Coss Ear2
lakbima.lk
COSS Ear 1

තමන් කිසිදා  කසිප්පු පෙරීම නොකළ නමුත් මැතිවරණය අවසන් වන තුරු පමණක්  කාර්යාලය පිටුපස දින දෙක තුනකට වරක් කසිප්පු වඩියක් දමා ගැනීමට අවසරයක් දෙන්නේ නම් එය තම මැතිවරණ කටයුතුවලට මහත් රුකුලක් බව ගලෙන්බිඳුණුවැව ප්‍රදේශයේ නීතිවිරෝධී මත්පැන් වැටලීම සඳහා ගිය අවස්ථාවක ප්‍රධාන පෙළේ පක්ෂයක අපේක්ෂකයෙකු පොලිසියට පවසා තිබේ.

පළාත් පාලන මැතිවරණය වෙනුවෙන් පවත්වාගෙන යන නීත්‍යනුකූල මැතිවරණ අපේක්ෂක කාර්යාලයක් පිටුපස නීතිවිරෝධී මත්පැන් පෙරීමක් වන බවට ‍පොලීසියට ලැබුණු තොරතුරක් මත ‍පොලිසිය අදාළ කාර්යාලයට ගොස් පරීක්ෂා කර තිබේ.

එහි ගිය ‍පොලිස් නිලධාරීන් මැතිවරණයට තරග වදින අපේක්ෂකයා හමුවී ඔහුට එරෙහිව කසිප්පු පෙරන බවට පැමිණිල්ලක් තිබෙන බව පවසා ඇත.

එම අපේක්ෂකයා ඉහත සඳහන් ඉල්ලීම කොට ඇත්තේ එම අවස්ථාවේ දීය.

රැය පහන්වන තුරුම ආධාරකරුවන් තම පක්ෂ කාර්යාලයේ රැඳී සිටිමින් උදව්  උපකාර කරන්නේ මත්පැන් සංග්‍රහ පවත්වන්නේ නම් පමණක් බව එවිට එම අපේක්ෂකයා ‍පොලීසියට පවසා තිබේ. කසිප්පු වැටලීම් සඳහා ගිය අවස්ථා කිහිපයක දී  මීට පෙරද එවැනි ඉල්ලීම් ඉදිරිපත් වූ බව පැවැසූ නිලධාරීහු මේ දිනවල කසිප්පුවලට තිබෙන ඉහළ ඉල්ලුම නිසා ජාවාරම්කරුවන් කසිප්පු පෙරීම හා බෙදාහැරීම ජයටම සිදුකරන බවද කීහ.

ඊට අමතරව අපේක්ෂකයන් කුලී කරුවන් යොදවා කසිප්පු පෙරන අවස්ථා ඇති බවද ඔවුහු කීහ.

ආධාරකරුවන්ට පානය කිරීම සඳහා රජයේ මත්පැන් ලබාදීම සඳහා  අධික මිලක් වැය වන බැවින් විවිධ අපේක්ෂකයන් කුලීකරුවන් යොදාගෙන තම මැතිවරණ කාර්යාල ආසන්නයේ නීති විරෝධී මත්පැන් පෙරා ගැනීම සිදුකරන බවද ‍පොලිස් නිලධාරීහු පැවැසූහ.

එම පොලිස් නිලධාරීන් වැඩුදුරටත් පවසනුයේ පවතින තත්ත්වය යටතේ මෙබඳු කසිප්පු සංග්‍රහ නොපවත්වන්නේ නම් මෙවර මැතිවරණයෙන් දිනීමට අපහසු බැවින් ප්‍රධාන පක්ෂවල අපේෂකයන් අවශ්‍ය බඩුබාහිරාදිය සහ උපකරණ ලබා දී විවිධ පුද්ගලයන් ලව‍ා එසේ කසිප්පු පෙරීම සිදුකරන බවය.

එමෙන්ම මැතිවරණ දිනය තෙක් පමණක් ඒ සඳහා අවසර ලබා දුනහොත් මැතිවරණයෙන් බලයට පත් වූ පසු පොලිස් නිලධාරීන්ට ද හොඳින් සලකන බව ඔවුන් පැවසූ බව පොලිස් නිලධාරීහු කියති.

බුද්ධික මහේෂ් විජේසූරිය - අනුරාධපුර

 

 

 

පාසල ශුද්ධ පවිත්‍ර කිරීමේ ශ්‍රමදානයකට සහභාගී වූ මවකට අනුරාධපුර නගරයේ පාසලක තිබී අහඹු ලෙස සිදුවන ගැබ්ගැනීම් වැලැක්වීම සඳහා කාන්තාවන් විසින් භාවිතා කරනු ලබන ඖෂධ වර්ගයක ඇසුරුම්  විශාල ප‍්‍රමාණයක් ඊයේ (15)හමුවී තිබේ.
අනුරාධපුර නගරාසන්නයේ පිහිටි එම විද්‍යාලයේ නව වසරේ පාසල් වාරය ආරම්භ කිරීමට පෙර මීට දිනකිහිපයකට ඉහත දී පැවැති ශ‍්‍රමදාන කටයුත්තකදී පන්ති කාමරයකින් වීසිකරනු ලැබූ බවට සැකකරන කුඩා පාර්සලයක් ඇයට හමුවී ඇත.

ඇය එම පාර්සලය පිළිබඳව සැකසිතී පරීක්ෂාවට ලක්කරද්දී එය භාවිතා කළ ඖෂධ වර්ගයක ආරක්ෂිත ඇසුරුම් කවර බව හඳුනාගෙන තිබේ.

එම ඖෂධය හමු වූ මව එය අහඹු ගැබ් ගැනීම් වැලැක්වීම සඳහා යොදාගන්නා බව නොදැන  වෙනත් රෝගයකට හෝ සිසුන්ට මත් ගතිය ඇතිවීමට භාවිත කරන ඖෂධ යැයි සිතා ශ‍්‍රමදානයට සහභාගීව සිටි තවත් තරුණ මවකට පෙන්වා තිබේ.

