lakbima.lk
2017-03-17 ඇමෙරිකා ඩොලරය ගැනුම් මිල රු.150.32 , විකුණුම් මිල රු154.17 | බි‍්‍රතාන්‍යය පවුම ගැනුම් මිල රු.184.90 , විකුණුම් මිල රු191.29 | යුරෝ යුරෝපය ගැනුම් මිල රු.160.89 , විකුණුම් මිල රු.167.08 | ස්වීස් ප‍්‍රෑන්ක් ගැනුම් මිල රු.149.89 , විකුණුම් මිල රු.155.90 | කැනඩා ඩොලරය ගැනුම් මිල රු.112.23 , විකුණුම් මිල රු.116.68 | ඔස්ට්‍රේලියා ඩොලරය ගැනුම් මිල රු.114.35 , විකුණුම් මිල රු.119.49 | සිංගප්පූරු ඩොලරය ගැනුම් මිල රු.106.67 , විකුණුම් මිල රු.110.61 | ජපානය යෙන් ගැනුම් මිල රු.1.3185 , විකුණුම් මිල රු.1.3688 |

හිටපු නියෝජ්‍ය ඇමැතිවරයකු වන විශ්‍රාමික රියර් අද්මිරාල් සරත් වීරසේකර සිව්වැනි ඊලාම් සටන පැවැති සමයේ නාවික හමුදාවේ දෙවැනියා හෙවත් මාණ්ඩලික ප්‍රධානී ලෙස රාජකාරි කළේය. එක්සත් ජාතීන්ගේ යුද අපරාධ චෝදනාවලට එරෙහිව කරුණු දැක්වීමට ඔහු ගිය සතියේ ජිනීවා බලා ගියේය. එම ගමන ගැන ඔහු ජිනීවා නුවර සිට ලක්බිම ඉරිදා සංග්‍රහය ට අදහස් දැක්වූයේ මෙසේය.

ජිනීවා මානව හිමිකම් කොමිසමට වාර්තාවක් බාර දෙන්න ඔබත් ගියා. මොකක්ද එතැනදි වුණේ?
එක්සත් ජාතීන්ගේ සංවිධානය ඉදිරියට ගිහිල්ලා කතා කරන්න පුළුවන් එහි ලියාපදිංචි වූ රාජ්‍ය නොවන සංවිධාන මගින් විතරයි. රාජ්‍ය නොවන සංවිධානවලට එක කමිටුවකදී කතා කරන්න දෙන්නේ තත්පර 90 ක් පමණයි. මෙතනට ඇවිල්ලා කතා කරන එන්.ජී.ඕ. ගත්තාම සියයට සියයක්ම කතා කරන්නේ එල්.ටී.ටී.ඊ. ඩයස්‍පෝරාවට පක්ෂවයි. අපේ පැත්තට කතා කරන්න හිටියේ මම විතරයි.

රජයේ නියෝජිත පිරිසක් රට වෙනුවෙන් කතා කරද්දී ඔබ විතරක් කතා කළා කියන්නේ කොහොමද?
රජය කරන්නේ මොකක්ද? සෙයිඩ් අල් හුසේන්ගේ වාර්තාව අනුවනේ අපේ ප්‍රඥප්තිය හැදුවේ. ඔහුගේ වර්තාවේ තියෙන්නේ අපි යුද අපරාධ කළ බවට සාක්ෂි තිබෙනවා කියලනේ. එම වාර්තාව අගය කරලානේ අපේ විදේශ ඇමැති මංගල සමරවීර කතා කෙරුවේ. ඉකුත් 23 දා කතා කරපු රටවල් 27 ම කතා කළේ අපි යුද අපරාධ කළා කියන පදනමේ ඉඳගෙනයි. හර්ෂ ද සිල්වා, විදේශ කටයුතු නියෝජ්‍ය ඇමැති කිව්වෙත් ඒකමයි.

ඔබ එතන සිටි කෙනෙක් සමග වාදයක් ඇති කරගත් නිසා ඔබට එයින් ඉවත් වෙන්න සිදුවුණා නේද?
නැහැ ඒක වැරදි කතාවක්. අපේ හමුදාව දෙමළ මිනිස්සු සමූල ඝාතනය කරනවා, දෙමළ ජනතාවගේ ඉඩම් හමුදාව බලෙන් අල්ලගෙන ඉන්නවා වගේ කතා කිව්වා. මම විතරයි මේ තත්පර අනූවෙදි යම්කිසි දෙයක් රණවිරුවන් වෙනුවෙන් කතා කරන්න හිටියේ. ප්‍රධාන රැස්වීම්වලට අමතරව තවත් අමතර රැස්වීම් මේ අය සංවිධානය කරනවා. එයිනුත් කරන්නේ අපේ සොල්දාදුවන්ට වගේම අපේ අධිකරණයටත් අපහාස කරන එකයි. ඒ වගේ එකකට තමයි මම එදා ගියේ. එතනදි අපේ අධිකරණයට බැන්නා. පක්ෂග්‍රාහී කිව්වා. මිනී මරන සොල්දාදුවන්ව නිදහස් කරනවා කිව්වා. මේ වගේ බොරු තොගයක් කිව්වට පස්සේ මම කිව්වා එහෙම කියන්න එපා ක්‍රිෂාන්ති කුමාරස්වාමි මරපු වෙලාවේ අපේ සොල්දාදුවන්ට මරණ දඬුවම දුන්නා කියලා. ඒ වගේම දරුණු එල්.ටී.ටී.ඊ. නිලධාරීන් නිදහස් කරනවා වගේම සාක්ෂි නැතිව බුද්ධි නිලධාරින්ව අධිකරණයේ මාස ගණනාවක් රඳවාගෙන හිටියා. එය තමයි අධිකරණයේ ස්වභාවය කියලා මම කිව්වා.
එහෙම කියලා මම නැගිටලා යන්න හදනකොට තමයි ඔය මානිවන්නන් කියන මිනිහා කියන්න පටන් ගත්තේ මෙයා යුද අපරාධ කළ කෙනෙක්, කවුද මෙයාට එන්න දුන්නේ, මෙයාව අත්අඩංගුවට ගන්න ඕනේ කියලා මට බැන්නා. ඒ වෙලාවේ තමයි මම ඇහුවේ ඔයා කොහෙද හිටියේ, අපි 4,95,000 ක් බිම් බෝම්බ ඉවත් කරනකොට කියලා. දෙලක්ෂ අනූදාහක් අවතැන් මිනිස්සු යළි පදිංචි කරනකොට ඔයා කොහෙද හිටියේ කියලා මම ඇහුවා. මම දෙමළ මිනිස්සුන්ට ‍ලේ පවා දීලා තියෙනවා, ඔයා දෙමළ මිනිස්සු වෙනුවෙන් මොනවද කරලා තියෙන්නේ කියලා මම ඇහුවා. එයා හිතුවේ නැහැ මම එහෙම කතා කරයි කියලා. රට බේරාගත් හමුදා නිලධාරීන්ට අපහාස කරන කොට අපට හරිම කනගාටුයි.

ඔබ රැගෙන ගිය විශේෂඥ වාර්තාව ජිනීවා සමුළුවට බාර දුන්නාද?
ඔව් අපි එය භාර දුන්නා. මොකද එය ඉතා අරපරිස්සමෙන් කරන්න ඕන දෙයක්. අපට අවශ්‍ය විදියට ඒක බාර දෙන්න බැහැ. අවශ්‍යම කරන දෙතුන් දෙනෙක්ගේ කාර්යාලවලට එය භාර දුන්නා. ලිපියක් පවා දෙද්දි ඒ අයගේ දැඩි නීති රීති තියෙනවා. මේසයක් උඩ තියලා යන්න ඕනේ. හැබැයි මේසයක් මත නිකම් තියා ගියොත් එල්.ටී.ටී.ඊ. ත්‍රස්තවාදීන්ට සහය දෙන එන්.ජී.ඕ. ඒක උස්සගෙන ගිහින් විනාශ කරනවා. ඉතා පරිස්සමින් තමයි මේ කටයුතු කරන්න වෙන්නේ.

කොහොම වුණත් රජයේ පාර්ශ්වයෙන් කියන්නේ දෙමුහුන් අධිකරණයක් හදන්නේ නැහැ කියලායි. විදේශ නියෝජ්‍ය ඇමැතිවරයාත් එලෙස කිව්ව බව තමයි වාර්තා වුණේ?
නැහැ එතුමා කිසිම අවස්ථාවක එය කිව්වේ නැහැ. මම එතැන හිටියා.

එහෙම නම් රජයේ ස්ථාවරය මොකක්ද?
මම කිව්වේ මම දැක්ක ඇහුව දේ. රජයේ පාර්ශ්වයෙන් කල් ඉල්ලුවා. නමුත් එයට අවසන් තීන්දුවක් දුන්නේ නැහැ. ඔවුන් කිව්වේ කල් ගන්න බැහැ ඉක්මනට මේ කටයුතු කරන්න කියලයි. යුද අපරාධ කරන සොල්දාදුවෝ දංගෙඩියට ඉක්මනට යවන්න කියලා තමයි මේ අය කියන්නේ.

විදේශ විනිසුරුවරුන් ගෙන්වා යුද අපරාධ චෝදනා විභාග කරන්න රජය එකඟ වුණා කියලද ඔබ කියන්නේ?
එකඟතාවක් ඇති වෙලා ඉවරයිනේ. තව මොනවද ඇති වෙන්න තියෙන්නේ. විදේශ ඇමැති මංගල සමරවීර ජිනීවා යෝජනා පිළිගත්තා. ලංකාවේ ආණ්ඩුව කොච්චර නැහැ කිව්වත් එක්සත් ජාතීන්ගේ සංවිධානය ඉදිරියේදී එයා පිළිඅරන් තියෙනවානේ එය කරනවා කියලා. එහෙම නම් එයා තමයි කියන්න ඕනේ මේක කරන්නේ නැහැ කියලා. ඔහු එය කියන්නේ නැහැනේ. එම පිළිගැනීම මතනේ මේ ප්‍රඥප්තිය හැදුණේ. විදේශ ඇමති රට පාවාදීමක් තමයි මෙතනදි කරලා තියෙන්නේ.

කොහොම වුණත් රටේ යුද අපරාධ සිදුවුණ බවට චෝදනාවක් තියෙන අවස්ථාවේ පරීක්ෂණයක් කරලා අපි නිදොස් බව ඔප්පු කරන එකේ ගැටලුවක් තියෙනවද?
යුද අපරාධ කරලා තියෙනවා නම් මෙහෙම චෝදනා කළාට කමක් නැහැ. හමුදා නිලධාරියෙක් හැටියට යුද අපරාධ නොවුණ බව අපි දැක්කා. අපිත් යුද අපරාධවලට විරුද්ධයි. මානුෂීය මෙහෙයුමක් සිද්ධ වුණේ. දෙමළ මිනිස්සු එල්.ටී.ටී.ඊ.ය දාලා එනවද අපි යුද අපරාධ කරනවා නම්. අහිංසක මිනිස්සු බේරාගන්න තමයි මේ යුද්ධය කළේ. අපට විරුද්ධව ජාත්‍යන්තරයේ කතා කරන කොට අප වෙනුවෙන් කතා කරන්න එක්කෙනෙක් නැහැ. ඒකයි කනගාටුව. රට පාවා දෙද්දි මාධ්‍ය නිහඬ ඇයි. 1815 දීවත් මෙවැනි නීච විදියට රට පාවා දුන්නා කියලා මම නම් හිතන්නේ නැහැ.

නමුත් ජනාධිපතිවරයාත්, අගමැතිවරයාත් පුන පුනා කියන්නේ රට පාවා දෙන්නේ නැහැ, දෙමුහුන් යුද අධිකරණ පිහිටුවන්නේ නැහැ කියලා නේද?
එයාලා ඒක කියන්න ඕනේ මංගල සමරවීර ඇමැතිවරයාට. එය එක්සත් ජාතීන්ගේ මානව හිමිකම් කොමිසමට කියන්න කියලයි. ලෝකයේ රටවල් ඉදිරියේ අපේ විදේශ ඇමැතිවරයා කියනවා මේ කාරණයෙන් අපි බැහැර වෙලා නැහැ කියලා. ලංකාවේ ජනතාවට වෙන එකක් කියනවා. ලංකාවේ ජනතාවට ඔය කතා කියලා හරියන්නේ නැහැ. ජිනීවාවලදි තමයි ඔය කතාව කියන්න ඕනේ. ජනාධිපතිටයි, අගමැතිටයි විරුද්ධ මතයක් ප්‍රකාශ කරනවා නම් මංගල සමරවීර ඇමැතිවරයා අස් කරන්න ඕනේ එහෙම නම්.

ඔබ ඔය ගිය ගමනින් රටට ඵලදායී දෙයක් වුණා කියලා හිතනවද?
මෙහෙමනේ, මම ගිය නිසා තමයි හැමෝම කියන දේට වඩා වෙනත් දෙයක් එහි සිටි නියෝජිතයන්ට අහන්න ලැබුණේ. දැන් දෙපැත්තක් තියන බව ඔවුන් දන්නවා.

මෙතනින් එහාට ඔබ කණ්ඩායම  කුමක්ද කරන්න බලා‍පොරොත්තු වෙන්නේ?
ඉදිරියේදී අපි සියලු දෙනා හොඳට සංවිධානය වෙලා ජිනීවා නුවරට එන්න බලා‍පොරොත්තු වෙනවා. මොකද අද මම විතරයි ආවේ. ඉදිරියේදී අපි රාජ්‍ය නොවන සංවිධාන පහක් හයක් එකතු වෙලා ඇවිල්ලා ඇත්ත තත්ත්වය පෙන්නන්න ඕනේ. රජය වැරදි මතයක් ගොඩනගන්න ඉඩ දීලා තියෙනවා. අනෙක රටේ හමුදාවට එරෙහිව බොරු චෝදනා නගපු සියලු දෙනාටම අපේ රජයක් යටතේ නඩු පවරන බවත් මම කියන්න කැමතියි.

