Coss Ear2
lakbima.lk
COSS Ear 1

මහනුවර රජ කළ රාජාධිරාජසිංහ රජුට බිසෝවරුන් කිහිප දෙනෙක්ම සිටියහ. ඔවුන් අතර අලමේලු අම්මා, රෙංගනායිගි අම්මා, උපේන්ද්‍ර අම්මා යනුවෙන් නායක්කාර් වංශික බිසෝවරියෝ තිදෙනෙක් වූහ. ඔවුන්ගෙන් නොසෑහුන රාජාධිරාජසිංහ උපේන්ද්‍ර අම්මා නමැති දෙවන බිසවගේ නැගණිය සමග හොර රහසේ සම්බන්ධතාවක් පැවැත්වීය. මේ අතරම පිළිමතලාවේ අදිකාරම්ද ඇය සමග සබඳතා පවත්වාගෙන ගියාය. ටික කලකින්ම ඇයට පිරිමි දරුවෙකු ලැබුණි. දරුවාගේ නම කන්නසාමිය. රජතුමා සිතුවේ දරුවා තමාගේ බවය. 
පිළිමතලාවේ සිතුවේද දරුවා තමාගේ බවය. වසර ගණනක් ගත විය. කන්නසාමිගේ කරදඬු උස් මහත් විය. නව යොවුන් තරුණයෙකු බවට පත් විය. ඒ අතරේ රජතුමා සැක කළේ පිළිමතලාවේ හා අනියම් බිරිඳ අතර සබඳතාවයක් ඇතැයි යනුවෙනි. මේ නිසා රාජාධිරාජසිංහ රජු සැලසුම් කළේ කන්නසාමි කුමරු ලවා පිළිමතලාවේ ඝාතනය කිරීමටය. නමුත් ඊට පෙර ඉක්මන් වූ පිළිමතලාවේ කන්නසාමි ලවා රාජාධිරාජසිංහ ඝාතනය කළේය. ඒ උඩරට කිරුළ කුමරුට දෙනවාය යන ‍පොරොන්දුව අනුවය. 
කන්නසාමි කුමරුන් ශ්‍රී වික්‍රම රාජසිංහ යනුවෙන් රජු බවට පත් කිරීමෙදී මහ අදිකාරම් පිළිමතලාවගේ අදහස වූයේ අටළොස් හැවිරිදි ශ්‍රී වික්‍රම රාජසිංහ රජු තමන්ගේ උපදෙස් ගෙන රාජ්‍යය කරයි යන්නය. නමුත් රජු උපදේශ ගත්තේ තමන්ගේ බිසෝවරුන් සමගිනි. දකුණු ඉන්දියාවෙන් පැමිණ උපදේශකගෙනි. මෙනිසා ශ්‍රී වික්‍රම රාජසිංහ රජු බලයෙන් පහ කිරීමට පිළිමතලාවේ මහ අදිකාරම් කටයුතු සම්පාදනය කරන්නට විය. රාජ භෝජනයට වස මිශ්‍ර කිරීමට පිහින 
රාළටත් බොටුව කැපීමට රජ වාසල කරණවෑමියාටත් ස්නානය කරනකළ කිරිච්චියෙන් ඇන මැරීමට සියඹලාපිටියේ සට්ටම්බිටත් අල්ලස් දුන්නේ යැයි, 
පිළිමතලාවේ මහ අදිකාරම්ට විරුද්ධව ශ්‍රී වික්‍රම රාජසිංහ රජු විසින් චෝදනා නගන ලදී. එම අවස්ථාවේ පිළිමතලාවේ මහ අදිකාරම් මරණයට පත් කිරීම රටේ කැරැල්ලක් ඇති වීමට හේතු වේ යැයි සිතු මහ රජු 
පිළිමතලාවේ මහ අදිකාරම් සියලු නිලතලවලින් පහකර සාමාන්‍ය නිලමේ කෙනෙකු වශයෙන් තම වලව්වේ දිවි ගෙවීමට අණ කරන ලදී. ඉක්බිතිව මහ අධිකාරම් ධුරයට රජු විසින් පත් කරනු ලැබුවේ ඇහැළේ‍පොළ නිලමේය. ශ්‍රී වික්‍රම රාජසිංහ ඇහැළේ‍පොළ මහ අධිකාරම්ට තාන්න මාන්න දුන්නේ හුදෙක් ඔහු ගැනම සිතා නොවේ. 
ඇහැළේ‍පොළගේ කුමාරිහාමි පිළිබඳ සිත් බැඳගෙනය. එහෙත් රජුගේ බසට ඇය අවනත නොවූවාය.            
රජු කෝපයට පත්විය. කුමාරි හාමිගෙන් කවදා හෝ පළිගන්නා බව ශපථ කළේය. ඊට අවස්ථාව ලැබෙන්නේ ඉංග්‍රීසින් ශ්‍රී වික්‍රම රාජසිංහ රජුට එරෙහිව යුද ප්‍රකාශ කිරීමත් සමගය. සබරගමුවේ සිටින ඇහැළේ‍පොළ අධිකාරම් ඉංග්‍රීසින්ට සහය දක්වන බවට චෝදනා කළ රජු ඇහැළේ‍පොළ කුමාරිහාමිද ඔවුන්ගේ දරුවන්ද අත්අඩංගුවට ගත්තේය. 
රාජ නියමයෙන් කුමාරිහාමිද ඇගේ දරුවෝද ඝාතනයට ලක් වූහ. 
ලෙයට ලෙය පළි ගැනීමට ඇහැළේ‍පොළ ඉංග්‍රීසින්ට එකතු විය. ඇහැළේ‍පොළ අදිකාරම් ඇතුළු ඉංග්‍රීසි හමුදාව උඩරට රාජ්‍ය ඇල්ලීමට එන බව ආරංචි වූ ශ්‍රී වික්‍රම රාජසිංහ රජු තමන් සතු කෝටි ගණන් වටිනා මුතු මැණික් සහ රන් ආභරණ ලැයිස්තු ගත කර පෙට්ටගම්, පෙට්ටිවල තැන්පත් කරන්නට විය. රජු මේ සඳහා උල්පැන්ගාව අරමුද‍ලේ කංකානම් වූ වෙ‍ලේගෙදර අප්පුහාමිගේ සහාය ලබාගත්තේය. එක් පෙට්ටියක ඇති භාණ්ඩ පිළිබඳ විස්තර ‍ලේඛනයක් සිංහල භාෂාවෙන් තලගුනේ වන්නකු නිලමේද, මලබාර් භාෂාවෙන් අයියර්ලු නායක්කර් විසින්ද සකස් කරනු ලදුව එම පිටපත් එම පෙට්ටියෙහි බහා සලකුණු කර, අගුල් දමා ලා කඩින් මුද්‍රා තබන ලදී. මේ සෑම පෙට්ටියකම සලකුණු සහ ඒවා භාර දුන් අයගේ නම් ඇතුළත් විස්තරයක්ද වෙනම සකස් කර, මහනුවර සාන්චි මණ්ඩපයේදී මධ්‍යම රාත්‍රී 
දොළහට එක් එක් නිලධාරීන්ට භාර දෙන ලදී. ඔටුන්න ඇතුළු අනිකුත් ස්වර්ණමය භාණ්ඩ හන රෙදිවලින් ඔතා පෙට්ටිවල තැන්පත් කරන ලදී. ඉංග්‍රීසි හමුදාව මහනුවරට ළඟා වූ බව සැල වූ ශ්‍රී වික්‍රම රාජසිංහ රජු, දළදා වහන්සේ ඉවත් කර ගෙන යෑමේ කටයුත්ත ඉඹුල්මල් ගෙදර රාළ සහ තවත් භික්ෂුන් වහන්සේලා කීප දෙනෙකුට පැවැරිය. රජතුමා තමන්ට හිතෙෂී දොරගමුවේ පිහිරාළත් හේවා විස්සේ මඩුප්පිළි රාළත්, තමන්ගේ බිසෝවරුන්ද, සමගින් උඩවත්ත කැලය හරහා මහවැලි ගඟෙන් එතරවී, මැද මහනුවර උඩුපිටියේ ගල්ලැහැවත්තේ බෝමුරේ ආරච්චිගේ නිවසට පැමිණියහ. එහිදී තමන්ගේ හැඩරුවට සමීප හැඩරුවෙන් යුතු, හේවා විස්සේ මඩුප්පිලි රාළ පමණක් නතර කරගෙන අනික් දෙදෙනා ආපසු යවන ලදී. 
තවත් ආරක්ෂාව පතා රජු කන්ද පැත්තේ ගල් ලෙනක සැඟවීමට මැද මහනුවර කන්ද පහළ පිහිටි උඩපිටියේ ගල්ලැහැ වත්තේ බෝමුරේ ආරච්චිගේ නිවසින් රාත්‍රියේ පිටත් විය. නමුත් අධික අන්ධකාරයත්, අධික වර්ෂාවත් නිසා මාර්ගය සොයාගත නොහැකි වූ රජු ආපසු පැමිණ බිසෝවරුන් සමග එම නිවසේම ලැගුම් ගත්තේය. 
හෙළයේ අවාසනාවන්ත දිනය වන 1815 පෙබරවාරි 18 වන දිනය උදා වී හෝරා කීපයක් ගතවුණි. මාරාවේශ වූ සබරගමු වැසියන් කීප දෙනකු සහ ඉංග්‍රීසි හේවාපන්නයක්ද සමගින් එක්නැලිගොඩ නිලමේත්, බඩුපිටියේ රාළත් බෝමුරේ ගමට ළඟා විය. අතරමගදී ඔවුන්ට කලබලයට පත්ව සිටි කොලු ගැටයකු හමුවිය. එක්නැලිගොඩ නිලමේ කොල්ලා අල්ලා ගෙන ඔහුට වධ හිංසා කිරීමට පටන් ගත්තේය. දිවි බේරා ගැනීමට කොල්ලා දේවයන් වහන්සේ සිටිනා තැන පෙන්වීය. රජු සැඟව හුන්නේ බෝමුරේ රාළගේ නිවසේය. 