 ඒ අවස්ථාවේ එම ඖෂධය අහඹු ගැබ් ගැනීම් වැළැක්වීම සඳහා අඹු සැමි ඇසුරකින් පසු එක්වරක් පමණක් භාවිතා කරන ඖෂධ වර්ගයක් බව එම මව  හඳුනාගෙන තිබේ. පසුව එම සිද්ධිය ශ‍්‍රමදානයට පැමිණි බොහෝ පිරිසකගේ කණවැකී ඇති අතර පාසලක් තුළට එවැනි ඖෂධයක් පැමිණියේ කුමන ආකාරයකින්ද යන්න පිළිබඳව  ශ‍්‍රමදානය සඳහා සහභාගි වූ දෙමාපියන් තුළ දැඩි සැකයක් මතුවී තිබේ.

ඊට හේතුව පාසලක් වැනි ස්ථානයක අඹුසැමි හැසිරීම් වල යෙදෙන්නේ කවුරුන්ද? එවැනි  හැසිරීම් වල යෙදීමෙන් පසු අහඹු ගැබ් ගැනීම් වැලැක්වීම සඳහා මේවා භාවිතා කරන්නේ කවුරුන්ද? යන්න පිළිබඳව කිසිවක් සිතාගත නොහැකි වීමය.

පසුව එම ඇසුරුම් කිහිපයක් තවත් අයෙකුට පෙන්වූ අවස්ථාවේ ඒවා හදිසි ගැබ් ගැනීම් වැලැක්වීම සඳහා අඹුසැමි ඇසුරකින් පසු කාන්තාවන්ට පානය කිරීම සඳහා මීට වසර කිහිපයකට පෙර වෙළෙඳ පොළට හඳුන්වා දුන් පෙති වර්ගයක් බව තහවුරු වී තිබේ.

එමෙන්ම රුපියල් දෙසීයකට ආසන්න මිලකින් යුත් පෙති දෙක බැගින් එම ඇසුරුම් වල බහා තිබූ බව තහවුරු කරගත හැකි වූ අතර ඇසුරුම් වල ඇති පෙති ෆාමසියකින් ඉවතලන ඒවා නොවන බවත් කිසියම් කාන්තාවක් විසින් පාවිච්චි කරන ලද ඒවා බවත් මනාව තහවුරු කරගත හැකිවිය.

ශ‍්‍රාමදාන අවස්ථාවේ හමු වූ කවරයේ භාවිත කළ  ඖෂධ පෙති හතළිහක් පමණ අඩංගුවූ කවර 20ක ප‍්‍රමාණයක් හමු වී ඇත.

 

අනුරාධපුර බුද්ධික - මහේෂ් විජේසූරිය

 

 

 

ප්‍රවේගය සිනමා පටයෙන් බොහෝ දෙනාගේ ආදරය දිනාගත් උදාරි පෙරේරාගේ තට්ට හිස සහිත ඡායාරූප පෙළක් මේ දිනවල අන්තර්ජාලයේ හුවමාරු වෙනවා. මේ ඡායාරූප පිටුපස ඇති සත්‍ය කතාව කියන්නයි උදාරි පෙරේරා මේ විදියට අද අපිත් එක්ක එකතු වෙන්නේ. 
 
ඔබ හිස මුඩුකරගත් ඡායාරූප පෙළක් මේ දවස්වල අන්තර්ජාලයේ සැරිසරනවා. ඇත්තටම ඔබේ ඔය ලස්සන කොණ්ඩය කපා දැමුවාද?
නැහැ, මම ඇත්තටම කොණ්ඩය කපා දැමුවේ නැහැ. පිළිකා රෝගීන් වෙනුවෙන් කරපු ව්‍යාපෘතියක් සඳහායි මම ඔය විදියට පෙනී සිටියේ. ඇත්තටම කොණ්ඩේ තිබුණත් නැතත්, බාහිර ස්වරූපය නිසා දුකින් ඉන්න අවශ්‍ය නැහැ කියලා තමයි අපිට කියන්න වුවමනා වුණේ. “ගියා-ගත්තා” විදියේ ෆොටෝ ෂූට් එකක් නෙමෙයි මේක. ගොඩක් මහන්සි වෙලා කරපු ෆොටෝ ෂූට් එකක්. 
 
මේ වගේ හොඳ වැඩකට ඔබේ පෙනුම වුණත් වෙනස් කරගන්න කොහොමද අදහසක් ආවේ? 
ඉස්සර ඉඳලාම මම පිළිකා රෝගීන් වෙනුවෙන් කරන ව්‍යාපෘති එක්ක එකතු වෙලා වැඩ කරනවා. මගේ මිතුරු මිතුරියන්ගේ සහෝදර සහෝදරියෝ,  ඔවුන්ගේ දෙමවුපියෝ පිළිකා රෝගයට ගොදුරු වෙලා තිබුණා. පිළිකාවක් කියන්නේ හෙම්බිරිස්සාවක් උණක් වගේ නෙමෙයි. මෙවැනි  තත්ත්වයකදී අපි කොහොමද ධනාත්මකව හිතෙන්නේ... සතුටින් ඉන්නේ කොහොමද කියන පණිවුඩය තමයි මා ඇතුළු කණ්ඩායමට සමාජයට දෙන්න ඕන වුණේ. ඒ සඳහා මම හරිම කැමැත්තෙන් ඡායාරූපවලට පෙනී සිටියා. 
 
කොණ්ඩේ ඇත්තටම තට්ටේ ගාපු වේෂ නිරූපණයක් ඔබට ලැබුණට පස්සේ කණ්ණාඩියෙන් එහෙම මුහුණ බැලුවද?
බැලුවා... බැලුවා... ඒ වෙලාවේ දුකක් නමෛයි හිතට ලොකු නිදහසක් දැනුණා. කොණ්ඩෙත් සමහර වෙලාවට අපිට කරදරයිනේ. තැනකට යන්න ගියාම කොහොමද කොණ්ඩය පීරන්නේ කියන එකනේ ගැහැනු ළමයින්ට තියෙන ලොකුම ප්‍රශ්නය. නිළියක් වුණොත් මේ ප්‍රශ්නය තවත් වැඩියි.  කොණ්ඩය නැතිව තට්ටේ විතරක් තියෙනවා කණ්ණාඩියෙන් දකින කොට මට නම් හිතට ආවේ ඔය වගේ හැඟීමක්. 
 
තට්ටේ එක්ක ඔබව දැක්කට පස්සේ කට්ටිය මොකද කිව්වේ?
හැමෝම ලස්සනයි කිව්වා. ඒ මදිවට වැළඳගෙන සුබ පැතුවා.
 
