Coss Ear2
lakbima.lk
COSS Ear 1

අර්ජුන් ඇලෝසියස් හා කසුන් පළිසේන අත්අඩංගුවට ගත්තේ පසුගිය 4දා උදේ 7.00ට පමණ අපරාධ පරික්ෂණ         දෙපාර්තමේන්තුවේ අංක 3 මූල්‍ය විමර්ශන ඒකකයේ ස්ථානාධිපති කාන්තා ‍පොලිස් පරික්ෂිකා සංජීවනී කැප්පෙටිගේ මහත්මියගේ උපදෙස් හා මෙහෙයවීම යටතේ සැකකරුවන් අත්අඩංගුවට ගැනීමේ මෙහෙයුම ඇරඹුණි. මුලින්ම වැල්ලවත්ත අර්තුෂා පාරේ පිහිටි කසුන් පලිසේනගේ නිවස පරික්ෂා කිරීමට ‍පොලිස් කණ්ඩායමක් පිටත් විය. ඒ අතරතුර සිවිල් ‍පොලිස් නිලධාරීන් පිරිසක් කොල්ලුපිටිය මල් පාරේ පිහිටි අර්ජුන් ඇලෝසිියස් ගේ නිවස යාබදව ඔත්තු බැලීමට යොදවා තිබුණි. කසුන් පලිසේනගේ නිවසට ඇතුල් වීමට ‍පොලිස් නිලධාරීන්ට අපහසු වූයේ ගේට්ටු ලොක් කර තිබිම නිසාය. මේ නිසා ‍පොලිස් නිලධාරීන්ට ගේට්ටු සවි කර තිබූ තාප්පයට නැග නිවසට ඇතුල් වීමට සිදුවිය. නිවස පරීක්ෂා කිරීම  සඳහා අධිකරණයේ අවසර පත්‍රය පෙන්වා නිවස පරීක්ෂා කළ ‍පොලීසිය කසුන් පලිසේන අත්අඩංගුවට ගත්තේය. 
 
බිරිඳගෙන් බාධා
 
කසුන් පලිසේන විශේෂ ‍පොලිස් ආරක්ෂාව යටතේ රඳවා ගනිමින් ‍පොලිස් කණ්ඩායම ඊළඟට ගියේ අර්ජුන් ඇලෝසිියස්ගේ කොල්ලුපිටිය මල් පාරේ පිහිටි නිවසටය. එහිදී ඇලෝසිියස්ගේ බිරිඳගෙන් විටින් විට බාධාවන්ද එල්ල විය. ‍පොලීසිය සමග එහි ගිය මාධ්‍යවේදීන්ට ඇය බාධා කළේ පෞද්ගලික නිවසක් තුළට මාධ්‍යවේදීන් ඇතුල් නොවිය යුතු බව කියමිනි. ‍පොලීසිය සමග මාධ්‍යවේදීන් අර්ජුන් ඇලෝසියස්ගේ නිවසට පැමිණ සිටීම ගැන ඇය අසතුටින් සිටිනු දක්නට ලැබිණ. ඇගෙන් එල්ල වූ විවිධ බාධා හමුවේ ඇලෝසියස්ගේ නිවසද 
පරික්ෂා කර ඔහුද අත්අඩංගුවට ගන්නට ‍පොලීසිය සමත් වන්නේය. 
අත්අඩංගුවට පත් සැකකරුවන් දෙදෙනා  විශේෂ ‍පොලිස් ආරක්ෂාව යටතේ රැගෙන යනු ලැබුවේ අපරාධ පරික්ෂණ දෙපාර්තමේන්තුවටය. එදින පැය 11ක් පමණ ඔවුන් ගෙන් ප්‍රශ්න කරමින් කරුණු සටහන් කරගත් ‍පොලීසිය එදින රාත්‍රියේදීම සැකකරුවන් දෙදෙනා කොටුව මහේස්ත්‍රාත් අධිකරණයට ඉදිරිපත් කිරීමෙන් පසු හත්වනදා දක්වා රක්ෂිත බන්ධනාගාර ගත කිරීමට අධිකරණය නියෝග කළේය. 
ඒ අනුව ඉකුත් 07දා යළිත් සැකකරුවන් අධිකරණයට ඉදිරිපත් කෙරිණි. එහිදී පැමිණිල්ල වෙනුවෙන් අතිරේක සොලිසිටර් ජනරාල් යසන්ත කෝදාගොඩ සමග නියෝජ්‍ය සොලිසිටර් ජනරාල් හරිප්‍රියා ජයසුන්දර රජයේ ‍‍‍ජ්‍යෙෂ්ඨ අධිනීතිඥ ලක්මිණි කිරියාගම අධිකරණයේදී පෙනි සිටියේය. සැකකරුවන් වෙනුවෙන් ජනාධිපති නීතිඥ කාලිංග ඉන්ද්‍රතිස්ස, නීතිඥ නලින්ද ඉන්ද්‍රතිස්ස, නීතිඥ ජීවන්ත ජයතිලක, නීතිඥ සම්පත් හේවාපතිරණ, නීතිඥ ජයන්ත ඩයස් නානායක්කාර ඇතුළු නීතිඥයන් කණ්ඩායමක් පෙනි සිටියහ. 
විත්තියේ නීතිඥයන් අධිකරණයට කරුණු ඉදිරිපත් කරමින් සඳහන් කළේ විත්තිකරුවන් ‍පොදු දේපළ පනත යටතට ගැනෙන වරදක් හෝ සුරකුම් පනතට ගැනෙන වරදවල් කර නොමැති බැවින් සාපරාධී විශ්වාස කඩ කිරීමක් හෝ සාපරාධී සාවද්‍ය පරිහරණයක් සිදු නොකර ඇති බැවින් ඇප ලබා දෙන ලෙසය. 
එහෙත් පැමිණිල්ල මෙහෙයවූ රජයේ නීතිඥයන්ගේ විරෝධතා හමුවේ සැකකරුවන් ලබන 16දා දක්වා තවදුරටත් රක්ෂිත බන්ධනාගාර ගතකර තැබිමට කොටුව මහේස්ත්‍රාත් ලංකා ජයරත්න මෙනවිය නියෝග කළාය. 
මෙරටින් පිටව සිටින අර්ජුන් මහේන්ද්‍රන් ලබන 15ට පෙර මෙරටට පැමිණ අපරාධ පරික්ෂණ                               දෙපාර්තමේන්තුවේ පෙනි සිට කට උත්තරයක් ලබාදෙන ලෙසද මහේස්ත්‍රාත්වරිය ජාත්‍යන්තර ‍පොලීසිය හරහා සිතාසි නිකුත් කර ඇත. 
 
කවුද මේ ඇලෝසියස්
 
රටේ මහත් ආන්දෝලනයක් ඇති කරමින්  පර්පචුවල් ටේ‍රෂරීස් සමාගමේ හිමිකරු ලෙස කටයුතු කරන අර්ජුන් ඇලෝසිියස්, කට්කාර් ඇලෝසිියස්ගේ මුනුබුරාය. කට්කාර් ඇලෝසිියස් කරවල අපනයනය කිරීමේ ව්‍යාපාරයකින් දියුණු වූ අයෙකි. ඔහු පසුව ලංකාවේ ප්‍රසිද්ධ සමාගම් කීපයකම කොටස් හිමිකරුවෙකු විය. හෙතෙම දකුණු ඉන්දියානු සම්භවයක් සහිත අයෙකි. 
1977 සිටම ආර්.ප්‍රේමදාසගේ කිට්ටු හිතෛෂින් වූ ඇලෝසිියස් පවුල ඔහුට විවිධ උපකාර කර ඇති බවද සඳහන්ය. කට්කාර් ඇලෝසියස්ට පුතුන් දෙදෙනෙකි. වැඩිමලා ජිප්රි ඇලෝසිියස්ය. ඔහුගේ පුතා අප අද කථා කරන අර්ජුන් ඇලෝසියස්ය.  කට්කාර් ඇලෝසිියස් ගේ දෙවන පුතා ගොඩිප්‍රි ඇලෝසිියස් කට්කාර් ඇලෝසිියස්ගේ පුතුන් වන ජිප්රි හා ගොඩිප්‍රි දෙදෙනාම පර්පචුවල් ටේ‍රෂරීස් සමාගමේ අධ්‍යක්ෂවරු වුවද බැඳුම්කර ගනුදෙනුවට සති 4කට කලින් ගොඩිප්‍රි පර්පචුවල් ටේ‍රෂරීස් සමාගමේ අධ්‍යක්ෂ ධුරයෙන් ඉවත්ව ඇත. 
අර්ජුන් ඇලෝසිියස් ජාත්‍යන්තර පාසලක අධ්‍යාපනය ලබා ඇතත් ඔහුගේ දඟකාර කම නිසා පාසලෙන් ඉවත් කර ඇත. පසුව වෙනත් ජාත්‍යන්තර පාසලකට ඇතුළත්ව ලන්ඩන් අ.‍පො.ස. (සාපෙළ) විභාගයෙන් ඉංග්‍රීසි හා ගණිතය යන භාෂාවන් පමණක් සමත්වී ඇත. ඇලෝසිියස්ගේ යහළුවන්ට අනුව ඔහු හිතුන දේ කරන ඕනෑම අභියෝගයක් ජයගත හැකි දක්ෂයෙකි. මෑතකදී අර්ජුන් ඇලෝසියස් මාධ්‍ය ආයතනයක් වෙත ඔහුගේ ලිපියක් යොමු කර තිබුණේ සිය ලිපි ශිර්ෂයකය. එහි ඔහු ව්‍යාපාර අධ්‍යයනය පිළිබඳ උපාධිධරයකු ලෙස සටහන් වී තිබෙනු දක්නට හැකි විය. ඔහු උපාධිය දිනාගෙන ඇත්තේ ඕස්ට්‍රේලියාවේ බොන්ඩි විශ්වවිද්‍යාලයෙනි. වර්තමානයේදී මෙම විශ්වවිද්‍යාලයට යම් දුරකට පිළිගැනීමක් තිබුණද එක්තරා කාලයකදී මුදලට උපාධි පිරිනමන ආයතනයක් ලෙස ප්‍රසිද්ධව තිබූ බවටද කතා පැතිර තිබුණි. 
සහජ දක්ෂතාවන් හා කැපවීම් ඇති අයකුට අභියෝග ජය ගැනීමට අධ්‍යාපනය බාධාවක් නොවනු ඇත. අර්ජුන් ඇලෝසිියස් වයස 21දී ලංකාවේ ව්‍යාපාරික උපදේශකයකු වූ අතර වයස 28දී පර්පචුවල් ටේ‍රෂරීස් සමාගමේ ප්‍රධාන විධායක නිලධාරියා බවට පත් විය. ඩ්ච්ජ්ඛි බැංකුවේ කොටස් හිමි පර්පචුවල් 
ටේ‍රෂරීස් සමාගමේ වත්මන් හිමිකරු අර්ජුන් ඇලෝසිියස්ය. 
ඔහු විවාහ වී ඇත්තේ අර්ජුන් මහේන්ද්‍රන්ගේ දියණිය සමගය. 2012දී මේ විවාහය සිදුවී ඇති අතර අර්ජුන් මහේන්ද්‍රන් 2015දී ශ්‍රී ලංකා මහ බැංකුවේ අධිපති තනතුරට පත්විය. 
ආන්දෝලනාත්මක බැඳුම්කර සිද්ධිය සම්බන්ධව දැන් රක්ෂිත බන්ධනාගාරගත වී  සිටින්නේ මේ කියන අර්ජුන ඇලෝසියස්ය. අර්ජුන් ඇලෝසියස් හා කසුන් පලිසේන සාමාන්‍ය  සිරකරුවන්ට වෙන් වූ කාමරයක රඳවා සිටින බවත් බන්ධනාගාර නිලධාරීන්ටද ඔවුන් අසලට ගොස් කතා බහ කිරීම තහනම් කර ඇති බවත් බන්ධනාගාර ප්‍රකාශකයකු සඳහන් කළේය. ඔවුන්ගේ සැප දුක බැලීමට දිනපතා නොයෙක් අය පැමිණෙන බවත් ඒ අතර පාර්ලිමේන්තු මන්ත්‍රීවරු  සිටිනවාදැයි කීමට නොදන්නා බවත් එම ප්‍රකාශකයා කීවේය. 
කසුන් පලිසේනට හා අර්ජුන් ඇලෝසියස්ට නිදා ගැනීමට මෙට්ට දෙකක් ඉල්ලා ඇති බවද ඒවා සැපයීමට පියවර ගෙන ඇති බවද සඳහන් කළ බන්ධනාගාර නිලධාරියා මෙම රැඳවියන්ට අවශ්‍ය ආහාර වැනි දේවල් නිවසින් ගෙන්වා ගැනීමට ඉඩදී ඇති බවද කීවේය. 
 