බෝමුරේ රාළගේ නිවස පිහිටියේ විශාල නුග රුකක් ආසන්නයේය. නිවස ඉදිරිපිට ලන්සයක් තබාගත් මුරකරුවෙකු විය. එක්නැලිගොඩ ඇතුළු පිරිස නිවස සමීපයට යන විට ස්ත්‍රීහු දෙදෙනෙක් විවර කර තිබූ දොරක් තදින් වැසූහ. 
එක්නැලිගොඩ දොරට තට්ටු කර දොර විවර කරන ලෙස රජුට දැන්වීය. නමුත් දොර විවර නොවුණි. පසුව මෝල්ගස් පහරින් දොර කඩන ලදී. සබරගමු වැසියෝ මාරාවේශව නිවසට ඇතුළු වූහ. ඔවුහු බිසෝවරුන් පැළඳ සිටි ආභරණ සහ අඟනා පට රෙදි ගලවා යට රෙදි පිටින් නිවසින් බැහැරට ඇදගෙන ආහ. බටුපිටියේ රාළ බිසවුන්ගේ නාස්වල සහ කන්වල පැළඳ සිටි රන් ආභරණ පැහැර ගත්තේ එම ඉන්ද්‍රීයන් ඉරා රුධිරය සිරුර පුරා ඇඳ හැලෙද්දීය. 
ශ්‍රී වික්‍රම රාජසිංහ රජු දෙසට ඇඟිල්ල දිගු කළ එක්නැලිගොඩ නිලමේ මේකා වැල්පටක් ගෙන ඌරෙක් වගේ අත් පා කුදලාපිය පැවැසූ විට අත් පා බඳිනු ලැබූ රජු නිවසින් පිටතට ඇඳගෙන පැමිණියේය. 
කේ.ඇම්. ද සිල්වා සහ හවඩ් රිගිනිස් ලියන ලද ජේ.ආර්. ජයවර්ධන චරිතාපදානයහි සඳහන් ලෙස 1815 උඩරට අල්ලා ගැනීමේ කුමන්ත්‍රණ ක්‍රියාවලියේදී එහි ප්‍රධාන චරිතය රඟ පෑ ජෝන් ඩොයිලිගේ විශ්වාසවන්ත සහකරුවා මෙන්ම බ්‍රිතාන්‍ය ඔත්තුකාර කණ්ඩායමේ ප්‍රධානියා වූයේ තොම්බි මුදලි නොහොත් පෙරමුණේ මුදලි පදවිය හෙබ වූ දොන් ඒඩ්‍රියන් විජේසිංහ ජයවර්ධනය. තොම්බි යනු එකල ඔත්තුකාර සේවා සඳහා ව්‍යාවහාර කළ වචනය විය. ශ්‍රී වික්‍රම රාජසිංහ බෝමුරේදී අල්ලා වැල් පටවලින් බැඳ තබන අවස්ථාවේද දොන් ඒඩ්‍රියන් එම ස්ථානයහි සිටි ප්‍රධාන නිලධාරියෙකු විය. 
1830 දී අභාවප්‍රාප්ත වූ දොන් ඒඩ්‍රියන් විජේසිංහ ජයවර්ධන මුදලිතුමා යනු මෙරට ප්‍රථම විධායක ජනපතිවරයා වූ ජේ.ආර්. ජයවර්ධනගේ මුත්තාය. 
සිංහලයේ රජතුමා අල්ලාගත් පුවත 1815 පෙබරවාරි 19 වන දින තෙල්දෙණිය රජුගේ ධාන්‍ය ගබඩාවේ සිටි ජෝන් ඩොයිලි එවකට ලංකාණ්ඩුකාරයා වූ රොබට් බ්‍රවුන්රිග් වෙත දන්වා යවන ලදී. 
එම පණිවුඩය ලැබෙන විට ආණ්ඩුකාරවරයා සිටියේ රාත්‍රී භෝජන සංග්‍රහයකට සහභාගි වෙමින්ය. වසර තුන්සියයක් මුළුල්‍ලේ ජාතීන් තුනකටම කළ නොහැකි වූ උඩරට ජයග්‍රහණය ගැන ඔහු සතුට කඳුළු වැගිරූ බව ඉංග්‍රීසි සිවිල් නිලධාරියෙකු ජේ.එම්.එෆ් හැමිල්ටන් ලියූ සටහනක දැක්්වේ. 
ඉතාමත් ඉක්මනින් ආරක්ෂිත මාර්ග ඔස්සේ රජු ඇතුළු පිරිස කොළඹට එවන ලෙස රොබට් බ්‍රවුන්රිග්, ජෝන් ඩොයිලිට දන්වා යවන ලදී. ඒ සමගම දෝලා දෙකක්ද, කර්නල් හාඩි සහ කර්නල් හුක් ප්‍රමුඛ සොල්දාදුවන් සියයක පිරිසක්ද ජෝන් ඩොයිලි වෙත යවන ලදී. 
රජු ඇතුළු පිරිස කොළඹට යැවීමේදී ඩොයිලිට කරුණු කීපයක්ම වැදගත් විය. ආරක්ෂිත මාර්ග සොයා ගැනීම ප්‍රධානම කරුණ විය. අනිත් කරුණු වූයේ රජතුමාට සහ බිසෝවරුන්ට සුදුසු ඇඳුම් සපයාදීම, ගමනට අවශ්‍ය දෝලා සහ දෝලාකරුවන් ලබාගැනීම සහ නැවතුම් ‍පොළවලදී අවශ්‍ය සැප පහසුකම් ලබාදීමය. මෙහිදී මහනුවර නගරය මගහැර විකල්ප මාර්ග සොයා ගැනීමට ඩොයිලි පරිස්සම් විය. 
1815 පෙබරවාරි 22 දින සවස තෙල්දෙණියෙන් ගමන් ආරම්භ කළ රජතුමා ඇතුළු පිරිස රාත්‍රී 8.30ට පමණ හක්කෙට්ටුවාගල ආසන්නයේ පිහිටි දඹරාව ධාන්‍ය ගබඩාවට ළඟා වූහ. දඹරාවෙන් පිටත් වූ රාජකීය පිරිස එතැනින් සැතපුම් දෙකක් දුරින් පිහිටි ඉඩකඩ සහිත ගොඩනැගිලි තිබූ දූල්වැවට යවන ලදී. ඊළඟට දූල්වැවේ සිට වෑ උඩටය. 
මෙසේ කොළඹට සම්ප්‍රාප්ත වූ සිංහ‍ලේ අවසන් රජතුමා 1815 මාර්තු හයවන දින සිට 1816 ජනවාරි විසි හය වන දින දක්වා කොළඹ කොටුවේ ගාලු මුවදොර ආසන්නයේ පිහිටි නිවසක රඳවා තබන ලදී. 1816 ජනවාරි 24 දින රාජකීය පිරිස කොන්වෝල්ස් නැවෙන් මදුරාසිය බලා පිටත් කරන ලදී. 
කොන්වෝල්ස් නැවෙන් මදුරාසිය බලා පිටුවහල් කරනු ලැබූ ශ්‍රී වික්‍රම රාජසිංහ රජු ඇතුළු රාජකීය පිරිසෙහි භාරකාරත්වය දැරුවේ විලියම් ග්‍රැන්විල් නමැති බ්‍රිතාන්‍යයේ සිවිල් සේවකයෙක්ය. 
නැවෙහි ගමන් කරන අතරතුර 
ශ්‍රී වික්‍රම රාජසිංහ රජු විලියම් ග්‍රැන්විල් සමග දවසකට දෙතුන් වතාවක් කතා බහෙහි යෙදීම සාමාන්‍ය සිරිතක් විය. 
එවන් අවස්ථාවක ශ්‍රී වික්‍රම රාජසිංහ රජු තමන්ගේ ඉතාමත් සුවිශාල ධනස්කන්ධයක් ශ්‍රී ලංකාව තුළ නිදන් ගත කර ඇති බවත් ඇහැළේ‍පොළ එම ධන නිධානය සොරා ගනීවිද යන සැකය තමන් තුළ ඇති බව විලියම් ග්‍රැන්විල්ට පැවැසූ බව මහා වංශයේ සඳහන් විය. 
නිධානය තියෙන තැන කියන්න මදුරාසියට ගිය ගමන්ම  බ්‍රවුන්රිග් උතුමාණන්ට කියන්නම්. යනුවෙන් ග්‍රැන්විල් කී බව සඳහන්ය. 
නමුත් එයට රජු දුන් පිළිතුර ග්‍රැන්විල්ට පැහැදිලි නොවීය. තෝල්කයන් ගැන විශ්වාසයක් නොතිබුණ රජු තෝල්කයින් මගින් අදහස් හුවමාරු කරගැනීම 
ප්‍රතික්ෂේප කළේය. මෙනිසා නිදන් වස්තුව පිහිටි ස්ථානය ගැන ග්‍රැන්විල්ට දැනගැනීමට  නොහැකි විය. 
විලියම් ග්‍රැන්විල් තම ලිපියෙහි වැඩිදුරටත් දක්වා ඇත්තේ සිංහලයේ අවසන් රජු ශ්‍රී වික්‍රම රාජසිංහ නිදන් කළ එතුමාගේ මහානර්ඝ වස්තු සමූහය ලංකාවේ ‍පොළවේ කිසියම් ස්ථානයක ස්ථිර වශයෙන් නිදන්ව ඇති බවය. එහෙත් ඒ කාරණාව දන්නා අයෙක් මේ බිමේ දැන් නැත. දැනගෙන හුන් රජු ඉන්දියාවේ වෙල්ලෝර් බලකොටුවේ 1832 ජනවාරි 30 දින මියගියේය.   
 
