lakbima.lk

අතිශය ආකර්ෂණීය විදෙස් ටෙලි නාට්‍ය මෑත කාලයේ අපේ ප්‍රේක්ෂක හිත් දිනා ගන්නට ප්‍රධාන හේතුවක් වුණේ ඒවා අපේ බවට පත් කරන අපේ හඬ නළි නිළියෝ.  මිණි පහන ඔබයි ටෙලි නාට්‍යයේ හැමෝගේම ආදරය දිනාගත්තු කුල්ෆිගේ චරිතයට හඬ මුසු කරන්නේ දෙරණ ලිට්ල් ස්ටාර් ඔස්සේ පැමිණි පුංචි දියණියක්. ඇය සශ්‍රීකා සේමිණි. ටෙලි නාට්‍යයේ සියලුම ළමා ගී ගයන්නේත් ඇය විසින්මයි.

සින්දු කියන්න ආපු සශ්‍රීකා නිළියක් වුණේ කොහොමද?

2015 දෙරණ ලිට්ල් ස්ටාර් තරගයේ වයස 8 න් පහළ ගායන අංශයේ දක්ෂතම තරුව වුණේ මමයි. ඊට පස්සේ දෙරණ නාලිකාවෙන් කරපු ඒකාංගික ටෙලි නාට්‍ය දෙකක මට රඟපාන්න ලැබුණා. එකක් ‍පෝය කතාවක්. තවම ඒ නාට්‍යය විකාශය වුණේ නැහැ. අනෙක නත්තල් නාට්‍යයක්. පහුගිය නත්ත‍ලේ ඒ නාට්‍යය විකාශය වුණා. මම ඒ නාට්‍යයේ දමිතා ඇන්ටිගේ (දමිතා අබේරත්න) දුවගේ චරිතය රඟපෑවා.

දුව වෙළෙඳ දැන්වීම්වලටත් සම්බන්ධ වුණා නේද?

ඔව්... වෙළෙඳ දැන්වීම් 10 ක විතර මම පෙනී ඉඳලා තියෙනවා.

කොහොමද ඔබට මිණි පහන ඔබයි ටෙලි නාට්‍යයේ කුල්ෆිගේ චරිතයට හඬ කවන්න අවස්ථාව ලැබුණේ?

අනුරාධ මාමා (අනුරාධ සිගේරා) තමයි කතා කරලා කිව්වේ ටෙලි නාට්‍යයක ළමා චරිතයට හඬ කවන්න කෙනෙක් හොයනවා කියලා. මම සම්මුඛ පරීක්ෂණයට ගියාට පස්සේ නාට්‍යයේ කොටසක් දීලා ඒකේ දෙබස් ටික දුන්නා. මම ඒ කොටස කළාම මගේ කටහඬ කුල්ෆිගේ චරිතයට හොඳට ගැළපුණා. ඊට පස්සේ තමයි ඒ චරිතයට හඬ කවන්න මට අවස්ථාව ලැබුණේ.

සශ්‍රීකාෙගේ කලා හැකියාව ගැනයි, ඇගේ පවු‍ලේ තොරතුරුයි දැනගන්න අපි සශ්‍රීකාගේ අම්මා නිල්මිණිට කතා කළා.

සශ්‍රීකා පුංචි කා‍ලේ ඉඳන්ම කලාවට දක්ෂද?

ඔව්... පුංචිම කාලෙදිත් සින්දුවක් ඇහුණොත් තා‍ලේ වරද්දන්නේ නැතුව හරියටම කියනවා. ටී.වී. එකේ කාටුන් බලලා කටහඬ වෙනස් කරලා ඒ දෙබස් කියනවා. අවුරුදු 4 දිත් ඒ වගේ දක්ෂතා පෙන්නුවා. ඒ හින්දමයි එයාව ලිට්ල් ස්ටාර් තරගයට යොමු කළේ.

රඟපෑමට ගියාම අධ්‍යාපන කටයුතුවලට බාධා ඇතිවන්නේ නැද්ද?

නැහැ... දුව ඉගෙන ගන්න දක්ෂයි.

මුලින්ම පාදුක්ක සිරි පියරතන කනිෂ්ට විද්‍යාලයේ ඉගෙන ගෙන ශිෂ්‍යත්ව විභාගය සමත් වෙලා දැන් සිරිමාවෝ බණ්ඩාරනායක විදුහ‍ලේ ඉගෙන ගන්නවා. දුව බාහිර වැඩ කළත් ඉගෙනීම අතපසු කරගන්න ළමයෙක් ‍නෙවෙයි. ඒ හින්දයි මම එයාව කලාවට යොමු කළේ.

අපි ආයෙම සශ්‍රීකාව කතාවට එකතු කරගත්තා.

මිණි පහන ඔබයි ටෙලි නාට්‍යයට හඬු මුසු කරද්දී සශ්‍රීකා ගොඩක්ම ආශාවෙන් රඟපෑ ජවනිකාව මොකක්ද?

කුල්ෆි හයියෙන් කෑගහලා අඬන ජවනිකාවක් තිබුණා. ඒ ජවනිකාවට කටහඬ දෙද්දී මටත් ඇත්තටම ඇඬුණා.

සශ්‍රීකා ලොකු වුණාම කවුරු වෙන්නද කැමති?

ඩොක්ටර් කෙනෙක් වෙන්න ආසයි. හැබැයි සින්දු කියන එකයි, රඟපාන එකයි නවත්වන්නේ නැහැ.

ආරියවංශ කුලතිලක

Page 1 of 8

Lakbima Online

Download Lakbima Mobile App

 
 

 

Get In Touch With Us

Please publish modules in offcanvas position.