Coss Ear2
lakbima.lk
COSS Ear 1

තමා සේවය කළ රෝහල්වල ප්‍රතිකාර ගනිමින් සිටි රෝගීන් 97 දෙනෙකු මරා දැමීම සම්බන්ධයෙන් ජර්මන් ජාතික හෙද නිලධාරියෙකුට එරෙහිව අධිකරණයෙහි චෝදනා ගොනු කිරීම පිළිබඳ පුවතක් මේ දිනවල විශාල අවධානයක් දිනාගන්නට සමත්ව තිබේ. නීල්ස් හෝගල් නමැති මෙම හෙද නිලධාරියාට එරෙහිව නගා ඇති චෝදනා ඔප්පු වුවහොත් ඔහු දවෛනි ලෝක යුද්ධයෙන් පසු ජර්මනියේ සිටි දරුණුම දාම ඝාතකයා (serial killer)  බවට පත් වනු ඇත. රෝගීන් 97 දෙනෙකු මරා දැමීම සම්බන්ධයෙන් මෙවර චෝදනා නැගෙන විටත් හෝගල් සිටියේ ජීවිතාන්තය දක්වා සිර දඬුවමක් විඳිමිනි. එයට හේතු වූයේ 2015 වසරේ ඔහුට එරෙහිව අධිකරණය ලබා දුන් නඩු තීන්දුවකි.
නීල්ස් හෝගල් පිළිබඳ මෙම සිදුවීම් දාමය පිළිබඳව මුලින්ම වාර්තා වන්නට පටන් ගත්තේ මෙයට වසර 12කට පමණ පෙර එනම් 2005 වසරේය. ඔහු අතින් රෝගීන් මියගොස් ඇත්තේ ඔවුන්ගේ හෘදය වස්තුවේ ක්‍රියාකාරිත්වය අඩාල කරන ඖෂධ එන්නත් කිරීම නිසාය. හෝගල් සේවය කරමින් සිටි එක් රෝහලකදී ඔහු එක්තරා රෝගියෙකුට මෙවැනි ඖෂධයක් එන්නත් කරමින් සිටියදී වෙනත් හෙදියක එය දැකීම නිසා පළමු වරට ඔහු පිළිබඳ සැක මතු විය. කෙසේ හෝ වේවා මෙම අවස්ථාවේදී එම රෝගියාගේ හෘදයවස්තුව කෘත්‍රිම ආකාරයෙන් නැවත පණගැන්වීමට ඔහු සමත්ව තිබේ. මෙම සිදුවීම සම්බන්ධයෙන් හෝගල්ට එරෙහිව නඩු පවරන ලද අතර එහිදී ඔහුට වසර හතහමාරක සිර දඬුවම් නියම කෙරිණි. ඒ මිනීමැරීමට තැත් කිරීමේ වරදටය. 
හෝගල් පිළිබඳ වඩාත් බියකරු තොරතුරු අනාවරණය වන්නට පටන් ගත්තේ මේ පිළිබඳ පැවැති නඩු විභාගයට මාධ්‍ය හරහා විශාල ප්‍රසිද්ධියක් ලැබිමත් සමගය. මෙම නඩු විභාගය ගැන අවධානය යොමු කරගෙන සිටි එක්තරා කාන්තාවක් ඔහුට එරෙහිව තවත් පැමිණිල්ලක් කිරීමට පෙරට ආවාය. ඇගේ මවද මේ කියන කාලය තුළ ප්‍රතිකාර ගනිමින් සිට ඇත්තේ හෝගල් සේවය කළ රෝහ‍ලේ වන අතර ඇයද එහි දී මරණයට පත්ව තිබිණි. ඉහත කී කාන්තාව පැමිණිලි කර තිබුණේ තම මවගේ මරණය සම්බන්ධයෙන්ද සැකයක් ඇති බවයි. මේ අතරතුර හෝගල් තමා සමග සිටි බන්ධනාගාර රැඳවියන් සමග සහ එක්තරා මනෝ වෛද්‍යවරයෙකු සමග පවසා තිබුණේ තමා අතින් තවත් රෝගීන් බොහෝ පිරිසක් ඝාතනය වූ බවයි.
රෝගීන්ගේ හෘදයේ ක්‍රියාකාරිත්වය අඩපණ කරන ඖෂධ හෝගල් ඔවුන්ට එන්නත් කර ඇත්තේ අපූරු හේතුවක් නිසාය.  මේ ආකාරයෙන් රෝගීන් මරණාසන්න තත්ත්වයට පත් කිරීමෙන් පසු ඔහු නැවත ඔවුන්ගේ හෘදයන් කෘත්‍රිම ආකාරයෙන් පණ ගැන්වීමට කටයුතු කර තිබේ. මෙලෙස කටයුතු කිරීමෙන් හෝගල් බලා‍පොරොත්තු වී ඇත්තේ රෝගීන් නැවත පණ ගැන්වීමට තමාට ඇති හැකියාව පිළිබඳව තමා සමග සේවය කළ සෙසු හෙද හෙදියන්ට සහ ඉහළ නිලධාරීන්ට ප්‍රදර්ශනය කර 'වීරයෙකු' බවට පත් වීමට බව අනාවරණය වී ඇත. සමහර රෝගීන් නැවත ප්‍රකෘති තත්ත්වයට පත්ව ඇති අතර රෝගීන් බොහෝ දෙනෙකු එහිදී මරණයට පත්ව තිබේ. 
හෝගල් පිළිබඳ සැක මතු කරමින් ඉහත කී කාන්තාව විසින් කරන ලද පැමිණිල්ල සම්බන්ධයෙන් කෙරුණු විමර්ශනවලින් පසු නැවතත් ඔහුට එරෙහිව නඩු පැවරුණු අතර  මිනීමැරුම්  සහ මිනීමැරීමට තැත් කිරීම්  සම්බන්ධයෙන් 2015 දී යළිත්  ඔහුට දඬුවම් නියම කෙරිණි. ඒ අනුව මිනීමැරීම් හයක් සම්බන්ධයෙන් ඔහු වරදකරු බවට පත්ව තිබිණි. ජීවිතාන්තය දක්වා සිර දඬුවම් නියම කෙරුණේ එහිදීය. තමා අතින් තවත් බොහෝ රෝගීන් මිය ගිය බව හෝගල් ප්‍රකාශ කිරීමත් සමග ඒ සම්බන්ධයෙන් වඩාත් පුළුල් පරීක්ෂණයක් දියත් කිරීමට ජර්මන් විමර්ශන අංශ පියවර ගත්තේය. මෙම හෙද නිලධාරියා සේවය කළ රෝහල් තුළ එම කාලයේ, එනම් 1999 සහ 2005 අතරතුර මියගිය රෝගීන් බොහෝ දෙනෙකුගේ මළ සිරුරු ගොඩ ගෙන පරීක්ෂණ සිදු කිරීමට පවා එහිදී පියවර ගැණිනි. එයට අමතරව රෝහල්වල පසුගිය ලියකියවිලි බොහොමයක්ද විමර්ශකයන්ගේ පරීක්ෂාවට ලක් විය. හෝගල් සේවය කළ කාලය තුළ මෙම රෝහල්වල රෝගීන් මිය ගිය ප්‍රමාණය ඉහළ ගොස් ඇති බවද එහි දී අනාවරණය වී ඇතැයි සඳහන් වේ. රෝගීන් 97 දෙනෙකු ඝාතනය කිරීම සම්බන්ධයෙන් හෝගල්ට එරෙහිව පසුගිය 22 දා තෙවැනි වතාවටත් චෝදනා ගොනු කෙරුණේ මෙම විමර්ශනවල ප්‍රතිඵලයක් වශයෙනි.
තමා විසින් කරන ලද අපරාධ පිළිබඳව අවංකවම පසුතැවිලි වන බව නීල්ස් හෝග්ල් කලින් අවස්ථාවක ප්‍රකාශ කර තිබිණි. මරණයට පත් වූ අයගේ ඥාතීන්ගෙන් සමාව ඉල්ලා තිබූ ඔහු තමාට දඬුවම් ලැබුණහොත් එය මෙම ඥාතීන්ට සහනයක් වනු ඇතැයිද පවසා ඇත. කෙනෙකු මිය ගිය සෑම අවස්ථාවකම තමා නැවත මෙවැන්නක් නොකරන බවට අදිටන් කරගත්තත් එම අධිෂ්ඨානය වැඩි කලක් පවත්වා ගන්නට නොහැකි වූ බවද ඔහු කියා තිබේ.
ඔහු අතින් මරණයට පත්වූ රෝගීන් සංඛ්‍යාව මීටත් වඩා වැඩි විය හැකි බවටද අදහස් පළවෙයි. නමුත් මිය ගිය ඇතැමුන්ගේ සිරුරු ආදාහනය කර තිබිම නිසා ඒ පිළිබඳ සාක්ෂි සොයා ගැනීමට නොහැකිව ඇති බවද සඳහන් වේ.
මේ ආකාරයෙන් මිනීමැරීම සම්බන්ධයෙන් ජර්මනියේ හෙද නිලධාරියෙකුට චෝදනා එල්ල වූ පළමු වතාව මෙය නොවේ. මෙයට දස වසකරට පමණ පෙර ද මේ ආකාරයෙන්ම පිරිමි හෙදියකට මිනීමැරුම් චෝදනා එල්ල විය. ඔහු අතින් මිය ගිය රෝගීන් ගණන 28කි. ඔවුන් බොහෝ දෙනා ඉතා වියපත් අය බව පැවසිණි. තමා ඔවුන් ඝාතනය කළේ ඔවුන් පිළිිබඳ උපන් අනුකම්පාව නිසා බව මෙම හෙදිය පවසා තිබූ අතර ඔහුටද ජීවිතාන්තය දක්වා සිර දඬුවම් නියම කෙරිණි.
 
