Coss Ear2
lakbima.lk
COSS Ear 1
                                                                                        එසැනින් පුවත් | ගොසිප් | විශේෂ පුවත් | සුන්දර ලක්බිම | ව්‍යාපාරික පුවත්     

ළඟ එන දිවාලි උත්සවයට පෙර නවදිල්ලියේ අධිකරණය විසින් ගිනිකෙළි දැල්වීම තහනම් කොට තිබේ. ලොව දූෂිතම වායුගෝලයන්ගෙන් එකක් ලෙස සැලකෙන නවදිල්ලියේ වායු ගෝලයට මෙම ගිනිකෙළි තහනමින් වෙනසක් වේදැයි දැනගැනීම සඳහා එසේ ගිනිකෙලි තහනම් කොට තිබේ. නොවැම්බර් පළමුවැනිදා තෙක් මෙම තහනම බලපාන බව කියැවේ. දිවාලි උත්සවය පැවැත්වෙන්නේ ඔක්තෝබර් 18 වැනිදාය. උතුරු ඉන්දියාවේ වඩාත් වැදගත් හින්දු උත්සවය වන දිවාලි අයහපත යටකොට යහපත ජයගැනීම සිහිකොට පවත්වනු ලබයි. 2016 නොවැම්බර් මාසයේ මුලින්ම පනවා පසුව සැප්තැම්බර් මාසයේ තාවකාලිකව ඉවත්කරන ලද මෙම තහනම මෙවර පනවන ලද්දේ එසේ කරන ලෙස ඉල්ලා එවු පෙත්සම් ගණනාවක් සලකා බැලීමෙන් පසුවය.                                      

නිශානි දිසානායක

බ්‍රිතාන්‍ය අගමැතිනි තෙරේසා මේ ට වැඩි කල් නොගොස්  සිය ධුරයෙන් ඉල්ලා අස්වීමට සිදුවනු ඇත්ද යන්න මේ දිනවල එරට දේශපාලන කරළියේ නිතර කතාබහට ලක්වන මාතෘකාවක් වී තිබේ. ඇය මේ ආකාරයේ අර්බුදයකට මුහුණ දී සිටියදී එය තවත් තීව්‍ර කරන ආකාරයේ අවාසනාවන්ත සිදුවීමකටද මුහුණ දෙන්නට පසුගිය බදාදා (04 දා) ඇයට සිදු විය. ඒ මැන්චෙස්ටර්හිදී, ඇයගේ කොන්සර්වේටිව් පක්ෂයේ ඉතා වැදගත් සම්මේලනයක් අමතා කතා කරමින් සිටියදීය. අගමැතිනිය වේදිකාව මත කතා කරමින් සිටියදී සභා ශාලාව හරහා වේදිකාව අසළට ආ අමුත්තෙකු කිසියම් ලියැවිල්ලක් ඇය වෙත දිගු කරනු දක්නට ලැබිණි. එය බ්‍රිතාන්‍යයේ හැඳින්වෙන්නේ 45 ‍ලේඛනය යන නමිනි. සාමාන්‍යයෙන් එය සේවකයෙකුගේ සේවය අවසන් කළ බව අඟවමින් සේවායෝජකයෙකු විසින් නිකුත් කරනු ලබන ආකාරයේ ලියැවිල්ලකි. අර ආගන්තුකයා මෙවැනි ලියැවිල්ලක් තෙරේසා මේ වෙත දිගු කිරීමෙන් සංකේතවත් කිරීමට උත්සාහ කළේ ඇගේ සේවයද අවසන් කර ඇති ආකාරයකි. මෙම සිදුවීම සැලකිය හැක්කේ විහිළුවක ආකාරයෙන් අගමැතිනියගේ පාලනයට විරෝධය දැක්වීමක් ලෙසිනි.  පසුව මෙම පුද්ගලයා ‍පොලිස් අත්අඩංගුවට ගන්නා ලද බව මාධ්‍ය ඔස්සේ වාර්තා විය.