පීටර් කැනියුට් පෙරේරා

“චංචල රේඛා” චිත්‍රපටයේ “දං චූටි” නාඳුනන කෙනෙක් එදා සිනමා ලෝලීන් අතර හිටියේ නැහැ. ගාමිණී ෆොන්සේකා සමග එදා ඇය කළ රංගනය බොහෝ දෙනෙකුගේ මතකයේ අමතක නොවන ලෙස රැඳී තිබෙනවා. එක්තරා කාලයක සිංහල සිනමාවේ ජනප්‍රිය නිළියක ලෙස වැජඹුණු ඇය පසු කලෙක රඟපෑමෙන් ඈත්ව නිහඬව සිටියා. මේ නිසා ඇය රඟපෑ කිසිදු නිර්මාණයක් දැක බලා ගන්නට ලැබුණේත් නැහැ. නමුත් ඇය යළිත් සිරස රූපවාහිනය හරහා දිග හැරෙන “සිරස film star” වැඩසටහනේ විනිසුරුවරියක් ලෙස කරළියට පැමිණ තිබෙනවා. අපි මේ කතා කරන්නේ. නදීකා ගුණසේකර නම් දක්ෂ ජනප්‍රිය ප්‍රවීණ රංගන ශිල්පිනිය ගැනයි. නදීකා “රිද්ම” සමග මේ විදිහට එකතු වුණේ කාලෙකට පස්සෙයි. 
 
කාලෙකට පස්සේ නේද ඔබ මේ විදියට ආයෙමත් කලා කටයුත්තකට එකතු වෙලා ඉන්නේ? 
 
ඇත්තටම ඔව්. “සිරස film star” විනිසුරුවරියක් විදියට මම මේ දිනවල කටයුතු කරනවා. ඒක වෙනස්ම අත්දැකීමක්. කාලාන්තරයක් ක්ෂ්ත්‍රයේ රැඳී සිටි කෙනෙකු විදියට මම ඒ තුළින් මගේ යුතුකමක් ඉටු කරනවා. 
 
ඒ කිව්වේ?
 
අපි හැමෝම ආධුනිකයන් විදියටයි මේ කලා ලෝකයට ආවේ. එදා අපි එද්දී ක්‍ෂේත්‍රයේ හිටපු වැඩිහිටියෝ, ප්‍රවීණයෝ අපිව පිළිගත්තේ නැත්නම් අපිට මේ ගමන එන්න වෙන්නේ නැහැ. ඒ වගේම තමයි අපෙත් යුතුකම නවකයින් වෙනුවෙන් යමක් කිරීම. මේක ඊට කදිම අවස්ථාවක්. 
 
නදීකා ඔය විදියට කිව්වාට රියැලිටි තරගවලින් එන නවකයින්ට බණින ප්‍රවීණයන් ඒ අයගෙ ඉදිරි ගමනක් නැතැයි කියලා හිතන අය ඕනෑ තරම් ඉන්නවා? 
 