කිත්සිරි මල්වත්ත 

ඇමෙරිකාවේ රජයේ දේපළ යළි පණගන්වමින්  කොංග්‍රසයේ රිපබ්ලිකන්වරු හා ඩිමොක්‍රටික්වරු තාවකාලිකව අයවැය සම්මත කරවාගෙන තිබේ. ළාබාල වියේ පසුවන අනවසර සංක්‍රමණිකයන් ගැන සාකච්ඡාවක් ලබාදීමට ‍පොරොන්දු වීම හේතුවෙන් අයවැයට පක්ෂව ඡන්දය ලබාදුන් බව ඩිමොක්‍රටික් පක්ෂය පවසයි. සඳුදා සවස මෙම පනතට අත්සන් කළ ජනපති ඩොනල්ඩ් ට්‍රම්ප් ඩිමොක්‍රටික්වරුන් විවේචනය කරන්නටද අමතක නොකළේ්ය.
ඩිමොක්‍රටික්වරුන්ගේ විරෝධය හේතුවෙන් ස්ථිර අයවැයක් සම්මත කරගත නොහැකි කොංග්‍රසය මෙලෙස තාවකාලික අයවැයක් පසුගිය ඔක්තෝබරයේ සිට සම්මත කරගත් සිව්වන වතාව මෙය වෙයි. සෙනෙට් සභාවේදී  පසුගිය සඳුදා අයවැයට පක්ෂව අසූඑක්දෙනෙක් ඡන්දය දුන් අතර ඊට විපක්ෂව ඡන්දය ලබාදී තිබූණේ දහඅටදෙනෙකි. නියෝජිත මණ්ඩලයේදී එය සම්මතව තිබුණේ් දෙසිය හැටක් හා විපක්ෂව එකසිය පනහක් ලෙසය.
 
සී.එන්.එන්.
 