නමුත් අගමැතිනිය ඊටත් වඩා අපහසුතාවකට මුහුණ දුන්නේ එම පුද්ගලයා සභා ශාලාවෙන් පිටත රැගෙන යාමෙන් අනතුරුවය. ඒ ඇය නැවත කතා කිරීමට පටන් ගත් අවස්ථාවේ නතර නොවන දරුණු කැස්සකට ගොදුරු වීම නිසාය. කැස්ස නිසා ඇයට කතා කරගැනීම බෙහෙවින් අපහසු වූ අතර ඇතැම් අවස්ථාවල ඇගේ කටහඬ නොඇසෙන තරම් මට්ටමකට  පහත වැටිණි. මේ නිසා අගමැතිනිය ඉතා කණගාටුදායක තත්ත්වයකට පත් වූවාය.  සභාවේ රැස්ව සිටි ඇගේ පක්ෂයේ බොහෝ දෙනා තුළ ඇය මුහුණ දුන් තත්ත්වය සම්බන්ධයෙන් කම්පාවක් ඇති වූ බවද පෙනිණි. ඔවුන් විවිධ ආකාරයෙන් ඇය දිරිගන්වන ආකාරයක්ද, ඇය අස්වසාලන්නට තැත් කරන ආකාරයක්ද දැකිය හැකි විය. මේ අතර ඇය රැඳී සිටි වේදිකාවේ පසුබිමෙහි පැවැති පුවරුවක සටහන් කර තිබූ තේමා පාඨයක අකුරු ගැලවී වැටීමක් සිදු වූ බවද සඳහන් වෙයි. එය අගමැතිනියගේ ප්‍රතිපත්ති පිළිබඳ තේමාපාඨයක් වූ අතර සමහර අකුරු ගැලවී වැටීම නිසා කිසියම් හාස්‍යජනක බවක් එයින් පල වූ බවද කියැවිණි.

කෙසේ හෝ වේවා ඉහත සම්මේලනය අතරතුර සිදු වූ මේ සියල්ල දැනටමත් තෙරේසා මේ මුහුණ දී සිටින අර්බුදය තවත් අවුල් කරන්නක් ලෙසිනි බොහෝ දෙනා සලකන්නේ. ඇයගේ ජනප්‍රියත්වය සහ ආකර්ශණීයත්වය ඉතා වේගයෙන් පහත වැටෙමින් ඇති බව මේ වනවිට පැහැදිලිව දැකගත හැක්කකි. එයට බලපෑ ප්‍රධාන හේතුවක් වූයේ පසුගිය ජුනි මාසයේ ඇය විසින් කැඳවන ලද හදිසි මහා මැතිවරණය නිසා ඇති වූ ගැටළුයි. එම අවස්ථාවේ එවැනි මැතිවරණයක් කැඳවීම වැරදි තීරණයක් බව මේ වනවිට සනාථ වී ඇති අතර ඒ සම්බන්ධයෙන්ද පාක්ෂිකයින්ගේ අප්‍රසාදය ඇය වෙත එල්ල වී තිබේ. එම මැතිවරණය පැවැත්වීමට පෙර තෙරේසා මේ ගේ කොන්සර්වේටිව් පක්ෂ ආණ්ඩුවට පාර්ලිමේන්තුව තුළ සැලකිය යුතු මට්ටමේ බලයක් තිබිණි. නමුත් ඇයට ඊටත් වඩා බලයක් ඇති කර ගැනීමට වුවමනා විය. එයට හේතු වූයේ ඒ වනවිට කරළියට පැමිණ තිබූ බ්‍රෙක්සිට් හෙවත් බ්‍රිතාන්‍යය යුරෝපා සංගමයෙන් වෙන් වීමේ ක්‍රියාවලිය සාර්ථක කර ගැනීම සඳහා වඩාත් ශක්තිමත් ආණ්ඩුවක් ඇති කරගැනීමට ඇයට වුවමනා වීමය.