රියැලිටි තරගවලින් එන අයට ගමනක් නැහැ කියන මතයක් සමාජය තුළ ගොඩනංවලා තියෙන බව ඇත්ත. නවකයින්ගේ දක්ෂතා අගය කරන්න අකමැති අයයි එහෙම කරන්නේ. රියැලිටි තරග හොලිවුඩ්වල පවා පැවැත්වෙනවා. මම රඟපාන්න එද්දී කැමරාව ඉස්සරහ වම, දකුණවත් දන්නේ නැහැ. ඒත් රියැලිටි තරගවලින් නවකයින්ට ලබාදෙන පුහුණුව කොයි තරම්ද කියලා මම මේ තරගයේදී දැක්කා. ඒ වගේම දක්ෂයින් මේ තරග තුළ ඒ අයට ඉදිරි ගමනක් ගොඩගාගන්න ඉඩකඩ සලසන එක ප්‍රවීණයින්ගේ යුතුකමයි. 
 
ඔබ හිතන විදියට කවුරුන් මේ තරගය තුළින් මතුවේවිද?
 
තාමත් තරගය පවතින හින්දා ඒකට පිළිතුරක් දෙන්න අපහසුයි. 
 
නදීකා දැන් පුංචි තිරයේ වගේම රිදී තිරයෙත් දකින්න ලැබෙනවා අඩුයි? 
 
පුංචි තිරයේ මම අන්තිමට රඟපෑවේ “දූවිලි මල්” ටෙලි නාට්‍යයේ. චිත්‍රපටයක් නම් කරපු කාලයක් මතක නැහැ. 
 
ඇයි ඔබේ සැමියා අකමැතිද ඔබ ආයෙම රංගනයට එනවට? 
 
සුරේන්ගේ කිසි විරුද්ධත්වයක් නැහැ. ව්‍යාපාරිකයෙක් වුණාට එයා ගොඩාක් කලාවට ලැදි කෙනෙක්. කලා ලෝකයේ මගේ හිතවතුන් එයාගේත් යාළුවෝ. මම රඟපෑම සීමා කළේ මගේම වාරණයක් විදියටයි. 
 
ඒකට විශේෂ හේතුවක් තියෙනවද? 
 
ඉස්සර අපි චිත්‍රපටයකට යද්දී අපේ දක්ෂතා උපරිමයෙන් ඒකට ගන්නවා. “බැද්දෙගම” චිත්‍රපටයේ මම රඟපෑවේ සුළු දර්ශන පෙළක්......” චායා චිත්‍රපටයේ මගේ චරිතය එන්නේ අන්තිමට. ඒත් මට ඔය චිත්‍රපට දෙකටම හොඳම නිළියට හිමි සම්මානය ලැබුණා. අද තත්ත්වය ඊට වඩා වෙනස්. පාන්දර ඉඳන් මහ රෑ වෙනකල් අපි රඟපාලා ඒවා කැමරාගත කරනවා. සංස්කරණයේදී ඒවා නැති බව දකින්නේ මංගල දර්ශනයට ගියාම. ඒවායින් හිත කලකිරෙනවා. ටෙලි නාට්‍ය වුණත් කොටස් ගණනකට සැලසුම් කළත් රූගත කරන අතරේ නාලිකාව කියනවා පැය ගණන සීමා කරන්න කියලා. එතකොට නිෂ්පාදන, අධ්‍යක්ෂ නළු නිළියෝ ඇතුළු හැමෝම අමාරුවේ වැටෙනවා. ඔන්න ඔය වගේ කලකිරීම් හින්දයි රඟපෑමෙන් මම අද දුරස් වෙලා ඉන්නේ. හැබැයි හොඳ නිර්මාණයකට ආරාධනා ලැබුණොත් භාරගන්නවා. 
 
ඔබගේ පෞද්ගලික ජීවිතයේ තොරතුරු දැන ගන්නත් “රිද්ම” පාඨකයෝ කැමති වෙයි?
 
මගේ දුව සෙනුකි යෙහන්සාට දැන් වයස අවුරුදු 13යි. සැමියා සුරේන්. දෙදෙනකුට යාළු වෙලා අවුරුදු 100ක් ඉන්න පුළුවන්. විවාහ වෙලා දවස් 100ඉන්න එක අමාරුයි. විවාහ ජීවිතය කියන්නේ හරිම සංකීර්ණ දෙයක්. සුරේනුයි මමයි අතර දැන් අවුරුදු 18ක සම්බන්ධයක්. අපි යාළුවෙලා අවුරුදු 3යි. බැඳලා අවුරුදු 15යි. ඒත් හරිම සතුටින් අපේ ජීවිත අදටත් ගෙවිලා යනවා. 
 
ආරියවංශ කුලතිලක

අද වන තුරු කාටවත් නොකී රස රහසක් මගේ ජීවිතය තුළත් තියෙනවා. ඇත්තටම ඒ රහස මම ඇර තව එක්කෙනයි දන්නේ. ඒත් අපි දෙන්නා කවමදාවත් ඒ ගැන කාටවත් කියලා නැහැ. කතා කරලත් නැහැ. කොහොම හරි ඉතින් අද මම ඒ රහස හැමෝටම කියනවා. ඒත් ඒ රහසට සම්බන්ධ නිළියගේ නම නම් හෙළි කරන්න බැහැ. 
එතකොට මම සාමාන්‍ය පෙළ පන්තියේ ඉගෙන ගන්නවා. ඔය කා‍ලේ මම ප්‍රිය කරපු නිළියක් හිටියා. ඇය මට වඩා අවුරුද්දක් විතර බාලයි. ළමා නිළියක් විදියට ක්ෂ්ත්‍රයට  ආපු ඇය මේ කියන සිදුවීම වන විට වයස 15ක විතර ළමයෙක්. දවසක් ඇගේ ලිපිනය පුවත්පතක පළ වෙලා තිබුණා. මම රසිකයෙක් විදයට ඒ ලිපිනයට ලියුමක් දැම්මා. එදා මම නිකමටවත් හිතුවේ නැහැ ඇගෙන් පිළිතුරු ලිපියක් ලැබේවි කියලා. ඒත් ටික දවසකින් ඇගෙන් මට පිළිතුරු ලිපියක් ලැබුණා. එවපු ලිපියට ස්තූති කරලා මමත් ලිපියක් දැම්මා. ඇය ඒ ලිපියටත් පිළිතුරක් එව්වා. ඔය විදියට අපි අතර දිගින් දිගටම ලිපි හුවමාරු වුණා. ඒ කා‍ලේ අද වගේ දුරකථන අන්තර්ජාල පහසුකම් නැහැනේ. අපි දිගින් දිගටම ලිපි ලියලා හොඳ මිතුරු මිතුරියන් දෙදෙනකු බවට පත් වුණා. 
ඔය විදියට ලියුම් ගනුදෙනුව යනකොට මට ඕන වුණේ මගේ ආදරය ගැන ඇයට කියන්නයි. ඒත් ඒක කෙළින්ම කියන්න තරම් ආත්ම ශක්තියක් මට තිබුණේ නැහැ. 
කොහොම හරි මම ඇයට ආදරේ කරන බව ඇඟවෙන විදියට ඇයට ලියුමක් ලිව්වා. හැබැයි ඒකට පිළිතුරක් එව්වේ නැහැ. ඒත් මම මගේ ආදරය ව්‍යාංගාර්ථයෙන් දැනෙන විදියට දිගින් දිගටම ඇයට ලියුම් ලිව්වා. ඒත් ඇය මට පිළිතුරු එවන එක නතර කළා. හැබැයි මට දුකක් දැනුනේ නැහැ. මොකද හිතවත්කමට එහා ගිය දෙයක් මගේ හිතේ තියෙන බව දැනුන හින්දනේ ඇය මට ලියන එක නතර කළේ. ඇහැටවත් දැකලා නැති කෙනෙකුගේ ආදරයක් පිළිගන්න අපි කවුරු වුණත් කැමැති නැහැනේ. ඊට පස්සේ මම කළේ මගේ ඡායාරූපයක් සමග ඇයට ලිපියක් යවපු එකයි. 
ටික දවසකින් ඇගෙන් ලිපියක් ලැබුණා. මා ගැන යම් විශේෂත්වයක් ඈ තුළ තියෙන බව ඒ ලිපියෙන් ඇඟ වුණා. මට දැනුනේ රටක් රාජ්‍යයක් දිනුවා වගේ හැඟීමක්. 
දැන් අපි අතර හුවමාරු වන ලිපි පෙම් හසුන්. හැබයි මම කවදාවත් ඇයට ආදරෙයි කියලා නැහැ. ඇයත් ආදරය පිළිගන්නවා කියලා නැහැ. ඒත් දෙන්නගේම හිත්වල තියෙන නිහඬ ප්‍රේමය ඒ ලිපිවල සඳහන් වෙලා තිබුණා. ඔය විදියට කාලයක් යද්දී ඇය මෙන්න මේ විදියට මට ලියලා එවලා තිබුණා. 
මට රසිකයෝ ලියුං එවනවා. ඒත් ඔයත් එක්ක දිගින් දිගටම ලියුං ලියනකොට අම්මා ඒ ලියුම් කියෙව්වා. අම්මා කිව්වා මීට පස්සේ ඔයා එක්ක ලියුං ගනුදෙනුව නතර කරන්න කියලා. මීට පස්සේ මට ලියන්න එපා. 
ඒ ලිපිය කියෙව්වාම මගේ හිතට ලොකු දුකක් දැනුනා. ඒ දුක හිතේ තද කරගෙනම මම පාසල් අධ්‍යාපනය නිමා කරලා රැකියාවකට ගියා. ඊට පස්සේ අහම්බෙන් වගේ මටත් නළුවෙක් වෙන්න අවස්ථාව ලැබුණා. ඊට පස්සේ මමත් ටිකෙන් ටික ජනප්‍රිය වුණා. ඔය අතරේ ඇයටයි මටයි ටෙලි නාට්‍යයක එකට රඟපාන්න අවස්ථාව ලැබුණා. 
ඔයා නේද සුරාජ් මාපා හා හා පුරා මුණගැසුණු දවසේ ඇය මගෙන් ඇහුවා. මමත් ඕව කිව්වා. එතනින් එහා කිසි දෙයක් අපි අතරේ කතා බහ කෙරුනේ නැහැ. අපි දෙන්නා ටෙලි නාට්‍ය තුනක රඟපෑවා. ටෙලි නාට්‍ය දෙකක රඟපෑවේ පෙම්වතුන් විදියට. පසු කලෙක ඇය විවාහ වෙලා රංගනයෙන් සමුගත්තා. දැන් ඇයට දරුවොත් ඉන්නවා. අපි දෙන්නා කලා ලෝකයේ හමුවෙලා ගොඩක් දේවල් කතා කරලා තියෙනවා. ඒත් කවමදාවත් අතීත ආදර කතාව ගැන කිසිම දවසක කතා කරලා නැහැ. ඒක අදටත් රහසක්. 
 