ලසන්ත වීරකුලසූරිය

උතුරු පළාතේ යුද්ධය අවසන් වුවත් ජාත්‍යන්තර වශයෙන් ලංකාව සම්බන්ධයෙන් ඇති වූ යුද්ධය තවමත් අවසන් නැත. අවි අතදරාගෙන උතුරේ යුද්ධ කළත් ජාත්‍යන්තර යුද්ධයේදී කවුරුවත් අවි ආයුධ අතට ගෙන නැත. ලංකාවට එරෙහි රටවල් හා ජගත් සංවිධානවල ඇති ආයුධ වන්නේ මානව හිමිකම් සම්බන්ධයෙන් වන චෝදනා හා යුද අපරාධ සම්බන්ධයෙන් වන චෝදනාය. යුද අපරාධ සම්බන්ධයෙන් චෝදනා ගැන කතාව කරළියට එන්නේ එක්සත් ජාතීන්ගේ මානව හිමිකම් කවුන්සිලයේදී ලංකාව සම්බන්ධයෙන් යෝජනා ඉදිරිපත් වන අවස්ථාවේදීය.
මේ දිනවල එක්සත් ජාතීන්ගේ මානව හිමිකම් කවුන්සිලයේදී ලංකාව සම්බන්ධයෙන් සාකච්ඡාවට ලක්වන අතර එහිදී ලංකාව ගැන උණුසුම් වාද විවාද ඇතිවෙයි. මේ අතර විදේශ කටයුතු ඇමැති මංගල සමරවීර පසුගිය සතියේදී ප්‍රකාශ කර තිබුණේ යුද අපරාධ සම්බන්ධයෙන් ඇති සාක්ෂි ගැනය. අවසන් සටනේදී ප්‍රභාකරන් මරා දැමූ 53 වැනි සේනාංකයට අණ දුන් මේජර් ජෙනරාල් කමල් ගුණරත්න ලියූ ‘රණමග ඔස්සේ නන්දිකඩාල්’ කෘතිය යුද අපරාධ සම්බන්ධයෙන් වන ලිපි එකතුවක් බවයි.
“කමල් ගුණරත්නගේ ‍පොත ලංකාව සම්බන්ධයෙන් යුද අපරාධ චෝදනා එල්ල කරන අයට සාක්ෂි සපයනවා” මංගල සමරවීර මාධ්‍ය හමුවේ ප්‍රකාශ කර තිබුණේය. ඔහු වැඩිදුරටත් කියා තිබුණේ කෘතිය රණමග ඔස්සේ නන්දිකඩාල් නොව අහිංසක මිනිසුන්ගේ ගෙවල් කඩාල් යනුවෙන් නම් කළ යුතු බවය. මංගල සමරවීර පවසන්නේ මේජර් ජෙනරාල් කමල් ගුණරත්න විශ්‍රාම යාමෙන් පසුව ප්‍රකාශයට පත්කරන ලද ‍පොත මගින් 1980 දශකයේ අග භාගයේ සිට හමුදාව කෲර ලෙස කටයුතු කර ඇති බව අඟවා ඇති බවයි. එය හමුදාවේ කෲරත්වය පිළිබඳ සටහන් එකතුවක් යැයි විදේශ ඇමැතිවරයා පවසයි. හමුදාව විසින් නිරායුධ දෙමළ ජනතාව ඝාතනය කර ඇති බවටත් දෙමළ ජනතාවගේ නිවාස අත්පත් කරගැනීම පිළිබඳවත් තොරතුරු එකින් එක කමල් ගුණරත්නගේ ‍පොතේ සඳහන් බව මංගල සමරවීර පවසන්නේ ‍පොතේ පිටු අංකද සඳහන් කරමිනි.
කමල් ගුණරත්න සිය ‍පොත එළිදැක්වූ විට එහි භාෂා භාවිතාව ගැන පාඨකයින් අතර වාද විවාද ඇතිව තිබුණේය. දශක ගණනාවක් යුද හමුදා නිලධාරියෙක් ලෙස කටයුතු කළ අයෙකුගෙන් එවැනි බස්වහරකට වඩා වෙනස් බස්වහරක් බලා‍පොරොත්තු විය නොහැකි යැයි ඇතැම් අය පවසන්නට වූ අතර එම භාෂාව වෛරී භාෂාවක් බව ඇතැම්හු පැවසූහ. මේ ගැනත් මංගල සමරවීර ඇමැතිවරයාගේ විවේචනයට ලක්විය.
“1983 ජනමත විචාරණය පැවති අවස්ථාවේදී යුද හමුදාව යාපනේ ගෙවල් බිඳ දැමූ ආකාරයත් මේ ‍පොතේ තියෙනවා. තරුණ හමුදා නිලධාරියෙක් ලෙස තමන් පුදුමයට පත්ව ඒ දෙස බලා සිටි බව තමයි ඔහු කියා තිබෙන්නේ. ඒ විතරක් නමෛයි ඔහු ඇස් කන් නොපෙනෙන අයෙක් ලෙස සිට තිබෙනවා. 1983 ජනමත විචාරණයක් ගැන ඔහු තමන්ගේ ‍පොතේ සඳහන් කර තිබුණත් 1983දී ජනමත විචාරණයක් තිබුණේ නැහැ. ජනමත විචාරණයක් තිබුණේ 1982දී යි” මංගල සමරවීර කමල් ගුණරත්නගේ ‍පොතට විවේචන එක්කරයි.
එල්.ටී.ටී.ඊ. නායක වේලුපිල්‍ලේ ප්‍රභාකරන්ගේ මළ සිරුර හමුවූයේ කමල් ගුණරත්න අණ දුන් සේනාංකයේ සෙබළුන්ටය. ඒ ගැන කමල් ගුණරත්න අවස්ථා දෙකකදී අදහස් දෙකක් ප්‍රකාශ කර ඇතැයි මංගල සමරවීර පවසන්නේය.
“යුද ගැටුම් අවසන්වීමෙන් පසුව 2009 ජුනි 7 වැනිදා ලක්බිම පුවත්පතට සම්මුඛ සාකච්ඡාවක් දෙන මේජර් ජනරාල් කමල් ගුණරත්න පවසා තිබෙන්නේ මිය ගිය ප්‍රභාකරන්නේ මළ සිරුර හමුවන අවස්ථාව වනවිට සිවිල් ඇඳුමක් ඇඳ සිට ඇති බවයි. පසුව හමුදා සෙබළුන් විසින් කොටින්ගේ නිල ඇඳුමක් අන්දවා ඇතැයි පවසා තිබෙනවා. ඒත් තමන්ගේ ‍පොතේ ඔහු සඳහන් කර තිබෙන්නේ ප්‍රභාකරන්ගේ සිරුර හමුවන අවස්ථාවේදී හමුදා නිල ඇඳුමක් ඇඳ සිටි බවයි. තමන්ගේ ප්‍රකාශයන් ඔහුම බාල කරගෙන තිබෙනවා” මංගල සමරවීර පැවසුවේය.
මේජර් ජෙනරාල් කමල් ගුණරත්නගේ ‘රණමග ඔස්සේ නන්දිකඩාල්’ කෘතිය යුද අපරාධ පිළිබද සාක්ෂි එකතුවක් යැයි මංගල සමරවීර පැවසුවත් ‍පොත එළිදැක්වීමට පෙර එය කමල් ගුණරත්නගේ පාසල් මිතුරෙකු වන සොලිසිටර් ජනරාල් යසන්ත කෝදාගොඩ කියවා තිබේ. එපමණක් නොව ‍පොත එළිදැක්වූ අවස්ථාවේදී ඔහු කතාවක් කරමින් ‍පොත ගැන හැඳින්වීමක් කළේය.
මේ ‍පොත මගින් යුද අපරාධ චෝදනාවන්ට සාක්ෂියක් ලෙස යොදාගත හැකිද යන්න ගැන මේජර් ජෙනරාල් කමල් ගුණරත්න පැහැදිලි අදහස් දැක්වීමක් කරන්නේ නැත. ඔහු ඒ සම්බන්ධයෙන් දක්වන්නේ නිහඬ ප්‍රතිපත්තියකි. මේ ගැන ඔහුගේ අදහස් ලබාගැනීමට සම්බන්ධ කරගැනීමට උත්සාහ ගත් නමුත් මේ අවස්ථාවේදී ඒ ගැන ප්‍රකාශයක් කිරීමට ඔහු කැමැති වූයේ නැත.
පසුගිය සැප්තැම්බර් මාසයේදී එළිදැක්වූ ‍පොතක ඇති කරුණු ගැන දැන් සාකච්ඡාවට ලක්වන්නේ ජිනීවාහිදී ලංකාව සම්බන්ධයෙන් සාකච්ඡා ඇති වන නිසාය. මානව හිමිකම් යන මාතෘකාව කරළියට පැමිණ ඇති නිසාය. එහෙත් මේ උණුසුම තව ටික දවසකින් යටයනු ඇතැයි බලා‍පොරොත්තු විය හැක්කේ ලංකාවේ මානව හිමිකම් සම්බන්ධයෙන් කටයුතු කිරීමට තවත් වසර දෙකක කාලයක් ජිනීවා නුවරින් ලැබි ඇති නිසාය. අළු යට ඇති ගිනිපුපුරු මෙන් මෙය යට යමින් දැල්වෙමින් තිබෙනු ඇත. එහෙත් එය යළිත් පුළිඟුවක් සේ මතුවනු ඇත.

සංජය නල්ලපෙරුම

බෞද්ධ මහෝපාසිකාවක ලෙසින් බොහෝ දෙනා අතර ප්‍රකටව සිටිය ද මිලිනා සුමතිපාල මැතිනිය, තියුණු රසාස්වාද ශක්තියකින්ද හෙබි, සෞන්දර්යකාමී කාන්තාවකි. විවිධ කලාවන්හි අන්තර්ගතයන් දෙස මැදිහත් ඇසකින් බලන්නට ඇය සමත් වූවාය. එමෙන්ම කොළඹ නගරයේ ආගමික බෞද්ධ පසුබිමක ජීවත් වුණු විශිෂ්ට යුවළක් ලෙසින්ද සුමතිපාල යුවළ හැඳින්විය හැකිය. ආගමික වශයෙන් ඔවුන් තුළ තිබූ හැදියාව  හා සමාජ සම්බන්ධතාව ඔස්සේ, තම පවුල් ජීවිතයේ ආරම්භයේ සිටම කලා පසුබිමක් ද එකතු කර ගැනීමට ඔවුන් සමත් වී තිබිණි. කලාකරුවන් සමග ඇසුරු කරමින් ඔවුන් ගෙවූ ජීවිතය සිය කටයුතු පහසු කරගැනීම සඳහා ඔවුන්ට වැදගත් වූ බව සිතිය හැකි ය.
ඒ නිසාම සිනමා කලාකරුවන් නිරන්තරයෙන්ම සුමතිපාල යුවළ සමග සබඳකම් පවත්වා ඇත. රුක්මණී දේවි, එඩී ජයමාන්න වැනි සිනමාවේ මුල්කාලීනයන් සුමතිපාල පවු‍ලේ සමීප හිතවතුන් බවට පත් වූ බව දකින්නට ලැබෙයි. එමෙන්ම සිනමාවේ දෙවන පරපුර වූ ගාමිණී, මාලනි, ජෝ අබේවික්‍රම නමැති, සිනමාවේ පතාකයන්ද සුමතිපාල යුවළ තම පවු‍ලේ හිතවතුන් ලෙස ඇසුරු කර ඇති වග කලා ඉතිහාසය සාක්ෂි දරයි. එවන් තත්ත්වයක් තුළ සුමතිපාල යුවළ පසුකාලීනව සිනමා කර්මාන්තය කෙරෙහි සිය අවධානය යොමු කිරීම සාධාරණය. යූ.ඩබ්ලිව්. සුමතිපාල මහතාත්, ආචාර්ය මිලිනා සුමතිපාල මැතිනියත්, යන දෙදෙනාම ආදරය කළේ, කලාවට පමණක් නොවේ. කලාකරුවන් කෙරෙහිද ඔවුන් දැක්වූයේ අසීමිත ආදරයකි. සිය ව්‍යාපාරික ලෝකයට කලාව එකතු කරගන්නට ඔවුන් කල්පනා කරන්නට ඇත්තේ ද එබැවිනි.
එහි පළමු අස්වැන්න වූයේ, සිනමාවේ සමාරම්භක කාලපරිච්ජේදයක, ලාංකේය සිනමාව ඉතාම ජනප්‍රිය වූ කාලයක, ‍පොදු ජනතාවට ගැළපෙන සිනමා නිර්මාණ කෙරෙහි අවධානය යොමු කරමින්, “උන්නත් දාහයි මළත් දාහයි” සිනමා නිර්මාණය ඔවුනතින් බිහි වන්නේය. එවකට සිටි සුප්‍රකට නළු නිළියන් ඒ සඳහා යොදා ගැනීමත්, කරුණාරත්න අබේසේකර වැනි ගේය පද රචකයන්, සරත් දසනායක වැනි සංගීතඥයන්, ලතා වල්‍පොල-ජෝතිපාල වැනි ගායක ගායිකාවන් ඊට සම්බන්ධ කර ගැනීමත් නිසා අසීමිත ප්‍රේක්ෂක ප්‍රසාදයක් ලබා ගන්නට උන්නත් දාහයි-මළත් දාහයි සමත් විය. ඒ නිසා ම මීට දශක පහ හයකට පෙර ජීවත් වූ මිනිසුන්ට අමතක නොවෙන සිනමා නිර්මාණයක් බිහිකරන්නට ඔවුන්ට හැකියාව ලැබිණි.
විශේෂයෙන් මෙකී කටයුතුවලදී, මිලිනා සුමතිපාල මැතිනිය කාන්තාවක, මවක, බිරිඳක ලෙසින් යූ. ඩබ්ලිව්. සුමතිපාල මැතිඳුන්ට විශාල සහයෝගයක් ලබා දීම කැපී පෙනෙන්නකි. ඒ නිසාවෙන් ම ඇය, කලාත්මක සිනමාව වෙතට සිංහල සිනමාව රැගෙන යන්නට සමත් වෙමින්, ආචාර්ය ලෙස්ටර් ජේම්ස් පීරිස් වැනි සිනමාවේ දැවැන්තයන් ඒකරාශී කොටගෙන “අහසින් ‍පොළවට” චිත්‍රපටය නිර්මාණය කරන්නට සමත් වන්නීය.
හෙළ සිනමා වංශ කතාවේ හැත්තෑව දශකය අවසාන භාගයේ, අමතක නොවෙන සිනමා සටහනක් තැබූ විශිෂ්ට ගණයේ නිර්මාණයක් ලෙසින් අදටත් “අහසින් ‍පොළවට” ඇගයීමට පාත්‍ර වේ. එය මෙරට ප්‍රේක්ෂකයන් අතර පමණක් නොව ජාත්‍යන්තර අවධානය පවා දිනාගන්නට සමත් වූ සිනමා නිර්මාණයක් වූ අතර තුන්වන ලෝකයේ හොඳම චිත්‍රපටය ලෙසින් සම්මාන ලබන්නට සමත් විය. දේශීය වශයෙන් ද සම්මාන රැසක් හිමිකර ගත් මෙම චිත්‍රපටයේ එන ඇතැම් ගීත, චිත්‍රපට ගීත සාහිත්‍යය ‍පෝෂණය කරන්නට පවා සමත් වී ඇත..
එපමණක් නොව, මිලිනා සුමතිපාල මැතිනියගේ දායකත්වයෙන් බිහි වූ, “ගඟ අද්දර” චිත්‍රපටයද විශිෂ්ට සිනමා නිර්මාණයක් ලෙසින් එක්දහස් නවසිය අසූ එක වසරේ වැඩිම සම්මාන ගණනකින් පුද ලද සිනමාපටය බවට පත් වූයේ, එය සිංහල සිනමාවේ තවත් සන්ධිස්ථානයක් බවට පත්වෙමිනි.
මිලිනා සුමතිපාල මැතිනිය, බෞද්ධ උපාසිකාවක වශයෙන් සිංහල සිනමාවට කළ විශිෂ්ට මෙහෙවර වන්නේ, “උත්පලවණ්ණා” චිත්‍රපටය නිර්මාණය කිරීමයි. “උත්පලවණ්ණා”, බෞද්ධ සිනමාපටයක් ලෙස සිංහල සිනමාවේ විශේෂ ස්ථානයක් හිමිකර ගන්නට සමත් විය. විශේෂයෙන්ම සංගීතා වීරරත්න නිළිය, මෙහෙණින් වහන්සේ කෙනෙකු ලෙසින් මෙහිදී කරන ලද රංගනය, ඇගේ විශිෂ්ට රංගන ප්‍රතිභාව ප්‍රකට කළ අවස්ථාවක්ද වේ. මෙරට බොහෝ ප්‍රේක්ෂකයෝ උත්පලවණ්ණා සිනමාපටය නරඹා, බුද්ධ කාලීන අපදාන සාහිත්‍යය පිළිබඳව අවධානයට යොමු වන්නටද වූහ.
එමෙන්ම සිය ජීවිතයේ අවසාන භාගයේදී තවත් නව ආරක සිනමා නිමැවුමක් හෙළ සිනමාවට දායක කරන්නට මිලිනා සුමතිපාල මැතිනිය සමත් වූවාය. ඒ, “පත්තිනි” චිත්‍රපටය මගිිනි. පත්තිනි දේවතාවිය පිළිබඳ පුරාවෘත්තය තේමා කරගනිමින්, පූජා උමාශංකර් වැනි
විශිෂ්ට රංගන ප්‍රතිභාවක් සහිත නිළියක යොදා ගනිමින්, පත්තිනි නිමකරන්නට ඇය උත්සුක වී තිබිණි.
එපමණක් නොව “සුමති ටෙලි සම්මාන උළෙල” අරඹමින්, සිනමාවට මෙන්ම සිංහල ටෙලි නාට්‍ය කලාවටත්, එහි දියුණුවට හා ටෙලි නිර්මාණකරුවන් ඇගයීමටත්, මිලිනා සුමතිපාල මහත්මියගේ මෙහෙයවීමෙන් ඉටු කරන ලද කාර්යභාරය ප්‍රශංසනීයය.
මේ අනුව, ව්‍යාපාරික ජීවිතයක ලක්ෂණ ඉක්මවා, ආගමික හා කලාකාමී උපාසිකාවක ලෙසින් සිංහල සංස්කෘතිය සුපුෂ්පිත කරන්නට ඇය විසින් ඉටු කරන ලද මෙහෙවර සියලු දෙනාගේම සම්භාවනාවට පාත්‍ර විය යුතුමය.