හිරේදී කොට්ටයක්
 
මේ අතර දේශපාලන ක්ෂේත්‍රයේ කතා බහට ලක්වී ඇත්තේ අර්ජුන් ඇලෝසියස් බලන්න පාර්ලිමේන්තු මන්ත්‍රීවරුන්ද බන්ධනාගාරයට ගොස් ඇති බවය. එසේ බන්ධනාගාරයට ගිය මන්ත්‍රීවරුගේ නම් පාර්ලිමේන්තුවට හෙළි කරන්නැයි ජවිපෙ නායක අනුර කුමාර දිසානායක මහතා කථානායකවරයාගෙන් ඉල්ලා ඇති අතර එසේ නම් හෙළි නොකරන්නේ නම් අර්ජුන් ඇලෝසියස් බලන්න බන්ධනාගාරයට ගිය මන්ත්‍රීවරුන්ගේ නම් තමන් හෙළි කරන බවද සඳහන් කර තිබේ.
මේ අතරේ අර්ජුන් ඇලෝසියස් හා කසුන් පලිසේන කොළඹ රිමාන්ඩ් බන්ධනාගාරයේ විශේෂ අංශයකට යොමු කර ඇත. වරදට දඬුවම් ලබන අය සහ චෝදනා ලැබූ සැකකරුවන් වෙන වෙනම රඳවා තබන අතර අසනීපකරුවන් සඳහා බන්ධනාගාර රෝහල ඇත. අර්ජුන් හා කසුන් රඳවා ඇත්තේ සැකකරුවන් රඳවන ප්‍රදේශයේය. අධිකරණයෙන් වැරදිකරුවන් කරන තුරු බන්ධනාගාරය තුළ සිටින සිරකරුවන්ට ජම්පර් අන්දවන්නේද නැත. තමන්ට කැමති ඇඳුමක් ඇඳගෙන සිටින්නට ඔවුන්ට හැකියාව ඇත. 
අර්ජුන් සහ කසුන්ට බන්ධනාගාර ආහාර ගැනීම අනිවාර්ය නැත. ඔවුන්ට තම නිවෙස්වලින් ආහාර ගෙන්වාගත හැකිය. මේ අනුව කසුන් අර්ජුන්ගේ බිරින්දෑවරු හා ව්‍යාපාරික මිතුරන්ද ඔවුන්ට ආහාර රැගෙන එන බව එහි ප්‍රකාශකයෙකු කීවේය. ඒ ගෙනෙන ආහාර සියල්ලම පරීක්ෂාවට ලක් කෙරෙන බවද පරීක්ෂා නොකර කිසිදු ආහාරයක් හෝ පරිභෝජන ද්‍රව්‍යයක් සැකකරුවන්ට බාර නොදෙන බවද එම නිලධාරියා කීවේය. 
 
 ජයසූරිය උඩුකුඹුර 

වෙඩි තබා මරා දැමූ බවට සැකකෙරුණ කල්ලාරු නම් ඇතාගේ මරණයට හේතුව වෙඩි තැබිමක් හෝ  හදිසි සිදුවීමක් නොව ස්වභාවික හේතුවක් යැයි වනජීවී දෙපාර්තමේන්තුවේ වනජීවී සංරක්ෂණ සෞඛ්‍ය කළමනාකරණ ඒකයේ පශු වෛද්‍ය තාරක ප්‍රසාද් මහතා ස්ථානීය පරීක්ෂණයෙන් අනතුරුව පසුගිය හයවනදා නිගමනය කළේය.
ජනවාරි මස (05) වැනිදා කල්ලාරු නමින් හඳුන්වන ඇතාගේ බවට සැකකරන ශරීර කොටස් විශාල ප්‍රමාණයක් සිලාවතුර නාඩ්ඩුකුට්ටු මොල්ලිකුලම් ප්‍රදේශයේදී අනුරාධපුර කොට්ඨාස අපරාධ විමර්ශන අංශය මගින් සොයා ගත් අතර වෛද්‍ය තාරක ප්‍රසාද් මහතා ඇතුළු පිරිස එම ස්ථානයට ගොස් අස්ථි කොටස් සොයාගත් භූමිය නිරීක්ෂණය කළහ.
එම ස්ථානය දැඩි පරීක්ෂාවට ලක්කළ වෛද්‍ය තාරක ප්‍රසාද් මහතා ඇතාට වෙඩි ප්‍රහාරයක් එල්ල වී නැති බව නිගමනය කළේය. එමෙන්ම අකුණු ගැසීමකින් විදුලිය සැර වැදීමක් වැනි හදිසි අනතුරකින් මරණය සිදුවී නොමැති බවද තහවුරු කළේය. ඇතා මියගිය  ස්ථානය පරීක්ෂාවට ලක් කරද්දී එම ස්ථානයේ ‍පොළව විශාල වශයෙන් ගිලා බැසීමක් සිදුව ඇති බව තාරක ප්‍රසාද් මහතා නිගමනයට එළඹි අතර ඇතා ස්වාභාවික හේතුවකින් මියගොස් තිබෙන බවට නිගමනය කළේය.
කල්ලාරු ඇතා වයස්ගතවීමෙන් ඇතිවන රෝගාතුර වීමකින් හෝ වෙනත් රෝගයක් වැළඳී දින කිහිපයක් එම ස්ථානයේ වැටී දැඟලීම නිසා භූමියේ ගිලා බැසීම සිදුව තිබෙන බවත් වෙඩි ප්‍රහාරයක්, අකුණු සැරක් හෝ විදුලිය සැර වැදීමක් සිදුවූයේ නම් ඇතා
ක්ෂණිකවම එම ස්ථානයේ මියයන බවත් එවිට භූමිය මේ අයුරින් ගිලා බැසීමක් සිදු නොවන බවත් වෛද්‍යවරයා ප්‍රකාශ කළේය.
ස්වාභාවිකව මිය ගිය බවට නිගමනය කරන ඇතා මීට වසර දෙකකට පමණ ඉහතදී මිය යන්නට ඇති බවට සැකකරන අතර දැනට අත්අඩංගුවේ පසුවන මවුලවීවරයා ඇතුළු සැකකරුවන් හෝ වෙනත් පිරිසක් වනෝද්‍යාන භූමියේ සැරිසරද්දී මියගිය ඇතාගේ සිරුර හමු වී ඇත්දළ යුගලය කපා ගන්නට ඇති බවට  ‍පොලීසිය සැක මතු කරයි. කිසියම් අයෙකුට එම ඇත්දළ යුගල හමුවූයේ නම් ඒවා වහාම රජයට බාර දිය යුතු බවත්, නීති විරෝධී අන්දමින් ඇත් දළ ළඟ තබා ගැනීමට කිසිවකුටත් හැකියාවක් නොමැති බවත් ‍පොලීසිය පැවැසුවේය.
සැකකාර මවුලවීවරයා ඇතුළු තිදෙනා අද (09) දක්වා රක්ෂිත බන්ධනාගාර ගත කර සිටී. පසුගිය වසරේ දෙසැම්බර් මස (28) වැනිදා තන්තිරිමලය සීමාවේදී සැකකරුවන් තිදෙනෙකු විසින් අනුරාධපුර කොට්ඨාසභාර ‍පොලිස් අධිකාරිවරයා ඇතුළු උපාය දූත ‍පොලිස් නිලධාරින් පිරිසකට ඇත් දළ යුගලය රුපියල් පනස් ලක්ෂයකට විකිණීමට යාමේදී ‍පොලිස් අත්අඩංගුවට පත්විය.
අනුරාධපුර කොට්ඨාසභාර ‍පොලිස් අධිකාරී තිළිණ හේවාපතිරණ මහතාගේ උපදෙස් මත කොට්ඨාස අපරාධ විමර්ශන අංශයේ ස්ථානාධිපති ප්‍රධාන ‍පොලිස් පරීෂක නවරත්න අබේකෝන් මහතාගේ මෙහෙයවීමෙන් ‍පොලිස් සැරයන් (12531) එල්.පී.එන්.සී. සෝමතිලක, ‍පොලිස් කොස්තාපල් (47799) ප්‍රේමරත්න අඩවි ආරක්ෂක එච්.ආර්.ඩී.එස්. සේනානායක යන මහත්වරු පරීක්ෂණයට සහභාගි වූහ.