මෙම බ්‍රෙක්සිට් ක්‍රියාවලියේදී බ්‍රිතාන්‍යයට වඩාත් වාසිදායක ගිවිසුම් ආදිය යුරෝපා සංගමය සමග ඇති කරගැනීමට නම් ඒ වෙනුවෙන් කේවල් කිරීම සඳහා  බ්‍රිතාන්‍යය තුළ ශක්තිමත් ආණ්ඩුවක් තිබිය යුතු බව තෙරේසා මේ ගේ විශ්වාසය විය. නමුත් ඇගේ ඉලක්කය වැරදී ගියේය. වැඩි බලයක් දිනා ගැනීම සඳහා ඇය කැඳ වූ හදිසි මැතිවරණයෙන් සිදු වූයේ කලින් තිබූ බලයවත් ඇගේ පක්ෂයට නොලැබි යාමයි. පාර්ලිමේන්තුව තුළ බහුතර බලයක් දිනාගන්නට කොන්සර්වේටිව් පක්ෂය අසමත් වූ අතර ඇය ආණ්ඩුවක් පිහිටුවූයේ තවත් සුළු පක්ෂයක් සමග සන්ධානගත වෙමිනි. මෙම සිදුවීම තෙරේසා මේ ගේ නායකත්වය පිළිබඳ විශාල අවිශ්වාසයක් සහ අප්‍රසාදයක් ජනිත කළ සිද්ධියක් බවට පත් විය.

එමෙන්ම බ්‍රිතාන්‍යය යුරෝපා සංගමයෙන් වෙන්වීමේ කටයුත්තේ දී යුරෝපා සංගමය සමග ඇති කරගන්නා ගිවිසුම් සම්බන්ධයෙන් ඇය දරණ අදහස් සහ පක්ෂයේ ඇතැම් ප්‍රබලයින් දරණ අදහස් අතරද ගැටුම් ඇතිවෙමින් තිබේ. මේ නිසා
පක්ෂය තුළ යම් යම් බෙදීම් උත්සන්න වෙමින් ඇති බවටද තොරතුරු පලවෙයි. මේ අතර රටෙහි සාමාන්‍ය ජනතාවගේ ගැටලුවලට විසඳුම් ලබා දීමට ඇගේ රජය අසමත් වෙමින් ඇති බවට විවේචන එල්ල වෙමින් තිබිම තවත් ගැටලුවකි. පසුගිය දා ලන්ඩනය ආසන්නයේ තට්ටු නිවාස සංකීර්ණයක් ගිනිගැනීමෙන් ඇති වූ බිහිසුණු ඛිෙදවාචකයද සාමාන්‍ය ජනතාව තුළ පාලකයින් පිළිබඳ ඇති විරෝධය ඉහළ නංවන්නක් බවට පත් විය.  මේ ආදී කාරණා රැසක් හේතුවෙන් තෙරේසා මේගේ නායකත්වය සහ ඇගේ ආණ්ඩුව කිසියම් අර්බුදයකට ගොදුරු වෙමින් ඇති ආකාරයක් දැකිය හැකි වන අතර ඇය වෙනුවට වඩාත් ශක්තිමත් නායකයෙකු/නායිකාවක පක්ෂයට අවශ්‍ය බවට අදහස් මතුවෙමින් ඇති ආකාරයද දැකිය හැකි වෙයි. තෙරේසා මේ ගේ ආණ්ඩුවේ විදේශ ‍ලේකම් ධුරය දරණ බොරිස් ජොන්සන් වැනි අය පක්ෂයේ නායකත්වය සහ අගමැති ධුරය වෙත ඇස ගසාගෙන සිටින බවටද මේ අතර යම් යම් ඉඟි පළවෙන්නට පටන් ගෙන ඇත. මෙම පසුබිම තුළ පසුගියදා මැන්චෙස්ටර් හි පැවති පක්ෂයේ සම්මේලනය තෙරේසා මේ ට ඉතා වැදගත් අවස්ථාවක් ලෙස සැලකිණි. ඇය එහිදී තමාගේ ප්‍රතිපත්ති සහ වැඩසටහන් සම්බන්ධයෙන් වඩාත් පැහැදිලි කරමින් ඇගේ ස්ථාවරය ශක්තිමත් කරගන්නට අදහස් කරගෙන සිටි බව සඳහන් විය. නමුත්  එහිදී කිසිසේත් අපේක්ෂා නොකළ ආකාරයෙන් ආගන්තුකයෙකු කඩා වැදීම නිසාත්, කැස්සකට ගොදුරු වීම නිසාත් එම අවස්ථාවද අවුල්ව ගිය බව බොහෝ නිරීක්ෂකයින් පෙන්වා දී තිබිණි. මෙම සිදුවීම ඇගේ කඩා වැටීමෙහි තවත් අවස්ථාවක් සනිටුහන් කරන්නක් ලෙස සලකන බොහෝ දෙනෙකු සිටින බවද ඒ පිළිබඳ ලියැවී තිබූ දෑ අනුව සිතාගත හැකිය.