බොහෝ විට පිළිකා රෝගීන් කොණ්ඩේ යෑම නිසා ඉක්මනින් කම්පනයට පත්වෙනවා. ජනප්‍රිය රංගන ශිල්පිනියක් විදියට මේ වගේ ව්‍යාපෘතියක් හරහා ඔබ ඔවුන්ට ලබාදෙන පණිවුඩය කුමක්ද? 
රූපය කියන දේ සදාකාලික නැහැ. ඒක හැමෝටම ‍පොදු දෙයක්. රංගන ශිල්පිනියක් විදියට මටත් ඒ කාරණය ‍පොදුයි. පිළිකාව කියන්නේ අපිට එකපාරටම පාලනය කරන්න බැරි ලෙඩක් වුණත් දැන් ඒ සඳහා ප්‍රතිකාර තිබෙනවා. සමහරු ධනාත්මකව හිතලා තමන්ගේ  ශරීරය සහ මනස කොයිතරම් ලස්සනට තියාගන්නවාද කිව්වොත් පසුකාලීනව ප්‍රතිකාර එක්කම පිළිකාව ශරීරයෙන් ඉවත් වෙලා ගිහින් තියෙනවා. ඒ අයගේ ධනාත්මක චින්තනය නිසයි එහෙම වුණේ. පිළිකා රෝගීන්ට මුළු ලෝකය කඩාගෙන වැටුණා වගේ දැනෙන්න පුළුවන්. ඒත් මිනිස්සුන්ගේ හිත වගේම විශ්ව ශක්තියත් එකතු වුණාම ගොඩක් දේවල් කරන්න පුළුවන්. ඒ නිසා මම පිළිකා රෝගීන්ට ආදරෙන් කියනවා ලෙඩේ ගැනම හිතන්නේ නැතිව ධනාත්මකව හිතන්න. ඒ ධනාත්මක චින්තනයට පුළුවන් ඔබව සුවපත් කරන්න කියලා. අපේ හිත ශක්තිමත්ව තබා ගත්තොත් පිළිකාව වුණත් පරාද කරන්න පුළුවන් කියලා කියන්නයි මට වුවමනා වුණේ. ඒත් එක්කම එබඳු රෝගීන්ව දිරිගන්වන්නත් මට වුවමනා වුණා.
 
මේ ව්‍යාපෘතිය සඳහා එකතු වුණ කණ්ඩායම ගැන මතක් කළොත්? 
වේෂ නිරූපණ කටයුතුවලින් අපට සහය දුන්නේ ප්‍රියන්ත දිසානායක. කොණ්ඩ සැකසුම් කළේ හරූන් ෂයිඩීන්. එතකොට අපිට ඡායාරූපවලින් සහෝගය දුන්නේ සන්දේශ් බණ්ඩාර. අපේ සහෝදර හිතවතුන් කිහිපදෙනෙක් එක්ක එකතු වෙලා තමයි අපි මේ ව්‍යාපෘතිය දියත් කළේ. ඉදිරියටත් මෙවැනි ව්‍යාපෘති වෙනුවෙන් මගේ සහයෝගය නොමදව ලබා දෙන බව කියන්නම ඕනේ. 
 