බුද්ධික මහේෂ්  විජේසූරිය - අනුරාධපුර

ප්‍රමාණවත් ලෙස වැසි නොලැබීම නිසා හේවාහැට බූටාවත්ත ග්‍රාමයේ ගොවීහූ කෘෂිකාර්මික කටයුතු සිදුකර ගත නොහැකිව දැඩි අසීරුතාවට පත්ව සිටිති.

අහස් දියෙන් වගා කටයුතු කරන මෙම ගම්මානයේ ගොවියන් යල මහ දෙකන්නයේ වී වගාව සිදුකළත් වැසි රහිත වියළි කාලගුණය හේතුවෙන් එම ගම්මානයේ මේ වන විට වැඩි වශයෙන් වගා කොට ඇත්තේ එළවළු පමණක් යැයි ගොවීහූ කියයි.

වැසි සමග තමන් වගාව ආරම්භ කළත් එතැන් සිට මේ දක්වා ප්‍රමාණවත් වැසි නොලැබුණු බවත් ඒ නිසා සිය වගාවන් විනාශවෙමින් පවතින බවට ගොවීහූ මැසිවිලි නගති. බූටාවත්ත ග්‍රාමයේ තුන්සියයකට අධික ජනතාව පාරම්පරිකව කෘෂිකර්මාන්තයෙන් ජීවත්වන අතර වැසි නොමැතිවීම නිසා තමන්ට සිය වෘත්තීය සිදුකර ගත නොහැකි තත්ත්වයක් උදාවී තිබෙන බව ද ඔවුහූ කීහ.

අහස් දියෙන් කෘෂිවගාවන් කිරීම සදහා අතීතයේදී ප්‍රමාණවත් වැසි ලැබුණු නමුත් පසුකාලීනට ජලය සපයා ගැනීම සදහා ගම්මානය මැදින් ගලා යන කුඩා දිය පහර උපයෝගී කර ගනු ලැබුව ද මේ වන විට එහි ජලය ප්‍රමාණවත්වී ඇත්තේ පානීය අවශ්‍යතා, දිය නෑම වැනි කාර්යයන් සදහා පමණක් යැයි ගම්මූ කියති. මේ හේතුවෙන් එහි ජලය කෘෂිකාර්මික කටයුතු සදහා යොදා ගත නොහැකි බවත් ක්‍රම ක්‍රමයෙන් තම වගාවන් අව්රශ්මියට පිළිස්සී යන බවත් ඔවුහූ කියති.

ගම්මානයේ සිට කිලෝමීටර් පහක පමණ දුරින් මොරගොල්ල වැව පිහිටා ඇති අතර වැව ප්‍රතිසංස්කරණය කොට නිසි පරිදි ඇල වේලි සකස් කර දෙන්නේ නම් තම වගාවන් සදහා ප්‍රමාණවත් ජල ධාරිතාවක් ලබා ගත හැකි බව ද ගොවීහූ යෝජනා කරති. මේ පිළිබදව බලධාරීන් දැනුවත් කර ඇති නමුත් ඔවුහූ අවධානය ඒ සදහා යොමුවී නැතැයි ද ඔවුහූ කියයි.

නදීක දයා බණ්ඩාර - මහනුවර

 

පසුගිය වසරේ නිදහස් සැමරු උළෙල පැවැත්වූයේ කොළඹ කොටුවේ ගාලුමුවදොරදීය. දෙතුන් වසරකට ඉහතදී මහනුවරදීද නිදහස් දින උළෙලක් පැවැත්තුවේය. බුත්තල මෙන්ම තිරිකුණාමලයේද නිදහස් සැමරුම පැවැති අවස්ථාද ඇත්තේය. මේ කොතැන නිදහස් උළෙල පැවැත්වූවත් මුළු රටම නිදහස් සැමරුම සජීවීව බලන්නේ රූපවාහිනියෙනි.
ඒ කෙසේවෙතත් රූපවාහිනියේ සජීව නොපෙන්වන වැදගත් අවස්ථා දෙකක් හැමදාමත් නිදහස් උළෙලට සමගාමීව පැවැත්වේ. ඉන් එකක් වන්නේ නිදහස් චතුරස්‍රයේ පිහිටි නිදහස් ලංකාවේ පළමු අගමැති ඩී.එස්. සේනානායකයන්ගේ පිළිරුවට පුෂ්‍පෝපහාර දැක්වීමයි.
දෙවැන්න කොල්ලුපිටිය ‍පොල්වත්ත ශ්‍රී ධර්මකීර්ත්‍යාරාම විහාරස්ථානයේ පැවැත්වෙන ජාතික නිදහස් දින අනුස්මරණ ආගමික උත්සවයයි. එම ආගමික උත්සවය ශ්‍රී ධර්මකීර්ත්‍යාරාමය හෙවත් ‍පොල්වත්ත පන්සලෙහි පැවැත්වීමට විශේෂ හේතුවක් ඇත්තේය. ඒ 1948 පෙබරවාරි 04 වැනි දින නිදහස ලැබිම සිහිකිරීම වස් එහි පන්ස‍ලේ අඹ පැළයක් රෝපණය කිරීමයි. එම අඹ පැළය හැත්තෑවසරකට පෙර රෝපණය කළේ එකල ‍පොල්වත්ත පන්සලට අල්ලපු වැටේ අරලියගහ මන්දිරයේ විසූ ඩී.ඇස්. සේනානායක අගමැතිවරයාය.
ශ්‍රී ලංකා රාමඤ්ඤ නිකායට අයත් ‍පොල්වත්තේ පන්ස‍ලේ ඉතිහාසය දහනව වැනි ශත වර්ෂයේ ආරම්භය දක්වා දිව යන්නේය. එහි ප්‍රථම විහාරාධිපති වන්නේ ඉඳුරුවේ ශ්‍රී විමලතිස්ස නායක ස්වාමින් වහන්සේය. අරලිය ගහ මන්දිරයේ මායිමේ පිහිටි ‍පොල්වත්තේ පන්ස‍ලේ, ලංකාවට නිදහස ලැබෙන සමයේ වැඩ සිටියේ හංචා‍පොළ විමලවංශ අනුනායක ස්වාමින් වහන්සේය. උන්වහන්සේ ඩී.ඇස්. සේනානායක අගමැතිවරයාත් උපන්නේ එක දිසාවකය. හැරත් රාමඤ්ඤ නිකාය සමග සේනානායක පරම්පරාවට සමීප සබඳතා තිබුණි. ඩී.ඇස්.ගේ පුත් ඩඩ්ලි සේනානායක උපන් වළව්ව පසුකලක ඔවුහු අඹේපුස්ස සේනානායක මුදලින්ද්‍රාරාමය ලෙස ශ්‍රී ලංකා රාමඤ්ඤ නිකායට පූජා කළෝය. අරලියගහ මන්දිරයේ පදිංචියට ආ අඹේපුස්සේ බෝත‍ලේ වළව්වේ ඩී.ඇස්. සේනානායකට රාමඤ්ඤ මහා නිකායේ ‍පොල්වත්තේ පන්සල සමග තිබුණේ සමීප ඇසුරකි.
ධර්මකීර්ත්‍යාරාම විහාරවාසී අපරැක්කේ සුගතවංශ හිමියන් පවසන්නේ ඩී.ඇස්. සේනානායක අග්‍රාමාත්‍යවරයා දිනපතා උදෑසන ගෝල්ෆේස් ගොස් නැවත අරලියගහ මන්දිරයට යාමට පෙර ‍පොල්වත්ත පන්සලට ගොඩ වීමට අමතක නොකළ බවට පැරන්නෝ පවසන බවකි.
“මම අහලා තියන විදිහට ඩී.එස්. සේනානායක මැතිතුමා නිතර අපේ පන්සලට ඇවිල්ලා තිබෙනවා. එතුමා එකල අපේ නායක හාමුදුරුවෝ  හංචා‍පොළ විමලවංශ හාමුදුරුවෝ සමග නිරන්තර කතා බහක යෙදිලා තිබෙනවා. එහි ප්‍රතිඵලයක් විදිහට මේ අඹ පැළේ අපේ පන්ස‍ලේ රෝපණය කරන්නට ඇති.
මීට වසර හැත්තෑවකට පමණ පෙර අරලියගහ මන්දිරය හා ‍පොල්වත්ත පන්සල වෙන්ව තිබුණේ මහා කාණුවකිනි. නමුත් දෙපසට යාම් ඊම් සඳහා ලී දමා ඒදණ්ඩක් මෙන් පුංචි පාලමක් සකසා තිබූ බව එම ප්‍රදේශයේ පැරැන්නෝ පවසති. 1948 වසරේ පෙබරවාරි 04 වැනි දින ඩී.එස්. සේනානායක අගමැතිවරයා අඹ පැළය රෝපණය කළ අවස්ථාව ගැන ජීවමාන සාක්ෂියකි. ඒ පද්මිණීද සිල්වාය. ඇය පදිංචි වී සිටින්නේ කොල්ලුපිටියේ මුහන්දිරම් පාරේය. ‍පොල්වත්තේ පන්සල පෙනෙන තෙක් මානයේ වෙසෙන ඇගේ දැන් වයස අවුරුදු අසූවකි. ඩී.ඇස්. සේනානායක අගමැතිවරයා අඹ පැළය රෝපණය කරන විට ඈ දසහැවිරිදි දහම් පාසල් දැරියකි.
ඒ දවස්වල මම ධර්මකීර්ත්‍යාරාම දහම් පාස‍ලේ ඉගෙන ගනිමින් සිටියේ. මට හොඳට මතකයි අපි සිංහ කොඩි අරගෙන ඩී.ඇස්. සේනානායක මහත්තයා එනකන් පන්සලට එන පාර දෙපැත්තට වෙලා සිටියා. නමුත් එතුමා කාර් එකෙන් ප්‍රධාන පාරේ එන්නේ නැතිව අරලියගහ මන්දිරේ ඉඳලා මහ කාණුව උඩින් පන්ස‍ලේ අනෙක් පැත්තෙන් පන්සලට ඇවිල්ලා. අපි දන්නෙත් නෑ. එතුමා එතැනින් ආපු බව දැනගත්ත අපි ඉක්මනටම පන්සලට දුවගෙන ගියා. අගමැති තුමා බුදුන් වැඳලා ජාතික කොඩිය එසෙව්වා. පස්සේ දහම් පාස‍ලේ තවත් ළමයි පිරිසක් ජයමංගල ගාථා කිව්වා. ඊට පස්සේ එතුමා ස්වාමින් වහන්සේලාගේ පිරිත් සජ්ජායනා මධ්‍යයේ අඹ පැළය සිටෙව්වා.”
මීට හැත්තෑ වසරක අතීතය පද්මිණී හෙමින් හෙමින් ආවර්ජනය කරන ගමන්ම ඩී.ඇස්. සේනානායක පිළිබඳවද මෙවැනි කතාවක්ද කියන්නීය.
“අඹ පැළය හිටෙව්වාට පස්සේ ඩී.එස්. සේනානායක මහත්තයා ධර්ම ශාලාවට ගිහිල්ලා කතාවක් කළා. නමුත් ඒ දවස්වල මම පුංචි දැරියක්ව සිටි නිසා මට කතාව පිළිබඳව නම් එතරම් වැටහීමක් තිබුණේ නැහැ. නමුත් මම හරි ආසයි එතුමා කතා පවත්වන විට හැසිරෙන ආකාරය බලන්න. මොකද එතුමා කතා කරන කොට විටින් විට ඇඟිලිවලින් ඉස්සෙනවා මෙන්ම මේ කතා විලාසය දකින්න මම හරි ආසයි. එතුමා ඊට පස්සෙ පන්ස‍ලේ උත්සවවලට ආවාම මම කරන්නේ එතුමාගේ කතා විලාසය නරඹන එකයි.”
ඩී.ඇස්. සේනානායක සිට වූ අඹ පැළය ලැබුණ ආකාරය පිළිබඳව ඇත්තේද විවිධ කතාය. ඇතැමුන් පවසන්නේ මෙම අඹ පැළය පේරාදෙණිය උද්භිද උද්‍යානයෙන් ගෙන ආ බවයි. තවමත් සමහරක් පවසන්නේ පන්ස‍ලේ තිබුණ අඹ ගසක ඇටයකින් සෑදුණු පැළයක් බවයි. නමුත් මේ මත දෙකෙන් කොයික නිවැරදි දැයි දන්නෙක් දැන් නොමැත.
එදා ඩී.එස්. සිටවූ අඹ පැළය අද අතු විහිදී ගිය මහා රුකකි. අපරැක්කේ සුගතවංශ ස්වාමින් වහන්සේ පවසන ආකාරයට මෙම අඹ ගසෙහි ගෙඩි හට නොගන්නා කාලයක් නොමැත. වාරයටද අවාරයටද එකසේ ඵල දරයි. එසේම මෙම අඹ ගසෙහි ගෙඩියක් රස නොබැලූ ගම්වැසියකු නොමැති තරම්ය. අඹ අවාරයට ගැබිනි අම්මලාගේ දොළදුකටද පිහිටවන්නේ මෙම අඹ ගසයි. පද්මිණී ද සිල්වා පැවැසුවේ තමන් කුඩා කල දහම් පාසල් ගිය විට එකල සිටි ස්වාමින් වහන්සේලා දහම් පාසල් දරුවන්ට මෙම අඹ ගසෙහි ගෙඩි කඩා කෑමට දෙන බවයි.
“මේ අඹ ගසෙහි ගෙඩි ඉදෙන්නේ නැතිව කන්න බැහැ. ඇඹුල්. හැබැයි ඉඳුණම මී පැණි වගේ රසයි. මේ ගහ හිටවපු දවසේ ඉඳලා ලොකු වෙනකම් බලා සිටියේ අඹ ගෙඩි කන්න. ඉතින් අපි  වගේ පුංචි දරුවන්ට දහම් පාසල් ආවම හාමුදුරුවෝ අඹ ගෙඩි දෙනවා, ඉදවලා බෙදාගෙන කන්න කියලා.”
මෙම අඹගස අසල ඩී.ඇස්. සේනානායකයන්ගේ පිළිරුවක් ස්ථාපිත කර තිබේ. එසේම හංචා‍පොළ විමලවංශ ස්වාමින් වහන්සේගේද පිළිරුවක් මෙම ස්ථානයේ තිබි ඇත. නමුත් අද එය විනාශ වී ගොස්ය. අද ඇත්තේ ඩී.ඇස්. සේනානායකයන්ගේ පිළිරුව පමණි.
වසර හැත්තෑවක කාලයක සිට කොල්ලුපිටිය ධර්මකීර්ත්‍යාරාම විහාරස්ථානයේ නිදහස් දින අනුස්මරණ ආගමික උත්සවය පැවැත්වෙන්නේ මෙම අඹ ගස හේතුවෙනි. මෙවරද එම ආගමික උත්සවය ‍පොල්වත්ත පන්ස‍ලේදී පැවැත්වේ. එකල ඩී.එස්. සේනානායක අග්‍රාමාත්‍යවරයා අරලියගහ මන්දිරේ සිට පාලම උඩින් පයින් පන්සලට පැමිණුණා සේම වර්තමාන අග්‍රාමාත්‍ය රනිල් වික්‍රමසිංහද එලෙස පැමිණෙනු ඇතැයි ගම්වාසීහු කල්පනා කරති. ඒ මන්ද යත් ඔහු මෙම විහාරස්ථානයට බොහෝ විට පැමිණෙන්නේ ඩී.ඇස්. සේනානායක  පැමිණි මාර්ගයේ බැවිනි. නමුත් අද එතැන ඒදණ්ඩක් නොමැත, ඇත්තේ හොඳ කොන්ක්‍රීට් පාරකි.

