lakbima.lk

සමන් වික්‍රමාරච්චි රටේ වැඩියෙන් ප්‍රසිද්ධ වී ඇත්තේ සම්මානීය ගත්කතුවරයෙකු හා සාහිත්‍ය විචාරකයෙකු වශයෙනි. එහෙත් ඔහු වෘත්තියෙන් විනිසුරුවරයකු ලෙස රාජකාරි කළ අයෙකි. මහේස්ත්‍රාත්, දිසා විනිසුරු, මහාධිකරණ විනිසුරු, පළාත්බද සිවිල් අභියාචනාධිකරණ විනිසුරුවරයකු ලෙස ද බොහෝ ප්‍රදේශවල විවිධ දේශපාලන හා සමාජ තත්ත්වයන් යටතේ රාජකාරි කර ඇති ඔහුගේ වෘත්තීය අත්දැකීම් බොහෝය. ඔහුගේ වෘත්තිය දිවියේ විශේෂ සිද්ධියක් වූයේ ගංගොඩවිල සෝම හිමියන්ගේ මරණය පිළිබඳ මහේස්ත්‍රාත් පරීක්ෂණය පැවැත්වීමය. මුළු රටේම ආන්දෝලනයට ලක් වූ එම සිද්ධිය හා විනිසුරු දිවියේ මතක සටහන් දිග හැරෙන ලිපි මාලාවේ අටවෙනි කොටසයි මේ.

සමන් වික්‍රමාරච්චි මොරවක මහේස්ත්‍රාත්වරයා වශයෙන් පත්වීම ලබා එහි යෑමට ප්‍රථම, මොරවක හිටපු මහේස්ත්‍රාත්වරයෙකු වූ කුයින්ටස් පෙරේරාගෙන් එහි ජීවිතය පිළිබඳ  විමසා බැලීය.

“කොහොමද ජීවිතය මොරවක?”

“ෆිල්ම්ස් ගෙනිච්චොත් බලන්න පුළුවන්.”

“වෙන?”

“හොඳට ‍පොත් කියවන්න පරිසරයක් තියෙනවා” කුයින්ටස් පෙරේරා පැවැසීය.

“බැරිම තැනකදී මොරවකදී උපකාරයක් ගන්න පුළුවන් කෙනෙක් ඉන්නවද?” සමන් වික්‍රමාරච්චි එසේ විමසුවේ මොරවක මහේස්ත්‍රාත්වරයා වශයෙන් කටයුතු කරන විට හදිසියේ උපකාරයක් ලබාගත යුතු පුද්ගලයකු පිළිබඳව දැනුවත්ව සිටීම වැදගත් වන නිසාය.

මොරවක තේ වතු හිමියකු වූ පද්මසිරි පිළිබඳව ඔහුට දැනගන්නට ලැබුණේ එම අවස්ථාවේදීය. පද්මසිරි

නීතිඥයන් බොහෝ පිරිසක් ඉතා ළඟින් ඇසුරු කළ පුද්ගලයකු විය.

කඩ කාමර දෙකක උසාවිය පවත්වාගෙන ගිය මහේස්ත්‍රාත්වරයාට සම්පූර්ණ උසාවියකට අංග සම්පූර්ණව එවූ ගෘහ භාණ්ඩ පරිස්සම් සහිතව තබා ගැනීම අලුත පත්ව ආ මහේස්ත්‍රාත්වරයාට ගැටලුවක් විය.

උසාවිය සමීපයේම පද්මසිරිට අයත් වසා දැමූ ලොකු ගෙයක් ඇති බව උසාවියේ රෙජිස්ට්‍රාර්වරයාගෙන් සමන් වික්‍රමාරච්චිට දැන ගන්නට ලැබුණි. කුයින්ටස් පෙරේරා මොරවක හිටපු මහේස්ත්‍රාත්වරයා පද්මසිරි පිළිබඳව හොඳ රෙකමදාරුවක් කලින්ම ලබාදී තිබුණ නිසා සමන් වික්‍රමාරච්චි, පද්මසිරිට අයත් නිවසේ උසාවියට අයත් ගෘහ භාණ්ඩ රඳවා තැබිමට එකඟ විය.