ආරියවංශ කුලතිලක

2015 ජනාධිපතිවරණ සමයේ දේශපාලන වේදිකාවේ බොහෝ දේ කතාබහ කෙරුණි. මිල අධික ලැම්බ්‍රෝගිනි මෝටර් රථද ඒ අතරින් එකකි. එහෙත් ඊයේ පෙරේදා නිම වූ පුංචි ඡන්දයේදී නම් කාර් ගැන කතා නොවූ තරම්ය. කෙසේ වෙතත් පුංචි ඡන්දයේ ප්‍රතිඵල නිකුත් වී දෙතුන් දිනක් ගත වෙත්දී තවත් මෝටර් රථයක් ලංකාවේ වබේ අඩවි දෙවනත් කරන්නට පටන් ගෙන තිබේ. 
ඒ රථය ඇස්ටන් මාටින්, ලැම්බ්‍රෝගිනි වාහන දෙවන තුන්වන තැන්වලට පසු බස්වන්නට සමත්වන සුපිරි ගණයේ එකකි. ශ්‍රී ලාංකිකයන් එතරම් අසා හුරු පුරුදු නැති වුවත් ලොව ඉහළම ධන කුවේරයන් භාවිත කරනා එම රථය ප්‍රකට බෙන්ට්ලි වෙළෙඳ නාමය යටතේ නිපද වූ බෙන්ට්ලි මුල්සාන් හෝල්මාර්ක් වර්ගයේ එකකි. 
ලංකාවේ අපට හුරු නැති වුවද බෙන්ට්ලි යනු ලොව ප්‍රකට මෝටර් රථ නිපදවන සමාගමකි. 1919දී එංගලන්තයේ w.o. බෙන්ට්ලි නම් අයකු විසින් ආරම්භ කරන ලද බෙන්ට්ලි සමාගම Bently speed six, Bently 08 littre, Bently mark vi වැනි ජනප්‍රිය රථ මාදිලි ගණනාවක් නිෂ්පාදනය  කළේය. පසුකාලීනව එහි නෛතික අයිතිය වෙනස් වූ අතර 1931දී බෙන්ට්ලි සමාගම රෝල්ස් රෝයිස් සමාගම විසින්ද පසුකාලීනව වොක්ස්වැගන් සමාගම විසින්ද මිලට ගන්නා ලදී. මේ වන විට සීමිත සේවක පිරිසක් සහිතව ජර්මනියේ Dresden කර්මාන්ත ශාලාවේ නිෂ්පාදනය කරන බෙන්ට්ලි රථ එහි අනන්‍ය බ්‍රිතාන්‍ය සුඛෝපභෝගී නිමාව අඛණ්ඩව රැකගෙන යයි. 
සිය නිෂ්පාදන සහායකයා ලෙස එච්.ජේ. මුලිනර් සමාගම සමග එක්වූ බෙන්ට්ලි සමාගම බෙන්ට්ලි මුල්සාන් අධි සුඛෝපභෝගී රථ මාලාව ලොවට හඳුන්වා දුන්නේ 1980 පමණය. බෙන්ට්ලි මුල්සාන් නම් පළමු රථ මාදිලිය  1992 පමණ වන තුරු නිපදවන ලද අතර මෙම රථ ඉතා සීමිත ප්‍රමාණයක් පමණක් 
නිෂ්පාදනය වීම විශේෂත්වයකි. පසුගියදා ශ්‍රී ලංකාවට ගෙන එනු ලැබුවේ බෙන්ට්ලි මුල්සාන් 
හෝල්මාර්ක් නම් මාදිලියට අයත් රථයකි. මේ රථය මෙන්ම එය ශ්‍රී ලංකාවට ගෙන ආ පුද්ගලයාද 
සුවිශේෂී කෙනෙකි. ඔහු ශ්‍රී ලංකාවේ ධනවත්ම ව්‍යාපාරිකයා ලෙස සලකන ධම්මික පෙරේරාය. 
මේ වනවිට සම්පත් බැංකුව, වැලිබල් ෆිනෑන්ස්, එල්.බි. ෆිනෑන්ස්, පෑන් ඒෂියා බැංකුව ඇතුළු  ශ්‍රී ලංකාවේ මූල්‍ය ආයතන ගණනාවක වැඩි හිමිකාරීත්වය දරන ධම්මික පෙරේරා පිඟන් ගඩොල් (ටයිල්) ව්‍යාපාරයේ වැඩිම වෙළෙඳ නාම ගණනක අයිතියද සතු කරගෙන සිටියි. ඊට අමතරව ඩෙල්මේජ්, හේලීස් යනාදී ප්‍රකට ව්‍යාපාරවලද වැඩි කොටස් ප්‍රමාණයක හිමිකාරීත්වය දරන ඔහු මෑතකදී සිංගර් ශ්‍රී ලංකා සන්නාමයෙහිද වැඩි අයිතිය හිමිකර ගන්නා ලදී. 
කලක් ප්‍රවාහන අමාත්‍යාංශයේ ‍ලේකම්වරයා ලෙසද කටයුතු කළ ඔහු අද වනවිට ශ්‍රී ලංකාවේ අංක එකේ ධන කුවේරයා බවට පත්ව ඇත.
ඔහු විසින් ආනයනය කළ මෙම බෙන්ට්ලි මුල්සාන් හෝල්මාර්ක් රථයේ වටිනාකම රුපියල්වලින් කියන්නේ නම්, මිලියන 160කි. එනම් කෝටි 16කි. ලෝකයේ දැනට ඇති අධි සුඛෝපභෝගීතම මෝටර් රථ අතර මුලින්ම කියවෙන මෙම මෝටර් රථ මාදිලියෙන් නිපදවා ඇත්තේ රථ පනහකි. එලෙස නිපදවූ රථ පනහෙන් 49ක් අලෙවි වී ඇති අතර ධම්මික පෙරේරා විසින් මිලට ගෙන ඇත්තේ 50 වෙනි හෙවත් අවසන් රථයයි.