ඡායාරූප :ප්‍රියන්ත ගමගේ

ශිරෝමි රත්නායක

  • අනුනායක හාමුදුරුවන්ගේ උපන් වර්ෂය?

මම උපන්නේ 1942 අප්‍රේල් 14 වෙනිදා

  • ගිහි නම?

ඕමත්තගේ ගිල්බට් පෙරේරා.

  • පවු‍ලේ විස්තර?

මගේ අම්මගේ නම බුත්සිලිනා ද සිල්වා. තාත්තාගේ නම ඕමත්තගේ ‍පෝල් පෙරේරා. අපේ පවු‍ලේ සහෝදර පිරිස මා එක්ක හය දෙනයි. මට වැඩිමහල් සහෝදරයන්  තිදෙනකුයි මට බාල සහෝදරයන් දෙදෙනකුයි ඉන්නවා. අපේ පවු‍ලේ ඔක්කෝම පිරිමි. මම පවු‍ලේ 4 වෙනියා.

  • ඔබ වහන්සේ අධ්‍යාපනය ලැබුවේ?

මම 5 පන්තිය දක්වා ගියේ නිකපේ ශ්‍රී විජයරාජ විද්‍යාලයට. පහේ පන්තියෙන් පසු 8 පන්තිය දක්වා ගියේ පිළියන්දල මධ්‍ය මහ විද්‍යාලයට.

  • පුංචි කාලයේ අනුනායක හාමුදුරුවන්ට අමතක නොවන සිදුවීමක් තිබෙනවාද?

ඔව්. අවුරුදු 10 දී විතර මම අහල පහළ යාළුවෝ එක්ක වත්තේ කොස් ගහක් යටට වෙලා සෙල්ලම් කරමින් හිටියා. ඔහොම ඉන්නකොට එක පාරටම කොස් ගෙඩියක් මගේ ඔළුවට කඩාගෙන වැටුණා. එතනදී මට සිහි නැති වුණා. කිසිම දෙයක් මට මතක නැහැ. පස්සේ යහළුවන්ගේ කෑගැහිල්ලට අම්මයි මාමයි දුවගෙන ඇවිත් ඇරැව්වල හිටපු යහම්පත් රාළහාමි කියන වෙද මහත්තයා ළඟට මාව උස්සගෙන ගිහින් තිබුණා. ඒ වෙද මහත්තයා අපේ ඥාතියෙක්. කොහොම හරි එදා කොස් ගෙඩිය වැටිල මගේ ඔළුවේ ඇති වුණ කැළල තවමත් තියෙනවා.

  • ඔබ වහන්සේ පාස‍ලේදී වැඩි කැමැත්තක් දැක්වූ විෂය මොකක්ද?

නිකපේ විදුහ‍ලේ ඉගෙන ගන්න කා‍ලේ විල්බට් පෙරේරා කියලා ගුරුතුමෙක් හිටියා. එතුමා ඉගැන්නුවේ සාහිත්‍යය. විල්බට් ගුරුතුමා හරි ලස්සනට කවි එහෙම කියනවා. ඒ වගේම සාහිත්‍යයේ උපමා උපමේය හොඳ ලස්සනට තේරුම් කරලා දෙනවා. මේ නිසා මට සාහිත්‍ය විෂයට විශේෂ ඇල්මක් කැමැත්තක් ඉබේම ඇතිවුණා.
එහෙම වුණාට මම පිළියන්දල ස්කෝ‍ලේ ඉගෙන ගන්න කා‍ලේ  ක්‍රිකට් ක්‍රීඩාවට දක්ෂයි. ස්කෝ‍ලේ ක්‍රිකට් කණ්ඩායමේ මම සෙල්ලම් කළා. ඒ කා‍ලේ පාස‍ලේ මලල ක්‍රීඩා තරගවලදී තිබුණා තුන් කකුලෙන් දිවීම කියලා තරගයක්. මෙහිදී තරගකරුවන් දෙදෙනකුගේ කකුල් දෙකක් ගැට ගහනවා. එතකොට දෙන්නාට දුවන්න තියෙන්නේ කකුල් තුනෙන්. මේ තරගෙන් මම වසර 3ක්ම පිට පිට පළමු වැනියා වුණා. තුන් කකුලෙන් මා එක්ක දිව්ව අනෙක් තරගකරුවා අද සම්පත් බැංකුවේ විධායක අධ්‍යක්ෂ පාලිත කන්නන්ගර මහතායි.

  • ක්‍රීඩාවට  විතරද ඔබ වහන්සේ දක්ෂ ඒ කා‍ලේ?

නැහැ. අත්කම් නිර්මාණ, මැටිවලින් කරන නිර්මාණවලටත් මම දස්කමක් දැක්වූවා. ඒ වගේම තමයි දඟ වැඩවලටත් මම කැපී පෙනුණා. පන්තියේ ඉන්නකොට අපි යාළුවෝ එකපාරටම පන්තියෙන් පැනලා සෙල්ලම් කරන්න දුවනවා. සෙල්ලමට වැඩි නැඹුරුව නිසා ගුරුවරුන්ගෙන් අවවාද ලැබූ අවස්ථා ගොඩක් තියෙනවා.

  • පුංචි කා‍ලේ ඉඳලා පන්සල සමග කිට්ටු සම්බන්ධයක් ඔබ වහන්සේට තිබුණාද?