කොළඹ සරසවියේ සිංහල අධ්‍යයන අංශයේ අංශාධිපති මහාචාර්ය අගලකඩ සිරිසුමන හිමි

බසයේ සිට් ‘ලක්බිම’ මාධ්‍යවේදියා හෙළිකරන කතාව

හරියටම මෙයට වසර දහතුනයි මාස අටකට පෙර මම මාරයාගෙන් ගැලවුණෙමි. එකල මා වයඹ පළාත් සභාව යටතේ එක්තරා කාර්යාලයක සේවයෙහි නිරතව සිටියෙමි. ඒ අතරේ මාධ්‍යවේදියකු ලෙසද සේවය කළෙමි. මගේ සේවා ස්ථානය වූයේ ඉබ්බාගමුව ප්‍රාදේශීය සභාව යටතේ පැවැති කුඹුක්ගැටේ ප්‍රාදේශීය සභා උප කාර්යාලයය මම එහි ස්ථානභාර නිලධාරිවරයා වීමි. සෑම සතියකම කාර්යාලයට ලැබෙන මුදල් සතියේ අවසන් දින බැංකුවෙහි තැන්පත් කර ප්‍රධාන කාර්යාලයට වාර්තා කිරීම මගේ රාජකාරියෙහි එක් කොටසක් විය. එදිනද සිකුරාදා දිනයක් විය. මා මුදල් හා සියලු ලිපි ‍ලේඛන මාගේ කාර්යාලයීය බෑගයෙහි අසුරා ගනිමින් බැංකුව වෙත යාම සඳහා කාර්යාලයෙන් පිටත් වුණෙමි. ඒ පෙරවරු 11ට පමණය. ඉදිරිපිට මාර්ගය ආසන්නයට එන විටම පෞද්ගලික බස් රථයක් වේගයෙන් පැමිණෙනු දක්නට ලැබුණද ශ්‍රී ලංගම බස් රථවල යෑමට පුරුදු වී සිටි මා එම බස් රථය මඟ හැරියෙමි. ක්ෂණයකින් එම බස් රථය පිටුපස තවත් බසයක් හඹා එනු දක්නට ලැබිණි. එය බොහෝවිට මාද ගමන් කරන සුපුරුදු ශ්‍රී ලංගම බසය බවද පෙනෙන්නට තිබුණි. මා සිටියේ මාර්ගයට ආසන්නව ද නොවේ. මට එම බස් රථයද අල්ලාගැනීමට නොහැකිවේවිය යන සිතුවිල්ලද ඇතිවනවාත් සමගම එම බස් රථයද මගේ කාර්යාලය පසු කළේය. නමුත් ඉදිරියට ගිය බස් රථය තදබල තිරිංග පහරකින් මාර්ගයෙහි නතර වනු මට දක්නට ලැබිණි. රියැදුරා මාව දුටුවා සේය. ඔහු මා හොඳින් හඳුනාගත් රියැදුරෙකි. ඔහු මා වෙනුවෙන්ම බසය නවත්වා ඇත. කුරුණෑගල උතුරු ඩි‍පෝවට අයත් එම බස් රථයෙන් මා මීට පෙර බොහෝ අවස්ථාවලදී ගමන් කර ඇත්තෙමි. වහා දිවගොස් මම බසයේ පිටුපස දොරටුවෙහි එල්ලුනෙමි. බසය මගීන්ගෙන් පිරී පැවැතියේය. කෙසේ හෝ ඇතුළට රිංගාගත් මම ‍පොල්‍ලේ එල්ලී සිටගතිමි.
බසය ගමන් කළේ අධික වේගයෙනි. මගීන්ගෙන් පිරී පවතින බස් රථයක් මෙසේ අධික වේගයෙන් ගමන් කළ යුතුද? මගීන් බොහෝ දෙනෙකුට ඒ පිළිබඳව අවබෝධයක් තිබුණාදැයි මට මතක නැත. නමුත් මෙම බස් රථයට ඉදිරියෙන් පෞද්ගලික බස් රථයක් මගීන් පුරවාගෙන ගිය බව නම් හොඳහැටි මතකය. මේ යන්නේ ඒ බස් රථය අල්ලන්නටද?
කුඹුක්ගැටේ සිට කුඹුක්වැව නගරයට ඇත්තේ සැතපුම් තුනක දුරකි. පිම්මේ ආ බස් රථයට එම සැතපුම් තුන එන්නට විනාඩි පහක්වත් ගත වූවාදැයි මතක නැත. කුඹුක්වැව නගරයෙහි බස් රථය නැවැත්වූයේද නොනවත්වාම බැරිතැනය. හුරුබුහුටි තරුණයෙකු එහිදී ඉදිරි දොරටුවෙන් බසයට ඇතුළු වෙනු යාන්තම් දක්නට ලැබුණි. එතැන් සිට ඉබ්බාගමුවට ඇත්තේ හැතැප්ම හයක දුර ප්‍රමාණයකි. මහ පාර මේ වන විට සුපිරි විදියට කාපට් කර තිබුණද එදා තිබුණේ ප්‍රතිසංස්කරණය නොවූ තත්ත්වයකය. ඉබ්බාගමුව දක්වා වංගු කිහිපයක්ම වෙයි. වේගයෙන් ඉදිරියට ආ බසය පළවෙනි වංගුව පසු කළේය. ඊළඟ වංගුව දීයාව අසලය.
බස් රථය එම වංගුව පසු කළාද? මට මතක නැත. මම බස් රථයට ගොඩවූයේ සිකුරාදා පෙරවරු 11ට පමණය. කුරුණෑගල ශික්ෂණ රෝහලෙහි විසි දෙවැනි වාට්ටුවේ ඇඳක් මත මුහුණ පුරාම බැන්ඩේජ් ඔතා තිබියදී මා පියවි සිහිය ලැබුවේ පසුදා එනම් සෙනසුරාදා දහවල් 12ට පමණය. එතෙක් මට වූයේ කුමක්ද? මටම සිතාගත නොහැකි විය. මගේ උඩුහක්ක සහ යටිහක්ක එකතු කර කට අරින්නට නොහැකිවන සේ දත් සියල්ලම බැඳ දමා තිබුණි. කිසිදු කෑමක් කනවා තබා කට අරින්න කෙසේවත් නොහැකිය. මුව තුළට බටයක් පමණක් දමා ඇති බව එහිදී මට දැනෙන්නට විය.
මා පැමිණි බස් රථය දීයාව අසලදී පාරෙන් ඉවතට පැන අසල තිබූ දැවැන්ත මී ගසක හැප්පිලාය. බස් රථය සම්පූර්ණයෙන්ම කුඩුපට්ටම්ය. මගීන් එකළොස් දෙනෙකු එම අවස්ථාවේදීම මරණයට පත්වී ඇත. ඉතිරි මගීන් සියලු දෙනාම වාගේ බරපතළ තුවාල ලබා රෝහල්ගත කර ඇත. කුරුණෑගල ශික්ෂණ රෝහලට සියලුම බස් මගීන්ව ගෙනවිත් තිබෙන බව ආරංචි වන විට මම නැගිට ගැනීමට නොහැකිව විසි  දෙවැනි වාට්ටුවේ ඇඳක් උඩය.
මට සිදුවූයේ කුමක්ද? මම රෝහලට ආවේ කෙසේද? මම බොහෝ දෙනෙකුගෙන් විමසීමි. මාව හඳුනාගත් ප්‍රදේශවාසියෙකු කෙසේ හෝ මාව බසයකට ගොඩ කර ඇත. මගේ කාර්යාලයීය බෑගය සමග මාව රෝහලට ගෙනවිත් භාරදී ඇත. නමුත් රෝහ‍ලේදී මාව හඳුනාගන්නට, මොහු කවුදැයි වෛද්‍යවරුන් වෙත පවසන්නට කිසිවකුත් නොවීය. රෝහලට රෝගීන් ඇතුළත් කරන ස්ථානයේ ටේ‍රාලියක නංවනු ලැබූ මාව උඩුබැලි අතට හරවා තබා සියලු දෙනාම ආපසු ගොස්ය.
අනතුර වාර්තා වූ මගේ කාර්යාලයේ අනික් නිලධාරීහු ඒ පිළිබඳව ප්‍රධාන කාර්යාලයට දන්වා ඇත. මා බැංකුවට ගොස් ප්‍රධාන කාර්යාලයට නොපැමිණි නිසා ප්‍රධාන කාර්යාලයෙන් මෙම සිද්ධිය මගේ නිවසට දන්වා ඇත. මගේ නිවසෙහි අය මාව සොයා පැමිණෙන විට මම තවමත් ටේ‍රාලියෙහි උඩුබැලි අතට නිදාගෙනය. මුහුණ කොතෙක්දුරට ඉදිමී තිබුණේදැයි කියනවා නම් කෙසේවත් මාව හඳුනාගත නොහැකි තරමටම වෙනස් වෙලාය.
කෙසේ වෙතත් මාගේ නෑදෑයෝ මාව සොයාගෙන වෛද්‍යවරයා වෙත තල්ලු කර තිබේ. වෛද්‍යවරයා නියම කර ඇත්තේ වහා ශල්‍යාගාරයට මාව ඇතුළු කළ යුතු බවය. නමුත් ශල්‍යාගාරය තෙක් මගේ ටේ‍රාලිය තල්ලුකරගෙන යාමට එහි කිසිවකුත් නැත. කුරුණෑගල ශික්ෂණ රෝහ‍ලේ සුළු සේවකයන් උපස්ථායකයන් සියල්ල ස්ට්‍රයික්ය. වැඩ නැති වුණත් ඔවුන් පැත්තකට වී බලා සිටිනවාය. අවසානයෙහි මගේ ටේ‍රාලිය ශල්‍යාගාරය දක්වා තල්ලුකර ගෙන යාමට රුපියල් සියයක් පුදන්නට මගේ ඥාතියකුට සිදුවිය.
පියවි සිහිය ලැබූ මා මගේ කලිසම් සාක්කුවේ තිබූ රුපියල් දොළොස් දහසක් පමණ වූ මුදලට වුණේ කුමක්දැයි විමසීමි. “කලිසම නම් තියෙනවා. නමුත් සල්ලි පර්ස් එක නම් නැහැ” මිසී කෙනෙකු කියනවා ඇසුනි. මගේ පර්ස් එක උස්සලාය. බැංකුවේ දමන්නට ගෙන ආ මුදල් රෝහ‍ලේදී අතුරුදන් වෙලාය. නමුත් මාගේ කාර්යාල බෑගය පමණක් සුරක්ෂිතව තිබුණි. එහි තිබුණේ ලියකියවිලි පමණය. ඒවා කාටවත් වුවමනා නැත.
රෝහ‍ලේ සිටිමින් බස් අනතුර සිදුවූ හැටි සහ එම ස්ථානය ගැන විපරම් කළෙමි. එකොළොස් දෙනෙකු එම අවස්ථාවෙහි මියගියද ඒ වන විට තවත් තුන් දෙනෙකු  එයට එකතු වී හමරය. ප්‍රදේශයම කම්පා කරමින් සිදුවූ අනතුරින් මරණ දාහතරක්ම සිදුවී ඇති නිසා ප්‍රදේශවාසීන් අනතුර සිදුවූ ස්ථානය අසලින් ගමන් කිරීමට පවා බියවී ඇත. දැවැන්ත මී ගස නොසෙල්වී සිටියද රාත්‍රී කාලයේදී ඒ අසලින් විවිධ ශබ්ද ඇසෙන බවට ගම පුරා ප්‍රචාරය විය. ගම්මු ඊට බිය වූහ. තැතිගත් ප්‍රදේශවාසීහු එකතු වී ඒ සඳහා යම් ප්‍රතිකර්මයක් කරන්නට උත්සාහ කර ඇත. සතියක් ගතවෙද්දී මහා සංඝරත්නය වැඩම කරවා අනතුර සිදුවූ මී ගස අසල රාත්‍රිය පුරා පිරිත් සජ්ඡායනයක් පවත්වා ඇත. අසල්වාසීන්ගේ බිය සැක යම් තරමකින් හෝ දුරු වී ඇත්තේ එම පුණ්‍යකර්මයෙන් පසුවය.
මසකට වැඩි කාලයක් රෝහල්ගතව සිටි මා නිවෙසට ගියේ මසක් පුරාම උඩුහක්ක සහ යටිහක්ක එකතු කර බැඳ තිබූ යදම් ගලවාගෙනය. මාස දෙකකට වෛද්‍ය නිවාඩු ලබාගතිමි. මගේ දුක සැප බැලීමට උනන්දු වූවෝ මාත් සමග සිටි ප්‍රාදේශීය මාධ්‍ය සහෝදරවරුය. මගේ කාර්යාලයෙන් මට සහනයක් වශයෙන් රුපියල් පනස් දහසක මුදලක් ප්‍රදානය කර තිබුණි. ඒ බස් රථය අයත්ව තිබූ කුරුණෑගල උතුර ඩි‍පෝවෙන් දන්වා තිබුණේ අනතුර සම්බන්ධයෙන් වන්දියක් බලා‍පොරොත්තුවේ නම් ඉල්ලුම් කරන ලෙසය. මියගිය අය වෙනුවෙන් නම් රුපියල් දස දහස බැගින් වූ විශේෂ වන්දියක් රජය මගින් ගෙවා තිබුණි. උතුර ඩි‍පෝවට අයත් මෙම බස් රථය රක්ෂණය කර තිබුණේ සමුපකාර රක්ෂණ සමාගමේය. එයද කුරුණෑගල නොව හෝමාගම පිහිටි කාර්යාලයේය. මමද වන්දි ඉල්ලා අයැදුම්පතක් ඉදිරිපත් කළෙමි. රක්ෂණ සමාගම මගෙන් විවිධ දෑ ඉල්ලා සිටියේය. අවසානයේ මට පිළිතුරක් ලැබුණි. ඒ වන්දිය ගැන නොවේ. වන්දි ගෙවීමට නම් දැනට බස් අනතුර සම්බන්ධයෙන් උසාවියට යොමු කර ඇති නඩුව විභාග කර අවසන් විය යුතු බවය. ඒ 2003 වර්ෂයේදීය. අද වන විට වසර දහ තුනක් ගෙවී අවසන්ය. අනතුරින් බරපතළ තුවාල ලැබූවන්ද තවත් කිහිප දෙනෙකු මියපරලොව ගොස්ය. මේ වන විට මියගිය සංඛ්‍යාව විසි එක දක්වා ඉහළ ගොස් ඇත. බරපතළ තුවාල ලැබූ පිරිස හතළිහකට අධික බව සොයාගෙන තිබේ.
බස් රථයේ රියැදුරුට එරෙහිව ‍පොලීසිය කුරුණෑගල මහේස්ත්‍රාත් අධිකරණයෙහි නඩු පවරනු ලැබිය. වසර කිහිපයක්ම නඩුව විභාග කිරීමෙන් අනතුරුව එය මහාධිකරණය වෙත යොමු කරනු ලැබිය. අපරික්ෂාකාරී ලෙස බස් රථය පදවා සාවද්‍ය මනුෂ්‍ය ඝාතන සිදු කිරීම සම්බන්ධයෙන් නීතිපතිවරයා විසින් බස් රථයේ රියැදුරු වූ හේනේ මුදියන්සේලාගේ ප්‍රේමරත්න නමැත්තාට එරෙහිව චෝදනා ගොනු කරනු ලැබිය. පුරා වසර දහයක් තිස්සේ නඩුව කුරුණෑගල මහාධිකරණයෙහි විභාග විය. නඩුව වරින්වර විභාග කරන ලද මහාධිකරණ විනිසුරුවරුන්ගේ ගණනද හත් දෙනෙකුට වැඩිය. පැමිණිල්ල වෙනුවෙන් සාක්ෂිකරුවන් අසූ පස් දෙනෙකු ඉදිරිපත් කර තිබුණි. මම හැත්තෑ දවෛනි සාක්ෂිකරුවා වුණෙමි.
අවසානයෙහි නඩුව විභාග කරන ලද්දේ වත්මන් කුරුණෑගල මහාධිකරණ විනිසුරු මේනකා විජේසුන්දරය. ඒ සඳහා මාසයක පමණ කාලයක් ගත විය. අවසානයේ නමුත් හදිසියේම එය කල් ගියේය. නමුත් පසුගිය මාර්තු 20 වැනි සඳුදා නඩුවෙහි තීන්දුව ප්‍රකාශයට පත් කෙරිණ. අපරික්ෂාකාරී ලෙස බස් රථය පදවා සාවද්‍ය මනුෂ්‍ය ඝාතන කිරීම සම්බන්ධයෙන් චූදිත වැරදිකරු විය. අධිකරණ වාර්තා අනුව මියගිය සංඛ්‍යාව දාහතරකි. බරපතළ තුවාල සිදුවූ සංඛ්‍යාව දහ නවයකි.
ඒ අනුව මියගිය දාහතර දෙනා වෙනුවෙන් වසර විසි අටක බරපතළ වැඩ සහිත සිරදඬුවම්ද, බරපතළ තුවාල ලැබූ දහනව දෙනා වෙනුවෙන් වසර නවය හමාරක සිරදඬුවම්ද, එකතුව වසර තිස්හතහමාරක සිරදඬුවම් චූදිත බස් රියැදුරුට නියම විය.
බස් අනතුරට අදාළ අධිකරණමය කටයුතු එතකින් නිමාවුවද, අනතුරින් බරපතළ තුවාල ලබා ජීවිතය බේරාගත් උදවියට මෙයින් පසු හිමි විය යුතු සාධාරණය ඉටු වන්නේ කවදාදැයි බොහෝ දෙනෙකු බලා සිටිති. සමුපකාර රක්ෂණ සමාගමෙන්, අනතුරට අදාළව වන්දි ඉල්ලූ අයට ලැබුණ පිළිතුර වූයේ නඩුව අවසන් වන තුරු රැඳී සිටින ලෙසය.
දැන් නඩුව අවසන්ය. අවිනීත රියැදුරා වසර තිස් හතරහමාරකට සිපිරිගෙට ගොස්ය. බරපතළ තුවාල ලැබූ අයට තවමත් හුළංය.