තෙරේසා මේ අගමැතිනියත්, ඇගේ කොන්සර්වේටිව් පක්ෂයත් බිය වද්දන තවත් කාරණයක් මේ වනවිට කරළියට එමින් තිබේ. එනම් ඔවුන්ගේ ප්‍රධාන ප්‍රතිවාදී පක්ෂය වන කම්කරු පක්ෂයේ නායක ජෙරමි කෝබින්ගේ ජනප්‍රියත්වය වේගයෙන් ඉහළ යමින් තිබිමයි. සමාජවාදී අදහස් දරන්නෙකු ලෙස සැලකෙන කෝබින් විශේෂයෙන් එරට තරුණ පරපුර තුළ  ඉතා ශක්තිමත් පදනමක් සකස් කර ගනිමින් සිටින බව පෙනේ. මේ වනවිට කම්කරු පක්ෂයේ ජනප්‍රියත්වය කොන්සර්වේටිව් පක්ෂයේ ජනප්‍රියත්වයට වඩා වැඩි බව මෑතක පවත්වා ඇති ජනමත සමීක්ෂණවලින්ද සනාථ වී තිබේ. යම් විදියකින් කොන්සර්වේටිව් පක්ෂයේ අභ්‍යන්තර අර්බුදයක් ඇති වී එහි ප්‍රතිඵලයක් ලෙස ආණ්ඩුව ද බිඳ වැටී නැවත හදිසි මැතිවරණයක් පැවැත්වුවහොත් කම්කරු පක්ෂය ජය ලැබිමටත්, කෝබින් අගමැති ධුරයට පත්වීමටත් බොහෝ දුරට ඉඩ ඇති බව පෙනී යයි. කෝබින්ගේ මෙම නැගීම එක්තරා අතකින් තෙරේසා මේ ට පක්ෂය තුළ කිසියම් ආරක්ෂාවක් ලබා දෙන කාරණයක් බවටද පත්ව තිබේ. මන්ද යත් ඇය නායකත්වයෙන් ඉවත් කළහොත් ඉන්පසු පක්ෂය තුළ ඇති විය හැකි අරාජිකත්වය සහ නායකත්ව තරඟය ප්‍රතිවාදී කම්කරු පක්ෂයට තවදුරටත් වාසිදායක පසුබිමක් ඇති කරනු ඇතැයි යන බියක් කොන්සර්වේටිව් පාක්ෂිකයින් තුළ ඇති බව පෙනී යන නිසාය. මේ නිසා අඩුපාඩු සහ දුර්වලතා මධ්‍යයේ වුවද තවදුරටත් තෙරේසා මේ නායකත්වයේ තබා ගැනීමට කොන්සර්වේටිව් පක්ෂය තුළ  පෙළඹීමක් ඇති බව පෙනී යයි. කෙසේ වෙතත් දැනට පවතින අවිනිශ්චිත දේශපාලන, ආර්ථික තත්ත්වය තුළ ඉදිරියේදී සිදුවිය හැකි කිසිවක් පිළිබඳව නිශ්චිතව අනාවැකි කීමට පිළිවන්කමක් නැති බවද ඉතා පැහැදිලි කාරණයක් වී තිබේ.

