Coss Ear2
lakbima.lk
COSS Ear 1

චීනයෙන් ලබා ගත් සහනදායී නොවන ණය හේතුවෙන් ශ්‍රී ලංකාවට අනවශ්‍ය පීඩනයක් එල්ලවී ඇති බව අමෙරිකා එක්සත් ජනපදය පෙන්වා දේ. චීනයෙන් ගත් මෙම ණය මුදල් හේතුවෙන්, තිරසාර නොවන ණය බරක්, ශ්‍රී ලංකාව මත පැටවී ඇති බවත්, දකුණු හා මධ්‍යම ආසියානු කටයුතු පිළිබඳ අමෙරිකානු සහකාර රාජ්‍ය ‍ලේකම් ඇලිස් වෙල්ස් මහත්මිය ප්‍රකාශ කර සිටී. 
අමෙරිකානු කොන්ග්‍රසයේ, කමිටු රැස්වීමකට එක්වෙමින් වෙල්ස් මහත්මිය මේ ප්‍රකාශ කර ඇත. 
ශ්‍රී ලංකාව මත පැටවී ඇති මෙම චීන ණය බර පිළිබඳව ශ්‍රී ලංකා  රජයේ  මෙන්ම ජනතාවගේද අවනධානය මේ වන විට යොමුව ඇති බවද වෙල්ස් මහත්මිය සඳහන් කර ඇත.
 
පැතුම් වික්‍රමරත්න 

දූෂණ චෝදනාවලට ලක් වූ කිසිවෙකුටත් එළඹෙන සියලු මැතිවරණවලදී ශ්‍රී ලංකා නිදහස් පක්ෂයෙන් නාමයෝජනා ලබා නොදීමට තම පක්ෂය තීරණය කර ඇති බව එක්සත් ජනතා නිදහස් සන්ධානයේ මහ ‍ලේකම් අමාත්‍ය මහින්ද අමරවීර මහතා පැවැසීය.
ශ්‍රී ලංකා නිදහස් පක්ෂය පිරිසිදු දේශපාලන පක්ෂයක් ලෙස ඉදිරියට රැගෙන යෑමේ ජනාධිපතිවරයාගේ වැඩපිළිවෙළ ශ්‍රී ලංකා නිදහස් පක්ෂය විසින් මෙම තීරණය ගෙන ඇත.
ඒ අනුව ඉදිරියේදී පැවැත්වෙන පළාත් පාලන මැතිවරණයේ සිට මෙම තීරණය ක්‍රියාත්මක වන බවත් මේ වනවිටත් ඉතා දක්ෂ, තරුණ, බුද්ධිමත් පිරිසක් ශ්‍රී ලංකා නිදහස් පක්ෂයෙන් එළඹෙන පළාත් පාලන මැතිවරණයට තරගවැදීමට සුදුසුකම් ලබා සිටින බවත් අමාත්‍ය මහින්ද අමරවීර මහතා පැවැසීය.
 
පානුක රාජපක්ෂ

සේවයේ අවශ්‍යතාව මත වහාම ක්‍රියාත්මක වන පරිදි උසස් ‍පොලිස් නිලධාරීන් විසිඑක් දෙනෙකුට ස්ථාන මාරු වීම් ලබා දී තිබේ. 
‍පොලිස්පතිවරයාගේ නිර්දේශය මත ජාතික ‍පොලිස් කොමිෂන් සභාවේ අනුමැතිය යටතේ මෙම මාරු වීම් ලබාදී තිබේ.
එහිදී අපරාධ පරීක්ෂණ දෙපාර්තමේන්තුවේ සිටි ‍‍‍ජ්‍යෙෂ්ඨ ‍පොලිස් අධිකාරි ජී. ශානි අබේසේකර මහතා අපරාධ පරීක්ෂණ දෙපාර්තමේන්තුවේ  අධ්‍යක්ෂ ලෙසද මතෛක් එම තනතුරේ  සිටි නියෝජ්‍ය ‍පොලිස්පති බි.ආර්.එස්.ආර්.නාගහමුල්ල මහතා ඉන් ඉවත් කර අපරාධ පරීක්ෂණ දෙපාර්තමේන්තුවේ නියෝජ්‍ය ‍පොලිස්පති ලෙසද ස්ථාන මාරු වීම් ලබා දී තිබේ.
තවද නීති, විනය හා කල්ක්‍රියා දිසාව සිටි නියෝජ්‍ය ‍පොලිස්පති කේ. අජිත් රෝහණ මහතා බස්නාහිර පළාත් උතුර දිසාව ලෙසද, දුක්ගැනවිලි දිසාව සිටි නියෝජ්‍ය ‍පොලිස්පති එම්.එච්.කේ.බි. මහගෙදර මහතා කෑගල්ල දිසාව ලෙසද, අනුරාධපුර කොට්ඨාසයේ සිටි නියෝජ්‍ය ‍පොලිස්පති එච්.ආර්.කේ. පීරීස් මහතා නීති, විනය හා කල්ක්‍රියා දිසාව ලෙසද, මහනුවර කොට්ඨාසයේ සිටි නියෝජ්‍ය ‍පොලිස්පති එම්.ඒ.ඊ. මහේන්ද්‍ර මහතා කුරුණෑගල දිසාව ලෙසද, වෛද්‍ය සේවා කොට්ඨාසයේ සිටි පී.සී. ද සිල්වා මහතා රථ වාහන දිසාව ලෙසද, අධිවේගි මාර්ග කොට්ඨාසයේ සිටි නියෝජ්‍ය ‍පොලිස්පති ජේ.අයි.ද.ඒ. ගුණතිලක මහතා දුක්ගැනවිලි දිසාව ලෙසද, මන්නාරම කොට්ඨාසයේ සිටි නියෝජ්‍ය ‍පොලිස්පති ඩී.ජේ.පලිහක්කාර මහතා අපරාධ වාර්තා දිසාව ලෙසද, ගාල්ල කොට්ඨාසයේ සිටි නියෝජ්‍ය ‍පොලිස්පති එස්.සී. ගලප්පත්ති මහතා පීරිස් හා පාලන දිසාව ලෙසද, මීගමුව කොට්ඨාසයේ සිටි නියෝජ්‍ය ‍පොලිස්පති ඩී.එම්.ඩී.ජේ.ටී.පී. දසනායක මහතා ‍පොලිස් තොරතුරු තාක්ෂණ දිසාව ලෙසද, බස්නාහිර පළාත් උතුර අපරාධ කොට්ඨාසයේ සිටි ‍පොලිස් අධිකාරි එච්. සමුද්‍රජීව මහතා කිලිනොච්චි දිස්ත්‍රික්ක 01 වෙතද, ක්‍රීඩා කොට්ඨාසයේ සිටි සහකාර ‍පොලිස් අධිකාරි ජී.එල්.ලීලාරත්න මහතා කිලිනොච්චි කොට්ඨාසය වෙතද මාරු කර තිබේ.
වව්නියාව කොට්ඨාස භාරව සිටි ‍‍‍ජ්‍යෙෂ්ඨ ‍පොලිස් අධිකාරි එම්.එන්.සිසිර කුමාර මහතා, මහනුවර කොට්ඨාසය භාර ලෙසද, තංගල්ල කොට්ඨාසය භාරව සිටි ‍‍‍ජ්‍යෙෂ්ඨ ‍පොලිස් අධිකාරි ටී.සී.ඒ.ධනපාල මහතා ‍පොලිස් මත්ද්‍රව්‍ය කාර්යාංශයේ අධ්‍යක්ෂ ලෙසද, අපරාධ කොට්ඨාසයේ අධ්‍යක්ෂව සිටි ‍‍‍ජ්‍යෙෂ්ඨ ‍පොලිස් අධිකාරි ජේ.එච්.එම්.කරුණාරත්න මහතා ‍පොලිස් වෛද්‍ය කොට්ඨාසයේ අධ්‍යක්ෂ ලෙසද, මාතර කොට්ඨාසයේ සිටි ‍පොලිස් අධිකාරි ඩබ්.වී. ගිනිගේ මහතා ගාල්ල කොට්ඨාස භාර ලෙසද, අධ්‍යක්ෂ සංවිධානාත්මක අපරාධ කොට්ඨාසයේ සිටි ‍පොලිස් අධිකාරි පී. ලියනගේ මහතා අධ්‍යක්ෂක සංවිධානාත්මක අපරාධ කොට්ඨාස ලෙසද, අගමැති ආරක්ෂක කොට්ඨාසයේ සිටි ‍පොලිස් අධිකාරී ටී.එම්.එස්.එම්. තෙන්නකෝන් මහතා වව්නියාව කොට්ඨාස භාර ලෙසද, අපරාධ පරීක්ෂණ දෙපාර්තමේන්තුවේ සිටි ‍පොලිස් අධිකාරි කේ.ජී.එල්.ගීතාල් මහතා තංගල්ල කොට්ඨාසය භාර ලෙසද, නුගේගොඩ කොට්ඨාසයේ සිටි ‍පොලිස් අධිකාරි ටී.පී. හේවාපතිරණ මහතා අනුරාධපුර කොට්ඨාස භාර ලෙසද ස්ථාන මාරු වීම් ලබා දී ඇත.
 