මෙම වර්ගයේ රථ දකුණු ආසියා කලාපයේ දක්නට නොලැබුණ අතර සමස්ත ආසියාවටම තිබුණේ රථ තුනක් බව කියවේ. එම රථ තුනම තිබුණේ චීනයේය. ඒ අනුව ඉන්දියාවේ මුකේෂ් අම්බානි වැනි ඉන්දීය කෝටිපතියන් සතුව හෝ මෙම රථයක් නොමැතිවීම විශේෂත්වයකි.  ඒත් දැන් ඉන් එකක් ලාංකිකයකු සතුය. 
බෙන්ට්ලි සමාගමේ බොහෝ රථ මෙන් මෙම රථයද මුළුමනින්ම හස්ත නිෂ්පාදනයකි. එමෙන්ම නිපදවූ රථ පනහම එකිනෙකට වෙනස් වීම අනෙක් විශේෂත්වයයි. ඒ අනුව ලෝකයේ කුමන ධනවතෙකුටවත් කොතරම් මිලක් ගෙවූවත් එක සමාන රථ දෙකක් මිලට ගත නොහැක. මෙය බෙන්ට්ලි රථවල ඉහළ වටිනාකම තබා ගැනීමට 
නිෂ්පාදකයෝ කරනා සුවිශේෂී ප්‍රයෝගයකි. 
බෙන්ට්ලි මුල්සාන් හෝල්මාර්ක් රථයේ බඳ සෑදීමේදී ස්වර්ණාභරණ නිෂ්පාදනයේදී භාවිත කරන සුවිශේෂී ලෝහ යොදා සාදා ඇති අතර රථයේ බාහිර ආ‍ලේපන සඳහා රන් රිදී පවා යොදා ගෙන ඇත. මෙම රථ පනහේ සෑම අඟලක්ම මිනිස් අතින් නිමාවී තිබෙන බව නිෂ්පාදකයෝ සහතික කරති.
ධම්මික පෙරේරා ගෙන්වූ රථය ‍පෝසි‍ලේන් සුදු සහ නිල් වර්ණයෙන් යුතුය. මෙහි එන්ජින් ධාරිතාව 6752ජජ (4000RPM) වන අතර පැයට සැතපුම් 184ක (296km) වේගයෙන් ධාවනය කළ හැක. ඉන්ධන දහනය EU6/LEVII ප්‍රමිතියෙන් ඇති මෙහි ආසන කිහිප ආකාරයෙන් සැකසිය හැක. 
මෙම රථයේ වටිනාකම රුපියල් මිලියන 84ක් වන අතර ආනයන බද්ද රු. මිලියන 76ක් වන බවද වාර්තා වෙයි. මෙවැනි රථයකට රක්ෂණාවරණය ලබා දීමේදී රක්ෂණ ආයතන දෙකක් එක්ව එය සිදු කරන බවත් එබැවින් ඒ සඳහා වන නිශ්චිත අයකිරීම් එක් වරම පැවැසීම අපහසු බවත් රක්ෂණායතන නියෝජිතයකු අප කළ විමසීමකදී සඳහන් කළේය.
 
අරුණ ලක්ෂ්මන් ප්‍රනාන්දු  

ආචාර්ය  වික්ටර් රත්නායකයන්ගේ පුතුන් දෙදෙනා වන ජයන්ත සහ ලෙලුම් ගැන අද වෙද්දී මුළු රටම දන්නවා. ඒ, ඔවුන් වික්ටර් රත්නායකයන්ගේ පුතුන් පමණක් ‍නෙවෙයි. සංගීතඥයන් විදිහටත් මේ වන විට තමන්ගේම ස්ථාවරත්වයක් ගොඩනගාගෙන සිටින නිසයි. වික්ටර් රත්නායකයන්ට  දියණියන් දෙදෙනකුද සිටියත් ඒ අතරින් වැඩිමහල් දියණිය මෑතකදී මෙලොව හැර ගියා. බාල දියණිය වන මංජුලා රත්නායක තමන්ගේ සොහොයුරන් දෙදෙනා වගේම බාල වියේ සිටම සංගීතයට ඇළුම් කළ කෙනෙක්. රිද්ම සමග මෙලෙස සංවාදයට එක්වූ මංජුලා තමන් ගැනත්, ආචාර්ය වික්ටර් රත්නායකයන්ගේ දෙවැනි විවාහය ඔහුගේ දියණියක ලෙස තමන් දකින්නේ කෙසේද කියන කාරණය ඇතුළු බොහෝ දෑ ගැනත් බොහොම විවෘතව අදහස් පළ කළා. 
 
ආචාර්ය වික්ටර් රත්නායකයන්ගේ පුතුන් විදියට පමණක් නොවෙයි සංගීතඥයන් විදිහටත් ඔබේ සොහොයුරන් දෙදෙනා රටේ ප්‍රසිද්ධයි. නමුත් ඔබ මේ පළමු වරට තමයි මාධ්‍ය ඉදිරියට ඇවිත් ඔබ ගැන කියන්නේ? 
 
ඔව්. හුඟක් අය වික්ටර් රත්නායකයන්ගේ දුව විදිහට මාව අඳුරන්නේ නෑ තමයි. හැබැයි ක්ෂේත්‍රයේ අය නම් මාව හඳුනනවා. මොකද, ඉස්සර ඉඳන්ම තාත්තාගේ ප්‍රසංගවලට ඔහුත් එක්ක මම සහභාගි වෙලා තියෙනවා. 
 
ඒ ප්‍රසංගවලට ඔබ එකතු වුණේ ගායිකාවක් විදිහටද එහෙමත් නැත්නම් තාත්තාගේ තනි නොතනියටද? 
 
මම ඒ ප්‍රසංගවලදී තාත්තාගේ ගීතවලට සමූහ ගායනයෙන් එක් වුණා. 
 
ඒ කියන්නේ සහෝදරයන්ට වගේම ඔබටත් ගායන හැකියාවක් තියෙනවා? 
 
ඔව්. මට හොඳ ගායන හැකියාවක් තියෙනවා. පුංචි කා‍ලේ ඉඳන්ම මම පාස‍ලේදී සහ දහම් පාස‍ලේදිත් ගායන තරගවලට සහභාගි වුණා. සාමාන්‍ය පෙළ දක්වා සංගීතය හැදෑරුවා. 
 