ඔව්. බෙල්ලන්විල පන්ස‍ලේ නායක හාමුදුරුවෝ, බෙල්ලන්විල ශ්‍රී සෝමරතන නාහිමි. උන්වහන්සේ මගේ පියාගේ වැඩිමහල් සහෝදරයා. ඒ ඥාතිත්වය නිසා අපේ පවු‍ලේ අය නිතරම පන්සලට ආවා ගියා. 1953 දී මගේ පියා හදිසියේ රෝගාතුර වී මිය ගියා. ඉන්පසුව මගේ වැඩිමහල් සහෝදරයා බෙල්ලන්විල සෝමරතන නාහිමියන්ගේ ශිෂ්‍යයෙකු හැටියට පැවිදි වුණා. උන්වහන්සේ තමයි අද මෙහි විහාරාධිපති ධුරය දරන බෙල්ලන්විල ධම්මරතන නායක හාමුදුරුවෝ.

  • අනුනායක හාමුදුරුවෝ පැවිද්දට යොමු වුණේ කොහොමද?

මේ වෙනකොට පැවිදි වුණු මගේ අයියා ඒ කියන්නේ ධම්මරතන හාමුදුරුවෝ මොල්ලිගොඩ ප්‍රවචනෝදය පිරිවෙනේ නැවතිලා ඉගෙන ගනිමින් හිටියේ. දවසක් අපේ අම්මා පන්සලට ගියා. නායක හාමුදුරුවෝ අම්මගෙන් අහල තියෙනව මාව පන්සලට දෙන්න කැමතිද කියලා. පුතාගෙන් අහල කියන්නම් කියලා අම්මා ඇවිත් තිබුණා.
සෝමරතන නායක හාමුදුරුවෝ දුටුවාම ඕනෑම කෙනෙකුට උන් වහන්සේ ගැන ගෞරවයක්  ඇති වෙනවා. ඒ වගේම පෞරුෂයක් උන්වහන්සේට තිබුණා. දවසක් මම පන්සලට ගියා. “කොල්ලෝ පන්ස‍ලේ නවතින්න කැමතිද?”  කියලා  නායක හාමුදුරුවෝ මගෙන් ඇහැව්වා. මම කිසිම උත්තරයක් දෙන්නේ නැතිව බිම බලාගෙන හිටියා.
ඔහොම දවස් කිහිපයක් ගියා ස්කෝ‍ලේ ගිහින් ආවම හවසට පාඩම් වැඩ කරන්න පන්සලට එන්න කියලා නායක හාමුදුරුවෝ කිව්වා. එතකොට මට අවුරුදු 13යි. මම ඉතින් හැමදාම ස්කෝ‍ලේ ඇරිලා හවසට පන්සලට ගියා. පාඩම් වැඩ කරන්න.
නායක හාමුදුරුවන්ට බැහැ කියන්න බැරිකමට පැවිදි වෙන්න මම කැමැති වුණා. සති දෙක තුනක් පන්ස‍ලේ නැවතිලා හිටියා. ඊට පස්සේ 1956
පෙබරවාරි 28 දා මම පැවිදි වුණා. හැබැයි මම ගිහි කා‍ලේ කරපු දඟ වැඩ නිසා හැමෝම කිව්වේ මම කවදාවත් සිවුරේ ඉන්න එකක් නැහැ කියලයි. ගොඩාක් අය කියලා තිබුණා ටික දවසකින් සිවුරෙන් යයි කියලා. ඒ තරමට මම සෙල්ලමට බරවයි හිටියේ.

  • ඔබ වහන්සේ පිරිවෙන් අධ්‍යාපනය ලැබුවේ?

මූලිකව මොල්ලිගොඩ ප්‍රවචනෝදය පිරිවෙනින් අධ්‍යාපනය ලැබුවා. පස්සේ 1957 අගභාගයේදී පෑලියගොඩ විද්‍යාලංකාර පිරිවෙනට ඇතුළත් වුණා. 1963 දී මම විද්‍යාලංකාර විශ්වවිද්‍යාලයට ඇතුළත් වුණා.

  • නායක හාමුදුරුවන්ගෙන් ඔබ වහන්සේට ලැබුණ මග පෙන්වීම කොහොමද?

අපේ නායක හාමුදුරුවෝ සැරයි. ඒත් උන්වහන්සේ අපිට හරි කරුණාවන්තයි. ඒත් ඒ ලෙන්ගතුකම අපිට පෙන්නුවේ නැහැ. අපෙන් මොනවා හරි වැරැද්දක් වුණොත් බොහෝම සැරවැර වුණා. හැබැයි ඊට දවස් දෙකතුනකට පස්සේ අපිව කැඳවලා බොහෝම කරුණාවෙන් අපි කරපු වැරැද්ද කියලා දීලා එසේ නොකරන්න උපදෙස් දෙනවා.

  • එහෙම සිද්ධියක් අනුනායක හාමුදුරුවන්ට මතකයේ තිබෙනවාද?

මම ඉගෙනීමට දක්ෂ බව දැන ගත්තට පස්සේ දායක දායිකාවෝ මට ගොඩාක් ‍පොත් ගෙනත් දුන්නා. ඉතින් මේ ‍පොත් තියාගන්න තැනක් නැති නිසා මමයි පන්ස‍ලේ හිටපු තවත් පස් නමකුයි ආවාසේ උඩු මහලට  වෙලා ‍පොත් රාක්කයක් හදන්න ගත්තා. නායක හාමුදුරුවෝ  වැඩ හිටියේ පහළ  මාලයෙ. රාක්කේ හදන සද්දේ ඇහිලා නායක හාමුදුරුවෝ උඩු මහලට වැඩියා. නායක හාමුදුරුවෝ එනවා සද්දේ ඇහිලා මගේ මිත්‍ර හාමුදුරුවරු ටික එහෙට මෙහෙට පැන්නා.
මොකද කරන්නේ කියලා ඇහැව්වා. මම කාරණය කිව්වා. මේවා භික්ෂුන්ට ඔබින වැඩ නෙවේ කියලා සැරවැර කරලා පන්ස‍ලේ හිටපු කෙනකුට කියලා අපි හද හදා හිටපු රාක්කේ එළියට  දැම්මා, සතියක් විතර ගියාට පස්සේ වඩු බාස් කෙනෙක් ගෙන්වලා තේක්ක ලීයෙන් නායක හාමුදුරුවෝ ‍පොත් රාක්ක දෙකක්ම හදලා දුන්නා. අදත් මගේ ‍පොත් තැන්පත් කරන්නේ ඒ රාක්ක දෙකේ තමයි.

  • ඔබ වහන්සේ ඉගැන්වූ විශ්වවිද්‍යාලයේ අද ඔබ වහන්සේ කුලපති?

ඔව්. සහකාර කථිකාචාර්ය ධුරයේ සිට මහාචාර්ය ධුරය දක්වාත් අනතුරුව උප කුලපති ධුරයත් මම ජයවර්ධනපුර විශ්වවිද්‍යාලයේ දැරුවා. චන්ද්‍රිකා කුමාරතුංග ජනාධිපතිනියගේ සමයේ තමයි මාව උපකුලපති ධුරයට පත් කළේ. පස්සේ ඒ යුගයේදීම කුලපති ධුරයට පත්වුණා. පස්සේ ජනාධිපති මහින්ද රාජපක්ෂ, ජනාධිපති මෛත්‍රීපාල සිරිසේන යන මහත්වරු මගේ සේවා කාලය දීර්ඝ කළා.
හැබැයි මේ කිසිම තනතුරක් මම කාගෙන්වත් පස්සෙන් ගිහින් ගත්ත ඒවා නොවෙයි. දේශපාලනඥයන් පන්සලට ආවා ගියාට කිසිම දේශපාලනඥයෙක් සමග මගේ කිට්ටු සම්බන්ධකමක් නැහැ.

  • පැවිදි දිවියේදී ඔබ වහන්සේ සංවේගයට පත්වුණ විශේෂ අවස්ථාවක් තිබෙනවාද?

පන්ස‍ලේ හිටියා චන්දු  කියලා ඇතෙක්. මේ ඇතාට පුදුම ගති තිබුණේ. හැමදාම උදේට ඇවිත් නායක හාමුදුරුවන්ගෙන්, අපෙන් පලතුරු කනවා. දළදා පෙරහර ඇතුළු රටේ ප්‍රධාන පෙරහරවල්වලට චන්දු ගියා. හරිම කීකරුකමක්, හික්මීමක් තිබුණු ඇතෙක්. දැක්ක තැන අපිට ගරු කළා. චන්දු මියගිය දවස මට වේදනාවක්, කනස්සල්ලක් ඇති වුණා. මම බොහෝ සතුටු වන වැඩක් තියෙනවා. වන්දනාකරුවන් වෙනුවෙන් ඉදිකළ විශ්‍රාම ශාලාවෙන් හා රථ ගාලෙන් ලැබෙන මුදල් කිසිවක් අපි පන්ස‍ලේ වැඩට ගන්නේ නැහැ. වෙනම අරමුදලක් ඇති කරලා ඒ මුදලින් විවිධ සැත්කම් කරගත නොහැකිව දුක් විඳින අයට ආධාර කරනවා. එසේ ආධාර ලැබූ අය සුවපත් වීමෙන් පසු පන්සලට ඇවිත් පින් දීලා යනවා. එය අපට මහත් සතුටක්. එසේම තරුණ පරපුරට ස්වයං රැකියා පුහුණුවට, වෘත්තීය පුහුණු  පාඨමාලා නොමි‍ලේ පවත්වනවා. දිවා සුරැකුම් මධ්‍යස්ථානයක්  පවත්වාගෙන යනවා. ධම්මරතන නාහිමියන්ගේත් මූලිකත්වයෙන් විවිධ විපත්වලදී රටට ජනතාවට අවශ්‍ය උපකාර විහාරයෙන් කරනවා.