විශාල ජාත්‍යන්තර අවධානයක් යොමු වන වැදගත් ආර්ථික සමුළුවක් අද (23) ආරම්භ වෙයි. ස්ටිට්සර්ලන්තයේ සිට ක්‍රියාත්මක වන ලෝක ආර්ථික මණ්ඩපය යනුවෙන් හැඳින්වෙන ස්වාධීන සංවිධානයක් විසින් පවත්වනු ලබන මෙම සමුළුව වාර්ෂිකව පැවැත්වෙන්නක් වන අතර සෑම වසරකම එය පවත්වනු ලබන්නේ ස්විට්සර්ලන්තයේ ඇල්ප්ස් කඳුවැටියේ අති රමණීය ඩාවොස් නගරයේය.  ප්‍රධාන වශයෙන්ම, ලෝකයේ ආර්ථික සහ ව්‍යාපාරික ක්‍ෂේත්‍රවල දැවෙන ප්‍රශ්න පිළිබඳ අවධානය යොමු කිරීම සහ වඩාත් යහපත් දිශාවකට ලෝකය යොමු කිරීම මෙහි මූලික අරමුණ වන අතර ප්‍රධාන පෙ‍ලේ දේශපාලන නායකයින්, ව්‍යාපාරිකයින්, මූල්‍ය අරමුදල වැනි ජාත්‍යන්තර සංවිධානවල නියෝජිතයින්, මාධ්‍යවේදීන්, සිවිල් සමාජ නියෝජිතයින්, තාක්ෂණවේදීන්, පරිසරවේදීන් වැනි පාර්ශ්ව රැසක් මේ සඳහා සහභාගි වෙති.  ෂාරුක් ඛාන්, එල්ටන් ජෝන්, කේට් බ්ලැන්චට් වැනි සුපිරි කලාකරුවන් පිරිසක්ද මෙවර සමුළුවට එක්වන බව සඳහන් වෙයි. 2018 සමුළුව සඳහා  රටවල් 110කින් නියෝජිතයින් 2500කට අධික පිරිසක්  සහභාගි වනු ඇතැයි යන්න සංවිධායකයින්ගේ විශ්වාසයයි. සමුළුව පිළිබඳ කියැවෙන තවත් අපූරු කාරණාවක් වන්නේ ඒ සඳහා සහභාගි වීමට අයෙකුගෙන් අය කරන මුදල ඇමෙරිකානු ඩොලර් 55,000 ක් වීමයි. (රාජ්‍ය නායකයින් වැනි අයගෙන් මෙම මුදල අය කරන්නේ නැත.)
සෑම වසරකම මෙම සමුළුව පැවැත්වෙන්නේ යම් ප්‍රධාන තේමාවක් පදනම් කරගනිමිනි. මෙවර එම තේමාව වී ඇත්තේ 'බෙදුණු ලෝකයක හවුල් අනාගතයක් නිර්මාණය කර ගැනීම' යන්නයි. ලෝකය දිනෙන් දින විවිධ පිල්වලට, කණ්ඩායම්වලට, බල කඳවුරුවලට වේගයෙන් බෙදී යමින් ඇති බව රහසක් නොවේ. එලෙස ඛණ්ඩනය වෙමින් ඇති ලෝකයක සියලු දෙනාට හවුල්ව අනාගතයක් නිර්මාණය කරගත හැකිද යන්න පිළිබඳ සොයා බැලීම අතිශයින් වැදගත් කටයුත්තකි. එමෙන්ම  පවතින තත්ත්වයන් තුළ එය ඉතාම අභියෝගාත්මක කටයුත්තක් වන බවද අමුතුවෙන් කිව යුතු නැත. (2017 වසරේ මෙම සමුළුවෙහි  තේමාව වූයේ 'ප්‍රතිචාර දක්වන  සහ වගකීම් සහගත නායකත්වයක්' යන්නයි.  'සිව්වෙනි කාර්මික විප්ලවය හසුරුවා ගැනීම' යන්න 2016 වසරේ තේමාව විය.
මෙවර සමුළුව සඳහා  සහභාගි වන රාජ්‍ය නායකයින් අතර ඇමෙරිකානු ජනාධිපති ඩොනල්ඩ්  ට්‍රම්ප් විශේෂයෙන් කැපී පෙනේ. මේ වනවිටත් දේශපාලන, ආර්ථික වශයෙන් ඉතා ආන්දෝලනාත්මක ප්‍රතිපත්ති ඉදිරිපත් කරමින්, විශාල අවධානයක් දිනාගෙන සිටින ඔහු සමුළුවේදී කියන කරන දේ ගැන එයට සහභාගි වන සියලුදෙනාගේ විශේෂ අවධානයක් යොමු වනු ඇත.  යුරෝපයට අදාළ ප්‍රතිපත්ති හැඩ ගැස්වීමේදී මේ වනවිට කැපී පෙනෙන නායකයෙකු ලෙස නැගී එමින් සිටින ප්‍රංශ ජනාධිපති එමානුවෙල් මැක්රොන් ද ඩාවෝස් සමුළුවට සහභාගි වන තවත් වැදගත් රාජ්‍ය නායකයෙකි. ආසියානු කලාපයේ තීරණාත්මක ආර්ථිකයක් හිමි ඉන්දියාවේ අගමැති නරේන්ද්‍ර මෝදි ද සමුළුවට සහභාගි වන අතර ඔහු එහිදී දක්වන අදහස් ගැනද කාගේත් විශේෂ අවධානයක් යොමු වනු ඇත. වසර 2050 වනවිට ලොව දවෛනි විශාලම ආර්ථිකය බවට ඉන්දියානු ආර්ථිකය පත්වනු ඇතැයි අනාවැකි පළ වී ඇති පසුබිමක් තුළ ඉන්දියාව මෙවැනි ආර්ථික සමුළුවක කැපී පෙනෙන නියෝජිතයෙකු වීම වැළකිය හැක්කක් නොවේ.  බ්‍රිතාන්‍ය අගමැතිනි තෙරේසා මේ ද සමුළුවට සහභාගි වන තවත් වැදගත් නියෝජිතවරියකි. බ්‍රිතාන්‍යය යුරෝපා සංගමයෙන් වෙන් වීමට කටයුතු කරමින් සිටින මෙම කාලයේ ඇගේ සහභාගිත්වය විශේෂ වැදගත්කමක් ගනියි. මෙම රාජ්‍ය නායකයින්ට අමතරව තවත් බොහෝ රටවල් නියෝජනය කරමින් දේශපාලන ක්‍ෂේත්‍රයේ නායකයින් 350කට ආසන්න පිරිසක් මෙම සමුළුව සඳහා සහභාගි වීමට නියමිතව තිබේ.