ශානිකා මාධවී පීරිස් 

දරුණු ලෙස වකුගඩු රෝගයෙන් පීඩා විදි රෝගියෙකු ලේ මාරු කිරීම සඳහා පැමිණ යතුරුපැදියකින් ආපසු යමින් සිටිය දී ඊයේ (09) අළුයම 1.20 ට පමණ පොලොන්නරුව ඇතුමල්පිටිය ප්‍රදේශයේ දී මෝටර්  රථයක ගැටීමෙන් යතුරු පැදියේ ගමන්ගත්වකුගඩු රෝගියා හා යතුරුපැදිකරු බරපතල තුවාල ලබා මිය යාමේ සිද්ධියක් සම්බන්ධයෙන් පොලිස් පරික්ෂණ පවත්වන අතර තුර ඊයේ (09) උදෑසන ජනාධිපති මෛත්‍රීපාල සිරිසේන මහතාගේ බාල සහෝදරයෙකු වන නැණසිරි ප්‍රඥාරත්න සිරිසේන (ලාල්)මහතා පොලිසියට පැමිණ භාර වී ඇත. සැකකරු ඊයේ (09) පොලොන්නරුව වැඩබලන මහේස්ත්‍රාත් රුවන්කුමාර මාපා මහතා වෙත ඉදිරිපත් කිරීමෙන් අනතුරුඅව හෙට (11) දක්වා රක්ෂිත බන්ධනාගාර ගත කොට තබන ලෙස නියෝග කළේ ය.

මෙසේ මියගොස් ඇත්තේ කවුඩුල්ල, පිංපාර යටියල්පතාන,අංක 2/12 හි පදිංචිව සිටිඑල්.එම්.ජේ.එම්.බුද්ධදාස (59) හා එල් .එම්.ජේ.එම්.ජයරත්න (44) යන අයයි. පොලිසිය පවසන අන්දමට බුද්ධ දාස යන අය දරුණු ලෙස වකුගඩු රෝගයෙන් පීඩාවිදින බවත් සතියකට වතාවක් පොලොන්නරුව මහ රෝහලට පැමිණ ලේ මාරු කර ගැනීම කරගන්නා බවත් මිය ගිය පැදිකරු වන ජයරත්න (44) නම් පුතු සමග එදිනද රෝහලට පැමිණ ලේ මාරු කරගෙන ආපසු නිවසට යමින් සිටිය දී මෝටර්  රථයක් තම යතුරු පැදියහප්පාගෙන පළා ගිය බවත් බරපතල ලෙස තුවාල ලබා රෝහල් ගත කළ ජයරත්න යන අය පවසා තිබේ. කෙසේ වෙතත් තුවාල කරුවන් දෙදෙනාම දරුණු තුවාල තත්ත්වයන් හේතුවෙන්මියගිය බව රෝහල් ආරංචි මාර්ග සදහන් කරයි.

සිද්ධිය සම්බන්ධයෙන් වැඩි දුර පරික්ෂණ උතුරු මැද පළාත් නියෝජ්‍ය පොලිස්පති එල්.පි..එස්.පී.සදුන්ගහවත්ත මහතාගේ උපදෙස් පරිදි පොලොන්නරුව ජ්‍යෙෂ්ඨ පොලිස් අධිකාරි ලක්සිරි විජේසේන මහතාගේ මෙහෙයවීමෙන් පොලොන්නරුව මූලස්ථාන පොලිසියේ ස්ථානාධිපති මු.පො.ප.එම්.එස්.එම් ජරූල් මහතා ගේ ප්‍රධානත්වයෙන් සිදු කෙරේ.