සමන්මලී නැලිගම 
 
ඡායාරූප - සන්දේශ් බණ්ඩාර

වසර හැත්තෑ පහක කාලය තුළ අමුතුම ආකාරයේ ගෝල්ඩන් ග්ලෝබ් සම්මාන උළෙලක් පළමු වරට පසුගිය ඉරිදා රාත්‍රියේ (ඇමෙරිකාවේ වේලාවෙන් එය ඉරිදා රැය වුවද අපට එය සඳුදා පාන්දරය) දක්නට ලැබිණි. එදින එයට සහභාගි වූ සියලු කලාකරුවන් කලින් කතාකරගත් පරිදි කළු පැහැයෙන් සැරසී පැමිණ සිටියෝය. තවත් විශේෂත්වයක් වූයේ ගෝල්ඩන් ග්ලෝබ් හා ඔස්කාර් සම්මාන උළෙලවල මුල් පෙළෙහි අසුනක් කවදත් ලැබෙන සුපිරි චිත්‍රපට නිෂ්පාදක හාවී වෙයින් ස්ටේන් පෙනෙන්නට නොසිටීමය. මේ කළු පාට ඇඳුම් විරෝධය ඔහු නිසා ඇතිවීම ඊට හේතුවයි. හාවී තම චිත්‍රපටවල රඟපාන්නට එන නිළියන්ගෙන් ලිංගික අල්ලස් ඉල්ලන බවට නිළියක කළ හෙළිදරව්වකින් පසු ඔහු ගැන මෙන්ම මෙවැනි අකටයුතුකම්වල යෙදෙන තවත් නිෂ්පාදකවරුන් හා අධ්‍යක්ෂකවරුන් ගැන බොහෝ තොරතුරු හෙළිවන්නට විය. ඒ සමගම දැඩි විරෝධයක් රැකියා ස්ථාන තුළ කාන්තා හිංසනය සම්බන්ධයෙන් පැන නැගුණු අතර එය ඇමෙරිකාව පුරා කාන්තාවන් මෙන්ම පිරිමින්ද පෙළපාළි යන තත්ත්වයට හැරවිණි. හාවීගේ බිරිය ඔහු හැරගිය අතර වරද පිළිගෙන චිත්‍රපට නිෂ්පාදන කටයුතුවලින් ඉවත්ව පරීක්ෂණයකට මුහුණදෙන්නට හාවී වෙයින්ස්ටේන්ට සිදුව තිබේ.
තම වෘත්තිය තුළ කාන්තාවන්ට සිදුවන ලිංගික අතවරවලට විරෝධය පා මෙවර ගෝල්ඩන් ග්ලෝබ් සම්මාන උළෙලට ආ පිරිස කළු ඇඳුමින් සැරසුණේ ටයිම්ස් අප් යනුවෙන් සිදුකරන විරෝධතා ව්‍යාපාරය සංකේතවත් කරමිනි. සම්මාන ලබාගැනීමට වේදිකාවට ආ සියලු දෙනාම පාහේ ලිංගික අතවරවලට එරෙහිව ඉදිරියට ආ කාන්තාවන් අගය කරමින් කතා කළෝය.
මෙවර උළෙ‍ලේ තවත් විශේෂත්වයක් වූයේ සුප්‍රකට නිවේදිකාවක මෙන්ම නිළියකද වන ඔප්රා වින්ෆේ‍ර් තමාට පිරිනැමුණු කලාකරුවකුට එක්වරක් පමණක් පිරිනැමෙන සිසිල් බි. ඩිමෙල් සම්මානය බාරගනිමින් කළ කතාවය. මෙම සම්මානය ලැබූ පළමු කළු ජාතික නිළියද ඇයය. පසුගිය කාලයේ රටපුරා පැතිරුණු කටකතාවක් ගැන ඉඟිකරමින් ඇයව වේදිකාවට හඳුන්වාදෙන අතරේ සෙත් මෙයර්ස් පවසා සිටියේ ඇමෙරිකාවේ 2020 වසරේ පැවැත්වෙන ජනාධිපතිවරණයට අපේක්ෂිකාවක ලෙස ඇය ඉදිරිපත් වීමට ඉඩ ඇති බවය. තම කතාව කරමින් ඔප්රාද පවසා සිටියේ එය සනාථ වන ආකාරයේ කරුණුය.
දිගුකලක් ඔප්රා වින්ෆේ‍ර් ෂෝ නමින් තම රූපවාහිනී වැඩසටහන ගෙනගිය ඇය නිළියක මෙන්ම චිත්‍රපට නිෂ්පාදිකාවක ලෙසද කටයුතු කොට ඇති අතර මේ වනවිට රූපවාහිනී නාලිකා සේවයක හිමිකාරියකි. ගෝල්ඩන් ග්ලෝබ් සම්මාන උළෙ‍ලේදී ඇය කළ කතාව අසා සිටි බොහෝ දෙනෙකු එය ජනපති අපේක්ෂිකාවකගේ කතාවකට සමාන බව පිළිගෙන තිබිණි. 
ඔප්රා මෙහිදී සුදු ජාතිකයන් බහුල සමාජයක් තුළ කළු ජාතිකයන්ට තවමත් විඳින්නට සිදුවන ගැහැට ගැන කතා කරන්නට අමතක නොකළාය. ඇය ප්‍රධාන වශයෙන් සඳහන් කළේ 1944 වසරේදී සුදු ජාතික පිරිමින් හයදෙනෙකු වෙතින් සමූහ දූෂණයට ලක්වූ රෙසී ටේලර් නම් කාන්තාව ගැනය. ගෝල්ඩන් ග්ලෝබ් සම්මාන උළෙලට දින කිහිපයකට පෙර ඇය මියගියේ තම අනූඅටවැනි උපන් දිනයට දින දහයක් ඉතිරිව තිබියදීය. මෙම සිදුවීමෙහි විශේෂත්වය වූයේ ඇයව දූෂණය කළ පිරිමින් සුදු ජාතිකයන් වීම නිසා ඔවුන්ට අධිකරණයෙන් කිසිදු දඬුවමක් හිමිනොවීමය.වසර ගණනාවකට පසු රෝසා පාක්ස් ඇතුළු කළු ජාතික විමුක්ති සටන්කාමීන් ගෙනගිය අරගලයේ ප්‍රතිඵලයක් ලෙස ඇමෙරිකානු රජය රෙසීට සිදුවූයේ අසාධාරණයක් බව පිළිගෙන සමාව ඉල්ලා සිටියේය. 
කෙසේ වුවද ඔප්රා ජනපතිවරණයට පිවිසෙන බව අසා සිනාසෙමින් ජනපති ට්‍රම්ප් පවසා සිටියේ “ඒක නම් නියමයි. හොඳ විනෝදයක් ලබන්න පුළුවන්. මට පුළුවන් ‍ලේසියෙන්ම ඔප්රාව පරද්දන්න.” යනුවෙනි.
මෙවර සම්මාන උළෙ‍ලේ කැපීපෙනෙන චිත්‍රපටය වූ අතරම හොඳම චිත්‍රපටය ලෙසද සම්මාන ලැබුවේ ත්‍රී බිල්බෝඩ්ස් අවුට්සයිඩ් එබින්, මිසුරි චිත්‍රපටයයි. මාටින් මැක්ඩොනා අධ්‍යක්ෂණය කළ මෙම චිත්‍රපටය ඇතුළත් වන්නේ අඳුරු හාස්‍යය හෙවත් බ්ලැක් කමෙඩි නමින් හැඳින්වෙන චිත්‍රපට ගොන්නටය. හොඳම නිළිය ලෙස සම්මාන ලැබුවේද එහි රඟපෑ ෆ්රාන්සස් මැක්ඩොමන්ඩ්ය. තම දියණියගේ මිනීමරුවා නීතියේ රැහැනට හසුකරගැනීමට ප්‍රදේශයේ ‍පොලීසිය අසමත්  වූ විට ඒ බව නිවේදනය කරන හා මිනිමරුවා සොයාගැනීමට ජනතාව දැනුවත් කරන දැන්වීම් පුවරු තුනක් තමා ජීවත්වන මිසුරි ප්‍රාන්තයේ එබින් නගරයේ එල්ලා තැබූ කතාව මෙම චිත්‍රපටයට ඇතුළත් වේ. හොඳම සහය නළුවා ලෙස සම්මානය දිනාගත්තේද මෙම චිත්‍රපටයේ රඟපෑ සෑම් රොක්වෙල් වන අතර හොඳම තිර රචනය සඳහා සම්මානයද එයට හිමිවිය.
හොඳම සංගීතමය හෝ විකට චිත්‍රපටය ලෙස සම්මාන ලැබුවේ ‍ලේඩි බර්ඩ් චිත්‍රපටයයි. එහි රඟපෑ සැයොරස් රොනැන් සංගීතමය හෝ විකට චිත්‍රපටයක හොඳම නිළිය විය. ඩාකස්ට් අවර් චිත්‍රපටයේ රඟපෑ ගැරී ඕල්ඩ්මන් හොඳම නළුවා ලෙස සම්මානය දිනාගත් අතර සංගීතමය හෝ විකට චිත්‍රපටයක හොඳම නළුවා වූයේද ඩිසා ස්ටර් ආටිස්ට් චිත්‍රපටයේ රඟපෑ ජේම්ස් ෆ්රැන්කෝය. හොඳම සහය නිළිය ලෙස අයි ටොන්යා චිත්‍රපටයේ රඟපෑ ඇලිසන් ජෙනී සම්මාන දිනාගත් අතර ද ෂේප් ඔෆ් වෝටර් අධ්‍යක්ෂණය කළ ගුග්ලිඑල්මෝ ඩෙල් ටෝරෝ හොඳම අධ්‍යක්ෂ ලෙස සම්මාන ලැබුවේය. හොඳම සංගීතය සඳහා සම්මානය ලැබුවේද මෙම චිත්‍රපටයයි. ද ග්‍රේටස්ට් ෂෝමන් චිත්‍රපටයේ එන දිස් ඉස් මී හොඳම ගීතය වූ අතර විදෙස් බසකින් නිර්මාණය කළ හොඳම චිත්‍රපටය වූයේ ජර්මනිය ඉදිරිපත් කළ ඉන් ද ෆේ ඩ් චිත්‍රපටයයි. මෙයට අමතරව ටෙලි නාට්‍ය ක්ෂෙත්‍රයේ හොඳම නිර්මාණ සඳහාද මෙහිදී සම්මාන හිමිවිය. හොඳම ටෙලි නාට්‍ය මාලාව ලෙස සම්මානය දිනාගත්තේද හෑන්ඩ්මේඩ්ස් ටේල් ටෙලි නාට්‍ය මාලාවය.
 
