා වෙලා තියෙනවා. ලූවිස් ටර්පින් සහ ඬේවිඞ් ටර්පින් නම් වූ මේ දෙදෙනා වයස අවුරුදු දෙකේ සිට 17 දක්වා වයස්වල දරුවන් 13 දෙනෙකුගේ මාපියන්. දරුවන්ගේ ආහාරපාන වෙනුවෙන් මුදල් වැය කිරීම නාස්තියක් කියලා හිතපු මේ මාපියන් දරුවන් ලවා වහල් වැඩ කරවා ගන්නත්, එසේ උපයා ගන්නා මුදලින් විතරක් දරුවන්ට ආහාරපාන ලබා දෙන්නත් පුරුදු වෙලා ඉඳලා තියෙනවා.
මේ නිසා දරුවන් 13 දෙනාගෙන් 12 දෙනෙකුටම මන්ද පෝෂණ තත්ත්වය පවා ඇති වෙලා. දරුවන් අතරින් 13 වියැති දැරියක් 911 අංකයට අමතා තමන්ව බේරා ගන්නා ලෙස දැනුම් දීමෙන් පසුව මේ දරු දැරියන් නගරයේ ෂෙරිෆ්වරයාගේ මාර්ගයෙන් රෝහල් ගත කරන්නත් මාපියන් අත්අඩංගුවට ගන්නත් නියම වෙලා තියෙනවා.
 

Page 1 of 10

IMAGE

සංසාර සිහිනයේ ගී සංකල්පනය මම 'ටැබ් එකේ ටයිප් කරපු' එකක්

IMAGE 2018 Feb 21 12:00
සනුක වික්‍රමසිංහ ගායනා කරන “සංසාර සිහිනේ” කලක පටන් බොහෝ ගීත දර්ශකවල පෙරමුණ ගෙන තිබෙන...
Views - 2211

මම නාට්‍ය කලාවෙ ඉන්නේ ඒ ගැන තියන 'උණ' නිසයි

IMAGE 2018 Feb 21 11:53
වේදිකාව, පුංචිතිරය සහ සිනමාව යන මාධ්‍ය ත්‍රිත්වයෙහිම සිය ප්‍රතිභාව ප්‍රකට කළ කලාකරුවකුවන...
Views - 1229

බිරිඳ රැකියාවක් නොකිරීම මගේ සාර්ථකවයට හේතුවක්

IMAGE 2018 Feb 20 14:38
“සිරස ජූනියර් සුපර් ස්ටාර්..” තරගය ගැන මුලින්ම අප ඔබගෙන් විමසන්න කැමතියි.. ඇත්තෙන්ම “සිරස...
Views - 5379

බිරිඳට පින් තකා සුනඛයන්ට දිනපතා සහල් කිලෝ 08ක දනක්

IMAGE 2018 Feb 20 14:23
මිනිසා තිරිසනුන් වන අවස්ථාත් තිරිසනා මිනිසුන් වන අවස්ථාත් අපට බොහෝ විට දක්නට ලැබුණද...
Views - 3111

ලංකාවේ අන්තිම රජු සැඟවූ නිධානය කෝ?

IMAGE 2018 Feb 19 11:34
මහනුවර රජ කළ රාජාධිරාජසිංහ රජුට බිසෝවරුන් කිහිප දෙනෙක්ම සිටියහ. ඔවුන් අතර අලමේලු අම්මා,...
Views - 5206

රඟපෑමෙන් සමුගත් හේතුව නදීකා කියයි

IMAGE 2018 Feb 19 10:41
“චංචල රේඛා” චිත්‍රපටයේ “දං චූටි” නාඳුනන කෙනෙක් එදා සිනමා ලෝලීන් අතර හිටියේ නැහැ....
Views - 6461

Please publish modules in offcanvas position.