මේ කාලය වන විට රෝහණ විජේවීරගේ මරණයද සිදුවී තිබුණි. රටේ පැවැති කලබලකාරී තත්ත්වය යම් තරමකට සමනය වෙමින් පැවතුණි. අධිකරණ කොමිසම් සභාවෙන් සමන් වික්‍රමාරච්චිට දැනුම් දුන්නේ මාතර සිට මොරවකට පැමිණෙන ගමන නතර කර, මොරවක මහේස්ත්‍රාත් කොට්ඨාසයේම නතර විය යුතු බවය.

“පද්මසිරිට අයිති ගෙදර උසාවියෙ බඩු දාලනේ තිබුණේ. ඒකෙ එක කාමරයක් හිස් කරල මම පදිංචි වුණා” එසේ එහි පදිංචි වූ සමන් වික්‍රමාරච්චි පද්මසිරි සමග සමීප සබඳතාවක්ද ඇති කරගත්තේය.

“කිසිම ප්‍රති උපකාරයක් බලා‍පොරොත්තුවෙන් කටයුතු කළ කෙනෙක් ‍නෙවෙයි. බොහෝම ගුණ යහපත්කම් ඇති කෙනෙක්. අපේ පවුල් අතරද සම්බන්ධකම් ඇතිවුණා. මම මොරවකින් මාරුවෙලා ගියායින් පසුවත් ඒ යාළුකම් තිබුණ මොරවක හිටපු මහේස්ත්‍රාත් සමන් වික්‍රමාරච්චි පද්මසිරි පිළිබඳව සඳහන් කළේ යහපත් ආකල්පයෙනි.

මේ වන විට මොරවක මහේස්ත්‍රාත් අධිකරණයෙහි රෙජිස්ට්‍රාර්වරයා වශයෙන් කටයුතු කළේ විශ්‍රාම යෑමට ඉතාමත් ආසන්න වයසේ සිටි අයෙකි. පාංශු දේහධාරී පුද්ගලයකු වූ ඔහුගේ හිසකෙස් තැනින් තැන සුදු වී තිබුණි.

“දවසක් හවසක රෙජිස්ට්‍රාර්වරයාට අසනීප වුණා” විශ්‍රාමික විනිසුරුවරයාව ගෙවී ගිය අතීතයක තොරතුරු යළි ආවර්ජනය කරයි.

රෙජිස්ට්‍රාර්වරයාව, මහේස්ත්‍රාත්වරයාගේ මෝටර් රථයට නංවා ගත්තේය. සහයට උසාවියේ ආරච්චිවරයාද මෝටර් රථයට නැගුණි. පිම්මේ ඉඟිල ගිය මෝටර් රථය නතර වූයේ මාතර පෞද්ගලික රෝහලක් ඉදිරිපිටය.

“ආරච්චිල ගිහිල්ල ඔය ඉස්සරහම ඉන්න කාට හරි කියන්න” රියැදුරු අසුනේ සිටි මහේස්ත්‍රාත්වරයා පැවැසීය.

කලබලයට පත් ආරච්චිල රෝහ‍ලේ සිටි අයට පැවැසුවේ මොරවක මහේස්ත්‍රාත්වරයා මෝටර්රථ තුළ සිටින බවය. රෝහ‍ලේ සිටි අය සිතුවේ මොරවක මහේස්ත්‍රාත්වරයා අසනීපව මෝටර් රථ තුළ සිටින බවය.

හදිසියේ ලැබුණ උත්තේජනයකින් මෙන් ක්‍රියාත්මක වූ ඔවුන් වහාම ටේ‍රාලියක් රැගෙන මෝටර් රථය වෙත පැමිණියහ.

“හා හා නඩුකාර හාමුදුරුවන්ව පරිස්සමින්” සුළු සේවකයන් මෝටරථය තුළ සිටි රෙජිස්ට්‍රාර්වරයා පරිස්සමින් එළියට ගන්නට විය.

“මම ඩ්‍රයිවර් සීට් එකට වෙලා හිනහ වෙවී බලාගෙන හිටියා. ඒක නිවැරදි කරන්න ගියේ නැහැ” සමන් වික්‍රමාරච්චි පවසයි.