නිශානි දිසානායක

සැමියා පහරදීම නිසා කාන්තාවන්ගෙන් සියයට විසිහයක් හිංසනයට ලක්ව ඇත්තේ ජංගම දුරකථනවලට එන කෙටි පණිවුඩ, මුහුණු ‍පොත සම්බන්ධ සිද්ධීන්, මගහැරුණු දුරකථන ඇමතුම් ආදී මාධ්‍ය භාවිතයෙන් වූ හේතු නිසා බැව් කරාපිටිය වෛද්‍ය පීඨයේ අධිකරණ වෛද්‍ය අංශයේ කථිකාචාර්ය විශේෂඥ අධිකරණ වෛද්‍ය නිලධාරී අජිත් රත්නවීර මහතා පවසයි.
සැමියාගේ පහරදීම නිසා හා නොයෙකුත් වදහිංසාවලට ලක්ව ගාල්ල කරාපිටිය ශික්ෂණ රෝහලට ඇතුළත් වූ කාන්තාවන් සම්බන්ධයෙන් කරනු ලැබූ පර්යේෂණයකදී මෙම කරුණු අනාවරණය වූ බවද විශේෂඥ අධිකරණ වෛද්‍ය නිලධාරිවරයා සඳහන් කළේය.
2013 ජනවාරි සිට 2017 ජූනි මසය දක්වා කාලය තුළ සැමියාගේ පහර කෑමට ලක්වූ කාන්තාවන් 183 දෙනකු සම්බන්ධ කරගෙන මෙකී පර්යේෂණය සිදුකොට තිබේ. විශේෂයෙන්ම හිංසනයට ලක්වූ කාන්තාවන්ගේ සමාජ හා ආර්ථිකමය පසුබිම, තුවාලවල තත්ත්වය සහ හිංසනට ලක්වීමට හේතු වූ කරුණු පිළිබඳ මෙම පර්යේෂණයේදී අනාවරණය කරගෙන තිබේ. අන්තර්ජාලය හා තාක්ෂණික මෙවලම් භාවිත කිරීම සම්බන්ධයෙන් ඇතිවන සිද්ධීන් නිසා කාන්තා හිංසනය වැඩිවී ඇති බවද අධිකරණ වෛද්‍යවරයා පවසයි.
මෙම පර්යේෂණයට ලක්වූ කාන්තාවන්ගෙන් සියයට පනස් එකකට පහර දී ඇත්තේ මුහුණට හා කම්මුල්වලට වන අතර ඉන් සියයට දහඅටකට පහර දී ඇත්තේ ඇඳ ‍පොලුවලින් හා කොසු මිටිවලින් බවද මෙම පර්යේෂණයේදී අනාවරණය වී තිබේ. 
මෙම පර්යේෂණය පිළිබඳ අදහස් දක්වමින් විශේෂඥ අධිකරණ වෛද්‍ය නිලධාරී අජිත් රත්නවීර මහතා මෙසේ පැවැසීය.
පහරකෑමට ලක්වූ කාන්තාවන්ගේ වයස් කාණ්ඩ දෙස බැලූ විට ඉන් සියයට 58 ක් හිටියේ වයස අවුරුදු 16 සිට 63 දක්වා කාන්තාවන්, පහර කෑමට ලක්වූ කාන්තාවන් 106 ක් හිටියේ වයස අවුරුදු 21 හා 30 අතර පසුවන කාන්තාවන්. මෙකී කාන්තාවන්ගෙන් සියයට හැටතුනක් 117 වතාවක් පහර කෑමට ලක්ව තිබුණා. හවස හය සහ රාත්‍රී 10 අතර කාලයේදී තමයි මෙම පහරදීම්වලින් බහුතරයක් ලක්වෙලා තිබුණේ. ඉන් සියයට 89 ක් වෙලා තිබුණේ ඒ අයගේ නිවස තුළයි. කායික වශයෙන් කරපු පීඩාවන් 183 වතාවක් වාර්තා වෙලා තිබුණා. මානසික වශයෙන් කරපු පීඩාවන් 130 වතාවක් වාර්තා වෙලා තිබුණා. බලහත්කාරයෙන් ලිංගික කටයුතුවල යෙදීම් 13 ක් වාර්තා වෙලා තිබුණා. විවිධාකාරයේ පාලනය කිරීම් 42 ක් වාර්තා වෙලා තිබුණා. වැඩි වශයෙන් පහර දීලා තිබුණේ මුහුණට හා කම්මුල්වලට. අතමිට මොළවා හා පාදවලින් කරන පහරදීම් සියයට 51 ක් වාර්තා වෙලා තිබුණා. අවි ආයුධ, මොට ආයුධවලින් සියයට 18 ක් එනම් ඇඳ ‍පොලුවලින් හා කොසු මිටිවලින් තමයි මෙම පහරදීම් වෙලා තිබුණේ. කැපෙන ආයුධයකින් පහර දීලා තිබුණේ සියයට හතරක් වගේ ඉතා අඩු සංඛ්‍යාවක්.
කාන්තා හිංසනයට ප්‍රධාන හේතුව සැමියන්ගේ බිමත්කම. සියයට 29 ක් අවස්ථාවල සැමියා බිගෙනවිත් තමයි පහරදීම් කරලා තිබුණේ. සියයට 23 ක් මුදල් සම්බන්ධ ගැටලු මුදල් නැතිවූ විට ඇතිවූ ආරවුල්, සියයට 31 ක් අනියම් සම්බන්ධතා නිසා ඇතිවූ සැකය නිසා කාන්තාවන් පහර දීම්වලට ලක්ව තිබුණා. බිරිඳගේ හා සැමියා යන දෙදෙනාගේම ඇතිවූ සැකයන් මේ සඳහා හේතුවෙලා තිබුණා. ඉන් සියයට 26 ක් ජංගම දුරකථනවලට එන කෙටි පණිවුඩ, මුහුණු ‍පොත සම්බන්ධ සිද්ධීන්, මගහැරුණු දුරකථන ඇමතුම්, මාධ්‍ය භාවිතයෙන් වූ හේතු නිසා තමයි පහර දීම්වලට ලක්වෙලා තිබුණේ. ඇත්තටම මේකත් සැකය කියන එක එහාට ගියපු අවස්ථාවක්. ජංගම දුරකථනයට එන ඇමතුම්, මුහුණු ‍පොතේ තිබූ ඡායාරූප, සම්බන්ධ සැක සිතූ අවස්ථාවන් නිසා කාන්තාවන් සැමියාගෙන් පහර කෑමට ලක්ව තිබුණා. නවීන තාක්ෂණික මෙවලම් මේ සඳහා බලපාලා තියෙනවා. සරල කාරණා තේරුම් ගැනීමට නොහැකිව, සුළු සුළු මත ගැටුම් දුරදිග යාම නිසා සියයට 19 ක් වූ කාන්තාවන් පහර දීමට ලක්වෙලා තියෙනවා.
කාන්තාවන් සියයට 44 ක්ම කීවා මීට කලින් එක් වතාවක් හෝ තුන් වතාවක් තමන් පහර දීම්වලට ලක්වී ඇති බව. කාන්තාවන් සියයට 24 ක් පළමු වතාවට තමයි පහර දීම්වලට ලක්ව තිබුණේ. තුවාලවල තත්ත්වය දිහා බැලූ විට සියයට 47 දෙනකුගේ මුහුණට හා හිසට තමයි පහර දීලා තිබුණේ. සියයට 42 ක විතර කාන්තාවන්ගේ පාදවල තුවාල තිබුණා. සියයට 22 ක විතර කාන්තාවන්ගේ අත්වල තුවාල තිබුණා. ලිංගික අවයවවලට පහරදීලා තිබුණේ සියයට 2 ක විතරයි. තැලීම් තුවාල තමයි වැඩිපුර තිබුණේ. තැලීම් තුවාල සියයට 47 ක් තිබුණා. සීරීම් තුවාල සියයට 36 කගේ තිබුණා. දාරිත තුවාල. සියයට 7 ක් අස්ථිභංග සියයට තුනක් පිළිස්සුම් තුවාල සියයට එකක්. කැපුම් තුවාල සියයට දෙකයි. තුවාලවල බරපතළ තත්ත්වය දිහා බැලූ විට සියයට 85 ක්ම තිබුණේ බරපතළ නොවන තුවාල. බරපතළ තුවාල සියයට දහතුනක් තිබුණා. ජීවිතයට හානි පමුණුවන තුවාල තිබුණේ එක් අයකුගේ හා දෙදෙනකුගේ විතරයි.
බොහෝ විට පහර දුන් සැමියාම තමයි ඇය රෝහලට රැගෙන එන්නේ. ඇතැම් කාන්තාවන් තුවාලවලට පුද්ගලික වෛද්‍යවරයකු හමුවෙලා බෙහෙත් ගන්නවා. කාන්තාවකට සැමියා විසින් පහර දුන් විට ආපසු ටික කාලයක් හොඳට ඉන්නවා. මාස දෙක තුනක් යනකම් සැමියා පහර දෙන්නේ නැහැ. මේ බව කාන්තාවද දන්නවා. මේකට කියන්නේ හනිමුන් කාලසීමාව කියලා. නමුත් ඊට පසු කරන පහරදීම ඉතා දරුණුයි. අවසානයේ මහත් විනාශයක් වෙන්නත් පුළුවන්. 
 