ජේ.එම්. මහරුප්

"බටහිර කුමන්ත්‍රණ" යන වචනය අපේ රටේ දේශපාලනයේ සුලභව භාවිතා වූ එක් වචනයකි. කාලයක් තිස්සේ භාවිත කිරීම නිසාත්, බටහිර හිතවාදී බලවේග විසින් අපේ රට මෙහෙයවනවා යැයිද, එක් එක් වූ සම්මක් ප්‍රලාපයන් නිසා නිරන්තරයෙන් ඇතැම් දේශපාලකයන් කරන ප්‍රකාශ නිසාත් බටහිර කුමන්ත්‍රණ පිලිබඳ අවධානය සහ වැදගත්කම අපේ රටේ මිනිසුන්ගේ හිස තුළ නිරන්තරයෙන් රැඳී පවතියි.
 
 වත්මන්  ගෝලීය ආධිපත්‍යය තහවුරු කිරීම සඳහා ඇමෙරිකාව ප්‍රමුඛ රටවල් එක් පසෙකින් යුධ වදිද්දී, අනෙක් පසින් සමාජ ප්‍රජාතන්ත්‍රවාදී රටවල් ප්‍රධාන කරගත් අනෙක් බල කඳවුරෙහි රුසියාව ප්‍රමුඛව, ඉහලින් වැජඹෙයි.
 
ඇමෙරිකාවේ වත්මන් ජනාධිපති ඩොනල්ඩ් ට්‍රම්ප් මහතා වුවත් තම මැතිවරණ ව්‍යාපාරය තුළ ප්‍රතිවිරුද්ධ පාර්ශවයන්ගේ නිරන්තර පහර කෑමට ලක් වූයේ ඇමෙරිකානු විරෝධි, බටහිර අධිරාජ්‍යවාදීන්ට නිරන්තරයෙන් පහර එල්ල කරන රුසියාව සමගින් රහස් සබඳතා පවත් වන බවට විවිධ චෝදනා එල්ල කරමින්ය. කෙසේ වෙතත් සියලු අභියෝග මැද ඩොනල්ඩ් ට්‍රම්ප් ඇමෙරිකානු ජනාධිපතිවරණ අපේක්ෂකයා තරඟ වැද ඇමෙරිකානු ජනාධිපතිවරනයෙන් ජය ගත්තේය. 
 
අප ට්‍රම්ප් ගේ ප්‍රතිවිරුද්ධ මතධාරීන් එල්ල කල චෝදනා සත්‍යයයි කියා ඒ අනුව සිතුවොත් ගම්‍ය වන්නේ  "දැන් ඇමෙරිකාවේ ජනාධිපති පත් කරන්නෙත් රුසියාවේ පූටින්ට ඕනේ විදිහට ඕනේ කෙනාවද" යන්නෙන් සිතා බැලිය හැක. මේ සියල්ල කිරා මැන බැලීමේදී ලොව ඉහළින්ම වැජඹෙන රුසියාව සමග අපේ රට පවත්වන සබඳතා ජාත්‍යන්තරව ගතහොත් කොයි තරම් වැදගත් වන්නේදැයි සිතා ගත හැකිය.
 
බටහිරට ගැති පාලකයෙක්..?
 
මේ අතර වාරයේ ශ්‍රී ලංකාවේ ජනාධිපති මෛත්‍රීපාල සිරිසේන මැතිතුමාට ප්‍රතිවිරුද්ධ දේශපාලකයන් දඩි ලෙසම චෝදනා කරන දෙයක් නම් ඔහු බටහිර ඇමරිකානු රූකඩයක් වන බවයි. එම චෝදනාවට ප්‍රබල පිළිතුරක් ඇමෙරිකානු විරෝධී, අධිරාජ්‍ය විරෝධී, බටහිරට නිරන්තරයෙන්ම පහර එල්ල කරන රුසියාවේ පූටින්ම අපේ රටේ එම චෝදනා එල්ල කරන දේශපාලකයන් හට දැන් ලබා දී ඇත. 
 
ඒ වසර 44කට පසුව ශ්‍රී ලංකා රාජ්‍ය නායකයෙක් රුසියානු ජනාධිපති වැල්ඩ්මීර් පූටින්ගෙන්  නිල ආරාධනයක් කරමින් ජනාධිපති මෛත්‍රීපාල සිරිසේන මැතිතුමාට රුසියාවේ නිල සංචාරයක නිරත වෙන ලෙස ලැබුනු ආරාධනාවයි. මේ ලැබුනු නිල ආරාධනය ශ්‍රී ලංකාවට මෑත කාලීනව ලැබුනු ඉහළම ජාත්‍යන්තර පිළිගැනීම ලෙසත් නිරන්තරයෙන් විවිධ අපවාද එල්ල කරමින් දේශපාලන පොර පිටියේ හිස් පුවත් මවනා දේශපාලකයන් හට ලබුණු නිසි පිළිතුරක් ලෙස මා දකිමි. 1974 දී එවකට අගමැතිනි සිරිමාවෝ බණ්ඩාරනායක මැතිනිය සෝවියට් රුසියාව නමින් හඳුන්වන කාලයේදී එරට සංචාරයේ යෙදුන බවත්, ඒ අනුව ගතහොත් සෝවියට් රුසිආව බිඳ වටීමෙන් පසුව රුසියාවේ නිල සංචාරයක නිරත වන පළමු රාජ්‍ය නායකයා වීමේ ගෞරවය ජනාධිපති මෛත්‍රීපාල සිරිසේන මහතාට හිමිවෙනු ඇත.
 
වැල්ඩ්මීර් පුටින්
 
වැල්ඩ්මීර් පුටින් නම් නායකත්වය ලෝකය පුරා ප්‍රසිද්ධියට පත්වන්නේ තනි මතයක් දරන කිසිවෙකුට යටත් නොවන්නාවූ චරිතයක් නිසාවෙනි. ඇමරිකාවට පමණක් නොව බටහිර කිසිඳු රටකටද ලෝකයේ අන් කිසිඳු රටකටද යටත් නොවනා පුටින්ගේ නායකත්වය ඔස්සේ පාලනය වන්නාවූ රුසියාව ත්‍රස්තවාදී බෙදුම් වාදයට රතු කොඩි වනනා ත්‍රස්තවාදය මුලින් උපුටා දමනා යුධ න්‍යෂ්ටික ශක්තියක් ඇති බලවත් රාජය්‍යකි.
 
මෙවැනි නායකත්වයක් අප ශ්‍රී ලංකා ජනපති මෛත්‍රීපාල සිරිසේන නම් ජන නායකයාට නිල චාරිකාවකට ඇරයුම් කරන්නේ පුටින් මෛත්‍රීපාල නම් චරිතයේ සුවිශේෂීතා දුටු නිසාවෙනි,මෛත්‍රීපාල සිරිසේන  ඇමරිකන් ගැත්තෙකු නොවන නිසාවෙනි,කොන්ද කෙලින් තබාගෙන නොබියව වැඩ කරනා අව්‍යාජ නායකයෙක් නිසාවෙනි.
 
සම්ප්‍රදායන් කඩමින් නිරත වන රුසියානු සංචාරය
 
රුසියානු සම්ප්‍රදායට අනූව එරටට පැමිණෙන රාජ්‍ය නායකයෙකු විශේෂිත වූ ගුවන් යානයකින් පැමිණිය යුතු වනවා. ඒ අනූව, රාජ්‍ය ගෞරව පිරිනැමීම සදහා ශ්‍රී ලංකා ජනාධිපති මෛත්‍රීපාල සිරිසේන මැතිතුමා ප්‍රමුඛ දූත පිරිසට රාජ්‍ය නායකයාට විශේෂිත වූ ගුවන්යානයකින් පැමිණෙන ලෙස රුසියාවෙන් දැනුම් දී ඇතත්, මෛත්‍රී ජනාධිපතිතුමා විසින් එය ප්‍රතික්ෂේප කර ඇති අතර රාජ්‍ය ගෞරව නොමැති වුවද සාමාන්‍ය ගුවන් යානයකින් පැමිණෙන බවයි දැනුම් දී ඇත්තේ. 
 
(පසුගිය කාලයේ හිටපු ජනාධිපතිවරයා මෙවැනි විදේශ සංචාර සදහා විශේෂිත වූ ගුවන් යානා භාවිතා කරනු ලැබු බවත්, ඒ සඳහා 100කට ආසන්න දූත පිරිසක් ද සහභාගී වූවා. ඇතැම් අවස්ථාවලදී ඔහුගේ නිල සංචාරය අවසන් වන තුරු එම ගුවන්යානා රඳවාගෙන සිටි බවට ද ඇතැම් මාධ්‍ය එකළ වාර්තාකර තිබුණා)
 
මේ කරුණු මෙසේ වෙද්දී, ජනාධිපති මෛත්‍රීපාල සිරිසේන මැතිතුමා රුසියානු රජයට දැනුම් දී ඇත්තේ "මහජන මුදල් නාස්තිකාර අන්දමින් පරිහරණය කර කිසි දිනක රටට අගතියක් සිදුවන අන්දමේ කටයුතු කිරීමට තමා කිසි ලෙසකින්වත් සූදානම් නොමැති බවයි."
 
අත්වන ප්‍රථිලාභ
 
වර්තමානය වන විටදි ශ්‍රී ලංකාව තනි රටක් ලෙසින් ගත හොත් නොමිලේ අධ්‍යාපන කටයුතු සඳහා රුසියාවේ පැමිණ අධ්‍යාපනය ලබන වැඩිම ප්‍රමාණය සහිත රට වන්නේ ශ්‍රී ලංකාවයි. ලොව කිසිඳු රටක් එවැනි වූ ශිෂ්‍යත්ව ප්‍රමාණ්යක් ශ්‍රී ලංකාවට ලබා දී නොමැති බවත් සඳහන්. රුසියාව සහ ශ්‍රී ලංකාව අතර අත්සන් කිරීමට නියමිතව ඇති අනෙක් ආර්ථික ගිවිසුම් අතර ධීවර ගිවිසුම්, තාක්ෂණික ගිවිසුමක් තාක්ෂණික දැනුම හුවමාරු කරගැනීමට නියමිතව ඇති බවත් සඳහන්. එමෙන්ම ශ්‍රී ලාංකික ඉංජිනේරුවන් හට රුසියාවට පමිණ විවිධ වූ තාක්ෂණික දේවල් සඳහා සහභාගිවීමේ අවස්ථාවත් මෙම ගිවිසුම් හරහා හිමි වන බව වාර්තා වේ.
 
මේ සකලවිධ කාරනා මැද සිදුවන එකම දෙයක් වේ නම් ඒ අපේ රට වත්මන් මෛත්‍රීපාල සිරිසේන ජනාධිපතිවරයාගේ පාලනය හමුවේ ජාත්‍යන්තරව ඉහළටම නැගී එමින්, මෛත්‍රීපාල සිරිසේන ජනාධිපතිවරයාගේ සෘජු නායකත්වය ඉහළින්ම පිළිගනිමින් වත්මන් ගෝලීය ආධිපත්‍යය තහවුරු කිරීම සඳහා වන තරඟයේදී ශ්‍රීලංකාව ඉතා තීරණාත්මක රටක් බවට පත්වෙමින් ඇති බවත්ය. 
 