'බෙදුණු ලෝකයක හවුල් අනාගතයක්' යන්න මෙවර සමුළුවේ තේමාව වුවද එය සාක්ෂාත් කර ගැනීම වර්තමාන යථාර්ථයන් හමුවේ කතෛක් දුරට ප්‍රායෝගිකද යන්න සම්බන්ධයෙන් බරපතළ ගැටලු ඇති බවද අමතක කළ නොහැක. උදාහරණයක් ලෙස ලොව අංක එකේ ආර්ථිකය හිමි ඇමෙරිකාවේ ජනාධිපතිවරයා වන ඩොනල්ඩ් ට්‍රම්ප් යනු 'පළමුව ඇමෙරිකාව' යන තේමාව මත සිය රට මෙහෙයවීමට පෙරමුණ ගෙන සිටින නායකයෙකි. ඔහුට ජනතාව ඡන්දය දුන්නේද ඒ නිසා ය. මෙවැනි සටන් පාඨ ලෝකයේ බෙදුණු බව තවත් වර්ධනය කිරීමට දායක වන ඒවා විනා එය සමනය කිරීමට උදව්වන ඒවා නොවන බව අමුතුවෙන් කිව යුතු නොවේ. මේ වනවිට මැද පෙරදිග, කොරියාව වැනි කලාපයන් හි පවතින ආතතීන් සහ  උග්‍ර ගැටුම්කාරී තත්ත්වයන් හමුවේ ද ලොව රටවල් කඳවුරුවලට බෙදෙමින් වඩාත් යුදවාදී දිශාවන් ඔස්සේ ගමන් කරන අයුරු පැහැදිලිවම දැකිය හැකි වෙයි. මෙවැනි වාතාවරණයක් තුළ හවුල් අනාගතයක් පිළිබඳ සිහිනය කෙතරම් දුරට සාක්ෂාත් කරගත හැකි වනු ඇත්ද යන්න බරපතළ ගැටලුවක් වන අතර මෙවර සමුළුවේදී මේ පිළිබඳ අර්ථවත් සංවාදයක් ඇතිවන්නේ නම් එය වැදගත් වනු ඇත.
ලෝකයේ ආර්ථික ක්‍රියාකාරිත්වයන් සම්බන්ධයෙන්  අවධානයට ලක් වන තවත් වැදගත් කාරණයක් වන්නේ ආර්ථික විෂමතා ඉතා දරුණු ආකාරයෙන් ඉහළ යමින් තිබිමයි. මෑතක ප්‍රකාශයට පත් වූ ඇතැම් සංඛ්‍යා‍ලේඛනවලට අනුව ලොව ජනගහනයෙන්  පහළ ස්ථරයේ ජීවත්වන  සියයට 50 කගේ (බිලියන 3.6කගේ)  වත්කම්වලට සමාන වත්කම් ප්‍රමාණයක් ඉහළම ස්ථරයේ සිටින ධනවතුන් 8 දෙනා සතු බව සඳහන් විය. එමෙන්ම 2017 වසර තුළ, ලොව වඩාත්ම ධනවත් පුද්ගලයින් 500 දෙනාගේ වත්කම් ඇමෙරිකානු ඩොලර් ට්‍රිලියනයකින් ඉහළ ගොස් ඇති බවද අනාවරණය විය. මෙම ධනවතුන් අතරින් වැඩි දෙනෙකුද ඩාවෝස් හි ආර්ථික සමුළුවට සහභාගි වීමට නියමිතව තිබේ. කෙසේ හෝ වේවා පවතින ක්‍රමය තුළ ධනවතුන් වඩ වඩාත් ධනවත් වෙද්දී දුප්පතුන් වඩාත් දුප්පත් වීමේ ප්‍රවණාවක් පවතින බව නිතර සාකච්ඡාවට ලක් වන්නකි.   මෙම විෂමතාවන්ද  ලෝකයේ විවිධ කලාපවල අසහනකාරී තත්ත්වයන් සහ ගැටුම්කාරී තත්ත්වයන් ඇති කිරීමට දායක වන සාධකයක් ලෙස හඳුනාගත හැකි වෙයි. මේ වනවිට යුරෝපය තුළ ප්‍රධාන අර්බුදයක් බවට පත්ව ඇති සංක්‍රමණිකයින් පිළිබඳ ගැටලුවටද විශාල වශයෙන් මෙවැනි ආර්ථික විෂමතා බලපා ඇති බව රහසක් නොවේ. ආර්ථික වශයෙන් පහළ මට්ටමේ පවතින රටවල සිට යුරෝපය වෙත විශාල වශයෙන් ජනතාව සංක්‍රමණය වෙමින් සිටින අතර මේ නිසා යුරෝපය තුළ මතුව ඇති ගැටලු හේතුවෙන් යුරෝපා සංගමයේ පැවැත්ම පවා අභියෝගයට ලක්ව තිබේ. යුරෝපා රටවල අලුතෙන් බලවත් වෙමින් ඇති ජාතිකවාදී දේශපාලන පක්ෂ සහ කණ්ඩායම් බොහොමයක් කියා සිටින්නේ යුරෝපයේ දේශ සීමා නීති වඩාත් දැඩි කරමින් තම රටවල් යුරෝපා සංගමයෙන් ඈත් විය යුතු බවයි. මෙයද ලෝකය තව තවත්  බෙදා වෙන්කිරීමට දායක වන කාරණයක් ලෙස සැලකිය හැක්කකි. ඩාවෝස් ආර්ථික සමුළුව වැනි සමුළුවලින් බලා‍පොරොත්තු වන අන්දමට 'හවුල් අනාගතයක්' ගොඩනැගීමේදී මෙවැනි කාරණා කළමනාකරණය කරගන්නේ කෙසේද යන්න සම්බන්ධයෙන්ද විශේෂ අවධානයක් යොමු කිරීමට සිදුවීම වැළකිය හැකි නොවේ.
කෙසේ හෝ වේවා, අද ස්විට්සර්ලන්තයේදී ඇරඹෙන මෙම  ආර්ථික සමුළුව ලබන 26 වෙනි දින දක්වා පැවැත්වෙන අතර එහිදී සාකච්ඡාවට ලක්වන කාරණා සහ ගනු ලබන පියවර සම්බන්ධයෙන් කාගේත් දැඩි අවධානය යොමු වනු නිසැකය. එමෙන්ම ලෝකයේ ආර්ථික, ව්‍යාපාරික බලවතුන් කටයුතු කරන ආකාරය පිළිබඳව විරෝධය දක්වන පාර්ශ්වවල විරෝධතා ව්‍යාපාරද  මෙම සමුළු පැවැත්වෙන අතරතුර නිතර දක්නට ලැබෙන දසුනක් වන අතර මෙවරද එහි අඩුවක් නොවනු ඇත.