කමල් විජේහේවා - ගාල්ල

නිකවැරටියට ආසන්න පිටිසරබද ගම්මානයක භූතයකු අරක්ගත් සියඹලා ගසක් පිළිබඳව මීට වසර කිහිපයකට පෙර මට අසන්නට ලැබිණ. පාළු වැව් පිටියකට මායිම් වී ඇති එම සියඹලා ගස අද්දරින් යන විට එම භූතයා හඬනු සමහරුන්ට ඇසෙන බවද මට දැකගත හැකි විය. විශේෂයෙන් එම භූත හඬ ඇසෙනුයේ හැන්දෑවේ හිරු බැස යන යාමයේ හෝ හිරු එළිය නොමැතිව හාත්පසින් අඳුරින් වැසී ගිය අවස්ථාවල බව ද මට අසන්නට ලැබිණ.
අමනුෂ්‍ය හඬවල් වශයෙන් ජන සම්මතයෙහි එන නොයෙකුත් ශබ්ද තිබේ. දහහත්වන සියවසේ එළිමහන් සිරකරුවකු ලෙස වසර විස්සකට ආසන්න කාලයක් මෙරට විසූ ඉංග්‍රීසි ජාතික රොබට් නොක්ස් ද තමන්ට හඳුනාගත නොහැකි යක් හඬක් මෙරට දී ඇසුණු බව තම කෘතියේ දක්වා තිබේ. එබැවින් එම සියඹාලා ගසින් නැගෙන භූත හඬ ඇසීමට මගේ සිත තුළ ද පැන නැඟුණේ අතිමහත් උනන්දුවක් සහ ආශාවකි. එහෙත්, මා එම සියඹලා ගස යටට ගොස් පැයක් හමාරක් නොව වරුවක් තබා දවසක් බලා සිටියද මගේ අවශ්‍යතාව සලකා එම භුතයා හඬ නොනඟනු ඇත. එහෙත් භූතයා එසේ හඬ නොනැඟූ පමණින් එම භූත කතාව පිළිබඳ විමර්ශනය මුළුමනින් ව්‍යවර්ථ වන්නේ ද නැත. එබැවින් පසුගිය දිනයෙක ඒ සඳහා නිකවැරටියට ගිය මම මා වෙත එම තොරතුරු ලබා දුන් ගුරුභවතා ද කැටුව එම භූත හඬ නැඟෙන ඉසව්ව වෙත පියමං කළෙමි. 
වර්තමානයේ වැඩිපුර එනමින් හැඳින්නොවුණද නිකවැරටිය අයත් වන්නේ දෙවිදේවතා ඇදහීම් ඇතුළු ගුප්ත විශ්වාසවලින් පිරී ඉතිරී ගිය වන්නි හත්පත්තුවය. අතහැර දමන ලද හේන් මණ්ඩියක් දෙසට වැටී ගත් අඩි දහයක් පමණ පළලැති එම මාර්ගය ට්‍රැක්ටරයකට මිස සෙසු වාහනයකට යා නොහැකි ලෙස වල්බිහිවී තිබිණ. එම භූත නිවස්නය වූ සියඹලා ගස පිහිටියේ එම දිරා ගිය මාර්ගයට මායිම් වු දිරා ගිය කටු කම්බි වැටකට අඩි හතඅටක් ඔබ්බෙන්. කලක් තිස්සේ හේන් වගා කොට අතහැර දැමීම නිසා ළඳු කැළෑ සහ කටු පඳුරු සහිත ද්විතීයික උප ලැහැබ්  සහිත එම පරිසරයේ එම සියඹලාවට ඔබ්බෙන්. තරමක පැරණි නිවසක් විය. එම භූත සියඹලා ගසේ සිට එම නිවස අතර දුර අඩි විස්සකට වඩා නොවිණ.
එබැවින් එම සියඹලා ගසේ භූත හඬ පිළිබඳව වැඩිපුර තොරතුරු දැන ගැනීම පිණිස මම මඟ පෙන්වන්නා ද සමග එම නිවසට පිවිසියෙමි. අප යනවිට එහි සිටියේ වයස අවුරුදු පනහක පමණ කාන්තාවක සහ වයස අවුරුදු අසූවක පමණ කාන්තාවක පමණි. ඒ එම නිවසේ මව සහ දියණිය වූ අතර එම දියණියගේ සැමියා මීට වසර පහළොවකට පමණ පෙර හඳුනා නොගත් වකුගඩු රෝගයට ලක්ව මිය ගොස් තිබිණ, ඔවුන්ට දරුවන් ද නොමැති බව දැන ගත හැකි විය.
ඒක හරිම මූසල සද්දයක් මහත්තයෝ හරියට බකමූණෙක් අඬනවා වගේ, ඔය සද්දේ මේ පැත්තේ හුඟ දෙනෙක් දැන් අහලා තියනවා. ඒ හින්දා කළුවර වැටුණට පස්සේ කවුරුවත් ඔතනින් යන්නේ වත් නැහැ, ඒත් ඉතින් අපි මේක දාලා කොහේ යන්නද..?,  ඔහේ වැටිලා ඉන්නවා. එම වැඩිහිටි කාන්තාව මා හා කීවාය. එවිට ඇය අතර මා පවතින එම කතාබහ ඇගේ දියණියගේ තියුණු නිරීක්ෂණයට ලක් වූ අතර ඒ සම්බන්ධයෙන් මගේ අදහස් දැන ගැනීමට ඇය තුළ වූ උනන්දුව ඇගේ සංතීක්ෂණ බැල්මෙන් මට මනාව වැටහිණ.
හොඳයි, මම අද රෑට ඇවිත් පැය කීපයක් ඔය ගහ යට හිටියොත් මටත් ඔය භූත සද්දේ අහන්න පුළුවන් වෙයිද..? අනතුරුව මම එම දියණියගෙන් ඇසීමි.