මිහිඳු ෆොන්සේකා
ජනාධිපති මාධ්‍ය අංශය

ජන ‍ලේඛන හා සංඛ්‍යා ‍ලේඛන දෙපාර්තමේන්තුව නිවේදනයක් නිකුත් කරමින් කියා සිටියේ 2016 වර්ෂයේ මෙරට ආර්ථිකය සියයට 4.4කින් වර්ධනය වී ඇති බවය. ඇත්ත වශයෙන්ම එය බලා‍පොරොත්තු වූ වර්ධන වේගයට වඩා අඩු අගයකි. අවම වශයෙන් සියයට 6ක පමණ ආර්ථික වර්ධන වේගයක් 2016 වසරේදී ලබාගත හැකිවනු ඇතැයි පුරෝකථනය කොට තිබුණත් කෘෂිකාර්මික අංශයේ සිදුවූ සංකෝචනය කරන කොටගෙන එම ඉලක්කය සාධනය කරගැනීමට නොහැකි වී ඇත.
2016 වසරේ කෘෂිකාර්මික අංශයේ සියයට 4.24 සෘණ වර්ධනයක් වාර්තා වී ඇත. වී වගාව සෘණ සියයට 31කින්ද (-31) පලතුරු වගාව සෘණ 3.7කින්ද එළවළු වගා කිරීම සෘණ 2.1කින්ද  වශයෙන් පහළ වැටී තිබේ. අයහපත් කාලගුණ තත්ත්වය ඊට ප්‍රබල ලෙස බලපෑම් කොට ඇති බව ජන ‍ලේඛන හා සංඛ්‍යා ‍ලේඛන දෙපාර්තමේන්තුව පවසයි. කෙසේ වෙතත් මේ සියල්ලෙහි අවසන් ප්‍රතිඵලය රටේ ආර්ථික වර්ධන වේගය පහළ වැටීමය.
රට හමුවේ ආර්ථික ගැටලු ගණනාවක් මේ වනවිට පැන නැගී තිබේ. ඇමෙරිකන් ඩොලරයක ගැනුම් මිල සේම විකුණුම් මිලද රුපියල් 150 සීමාව ඉක්මවා ගොස් තිබේ. ඉකුත් 16 වැනිදා ඇමෙරිකන් ඩොලරයක විකුණුම් මිල රුපියල් 154 සීමාවද ඉක්මවා ගියේය. වී ‍පොල් ආදී නිෂ්පාදනයන්ගේ පහළ වැටීමත් සමග සහල් සහ ‍පොල්තෙල් ආනයනය ඉකුත් මාසයේ සිට වේගවත් විණි. එසේම සීනි සඳහා පැවැති රුපියල් 93ක පාලන මිලද ඉකුත් සතියේ ඉවත් කරනු ලැබිය. දැන් සීනි කිලෝවක් රුපියල් 110ටද විකුණනු දැකිය හැකිය.
ගෙවුම් ශේෂය 2017 අයවැය ‍ලේඛනය ඉදිරිපත් කරමින් මුදල් අමාත්‍ය රවි කරුණානායක මහතා පැවැසුවේ අත්‍යවශ්‍ය ආහාරද්‍රව්‍ය ආනයනය වියදම් හැකිතාක් අඩුකොට ගෙවුම් ශේෂ ‍ලේඛනයේ හිඟය අඩුකරගන්නා බවය. එසේම පාරිභෝගිකයාට සහන ලබාදීමට කටයුතු කරන බව කියමින් සීනි මිල රුපියල් 2.00කින් අඩු කරනු ලැබිය. නමුත් වර්ෂයේ පළමුවන කාර්තුව අවසන්වීමටත් ප්‍රථම අය වැය ‍ලේඛනයෙන් ඉදිරිපත් කළ කරුණු හා ‍පොරොන්දු එකිනෙක බිඳ වැටෙමින් පවති. මුදල් අමාත්‍යවරයා අපේක්ෂා කළ ආකාරයෙන් පාරිභෝගික ද්‍රව්‍ය ආනයනය සීමා කිරීමට නොහැකිවිය. සහල්, ‍පොල්තෙල්, ලොකු ලූනු, අර්තාපල්, වියළි මිරිස්, හාල්මැස්සන්, සීනි තොග පිටින් ආනයනය කිරීමට සිදුවිය. ඇමෙරිකන් ඩොලරයකට රුපියල් 154ක් ඉක්ම වූ මුදලක් ගෙවීමට සිදුවී තිබෙන පසුබිමක අපේ ආනයන වියදම් වැඩිවීම පිළිබඳ අමුතුවෙන් කිවයුතු නැත. වෙළෙඳ හිඟය විශාල වශයෙන් පුළුල් වී තිබෙන බව මහ බැංකුවද පිළිගෙන තිබේ.
ආර්ථික වර්ධන වේගය පහළ වැටීම මෙහි ආර්ථික ගැටලුවලට විසඳුම් සෙවීමේදී උභතෝකෝටිකම ඇද වැටීමකි. ආර්ථික විද්‍යාඥයන් පෙන්වා දෙන්නේ රට මුහුණ දී සිටින ගැටලුවලින් හිස එසවීමට නම් සියයට 8ක් ඉක්ම වූ ආර්ථික වර්ධන වේගයක් අඛණ්ඩව වසර පහක පමණ කාලයක් හෝ පවත්වාගෙන යා යුතු බවය. එහෙත් අවාසනාවකට මෙන් අපට සියයට 6ක හෝ ආර්ථික වර්ධන වේගයක් ලබාගැනීමට නොහැකිව තිබේ.
නව අර්බුද ආර්ථික වර්ධන වේගය පහළ වැටීමත් සමග දේශීය වශයෙන්ද මතුවීම විදේශීය වශයෙන්ද නව අර්බුද මතුවීම වැළැක්විය නොහැකිය. වෙළෙඳ ශේෂයේ හිඟය පුළුල් වන විට වැඩි වැඩියෙන් දේශීය හා විදේශීය මූලාශ්‍රවලින් ණය ලබාගැනීමට සිදුවේ. කෙසේ වෙතත් දේශීය මූලාශ්‍රවලින් ණය ලබාගැනීම දුෂ්කර වී ඇත්තේ ඒ හරහා ‍පොලී අනුපාතය තවදුරටත් ඉහළ යන නිසයි. මේ වන විට සියයට 15 ඉක්මවූ වෙළෙඳ‍පොළ ‍පොලී අනුපාතිකය ආයෝජනයන් අධෛර්යමත් කරන සුලුය.
විදේශීය මූලාශ්‍රයන්ගෙන් ණය ලබාගැනීමට යාමේදී ජාත්‍යන්තර මූල්‍ය අරමුදල, ආසියානු සංවර්ධන බැංකුව ලෝක බැංකුව වැනි ජාත්‍යන්තර මූල්‍ය ආයතන ශ්‍රී ලංකාවට දැඩි කොන්දේසි පැනවීම වැළැක්විය නොහැකිවනු ඇත. මක් නිසාද යත් අඩු ආර්ථික වර්ධන වේගයක් සහිත රටකට ණය ලබාදීමේදී ජාත්‍යන්තර මූල්‍ය ආයතන වඩාත් ප්‍රවේශම්කාරී ප්‍රතිපත්තියක් අනුගමනය කරන නිසාය.
අනෙක් පැත්තෙන් විනිමය අනුපාතිකය අවප්‍රමාණය වී ඇති නිසා අපේ විදේශ ණය ප්‍රමාණය හා ‍පොලියද වැඩිවී ඇති බව ජාත්‍යන්තර මූල්‍ය ආයතන හොඳාකාරවම දනී. රජයද ණය ආපසු ගෙවීමේ අර්බුදයක ගිලී සිටින බව ඔවුන් වරින් වර කරනු ලබන ප්‍රකාශවලින් මනාව පෙනී යයි. අග්‍රාමාත්‍ය රනිල් වික්‍රමසිංහ මහතා පෙබරවාරි 27 වැනිදා ප්‍රකාශ කරනු ලැබුවේ ඉදිරි වසර 10ක කාලයක් ඇතුළත රුපියල් කෝටි හාරලක්ෂ අසූදෙදහසක විදේශ ණය ප්‍රමාණයේ ගෙවීමට ඇති බවය. මෙම ණය බර කරණ කොටගෙන රට එකතැන නතරවී තිබෙන බව අගමැතිවරයා අවධාරණය කර සිටියේය. එකතැන නතරවී තිබෙන රටකට විදේශ රටවලින් හා මූල්‍ය ආයතනවලින් ණය ලබාගැනීම අසීරුය. මක්නිසාදයත් ඔවුන් ණය ආපසු ගෙවීමේ හැකියාව ගැඹුරින් සොයාබලන නිසාය. මේ නිසා අපට තවදුරටත් ණය ලබාගැනීමට සිදුවන්නේ දැඩි කොන්දේසිවලට යටත්වීමෙන් අනතුරුවය. රජය විදේශ ණය ලබාගැනීම සීමා කරන බව කලින්ම කියමින් යන්නේ ජාත්‍යන්තර මූල්‍ය ආයතනවල අමිහිරි කොන්දේසි ආර්ථික සීමා ඉක්මවා දේශපාලන කාරණා වෙතද ප්‍රවේශවන බව දන්නා නිසාය.
විසඳුම්  ආර්ථිකය එක තැන පල්වෙන බව කියන්නේ අග්‍රාමාත්‍යවරයාමය. එවැනි ආර්ථිකයකින් ජනතාවගේ ගැටලුවලට තිරසර විසඳුම් සෙවිය නොහැකිය. එකතැන පල්වෙන ආර්ථිකය ඉන් මිදී ඉදිරියට යා යුතුය. එය කළ හැක්කේ කෙසේද? එකිනෙකාට එරෙහිව කරනු ලබන අවලාද නවත්වා කෘෂිකාර්මික, කාර්මික හා සේවා යන අංශ තුනෙහිම සමබර වර්ධනයක් ඇතිකර ගැනීමට කටයුතු කළ යුතුය. 2016 වසරේ කෘෂිකාර්මික අංශයේ සෘණ 4.2ක අඩු වර්ධනයක් පවතින විට කාර්මික අංශය සියයට 6.7කින් හා සේවා අංශය සියයට 4.2කින් වර්ධන වේගයක් ලබා ඇතැයි ජන ‍ලේඛන හා සංඛ්‍යා‍ලේඛන දෙපාර්තමේන්තුව පෙන්වා දෙයි.
කෙසේ වෙතත් 2015 වසරේ කෘෂිකාර්මික අංශයේ සියයට 5.5ක ධන වර්ධන වේගයක් දක්නට ලැබුණු අතර සේවා අංශය සියයට 5.3කින් වර්ධනය විය. එසේ වූවත් 2016 වසරේ කාර්මික අංශය සියයට 6.7කින් වර්ධනය වීම සැලකිය යුතු තත්ත්වයකි. මක්නිසාදයත් 2015 වසරේ කර්මාන්ත අංශයේ වර්ධනය සියයට 3 ක් වශයෙන් පැවැති නිසාය. කෘෂිකාර්මික අංශයේ සංකෝචනයන් ඇතිවීම අපට පහසුවෙන් බැහැර කළ නොහැක්කේ එම ක්‍ෂේත්‍රය ආශ්‍රිතව රටේ බහුතරයකගේ ජීවනෝපාය රැඳී තිබෙන නිසාය.  අනෙක් පැත්තෙන් වී, ‍පොල්, ලූනු, මිරිස් ආදී දේශීය වශයෙන් වගාකරගත හැකි ආහාර ද්‍රව්‍ය දිගින් දිගටම ආනයනය කිරීමෙන් දැවැන්ත විදේශ විනිමයක් රටින් බැහැරවීම සුළුවෙන් තැකිය නොහැකිය. දිනෙන් දින විශාලවන වෙළෙඳ ශේෂය, විදේශ සම්පත් පරතරය, ඩොලරයට ගෙවිය යුතු රුපියල් ප්‍රමාණය සීමා කරගැනීමට හැකිවන්නේ සැලසුම් සහගත වැඩපිළිවෙළක් තුළිනි. ක්‍රමයෙන් නිෂ්පාදනය වැඩිකරගන්නා අතරතුර ආනයනය සීමා කිරීමේ ක්‍රමවේදයකට ප්‍රවේශවිය යුතුය.
කෙසේ වෙතත් සංවර්ධනය වෙමින් පවත්නා රටක් වශයෙන් කාර්මික භාණ්ඩ අමුද්‍රව්‍ය හා අන්තර් භාණ්ඩ ආනයනය සීමා කිරීම අසීරුය. එවැනි පසුබිමක් යටතේ පහසුවෙන් කළ හැකිවන්නේ කෘෂිකර්මාන්තය ආශ්‍රිත භෝග නිෂ්පාදනය ඉහළ නංවාගැනීමය. නියඟය හා වර්ෂාව පාලනය කළ නොහැකි ස්වාභාවික සංසිද්ධියකි. එහෙත් අපි තවමත් කරවල, හාල්මැස්සන් වැනි අවට  සාගරයෙන් අල්ලාගත හැකි සම්පත්ද කිසිඳු හිරිකිතයකින් තොරව ආනයනය කරන්නෙමු. මුදල් අමාත්‍යවරයා 2017 අයවැය ‍ලේඛනය ඉදිරිපත් කරමින් කියා සිටියේ මෙවැනි ආනයන සීමා කළ යුතු බවය. නමුත් එවැන්නක් සිදුවී නොමැත්තේ ආර්ථික සංවර්ධනය කටින් බතල කොළ සිටුවන ආකාරයේ එකක් වීම නිසාදැයි ඇසීමට සිදුවේ.