නිහාල් පීරිස්

මුහුණු ‍පොත හෙවත් ෆේස් බුක් ට්‍රම්ප් විරෝධී ලෙස හැසිරෙන බවට ඇමෙරිකානු ජනපතිවරයා නගන චෝදනාව එහි නිර්මාතෘ මාක් සකර්බර්ග් විසින් ප්‍රතික්ෂේප කොට තිබේ. එම චෝදනාව තම ට්විටර් වෙබ් අඩවිය ඔස්සේ ජනපතිවරයා විසින් නගා තිබිණි. මෙසේ ට්‍රම්ප් විරෝධී ලෙස කටයුතු කරන මාධ්‍ය ලෙස ඇමරිකානු ජනපතිවරයා විසින් නිව්යෝක් ටයිම්ස් හා වොෂින්ටන් ‍පෝස්ට් පුවත්පත්ද හඳුන්වා දී තිබේ.
මේ අතර ඇමෙරිකානු මැතිවරණයට රුසියාවේ මැදිහත්වීම ගැන දේශපාලන දැන්වීම් තුන්දහසක්ද මුහුණු ‍පොත විසින් ප්‍රචාරය කිරීමට නියමිතය. මේවා ඇමෙරිකානු ජනපතිවරණයට පෙර රුසියාව විසින් ලබාදුන් ඒවා බව වාර්තා වෙයි.

බි.බි.සීි.

උතුරු කොරියානු අත්අඩංගුවේ සිටි කාලයේ ඇමෙරිකානු සිසු ඔටෝ වොම් බියර් ගේ සිරුරේ වද දුන් බවට ලකුණු නැතැයි ඔහුගේ මරණ පරික්ෂණ වාර්තාවේ දැක්වෙයි. ඒ අනුව රූපවාහිනී සම්මුඛ සාකච්ඡාවකට ඉදිරිපත්වෙමින් ඔහුගේ මව්පියන් කළ චෝදනාවන් හා එම වාර්තාව අතර පරස්පරයක් පවතියි. 2016 උතුරු කොරියාවේ සංචාරයක යෙදී සිටියදී හෝටලයක නාම පුවරුවක් සොරකම් කිරීමේ වරදට අත්අඩංගුවට ගත් තම පුත්‍රයාට වද දුන් බවට එහිදී ඔටෝගේ දෙමව්පියන් චෝදනා කොට සිටියේය. මරණ පරීක්ෂණ වාර්තාවේ දැක්වෙන්නේ මොළයට ඔක්සිජන් සැපයීමේ මදිකමක් නිසා ඔහුගේ මරණය සිදුව ඇති බවයි.
ඔහු  පරීක්ෂා කළ  වෛද්‍යවරයා පවසා ඇත්තේ ඔටෝට කුමක් සිදු වූවේ දැයි නොදන්නා බවය. සෞඛ්‍ය හේතුන් මත උතුරු කොරියාවෙන් ආපසු එවනු ලැබූ ඔටෝ පැමිණ දින කිහිපයක් තුළ පසුගිය ජුනි මාසයේදී මියගියේය. ආපසු එනවිට ඔහු සිහිමද ගතියකින් හා අතිශයින් දුර්වලව සිටි බව වාර්තා විය. බොටුලිස්ම් නම් රෝගී තත්ත්වය ඔහුට වැලඳුන බව උතුරු කොරියානු බලධාරීන් පවසා සිටියද ඇමෙරිකානු වෛද්‍යවරුන් ඒ බව ප්‍රතික්ෂේප කරයි.

සී.එන්.එන්.