2019 වසරෙන් පසු ලංකාවට ලෝක බැංකුවෙන් හෝ ආසියානු සංවර්ධන බැංකුවෙන් සහනාධාර නොලැබෙන බවට දැනුම්දී ඇති බව අගමැති රනිල් වික්‍රමසිංහ මහතා පාර්ලිමේන්තුවේදී ප්‍රකාශ කළේය. ඉන් පසුව එළැඹෙන තත්ත්වයට රට මුහුණදෙන ආකාරය සම්බන්ධයෙන් පාර්ලිමේන්තුවේ සියලු දේශපාලන පක්ෂ සමග සාකච්ඡා කොට සැලසුම් හැදීමට තමා බලා‍පොරොත්තු වෙන බවද අගමැතිවරයා සඳහන් කළේය.
අගමැතිවරයා මේ බව සඳහන් කළේ අධිවේගී මාර්ග සම්බන්ධයෙන් පාර්ලිමේන්තුවේදී විශේෂ ප්‍රකාශයක් කරමිනි. මධ්‍යම අධිවේගී මාර්ගයේ ඉදිකිරීම් කොන්ත්‍රාත්තුව සඳහා කැබිනට් අනුමැතිය ලද ජපානයේ ටයිසෙයි සමාගම මුලින් ඉදිරිපත් කළ මිලට වඩා බිලියන 25ක් අඩුවෙන් එම ව්‍යාපෘතිය ලබාදීමට හැකිවූ බවද රනිල් වික්‍රමසිංහ මහතා කීවේය.

 ලසන්ත වීරකුලසූරිය

ශ්‍රී ලංකා නිදහස් පක්ෂය ඉදිරියේදී පැවැත්වෙන මැතිවරණවලදී සුළු ජාතීන් නියෝජනය කරන දේශපාලන පක්ෂ සමග සන්ධාගත වී එක්සත් ජනතා නිදහස් සන්ධානයේ “බුලත් කොළය"ලකුණින් තරග කිරීමට සාකච්ඡා ආරම්භ කර ඇතැයි එම පක්ෂ අභ්‍යන්තර ආරංචි මාර්ග සඳහන් කරයි.
කඳුකරය නියෝජනය කරන දෙමළ දේශපාලන පක්ෂත්, නැගෙනහිර පළාත නියෝජනය කරන මුස්ලිම් දේශපාලන පක්ෂත් සමග මේ සම්බන්ධයෙන් දැනටමත් සාකච්ඡා ආරම්භ කර ඇතැයි එම ආරංචිමාර්ග  සඳහන් කළේය.
දෙමළ හා මුස්ලිම් දේශපාලන පක්ෂ ජනාධිපති මෛත්‍රීපාල සිරිසේන මහතා සම්බන්ධයෙන් මේ වන විට තබා ඇති විශ්වාසය හේතුවෙන් කොන්දේසි විරහිතව මේ සඳහා එකඟ කර ගැනීමට හැකිවනු ඇතැයි ශ්‍රී ලංකා නිදහස් පක්ෂය විශ්වාස කරන බවද එම ආරංචිමාර්ග වැඩිදුරටත් අනාවරණය කළේය.

කමණි හෙට්ටිආරච්චි

2017 වර්ෂය වෙනුවෙන් වත්කම් බැරකම් ප්‍රකාශ  ලබාදුන් ඇමැතිවරුන් හා මන්ත්‍රීවරුන්ගේ නාම ‍ලේඛනයක් ප්‍රසිද්ධියට පත් කරන බව කථානායක කරු ජයසූරිය මහතා පාර්ලිමේන්තුවේදී ප්‍රකාශ කළේය.
මන්ත්‍රීවරුන්ගේ වත්කම් බැරකම් ප්‍රකාශ පාර්ලිමේන්තුවටද ඇමැතිවරුන්ගේ වත්කම් බැරකම් ප්‍රකාශ ජනාධිපති ‍ලේකම් කාර්යාලයට ලබාදෙන බව කී කථානායකවරයා සියලු දෙනාම පාර්ලිමේන්තු මන්ත්‍රීවරුන් බැවින් ජනාධිපති කාර්යාලයෙන්ද තොරතුරු ගෙන තොරතුරු ලබා දුන් සියලු දෙනාගේම වත්කම් බැරකම් ප්‍රසිද්ධියට පත් කරන බව කීවේය.
ක්‍රිඩා ඇමැති දයාසිරි ජයසේකර, ධීවර හා ජලජ සම්පත් ඇමැති මහින්ද අමරවීර, විපක්ෂයේ ප්‍රධාන සංවිධායක අනුර කුමාර දිසානායක, රවි කරුණානායක, බන්දුල ගුණවර්ධන යන මහත්වරුන් විසින් වත්කම් බැරකම් ප්‍රකාශ දුන් මැති ඇමැතිවරුන්ගේ ලැයිස්තුව ප්‍රසිද්ධ කරන ලෙස කළ ඉල්ලීමට පිළිතුරු දෙමින් කථානායකවරයා එසේ කීය.
ආණ්ඩු පක්ෂයේ හා විරුද්ධ පක්ෂයේ සැලකිය යුතු පිරිසක් වත්කම් බැරකම් ප්‍රකාශ ලබාදී ඇති බවත් මන්ත්‍රීවරු නව දෙනෙකු පමණක් වත්කම් බැරකම් ප්‍රකාශ ලබාදුන් බවට මාධ්‍යයක පළවූ පුවත අසත්‍යයක් බවත් කථානායක කරු ජයසූරිය මහතා ප්‍රකාශ කළේය.
දයාසිරි ජයසේකර හා මහින්ද අමරවීර යන ඇමැතිවරුන් කීවේ මේ නිසා ජනතාව අතර වැරදි මතයක් ගොඩනැගී ඇති බැවින් මාධ්‍ය හරහාම වත්කම් බැරකම් දුන් මන්ත්‍රී නාම ‍ලේඛනය ප්‍රසිද්ධ කරන ලෙසයි.

ලසන්ත වීරකුලසූරිය

ලබන 18 වෙනිදා සිට බත්තරමුල්ල ප්‍රදේශයේ රාජ්‍ය සේවා නිලධාරීන්ට උදෑසන 7.30 සිට 9.15 දක්වා ඕනෑම වෙලාවක සේවයට වාර්තා කිරීමට ඉඩ ලැබෙන බව රාජ්‍ය පරිපාලන අමාත්‍යංශයේ ලේකම් ජේ.ජේ රත්නසිරි මහතා ප්‍රකාශ කරයි.