අන් කවරදාකටත් වඩා මුතුරාජවෙළ තෙත් බිම් රක්ෂිතය ගොඩ කිරීමේ ප්‍රවණතාවය ඉහළ ගොස් ඇති අතර එකී තත්ත්වය හේතුවෙන් අනාගතයේ පාරිසරික ගැටලු රාශියක් ඇතිවීමේ අවදානමක් පෙන්නුම් කර තිබේ.
මුතුරාජවෙළ තෙත් බිම ගොඩ කිරීම මීට පෙරද  සුළු වශයෙන් සිදුවිය. එහිදී එම ගොඩ කිරීම් ඉතා රහසිගතව සිදු වූ අතර කුඩා නිවසක් තනා ගැනීමට හෝ පැලක් අටවා ගැනීමට පර්චස් 5ක් 10ක් ගොඩ කිරීම සිදුවිය. නමුත් වර්තමානයේ ඉතා  ප්‍රසිද්ධියේ මහා පරිමාණයෙන් මෙය සිදුවෙමින් තිබෙයි. ජා - ඇල ප්‍රාදේශීය ‍ලේකම් බල ප්‍රදේශයේ මේ තත්ත්වය වඩාත් උත්සන්න වී ඇති අතර ජනතාව පවසා සිටින්නේ  වගකීව යුතු රාජ්‍ය ආයතන හා බලධාරීන්ගේ සේවය මගහැර තිබිම මේ තත්ත්වයට හේතුවක් වී ඇති බවයි.
මේ දිනවල ජා - ඇල පමුණුගම පාරේ තුඩැල්ල ප්‍රදේශයේ මහා පරිමාණ ලෙස මුතුරාජවෙල් යායේ වගුරු බිමක් ගොඩ කිරීම සම්බන්ධයෙන් ප්‍රදේශයේ ජනතා විරෝධයද එල්ල වී තිබේ. එනමුදු ජනතාව පවසා සිටින්නේ මීට  එරෙහිව වගකිව යුතු බලධාරීන්ට ලිඛිත හා වාචිකව කොතෙක් දන්වා සිටියත් ඒ සම්බන්ධයෙන් නිසි පියවර නොගන්නා බවයි. එසේ හෙයින් නුදුරු වැසිකාලයකදී සිදුවිය හැකි ජලගැලීම් හා  පරිසර හානි වඩාත් උග්‍ර වීමට මෙම ගොඩ කිරීම බලපෑ හැකි බවටද ප්‍රදේශයේ ජනතාව චෝදනා එල්ල කරයි.
මේ සම්බන්ධයෙන් අපට අදහස් දක්වා සිටි ප්‍රදේශවාසියෙකු වූ ප්‍රියන්ත පෙරේරා මහතා
‘මේ පිරවීම සිද්ධ කරන්නේ 192/ බි තුඩැල්ල උතුර ග්‍රාම නිලධාරී වසම තුළයි. ඔය පිරවීම කරන ප්‍රදේශයේ ඉදිරිපසින් ජා-ඇල , මීගමුව 273 බස් මාර්ගය වැටී තියෙනවා. වැසි කාලයට එම මාර්ගය ගොඩ කිරීම කරන ස්ථානයේදී අඩි 5ක් පමණ යට වෙනවා. මෙසේ තිබියදී තමයි මේ ගොඩ කිරීම සිද්ධ වන්නේ. ගොඩකිරීම හේතුවෙන් පාර හරහා තිබෙන බෝක්කුවේ එක් පසක් සම්පූර්ණයෙන්ම වැහිලා ගිහිල්ලා ඒ වගේම ගොඩ කිරීම සිද්ධ වන්නේ අසලින් වැටී තිබෙන ඇළ මාර්ගයන් අවහිර කරමිණි. මෙහි ඉංග්‍රීසි පාලන සමයේ ඉදිකළ ඓතිහාසික අමුණකුත් තිබෙනවා. ඒ කාලයේ වෙල්යායට  වඩදිය බාදිය ඇති වීමෙන් සිදුවන තත්ත්වය මගහරවන්න තමයි මේවා ඉදිරලා තියෙන්නේ. මෙවැනි ගොඩ කිරීමක් සිද්ධ වෙද්දී වගිවයුතු රාජ්‍ය ආයතනවලට අපි දැනුම් දුන්නත් ඔවුන් එය නතර කිරීමට කිසිදු පියවරක්  ගන්නේ නෑ. මේ වන විටත්  ගොඩකිරීම කරන ව්‍යාපාරිකයා නීතිය තුට්ටුවකට මායිම් කරන්නේ නැතුව ගොඩ කිරීම සිද්ධ කරනවා. අද වනවිට අක්කර 2ක පමණ තෙත් බිම් ප්‍රමාණයක් ගොඩ වෙලා ඉවරයි. මේ ස්ථානයේ වනජීවියෙන් සවිකරපු පුවරුවක් පවා තිබ්බා. ‘මෙහිි තිබෙන පරිසර පද්ධතියට කිනම් ආකාරයක හෝ බලපෑමක් කිරීම දඬුවම් ලැබෙන වරදක් කියලා’ නමුත් කියන්න කනගටුයි අදාළ ව්‍යාපාරිකයා එම පුවරුව පවා ගලවලා දාලා. මේ ක්‍රියාවලිය මාස 6කටත් අධික කාලයක සිට සිද්ධ වුණත් මේ ගොඩ කරනනේ ජල බස්නාවක් අපි, ‍පොලීසිය, ප්‍රාදේශීය ‍ලේකම් කාර්යාලය, මධ්‍යම පරිසර අධිකාරිය, ඉඩම් ගොඩ කිරීම් හා සංවර්ධනය කිරීමේ සංස්ථාව, ගොවිජන සේවා ඒ සියලුම ආයතන දැනුවත් කරලා ඉවරයි. කිසිදෙයක් සිදු නොවුණාට මේ ගොඩ කිරීම නිසා ඉදිරි වැස්සකදී 273  බස් මාර්ගයේ එම කොටස යට වී මාර්ගය පවා  කැඩී බිඳී යාම සිදු වෙනවා. ඇත්තටම මේ ගොඩ කිරීම කරන ව්‍යාපාරිකයා ප්‍රදේශයේ ජනතාවට  හඟවන්නේ ඉහළ නිලධාරීන් බොහොමයක් තමන්ගේ හිතවතුන් බවයි. අපිට එය ඇත්තක්දැයි සාධාරණ සැකයක් ඇති වී තිබෙන්නේ අපි කරන පැමිණිලි ගඟට කැපූ ඉනි මෙන් වී ඇති නිසයි.’
තවත් ප්‍රදේශවාසියෙකු වූ රංජිත් ගේ‍රගරි ප්‍රනාන්දු අපිට දැක් වූයේ මෙවැනි අදහසකි.
‘මේ ගොඩ කිරීම් කරන්නේ දිගපනේ කුඹුරු වෙල්යායේයි. ගොඩ කිරීම සිදු කරන ව්‍යාපාරිකයා  හැමවිටම තමන්  උසස් ‍පොලිස් නිලධාරීන් හඳුනන බව පවසනවා.   එලෙසම රජයේ ඉහළ නිලතල දරන්නන් තමුන්ගේ හිතවතුන් නිසා ඔවුන්ට ජනතාව ඉදිරියේ දුරකථනයෙන් කතා කරනවා. ඔහුගේ දුරකථන අංකය ඔස්සේ   පරීක්ෂණ කළහොත් ඔහු සම්බන්ධකම් පැවැත් වූ නිලධාරීන් කවුද කියලා පහසුවෙන් හොයා ගන්න පුළුවන්. අන් කවරදාකටත් වඩා මේ ප්‍රදේශවල ඉඩම් ගොඩ  වන්නේ නිලධාරීන්ගේ කඹ ඇදිලි හා වගකීම  එක් එක් පුද්ගලයා වෙත දැමීම නිසයි.’
මෙම දැවැන්ත ගොඩ කිරීම සිදුවන ප්‍රදේශයට අදාළ ග්‍රාම නිලධාරී අසංක චන්ද්‍ර කුමාර මහතාගෙන්ද අපි විමසීමක් කළෙමු.
 මගේ බලතල අනුව මෙය නවත්වන්න උත්සාහ කළත් ව්‍යාපාරිකයා ඒවා නොසලකා හරිමින්  සිය පිරවීම් කටයුතු කරගෙන ගියා. ඊළඟට මට කළ හැකිව තිබුණේ මෙය ‍පොලීසියට, ගොවිජනසේවා එකට, ප්‍රාදේශීිය ‍ලේකම්වරයාට පැමිණිලි කිරීමයි. මම ඒ දේවල් ලිඛිතව මේ වනවිට කරලා ඉවරයි. මේ ගොඩ කිරීම් නිසා පැහැදිලිවම අනාගතයේ විශාල පාරිසරික ගැටලුවක් මේ ග්‍රාම නිලධාරී කොට්ඨාසය තුළ සිදුවිය හැකියි. මහජන පීඩාවක් යටතේ හෝ අදාළ  පුද්ගලයාට එරෙහිව නඩු දැමිය යුතුයි‘
මෙම ගොඩ කිරීම සම්බන්ධයෙන් පරිසරවේදී ජනක ජන සහන පදනමේ සභාපති ජානක විජේවර්ධන මහතා අපට පැවැසුවේ මෙවැන්නකි.
‘මුතුරාජවෙල් යාය කියන්නේ  මා දන්නා පරිදි රුම්සාා සම්මුතියෙන් අපේ රට ආරක්ෂා කළ යුතු  තෙත් බිමක්. පසුගිය කාලයේ අපේ රටට මානව හිමිකම් ගැටලුවලට මූණ දෙන්න සිද්ධ වෙලා ජාත්‍යන්තරව රටහුදකලා කිරීමේ වෑයමක් තිබ්බා. ඒ අනුව අපේ රටට සම්බාධක පැනවුණා. ඇත්තටම මේ දේවල්වලට හේතු වුණේ මානව හිමිකම් සේම පාරිසරික විනාශයන්ද අපේ මිනිසුන් විසින් සිදු කිරීම යන කාරණායි. මුතුරාජවෙළ තෙත්බිම කියන්නේ ජලය රඳවා තබා ගන්න  ස්‍පොන්ජ් එකක ස්වරූපයෙන් කටයුතු ක රන ලෝකයේ තිබෙන විරල භූමි ප්‍රදේශයක්. වර්ෂා කාලවලදී ජලය රඳවා ගන්නා මෙම  භූමිය වියළි කාලගුණයන්වලදී ක්‍රමිකව ජලය මුදා හරිමින් පරිසරයේ ජල තුල්‍යතාව රඳවා ගන්නවා. නමුත් මේ ගොඩ කිරීම් නිසා එම තත්ත්වය මග හැරී අනාගතයේ පරිසර ගැටලු රාශයික් ඇති වේවි. කනගාටුවට කාරණය නම් මෙම ගොඩ කිරීමේ ක්‍රියාවලියන් නැවැත්වීමට වගකිව යුතු  මහජන මුදලින් වැටුප් ලබන නිලධාරීන්  නිද්‍රාශීලීව  සිටීමයි. අපි දන්නවා බොහෝ නිලධාරීන් අද වනවිට වරප්‍රසාද හා වරදාන වලට නතුවෙලා තම වගකීම් පැහැර හරින බව‘
උක්ත ගොඩ කිරීම සම්බන්ධයෙන් ජා - ඇල ප්‍රාදේශීය ‍ලේකම් ආර්.එම්. ජයසුන්දර මහතාගෙන් කරනු ලැබූ විමසීමකදී ඒ මහතා කියා සිටියේ අදාළ ප්‍රදේශයේ ගොඩ කිරීම  නැවැත්වීමට පියවර ගෙන තිබෙන බවයි. ඒ සම්බන්ධයෙන් ‍පොලීසියට පැමිණිලි කර ගොවිජන සේවා නිලධාරීන්ද දැනුවත් කර තිබෙන බව ප්‍රාදේශීය ‍ලේකම්වරයා පැවැසීය. මෙහිදී ගොඩකිරීම් තාවමත් සිදුවන බව ප්‍රාදේශීය ‍ලේකම්වරයාට අප පැවැසූ විට එහිදී ඔහු ප්‍රකාශ කර සිටියේ ගොඩකිරීම් සිදු කරන්නේ නම් තමන් ඒ පිළිබඳව සොයා බැලීමට ක්‍රියා කරන බවයි.

ප්‍රසංග පෙරේරා / ජා ඇල

''රූකඩේ කරළියේ නැටුවාට ලොකුම වැඩේ තියෙන්නේ තිරයෙන් පිටුපස්සෙ. ඒත් අපේ වැඩේ කවදාවත් එළියට පේන්නේ නෑ. එසේ කියමින් කතාව ඇරඹුවේ කේ. ගර්ලිමාලාය. රූකඩවලට ලංකාවෙන්ම කප් ගැසූ දකුණේ රූකඩ කලාවේ ඇය ගැන නොදන්නා කෙනෙක් නැති තරම්ය.
දැනට ජීවතුන් අතර සිටින දකුණේ පැරණිම රූකඩ ශිල්පිනිය වන්නේ ගර්ලිමාලාය. ඇල්පිටිය, පිටිගල, හත්තක පන්සල ගොඩැල්ල ඇගේ පදිංචියයි. ඇය උපන්නේ 1947 මාර්තු 21 වැනි දිනය. දැන් ඇගේ වයස අවුරුදු හැත්තෑවකි. ඇය රූකඩ කලාවට යොමු වන්නේ, හැටේ දශකයේ මුල් කාලයේය. කාන්තාවන් මෙම වකවානුවේදී රූකඩ කලාවට සම්බන්ධවීම ගැන වැඩිහිටියන් දැක්වූයේ සුබවාදි ආකල්පයක් නොවේ. එහෙත් ගර්ලිමාලා තරුණියට රූකඩ කලා ක්‍ෂේත්‍රයට ඇතුල්වීමට මගපෑදුණේ අම්බලන්ගොඩ ශ්‍රී අනුර රූකඩ කණ්ඩායමේ ආදි කර්තෘ ගම්වාරි ලව්නේරිස් ගුරුන්නාන්සේ නිසාය.
ලව්නේරිස් ගුරුන්නාන්සේ විසින් 1960 දශකයේ මුල් කාලයේදී හත්තක ජාතික කලායතනයේ, රූකඩ කලායතනයක් පිහිටුවන ලදී. ගර්ලිමාලා රූකඩ නැටුම් ශිල්පය හැදෑරුවේ ලව්නේරිස් ගුරුන්නාස්ගෙනි.
ලව්නේරිස් ගුරුන්නාන්සේ මගේ ගුරුතුමා. මම කලායතනයේ ඉගෙන ගෙන පස්සේ ඒ ආයතනයේම ගුරුවරියක ලෙස සේවය කළා. මට එදා ලව්නේරිස් ගුරුතුමා රුපියල් තුන්සීයක (300/-) මාසික පඩියක් දුන්නා. පස්සේ මම අම්බලන්ගොඩ ශ්‍රී අනුර රූකඩ කණ්ඩායමේ ශිල්පිනියක ලෙස කටයුතු කළා. අදත් මම වැඩ කරන්නේ ශ්‍රී අනුර රූකඩ කණ්ඩායම සමගයි. ඒ වගේම දකුණු පළාතෙන් රූකඩ කලාවට එක්වූ පළමු කාන්තාවත් මමයි... ඇය කීවේ දැඩි අභිමානයකින් යුතුවයි.
මම ජීවිතයෙන් අවුරුදු පනහකටත් වැඩි කාලයක් ගත කළේ රූකඩ කලාවටයි. ඒ නිසාම මට විවාහයක් ගැන හිතන්න කාලයක් තිබුණේ නැහැ. මම තවමත් තනිකඩව ජීවත් වෙනවා ඇය කීවේ රූකඩ කලාවට ඇයගේ ජීවිතය කැප කර ඇති බව හඟවමිනි.
සාමාන්‍යයෙන් තිරයේ පිටුපස සිට රූකඩ හඬකැවීම, රූකඩ නැටවීම, ගීත ගායනය, වාද්‍ය භාණ්ඩ වාදනය සහ රූකඩ හැඩගැන්වීමේ ශිල්පීනියන් ඇගැයීමට පාත්‍ර වන්නේ නැත. එහෙත් ගර්ලිමාලාට නම් ඒ වාසනාව උදාවී තිබිණි. ඒ ඇය ලබා තිබූ දක්ෂතා නිසාය. රූකඩ කලාව පමණක් නොව ඇය පහතරට නැටුම්ද ඉගෙන ගෙන තිබුණි.
ඇය අම්බලන්ගොඩ රුහුණු කැලුම් කලායතනයේදී 'නූල් රූකඩ' පිළිබඳ චෙකොස්ලෝවැකියානු රූකඩ ශිල්පීන් වන ඊවා වොඩිශ්කෝවා සහ ජානාහවුලිකෝවා යන අයගෙන් අත් රූකඩ පිළිබඳව හදාරා සහතික පත්‍රද ලබා ඇත.
අම්බලන්ගොඩ ශ්‍රී අනුර කලායතානාධිපති නලින් ගම්වාරිගේ අනුග්‍රහය යටතේ, ඇය 1990 වර්ෂයේ තායිවානයේද, 1988දී ජපානයේද 2003දී පාකිස්තානයේද සංචාරයේ යෙදෙමින් රූකඩ සංදර්ශන පවත්වා තිබේ. එසේම ශ්‍රී ලංකා කලා මණ්ඩලය හා සංස්කෘතික කටයුතු දෙපාර්තමේන්තුව සංවිධානය කළ රූකඩ නාට්‍ය රාජ්‍ය උළෙලවල්වලදී රාජ්‍ය සම්මාන හා සහතික පත්‍ර පවා හිමිකර ගෙන තිබේ.
එසේම ඇය 2011 වර්ෂයේදී රාජ්‍ය 'කලා භූෂණ' සම්මානයෙන් පිදුම් ලබා ඇත.
අම්බලන්ගොඩ, කන්දේගොඩ එල්.පී. චාලට් දීර්ඝ කාලයක සිට රූකඩ ක්‍ෂේත්‍රයට සම්බන්ධ වී සිටින ශිල්පිනියකි. ඇය රූකඩ සංදර්ශනවලට යොමුකර ඇත්තේ ජී. චාලි නමැති ඇගේ මාමා කෙනෙකු විසිනි.
ඇය පළමු වරට රූකඩ සංදර්ශනවල දෙබස් කීමට ගොස් ඇත්තේ බද්දේගම, ක්‍රිස්තුදේව විදුහ‍ලේ පැවැති සංදර්ශනයකදීය.
මම එදා පාසල් යන ශිෂ්‍යාවක්. මට මාමා කිව්වා සිංදුවක් කියන්න කියලා. මම සිංදුවක් කිව්වා. ඒ කා‍ලේ මට දෙබස් කියන්න තේරුමක් නැහැයි චාලට් කීවේ අතීතය ආවර්ජනය කරමිනි.
පසුව ඇය එල්.පී. ගෝමිස් ගුරුවරයා යටතේ රූකඩ ශිල්පය හදාරා ඇත.
මම ගුරුතුමා එක්ක 1960 පමණදී වාද්දුව, ‍පොතුපිටිය විදුහ‍ලේ රූකඩ සංදර්ශනයකට ගියා. දවාලෙ රූකඩ හැඩගන්වනවා. හවසට රිහසල් තියෙනවා. රෑට තමයි අපි රූකඩ රඟදක්වන්නේ. මට හොඳට මතකයි ඒ දවස්වල මම නමෝ නමෝ ශ්‍රී සම්බුදු රාජා... ගීතය ගායනා කළ හැටි ඇය අතීතය හෙළි කළාය.
ඊළඟට අපට මුණගැසුණේ චාලට් ශිල්පිනියගේ සහෝදරියක් වන වතුගෙදර ‍පොකුණ පාරේ පදිංචිව සිටින එල්.පී. වයලට්ය.
ඇයත් කුඩා කාලයේ සිටම රූකඩ ක්‍ෂේත්‍රයට සම්බන්ධවී සිටින ශිල්පිනියකි. රුහුණු රූකඩ කණ්ඩායමේ නායක ඇස්. චාර්ල්ස් සමග සංදර්ශනවලට සහභාගි වූ බවද ඇය සඳහන් කළාය.
කණ්ඩායම ඇගැයීමට ලක් වුණත් පෞද්ගලිකව අපි ඇගැයීමට ලක් වෙන්නේ නැහැ. ඒක තමයි මේ කර්මාන්තයේ තියෙන අඩුපාඩුව. සමහර වෙලාවට පන්සල්වල තියෙන සංදර්ශන අවසානයේ අපට තෑගි බෝග ලැබෙනවා. ඒත් පෞද්ගලිකව සම්මාන සහතික ලැබෙන්නේ නැහැයි වයලට් ශිල්පිනිය සඳහන් කරන්නේ, අනෙක් සෑම කලා ක්‍ෂේත්‍රයකදීම ශිල්පියා ඇගැයීමට ලක්වුවත්, මෙම ක්‍ෂේත්‍රයේදී ඇගැයීමකට හෝ සම්මානයට ලක් නොවන බවයි.
අම්බලන්ගොඩ, බෝගහවත්තේ පදිංචි රංජනී ගංවාරි ශිල්පිනියද රූකඩ කලා ක්‍ෂේත්‍රයේ රැඳී සිටින්නියකි. ඇය සිය සහෝදරයා නිමල් ගංවාරි ශිල්පියාගේ 'නිපුන' රූකඩ කලාකවයේ ස්ථිර ශිල්පිනියක ලෙස සේවය කරයි.
ඇයත් ක්‍ෂේත්‍රයේ සෑම අංශයකම වාගේ පළපුරුද්දක් ඇති බව පවසයි. ගංවාරි සිරිල් නමැති ශිල්පියා ඇයගේ ගුරුවරයායි.
අපි ලංකාවේ සෑම ප්‍රදේශයකම වගේ සංදර්ශනවලට සහභාගි වෙලා තියෙනවා. සල්ලි හම්බ කරනවා. ඒත් ඒ වෙලාවට විතරයි. අද එදා වගේ සංදර්ශන නැහැ. ඒ කා‍ලේ පන්සල්වල දින හත අටක් පමණ සංදර්ශන පැවැත්තුවා. අද ඒක වෙනස් වෙලා. ගමේ පන්සලක, පාසලක නැතිනම් සංචාරක හෝටලයක සංදර්ශනයක් තියෙන්නේ එක දවසයි. ඒකත් මේ කර්මාන්තය පසුබැසීමට හේතුවක්. ගංවාරි රංජනී ශිල්පිනිය සඳහන් කරයි.
අම්බලන්ගොඩ, බෝගහවත්තේ පදිංචි ලක්නී රාජිකා ගම්වාරිද (22) රූකඩ කලාවේ ළාබාලතම ශිල්පිනියකි. ඇය ශ්‍රී අනුර රූකඩ කණ්ඩායමේ නායක නලින් ගම්වාරිගේ දියණියයි. ඇය සෞන්දර්ය විශ්වවිද්‍යාලයේ දෙවැනි වසරේ අධ්‍යාපනය ලබන සිසුවියකි.
සිය පියාගේ අඩි පාරේ යමින් අවුරුදු 10 වයසේ සිට ඇය රූකඩ කලාවට සම්බන්ධ වී කටයුතු කරයි.
මීට අවුරුදු 11ට කලින් අම්බලන්ගොඩ පටබැඳිමුල්‍ලේ රූකඩ සංදර්ශනයක් තිබ්බා. මගේ අක්කා ජනනි තාරකායි, මමයි ඒකට සහභාගි වුණා. මේ සංදර්ශනය දින දෙකක් තිබුණා. මාලා නැන්දා ඒ දින දෙකේම සහභාගි වුණේ නැහැ. අක්කයි මමයි තමයි රූකඩවලට දෙබස් දුන්නේ. සංදර්ශනය අවසන් වුණාම අපට ප්‍රේක්ෂකයන්ගේ හොඳ ප්‍රතිචාර ලැබුණා. කටහඬ හොඳයි කීවා. ගර්ලි මාලා නැන්දාට කටහඬවල් කිහිපයකින් දෙබස් දෙන්න පුළුවන්. ඒත් අපට ඒ දක්ෂතාව නැහැ.... ලක්නී රාජිකා කියන්නේ, ඉතා නිහතමානී අයුරිනි.
ලක්නි රාජිකාටත්, ඇගේ අක්කාටත් ගීත ගායනා, දෙබස් කැවීම සහ රූකඩ නැටවීම කුඩා කාලයේ සිටම හැකියාව තිබිණි.
තාත්තා අපි සංදර්ශනවලට එක්ක යනවා. දෙබස් වැරුදුණොත් පයින් ගහනවා. මීට අවුරුදු පහළොවකට පෙර බෞද්ධාලෝක වෙසක් කලාපයේදී වෙස්සන්තර ජාතක කතාවේ ක්‍රිෂ්ණජිනා චරිතයට මම හඬ කැව්වා. එය මගේ හඬ දුන්න මුල් අවස්ථාව. මට මාලා නැන්දා එදා ගොඩක් උදව් කළා.
එදා දෙබස් දීම ඉතාම තාත්වික වුණා. කාගේත් ප්‍රශංසාවට ලක්වුණා. තෑගි බෝග පවා ලැබුණා. දවසක් ගාල්ල තල්ගම්පල අටහවුල ප්‍රදේශයේ සංදර්ශනයක් තිබුණා. ඒත් අවුරුදු පහළොවකට පමණ කලින්. එදත් අපට සංදර්ශනය අවසානයේ ප්‍රශංසා කළා. තෑගි බෝග ලැබුණා