වනුආටුහි ගිනි කන්දක් සක්‍රීය වීම හේතුවෙන් දූපතක ජනගහනය සහමුලින්ම ඉවත් කිරීමට සිදු වූ බව වාර්තා වෙයි. අම්බේ නම් මෙම දූපතේ සිටි එකොළොස්දහසක ජනතාව ඉවත් කර ඇති අතර පැසිපික් කලාපයේ වෙනත් දූපත්වලට ඔවුන් ගෙනගොස් ඇත.පුපුරන්නට ආසන්නව දින ගණනාවක් තිබුණු මෙම ගිනි කන්ද සති අන්තයේදී පුපුරා ගිය බව වාර්තාවෙයි.
    සතිය මුලදී බලධාරීන් විසින් හයදහසක ජනතාව ඉවත් කරගන්නා ලද අතර පසුව ඉතිරි පිරිසද ඉවත්කිරීමට පියවර ගත්තේය. මේ වනවිට සියලුම දෙනා ඉවත් කරගෙන ඇති අතර එරට දූපතකින් මෙසේ සමස්ත ජනතාවම ඉවත්කිරිමට සිදු වූ පළමු අවස්ථාව ලෙස මෙය දැක්වෙයි.

සී.එන්.එන්.

කාන්තාවන්ට රිය පැදවීම තහනම් කර තිබූ ලෝකයේ එකම රට සෞදි අරාබියයි. තනිව රිය පදවාගෙන යන කාන්තාවන් අත්අඩංගුවට ගෙන හිරේ විලංගුවේ දැමීම එරට නිතර දක්නට ලැබෙන්නකි. දඬුවම් ලෙස කස පහර නියම කළ අවස්ථා ගැනද සඳහන්ව තිබේ. පසුගිය 26 වෙනි දින මෙම තහනම ඉවත් කරමින් එරට රජය කාන්තාවන්ට රිය පැදවීමේ නිදහස ලබා දීම සෞදි ඉතිහාසයේ විශේෂ සිදුවීමක් වන අතර කාන්තාවන් මෙන්ම නිදහස සහ මානව හිමිකම් අගයන සියලු දෙනා මේ පිලිබඳව මහත් සතුටට පත්ව සිටිනු දැකිය හැකි වෙයි. කාන්තාවන්ට රිය පැදවීමේ නිදහස ලබා දෙමින් ඉදිරියේදී ඊට අදාළ නීති සැකසෙනු ඇති අතර ලබන වසරේ සිට එය ක්‍රියාත්මක වනු ඇති බව සඳහන් වේ. 
කාන්තාවන් තනිව රිය පැදවීම සම්බන්ධයෙන් පනවා තිබූ තහනම ඔවුන්ගේ පුද්ගලික නිදහස දැඩි ලෙස සීමා කළ එකක් බව අමුතුවෙන් කිව යුතු නොවේ. එමෙන්ම කාන්තාවන්ගෙන් සමාජයට මෙන්ම ආර්ථිකයටද ලැබෙන දායකත්වය දැඩි ලෙස සීමා කිරීමට මෙම තත්ත්වය දායක විය. මෙම තහනම නිසා එරට කාන්තාවන් මෝටර් රියකින් ඕනෑම තැනක යාමේදී පවු‍ලේ හෝ භාරකාර පිරිමියෙකු සමග යා යුතු විය.  එසේ නොවන්නේ නම් පිරිමි භාරකාරයෙකුගේ ලිඛිත අවසරයක් අවශ්‍ය විය. මෙම තහනම ඉවත් කිරීමත් සමග මෙම ලිඛිත අවසරය පිළිබඳ නියමයද අවලංගු  වී යයි.
‘මගේ භාරකාරයා දැන් මමමයි. දැන් අපිටත් රිය පදවන්න පුළුවන්’ මෙම නිදහස නිසා මහත් පී්‍රතියට පත්ව සිටින කාන්තාවන් අතින් සමාජ මාධ්‍ය තුළ මෙවැනි සටහන් සංසරණය වනු දැකිය හැකි විය. ‘මට දැන් මගේ සිහින මෝටර් රථය මිලදී ගන්න පුළුවන්. මම ගන්නේ කළු සහ කහ පැහැති රථයක්’ වැනි පී්‍රතිමත්  සටහන්ද ඒ අතර දක්නට ලැබිණි.