ඒ අනුව ඔවුන් සේවයට වාර්තා කළ වේලාව අනුව පස්වරු 3.15 සිට 5.30 දක්වා සේවය අවසන් කර කාර්යාලයෙන් නික්මයාමේ අවස්ථා‍ව හිමිවනු ඇත. කෙසේ නමුත් සියලුම රාජ්‍යසේවකයින් පෙරවරු 9.15 ත් , 3.15 ත් අතර අනිවාර්යයෙන් කාර්යාලයේ රැඳී සිටිය යුතු බව ඒ මහතා දන්වා සිටී.

දැනට උදෑසන පවතින මාර්ග තදබදයට පිළියමක් වශයෙන් මෙම පියවර  නියාමන ව්‍යාපෘතියක් වශයෙන් රාජ්‍යායතන රාශියක් පිහිටි බත්තරමුල්ල ආශ්‍රිතව ක්‍රියාත්මක වන අතර පසුව එය සෙ‍සු ප්‍රදේශව වල රාජ්‍ය ආයතන දක්වාද ව්‍යාප්ත කෙරෙනු ඇත.

 

ඒ.ජී.රේණුකා{jcomments on}

අපරාධ පරීක්ෂණ දෙපාර්තමේන්තුවේ (CID) නව අධ්‍යක්ෂ ලෙස ජ්‍යෙෂ්ඨ පොලිස් අධිකාරී ශානි අබේසේකර මහතා පත්කොට තිබේ.

ඒ ජාතික පොලිස් කොමිෂන් සභාවේ තීරණයකට අනුවය. රෝයල් පාක් ඝාතනය, උඩතලවින්න ඝාතනය, කෝටිදෙකේ මංකොල්ලය, අඟුලාන ද්විත්ව මිනී මරුම, මොහොමඩ් ශියාම් ඝාතනය ආදී අපරාධ සම්බන්ධ රහස් පොලිස් පරීක්ෂණ රැසක් මෙහෙයවා අපරාධ කරුවන් නීතියේ රැහැනට හසුකර ගැනීමට ඔහු සමත් වී ඇත. ඊට අමතරව ප්‍රදීප් එක්නැලිගොඩ පැහැර ගැනීම, ලසන්ත වික්‍රමතුංග ඝාතනය ආදී සාපරාධී ක්‍රියා සම්බන්ධ විමර්ශන කටයුතු වල ප්‍රධානියා ලෙස කටයුතු කරනුයේ ඔහුය.

මොහොමඩ් ශියාම් ඝාතනය සම්බන්ධයෙන් මරණ දඬුවමට නියමව සිටින හිටපු නියෝජ්‍ය පොලිස්පති වාස් ගුණවර්ධන මහතා විසින් ශානි අබේසේකර මහතාට පසුගිය කාලයේ මරණ තර්ජන පවා එල්ල වූ බව අධිකරණයේ දී ප්‍රකාශ වී ඇත.

දැනට පුරප්පාඩු වී ඇති අපරාධ පරීක්ෂණ දෙපාර්තමේන්තුවේ අධ්‍යක්ෂ ධූරය සඳහා ජ්‍යෙෂ්ඨ පොලිස් අධිකාරී මෙවන් සිල්වා මහතා පත් කරන ලෙස පොලිස්පතිවරයා නි‍ර්දේශ කොට ඇතත් ශානි අබේසේකර මහතා එම තනතුරට පත් කොට ඇත්තේ ජාතික පොලිස් කොමිෂම සතු බලය ක්‍රියාත්මක කරමිනි.

එස්.ටී.පී සිල්වා{jcomments on}

-----------------------------------------------------------------

ශානි අබේසේකර පිළිබලඳව 2016 ජනවාරි 24 වෙනිදා ඉරිදා ලක්බිම පුවත්පතේ පළ වූ ලිපියක්

සර් ආතර් කොනන් ඩොයිල්ගේ ත්‍රාසය භීතිය කුතුහලය පිරී ගිය රහස් පරීක්ෂක කතා පෙළේ කතානායකයා ෂර්ලක් හෝම්ස්ය. ෂර්ලක් හෝම්ස්ගේ වැනි කතා ලියන ලංකාවේ පුවත්පත් කලාවේදීන්ට නිතැතින්ම සිහිවන නමක් ඇත්තේය.  ඔහු ශානි අබේසේකර ය. අපරාධ පරීක්ෂණ දෙපාර්තමේන්තුවේ සිටින නොම්බර එකේ රහස් පරීක්ෂකවරයා ලෙස ගරු සම්භාවනාවට පාත්‍රව සිටින ඔහු මෙකල රටේ නිතර කියැවෙන නමකි. ‍පොලීසියේ, පත්තරවල පමණක් නොව දේශපාලන වේදිකාවේද ඔහුගේ නම දැන් කියැවෙන්නට පටන් ගෙන තිබේ.

මෑත ඉතිහාසයේ ආන්දෝලනයට තුඩුදුන් යම් අපරාධයක් වෙතොත් ඒ සියලු අපරාධ විමර්ශනයන්ට නායකත්වය දී ඇත්තේද ශානි අබේසේකරය. ඒ සෑම අපරාධකරුවෙක්ම ගියේ එල්ලුම්ගහටය. සහකාර රේගු අධිකාරී සුජිත් ප්‍රසන්න ඝාතනය, රෝයල්පාක් හි සුරූපී තරුණියගේ ඝාතනය, අඟුලාන ඝාතනය, සියාම් ඝාතනය, හසිත මඩවල ඝාතනය, චන්ද්‍රිකා ජනාධිපතිනියට පුරහල් භූමියේදී එල්ලවුණූ මරාගෙන මැරෙන ප්‍රහාරය, හිටපු ආරක්ෂක ‍ලේකම් ගෝඨාභය රාජපක්ෂ මහතාට පිත්තල හන්දියේදී එල්ලවුණු මරාගෙන මැරෙන ප්‍රහාරය, කැලණි තිස්ස විදුලිබලාගාරයට එල්ලවුණු ප්‍රහාරය,  ආදී රටේ මහත් ආන්දෝලනයට තුඩුදුන් ඝාතන සහ අපරාධ රැසකම විමර්ශන නිලධාරියා වූයේ ශානි අබේසේකරය. අඟුලාන ඝාතනයේ චෝදනා එල්ලවන්නේ ‍පොලිස් ස්ථානාධිපතිවරයෙක් ඇතුළු ‍පොලිස් කණ්ඩායමකටය. සියාම් ඝාතනයේ චෝදනා එල්ලවන්නේ නියෝජ්‍ය  පොලිස්පති වාස් ගුණවර්ධන ඇතුළු ‍පොලිස් කණ්ඩායමකටය. තමාගේ උසස් නිලධාරීන් පවා ‍පෝරකයට යැවීමට පාර කැපුවේ ඔහුය.