වරක් ශ්‍රී ලංකා වට පැමිණි අවස්ථාවක මා ඇඳුම් කීපයක් මිලදී ගැනීම සඳහා රෙදි සාප්පුවකට ගොඩ වැදුනෙමි. සාප්පුව තුළ වට කීපයක් කැරකැවී මට අවශ්‍ය ටීෂර්ට්, කමිස හා කලිසම් කීපයක් තෝරා ගත්තෙමි. අනතුරුව ඒවාට මුදල් ගෙවීම සඳහා කැෂියර් කවුන්ටරය වෙත ගියෙමි.
මහත්තයාට අසවල් බැංකුවේ ක්‍රෙඩිට් කාඩ් එකක් තියෙනවද? කැෂියරයේ සිටි තරුණයා මගෙන් විමසුවේය. මම නැතැයි කීවෙමි. අත්පිට මුදලට රෙදි මිලදී ගන්නට පැමිණි මාගෙන් ක්‍රෙඩිට් කාඩ් පතක් තිබේදැයි විමසීම මා කුතුහලයට පත් කළ කාරණාවක් විය.
“ඇයි කේ‍රඩිට් කාඩ් එකක් ගැන ඇහුවේ?” මම තරුණයාගෙන් විමසුවෙමි.
“ක්‍රෙඩිට් කාඩ් එකක් තියෙනව නම් කොමිස් එකක් දෙනවා.” තරුණයා පැහැදිලි කරන්නට විය.
“කොමිස් එකක් දෙන්න ඕනේ අත්පිට මුදලට බඩු ගන්නවනංනේ..” මම ඇසුවෙමි. තරුණයා ඊට නිසි පිළිතුරක් නොදී කරබා ගෙන මගේ ගනුදෙනු අවසන් කළේය.
ක්‍රෙඩිට් කාඩ්පත එසේත් නැත්නම් බැංකු ණය කාඩ්පත සම්බන්ධයෙන් ඕස්ට්‍රේලියාව අනුගමනය කරනු ලබන්නේ මීට හාත්පසින්ම වෙනස් වැඩපිළිවෙළකි. වරක් මම ක්‍රෙඩිට් කාඩ් පතක් අයදුම් කිරීම සඳහා සිඩ්නි නුවර බැංකුවකට ගොඩ වැදුනෙමි. ක්‍රෙඩිට් කාඩ්පතක් අයැදුම් කිරීමට අවශ්‍ය සියලුම සුදුසුකම් මා සතුව  තිබූ බැවින් වහා අයැදුම් පත්‍රය සකස් කෙරිණ. අනතුරුව එම අයැදුම් පත්‍රය රැගත් බැංකු නිලධාරිනියක් මා සමග කාමරයකට ඇතුළු වී දොර ද වසා දමා මට අසුන් ගන්නා ලෙස කාරුණිකව ඉල්ලා සිටියාය. ඇය ද මා ඉදිරිපිට අසුනේ හිඳ ගත්තාය. අනතුරුව ක්‍රෙඩිට් කාඩ් පතක් යනු කුමක්දැයි ඇය විස්තර කරන්නට වූවාය.
ඔබ ඩොලර් පන්දහසක් වටිනා ක්‍රෙඩිට් කාඩ්පතක් ඉල්ලා තිබෙනවා. මෙම අයැදුම් පත්‍රය බැංකුව විසින් අනුමත කළහොත් ඔබට ඒ මුදල අඩංගු කාඩ්පත ලැබෙනවා. නමුත් කරුණාකර ඔබ මතක තබා ගන්න මෙය ණය මුදලක් බව. මෙම කාඩ්පතේ තිබෙන සම්පූර්ණ මුදල ඔබට නොපෙනෙන මුදලක්. ඔබේ ‍පොකැට්ටුවේ තිබෙන මුදල ඔබ සතු සැබෑ වටිනාකමක් සහිත මුදලක්. මෙම ක්‍රෙඩිට් කාඩ් පතෙන් ඔබ මිලදී ගන්නා භාණ්ඩ සඳහා බැංකුව ඔබෙන් ලොකු ‍පොලියක් ලබා ගන්නවා ඒ වගේම මෙම කාඩ්පතෙන් ඔබ  මුදල් පිටතට ගත්තොත් ඊටත් වඩා ‍පොලියක් ඔබට ගෙවන්න සිද්ධ වෙනවා. සමහර විට ඔබ මෙම කාඩ්පතෙන් වටිනා භාණ්ඩ මිල දී ගන්න ඉඩ තිබෙනවා.  එවිට එම භාණ්ඩය අලෙවි කරන ආයතනයත් ඔබෙන් ‍පොලියක් අය කරනවා. මෙම ක්‍රෙඩිට් කාඩ්පත නිසා ඔබ ණයකාරයෙක් වන බව කරුණාවෙන් ඔබට දැනුම් දෙන්න මට සිදු වෙනවා.”
බැංකු සේවිකාවට කීප වාරයක් ස්තුති කළ මා ක්‍රෙඩිට් කාඩ් පත් ඉල්ලුම් පත්‍රය කුණු කූඩයට දමන්න යැයි කාරුණිකව ඉල්ලා සිටිමින් බැංකුවෙන් පිට වීමි. සැබවින්ම ඕස්ට්‍රේලියාවේ සුපිරි සාප්පු ආදියේදී හොඳ වට්ටමක් ලබා දෙන්නේ අත්පිට මුදලට සිදු කෙරෙන ගනුදෙනු සඳහාය. නමුත් ක්‍රෙඩිට් කාඩ්පත් ජනතාව අත නැතුවාම නොවේ. ඔවුන් එම කාඩ්පත් පාවිච්චියට ගනු ලබන්නේ ඉතා අත්‍යාවශ්‍ය කටයුතු සඳහා පමණි. ක්‍රෙඩිට් කාඩ් පතක් ළඟ තබා ගැනීම නොපෙනෙන මුදලක් සන්තකයේ තබා ගැනීමක් ලෙස සලකා ඉතා වැදගත් අවශ්‍යතාවකදී පමණක් එය පරිහරණය කිරීම මා ඇතුළු මෙහි බහුතරයකගේ උත්සාහයයි. වෙළෙඳසල් ආදියෙන් මිලදී ගන්නා ආහාර ද්‍රව්‍ය, රෙදිපිළි හෝ ෙදෙනික දිවියේ වෙනත් අවශ්‍යතාවලදී ක්‍රෙඩිට් කාඩ්පත කිසිදු විටෙක යොදා නොගැනීමට අප උත්සහ කරන්නෙමු. අතේ තිබෙන මුදලට සරිලන පරිදි ආහාර ද්‍රව්‍ය මිලදී ගැනීමට අප පුරුදු වී සිටින්නෙමු.
මෙහි බොහෝදෙනා පිළිපදින්නට බොහෝ උත්සහ කරන තවත් වැදගත් කාරණාවක් තිබේ. එනම් ආහාරයට ගැනීමෙන් පසු ඉවත දමන ආහාර කොටස් ප්‍රමාණය හැකිතාක් අඩු කිරීමට උත්සහ කිරීමයි. මුළුතැන්ගෙයි ඉතිරි ආහාර කොටස් දමන්නට එක් කුණු බඳුනක්ද, බෝතල්, ප්ලාස්ටික් කවර ආදිය දමන්නට වෙනත් කුණු බඳුනක් ද තිබේ. ආහාර කොටස් දමන කුණු බඳුනට බහා තිබෙන ප්ලාස්ටික් උරය සතියකදී කිලෝ පහක පමණ බරින් යුක්ත නම් එහි තේරුම ඩොලර් දහයක් තරම් වටිනා ආහාර කොටස් ඉවත දමන බවයි. මෙම මුදල මාසයකදී ඩොලර් හතළිහකි. වසරකදී එය ඩොලර් 480ක් තරම් ඉහළ අගයක් පෙන්නුම් කරන අතර නවසීලන්තයේ ඔක්ලන්ඩ් නගරයට “ජෙට්ස්ටාර්” ගුවන් යානයකින් ගොස් ආපසු එන්නට වැය වන්නේ (මේ දිනවල) ඩොලර් 338කි. එබැවින් පවු‍ලේ සාමාජිකයන්ගේ අවශ්‍යතාව අනුව පමණක් ආහාර පිළියෙළ කොට කිසියම් මුදලක් ඉතිරි කර ගන්නට බොහෝදෙනා උත්සහ කරති.
කිසිම හේතුවක් නැතිව මුදල් වැය කරන තවත් කාරණාවක් වශයෙන් මෙහි බොහෝදෙනා සලකන්නේ විදුලියයි. පවු‍ලේ සාමාජිකයන් නොගැවසෙන සෑම ස්ථානයකම විදුලි පහන් නොදල්වා තබන්නට බොහෝදෙනා උත්සහ කරති. මීට පවු‍ලේ සියලුදෙනාගෙන් හිමි වන්නේ නොමඳ සහයකි. එපමණක් ද නොව, රාත්‍රියේදී ශීතකරණය හැර අනෙක් සියලුම විදුලි උපකරණ ආදියෙහි විදුලි බලය බිත්තියෙන්ම විසන්ධි කර දැමීම සිරිතකි. මෙමගින්  මාසයකට සිය විදුලි බිලෙන් ඩොලර් දහයක් ඉතිරි කරගත හැකි යැයි බොහෝදෙනා විශ්වාස කරති.
මෙය මසුරුකමක් නොවේ. මෙහි බහුතරයක් දෙනා රැකියා කොට මුදල් උපයන්නට බොහෝ වෙහෙස මහන්සි වෙති. එබැවින් එම මුදලට ඉහළ පිළිගැනීමක් සහ වටිනාකමක් තිබේ. තමන් හරිහම්බ කරන මුදලින් සැපවත් ජීවිතයක් ගත කළ හැකි අතර අරපරිස්සමින් වියපැහැදැම් කිරීම හේතුවෙන් “හොඳ” මුදලක් ඉතිරි කර ගන්නට ද හැකි වනු ඇත. ජීවිතය සුන්දර වන්නේ එවිටයි.