සහෝදරයෝ දෙන්නා වගේ වැඩිදුරටත් සංගීතය හදාරන්න ඔබට කැමැත්තක් තිබුණේ නැද්ද? 
 
කැමැත්තක් තිබුණා. නමුත් අක්කයි මාවයි සංගීතය පැත්තෙන් ඉදිරියට යවන්න උනන්දුවක් තාත්තාට තිබුණේ නැහැ. මොකද සංගීත ක්ෂේත්‍රය කියන්නේ ගැහැණු ළමයින්ට ඒ තරම් හොඳ තැනක් ‍නෙවෙයි කියලයි තාත්තා නිතරම කිව්වේ. 
 
ඒ හේතුව නිසාද ඔබේ සංගීත ගමන නතර වුණේ? 
 
ඔව්. ඒත් තාත්තාට හොරෙන් මම භාත්කණ්ඩේ විභාග දෙකකටත් පෙනී සිටියා. තාත්තා දිගටම සංගීතය හදාරන්න ඉඩ දුන්නේ නැහැ ඊට පස්සේ මම රැකියාවට ගියා. රැකියාවේ කාර්ය බහුලත්වයත් එක්ක සංගීත කටයුතු ටිකෙන් ටික මගෙන් මග හැරුණා. 
 
තමන්ගේ හැකියාවෙන් තනිවම ගායිකාවක් විදිහට ඉස්මතු වෙන්න අවස්ථාවක් ලැබුණේම නැද්ද? 
 
රඹුකන සිද්ධාර්ථ හාමුදුරුවන්ගේ ගීත ඇතුළත් කැසට් පටයකට ගීතයක් ගයන්න මට අවස්ථාව ලැබුණා බෝ අතු ඉති නැමි නැමි කියන ඒ ගීතය අදටත් ප්‍රචාරය වෙනවා. දැන් නම් විනෝදාංශයක් විදිහට විතරයි මම ගීත ගායනා කරන්නේ. 
 
තාත්තාගේ සංගීත කටයුතුත් එක්ක ‍පොඩි කා‍ලේ ගෙදර තිබුනේ මොන වගේ වටපිටාවක්ද? 
 
තාත්තා ඉස්සර ගෙදර සංගීත පන්ති පැවැත්වුවා. තාත්තා පන්ති කරන වෙලාවට අපි හතර දෙනාට කාමරයෙන් එළියට බහින්නවත් අම්මා ඉඩ දෙන්නේ නැහැ. ඒ වෙලාවට අපි ගෙදර නෑ වගෙයි පේන්නේ. තාත්තා එළියට ගියාම තමයි අපි කාමරයෙන් එළියට ඇවිත් දඟලන්නේ. 
 
ඔබ අදහස් කළේ තාත්තාගේ වැඩ කටයුතුවලට අම්මාගෙන් විශාල සහයෝගයක් ලැබුණා කියන එකද? 
 
ඔව්. තාත්තා වෙනුවෙන් අම්මා ලොකු මෙහෙවරක් කළා. ඒ කා‍ලේ හැම සතියකම වගේ ස ප්‍රසංග තිබුණ නිසා අපේ ගෙදර තිබුණේ බොහොම කාර්ය බහුල පරිසරයක්. අපේ ගෙදරට එන තාත්තාගේ යාළුවන්ට අම්මා තමයි තනිවම සංග්‍රහ කළේ. තාත්තා ගායනා කළ ගීත පවා ‍පොත්වල ලියැවුණේ අම්මාගේ අත් අකුරෙන්. අපි හතර දෙනා අතර ලොකු වයස් පරතරයක් නොතිබුණු නිසා අම්මාට ඒ දවස්වල හුඟක් මහන්සි වෙන්න සිද්ධ වුණා. 
 
ඔබේ සොහොයුරන් දෙදෙනාට නම් සංගීත ක්ෂේත්‍රයෙන් ඉදිරියට යෑම තාත්තා තහනම් කළේ නැහැ නේද? 
 
ඒ දෙන්නාටත් තාත්තා ලොකු අනුබලයක් දුන්නේ නැහැ. ඒත් තාත්තා පස්සේ  ජයන්ත අයියාව ඔහුගේ ප්‍රසංගවලට එකතු කරගත්තා. 
 
සංගීතය පැත්තෙන් ඉදිරියට යන්න උනන්දු නොකළාට පියකු විදියට ඔහු තමන්ගේ යුතුකම් කොටස ඉටු කරන්න ඇති? 
 
ඔව්. තාත්තා අප වෙනුවෙන් යුතුකම් ඉටු නොකළා කියලා කියන්න බැහැ. අපි කසාද බැන්දාට පස්සේත් ඔහු අපි ගැන සොයා බැලුවා. 
 
අම්මාගේ අභාවයෙන් දරුවන් ඔහු ගැන සොයා බැලුවේ නැහැ කියලා චෝදනාවක් ඔබේ පියාගේ පැත්තෙන් එල්ල වුණා. ඇත්තද ඒ කතාව? 
 
අම්මාගේ අභාවයෙන් පස්සේ තාත්තාටත් අපි හතර දෙනා එක්කම ලොකු සම්බන්ධතාවක් තිබුණා. අපි ඔහුව සැලකුවේ නෑ කියනවා නම් ඒක බොරුවක්. අපි ගැන දන්නා අය නම් දන්නවා ඇත්ත. මොකක්ද කියලා මෑතකදී ඇතිවුණු ගැටලුවත් එක්ක තමයි අපේ සම්බන්ධතාවය දුරස් වෙලා ගියේ. 
 
ආචාර්ය වික්ටර් රත්නායකයන්ගේ දෙවැනි විවාහය ගැන මෑත කාලයේ විශාල වශයෙන් කතා බහට ලක් වුණා. ඔබේ සහෝදරයන් දෙදෙනාත් ඔබේ පියාව විවේචනය කරමින් මාධ්‍ය වෙත අදහස් පළකර තිබුණා.  දියණිය විදිහට ඔබ මේ කියන සිදුවීම දකින්නේ මොන විදිහටද? 
 
ඔය ප්‍රශ්නයේදී අයියයි මල්ලියි ඉන්න මතයේම තමයි මමත් ඉන්නේ. ඇත්තටම දැන් මම ඒක කතා කරන්නත් අකමැති මාතෘකාවක්. තාත්තාට හොඳ නම් අපිටත් කමක් නෑ කියලා මම පැත්තකට වෙලා ඉන්නවා. 
 
ආචාර්ය වික්ටර් රත්නායකයන් රටම ගරු කරන සංගීතඥයෙක්. මේ සිදුවීම නිසා ඔහුව විවේචනය කරන පිරිසකුත් ඉන්නවා. ඔබ අද තාත්තාව දකින්නේ මොන විදිහටද? 
 
මට දැන් තාත්තා ගැන තියෙන්නේ අනුකම්පාවක් විතරයි. ඔහු ඒ කා‍ලේ රජෙක් වගේ බොහොම ගාම්භීර බවකින් ජීවත් වුණු කෙනෙක්. ඔහු කවදාවත් ඔය විදිහට ජීවත් වෙන්න ඕනෑ කෙනෙක් ‍නෙවෙයි.  ඒ කාන්තාව කළේ කපටි කමක්. මට නම් හිතෙන්නේ මේක ඔහුට මොනවා හරි දීලා කරපු දෙයක් කියලයි.   
 
කවදා හරි පියාත් සමග සමගිවෙන්න අවස්ථාවක් ලැබුණොත් ඒ ගැන ඔබේ තීරණය මොන වගේ වේවිද? 
 