නීතිය නිසි ලෙස නීතියට අනුකූලව ඉටුකිරීම ඔහුගේ ප්‍රතිපත්තියයි. ‍පොලිස් නිලධාරියෙක් ලෙස ඔහු තමන්ට පැවරුණු රාජකාරිය ඉටුකරන්නේ දේවකාරියකටත් වඩා උසස් කාර්යක් සේ සලකාය. ඒ බව කියන්නේ අප පමණක් නොව. ‍පොලිස් දෙපාර්තමේන්තුවේ බහුතරයකගේ අදහසය. යම් විමර්ශනයක් ශානි අබේසේකරට දුන් විට ඒ අය සඳහන් කරන්නේ වැඩේ හරියට කෙරේවි යැයි කියාය. ඒ තරමට ශානි ගැන ඇත්තේ දැඩි විශ්වාසයකි.

ශානි අබේසේකර නම් මෙම ‍පොලිස් නිලධාරියා ගැන මෙවන් සටහනක් තැබිමට සිදුවන්නේ ඔහු පිළිබඳ හටගෙන ඇති ආන්දෝලනය නිසාය.

එසේ ශානි අබේසේකර නම් වූ මේ නිලධාරියා ආන්දෝලනයට ලක්වන්නේ  වෙන කිසිවක් නිසා නොව. නිදහස් මාධ්‍යවේදියෙක් ලෙස කටයුතුකරමින් සිටි ප්‍රගීත් එක්නැලිගොඩ අතුරුදන්වීමට අදාළව කෙරෙන විමර්ශනවල ප්‍රතිඵලයක් ලෙස සැකපිට හමුදාවේ බුද්ධිඅංශ සාමාජිකයන් කිහිප දෙනෙක් අත්අඩංගුවට ගැනීම  නිසාය.

මාධ්‍යවේදී ප්‍රගීත් එක්නැලිගොඩගේ අතුරුදන්වීම මෛත්‍රි ආණ්ඩුව බලයට පත්වන තුරුම පැවැතියේ අභිරහසක් ලෙසිනි. එකල නීතිපතිවරයෙක් මෙන්ම පසුකලක අගවිනිසුරු වූ මොහාන් පීරිස් ජිනීවා මානව හිමිකම් කවුන්සලයේදී පවා පවසා තිබුණේ ප්‍රගීත් පිට රටක ජීවත්ව සිටින බවට තොරතුරු ඇති බවය. ඔහු එදා ඒ කීවේ තම මතය නොව. එකල රජයේ ප්‍රකාශයකි.

ප්‍රගීත් එක්නැලිගොඩ සම්බන්ධයෙන් එදා ඒ කී දෑ සියල්ලක්ම අතේ රෝල් බවට පත්වන්නේ මෛත්‍රී  ආණ්ඩුව ප්‍රගීත් එක්නැලිගොඩගේ අතුරුදන්වීම මෙන්ම ආන්දෝලනයට තුඩුදුන් ඝාතන ගොන්නකම විමර්ශන නැවත මුලසිට පටන් ගැනීමත් සමගය. පැහැර ගැනීමක් සිදුවුණු බවට රඟපෑමක්කර ප්‍රගීත් එක්නැලිගොඩ රටින් පැනගත් බවට එකල ආණ්ඩුවේ ඇතැම් දේශපාලනඥයන් මෙන්ම ආරක්ෂක අංශයේ ඇතැම් පිරිස් රටේ ජනතාව අතර මැවූ චිත්‍රය බොඳවන්නට පටන් ගන්නේ ඒ සමගය.

ප්‍රගීත් රටින් පලානොගිය බවත් ඔහුව යුද හමුදාවේ සන්නද්ධ බුද්ධි අංශ කණ්ඩායමක් විසින් පැහැරගත් බවත් පසුව ඔහුව අතුරුදන්කර ඇති බවත් දැන් පැහැදිලිවම සාක්ෂි සහිතව අනාවරණය වී හමාරය. එකී විමර්ශන හරහා ප්‍රගීත් එක්නැලිගොඩගේ අතුරුදන්වීම පමණක් නොව. දෙහිවලදී ඝාතනය වූ නිදහස් මාධ්‍යවේදී සම්පත් ලක්මාල්ගේ ඝාතනයේ අභිරහසද විසදෙමින් තිබිම විශේෂිතය.

දෙමළ ජාතික සන්ධානයේ යාපනය දිස්ත්‍රික් පාර්ලිමේන්තු මන්ත්‍රී නඩරාජා රවිරාජ් නාරාහේන්පිටදී වෙඩි තබා ඝාතනය කිරීමේ විමර්ශනයන්ද නැවත ඇරඹෙන්නේ ද ප්‍රගීත් එක්නැලිගොඩ අතුරුදන්වීමේ විමර්ශනයන්ට සමගාමීවය. රවිරාජ් මන්ත්‍රීවරයාගේ ඝාතනය සම්බන්ධයෙන් විමර්ශනයන් පැවැත්වීමට ස්කොඩ්ලන්යාඩ් ‍පොලීසියේ සහය පවා එකල මහින්ද රාජපක්ෂ ආණ්ඩුව ගත් බව මෙහිදී අමතක නොකළ යුතුය. ඒ අනුව ස්කොඩ්ලන්යාඩ් ‍පොලීසියේ කණ්ඩායමක්ද මෙහි පැමිණ විමර්ශනයක් පැවැත්වීම විශේෂත්වයකි. ලෝකයේ හොඳම අපරාධ විමර්ශකයන් බව කියන ස්කොඩ්ලන්යාඩ් ‍පොලීසිය මෙහි ආවත් රවිරාජ් මන්ත්‍රීවරයාගේ ඝාතන අභිරහස ඒ අයටද විසඳන්නට නොහැකි විය.

එසේම එකල මහත් ආන්දෝලනයට තුඩුදුන් තවත් ඝාතනයක් වූයේ දෙමළ ජාතික සන්ධානයේ මඩකලපුව දිස්ත්‍රික් මන්ත්‍රී ජෝෂප් පරරාජසිංහම් මන්ත්‍රීවරයාගේ ඝාතනයයි. නත්තල් දේව මෙහෙයට සහභාගිවෙමින් සිටියදී ඔහුව ඝාතනය කෙරෙන්නේ දේවස්ථානය තුළදීමය.