කැන්ගරු දේශයේ සිට අනුර හොරේෂස් ලියයි

සැබැවින්ම “සපතේරුවන්ගේ” දිවිය තුළ රැඳී ඇත්තේ කඳුළ සහ සුසුම පමණක් යැයි පැවැසුවහොත් එය වඩාත් නිවැරදිය. පහතින් පෙළගැස්වෙන්නේ අනේක විවිධ දුක්ඛ දොම්නස්සයන්ට මැදිව ජීවත් වීමේ උරුමය සොයන අවිහිංසක මිනිසුන්ගේ ජීවිත කතාවකි. තවත් කෙනෙකුගේ පයට පෑගෙන දුහුවිල්ලක් තරම්වත් සමාජය විසින් වටිනාකමක් නොදෙන මේ මිනිසුන් ගැන කියවෙන්නේ හැඟීම්බර සංවේදී කතා පුවතකි.
සපතේරුවන් පස්දෙනෙකු මාතර නගරය නියෝජනය කරමින් එදිනෙදා මග තොටේදී සැරිසරන පිරිස් සමූහයේ ගැලැවෙන පාවහන් යුගළක, සෙරෙප්පු යුගළක හෝ හිසට හෙවණ දෙන කුඩයක සැකිල්ල අලුත්වැඩියා කිරීමෙන් මුදලක් ලබා ගනී. මාතර මහනගර සභාවෙන් ලබාදී ඇති කුඩා කුටිවල රැඳුණු සපතේරුවෝ පස්දෙනා ඔවුන්ගේ වෘත්තීය ගැන මෙසේ අප සමග කතාබහ කළෝය.
“දහයේ පන්තියට යන කා‍ලේ වත් අධ්‍යාපනය හැදෑරුවද කියලා මතකයක් නැහැ. අපේ අම්මා තාත්තලට ඉහළට උගන්වලා අපිව දොස්තරවරු ඉංජිනේරුවරු කරන්න අවශ්‍යතාවක් තිබුණේ නැහැ. තුන් වේලටම සප්පායම් වෙන්න මොනවා හරි කන්න දීල ‍පොතක් පැන්සලක් අරන් දුන්නා ඉගෙන ගනින් කියලා. බලපෑමක් නැහැ. සහෝදරයා හිටියා. මේ හැමදෙනාම ස්කෝ‍ලේ ගියේ පහළ ශේ්‍රණිවලට විතරයි. ස්කෝ‍ලේ දවල්ට වැහුවම ගෙදර එන්නේ රෑට සමවයසේ කට්ටියත් එක්කලා පිට්ටනිවල ලඳු කැලෑවල රිංගලා. අධ්‍යාපනයේ බරපතළක් හිතේ තිබුණේ නැහැ.” සුගත් උදය කුමාර සිය අතීතය සිහිපත් කරමින් ප්‍රවේශය ලබා ගත්තේ ඒ විදිහට. “අ.‍පො.ස. සා.පෙළ පස්සේ පාසල් ගියේම නැහැ. අතට කීයක් හරි හොයාගන්න විවිධ දේවල් කරා. ගෙදරින් විරෝධයක් ආවෙත් නැහැ. වැඩිමහල් සහෝදරයනුත් ජීවත් වෙන්නෙත් ඒ අය කැමැති රස්සාවල්වලට යොමුවෙලා. කිහිපදෙනෙක් කුලී වැඩ කළා. 1980 ගණන්වල මම කොළඹට පැන්නා. ටික දවසක් යනකල් ඉබාගාතේ ගියා. මේ විදිහට දින කිහිපයක් ජීවිතය නිස්කාරණේ ගවෛනකොට එකපාරටම ජීවිතයේ වෙනසක් වුණා. කැලණිය පැත්තේ තිබුණ රජයට සම්බන්ධ උළු පැක්ට්‍රේරියක්. ඒකේ මට රැකියාවක් ලැබුණා. උළු පැක්ටරියේ මැෂින්වල වැඩට වැටුණා. ජීවිතය පිළිබඳ අලුත් බලා‍පොරොත්තුවක් ඇතිව රස්සාවට ගියා. මාසේ අන්තිමට අතට කීයක් හරි ලැබෙනවා කියලා.


අවුරුදු කීපයක්ම මේ රස්සාව ආසාවෙන් කරගෙන යනකොට ප්‍රේමදාස මහත්තයාගේ පාලන කාලයේ මේ උළු පැක්ටරිය වැහුණා රජයට පාඩුයි කියලා. අපිට රුපියල් 20,000ක වන්දියක් ලැබුණා. ඒ මුදලත් අරගෙන 1989යේ මම නැවත මාතර ගමට ආවා. ඇවිත් කුලී වැඩ කළා. මාළු වෙළෙඳාමේ ගියා. ඒ අතර කිසිම රැකියාවකින් මට මගේ ජීවිතය පිළිබඳව තෘප්තියක් ගොඩනැගුණේ නැහැ. එදා වේල පිරිමැහෙනවා කියලා විතරයි හැඟුණේ. මාතර වීරසූරිය ගොඩනැගිල්ල අසල දමිළ සහෝදරවරු දෙදෙනක් කැඩෙන සපත්තු සෙරෙප්පු මහනවා. කුඩ හදනවා දැක්කා. ඒ 1999, 2000 වර්ෂයේදී. මමත් ඒ අයට කිට්ටු කරලා අත්උදව් දුන්නා. උදේ ඉඳන් සවස් වෙනකම්ම එතැන රැඳුණා. හවසට රුපියල් 50ක් විතර ලැබුණා. වසර කිහිපයක් වැඩ කළත් අරමුදල තමයි දවසට අතට ලැබෙන්නේ. මටත් හිතුණා වෙනමම ‍පොඩියට වැඩේ පටන් ගන්න ඕන කියලා. මමත් ‍පොඩි ලෑලි තට්ටුවක සෙරෙප්පු මහන වැඩේ පටන් ගත්තා. අව්ව වැස්ස මේ දෙකෙන්ම හොඳටම බැට කෑවා. පාරේ අයිනේ ඉන්න බැහැ කියලා ‍පොලීසියෙන් එලෙව්වා. විවිධ බාධක ආවා. ඒත් මම මගේ වැඩේ කරගෙන ගියා. එතැනින් ඉවත් වුණේම නැහැ. සපත්තු සෙරෙප්පු මහන ගමන් ෙදෙනිකව සමාජයේ වෙන දේවල් ඇස් පනාපිටම දැකලා තියෙනවා. දරුණු රිය අනතුරු..... මාල කඩාගෙන දුවන අය එහෙම නැත්නම් මුදල් පසුම්බිය පැහැරගෙන යන අය.... අවස්ථා කිහිපයකදී මාල කඩාගෙන යන අය මුදල් පසුම්බිය පැහැරගෙන යන අය පස්සේ ලුහුබැඳලා අල්ලාගෙන ‍පොලීසියට හරි හිමිකරුට හරි හොරුන් අල්ලා දී තියෙනවා. අපි කවදාවත් අපිට හිමි නැති දෙයක් ලබාගෙන නැහැ. නමුත් අපට සමාජයේ ලැබෙන පිළිගැනීම හරිම කනගාටුයි.
මාතර මහ නගර සභාවේ හිටපු පුරපති හඳුන්ගේ මහත්තයා අපි ගැන නිතරම හොයා බැලුවා. 2015 වසරේදී හඳුන්ගේ මහත්තයාගේ යෝජනාවකට අනුව තමයි. දැනට ඉන්න මේ කුටිය අපිට හිමිවුණේ. මේ කුටිවලට මාසිකව රුපියල් 1400ක මුදලක් අපි මාතර මහ නගර සභාවට ගෙවන්න ඕන. කොහොමහරි ඒ මුදල ගෙවනවා. වැස්ස දවස්වලට වැඩ අඩුයි. සත පහක් එන්නේ නැති දවස් තියෙනවා. එදාට ඉතින් හාමතේ.....
“මම අවුරුදු දහයක ඉඳන්ම සපත්තු සෙරෙප්පු කැඩෙන ඒවා හදලා දීලා කීයක් හරි හොයා ගන්නවා. මට මහන්සිවෙලා කරන්න රැකියාවක් කරන්න බැහැ. මගේ නහරයක් බයිපාස් කරලා තියෙන්නේ. සැත්කමක් කළ නිසා අද මම රෝගියෙක්. ඒත් දරුවෝ දෙන්නෙක් ජීවත් කරන්න ඕන නිසා මහ පාරට ආවා. මිනිසුන්ගෙන් හිඟමන් යදින්න බැහැ.... මිනිස්සු දොස් කියනවා අතපය හොඳට තියාගෙන හිඟාකනවා කියලා. ඒ නිසා මට හිතුණා කියක් හරි හොයාගන්න මේ වෘත්තිය කරන්න ඕන කියලා” කන්දයියා ගනේෂන් සිය වෘත්තීය පිළිබඳව එලෙස සිය අදහස් දැක්වීය. “වැඩිදුර අධ්‍යාපනයක් තිබුණේ නැහැ. ජීවිතයේ බරපතළක් දැනෙන කොට කරන්න පුළුවන් හැම රස්සාවක්ම කළා. කුලී වැඩ ඉඳන් මුට්ට කර ගහන එකත් කරා... ඒ විදිහට කරගෙන යන අවස්ථාවේදී තමයි මට බයිපාස් සැත්කමක් කළේ. එදා ඉඳන් මුකුත් ඇඟ වෙහෙසන වැඩ කරන්න බැහැ. රෝගියෙක් වුණා. අන්තිමට ඇවිත් නතර වුණේ මෙතන...
මිනිසුන්ගේ මතයක් තියෙනවා. අපි කරන්නේ බොහොම පහත් රැකියාවක් කියලා. අපි දෙස පිළිකුළෙන් බලන පිරිසකුත් අද සමාජයේ ජීවත් වෙනවා. අපි සපත්තු සෙරෙප්පු මහන මනුස්සයානේ කියන හැඟීමෙන් අපි බොහොම පහත් අඩියකට දාලා කතා කරන අය ඉන්නවා. ඒත් අපි කිසිම කෙනෙක් එක්ක අමනාපයක් නැහැ. අපි කරන්නේ සේවයක්.. තවත් කවුරුවත් කෙනෙක් නොකරන සේවයක්. වැඩ කුළියක් බලාගෙන කළත් සමහර අවස්ථාවල මුදල් අය කරන්නේ නැතිව ඒ වැඩේ අවසන් කරලා දෙන උණුවෙන සංවේදී හිතක් අපටත් තියෙනවා. ඇතැම් පිරිස් අපට චෝදනා කරනවා, කෙනෙකුගේ මූණ බලලා ගණන් කියනවා කියලා. කෙනෙකුගේ තරාතිරම බලලා අපිට වැඩ කුළිය ලබාගන්න අවශ්‍ය නැහැ.
“මම කාලයක් මාතර මහානාම පාලමේ අයිනක ගිනි අව්වේ ඉඳගෙන මගතොටේ යන අයගේ කැඩෙන සෙරප්පු සපත්තු මහනවා. කැඩෙන ඒවා  හදනවා. දරු පවුලක් නඩත්තු කරන්න තමයි මේ විදිහට අව්වට වැස්සට වේලෙන්නේ. ජී.එම්.සිරිපාල සිය අතීතය සමග මුසුවුණු වෘත්තීය අරගලය ගැන අප සමග කත කළේ ඒ අයුරිනි. හෙතෙම මේ වෘත්තියෙන් කොතරම් බැට කා ඇති අයෙක්ද යන්න පැහැදිලි වන්නේ ඔහුගේ දෙඅත් තුළිනි. දෙයතෙහි සෑම ඇඟිල්ලකම සපත්තු මහන සෙරෙප්පු මහන ඉදිකටුව ඇනී තුවාල සිදුව තිබේ. ඒ තුවාල සුව වුවද ඒ දෑත් තවමත් ගොරහැඩිය.
“කොයිතරම් මහන්සි වුණත් මහත්තයා... හවසට හරි හමන් ආදායමක් අපේ අතට එන්නේ නැහැ. ඒ ලැබෙන මුදලින් තමයි අපේ දරු පවුල් ජීවත් වෙන්නේ. අපට කියලා හාල් තුනපහ අඩුම කුඩුම දෙන්නේ නැහැනේ මහත්තයා. අපි ගැන පත්තරයට ලිව්වා කියලත් වැඩක් නැහැ. අපේ ජීවිතවල කිසිම වෙනසක් නැහැ.
මාතර පුරවරයේ සපතේරුවන්ගේ ජීවිත කතාව මෙන්ම මුළු දිවයිනේම සිටින මෙවැනි පීඩිත පන්ති නියෝජනය කරන පිරිසකගේ ජීවිත කතාවද මොවුන්ගේ ජීවිත කතාවට සියට සියයක්ම සරිලනු ඇතැයි සිතේ. මොවුන්ද මිහිතලයේ වාසය කිරීමට උරුම ලද්දෝය. ගැටලුව  නම් ඔවුන්ගේ වෘත්තිය අද සමාජය තුළ පිළිගැනීමට ලක් නොවීමය.

චමරි රාජපක්ෂ - මාතර

Page 1 of 8

IMAGE

සුද්දන් දෙකට පැලූ 'මීයන් ඇල්ලේ' කතාව

IMAGE 2017 Mar 27 16:59
වර්ෂ 1815දී අප රටේ පාලනය මුළුමනින්ම සිය’තට ගත් ඉංග්‍රීසි ජාතිකයන් එය නැවත අප අතට පත් කරන ලද්දේ...
Views - 158

මැතිනිය බක්කි කරත්තෙන් ඉස්කෝ‍ලේ ගිය හැටි

IMAGE 2017 Mar 27 11:07
ඒ වර්ෂ 1923 ජූලි මස 9 බ්‍රහස්පතින්දායි. රත්නපුර දඹවින්න වලව්වෙන් පිටත් වූ බක්කි කරත්තය නගරයේ...
Views - 686

සමහර සාස්තර බලාගෙන හිටියා වගේ කියැවෙන්නේ කොහොමද?

IMAGE 2017 Mar 27 10:43
ගතවූ වසර විසිඅටක කාලය තුළ මම වරින්වර ‘බලා සිටියාක් මෙන් සත්‍ය පවසෙතැ’යි බොහෝ දෙනකු කී...
Views - 896

සමහරු සල්ලි මත්තේ නැහෙද්දී තාත්තා වින්දනය සොයමින්...

IMAGE 2017 Mar 26 14:43
සිංහල වේදිකාව, සිනමාව සහ රූපවාහිනිය විජයග්‍රහණය කළ චරිතාංග නළුවකු වශයෙන් ජයලත් මනෝරත්නයන්...
Views - 5034

රන්ජන් එක්ක ගත්ත මංගල ඡායාරූපය නිසා මට ප්‍රශ්න පිට...

IMAGE 2017 Mar 26 14:30
ජනප්‍රිය නළු නිළියන් දෙ‍පොළක් වූ රන්ජන් රාමනායක සහ අනූෂා දමයන්ති පෙනී සිටි මංගල ඡායාරූපය...
Views - 3194

හෘද රෝගීන් අනියම් සබඳතා පවත්වන්නේ බලාගෙනයි!

IMAGE 2017 Mar 24 13:39
හදවත් රෝග ලක්ෂණ ඇත්තවුන් සහ හදවත් රෝග වැළදුන පුද්ගලයන් තුළ තම ලිංගික ජීවිතය සම්බන්ධයෙන්...
Views - 5009

Please publish modules in offcanvas position.