නිහාල් පීරිස්

ලබන 25 වෙනිදා ඉන්දියාවේ සිනමාශාලා ගිනි තබන බවට ඉදිරිපත්ව ඇති තර්ජනය මේ දිනවල එරට විශාල ආන්දෝලනයක් ඇති කරන කාරණාවක් බවට පත්ව තිබේ. මෙම තර්ජනය ඉදිරිපත්ව ඇත්තේ සුප්‍රකට බොලිවුඩ් සිනමා අධ්‍යක්ෂ සංජේ ලීලා බන්සාලිගේ අලුත්ම චිත්‍රපටය වන ‘පද්මාවතී’ කේන්ද්‍ර කරගෙනය. ඉන්දියාවේ ප්‍රාන්ත කිහිපයක දැන් ටික කලෙක සිටම බන්සාලිගේ සිනමාපටයට එරෙහිව දැඩි විරෝධතා එල්ල වෙමින් ඇති අතර එය ප්‍රදර්ශනය ආරම්භ කිරීමට නියමිතව ඇති ලබන 25 වෙනිදා කවර තත්ත්වයක් ඇති වනු ඇත්ද යන්න දැන් කා තුළත් ලොකු කුතුහලයක් ඇති කරන්නට සමත්ව තිබේ. පසුගිය දිනවල මෙම චිත්‍රපටය නිසා බන්සාලිට මෙන්ම එහි ප්‍රධාන නිළිය වන දීපිකා පාදුකෝන්ට ද මරණ තර්ජන පවා එල්ල වූ බව රහසක් නොවේ.
ඉන්දියානු රුපියල් කෝටි 200ක් වැනි විශාල මුදලක් වැය කර නිපදවන ලද ‘පද්මාවතී’ චිත්‍රපටයට පසුබිම් වන්නේ ඉන්දියාවේ පුරාවෘත්තයක් බවට පත්ව ඇති රජෙකු සහ ඔහුගේ බිසව පිළිබඳ කතාවකි. මධ්‍යකාලීන ඉන්දියාවේ විසූ රතන් සිං නමැති මෙම රජු සහ ඔහු විවාහ වී සිටි බව කියන පද්මාවතී නමැති බිසව පිළිබඳ මෙම කතාව එන්නේ 16 වෙනි සියවසේදී මලික් මුහමද් ජයසි විසින් රචනා කරන ලද කාව්‍ය සංග්‍රහයකය.  එයට අනුව පද්මාවතී එකල ඉන්දියාවේ විසූ රූමත්ම කාන්තාව ලෙස සැලකිණි. ඇය ලංකා දේශයේ උපන් කෙනෙකු බවත් පසුව රතන් සිං ඇය විවාහ කරගෙන ඉන්දියාවට කැන්දාගෙන ගිය බවත් මෙම කාව්‍යයෙහි සඳහන් වේ.  කෙසේ හෝ ඇයගේ රූමත් බව පිළිබඳ දැනගන්නා මුස්ලිම් ජාතික සුල්තාන්වරයෙකු වන අලවුදින් කිල්ජි ඇය පිළිබඳ තෘෂ්ණාවෙන් බැඳී පද්මාවතී රැගෙන යනු පිණිස මහා සේනාවක්ද සමග විත් රතන් සිංගේ රාජධානිය ආක්‍රමණය කරයි. රතන් සිං තමාගේ චිතෝර් රාජධානියත් (වත්මන් රාජස්ථානය),  සිය ආදරණීය බිරිඳත් රැක ගනු පිණිස සටන් වදියි. නමුත් අවසානයේ අලවුදින් කිල්ජි රජුගේ බලකොටුව බිඳ එහි ඇතුළු වීමට සමත් වෙයි. බිහිසුණු සටනකින් පසුව රතන් සිං මරණයට පත්  වුවද  අලවුදින්ට පද්මාවතී රැගෙන යාමට නොහැකි වෙයි. ඒ ඇය සිය ගෞරවයත්, පති භක්තියත් වෙනුවෙන් සිරුරට ගිනි තබාගෙන ජීවිතය අවසන් කරගන්නා බැවිණි. ‘පද්මාවතී’ සැලකෙන්නේ ආත්ම ගෞරවයත්, වීරත්වයත්, තෘෂ්ණාවත් අතර ගැටුම් නිරූපණය කරන සිනමා නිර්මාණයක් ලෙසිනි. පද්මාවතී බිසව සැබැවින් ජීවත් වූ  චරිතයක්ද, නැතහොත් කල්පිතයක්ද යන්න සම්බන්ධයෙන් ඉතිහාසඥයන් අතර මතභේද පවතී.
කෙසේ නමුත් බන්සාලි මෙම චිත්‍රපටය රූගත කරමින් සිටි කාලයේ සිටම ඊට එරෙහිව විශාල වශයෙන් විරෝධතා මතුවෙන්නට විය. මේ ආකාරයෙන් විරෝධය දක්වන්නට වූයේ මෙම රජු සහ බිසව අයත් යයි සැලකෙන රාජ්පුත් වංශයේ ඉතිහාසය සහ සංස්කෘතිය රැක ගැනීම වෙනුවෙන් පෙනී සිටින බලවේගය.  කාර්නි සේනා නම් සංවිධානයක් මෙහි ඉදිරියෙන්ම සිටියි. ඉන්දියාවේ පාලක පක්ෂය වන භාරතීය ජනතා පක්ෂයට සම්බන්ධ අය ද ඒ අතර සිටින බව පෙනිණි. ඔවුන්ගේ විරෝධයට ප්‍රධාන වශයෙන්ම හේතු වූයේ චිත්‍රපටය ඉතිහාසය විකෘති කරන බවට නැගුණු චෝදනායි. විශේෂයෙන් පද්මාවතී බිසවගේ චරිතය නිරූපණය කර ඇත්තේ ඇයට අගෞරවයක් වන ආකාරයෙන් බවට චෝදනා මතු විය. නිදසුනක් ලෙස, ඇයගේ නැටුමක් සහ එහිදී ඇය හැඳ සිටින ඇඳුම් සම්බන්ධයෙන් මතු වූ විරෝධතා සඳහන් කළ හැකිය. එමෙන්ම පද්මාවතී සහ ආක්‍රමණික අලවුදීන් ආලයෙන් මත්ව සිටින අයුරු දැක්වෙන  සිහින ජවනිකාවක් සම්බන්ධයෙන්ද එවැනිම විරෝධතාවක් පැන නැගිණි. නමුත් චිත්‍රපටයේ නිර්මාණකරුවන් පවසා සිටියේ එවැනි ජවනිකාවක් එහි නොමැති බව සහ මෙම විරෝධතා හුදෙක් විවිධ කටකතා මත පදනම් වූ ඒවා පමණක් බවයි. පද්මාවතී පැහැරගන්නට ආ, ඉතා දරුණු පාලකයෙකු ලෙස සැලකෙන අලවුදීන් ඇය සොයා පැමිණියේ ඈ පිළිබඳ ආදරයෙන්ය යන බොරු අදහසක් ඇති කිරීමට චිත්‍රපටය උත්සාහ දරා ඇති බවටද විරෝධතා පළවෙයි. 
මේ අතර මෙම විරෝධතා සංවිධානය කළ ඇතැම් කණ්ඩායම්වලට එරෙහිවද විවිධ චෝදනා නැගෙන්නට විය. ඔවුන් සිනමා නිෂ්පාදකයන් මේ ආකාරයෙන් බිය වද්දා කප්පම් ගන්නා බවට නැගුණු චෝදනාව එවැන්නකි. මේ අතර ඇතැම් සංවිධාන බන්සාලිට සහ දීපිකාට එරෙහිව මරණ තර්ජන පවා කරමින් ඔවුන් මරා දමන අයට කෝටි ගණන් මුදලින් තෑගි පිරිනමන බවද ප්‍රකාශ කළෝය. මෙම තත්ත්වය නිසා වහාම ඔවුන් වෙනුවෙන් විශේෂ ආරක්ෂාවක් සැපයීමට පවා ‍පොලීසියට සිදුව තිබිණි. අලවුදීන් කිල්ජිගේ චරිතය රඟපාන රන්වීර් සිංගේ කකුල් කඩන බවටද තර්ජන එල්ල කර තිබිණි. වරක් චිත්‍රපටය රූගත කරන දර්ශන තලයකදී අධ්‍යක්ෂ බන්සාලි ප්‍රහාරයකටද ලක් වූයේය. කෙසේ හෝ වේවා මෙම විරෝධතා සහ තර්ජන ගර්ජන හමුවේ ඉන්දියාවේ ‘’චිත්‍රපට අනුමත කිරීමේ මධ්‍ය මණ්ඩලය’’ චිත්‍රපටයට අනුමැතිය දීම ප්‍රමාද කළ අතර පසුව යම් යම් වෙනස්කම් කිරීමෙන් පසු ඊට අනුමැතිය ලබා දීමට කටයුතු කළේය. චිත්‍රපටයේ නම පවා දැන් ‘පද්මාවතී’ නොව ‘පද්මාවත්’ යනුවෙන් වෙනස් කර තිබේ. නමුත් වෙනස්කම් කළා වුවත් චිත්‍රපටය පෙන්වීමට ඉඩ නොදෙන බව විරෝධතාකරුවෝ පවසති. විශේෂයෙන් රාජස්ථාන්, ගුජරාට්, හර්යානා,මධ්‍ය ප්‍රදේශ් යන ප්‍රාන්තවල මෙම තත්ත්වය  දරුණු ලෙස දක්නට ඇතැයි සඳහන් වේ.  යම් විදියකින් එය තිරගත කිරීමට කටයුතු කළහොත් සිනමා ශාලා ගිනි තබන බවට සමහර සංවිධාන තර්ජනය කර තිබේ. මෙම තත්ත්වය තුළ කලබල ඇති වනු ඇතැයි යන බිය නිසා චිත්‍රපටය ප්‍රදර්ශනය නොකිරීමට මෙම ප්‍රාන්තවල බලධාරීන් තීරණය කර ඇති බවද සඳහන් විය. මෙම තත්ත්වය වෙනස් කර ගැනීම සඳහා ‘පද්මාවත්’ 
නිෂ්පාදකයන් අධිකරණයට ගිය අතර අධිකරණය ඉහත කී තහනමට එරෙහිව තීන්දුවක් ලබා දී ඇති බව වාර්තා වේ. කෙසේ හෝ වේවා, මෙම උණුසුම් වාතාවරණය තුළ ලබන 25 වෙනිදා කවර තත්ත්වයක් ඇති වේවිද යන්න  දැන් කවුරුත් මහත් කුතුහලයෙන් යුතුව බලා සිටින කාරණයක් බවට පත්ව ඇති අතර එය නිසැකවම බොලිවුඩ් සිනමාවට ඉතා විශේෂ දවසක් බවට පත්වනු ඇත. චිත්‍රපටය කිසිදු සංස්කරණයකින් තොරව ප්‍රදර්ශනය කිරීමට බ්‍රිතාන්‍යයේ ප්‍රදර්ශකයින් ගත් තීරණයකට එරෙහිවද මේ වනවිට විශාල විරෝධයක් එල්ල වෙමින් ඇත. බ්‍රිතාන්‍යයේ පවා  සිනමා ශාලා ගිනි තබන බවට මෙම පාර්ශ්ව තර්ජනය කර ඇති අයුරු පසුගිය දිනවල මාධ්‍ය හරහා වාර්තා විය.  
 