මෙතෙක් කලක් අභිරහස් ඝාතන ලෙස සටහන්ව තිබුණු මෙම ඝාතන මෙන්ම ප්‍රගීත් එක්නැලිගොඩ අතුරුදන්වීමේ විමර්ශන ජනපති මෛත්‍රීපාල සිරිසේනගේ නියෝගයෙන් ‍පොලිස්පති එන්.කේ. ඉලංගකොන් විසින් පවරනු ලබන්නේ අපරාධ පරීක්ෂණ දෙපාර්තමේන්තුවටය. එහිදී අපරාධ පරීක්ෂණ දෙපාර්තමේන්තුවේ බලධාරීන් එකී විමර්ශන කටයුතුවල ප්‍රධානියා ලෙස පත්කරන්නේ සහකාර ‍පොලිස් අධිකාරී ශානි අබේසේකරය. ශානි අබේසේකරට පහර පිට පහර ගසන්නට පටන් ගැනෙන්නේ කිසිදිනක විසඳිය නොහැකි බවට සිතාගෙන සිටි එම අභිරහස් ඝාතන ඔහුගේ නායකත්වයෙන් අපරාධ පරීක්ෂණ දෙපාර්තමේන්තුවේ විමර්ශන කණ්ඩායම සාක්ෂිද සහිතව අනාවරණය කරගනිමින් ඒවාට වගකිව යුත්තන් එකිනෙකා අත්අඩංගුවට ගැනීමට පටන් ගැනීමත් සමගය.

ඒ අනුව  රවිරාජ්  මන්ත්‍රීවරයාගේ ඝාතනය ජෝෂප් පරරාජසිංහම් මන්ත්‍රී වරයාගේ ඝාතනයට ප්‍රගීත් එක්නැලිගොඩ අතුරුදන්කිරීමට සම්බන්ධවූවන්ද අපරාධ පරීක්ෂණ දෙපාර්තමේන්තුවේ අත්අඩංගුවට පත්ව හමාරය. එකී ඝාතන සහ අතුරුදන් කිරීම් සම්බන්ධයෙන් මේ වන විට අත්අඩංගුවට පත්ව සිටින සහ චෝදනා එල්ලවන සියලුදෙනාම පාහේ හමුදා බුද්ධි අංශයේ සාමාජිකයන්ය. ඒ අය අතර හමුදා බුද්ධි අංශයට එක්වූ එල්.ටී.ටී.ඊයෙන් කැඩි වෙන්වූ කරුණා පාර්ශ්වයේ මෙන්ම පිල්ලෙයාන් පාර්ශ්වයේ අයද නැතුවා නොවේ. නැගෙනහිර පළාත් මහ ඇමැතිවරයාව සිටි පිල්ලෙයාන්ද ඇත්තේ එසේ අත්අඩංගුවට පත්වූවෙක් ලෙසිනි. ඔහු සහ ඔහුගේ ගෝලබාලයන්ට එල්ලවී ඇති චෝදනාව වන්නේ ජෝසප් පරරාජසිංහම් ඝාතනයයි. එකී ඝාතනයට හමුදා බුද්ධි අංශයේ සම්බන්ධයක් පවා හෙළිවී ඇති අතර ඝාතනයට යොදා ගත් ආයුධය සම්බන්ධයෙන්ද චෝදනාව ඇත්තේ යුද හමුදා බුද්ධි අංශය වෙතය.

විමර්ශන වලින් අනාවරණය වී ඇති ආකාරයට අනුව ජෝෂප් පරරාජසිංහම් මන්ත්‍රීවරයා ඝාතනය වන්නේත් ඔහුව මරා දැමීමට සැලසුම්කර ඇත්තේත් ඔහු ජාතික ආරක්ෂාවට තර්ජනයක් වූ පුද්ගලයෙක් ලෙස ජාතික ආරක්ෂාව වෙනුවෙන් ගන්නා තීරණයක් නිසා නොවේ. විමර්ශනවලින් අනාවරණය වී ඇති ආකාරයට අනුව එය හුදෙක් දේශපාලනික අවශ්‍යතාවක් මත සිදුවූවකි. ඒ සම්බන්ධයෙන් බොහෝ කරුණු කාරණා ඉදිරියේදි අධිකරණයේදී දිග හැරෙනු ඇත.

එසේම කොළඹ නාරාහේන්පිටදී නඩරාජා රවිරාජ් මන්ත්‍රීවරයාව මරා දැමීම මුළු මනින්ම සැලසුම් කළායැයි අනාවරණය වන්නේ හමුදා බුද්ධි අංශයේ සැලසුමකට අනුවය. ඒ අතරද කරුණා සහ පිල්ලෙයාන් කණ්ඩායම් සහ සාමාජිකයන් සහ හමුදා බුද්ධි අංශ සමග එක්ව සිටි කිහිප දෙනෙක්ම මෙන්ම ‍පොලීසියේ අයද  සිටීම විශේෂිතය. ඒ අයද දැන් අපරාධ පරීක්ෂණ දෙපාර්තමේන්තුවට කොටුවී හමාරය. එකී ඝාතන විමර්ශනයේ අතුරු ප්‍රතිඵලයක් ලෙස කොළඹදී ව්‍යාපාරිකයන්ගේ දරුවන් පැහැරගෙන ගොස් කප්පම් ලබාගෙන එම දරුවන් ඝාතනය කර මළ සිරුරු මුහුදේ ගිල්ලා අතුරුදන් කිරීම්ද අනාවරණය වෙමින් පැවතීම විශේෂිතය. මේ වන විට රවිරාජ් මන්ත්‍රීවරයාගේ ඝාතනය සම්බන්ධයෙන් අධිකරණයේ සාක්ෂි විභාගය ආරම්භවී ඇති අතර ළඟදීම සෙසු ඝාතන සම්බන්ධයෙන්ද සාක්ෂි විභාගවනු ඇත. එකී ඝාතනයන් සිදුකරනු ලැබුවේ ජාතික ආරක්ෂාව වෙනුවෙන්ද නැතිනම් වෙනත්  කාගේ උවමනාවකටදැයි දැනට අත්අඩංගුවේ පසුවන හමුදා බුද්ධි අංශ සාමාජිකයන් මෙන්ම කරුණා සහ පිල්ලෙයාන් පාර්ශ්වයන්ට සම්බන්ධවූවෝ හෙළිකරනු ඇත.

මේවා  අතරින් ශානි අබේසේකරට එරෙහිව දැඩිව ප්‍රහාර එල්ලවන්නේ ප්‍රගීත් එක්නැලිගොඩ ඝාතන විමර්ශනයට අදාළවය.