එසේම කාන්තාවන්ට ගමන් බිමන් යාම සඳහා පිරිමි රියැදුරන්ගේ සේවය ලබා ගැනීමට සෞදි පවුල්වලට සිදු වූ අතර මෙය එම පවුල්වලට අමතර ආර්ථික බරක් එකතු කරන්නක් ද වූයේය. මේ ආකාරයෙන් ලක්ෂ අටක් පමණ විදේශීය රියැදුරන්ද මේ වනවිට සෞදිය තුළ සේවය කරන බව වාර්තා වෙයි. මෙම රියැදුරන් සේවයෙහි යෙදවීමේදී කෑමබිම, ඉඳුම් හිටුම්, සෞඛ්‍ය පහසුකම්, රක්ෂණ ආවරණ ආදිය සඳහාද විශාල වියදමක් දැරීමට එම පවුල්වලට සිදු වෙයි.
කෙසේ හෝ වේවා කාන්තාවන්ට රිය පැදවීම සම්බන්ධ තහනම ඉවත් කර ගැනීම සඳහා කාන්තා ක්‍රියාකාරිනියන්, මානව හිමිකම් ක්‍රියාකාරීන් වැනි උදවිය විසින් ඉටු කරන ලද කාර්යභාරය තීරණාත්මක මෙහෙයක් ඉටු කළ බවද පැවසිය යුතු වෙයි. එමෙන්ම ඇමෙරිකාව වැනි රටවලින් රාජ්‍ය මට්ටමින් එල්ල වූ පීඩනයද මෙහිදී විශාල බලපෑමක් කළ බැව් අමතක කළ හැකි නොවේ.
මේ වනවිට සෞදිය තුළ ක්‍රියාත්මක වෙමින් ඇති ආර්ථික ප්‍රතිසංස්කරණ ආදිය සමගද මෙවැනි තීරණ බැඳී ඇති බැව් දැකිය හැකි වෙයි. දැනට එහි රජකම දරන සල්මාන් රජු මේ වනවිට ඉතා මහළු වියේ පසුවන අතර ඔහුගෙන් පසු රජකම බාර ගැනීමට සිටින්නේ ඔහුගේ පුත් මොහොමඩ් බින් සල්මාන් ය. දැනටත් ඔහු රාජ්‍ය පාලනය පිළිබඳ 
බොහෝ කටයුතුවලට සම්බන්ධ වන බවද සඳහන් වෙයි. ඉතා තරුණ නායකයෙකු වන ඔහු බොහෝ දුරට නවීන අදහස් ඇත්තෙකු බවද පෙනේ. සෞදි අරාබිය නවීන ලෝකය හා සමාන්තරව යන රටක් ලෙස දියුණු කිරීම සල්මාන් කුමරුගේ අරමුණ බව දැකිය හැකි වෙයි. එහිදී සෞදි ආර්ථිකයේ යම් යම් වෙනස්කම් කිරීමට ඔහු බලා‍පොරොත්තු වන ආකාරයක්ද පෙනේ. මීට අදාළව 2030 දැක්ම යනුවෙන් වැඩපිළිවෙළක්ද මේ වනවිට සකස් කර ඇත. 
එරට ආර්ථිකය වුවමනාවට වඩා තෙල් ආදායම් මත රඳා පවතිනවාය යන්න මොහොමඩ් බින් සල්මාන් කුමරුගේ අදහසයි. ඉදිරියේදී ඇති විය හැකි ආර්ථික අභියෝග ජයගන්නට නම් මෙම තත්ත්වය වෙනස් කර ආර්ථිකය විවිධාංගීකරණයකට ලක් කළ යුතුය යන්න ඔහුගේ විශ්වාසය වී තිබේ. ආර්ථිකය මේ ආකාරයෙන් ප්‍රතිසංස්කරණය කිරීමේදී රටේ කාන්තා පරපුරද දැනට වඩා ඊට සහභාගි කරගැනීමට ද මෙම අනාගත පාලකයින් කල්පනා කරනවා විය හැකිය. රිය පැදවීමේ අයිතිය කාන්තාවන්ට ලබා දීම වැනි පියවර ගන්නට මෙවැනි සාධක පවා බලපාන බව පැහැදිලිය.
කෙසේ වෙතත් රජය විසින් ගන්නා ලද මෙම තීරණය සම්බන්ධයෙන් සිය විරෝධය පළ කරන පාර්ශ්වද නැතුවා නොවේ. විශේෂයෙන්ම ෂරියා නීතිය 
පිළිපැදීමේ අවශ්‍යතාව දැඩිව විශ්වාස කරන ආගමික කණ්ඩායම් මේ සම්බන්ධයෙන් විරෝධය දක්වා තිබේ. තවත් සමහරුන් පවසා ඇත්තේ රිය පැදවීම වැනි කටයුත්තකට වුවමනා කරන බුද්ධිය කාන්තාවන්ට නොමැති බවයි එමෙන්ම මෙම තහනම ඉවත් කිරීම නිසා කාන්තාවන් පිරිමින් සමග මුසු වීමට වැඩි නිදහසක් හිමි කර ගැනීමද විවේචනයට ලක්ව ඇත.
 