සාත්තු සේවක සහයකයන් රෙජිස්ට්‍රාර්වරයා රැගෙන ගොස් වෛද්‍ය පිරිස් කැඳවා ඉක්මන් ප්‍රතිකාර ලහි ලහියේ ලබා දුන්හ.  රෙජිස්ට්‍රාර්වරයාට මහේස්ත්‍රාත්වරයකුගේ සැලකුම් ලැබිම නිසා ඉක්මනින් රෝහලෙන් පිට වීමටද හැකි විය. මොරවක මහේස්ත්‍රාත් අධිකරණ බල ප්‍රදේශයට ‍පොලිස් බල ප්‍රදේශ පහකට ආසන්න සංඛ්‍යාවක අධිකරණ කටයුතු සිදු කිරීමට සිදුවිය. මොරවක, ඌරුබොක්ක, දෙණියාය, අකුරැස්ස, මාවරල, එම ‍පොලිස් බල ප්‍රදේශ විය. මේවා ඉතාමත් ඈතින් ඈත පිහිටි ‍පොලිස් කොට්ඨාස විය. මෙනිසා මහජනතාවට අධිකරණ කටයුතු ඉතාමත් දුරබැහැර ගෙවා මොරවක මහේස්ත්‍රාත් අධිකරණය වෙත පැමිණිය යුතුවිය.

“මම එන්න ටික කාලයකට ඉස්සර දෙයියන්දර සංචාරක උසාවියක් පවත්වල තියෙනවා. සතියකට එක දිනයක් එහි නඩු විභාග කරල තියෙනවා. නමුත් මම එන්න ටික දවසට පෙර එම උසාවියට ගිනි තියල සම්පූර්ණයෙන් විනාශ කරල තිබුණා. ඒක නිසා ඒ සංචාරක උසාවිය පැවැත්වුණේ නැහැ” විශ්‍රාමික විනිසුරුවරයා අතීත තොරතුරු හෙළි කරන්නට විය.

මොරවක මහේස්ත්‍රාත් අධිකරණය, කොළඹ අධිකරණ පාලන පද්ධතියෙන් මිදුනු ස්වභාවයක් පළ කළත් කොළඹ පැවැත්වෙන විශේෂ සම්මන්ත්‍රණ සඳහා සහභාගිවීමට විනිසුරුවරයාට සිදුවිය. මෙම සම්මන්ත්‍රණවලදී අධිකරණ සේවාව වඩාත් ඵලදායී ලෙස මහජනතාවට පවත්වාගෙන ගිය යුතු ආකාරය පිළිබඳව දේශන පවත්වන ලදී. විශේෂයෙන් නඩු කල්නොයවා ඉක්මනින්  විසඳිය යුතුය යන්න එම දේශනවලදී අවධාරණය කරන ලදී.

“ඒ සම්මන්ත්‍රණ මට ලොකු බේ්‍රන් වොෂ් එකක් වගේ වුණා.  නඩු කල්නොයවා ඉක්මනින් විසඳිය යුතු යන ආකල්පය මගේ සිත් තදින් කාවැදුන” සමන් වික්‍රමාරච්චි පවසන්නේ තමන් මහේස්ත්‍රාත්වරයකු වශයෙන් කටයුතු කරන සමයේ අධිකරණ කොමිෂන් සභාවෙන් පවත්වන සම්මන්ත්‍රණවලින් ලැබුණ දායකත්වය පිළිබඳවය.

විශාල බල ප්‍රදේශයක පැතිරුණ නිසා මොරවක මහේස්ත්‍රාත් අධිකරණයෙහි විශාල නඩු ප්‍රමාණයක්  ගොඩගැසී තිබුණි.

වරක් මොරවක මහේස්ත්‍රාත් අධිකරණයෙහි විභාග වූ නඩුවක විත්තිකරුට ඇප ඉල්ලීම සඳහා මාතර ඉතාමත් ප්‍රකට නීතිඥයකු පෙනී සිටියේය. ඔහු විත්තිකරුට ඇප ලබා ගැනීමට ඉතාමත් වෙහෙස විය. නමුත් නඩුවේ ස්වභාවය නිසා විත්තිකරුට ඇප ලබාදීමට ‍පොලීසිය තරයේ විරුද්ධ විය.