මේ වන විට ප්‍රගීත් එක්නැලිගොඩ පැහැර ගැනීමේ සිට අතුරුදන් කරවීම දක්වා වූ ඒ සෑම කටයුත්තකටම සම්බන්ධවූවන් අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන හමාරය. හමුදා බුද්ධි අංශයේ පමණක් හය දෙනෙක් ඒ අතර සිටිති. පැහැර ගැනීම සැලසුම් කිරීමේ අවස්ථාවේ සිට අතුරුදන් කිරීම දක්වා ඒ අය සම්බන්ධවන ආකාරය ගැන විද්‍යාත්මක සාක්ෂිද අඩුවක් නොමැතිව රැස්කර ගැනීමට අපරාධ පරීක්ෂණ දෙපාර්තමේන්තුව සමත්ව ඇත. එක්නැලිගොඩව පැහැර ගන්නේ ඔහු එල්.ටී.ටී.ඊ.ය සමග සම්බන්ධකම් පැවැත්වීම හේතුවෙන් බව එකී බුද්ධි අංශ සාමාජිකයන් ප්‍රශ්න කිරීම් හමුවේ සඳහන් කර ඇතත් පසුව ඒ අයගේම සාක්ෂි සහ ප්‍රකාශවලින් තහවුරුවී ඇත්තේ යැයි සඳහන් වන්නේ එවකට පැවැති මහින්ද රාජපක්ෂ පාලනයට එරෙහිව ඔහු විසින් ලියන ලද ‍පොතක් හා එකල ජනාධිපති අපේක්ෂකයෙක්වූ ෆීල්ඩ් මාර්ෂල් සරත් ෆොන්සේකාට සහයක් ලෙස ලියූ පැවැති ආණ්ඩුව විවේචනයකර සකස්කළාවූ විරිඳු තැටියක් ගැනය. ජාතික ආරක්ෂාව සම්බන්ධයෙන් කිසිදු ප්‍රශ්න කිරීමක් හෝ ඔහු සහ එල්.ටී.ටී.ඊ.ය අතර තිබුණේ යැයි සඳහන් සම්බන්ධකම් ගැන ප්‍රශ්න කළ බව කිසිවක් අනාවරණය වන්නේ නැත. එසේම ප්‍රගීත්ගෙන් එසේ ප්‍රශ්න කරන්නේ ගිරිත‍ලේ පිහිටි 3 වැනි සන්නද්ධ බුද්ධි අංශ කඳවුරේ තබාගෙනය. ප්‍රගීත්ව එම කඳවුරට ගෙන ආ බව මෙන්ම ඔහුගෙන් ප්‍රශ්න කළ බවට ඇතැම් බුද්ධි නිලධාරීන් තැබූ සටහන් ‍පොත්ද දැන් ඇත්තේ අපරාධ පරීක්ෂණ දෙපාර්තමේන්තුවේය. එහෙත් ඔහු සහ එල්.ටී.ටී.ඊ.ය අතර යම් සම්බන්ධතාවක් තිබුණේ නම් ඒ බව සඳහන් කිසිදු ලියැවිල්ලක් මතෛක් හමුදාව අපරාධ පරීක්ෂණ දෙපාර්තමේන්තුවට ලබාදී නොතිබිමද විශේෂිතය.

ප්‍රගීත් පැහැර ගැනීම සහ අතුරුදන් කිරීම සම්බන්ධයෙන් අත්අඩංගුවට ගැනුණු යුද හමුදා බුද්ධි අංශ සාමාජිකයන් අතර බුද්ධි අංශයේ ලුතිනන් කර්නල්වරුන් දෙදෙනෙක් සිටිති.

අපරාධ පරීක්ෂණ දෙපාර්තමේන්තුව පැත්තෙන් දැනගන්නට ඇති ආකාරයට අනුව ප්‍රගීත්ගේ අතුරුදන්කරවීම සම්බන්ධයෙන් මිස ඔවුන් ඊට පෙර රටේ ආරක්ෂාව වෙනුවෙන් කළ කිසිදු මෙහෙයුමක් හෝ ඊට අදාළ ‍ලේඛනයක් විමර්ශන නිලධාරීන් විමසා හෝ ඉල්ලා නැත. දිගින් දිගටම ප්‍රශ්නකර ඇත්තේ ප්‍රගීත්ව පැහැර ගත්තේ කාගේ උවමනාවකටදැයි කියාය. දෙබරයකට ගල් ගැසුවාක් මෙන් යම් කණ්ඩායමක් ඇවිස්සෙන්නේ එවිටය.

දැනගන්නට ඇති ආකාරයට මේ වන විට ප්‍රගීත්ව පැහැර ගැනීමට නියෝග සහ උපදෙස් ලැබුණේ කාගෙන්දැයි අපරාධ පරීක්ෂණ දෙපාර්තමේන්තුව අනාවරණය කරගෙන හමාරය. ඉදිරියේදි ප්‍රගීත්ගේ අතුරුදන්වීම සම්බන්ධයෙන් කෙරෙන නඩු විභාගවලදී ඒ සියල්ලම සමග ගිරිත‍ලේ හමුදා කඳවුරු භූමියේ බුද්ධි අංශයේ කෝප්‍රල්වරයෙක්ව මරා ත්‍රිරෝද රථයත් සමග වළ දැමීමක්ද හෙළිදරව් වනු ඇත.

ආජන් ප්‍රේමකුමාර නමැති එම කෝප්‍රල්වරයාව ‍පොළොන්නරුවේ ගල්ලෑල්ල ප්‍රදේශයේදී 2007 වසරේ ජුනි 19 වෙනිදා පැහැරගෙන විත් මරා ත්‍රිරෝද රථය සමග වළදමා ඇති බව සඳහන්ය. යුද හමුදා බුද්ධි අංශයටම සම්බන්ධ එම කෝප්‍රල්වරයාව මරා දමන්නේ ඔහු ජාතිද්‍රෝහියෙක් හෝ පාවා දෙන්නෙක් වූ නිසා නොවේ. අනාවරණය වී ඇති ආකාරයට අනුව බුද්ධි අංශයේ දැනට අත්අඩංගුවේ සිටින ‍‍‍ජ්‍යෙෂ්ඨ නිලධාරියෙකුගේ බිරිඳක් සමග අනියම් ඇසුරක් එම කෝප්‍රල්වරයා පැවැත්වූ බවට සැකකරමිණි. එකී අතුරුදන්වීම ගැන පරීක්ෂණ පැවැත්වූ ‍පොලිස්  පරීක්ෂකවරයෙක්ද පසුව අභිරහස් ලෙස වෙඩිතබාගෙන මිය යන අතර ඒ සම්බන්ධයෙන්ද දැන් විමර්ශනයක් ආරම්භවී ඇත්තේ එය වෙඩි තබා ගැනීමක්ද ඝාතනයක්ද යන්න සෙවීමටය.