ඔව් ඉතින් එහෙම ඉඳලා බලන්න, මේ පැත්තේ අනික් හැමෝටම ඇහෙන සද්දේ මහත්තයට විතරක් නොඇහී තියෙන්න විදිහක් නෑනේ එම දියණිය කීවාය. එහෙත් ඇගේ ස්වරයෙහි කිසියම් උපහාසාත්මක හෝ අවලාදාත්මක ස්වභාවයක් ඇතැයි මට සිතිණ.
ඔය විදිහට සද්ද නඟන භූතයා ඉස්සර මේ ගේ දොර ඉඩකඩම්වලට උරුමකම් කියපු මියගිය කෙනෙක් වෙන්න බැරිද..? ඉන් අනතුරුව මම ඇසීමි.
මොකද වෙන්න බැරි පුළුවන් එම දියණිය ගත්කටටම කීවාය.
ඉන්පසුව එම භූත කතාව පසෙක තිබියදී මම ඒ මවගෙන් දියණියගේත් පවුල් පසුබිම පිළිබඳව විස්තර විමසා සිටියෙමි. එවිට එම දියණිය කියා සිටියේ තම සැමියාගේ මරණයෙන් පසු ඔහු විසින් ගොවිතැන් කරන ලද හේන් කුඹුරු පාළු වී තමන් සහ මව ආර්ථික වශයෙන් අතිශය අසරණ තත්ත්වයට පත්ව ඇති බවය.
ඒ වගේ අසරණ වුණු පවුල්වල ආරක්ෂාවට ආරක්ෂක භූතයෝ ඒ ගෙවල්වල ලැඟුම් ගන්නවා කියලා විශ්වාසයක් තියනවා නේද..? මේ සියඹලා ගහෙත් ඉන්නවා ඇත්තේ ඒ වගේ භුතයෙක් වෙන්න බැරිද...? මම එම මවගෙන් සහ දියණියගෙන් ඇසීමි.
ඒක නම් ඇත්ත මහත්තයෝ, ඔය සියඹලා ගහෙන් ඇහෙන භුත සද්දෙ හින්දා මොනවා නැති වුණත් අපිට ආරක්ෂාව නම් තියෙනවා එම වැඩිහිටි කාන්තාව කීවාය.
හැබැයි ඔය දෙන්නට ඕනෑ නම් තොවිල් පවිල් ශාන්ති කර්ම නොකරන පුංචි උපක්‍රමයකින් එය භූතයව ගෙන්නලා ඔය මූසල සද්දේ නැත්තටම නැතිකරවලා දමන්නත් මට පුළුවන්. මා ඔවුන්ට එසේ කියන්නට එම දියණිය එක්වරම ඊට විරුද්ධත්වය පළ කළාය.
ඔය භූත සද්දෙන් අපිට කිසිම ප්‍රශ්නයක් නැත්නම් මහත්තයට මොකක්ද තියන ප්‍රශ්නේ..? ඇය එක්වරමම මවෙතින් අසා සිටියාය. ඒ අනුව ඔවුන්ගේ නොමනාපය මත එම ගවේෂණය තව දුරටත් ඉදිරියට ගෙන යාම සදාචාරාත්මක නැතැයි මට සිතිණ. ඒත් ඉතින් එය භුත සද්දෙන් ගමේ මිනිස්සු බය වෙනවා නම් ඒකත් තරමක ප්‍රශ්නයක් නේද? ඒකයි මම කිව්වේ. මා කීයේ මගේ අදහස සිතින් අතහැර ගන්නා අතරේය.
ගමේ මිනිස්සු බය වෙන්නේ මේ පැත්තට ආවොත් විතරනේ, මොකද මේ භුතයා ඒ කාගෙවත් ගෙවල්වලට ගිහින් බය කරන්නේ නැහැනේ. කාන්තාව ගත් කටටම කීවාය.
ඉර බැස යන විට නැතහොත් අඳුරු කාලගුණයක් සහිත අවස්ථාවන්හි එම වන ලැහැබ් සහිත පරිසරයෙන් යන එන්නවුන් හට එම සියඹලා ගසෙන් නැගෙන භූත හඬට පදනම වන හේතුව, නිමිත්ත පැහැදිලිය. එහෙත් එම හඬ නැගෙනුයේ සැබැවින්ම එම සියඹලා ගසේ අතු අතරින් ද නැතහොත් ඒ අද්දර දිවිගෙවන කාන්තාවකගේ මුවින්ද යන්න මෙවන් ගවේෂණයක දී ඉතා විමසිල්ලෙන් සොයා බැලිය යුතුය. ඊට හේතුව තම ජීවිතය සම්බන්ධ දැඩි ගැටුම්කාරී තත්ත්වයන්ට මුහුණ දෙන සමහරුන් මෙලෙස තමන් ද නොදැනුවත්වම තම පෞරුෂයෙන් අත්මිදී වෙනත් පෞරුෂයන් ආරෝපණය කර ගනිමින් අන්‍යයන් හමුවේ පෙනී සිටන බැවිනි. එය විඝමතය නම් මානසික තත්ත්වය යටතේ සිදුවන්නකි. ඒ අනුව මෙම මව සහ දියණිය විසින් මුලින් ප්‍රසිද්ධ කරවන ලද සියඹලා ගසෙන් නැගෙන භුත හඬ මුල්කොට හට ගත් කුතුහලය, බිය සැක ආදී සංකීර්ණ හැඟීම් සිත දරා එම ස්ථාය පසු කරන්නවුන් හට එම සියඹලා ගසින් එවන් භුත හඬක් ඇසීම අතිශය ස්වභාවිකය. එහෙත්, සැබවින්ම ඒ හඬ නැගෙනුයේ එසේ විඝටනයට පත් කාන්තාවගේ මුවින් වුව එම සියඹලා ගස කෙරෙහි පමණක් දැඩිව සංවේදීවන්නවුන් හට එය එම ගසින් නැගෙන ගුප්ත නාදයක් සේ වැටහීමේ කිසිදු අරුමයක් නැත.
 