ධර්ම ශ්‍රී තිලකවර්ධන

ත්‍රිරෝද රථ අද මෙරට ‍පොදු ප්‍රවාහන සේවාවේ ඉදිරියෙන්ම සිටින වාහනයකි. දුප්පත් ‍පෝසත් භේදයකින් තොරව අපේ රටේ සියලු සමාජ පන්තිවලට සේවාව සපයන ප්‍රවාහන සේවාවක් ලෙසද ත්‍රිරෝද රථ හඳුන්වා දිය හැකිය. මේ වනවිට ප්‍රවාහන සේවා සපයන ධාවනය වෙන ත්‍රිරෝද රථ සංඛ්‍යාව ලක්ෂ 6ත්, 7ත් අතර වෙයි.
කෙසේ නමුත් ප්‍රවාහනයේදී ඇතිවෙන අනාරක්ෂිත බව, නාගරික සංවර්ධනයට බාධා පැමිණීම යන කාරණා මූලික කොටගනිමින් ත්‍රිරෝද රථය මෙරට ප්‍රවාහනයෙන් බැහැර කළ යුතු බවටත්, ඒ වෙනුවට ඉලෙක්ට්‍රික් ත්‍රිරෝද රථයක් හෝ මෝටර් රථයක් ආදේශ කළ යුතු බවටත් 2018 අයවැය මගින් යෝජනා කොට ඇත.  මේ හරහා මතුවන තත්ත්වය පිළිබඳව ත්‍රිරෝද රථ සංගම් කිහිපයකින් අපි අදහස් විමසා සිටියෙමු. මේ ඒ පිළිබඳව සමස්ථ ලංකා ත්‍රිරෝද රථ රියැදුරන්ගේ සහ හිමිකරුවන්ගේ සංගමයේ සභාපති සුදිල ජයරුක් දැක්වූ අදහසය.
2018 අයවැය යෝජනා මගින් සංවර්ධනය වන නගර වලින් ත්‍රිරෝද රථ ධාවනය කිරීම යම්කිසි විදිහකින් සීමා කරන ලෙසටත්, ඒ වෙනුවට කුඩා ප්‍රමාණයේ මෝටර් රථ වගේම විදුලි ත්‍රිරෝද රථයක් හඳුන්වා දෙන්න කියලා අපි යෝජනාවක් ඉදිරිපත් කළා. රියැදුරා වෙනස් නොවි පදවන වාහනය වෙනස් වුණාට කිසිම ප්‍රශ්නයක් නැහැ. අපේ සංගමය යටතේ සිටින ලක්ෂ තුනහමාරකට අධික රියැදුරන් පරිසර හිතකාමී යෝජනාවලට විරුද්ධත්වයක් දක්වන්නේ නැහැ.”
ත්‍රිරෝද රථය වෙනුවට ආදේශක ගෙන ඒමේ යෝජනාව පිළිබඳව, සමස්ථ ලංකා ත්‍රිරෝද රථ රියැදුරන්ගේ වෘත්තීය සමිතියේ සභාපති ලලිත් ධර්මසේකර මෙලෙස අදහස් දක්වා සිටියේය.
“රටේ ආර්ථිකය දියුණු වෙනවා කියලා ත්‍රීවීල් එකේ හැඩය වෙනස් වෙන්න ඕනේ කියලා නැහැනේ. ඒ වෙනුවට කාර් පදින්න ඕනේ කියලා මම නම් හිතන්නේ නැහැ. අපේ රටට අමුතුවෙන් කාර් හඳුන්වලා දෙන්න ඕන නැහැනේ. ත්‍රීවීල් වෙනුවට කාර් ගෙන්වනවා කියන එක කවදාවත් වෙන්නේ නැති වැඩක්. තාම හරියට රටේ සංවර්ධනයක්වත් නැති එකේ මොකටද කාර් ගේනවා කියලා රියැදුරන් බයවෙන්නේ. මේක ප්‍රායෝගික නැහැ.”
ත්‍රිරෝද රථය වෙනුවට ඉලෙක්ට්‍රික් ත්‍රිරෝද රථයක් හෝ මෝටර් රථයක් ආදේශ කිරීමේ වැඩපිළිවෙළ පිළිබඳව රියදුරන් දක්වන අදහස් තවදුරටත් පැහැදිලි කරගැනීම සඳහා ලංකා ස්වයං රැකියා වෘත්තිකයන්ගේ ජාතික ත්‍රිරෝද රථ සම්මේලනයේ සභාපති සුනිල් ජයවර්ධන මහතාගෙන්ද අපි අදහස් විමසා බැලුවෙමු.
“මෙවර අයවැය යෝජනාවකදී මුදල් අමාත්‍ය මංගල සමරවීර තමයි ත්‍රීවීල් වෙනුවට මෝටර් රථයක් හඳුන්වාදීමේ කතාව කිව්වේ. ඇමැතිතුමාගේ ‍‍‍ජ්‍යෙෂ්ඨ මුදල් උපදේශක සමග අපි සාකච්ඡාවක්ද පැවැත්වූවා. එතනදී අපිට කිව්වා ලංකාවේ ත්‍රීවීල් බංග්ලාදේශයට විකුණලා, චීනෙන් අලුත් ත්‍රීවීල් එකක් ගේන්න යනවා කියලා. කාර් එකකුත් හඳුන්වලා දෙනවා කිව්වා. ඇත්තටම දැන් අපිට ප්‍රශ්නෙකට තියෙන්නේ ත්‍රීවීල් එකක් වෙනුවට කාර් එකක් නම් හඳුන්වලා දුන්නට කමක් නැහැ කියමුකෝ. ඒත් ත්‍රීවීල් එකක්ම හඳුන්වා දෙන එක ප්‍රායෝගිකද කියලා අපි අහනවා. ඔය කියන ඉලෙක්ට්‍රික් ත්‍රීවීල් එක ලක්ෂ 13ක් වෙනවා. මං හිතන්නේ කාර් එකක් ලක්ෂ 14ක් වෙනවා. දැන් ලක්ෂ හතහමාරකට විතර තියෙන ත්‍රීවීල් එකක් බොහොම අමාරුවෙන් ගන්න රියැදුරන්ට ඊට වඩා වැඩි ගාණක් ගෙවලා කාර් එකක් හරි ත්‍රීවීල් එකක් හරි ගන්න පුළුවන්කමක් තියෙනවද කියන ප්‍රශ්නෙත් අපිට තියෙනවා. අපි නම් කියන්නේ ත්‍රීවීල් වෙනුවට වෙනත් ආදේශක ගේනවා නම් රියැදුරන්ගේ පැත්තට උපරිම සාධාරණයක් වෙන්න ඕනේ කියලයි.”
කෙසේ නමුත් ත්‍රිරෝද රථයෙන් තම ෙදෙනික ජීවිතය ගැටගසා ගන්නා දහසකුත් ත්‍රිරෝද රථ රියැදුරන්ට තදින්ම දැනෙන මේ ප්‍රශ්නය පිළිබඳව රියැදුරන් කිහිප දෙනෙකුගේ අදහස්ද අප විමසා සිටියෙමු.  අලුත්කඩේ අධිකරණ සංකීර්ණය අසල වූ ත්‍රිරෝද රථගා‍ලේ ප්‍රධානී ‘රවුමාන්’ මේ පිළිබඳව මෙලෙස අදහස් දැක්වීය.
“ආණ්ඩු මාරු වෙනකොට එක එක කතා කියනවනේ. එක පාරක් අපිට යුනිෆෝම් දෙනවා කිව්වා. පැන්ෂන් දෙනවා කිව්වා. ඒ වගේ තමා මේ කාර් දෙනවා කියන කතාවත්. අපි නම් කියන්නේ බොහොම අමාරුවෙන් ජීවත් වෙන අපේ රස්සාව නැති කරන්න එපා කියලයි.”
කොටහේන මන්සන්ධිය අසල වූ ත්‍රිරෝද රථ ගා‍ලේ රියැදුරෙකු වූ ගුණදාස  මේ පිළිබඳව මෙලෙස අදහස් දක්වා සිටියේය.
“මම ත්‍රීවීල් හයර් කරන්නේ අවුරුදු පහළොවක ඉඳලා. කාර් ගේන්න යනවා කියන කතාව හරියන වැඩක් නම් නමෛයි. දැන් තියෙන ත්‍රීවීල් එකත් ලක්ෂ හතහමාරක් ගෙවලත් අපි ගන්නේ බොහොම අමාරුවෙන්. ඉතින් අපි කොහොමද ලක්ෂ 13, 14 දීලා ඔය කියන වාහන ගන්නේ”.
කොළඹ 14 ග්‍රෑන්ඩ්පාස් මන්සන්ධියේ වූ ත්‍රිරෝද රථ නැවතුම්‍පොළෙහි කිහිප දෙනෙකු අදහස් පළකළේ මේ ආකාරයටය.
“ත්‍රීවීල් අයින් කරලා කාර් ගෙනාවොත් අපි කොච්චර අසරණ වෙනවද, හරියට තවම අපේ රට සංවර්ධනය වෙලාවත් නැහැ. ඉතිං කොහොමද වාහන වෙනස් කරන ඒවා ගැන කතා කරන්නේ.”
“අනාරක්ෂිතයි කියනවා නම් ඒකට ඉතිං රියැදුරන් දැනුවත් කරන්න ඕනේ. අපි අවුරුදු කීයක් තිස්සේ ත්‍රීවීල් හයර් දුවනවද? අපෙන් කාටත් අහිතක් වෙලා නැහැනේ. එහෙම කියලා ත්‍රීවීල් අයින් කළාම අනතුරු අඩුවෙනවා කියලා අපි කොහොමද හරියටම කියන්නේ. අපි නම් කියන්නේ ඔය ආදේශක ප්‍රායෝගික නැහැ කියලයි.”
මේ ආකාරයට බොහෝ ත්‍රිරෝද රථ රියැදුරන්ට ත්‍රිරෝද රථ ඉවත් කිරීම පිළිබඳව දක්වා ඇත්තේ අසුබවාදී අදහස්ය. රට සංවර්ධනය විය යුතුය. නමුත් ත්‍රිරෝද රථ රියැදුරන්ගේ ජීවනෝපායද සුරක්ෂිත විය යුතුය යන්න බොහෝ දෙනෙකුගේ අදහසය.