කිත්සිරි මල්වත්ත

ස්පාඤ්ඤය දෙකඩ වීමේ අනතුර හෙවත් එහි එක් 'ප්‍රාන්තයක්' වන කැටලෝනියාව ස්පාඤ්ඤයෙන් වෙන්ව ස්වාධීන රාජ්‍යයක් බවට පත්වීමේ සූදානම මේ දිනවල ලෝක දේශපාලන කරළියේ නිතර අවධානයට ලක්වන කාරණාවකි. දැන් මාස කිහිපයක සිටම මේ සම්බන්ධ වැදගත් සිදුවීම් දාමයක් ඉදිරියට යමින් ඇති අතර තවමත් එහි නිශ්චිත අවසානයකට ළඟා වී නොමැත. කෙසේ වෙතත් මෙම ක්‍රියාදාමය හා බැඳුණු තවත් වැදගත් සිද්ධියක් පසුගිය 17 වෙනි බදාදා කැටලෝනියාවෙහි සිදු විය. එනම් මෙයට මාස කිහිපයකට පෙර ස්පාඤ්ඤ මධ්‍යම රජය විසින් විසුරුවා හරිනු ලැබිමෙන් පසු අක්‍රියව පැවැති කැටලෝනියාවේ කලාපීය පාර්ලිමේන්තුව නැවත රැස්වීමයි. මෙම සිදුවීමෙහි ඇති විශේෂත්වය පිළිබඳ සලකා බැලීමට පෙර මතෛක් කටයුතු සිදුවූ අන්දම පිළිබඳ නැවත සිහිපත් කිරීම වැදගත් වෙයි.
ස්පාඤ්ඤය සැදී ඇති, ප්‍රාන්ත හා සමාන කලාපීය ඒකක 17න් එකක් වන කැටලෝනියාවේ පාර්ලිමේන්තුව අවසන් වරට විසුරුවා හරින ලද්දේ පසුගිය ඔක්තෝබරයේය. එයට හේතු වූයේ කැටලෝනියානු කලාපීය ආණ්ඩුව විසින් පවත්වන ලද ජනමත විචාරණයකින් පසු ඒක පාර්ශ්වීයව ස්වාධීන රාජ්‍යයක් ප්‍රකාශයට පත් කිරීමට ඔවුන් පියවර ගැනීමයි. මෙම ජනමත විචාරණයේදී කැටලෝනියානු ඡන්දදායකයන්ගෙන් සියයට 43ක් ඡන්දය ප්‍රකාශ කළ බව සඳහන් වූ අතර එයින් සියයට 92ක් කැටලෝනියාවේ නිදහස වෙනුවෙන් ඡන්දය දී තිබූ බව වාර්තා විය. කෙසේ වෙතත් මෙම ජනමත විචාරණයට ස්පාඤ්ඤයේ මධ්‍යම ආණ්ඩුවෙන් මුල සිටම පළ වූයේ දැඩි විරෝධයකි. ස්පාඤ්ඤ ආර්ථිකයට විශාල දායකත්වයක් දක්වන කැටලෝනියාව වෙන් වී යාම ඔවුන්ට කිසිසේත් පිළිිගත හැක්කක් නොවීය.  ආරක්ෂක අංශ යොදවා ජනමත විචාරණය කඩාකප්පල් කිරීමට ඔවුන් උත්සාහ කළ නමුත් එය එතරම් සාර්ථක වූයේ නැත. අවසානයේ ජනමත විචාරණයේ ප්‍රතිඵලය මත පදනම් වෙමින් කැටලෝනියා ආණ්ඩුව කැටලෝනියාව වෙනම රාජ්‍යයක් ලෙස ඒක පාර්ශ්විකව ප්‍රකාශයට පත් කළේය. එය දැඩි ලෙස හෙලා දුටු මධ්‍යම ආණ්ඩුව මේ සියල්ල ව්‍යවස්ථා විරෝධී බව පවසමින් කැටලෝනියා පාර්ලිමේන්තුව විසුරුවා හැරීමටත්, එහි පාලනය මධ්‍යම රජය යටතට ගැනීමටත් පියවර ගත් අතර නැවත කැටලෝනියාවේ මැතිවරණයක් පවත්වා අලුත් ආණ්ඩුවක් පත් කරගැනීම සඳහා ඉඩකඩ විවර කෙරිණි. ඒ අනුව එම මැතිවරණය පැවැත්වුණේ පසුගිය දෙසැම්බර් 21 වෙනි දිනය.
කෙසේ නමුත්, එම මැතිවරණයෙන්ද නැවතත් වැඩි වාසි හිමිකරගනු ලැබුවේ කැටලෝනියාවේ නිදහස වෙනුවෙන් සටන් කරන බෙදුම්වාදී පක්ෂ  විසින්මය.  මේ නිසා ස්පාඤ්ඤ රජය නැවතත් අර්බුදයක සිර වූ බව පෙනිණි. කැටලෝනියාවේ පාර්ලිමේන්තුව ආසන 135කින් සමන්විත වන  අතර එයින් බහුතරයක්, (ආසන 70ක්) දිනාගන්නට බෙදුම්වාදී පක්ෂ සමත්ව සිටියි. ඉහත සඳහන් කළ ආකාරයට මැතිවරණයෙන් පසු පළමු වතාවට කැටලෝනියාවේ නව පාර්ලිමේන්තුව රැස් වූයේ පසුගිය 17 වෙනි බදාදාය.
කැටලෝනියා පාර්ලිමේන්තුවේ ආසන 70ක් හිමි කරගෙන සිටින බෙදුම්වාදී පාර්ශ්වයේ නායකයා ලෙස පිළිගැනෙන්නේ  කලින් පැවැති කැටලෝනියා ආණ්ඩුවේද ප්‍රධානියා (ජනාධිපති) වූ කාලෝස් පුයිජ්ඩෙමන්ට් ය. කැටලෝනියාව ස්පාඤ්ඤයෙන් වෙන් වූ නිදහස් රාජ්‍යයක් බවට පත් කරගැනීමේ අරගලයේ කැපී පෙනෙන නායකයා වන්නේ ඔහුයි. නමුත් මේ වනවිට ඔහු සිටින්නේ ස්පාඤ්ඤයෙන් පලා ගොසිනි. එයට ප්‍රධාන වශයෙන්ම හේතු වූයේ ස්පාඤ්ඤ රජයට එරෙහිව කැරලිගැසීම සහ රාජද්‍රෝහී බව යන චෝදනා මත ඔහු අත්අඩංගුවට ගැනීමට ඉඩ තිබුණු බවට වූ සැකසංකා ය.  ඔහුගේ පාර්ශ්වයේ කිහිප දෙනෙකුම මේ වනවිටත් අත්අඩංගුවේ පසුවන අතර පුයිජ්ඩෙමන්ට් සමග තවත් කිහිප දෙනෙක් රටින් පලා ගියෝය. ඔවුන් දැන් වාසය කරන්නේ බෙල්ජියමේ බව විශ්වාස කෙරේ. මේ අනුව පුයිජ්ඩෙමන්ට්ගේ කඳවුරේ ප්‍රධාන ක්‍රියාකාරිකයන් අට දෙනෙක් මේ වෙද්දී එක්කෝ අත්අඩංගුවේ හෝ රටින් බැහැරව හෝ සිටිති.
මෙවර පාර්ලිමේන්තුවට පත්ව සිටින බෙදුම්වාදී පක්ෂවල මන්ත්‍රීවරුන්ට මීළඟට ජයගැනීමට ඇති අභියෝගය බවට පත්ව ඇත්තේ නැවතත් කැටලෝනියාව තුළ තමුන්ගේ ආණ්ඩුවක් තහවුරු කර ගැනීමයි. එහිදී පාර්ලිමේන්තුවේ කථානායක සහ ආණ්ඩුවේ ප්‍රධානියා වන ජනාධිපති  යන තනතුරු සඳහාද, පාර්ලිමේන්තුවේ පාලක කමිටුව සඳහාද තම එකමුතුවේ නියෝජිතයන් පත් කරගැනීම  තීරණාත්මක කටයුත්තක් බවට පත්ව තිබේ. බදාදා පාර්ලිමේන්තුව රැස් වූ අවස්ථාවේ කථානායක ධුරය සඳහා තම නියෝජිතයෙකු පත් කර ගැනීමට බෙදුම්වාදී එකමුතුව සමත් වීම ඔවුන් ලැබූ පළමු ජයග්‍රහණය ලෙස සැලකෙයි. ඊළඟ වැදගත් කටයුත්ත ලෙස ඉතිරිව තිබෙන්නේ ආණ්ඩුවේ ප්‍රධානියා වන ජනාධිපති පත් කරගැනීමයි. බෙදුම්වාදී කණ්ඩායමේ අදහස වන්නේ කාලෝස් පුයිජ්ඩෙමන්ට්ම ඒ සඳහා නැවත තෝරාගැනීමයි. නමුත් මේ සම්බන්ධයෙන් දැන් විශාල ගැටලුවක් පැන නැගී තිබෙනු දැකිය හැකි වෙයි. එනම්  ඔහු නැවත ස්පාඤ්ඤය වෙත නොපැමිණ ජනාධිපති ධුරයේ කටයුතු කරන්නේ කෙසේද යන්නයි. පුයිජ්ඩෙමන්ට් නැවත සිය රටට පැමිණියහොත් ඔහු වහා අත්අඩංගුවට ගනු ඇතැයි යන්න බහුතරයකගේ විශ්වාසය වී තිබේ. කෙසේ නමුත්, ඔහුගේ කණ්ඩායමේ අය පවසන්නේ ඔහු ස්පාඤ්ඤයට නොපැමිණියත් වෙනත් රටක සිට ධුරයේ කටයුතු කළ හැකි බවයි. නමුත් ස්පාඤ්ඤයේ අගමැති මරියානෝ රයෝයි මේ සම්බන්ධයෙන් කිසිදු බුරුලක් දක්වන්නේ නැත. විදේශයක සිට කැටලෝනියාවේ ජනාධිපති ධුරය දැරීම ව්‍යවස්ථා විරෝධී බව ඔහු තදින් පවසන අතර පුයිජ්ඩෙමන්ට් නැවත එම ධුරයට පත් කරගතහොත් තවදුරටත් කැටලෝනියාවේ පාලනය මධ්‍යම රජය යටතේම තබා ගන්නා බව ඔහු පවසා තිබේ.
කෙසේ හෝ වේවා ජනාධිපති කෙනෙකු පත් කරගැනීම සඳහා තවත් ඉතිරිව ඇත්තේ සති දෙකක කාලයක් පමණි. ජනවාරි 31 වෙනි දින ඒ සඳහා ඡන්ද විමසීමක් පැවැත්වේ. එහිදී පුයිජ්ඩෙමන්ට් නැවත ඒ සඳහා පත් කරගැනීමට බෙදුම්වාදී පක්ෂවලට හැකි වේවිද යන්න මේ වනවිට කවුරුත් අවධානයෙන් බලා සිටින කාරණාව බවට පත්ව තිබේ. කැටලෝනියාව සම්බන්ධ සිදුවීම් දාමයේ ඊළඟ අවදිය එළැඹෙනු ඇත්තේ එම සිදුවීමෙන් පසුව බැවිනි.