නිහාල් පීරිස්
IMAGE

අයිවෝ ඩෙනිස් රෝහ‍ලේ

IMAGE 2018 Jan 17 10:59
මෙරට බිහි වූ විශිෂ්ටතම සංගීතඥයකු වූ සුනිල් ශාන්තයන්ගේ ගීත උරුමය ඉදිරි පරපුර වෙත රැගෙන ආ...
Views - 1071

ඡන්දය වෙනුවෙන් 'වඩියකට' ඉඩ දෙන්නැයි අපේක්ෂකයෝ ඉල්ලති

IMAGE 2018 Jan 16 10:42
තමන් කිසිදා  කසිප්පු පෙරීම නොකළ නමුත් මැතිවරණය අවසන් වන තුරු පමණක්  කාර්යාලය පිටුපස දින...
Views - 2803

අහඹු ගැබ් ගැනීම් වලකන පෙති ඇසුරුම් 20 අනුරපුර පාසලක

IMAGE 2018 Jan 16 09:59
පාසල ශුද්ධ පවිත්‍ර කිරීමේ ශ්‍රමදානයකට සහභාගී වූ මවකට අනුරාධපුර නගරයේ පාසලක තිබී අහඹු ලෙස...
Views - 3202

අන්තර්ජාල ඡායාරූපයේ සත්‍ය කතාව උදාරි හෙළි කරයි

IMAGE 2018 Jan 15 12:15
ප්‍රවේගය සිනමා පටයෙන් බොහෝ දෙනාගේ ආදරය දිනාගත් උදාරි පෙරේරාගේ තට්ට හිස සහිත ඡායාරූප පෙළක්...
Views - 4120

හොලිවුඩ් නිළියන්ටත් ලිංගික හිංසන

IMAGE 2018 Jan 15 11:49
වසර හැත්තෑ පහක කාලය තුළ අමුතුම ආකාරයේ ගෝල්ඩන් ග්ලෝබ් සම්මාන උළෙලක් පළමු වරට පසුගිය ඉරිදා...
Views - 2320

SMS මිස්කෝල් ෆෙස්බුක් නිසා කාන්තාවන් 26%ක් ගුටිකති

IMAGE 2018 Jan 15 08:37
සැමියා පහරදීම නිසා කාන්තාවන්ගෙන් සියයට විසිහයක් හිංසනයට ලක්ව ඇත්තේ ජංගම දුරකථනවලට එන කෙටි...
Views - 2709

Please publish modules in offcanvas position.

Web Analytics
X

Right Click

No right click