බුද්ධි අංශයේ රාජකාරිවලට මුවා වෙමින් කළා වූ මෙවන් අපරාධ එකිනෙක හෙළිදරව්වන විට එකී විමර්ශන භාරව ක්‍රියාකරන ශානි අබේසේකර වැනි නිලධාරීන් ජාති ද්‍රෝහීන් කිරීම සැබැවින්ම සාධාරණදැයි ප්‍රශ්න නැගිය යුතුය. ශානි අබේසේකර යනු යුද්ධය දරුණුවටම පැවැති 1985 සිට 1995 දක්වා වූ කාලය තුළ ‍පොලිස් විශේෂ කාර්ය බළකායේ සිටි යුද්ධයට සක්‍රියව දායකත්වයක් සපයන ලද නිලධාරියෙක් බව මෙහිදී අමතක නොකළ යුතුය. එල්.ටී.ටී.ඊ අඩවියට රිංගා ප්‍රහාර එල්ලකර ඇති ඔහු බුද්ධි අංශයේ රාජකාරී සම්බන්ධයෙන්ද හසල දැනුමක් ඇත්තෙකි. වසර තිහක ‍පොලිස් සේවා ඉතිහාසයක් ඇති ඔහු මේ කාලය තුළ කිසි දිනක සිය නම කැතකරගත් නිලධාරියෙක් ද නොවීම විශේෂිතය.

– කුමාර කරුණාරත්න

ඇතැම් සමාජ මාධ්‍ය තුළින් දේශපාලන නායකයකුගේ මුහුණක් සමග ක්‍රිස්තුස් වහන්සේගේ ප්‍රතිරූපය විකෘති කර, ප්‍රචාරය කිරීම සම්බන්ධයෙන් දැඩි විරෝධය ප්‍රකාශ කරන බව ශ්‍රී ලංකා කතෝලික රදගුරු සම්මේලනය නිවේදනයක් නිකුත් කරමින් පවසයි.

මෙම නින්දිත ක්‍රියාව හේතුවෙන් ලෝක ජනගහනයෙන් බිලියනයකට වැඩි ජනතාවගේ ගෞරවය ආදරයට හා වන්දනාවට පාත්‍ර වන ජේසුස් වහන්සේට අගෞරව හා අවමාන කිරීමක් සිදුවී ඇතැයිද එම නිවේදනයේ සඳහන් කර ඇත. මෙවැනි වේදනාත්මක හා අවමන් සහගත ක්‍රියාවන් තුළින් කිසිඳු ආගමික ශාස්තෘවරයකුට බඳුන් නොකිරීමට ඉඩ සලස්වන ලෙස බලධාරීන්ගෙන් ඉල්ලා සිටින බවද එහි දක්වා තිබේ.

ගයාත්‍රි ගීගනආරච්චි{jcomments on}

මහාධිකරණයෙන් ලබා දී ඇති තීන්දුවකට අනුව දැනට බන්ධනාගාරගතව සිටින හිටපු ජනාධිපති ලේකම් ලලිත් වීරතුංග සහ විදුලිසංදේශ නියාමන කොමිසමේ හිටපු අධ්‍යක්ෂජනරාල් අනූෂ පැල්පිට යන මහතුන් සම්බන්ධයෙන් එම මහාධිකරණ තීන්දුවට එරෙහිව අභියාචනයක්  ගොණු කිරීමේ කටයුතු සැකසෙනු ඇතැයි වාර්තා වේ.

කෙසේ නමුත් දැනට අභියාචනාධිකරණය හමුවේ නඩු සැලකිය යුතු සංඛ්‍යාවක් ගොඩගැසී ඇති බැවින් මෙම අභියාචනය විභාග කිරීමට සැලකිය යුතු කලක් ගත වනු ඇතැයි ද ඒ දක්වා ඔවුන් දෙදෙනාට බන්ධනාගාරගතව සිටීමට සිදුවනු ඇතැයි ද අධිකරණ ආරංචිමාර්ග පවසයි.

ඡායාරූපය - නිමල්සිරි එදිරිසිංහ{jcomments on}

 

 

IMAGE

සංසාර සිහිනයේ ගී සංකල්පනය මම 'ටැබ් එකේ ටයිප් කරපු' එකක්

IMAGE 2018 Feb 21 12:00
සනුක වික්‍රමසිංහ ගායනා කරන “සංසාර සිහිනේ” කලක පටන් බොහෝ ගීත දර්ශකවල පෙරමුණ ගෙන තිබෙන...
Views - 2009

මම නාට්‍ය කලාවෙ ඉන්නේ ඒ ගැන තියන 'උණ' නිසයි

IMAGE 2018 Feb 21 11:53
වේදිකාව, පුංචිතිරය සහ සිනමාව යන මාධ්‍ය ත්‍රිත්වයෙහිම සිය ප්‍රතිභාව ප්‍රකට කළ කලාකරුවකුවන...
Views - 1099

බිරිඳ රැකියාවක් නොකිරීම මගේ සාර්ථකවයට හේතුවක්

IMAGE 2018 Feb 20 14:38
“සිරස ජූනියර් සුපර් ස්ටාර්..” තරගය ගැන මුලින්ම අප ඔබගෙන් විමසන්න කැමතියි.. ඇත්තෙන්ම “සිරස...
Views - 5113

බිරිඳට පින් තකා සුනඛයන්ට දිනපතා සහල් කිලෝ 08ක දනක්

IMAGE 2018 Feb 20 14:23
මිනිසා තිරිසනුන් වන අවස්ථාත් තිරිසනා මිනිසුන් වන අවස්ථාත් අපට බොහෝ විට දක්නට ලැබුණද...
Views - 2942

ලංකාවේ අන්තිම රජු සැඟවූ නිධානය කෝ?

IMAGE 2018 Feb 19 11:34
මහනුවර රජ කළ රාජාධිරාජසිංහ රජුට බිසෝවරුන් කිහිප දෙනෙක්ම සිටියහ. ඔවුන් අතර අලමේලු අම්මා,...
Views - 5022

රඟපෑමෙන් සමුගත් හේතුව නදීකා කියයි

IMAGE 2018 Feb 19 10:41
“චංචල රේඛා” චිත්‍රපටයේ “දං චූටි” නාඳුනන කෙනෙක් එදා සිනමා ලෝලීන් අතර හිටියේ නැහැ....
Views - 6251

Please publish modules in offcanvas position.