නිහාල් පීරිස්

ඇමෙරිකානු ජනාධිපති ඩොනල්ඩ් ට්‍රම්ප් යනු විවිධ හේතු නිසා නිතර කතාබහට ලක්වන, පුවත් මවන්නෙකු බවට පත්ව සිටින බව අමුතුවෙන් කිව යුත්තක් නොවේ. ඔහුගේ දේශපාලන තීන්දු තීරණ, ඔහුගේ ට්විටර් පණිවිඩ, ඔහු විසින් කරනු ලබන ඇතැම් ප්‍රකාශ ආදී බොහෝ දේ නිතරම සමාජය තුළ දැඩි අවධානයට ලක් වෙමින් විවිධ කැළඹීම්,  ආන්දෝලනයන්, මත ගැටුම් ඇති කරන්නට සමත් වන ආකාරය දැකිය හැකි වෙයි. කෙසේ හෝ වේවා මේ දිනවල ඔහු සම්බන්ධයෙන් කතාබහට ලක්වන එක් කාරණයක් බවට පත්ව තිබෙන්නේ ඔහුගේ සෞඛ්‍යය පිළිබඳ කාරණයයි. මේ ගැන වඩාත් අවධානයට ලක්වන්නට පටන් ගත්තේ ට්‍රම්ප්ගේ මානසික සෞඛ්‍යය සම්බන්ධයෙන් පසුගිය දිනවල විශාල ආන්දෝලනයක් ඇති වීම නිසාය. ඔහු ජනාධිපති පදවිය දැරීමට සුදුසු තරමේ මානසික තත්ත්වයක නොසිටින බවට චෝදනා නැගුණු අතර මයිකල් වොල්ෆ් විසින් ලියන ලද ජ්ඪපඥ චදඤ ජ්භපර නැමැති ‍පොතෙන් කියැවුණු ඇතැම් කාරණා එහි දී විශාල වශයෙන් අවධානයට ලක් විය. ට්‍රම්ප් ජනාධිපතිකම වැනි ධුරයක් දැරීමේදී අවශ්‍ය වන මානසික ස්ථාවර බවින් තොර කෙනෙකුය යන අදහසක් වොල්ෆ්ගේ ‍පොතේ ඇතැම් අනාවරණයන් නිසා ගම්‍ය වන අයුරු දැකිය හැකි විය.

කෙසේ හෝ වේවා, පසුගිය සතියේ නැවතත් ට්‍රම්ප්ගේ සෞඛ්‍යය සම්බන්ධයෙන් මෙන්ම ඔහුගේ ආහාර පුරුදු සහ ජීවන ෙශෙලිය ආදිය  සම්බන්ධයෙන්ද බොහෝ දේ කතාබහට ලක්වීමට පටන් ගත්තේය. ඒ, ඔහු එක්තරා වෛද්‍ය පරීක්ෂණයකට මුහුණ දීම හේතුවෙනි. එය ඇමෙරිකාවේ සෑම ජනාධිපතිවරයෙකුම සෑම වසරකටම වරක් පෙනී සිටිය යුතු පරීක්ෂණයකි. ට්‍රම්ප් ද ඔහුගේ ධුර කාලයේ පළමු වසර අවසන් වෙමින් තිබියදී පසුගිය 12 වෙනි දින පළමු වරට මෙම පරීක්ෂණයට පෙනී සිටියේය. නමුත් මෙම පරීක්ෂණයේ ප්‍රධාන අරමුණ වන්නේ ජනාධිපතිවරයෙකුගේ මානසික සෞඛ්‍යය පරීක්ෂා කිරීම නොව ඔහුගේ  ශාරීරික සෞඛ්‍යය පිළිබඳ පිරික්සා බැලීමයි.

ට්‍රම්ප් මෙම පරීක්ෂණයට පෙනී සිටීමට ආසන්න කාලයේ ඔහුගේ ඇතැම් පුරුදු සම්බන්ධයෙන් අපූරු තොරතුරු නිතර මාධ්‍ය තුළ කතාබහට ලක්වෙනු දැකිය හැකි විය. ඔහු බොහෝ විට තෙල් සහ සීනි අධික ආහාර ගැනීමට ප්‍රිය කරන කෙනෙකු බවත්, ව්‍යායාම කිරීමට ප්‍රියක් නැති, එපමණක් නොව ව්‍යායාමවලට එරෙහි මතයක් ද දරන කෙනෙකු බවත් මෙහිදී සඳහන් වනු දක්නට ලැබිණි. සාමාන්‍යයෙන් අධික කැලරි ප්‍රමාණයක් සහිත යයි පිලිගැනෙන, ක්ෂණික ආහාර (ජ්චඵබ ජ්ධධඤඵ)  යනුවෙන් හැඳින්වෙන ආහාර ගැනීමට මෙන්ම සීනී අධික චොකලට් අඩංගු බිම වර්ග පානය කිරීමටද ට්‍රම්ප් කැමැත්ත දැක් වූ බව වරක් ඔහු ගැන ලියූ ‍ලේඛකයෙකු සඳහන් කර තිබිණි. ට්‍රම්ප්ගේ එබඳු එක් ආහාර වේලක පමණක් කැලරි 2430ක් පමණ අන්තර්ගත වන බවත්, දිනකට පිරිමි පුද්ගලයෙකු ගත යුතු සමස්ත කැලරි ප්‍රමාණය 2500 ක් පමණ වන බවත් පැවැසිණි. මේ ආකාරයේ ආහාර ගැනීමට පුරුදු වීම ට්‍රම්ප්ගේ සෞඛ්‍යයට බලපෑ හැකි කාරණාවක් ලෙස ඒ පිළිබඳ අදහස් දැක් වූ වෛද්‍යවරුන් මාධ්‍ය වෙත පවසා තිබිණි. ට්‍රම්ප්ගේ වයස මේ වනවිට අවුරුදු 71ක් වන අතර ඒ පිළිබඳවද මෙහිදී අවධානයට ලක්විය යුතු බව ඔවුන් සඳහන් කර ඇත. ට්‍රම්ප් ඇමෙරිකාවේ ජනාධිපති ධුරයට පත් වයස්ගතම පුද්ගලයෙකු බවද මෙහිදී අමතක කළ නොහැක.
කෙසේ නමුත් ට්‍රම්ප්ගේ සෞඛ්‍ය පුරුදු අතර ඔහුට වාසිදායක එකක් ලෙස සැලකෙන්නේ ඔහු දුම් පානයෙන් සහ මත්පැන් පානයෙන් සහමුලින්ම වැළකී සිටින කෙනෙකු වීමයි. දුම් පානය කරන්නන් දෙස බලා සිටින විට තමාට අපුලක් දැනෙන බව ද,  මත්පැන් පානය නොකිරීමට පෙළඹුණේ  තදින් ඊට ඇබ්බැහිව සිටි සිය සොහොයුරා ෆෙඩී 43 වැනි වියේදී මිය යාමෙන් පසුව බව ද ට්‍රම්ප් වරක් ප්‍රකාශ කර තිබිණි. ට්‍රම්ප් ජීවිතයේ කවදාවත් දුම්පානය හෝ මත්පැන් පානය කර නොමැති බව සඳහන් වේ.