“මම අවුරුදු විසිපහක කීර්තිමත් නීතිඥ වෘත්තියක් තියෙන කෙනෙක්” නීතිඥවයා පැවැසීය.

“ඔබගේ නීතිඥ වෘත්තියේ අතීත කාලය මේ ඇප දීමට අදාළ නැහැ ‍පොලීසිය ඇප දීමට එකඟ නැහැ” විනිසුරුවරයා ඇප දීම ප්‍රතික්ෂේප කරමින් පැවැසීය. නීතිඥවරයා විත්තිකරුට ඇප ලබා දෙන්නේය කියා විශාල මුදලක් ලබා ගන්නට ඇත. ඒ නිසා ඇප ලබා ගැනීමට නොහැකිවීම නිසා කෝපයට පත්ව අධිකරණ සේවා කොමිසම් සභාවට පෙත්සමක් යැවීය.

“ඔය සිද්ධිය මට හරියටම දැන ගන්න ලැබුණෙ මම මොරවකින් මාරු වෙලා යන දවසෙ. මාතරදී මට පවත්තපු සම්භාෂණයේදී” විශ්‍රාමික විනිසුරුවරයා පවසයි.

මොරවක මහේස්ත්‍රාත් අධිකරණයෙද මාතර අධිකරණයෙද කටයුතු කළ මහින්ද සිරිවර්ධන නම් ‍‍‍ජ්‍යෙෂ්ඨ නීතිඥවරයා එම සමු ගැනීමේ සාදය අතරතුර මාරු වී යන මහේස්ත්‍රාත්වරයා පසකට කැඳවා ගත්තේය.

“සර් මාරුවෙලා යන නිසයි මම මේ සිද්ධිය කියන්නෙ” මහින්ද සිරිවර්ධන පැවැසීය.

දිනක් මාතර මහාධිකරණ විනිසුරු ජයවික්‍රම ඔහුගේ නිල කාමරයට මහින්ද සිරිවර්ධන කැඳවා, අධිකරණ සේවා කොමිෂන් සභාවට යවන ලද පෙත්සමක පිටපතක් ඔහුගේ අතට දෙන ලදී.

“මිස්ටර් සිරිවර්ධන ඔයා මොරවකත් වැඩ කරනවනේ. මේ පෙත්සමේ ඇත්තම තත්ත්වය මොකක්ද?” මහාධිකරණ විනිසුරුවරයා විමසීය.

අධිකරණ සේවා කොමිෂන් සභාව වෙත යවන ලද පෙත්සම මාතර මහාධිකරණ විනිසුරුවරයා වෙත එවා තිබුණි.

“මොරවක විවිධ විනිසුරුවරයන් ඉඳල තියෙනවා. බිමත්ව ඉන්න අය. ලෝයර්ස්ල එක්ක ඩීල් ගහන අය. හැබැයි  මෙයා එහෙම කෙනෙක් නොවෙයි. නඩු කල් දාන්නෙ නැතිව ඉක්මනට විසඳන්න කැමති කෙනෙක්” මහින්ද සිරිවර්ධන පැවැසීය.

“පෙත්සම ගැන වෙන විභාගයක් ඕනෙ නැහැ. මම පිළිතුර අධිකරණ සේවා කොමිෂන් සභාවට යවන්නම්” මාතර මහාධිකරණ විනිසුරුවරයා පැවැසීය.

පෙත්සමේ සඳහන්ව තිබුණේ සමන් වික්‍රමාරච්චි විනිසුරුවරයා ‍පොලීසියෙන් පගාව ගෙන විත්තිකරුවන්ට ඇප දීම   ප්‍රතික්ෂේප කරන බවය.

පීටර් කැනියුට් පෙරේරා

Page 1 of 8

Lakbima Online

Download Lakbima Mobile App

 
 

 

Get In Touch With Us

Explore More

Please publish modules in offcanvas position.