සමන්මලී නැලිගම

ශ්‍රී ලංකාවේ විශාලතම වේල්ලක් වන වික්ටෝරියා ජලාශයේ වාන් දොරටු මත බැද ඇති බඹර වද කපා ඉවත් කිරීම පෙරේදා (30) සිදු කෙරිණි.
මීටර් 122ක උසකින් යුක්තව ආරුක්කු හැඩයෙන් යුතු මෙම වේල්ල ජල ධාරිතාව ඉහළ යන විට යම් ප්‍රමාණයක් ඉදිරියට ගමන් කිරීම නිසා සජීවි වේල්ලක් වශයෙන් හැඳින්වේ. එම සජීවි වේල්‍ලේ චලනය අධීක්ෂණය
කිරීමේ නව ව්‍යාපෘතියක් සිදුකිරීමට ශ්‍රී ලංකා මහවැලි අධිකාරිය හා වික්ටෝරියා ජලාශ කාර්යාලය සැලසුම් කර ඇති අතර ඒ සඳහා ප්‍රධාන බාධකයක් වී අත්තේ වාන් දොරටු මත බැද ඇති බඹර වදයි.
වාන් දොරටු තුනක පහළ ප්‍රදේශයේ  බඹර වද හතරක් බැද ඇති අතර දොඹකර ආධාරයෙන් තොරව එම ස්ථානයට කිසිසේත්ම ළඟා විය නොහැකි වේ. ඒ නිසාම බඹර වද කපා ඉවත් කිරීමේ වගකීම බිගු සම්පත සුරැකීමේ සංවිධානය භාරගෙන එය ඉටු කිරීම වික්ටෝරියා වේල්ල මතදී සිදුවිය.
ශ්‍රී ලංකා මහවැලි අධිකාරිය සතු දොඹකරයක් ආධාරයෙන් තරුණියන් දෙදෙනකුද ඇතුළුව සිව්දෙනෙක් මෙම වද කපා ඉවත් කිරීම සිදුකළහ. සතුන් කලබලයට පත් නොකර ක්‍රම ක්‍රමයෙන් වද කරා ළං වී මුලින්ම ධුමායනය කොට සතුන් පලවා හරින අතර පසුව ඉතා ප්‍රවේශමෙන් වදය කපා ඉවත් කිරීම මෙහිදී සිදුවිය.
අප මේ කාර්යය කිරීමේදී සතුන් මරණයට පත් කරන්නේ නැහැ. පරිසරය සමතුලිතය සඳහා මීමැස්සා, බඹරා හා දෙබරා යන සතුන් අවශ්‍ය යැයි බිගු සම්පත සුරැකීමේ සංවිධානයේ ‍ලේකම් තිස්ස බණ්ඩාර තඹවිට මහතා පැවැසීය. මේ නිසා කිසිදු අවස්ථාවක බිගුන් ගිනි තබා විනාශ නොකරන්නැයි ඒ මහතා ඉල්ලා සිටියි. මේ සතුන්ගෙන් මිනිසාට හිරිහැරයක් වන්නේ ඔවුන් කලබලයට පත්වූ විටයි.
මේ වන විට අප කිසිදු හිංසාවකින් තොරව ආරක්ෂාකාරී ලෙස සතුන් ඉවත් කිරීමේ කාර්යය කරනවා. මී මැස්සා හා බඹරා මල් පැණි රොන්වලින් ජීවත්වන නමුත් දෙබරා ප්‍රිය කරන්නේ මාංශවලටයි. එම සත්වයා මල් වෙත එන්නේ මල් රොන් ගන්නට නොව මල් කරා පැමිණෙන කුඩා කෘමියන් ආහාරයට ගැනීමටයි.
මරණයට පත් නොකර බිගුන් සුරක්ෂිතව ඉවත් කිරීමේ කාර්යය අප සංවිධානය විසින් සිදුකරනවා. ඒ අයුරින්ම අලියන් හා දිවියන් ආරක්ෂාකර ගැනීම සඳහාද යම් සංවිධානයක ඉදිරිපත්වීමක් සුදුසු බවයි මගේ හැගීම. ශ්‍රී ලංකාවේ වන ගහනයේ මේ වන විට ක්‍රම ක්‍රමයෙන් අඩු වෙමින් යනවා. මේ නිසා බිගුන්ට ජීවත්වීමට හැකි ඉඩකඩ සීමිතයි. ඒ නිසා ඔවුන්ගේ පැවැත්මට තර්ජනයක් වෙනවා. ඔවුන් තුරන්වීම නිසා මිනිසාගේ පැවැත්මට තර්ජනයක් මතුවන බවද තිස්ස බණ්ඩාර තඹවිට මහතා පැවැසීය.
ඉවත් කිරීම නියමිතව තිබුණු බඹර වදවලට අමතරව වෙනත් බඹරුන් පිරිසක් ඇවිස්සී සිටීම හේතුවෙන් වද කපා ඉවත්කිරීම පැය පහක පමණ කාලයක් ප්‍රමාද වුණු නමුත් පසුව මහවැසි නොතකා එම කාර්යය මණ්ඩලය පැය දෙකක් වැනි කාලයක් තුළදී වාන් දොරටු මත බැද තිබුණු වද සතර කපා ඉවත් කළහ.
නදීක දයා බණ්ඩාර - මහනුවර

නැවත වතාවක් ආරච්චිකට්ටුව මුතුපන්තිය දූපත ඛාදනය වීමේ අවදානමක් පවතින බව දූපත්වාසීහු කියා සිටිති.
මුතුපන්තිය දූපත තුළ පවුල් 150ක් පමණ ජීවත් වන අතර ඔවුන් කුමන ආකාරයකට හෝ ධීවර වෘත්තීය හා සම්බන්ධ වී සිටිති. ඒ නිසා මුතුපන්තිය යනු සම්පූර්ණයෙන්ම ධීවර ගම්මානයකි.
බටහිරෙන් මහ මුහුදටත්, නැගෙනහිරෙන් හැමිල්ටන් ඇළටත් කොටුවී ඇති මුතුපන්තිය දූපත තවත් පැත්තකින් වටිනා ස්ථානයකි. ඒ මෙම දූපත ආසන්නයේම පිහිටා ඇති ආනවිළුන්දාව රම්සා තෙත් බිම් අභය භූමිය නිසාය. රම්සා අභය භූමියට පැමිණෙන ඇතැම් සංචාරක පක්ෂී වර්ග නිරන්තර මුතුපන්තිය දූපතට පැමිණෙති. ඒ තමන්ගේ ආහාර සොයා ගැනීමට සහ ප්‍රජනන කටයුතු සඳහාය. මේ නිසා සංචාරක පක්ෂීන් දැක ගැනීමට පැමිණෙන දෙස්විදෙස් සංචාරකයන්ද ආනවිළුන්දාව අභය භූමියට මෙන්ම මුතුපන්තිය දූපතටද ගමන් කිරීමට අමතක නොකරති. එම හේතුව නිසා මුතුපන්තිය දූපත තුළ මේ වනවිට සංචාරක හෝටල් කීපයක්ද ඉදිවෙමින් පවතී.
මුතුපන්තිය දූපත මුහුදට බිලිවීමට පටන් ගෙන ඇත්තේ වසර කීපයකට පෙරදීය. ගම්වාසීන් වගකිව යුතු අංශ දැනුවත් කිරීමත්, මාධ්‍ය මගින් මේ සම්බන්ධයෙන් විටින් විට කරුණු දැක්වීමේත් ප්‍රතිඵලයක් ලෙස ඛාදනය වන බවට හඳුනා ගත් ස්ථාන කීපයකට ගල් වැටි යෙදීමට වෙරළ සංරක්ෂණ දෙපාර්තමේන්තුව කටයුතු කර ඇත. නමුත් පුදුමය වී ඇත්තේ වර්තමානයේ මුහුදු ඛාදනය ආරම්භ වී ඇත්තේ එම ස්ථානවලින්ම වීමය.
පවතින තත්ත්වය නිසා වෙරළට ආසන්නයේ පදිංචිව සිටි පවුල් කීපයක් මේ වනවිට තම නිවාස අතහැර වෙනත් ස්ථානවල පදිංචියට ගොස් ඇත. ඊට හේතුව වී ඇත්තේ මුහුද තම නිවාස ආසන්නයටම පැමිණ තිබිමය. මීටර් 500 කට වැඩි වෙරළ තීරයක් අඩි 50කට වැඩි ප්‍රමාණයක් මේ වනවිට මුහුදට ඛාදනය වී ඇති බව දූපත්වාසීහු කියා සිටිති.
පෙර ගල්  වැටි යොදා ඇති ආකාරයටම ගල්  වැටි යෙදීමක් සිදු නොකර නිසි අධ්‍යයනයකින් අනතුරුව ප්‍රතිකර්මයක් සිදු නොකළහොත් වැය කරන මුදල පවා මුහුදට ගසාගෙන යාමට ඉඩ ඇති බව අපට හමුවූ ධීවරයෝ කියා සිටිති. තාවකාලික පැලැස්තර වෙනුවට ස්ථීරසාර විසඳුමක් ලබාදීමට වගකිව යුතු අංශ කටයුතු නොකරන්නේ නම් මුතුපන්තිය දූපත වැඩි දිනක් යාමට පෙර ලංකා සිතියමෙන් මැකී යාමට ඉඩ ඇති බවද ඔවුහු වැඩිදුරටත් පවසති.
මෙවැනි ව්‍යවසනයන්ට ප්‍රතිකර්ම කිරීමේදී තාක්ෂණය අවශ්‍යය. ඒ සම්බන්ධයෙන් තර්කයක් නැත. නමුත් ප්‍රායෝගික අත්දැකීම් ඇති ධීවරයන්ගේ දැනුමද ඊට දායක කර ගැනීමට හැකියාව ඇත්නම් වඩාත් වැදගත් වන්නේය. එය අපි වගකිව යුත්තන්ට මතක් කර දෙන්නෙමු.
 