නමුත් ඔහුට අවාසිදායක ප්‍රධාන කාරණයක් ලෙස සැලකෙන්නේ ව්‍යායාම කිරීම පිළිබඳව දක්වන සෘන ආකල්පයයි. ඔහු එය වැදගත් කටයුත්තක් ලෙස සලකන බවක් නොපෙනේ. වුවමනාවට වඩා ව්‍යායාම කිරීමට පුරුදුව සිටි ඔහුගේ මිතුරන් බොහෝ දෙනෙකු දණහිස්වල සහ උකු‍ලේ ආබාධවලට ලක්ව සැත්කම්වලට භාජනය කෙරුණු බව ඔහු වරක් පුවත්පතකට පවසා තිබිණි. දේශපාලන රැස්වීම් සඳහා යාම සහ ඒවායේදී පැය ගණන් සිටගෙන සිටීම ව්‍යායාම කිරීම හා සමාන කටයුත්තක්ය යන්න ට්‍රම්ප්ගේ අදහසයි. ඔහුගේ සෞඛ්‍ය පුරුදු අතර අවධානයට ලක් වන තවත් කාරණාවක් වන්නේ  නින්දයි. තමා සාමාන්‍යයෙන් නිදාගන්නේ දිනකට පැය 4 ත්, 5ත් අතර කාලයක් බව වරක් ඔහු පැවැසුවේය. නමුත් සෞඛ්‍ය සම්පන්න දිවියක් සඳහා  දිනකට පැය හතක අටක නින්දක් අවශ්‍ය බව සාමාන්‍ය පිළිිගැනීමයි. නමුත් ට්‍රම්ප් වරක් හඟවා තිබුණේ වැඩි වේලාවක් නිදාගන්නට පුරුදු වුවහොත් මේ තරගකාරී සමාජයේ ඉදිරියට යාමට නොහැකි බවයි. දිනකට පැය දහයක් දොළහක් නිදාගන්නා පුද්ගලයෙකුට පැය තුන හතරක් නිදාගන්නා පුද්ගලයෙකු සමග තරගයක් දීමට අපහසු නොවේදැයි 2009 වසරේ එක්තරා සම්මුඛ සාකච්ඡාවකදී  ඔහු විමසා තිබිණි.  තමාගේ සාර්ථකත්වයට හේතුව නිදාගන්නා කාලය අඩුවීම බව ඔහු විශ්වාස කරන බව පෙනේ.

කෙසේ වෙතත් ට්‍රම්ප් විෂබිජ සම්බන්ධයෙන් නම් ලොකු බියක් දක්වන කෙනෙකු බවද අනාවරණය වෙයි. තමා නිතර පාවිච්චි කරන පෞද්ගලික භාණ්ඩ  පිටස්තර අයට ඇල්ලීමට පවා ඔහු ඉඩ නොදෙන බව සඳහන් වේ. වරක් බිම වැටී තිබූ ඔහුගේ කමිසයක් අහුලා තැබිමට ගිය ධවල මන්දිරයේ සේවකයෙකුට ඔහු දොස් පවරා ඇති බවද පැවැසේ. එසේම කිසිවෙකු තමාට වස දෙනු ඇතැයි යන බියකින් ඔහු පෙළෙන බවද ට්‍රම්ප් පිළිබඳ ලියැවුණු සමහර ‍ලේඛනවල සඳහන්ව තිබේ. ඔහු ක්ෂණික ආහාර සපයන ආයතනවලින් ආහාර ගන්නේ ද එම බිය නිසා බව වොල්ෆ්ගේ ජ්ඪපඥ චදඤ ජ්භපර ‍පොතේ ද සඳහන්ව තිබේ.

කෙසේ හෝ වේවා, පසුගිය 12 වෙනි දින ට්‍රම්ප්ගේ සෞඛ්‍ය තත්ත්වය සම්බන්ධයෙන් පවත්වන ලද වෛද්‍ය පරීක්ෂණයේ දී හෙළි වී ඇත්තේ ඔහු ඉතාම හොඳ සෞඛ්‍ය තත්ත්වයෙන් පසුවන බවයි. විශේෂයෙන් ඔහුගේ සෞඛ්‍ය පුරුදු හා සසඳා බලන විට මෙය ඉතා හොඳ ප්‍රතිඵලයක් බව  වෛද්‍යවරුන් සඳහන් කර තිබේ. නමුත් කැලරි ප්‍රමාණයෙන් අඩු ආහාර ගැනීමටත්, වැඩි වශයෙන් ව්‍යායාමවල යෙදීමටත් ඔහු යොමු වුවහොත් එය මෙම තත්ත්වය තවත් වැඩි දියුණු කිරීමට හේතු වනු ඇති බව ඔවුන් පවසා තිබිණි.

ට්‍රම්ප්ගේ ඥානන හැකියාවන් (cognitive abilities) සම්බන්ධයෙන්ද මෙහිදී පරීක්ෂණ සිදු කර තිබේ. එහිදී මතක ශක්තිය, අවධානය යොමු කිරීමේ හැකියාව, ගණනය කිරීමේ හැකියාව, සංකල්පනයේ හැකියාව ආදිය ගැන සොයා බලනු ලැබේ. ට්‍රම්ප්ගේ පියා වන ෆේ‍රඩ්රික් ට්‍රම්ප් වයස අසූ ගණන්වලදී අල්ෂයිමර්ස් රෝගයට  ගොදුරු විය. මේ නිසා ට්‍රම්ප්ගේ ද මතක ශක්තිය ආදී ඉහත කී කාරණා ගැන විශේෂයෙන් පිරික්සා බැලෙන බව සඳහන් වේ. නමුත් මෙම පරීක්ෂණයෙන්ද ඔහු හොඳින් සමත්ව ඇති බව මාධ්‍ය අනාවරණය කර තිබිණි.

කිත්සිරි මල්වත්ත

IMAGE

බිරිඳ රැකියාවක් නොකිරීම මගේ සාර්ථකවයට හේතුවක්

IMAGE 2018 Feb 20 14:38
“සිරස ජූනියර් සුපර් ස්ටාර්..” තරගය ගැන මුලින්ම අප ඔබගෙන් විමසන්න කැමතියි.. ඇත්තෙන්ම “සිරස...
Views - 1769

බිරිඳට පින් තකා සුනඛයන්ට දිනපතා සහල් කිලෝ 08ක දනක්

IMAGE 2018 Feb 20 14:23
මිනිසා තිරිසනුන් වන අවස්ථාත් තිරිසනා මිනිසුන් වන අවස්ථාත් අපට බොහෝ විට දක්නට ලැබුණද...
Views - 1041

ලංකාවේ අන්තිම රජු සැඟවූ නිධානය කෝ?

IMAGE 2018 Feb 19 11:34
මහනුවර රජ කළ රාජාධිරාජසිංහ රජුට බිසෝවරුන් කිහිප දෙනෙක්ම සිටියහ. ඔවුන් අතර අලමේලු අම්මා,...
Views - 3109

රඟපෑමෙන් සමුගත් හේතුව නදීකා කියයි

IMAGE 2018 Feb 19 10:41
“චංචල රේඛා” චිත්‍රපටයේ “දං චූටි” නාඳුනන කෙනෙක් එදා සිනමා ලෝලීන් අතර හිටියේ නැහැ....
Views - 4184

කසාද බැඳලා දරුවොත් ඉන්න ඇය මේ කතාව කාටවත් කියන එකක් නැහැ

IMAGE 2018 Feb 18 12:57
අද වන තුරු කාටවත් නොකී රස රහසක් මගේ ජීවිතය තුළත් තියෙනවා. ඇත්තටම ඒ රහස මම ඇර තව එක්කෙනයි දන්නේ....
Views - 7183

ලංකාවේ සුපිරි ධනවතාගේ කෝටි 16 මෝටර් රිය

IMAGE 2018 Feb 18 12:00
2015 ජනාධිපතිවරණ සමයේ දේශපාලන වේදිකාවේ බොහෝ දේ කතාබහ කෙරුණි. මිල අධික ලැම්බ්‍රෝගිනි මෝටර් රථද ඒ...
Views - 6328

Please publish modules in offcanvas position.