තිලක් සේනාසිංහ

IMAGE

සංසාර සිහිනයේ ගී සංකල්පනය මම 'ටැබ් එකේ ටයිප් කරපු' එකක්

IMAGE 2018 Feb 21 12:00
සනුක වික්‍රමසිංහ ගායනා කරන “සංසාර සිහිනේ” කලක පටන් බොහෝ ගීත දර්ශකවල පෙරමුණ ගෙන තිබෙන...
Views - 737

මම නාට්‍ය කලාවෙ ඉන්නේ ඒ ගැන තියන 'උණ' නිසයි

IMAGE 2018 Feb 21 11:53
වේදිකාව, පුංචිතිරය සහ සිනමාව යන මාධ්‍ය ත්‍රිත්වයෙහිම සිය ප්‍රතිභාව ප්‍රකට කළ කලාකරුවකුවන...
Views - 354

බිරිඳ රැකියාවක් නොකිරීම මගේ සාර්ථකවයට හේතුවක්

IMAGE 2018 Feb 20 14:38
“සිරස ජූනියර් සුපර් ස්ටාර්..” තරගය ගැන මුලින්ම අප ඔබගෙන් විමසන්න කැමතියි.. ඇත්තෙන්ම “සිරස...
Views - 3453

බිරිඳට පින් තකා සුනඛයන්ට දිනපතා සහල් කිලෝ 08ක දනක්

IMAGE 2018 Feb 20 14:23
මිනිසා තිරිසනුන් වන අවස්ථාත් තිරිසනා මිනිසුන් වන අවස්ථාත් අපට බොහෝ විට දක්නට ලැබුණද...
Views - 1955

ලංකාවේ අන්තිම රජු සැඟවූ නිධානය කෝ?

IMAGE 2018 Feb 19 11:34
මහනුවර රජ කළ රාජාධිරාජසිංහ රජුට බිසෝවරුන් කිහිප දෙනෙක්ම සිටියහ. ඔවුන් අතර අලමේලු අම්මා,...
Views - 3947

රඟපෑමෙන් සමුගත් හේතුව නදීකා කියයි

IMAGE 2018 Feb 19 10:41
“චංචල රේඛා” චිත්‍රපටයේ “දං චූටි” නාඳුනන කෙනෙක් එදා සිනමා ලෝලීන් අතර හිටියේ නැහැ....
Views - 5039

Please publish modules in offcanvas position.