මට හිතෙනවා තාත්තා කවදා හරි ඇත්ත වටහා ගනීවි කියලා. තාත්තා කවදා හරි තනිවම ආවොත් විතරක් අපි ඔහුව බාර ගන්න ඉඩ තියෙනවා. ඒක ඒ අවස්ථාව අනුව තීරණය වේවි. 
 
කිෂාන්  කනංකෙ 
 
ඡායාරූප - ප්‍රියන්ත ගමගේ

අනුරාධපුරයට ආසන්න නිකැලැල් චරිතවත් යුවතියක සඳහා මනාලයෙකු සොයන බව මීට සති කිහිපයකට ඉහත ඉරිදා පුවත්පතක දැන්වීමක් පළ වී තිබිණි.

ආරක්ෂක අංශයකට සම්බන්ධ තරුණයෙකු මෙම දැන්වීම කියවා එම තරුණිය පසුව දුරකතනයෙන් සම්බන්ධ කරගත්තේය. තමන්ගේ දෙමාපියන් මිය ගොස් ඇති අතර අනුරාධපුරයේ පුංචි අම්මා කෙනෙකුගේ නිවසේ සිටින බවත් නුගේගොඩ ප්‍රදේශයේ පෞද්ගලික ආයතනයක රැකියාවක් කරන බවත් එම තරුණිය දුරකතනයෙන් ඔහුට දන්වා සිටියාය.

කෙසේ හෝ ‍නිට්ටඹුව ආසන්න ප්‍රදේශයේ පදිංචි මෙම තරුණයා දෙමාපියන්ට ද ඒ බව දන්වා පසුගිය සති අන්තයක දෙමාපියන් සහ තම මිතුරන් දෙදෙනෙකුද සමඟ වෑන් රථයකින් එම මනාලිය බැලීමට ගියේය. බැලූ බැල්මටම මධ්‍යම පන්තියට අයත් එම නිවසේ වටපිටාවේ සිටම මනාලයාගේත් දෙමාපියන්ගේත් සිත් ඇදී ගියේය. මනාලියද පැහැපත් සිත් ඇදගන්නා සිරුරකින් යුතු වූ අතර ඇගේ පුංචි අම්මා ඇය පිළිබඳව අසීමිත ලෙස වර්ණනා කළාය. එහෙත් එම පිරිස පැමිණීමත් සමඟ එම මනාලිය කිසියම් බියපත් ස්වභාවයකින් පසුවන බව මනාලයාට පෙණින. නමුත් ඔහුට ඒ සම්බන්ධ කිසිවක් සිතා ගත නොහැකි විය. වැඩිහිටියන් අතර ඇති වූ මූලික කතා බහෙන් පසු එම විවාහය සඳහා එදිනම මනාලයාගේ පාර්ශවයේ කැමැත් විණි. එහෙත් ආපසු එන ගමනේ දී මනාලයාගේ යහළුවෙක් මනාලයාගේ කණට කොඳුරා මෙවැන්නක් කීය.

"මචං උඹ මගේ පණ වගේ යාළුවෙක් හින්දයි මේ කතාව කියන්නේ; ඔය කෙල්ලව මම හොඳට දන්නවා. ඒත් හොඳ විදිහකට නෙමෙයි."

මිතුරා කියත්ම මනාලයා විස්මයෙන් ඇලලී ගියේය.

"උඹ කොහොමද ඒ කෙල්ලව දන්නේ? මචං මම මාසෙකට හමාරකට සැරයක් නාරාහේන්පිට පැත්තේ මසාජ් ක්ලීනික් එකකට යනවා. ඔය කෙල්ල වැඩ කරන්නේ ඒකෙ."

මිතුරා කියත්ම මනාලයාට දෙලෝ රත්විය.

"ඒකනම් කීයටවත් වෙන්ඩ බෑ; පොඩ්ඩක් හිටපං මං ඒකිගෙන් අහන්න."  හනික දුකතනයේ වූ අංකයක් අමතන අතරේ මනාලයා කීය.

එහෙත් ඒ‍ මොහොතේ ඇය ඊට පිළිතුරු නොදුන් අතර තවත් මඳ වේලාවකින් මනාලයාගේ දුරකතන අංකයට ඇගෙන් ඇමතුමක් ලැබිණ.

"ඔයාට මාව ගැලපෙන්නේ නැති බව දැන් ඔයාට තේරෙනවා ඇතිනේ. ඇය අසා සිටියාය."

"ඔව්; ඒත් ඇයි ඔයාලගෙ පුංචි අම්මා අරවගේ පහත් පෙලේ බොරුවක් කිව්වේ." මනාලයා කෝපයෙන් ඇසීය.

"අනේ එයාගේ කිසි වරදක් නෑ. මට එයාව කොහොම හරි ජීවත් කරන්න වෙන ක්‍රමයක් නැති හින්දයි මම ඔය වගේ රස්සාවක් තෝරගත්තේ. ඔයාට ගැලපෙන සුදුසු මනමාලියෙක් ලැබෙන්න කියලා මම ප්‍රාර්ථනා කරනවා."

එම යුවතියගේ හඬ නෑසී යන ලද්දේ සිහින් ඉකි බිඳුමක් ද සමගිනි.

ඒ.ජී.රේණුකා

 

 

 

 

 

 

 

 

IMAGE

බසයේදී දුන් බොරු විවාහ පොරොන්දුවෙන් පවුල්ජීවිතේ 'හබක්'

IMAGE 2018 Feb 23 12:25
ඔහු අගනුවර ප්‍රසිද්ධ සමාගමක විධායක නිලධාරියෙකි. වයස අවුරුදු 40 ඉක්මවූ ඔහුට රූමත් බිරිඳක් සහ...
Views - 3627

අහිමි පෙම ඉල්ලා පෙම්වතියට ප්‍රසිද්ධියේ ගුටි ඇනලා

IMAGE 2018 Feb 23 10:42
පැරණි පෙම්වතියගෙන් අහිමි වූ ආදරය නැවත ඉල්ලා එය නොලැබුණු විට නාරාහේන්පිට ප්‍රදේශයේදී ඇයට...
Views - 2409

සංසාර සිහිනයේ ගී සංකල්පනය මම 'ටැබ් එකේ ටයිප් කරපු' එකක්

IMAGE 2018 Feb 21 12:00
සනුක වික්‍රමසිංහ ගායනා කරන “සංසාර සිහිනේ” කලක පටන් බොහෝ ගීත දර්ශකවල පෙරමුණ ගෙන තිබෙන...
Views - 3562

මම නාට්‍ය කලාවෙ ඉන්නේ ඒ ගැන තියන 'උණ' නිසයි

IMAGE 2018 Feb 21 11:53
වේදිකාව, පුංචිතිරය සහ සිනමාව යන මාධ්‍ය ත්‍රිත්වයෙහිම සිය ප්‍රතිභාව ප්‍රකට කළ කලාකරුවකුවන...
Views - 2123

බිරිඳ රැකියාවක් නොකිරීම මගේ සාර්ථකවයට හේතුවක්

IMAGE 2018 Feb 20 14:38
“සිරස ජූනියර් සුපර් ස්ටාර්..” තරගය ගැන මුලින්ම අප ඔබගෙන් විමසන්න කැමතියි.. ඇත්තෙන්ම “සිරස...
Views - 7207

බිරිඳට පින් තකා සුනඛයන්ට දිනපතා සහල් කිලෝ 08ක දනක්

IMAGE 2018 Feb 20 14:23
මිනිසා තිරිසනුන් වන අවස්ථාත් තිරිසනා මිනිසුන් වන අවස්ථාත් අපට බොහෝ විට දක්නට ලැබුණද...
Views - 4433

Please publish modules in offcanvas position.