ජූඩ් සමන්ත

සතියකට ශ්‍රී ලංකාවේ අලින් හතරදෙනකු මිය යන බවත් මසකට අලි දාසය දෙනෙක් මිය යන බවත් පරිසර හා සොබාදහම් අධ්‍යාපන මධ්‍යස්ථානයේ ජාතික සංවිධායක රවීන්ද්‍ර කාරියවසම් මහතා පැවැසීය.
ඒ මහතා මේ බව පැවැසුවේ පෙරේදා (29) කොළඹදී පැවැති මාධ්‍ය හමුවකට එක් වෙමිනි.
හෙතෙම වැඩිදුරටත් පැවැසුවේ අලියා සහ ඇතා ලංකාවේ වඳ වී යන සත්ව කාණ්ඩයට අයත් බවයි. එමෙන්ම අලි ගහණය අඩු වීමට හේතුව අලින්ගෙන් 60ක ප්‍රමාණයක් රක්ෂිත වනාන්තර ඇතු‍ලේ වාසය නොකරන බවයි. රක්ෂිත වනාන්තරවල ඉඩ ප්‍රමාණවත් නොවන බැවින් අලි ඇතුන් කෘෂි ආර්ථික බෝග වගා කරන ප්‍රදේශවලට හා අලිමංකඩවල ඉදිකර ගත් නිවාස ආශ්‍රිත ප්‍රදේශවලට පැමිණෙන බවද හෙතෙම කීය. මේ නිසා අද වන විට අලි මිනිස් ගැටුම බරපතළ ප්‍රශ්නයක් වී ඇතැයිද ඒ මහතා පැවැසීය. අලියෙකුට දිනකට ආහාර කිලෝ ග්‍රෑම් 150ක ප්‍රමාණයක් හා ජලය ලීටර 120ක ප්‍රමාණයක් අවශ්‍ය වන බවද හෙතෙම සඳහන් කළේය. අලින්ට අවශ්‍ය ආහාර වනාන්තර ඇතුළත සොයා ගැනීමට නොහැකි බවත් ඔවුන් ආහාර සොයා කිලෝ මීටර 15ක පමණ දුරක් ඇවිද යන බවද ඒ මහතා කීය. විල්පත්තුව ජාතික වනෝද්‍යානය ප්‍රදේශයේ සිටින අලි ඇතුන් පුත්තලම, ආණමඩුව, නිකවැරටිය, ගල්ගමුව ආදී ප්‍රදේශවලට යන බවද හෙතෙම ප්‍රකාශ කළේය.
විල්පත්තුව ජාතික වනෝද්‍යානය, අනුරාධපුර, ‍පොළොන්නරුව, බදුල්ල හා දකුණු පළාතේ තිබෙන වනාන්තර යා කරන්න යැයි පරිසර හා සොබාදහම් අධ්‍යාපන මධ්‍යස්ථානය රජයට යෝජනා කළ බවද ඒ මහතා කීය. මෙලෙස අලිමංකඩත් නිර්මාණය කළ විට මිනිසුන්ට වන හානිය අවම වන බවද හෙතෙම පැවැසීය. 
පවතින රජය හෝ පැවැති රජය මේ සම්බන්ධව කිසිදු පියවරක් නොගැනීම හේතුවෙන් අද අලි මිනිස් ගැටුම වර්ධනය වී ඇතැයිද හෙතෙම කීය.
අලි ඝාතනය වනවාට අමතරව පන්සල්වලට පෙරහරට යැයි පවසමින් අලි විකිණීමද සිදු කරන බව කාරියවසම් මහතා කීය.
අලි හොරකම මේ වනවිට වැඩි වී ඇති බවත් දකුණු පළාතේ ඇතැම් වලව්වල අලි හංගාගෙන සිටින බවත් ඒ මහතා ප්‍රකාශ කළේය. එමෙන්ම දළදා මාලිගාවේද අලි හංගාගෙන සිටීම සිදු කරන බව කාරියවසම් මහතා කීය. අලි ජාවාරමක් සම්බන්ධව පැය 12ක හඬ පටයක් තමන් සතුව පවතින බවද එය වනජීවී අමාත්‍ය ගාමිණී ජයවික්‍රම පෙරේරා මහතාට ලබන සතිය තුළ භාරදීමට කටයුතු කරන බවද හෙතෙම කීය. අලි ජාවාරම නතර කිරීමට ඇමැතිවරයා මැදිහත් වී ඉදිරි පියවර ගත යුතු යැයිද ඒ මහතා ප්‍රකාශ කළේය.
 
තනුජා නානායක්කාර

මොළය මියගිය පුද්ගලයන්ගේ අවයව රෝගීන් සඳහා බද්ධ කිරීමේ ජාතික වැඩපිළිවෙළක් ආරම්භ කිරීමට ශ්‍රී ජයවර්ධනපුර  රෝහ‍ලේ විශේෂඥ වෛද්‍යවරුන් කණ්ඩායමක් තීරණය කර ඇත.
මෙම වැඩපිළිවෙළ යටතේ අවයව දන් දුන් පුද්ගලයන් සැමරීම සඳහා පෙබරවාරී 18 වන දින දියවන්නා අවන්හල් සංකීර්ණයේදී ආරම්භ වන පාගමන ශ්‍රී ජයවර්ධන රෝහල් පරිශ්‍රයෙන් අවසන් වීමට නියමිත බව රෝහ‍ලේ ශල්‍ය වෛද්‍ය විශේෂඥ නිරෝෂණ සෙනෙවිරත්න මහතා සඳහන් කළේය.
මෙසේ අවයව දන්දුන් පුද්ගලයන් වෙනුවෙන් ජයවර්ධනපුර රෝහල් පරිශ්‍රයේදී ඉදිකළ ස්මාරකය එදින ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් නිරාවරණය කරනු ලබන බව රෝහල් පරිශ්‍රයේදී පසුගියදා පැවැති මාධ්‍ය හමුවේදී වෛද්‍ය සෙනෙවිරත්න මහතා පැවැසීය.
අවයව ලබා දුන් පුද්ගලයන්ගේ නම් මෙම ස්මාරකය මත සටහන් කිරීම මේ වන විටත් සිදුකර ඇති අතර ඉදිරියේදීද අවයව පරිත්‍යාග කරන පුද්ගලයන්ගේ නම් මෙම ස්මාරකය තුළ සටහන් කරන බවද හෙතෙම මෙහිදී සඳහන් කළේය.
මෙදින අවයව පරිත්‍යාග කිරීම සඳහා ජනතාව දැනුවත් කිරීමේ ජාතික වැඩසටහන ආරම්භ කරන බවත් එම වැඩසටහන හරහා රෝගීන් ලියාපදිංචි කිරීම ආරම්භ කරන බවත් වෛද්‍ය සෙනෙවිරත්න මහතා පැවැසීය.
අවයව බද්ධ කළ යුතු රෝගීන් විශාල ප්‍රමාණයක් මේ වන විටත්  සිටින නමුත් ඔවුන්ට අවශ්‍ය අවයව ලබාගැනීම දුෂ්කර බැවින් එම පුද්ගලයන්ගේ ජීවිත බේරා ගැනීමට නොහැකි තත්ත්වයක්  උද්ගත වී ඇතැයිද මෙහිදී වෛද්‍ය සෙනෙවිරත්න මහතා කීවේය.
මොලොවට බිහිවී මිනිත්තු කීපයක් ගත වූ පසුව සිට මිය යන තෙක්ම යම් පුද්ගලයෙකුට අවයව දන්දීමේ හැකියාව පවතී.
මොළය මියගිය පුද්ගලයෙකුගෙන් අවයව අටක් පැය තුනක් ඇතුළත දී ලබා ගත යුතු වන අතර ඊට අමතරව පටක වර්ග වන අස්ථි, ‍ලේ නහර ද ලබා ගත හැකිය.  මෙසේ අවයව දන් දිය හැකි වන්නේ එම පුද්ගලයා යම් රෝගී තත්ත්වයකින් හෝ හදිසි අනතුරකට ලක්ව මියගිය පසු පැය තුනක් ඇතුළත අවයව ඉවත්් කර ගතහොත් පමණි.
එය කළ හැකිවෙන්නේ එම පුද්ගලයාගේ මොළය මිය ගිය සැණින්ම ඔහු යන්ත්‍රවලට සම්බන්ධ කරමින් කෘත්‍රීම ස්වසනය ලබා දීම හා හෘදයට රුධිරය ලබා දීම නොකඩවා සිදු කිරීමෙන් බවද වෛද්‍ය සෙනෙවිරත්න මහතා කීවේය.
අවයව බද්ධ කිරීමේ ජාතික වැඩසටහනට දායකත්ව ලබාදෙන අවයව බද්ධ කිරීමේ විශේෂඥ වෛද්‍ය කණ්ඩායමේ මාධ්‍ය හමුවට එක් වූ නිර්වින්ද  විශේෂඥ වෛද්‍ය ශර්මිලා පිළිමතලාව, වකුගඩු රෝග හා විශේෂ වෙද්‍ය චූලා හේරත්, වකුගඩු රෝග පිළිබඳ ශල්‍ය වෛද්‍ය චින්තක ගලහිටියාව, අවයව බද්ධ කිරීම පිළිබඳ ශල්‍ය වෛද්‍ය නිරෝෂන් සෙනෙවිරත්න, අක්මාව බද්ධ කිරීම පිළිබඳ විශේෂ වෛද්‍ය රොමේෂ් සිරිවර්ධන, හෘද ශල්‍ය වෛද්‍ය රජිත සිල්වා යන මහත්ම මහත්මීහු ඡායාරූපයේ සිටිති.

ශ්‍රියානි විජේසිංහ

IMAGE

සංසාර සිහිනයේ ගී සංකල්පනය මම 'ටැබ් එකේ ටයිප් කරපු' එකක්

IMAGE 2018 Feb 21 12:00
සනුක වික්‍රමසිංහ ගායනා කරන “සංසාර සිහිනේ” කලක පටන් බොහෝ ගීත දර්ශකවල පෙරමුණ ගෙන තිබෙන...
Views - 2008

මම නාට්‍ය කලාවෙ ඉන්නේ ඒ ගැන තියන 'උණ' නිසයි

IMAGE 2018 Feb 21 11:53
වේදිකාව, පුංචිතිරය සහ සිනමාව යන මාධ්‍ය ත්‍රිත්වයෙහිම සිය ප්‍රතිභාව ප්‍රකට කළ කලාකරුවකුවන...
Views - 1097

බිරිඳ රැකියාවක් නොකිරීම මගේ සාර්ථකවයට හේතුවක්

IMAGE 2018 Feb 20 14:38
“සිරස ජූනියර් සුපර් ස්ටාර්..” තරගය ගැන මුලින්ම අප ඔබගෙන් විමසන්න කැමතියි.. ඇත්තෙන්ම “සිරස...
Views - 5107

බිරිඳට පින් තකා සුනඛයන්ට දිනපතා සහල් කිලෝ 08ක දනක්

IMAGE 2018 Feb 20 14:23
මිනිසා තිරිසනුන් වන අවස්ථාත් තිරිසනා මිනිසුන් වන අවස්ථාත් අපට බොහෝ විට දක්නට ලැබුණද...
Views - 2938

ලංකාවේ අන්තිම රජු සැඟවූ නිධානය කෝ?

IMAGE 2018 Feb 19 11:34
මහනුවර රජ කළ රාජාධිරාජසිංහ රජුට බිසෝවරුන් කිහිප දෙනෙක්ම සිටියහ. ඔවුන් අතර අලමේලු අම්මා,...
Views - 5021

රඟපෑමෙන් සමුගත් හේතුව නදීකා කියයි

IMAGE 2018 Feb 19 10:41
“චංචල රේඛා” චිත්‍රපටයේ “දං චූටි” නාඳුනන කෙනෙක් එදා සිනමා ලෝලීන් අතර හිටියේ නැහැ....
Views - 6248

Please publish modules in offcanvas position.